3. சீவரனித்³தே³ஸவண்ணனா

30. ‘‘கோ²மஞ்ச கோஸேய்யஞ்சா’’திஆதி³னா நபும்ஸகவிக்³க³ஹேன த்³வந்தே³ கதே கோ²ம…பே… ப⁴ங்கா³னி. தத்த² கோ²மந்தி க³ச்ச²ஜாதி. உபசாரதோ பன கோ²மேன கோ²மஸுத்தேன வாயிதந்தி தத்³தி⁴தேன உபசாரேன வா கோ²மம் கோ²மபடசீவரம், ததா² அவஸேஸானி. ஸாணம் ஸாணவாகஸுத்தேஹி வாயிதம் சீவரம். ப⁴ங்க³ம் கோ²மஸுத்தாதீ³னி ஸப்³பா³னி ஏகச்சானி வா வோமிஸ்ஸேத்வா வாயிதசீவரம். வாகமயமேவ வாதி கேசி. கம்ப³லந்தி மனுஸ்ஸலோமம் வாளலோமஞ்ச ட²பேத்வா ஸேஸலோமேