32. நிஸ்ஸயனித்³தே³ஸவண்ணனா

230. ப்³யத்தஸ்ஸாதி ‘‘காரிய’’ந்தி கிதகயோகே³ கத்தரி ச²ட்டீ². ப்³யத்தோ ச நாம ‘‘பஞ்சஹி, பி⁴க்க²வே, அங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³ம், ஆபத்திம் ஜானாதி, அனாபத்திம் ஜானாதி, லஹுகம் ஆபத்திம் ஜானாதி, க³ருகம் ஆபத்திம் ஜானாதி, உப⁴யானி கோ² பனஸ்ஸ பாதிமோக்கா²னி வித்தா²ரேன ஸ்வாக³தானி ஹோந்தி ஸுவிப⁴த்தானி ஸுப்பவத்தீனி ஸுவினிச்சி²தானி ஸுத்தஸோ அனுப்³யஞ்ஜனஸோ. இமேஹி கோ², பி⁴க்க²வே, பஞ்சஹி அங்கே³ஹி ஸமன்னாக³தேன பி⁴க்கு²னா அனிஸ்ஸிதேன வத்த²ப்³ப³’’ந்தி (மஹாவ. 103) ஏவம் வுத்தப்³யத்தோ ச ப³ஹுஸ்ஸுதப்³யத்தோ ச வேதி³தப்³போ³.

தத்த² ஸுவிப⁴த்தானீதி ஸுட்டு² விப⁴த்தானி பத³பச்சாப⁴ட்ட²ஸங்கரதோ³ஸவிரஹிதானி. ஸுப்பவத்தீனீதி பகு³ணானி வாசுக்³க³தானி. ஸுவினிச்சி²தானி ஸுத்தஸோதி க²ந்த⁴கபரிவாரதோ ஆஹரிதப்³ப³ஸுத்தவஸேன ஸுட்டு² வினிச்சி²தானி. அனுப்³யஞ்ஜனஸோதி அக்க²ரபத³பாரிபூரியா ஸுவினிச்சி²தானி அக்க²ண்டா³னி அவிபரீதக்க²ரானி. ஏதேன அட்ட²கதா² தீ³பிதா. அட்ட²கதா²தோ ஹி ஏஸ வினிச்ச²யோ ஹோதீதி. ப³ஹுஸ்ஸுதப்³யத்தோ பன யேன ஸப்³ப³ந்திமேன பரிச்சே²தே³ன த்³வே மாதிகா பகு³ணா வாசுக்³க³தா, பக்க²தி³வஸேஸு த⁴ம்மஸவனத்தா²ய ஸுத்தந்ததோ சத்தாரோ பா⁴ணவாரா, ஸம்பத்தானம் பரிஸானம் பரிகத²னத்தா²ய அந்த⁴கவிந்த³மஹாராஹுலோவாத³அம்ப³ட்ட²ஸதி³ஸோ ஏகோ கதா²மக்³கோ³, ஸங்க⁴ப⁴த்தமங்க³லாமங்க³லேஸு அனுமோத³னத்தா²ய திஸ்ஸோ அனுமோத³னா, உபோஸத²ப்பவாரணாதி³ஜானனத்த²ம் கம்மாகம்மவினிச்ச²யோ, ஸமணத⁴ம்மகரணத்த²ம் ஸமாதி⁴வஸேன விபஸ்ஸனாவஸேன வா அரஹத்தமக்³க³பரியோஸானமேகம் கம்மட்டா²னம் ஏத்தகம் உக்³க³ஹிதம், ஸ்வாயம் வுச்சதி. நத்தி² நிஸ்ஸாய காரியந்தி ஆசரியாதி³ம் நிஸ்ஸாய வாஸேன கத்தப்³ப³ம் நத்தி². ‘‘நிஸ்ஸயகாரிய’’ந்தி வா பாடோ², நிஸ்ஸயேன காரியந்தி ஸமாஸோ. ஜீவஸ்ஸ யத்தகோ பரிச்சே²தோ³ யாவஜீவம்.

231. தேன நிஸ்ஸாய வஸந்தேன ஏவம் நிஸ்ஸயோ க³ஹேதப்³போ³தி த³ஸ்ஸேதும் ‘‘ஏகம்ஸ’’ந்திஆதி³ வுத்தம். ஏகம்ஸந்தி ஏகோ அம்ஸோ அஸ்ஸ சீவரஸ்ஸாதி விக்³க³ஹோ. கிரியாவிஸேஸனம் வா பு⁴ம்மத்தே² வா உபயோக³வசனம், ஏகஸ்மிம் அம்ஸேதி அத்தோ². அஞ்ஜலி கரபுடோ. யாவததியகம் வதே³தி உபஸம்பதா³ய ஸட்டி²வஸ்ஸேன ஸத்ததிவஸ்ஸேன வாபி ப்³யத்தஸ்ஸ நவகஸ்ஸ ஸந்திகே யாவததியகம் வசனம் கரேய்ய. யாவததியோ வாரோ அஸ்ஸாதி கிரியாவிஸேஸனஸமாஸோ. ஆயஸ்மதோதி ஆயஸ்மந்தம். வச்சா²மீதி வஸாமி. உபஜ்ஜ²ம் க³ண்ஹந்தேனாபி ‘‘உபஜ்ஜா²யோ மே, ப⁴ந்தே, ஹோஹீ’’தி க³ஹேதப்³ப³ம். தம் பன ‘‘ஆசரியோ’’தி ஏத்த² ‘‘உபஜ்ஜா²யோ’’தி வசனம் விஸேஸோதி ஏத்த² வாசாபே⁴த³தோ ந விஸும் வுத்தம். ந கேவலமேத்த² நிஸ்ஸயுபஜ்ஜா²யக³ஹணே, கா³மப்பவேஸனாதீ³ஸுபி ஏவமேவ கத்வா ‘‘அஹம் ஆவுஸோ’’தி வா ‘‘ப⁴ந்தே’’தி வா வத்வா ‘‘கா³மப்பவேஸனம் ஆபுச்சா²மீ’’திஆதி³னா வத்தப்³ப³ம்.

232. நிஸ்ஸயபடிப்பஸ்ஸத்³தி⁴ம் த³ஸ்ஸேதி ‘‘பக்கந்தே’’திஆதி³னா. பக்கந்தேதி உபஜ்ஜா²யே ஆசரியே ஸத்³தி⁴விஹாரிகே அந்தேவாஸிகே ச கா³மாதீ³ஸு யத்த² கத்த²சி ஆபுச்சி²த்வா வா அனாபுச்சி²த்வா வா க³தே. தேஸு யேன கேனசி ‘‘அஸுகம் நாம கா³மம் க³ச்சா²மீ’’தி வுத்தே தேஸுயேவ யேன கேனசி ‘‘ஸாதூ⁴’’தி ஸம்படிச்சி²தேபி தம் தம் நியமம் அதிக்கமித்வா பக்கந்தேபி அனாபுச்சா² பன உபசாரஸீமாதிக்கமேன பக்கந்தேபி நிஸ்ஸயோ ஸம்மதி படிப்பஸ்ஸம்ப⁴தி. பக்க²ஸங்கந்தேதி தித்தி²யபக்க²ஸங்கந்தே சாபி விப்³ப⁴ந்தே சாபி மரணேன ச தங்க²ணஞ்ஞேவ படிப்பஸ்ஸம்ப⁴தி. ஆணத்தி நாம ‘‘பணாமேமி த’’ந்தி வா ‘‘மா இத⁴ பவிஸா’’திஆதி³கா நிஸ்ஸயப்பணாமனா. தாய பணாமிதேன ஆசரியுபஜ்ஜா²யா க²மாபேதப்³பா³. அக²மந்தேஸு த³ண்ட³கம்மம் கத்வா தஸ்மிம் விஹாரே மஹாதே²ரே க³ஹேத்வாபி ஸாமந்தவிஹாரே பி⁴க்கூ² க³ஹேத்வாபி க²மாபேதப்³பா³. ந க²மந்தி சே, ஆசரியுபஜ்ஜா²யானம் ஸபா⁴கா³னம் ஸந்திகே வஸிதப்³ப³ம். யேன கேனசி காரணேன ந ஸக்கா ஹோதி தத்ர ஆசரியுபஜ்ஜா²யானம் ஸபா⁴கா³னம் ஸந்திகே வஸிதும், தம்யேவ விஹாரம் ஆக³ந்த்வா அஞ்ஞஸ்ஸ ஸந்திகே நிஸ்ஸயம் க³ஹேத்வா வஸிதப்³ப³ம். தத்த² ‘‘பஞ்சஹி, பி⁴க்க²வே, அங்கே³ஹி ஸமன்னாக³தம் ஸத்³தி⁴விஹாரிகம் அப்பணாமேந்தோ உபஜ்ஜா²யோ ஸாதிஸாரோ ஹோதி, பணாமேந்தோ அனதிஸாரோ ஹோதி. உபஜ்ஜா²யம்ஹி நாதி⁴மத்தம் பேமம் ஹோதி, நாதி⁴மத்தோ பஸாதோ³ ஹோதி, நாதி⁴மத்தா ஹிரீ ஹோதி, நாதி⁴மத்தோ கா³ரவோ ஹோதி, நாதி⁴மத்தா பா⁴வனா ஹோதி. இமேஹி கோ², பி⁴க்க²வே, பஞ்சஹங்கே³ஹி…பே… ஹோதி (மஹாவ. 68). பஞ்சஹி, பி⁴க்க²வே, அங்கே³ஹி ஸமன்னாக³தம் அந்தேவாஸிகம் அப்பணாமேந்தோ ஆசரியோ…பே… ஹோதீ’’தி (மஹாவ. 81) வுத்தத்தா பன அஸம்மாவத்தந்தே அந்தேவாஸிகஸத்³தி⁴விஹாரிகே அப்பணாமேந்தா ஆசரியுபஜ்ஜா²யா து³க்கடம் ஆபஜ்ஜந்தீதி வேதி³தப்³ப³ம். பா⁴வனாதி மேத்தாபா⁴வனா. உபஜ்ஜா²யஸமோதா⁴னம் பன தஸ்ஸ த³ஸ்ஸனஸவனவஸேன வேதி³தப்³ப³ம்.

