35. பரிக்கா²ரனித்³தே³ஸவண்ணனா

259-60. ச²த்தே அந்தோ ப³ஹி ச பஞ்சவண்ணேஹி ஸுத்தேஹி ஸிப்³பி³துஞ்ச பண்ணே கி³ரிகூடஅட்³ட⁴சந்தா³தி³ம் சி²ந்தி³துஞ்ச ந வட்டதீதி ஸம்ப³ந்தோ⁴. ச²த்தேதி தாலபண்ணே ச²த்தே. கி³ரிகூடம் நாம மகரத³ந்தகம், ஆதி³-ஸத்³தே³ன தாதி³ஸம் அஞ்ஞம் விகாரரூபம் ஸங்க³ஹிதம். க⁴டகந்தி கே³ஹத்த²ம்பே⁴ஸு விய கயிரமானம் க⁴டகம். த³ண்டே³தி ச²த்தத³ண்டே³. லேகா²தி தஹிம் தஹிம் தி³ன்னா லேகா². ஸாதி³ஸந்தி தீ³கே⁴ன நித்³தி³ட்ட²ம். பு³ந்த³ம்ஹி மூலே.

261. தி²ரத்த²ம் ச²த்தே ஏகவண்ணேன ஸிப்³பி³தும் வா பஞ்ஜரம் வினந்தி⁴தும் வா வட்டதீதி ஸம்ப³ந்தோ⁴. ஸிப்³பி³துந்தி அந்தோ ப³ஹி ச ஸிப்³பி³தும். ஏகவண்ணேனாதி நீலாதி³னா ஏகவண்ணேன. பஞ்ஜரந்தி ச²த்தத³ண்ட³கா³ஹகஸலாகபஞ்ஜரம். தி²ரத்த²ந்தி இமினா ந வண்ணமட்ட²த்தா²யாதி த³ஸ்ஸேதி. ப³ந்தி⁴தும் த³ண்டே³ லேகா² வட்டதீதி ஸம்ப³ந்தோ⁴. ப³ந்தி⁴துந்தி வாதப்பஹாரேன அசலனத்த²ம் ச²த்தமண்ட³லிகம் ரஜ்ஜுகேஹி க³ஹேத்வா ப³ந்த⁴னத்தா²ய. லேகா²வாதி வலயமிவ உக்கிரித்வா கதா லேகா² ஏவ. வட்டதீதி யதி³பி ந ப³ந்த⁴தி, ரஜ்ஜுகேஹி ப³ந்தி⁴தும் யுத்தட்டா²னத்தா வட்டதி.

262. சீவரே அந்தே வாபி பட்டமுகே² வாபி வேணிபி வா ஸங்க²லிகாபி வா அஞ்ஞம் ஸூசிவிகாரம் வா பாளிகண்ணிகஆதி³கம் கப்பபி³ந்து³விகாரம்பி வா ந ச கப்பதீதி ஸம்ப³ந்தோ⁴. அந்தேதி சீவரபரியந்தே, அனுவாதேதி வுத்தம் ஹோதி. பட்டமுகே²தி பட்டகோடியம், த்³வின்னம் பட்டானம் ஸங்க⁴டிதட்டா²னம் ஸந்தா⁴யேதம் வுத்தம். வேணீதி வரகஸீஸாகாரேன ஸிப்³ப³னம். ஸங்க²லிகாதி பி³ளாலப³ந்த⁴னாகாரேன ஸிப்³ப³னம். அஞ்ஞம் ஸூசிவிகாரம் வாதி சீவரமண்ட³னத்தா²ய கயிரமானம் அஞ்ஞம் யம் கிஞ்சி ஸூசிகம்மவிகாரம் வா. டீகாயம் பன ‘‘ஸதபதி³ஸதி³ஸம் அஞ்ஞம் வா ஸூசிவிகாரம் ந கப்பதீ’’தி ஸாமஞ்ஞேன வுத்தம். ‘‘சீவரமண்ட³னத்தா²ய நானாஸுத்தகேஹி ஸதபதி³ஸதி³ஸம் ஸிப்³ப³ந்தா ஆக³ந்துகபட்டம் ட²பேந்தி, அஞ்ஞம்பி யம் கிஞ்சி ஸூசிகம்மவிகாரம் கரோந்தி, ஸப்³ப³ம் ந வட்டதீ’’தி அட்ட²கதா²யம் வுத்தத்தா பன நானாவண்ணேஹி வா ஹோது, ஏகவண்ணேன வா ஹோது, சீவரமண்ட³னத்தா²ய ஸம்ஸிப்³ப³ந்தானம் ஸூசிகம்மவிகாரம் ஸந்தா⁴ய வுத்தந்தி சீவரேஸு பா²லிதட்டா²னஸ்ஸ தி²ரபா⁴வத்த²ம் ஸதபதி³ஸதி³ஸம்பி ஸிப்³பி³தும் வட்டதீதி அம்ஹாகம் க²ந்தி. பாளி-ஸத்³தே³ன, கண்ணிக-ஸத்³தே³ன ச கப்ப-ஸத்³த³லோபேன வா உபசாரேன வா பாளிகப்பாத³யோவ க³ஹிதா. பாளி ச கண்ணிகா ச பாளிகண்ணிகாயோ, தா ஆதி³ யஸ்ஸ அஞ்ஞஸ்ஸ தாதி³ஸஸ்ஸாதி விக்³க³ஹோ. தத்த² நீலாவளிஆதி³ஸண்டா²னாய பி³ந்து³பந்தியா யதா² ஸோப⁴தி, ததா² கயிரமானோ பாளிகப்போ. ததே²வ பி³ந்து³ஸமூஹே கத்த²சி த³ஸ்ஸேத்வா கயிரமானோ கண்ணிககப்போ.

263. க³ண்டி²பாஸகபட்டாதி க³ண்டி²னோ ச பாஸகஸ்ஸ ச பதிட்டா²னட்டா²னே ட²பேதப்³பா³ பட்டா. வட்டதீதி ஏத்த² ‘‘க³ண்டி²பாஸகா’’தி கத்வா ‘‘சதுகோணாவ வட்டந்தீ’’தி அத்த²தோ வசனம் விபல்லாஸேத்வா யோஜேதப்³ப³ம். அக்³கி⁴யந்தி சேதியஸண்டா²னேன ஸிப்³ப³னம். மூலே ச அக்³கே³ ச ஏகஸதி³ஸம் கத்வா முக்³க³ராகாரேன ஸிப்³ப³னம் முக்³க³ரோ. விகாரந்தி விகாரோ, லிங்க³விபல்லாஸேன வுத்தம். ஏத்தா²தி க³ண்டி²பாஸகபட்டேஸு.

264. கோணஸுத்தாதி நபும்ஸகனித்³தே³ஸோ, க³ண்டி²பாஸகபட்டானம் கோணேஹி நீஹடஸுத்தகோடியோ. பீளகாதி தானியேவ நிவத்தேத்வா பீளகாகாரேன கதானி. து³விஞ்ஞேய்யாவாதி தேஸம் அந்தேஸு ஏகவாரம் க³ண்டி²கரணேன வா புன நிவத்தேத்வா ஸிப்³ப³னேன வா து³விஞ்ஞேய்யா ஏவ. க³ந்த⁴ம் தேலம் வாதி க³ந்த⁴ம் வா தேலம் வா. கஞ்சிகபிட்ட²க²லிகஆதீ³னிபி வட்டந்தி.

265. மணினாதி மஸாரக³ல்லாதி³பாஸாணேன. ந ச க⁴ட்டேய்யாதி நேவ க⁴ட்டேய்ய. அஞ்ஞேன வாதி முக்³க³ரமுஸலாதி³னா. அம்ஸப³த்³த⁴ககாயப³ந்த⁴னானி பன ததா² காதும் வட்டதி. தோ³ணியம் கத்வா ந ச க⁴ம்ஸேய்யாதி பக்கரஜனாகிரணதோ³ணியம் ட²பேத்வா பூ⁴மியம் ஜண்ணுகானி நிஹந்த்வா இதோ சிதோ ச ஆவிஜ்ஜி²த்வா நேவ க⁴ம்ஸேய்யாதி அத்தோ².