233. அலஜ்ஜிந்தி –

‘‘ஸஞ்சிச்ச ஆபத்திம் ஆபஜ்ஜதி;

ஆபத்திம் பரிகூ³ஹதி;

அக³திக³மனஞ்ச க³ச்ச²தி;

ஏதி³ஸோ வுச்சதி அலஜ்ஜிபுக்³க³லோ’’தி. (பரி. 359) –

ஏவம் வுத்தலக்க²ணம் அலஜ்ஜிம். நிஸ்ஸயம் தே³ந்தேனாபி லஜ்ஜினோயேவ தா³தப்³ப³ம். ‘‘ந பி⁴க்க²வே அலஜ்ஜீனம் நிஸ்ஸயோ தா³தப்³போ³. யோ த³தே³ய்ய, ஆபத்தி து³க்கடஸ்ஸா’’தி (மஹாவ. 120) ஹி வுத்தம். அதி³ட்ட²புப்³ப³ஸ்ஸ கதிபாஹம் ஆசாரம் உபபரிக்கி²த்வா தா³தப்³ப³ம். அபுப்³ப³ந்தி ஏத்த² ஸம்ப³ந்தி⁴ஸத்³த³த்தா புப்³ப³-ஸத்³தே³ன புப்³ப³வாஸோ க³ஹிதோ, நத்தி² புப்³போ³ அஸ்ஸாதி அபுப்³ப³ம், நவந்தி வுத்தம் ஹோதி. சத்தாரி பஞ்ச வா பரிமாணமேதேஸந்தி விக்³க³ஹோ. ஏத்த² பன பரிமாண-ஸத்³த³ஸன்னிதா⁴னேன ஸங்க்²யேய்யவாசினோபிதே ஸங்க்²யாமத்தவாசினோ ஹோந்தீதி சதுபஞ்சஸங்க்²யாபரிமாணமேவ ஸங்க்²யேய்யமாஹ, தஸ்மா விக்³க³ஹபத³த்தே²ஹி பி⁴ன்னோ அஞ்ஞபத³த்தோ² ஸம்ப⁴வதீதி ஸமாஸோ. வா-ஸத்³த³ஸ்ஸ யோ விகப்பத்தோ², தத்த² சாயம் ஸமாஸோ, சத்தாரி வா பஞ்ச வா, சதுபஞ்ச அஹானி, தேஸம் அஹானம் ஸமாஹாரோ சதுபஞ்சாஹம். பி⁴க்கு²ஸபா⁴க³தந்தி ஸமானோ பா⁴கோ³ லஜ்ஜிதாஸங்கா²தோ கோட்டா²ஸோ யேஸம், பி⁴க்கூ²ஹி ஸபா⁴கா³, தேஸம் பா⁴வோ பி⁴க்கு²ஸபா⁴க³தா, தம், பேஸலபா⁴வந்தி அத்தோ². ‘‘தே²ரோ லஜ்ஜீ’’தி ஜானந்தேன பன பகதியா நிஸ்ஸயதா³னட்டா²னம் க³தேன ச தத³ஹேவ க³ஹேதப்³போ³, ஏகதி³வஸம்பி பரிஹாரோ நத்தி². ஸசே ‘‘ஓகாஸே அலப⁴ந்தே பச்சூஸஸமயே க³ஹேஸ்ஸாமீ’’தி ஸயதி, அருணம் உக்³க³தம்பி ந ஜானாதி, அனாபத்தி. லத்³த⁴பரிஹாரேனாபி வஸிதும் வட்டதீதி.

234. ‘‘லப்³ப⁴தீ’’தி கம்மனி நிப்ப²ன்னத்தா அவுத்தகத்தாதி ‘‘அத்³தி⁴கஸ்ஸா’’திஆதீ³ஸு கத்தரி ஸாமிவசனம், ‘‘அத்³தி⁴கேனா’’ திஆதி³ வுத்தம் ஹோதி. ‘‘ஸல்லக்கே²ந்தேனா’’தி பன ஸரூபேனேவ நித்³தி³ட்ட²ம். வஸிதுந்தி வுத்தகம்மம். பா⁴வே ஹி தும்-பச்சயோ, வாஸோதி அத்தோ². யாசிதஸ்ஸாதி ‘‘கி³லானுபட்டா²கஸ்ஸ சா’’தி ஏத்த² விஸேஸனம். ஸசே பன ‘‘யாசாஹி ம’’ந்தி வுச்சமானோபி கி³லானோ மானேன ந யாசதி, க³ந்தப்³ப³ம். அரஞ்ஞே வா ஸல்லக்கே²ந்தேன பா²ஸுகந்தி யத்த² வஸந்தஸ்ஸ படிலத்³த⁴தருணஸமத²விபஸ்ஸனாவிஸேஸபா⁴கி³தாவஸேன பா²ஸு ஹோதி, தஸ்மிம் அரஞ்ஞே தாதி³ஸம் பா²ஸுவிஹாரம் ஸல்லக்கே²ந்தேன ஆரஞ்ஞகேன. தா³யகே அஸந்தேதி பத³ச்சே²தோ³. தாவாதி அவதி⁴ம்ஹி, அத்³தி⁴காதீ³ஹி யாவ நிஸ்ஸயதா³யகோ லப்³ப⁴தி, தாவ, ஆரஞ்ஞகேன பன ‘‘படிரூபே நிஸ்ஸயதா³யகே ஸதி நிஸ்ஸாய வஸிஸ்ஸாமீ’’தி ஆபோ⁴க³ம் கத்வா யாவ ஆஸாள்ஹிபுண்ணமா, தாவாதி அத்தோ². ‘‘ஸசே பன ஆஸாள்ஹிமாஸே ஆசரியோ நாக³ச்ச²தி, யத்த² நிஸ்ஸயோ லப்³ப⁴தி, தத்த² க³ந்தப்³ப³ம் (மஹாவ. அட்ட². 121). அந்தோவஸ்ஸே பன நிப³த்³த⁴வாஸம் வஸிதப்³ப³ம், நிஸ்ஸயோ ச க³ஹேதப்³போ³’’தி (மஹாவ. அட்ட². 121) ஹி அட்ட²கதா²யம் வுத்தம்.

அம்ஹாகம் பன கேசி அந்தேவாஸிகத்தே²ரா ‘‘ந பி⁴க்க²வே வஸ்ஸம் ந உபக³ந்தப்³ப³ம். யோ ந உபக³ச்சே²ய்ய, ஆபத்தி து³க்கடஸ்ஸா’தி (மஹாவ. 186) ச ‘ந பி⁴க்க²வே தத³ஹு வஸ்ஸூபனாயிகாய வஸ்ஸம் அனுபக³ந்துகாமேன ஸஞ்சிச்ச ஆவாஸோ அதிக்கமிதப்³போ³. யோ அதிக்கமேய்ய, ஆபத்தி து³க்கடஸ்ஸா’தி (மஹாவ. 186) பாளிவசனதோ கேனசி காரணேன நிஸ்ஸயம் அலப⁴மானேனபி ந ஸக்கா அந்தோவஸ்ஸே வஸ்ஸம் அனுபக³ந்தும். ‘அந்தோவஸ்ஸே பனா’திஆதீ³ஸு பன ச-ஸத்³தோ³ அன்வாசயத்தோ², தஸ்மா தேனாபி வஸ்ஸம் உபக³ந்தப்³ப³மேவா’’தி வதி³ம்ஸு.