266-7. கண்ணகோணகஸுத்தானீதி சீவரரஜனகாலே லக்³க³னத்தா²ய அனுவாதே சதூஸு கோணேஸு ச பாஸகம் கத்வா ப³ந்தி⁴தானி ஸுத்தானி, யானி ‘‘அனுஜானாமி, பி⁴க்க²வே, கண்ணஸுத்தக’’ந்தி (மஹாவ. 344) ஏவம் அனுஞ்ஞாதானி. கண்ணஸங்கா²தா கோணா கண்ணகோணகா, தேஸு ஸுத்தானி. க³ண்டி²கபாஸகபட்டேஸு பன கண்ணகோணகஸுத்தானம் து³விஞ்ஞேய்யானமேவ கப்பியதா ஹேட்டா² வுத்தாதி சீவரே ரத்தேயேவ தேஸம் சி²ந்தி³தப்³ப³தா நத்தி², கண்ணகோணகஸுத்தானம் சி²ந்தி³தப்³ப³தாய வுத்தத்தா அனுவாதேஹி நிக்க²மிதஸுத்தானிபி சி²ந்தி³தப்³பா³னீதி வேதி³தப்³ப³ம். த⁴ம்மகரணே ச²த்தவட்டியம் லேக²ம் ட²பேத்வா லேகா² ந வட்டதீதி யோஜனா. ச²த்தவட்டியந்தி ச²த்தஸ்ஸ முக²வட்டியம். லேகா²தி உபரி வா ஹேட்டா² வா குச்சி²யம் வா அஞ்ஞா லேகா². குஞ்சிகாய ச பிப்ப²லே ச மணிகா ச பீளகா ச ந வட்டந்தீதி ஸம்ப³ந்தோ⁴. மணிகாதி ஏகா வட்டமணி. பீளகாதி ஸாஸபமத்திகா முத்தராஜிஸதி³ஸா ப³ஹுவட்டலேகா². த³ண்ட³ம்ஹீதி பிப்ப²லத³ண்ட³கே.

268-9. அரணியம் மாலாதி³ ச பத்தமண்ட³லே பி⁴த்திகம்மஞ்ச ந வட்டதீதி ஸம்ப³ந்தி⁴தப்³ப³ம். அரணியந்தி உத்தராரணி அத⁴ராரணி அரணித⁴னுகஞ்ச ஸாமஞ்ஞேன க³ஹிதம். பத்தமண்ட³லேதி திபுஸீஸாதி³மயே பத்தமண்ட³லே. ஏத்த² பன மகரத³ண்ட³கம் வட்டதி. ஹேட்டா²தி கத்தரயட்டி²யா ஹேட்டா². உத்³த⁴ந்தி தஸ்ஸாயேவ உபரி.

270-3. ஸம்முஞ்ஜனிம்ஹீதி ஸம்முஞ்ஜனியா லிங்க³விபல்லாஸோ. அவாரிதந்தி இத்தி²ரூபம் பன வாரிதம். ஸோவண்ணமயம்பீதி ஸுவண்ணமயம்பி. விஸாணனாளி நாம விஸாணமயா நாளி. ஏத்த² பன அவுத்தானிபி யானி கானிசி ஆரகண்ட³கத³ந்தகட்ட²சே²த³னபானீயக⁴டபானீயஉளுங்கசுண்ணபா⁴ஜனாதீ³னி வுத்தானம் அனுலோமானீதி வேதி³தப்³பா³னி. யோ பனேத்த² வினயஞ்ஞூ தாதி³ஸம் பரிக்கா²ரம் தி³ஸ்வா சி²ந்தே³ய்ய வா சி²ந்தா³பேய்ய வா, அனுபவஜ்ஜோ ஸோதி வேதி³தப்³ப³ந்தி.

பரிக்கா²ரனித்³தே³ஸவண்ணனா நிட்டி²தா.