மயம் பனேத்த² ஏவமவோசும்ஹ ‘‘ப⁴க³வதா அனுபக³மனே து³க்கடம் அனந்தராயிகஸ்ஸேவ வுத்தம், தேனேவ ‘கேனசி அந்தராயேன புரிமிகம் அனுபக³தேன பச்சி²மிகா உபக³ந்தப்³பா³’தி அட்ட²கதா²யம் (மஹாவ. அட்ட². 185) வுத்தம். அந்தராயோ ச நாம அந்தரா வேமஜ்ஜே² ஏதீதி அந்தராயோ, யோ கோசி பா³த⁴கப்பச்சயதாய அதி⁴ப்பேதோ வுச்சதி ‘ந லப⁴ந்தி பதிரூபம் உபட்டா²கம், ஏஸேவ அந்தராயோதி பக்கமிதப்³ப³’ந்திஆதீ³ஸு (மஹாவ. 201) விய, தஸ்மா பா³த⁴கப்பச்சயதா அதி⁴ப்பேதா. நிஸ்ஸயாலாபோ⁴பி அந்தராயோத்வேவ விஞ்ஞாயதி. ஸக்கா ஹி வத்தும் ‘அந்தராயோ வஸ்ஸூபக³மோ ஸன்னிஸ்ஸயத்தா தருணஸமத²விபஸ்ஸனாலாபீ⁴னம் கதோகாஸோ வியா’தி. தருணஸமத²விபஸ்ஸனாலாபீ⁴னம்பி ஹி கதோகாஸேபி ‘ஸசே பன ஆஸாள்ஹிமாஸே ஆசரியோ நாக³ச்ச²தி, யத்த² நிஸ்ஸயோ லப்³ப⁴தி, தத்த² க³ந்தப்³ப³’ந்தி த³ள்ஹம் கத்வா அட்ட²கதா²யம் (மஹாவ. அட்ட². 121) வுத்தம். அம்ஹாகம் க³ரூஹி ச ஸாரத்த²தீ³பனியம் (ஸாரத்த². டீ. மஹாவக்³க³ 3.121) ‘ஆசரியம் ஆக³மேந்தஸ்ஸேவ சே வஸ்ஸூபனாயிகதி³வஸோ ஹோதி, ஹோது, க³ந்தப்³ப³ம் தத்த², யத்த² நிஸ்ஸயதா³யகம் லப⁴தீ’தி வஸ்ஸூபனாயிகதி³வஸேபி நிஸ்ஸயத்தா²ய க³மனமேவ வுத்தம். அத² ச பன மஹாகாருணிகோபி ப⁴க³வா ‘அனுஜானாமி, பி⁴க்க²வே, கி³லானுபட்டா²கேன பி⁴க்கு²னா நிஸ்ஸயம் அலப⁴மானேன யாசியமானேன அனிஸ்ஸிதகேன வத்து²’ந்தி (மஹாவ. 121) கி³லானவிஸயேபி நிஸ்ஸயம் க³ருகம் கத்வா பட்ட²பேஸி. யம் பன அனிஸ்ஸயம், தம் அனந்தராயம் நிஸ்ஸயமுத்தகஸ்ஸ வஸ்ஸூபக³மனம் விய. அபிச நாவாய க³ச்ச²ந்தஸ்ஸ பன வஸ்ஸானே ஆக³தேபி நிஸ்ஸயம் அலப⁴ந்தஸ்ஸ அனாபத்தீதி நாவாய க³ச்ச²தோயேவ ஆவேணிகா அனாபத்திகதா வுத்தா. தஸ்மா நிஸ்ஸயாலாபோ⁴ பா³த⁴கப்பச்சயோ வஸ்ஸூபக³மனஸ்ஸ, ந வஸ்ஸூபக³மனம் நிஸ்ஸயஸ்ஸாதி அந்தராயோயேவ நிஸ்ஸயாலாபோ⁴. ததோயேவ டீகாயம் ‘அந்தோவஸ்ஸே பன அனிஸ்ஸிதேன வத்து²ம் ந வட்டதீ’தி வுத்தம். தஸ்மாயேவ ச ‘அந்தோவஸ்ஸே பனா’திஆதீ³ஸு நிஸ்ஸயதா³யகே ஸதி நிப³த்³த⁴வாஸம் வஸிதப்³ப³ஞ்ச நிஸ்ஸயோ க³ஹேதப்³போ³ ச ஹோதீதி க³மனகிரியாய கீ²யமானதாவஸேன ச-ஸத்³தோ³ ஸமுச்சயோ க³ஹேதப்³போ³’’தி.

நிஸ்ஸயனித்³தே³ஸவண்ணனா நிட்டி²தா.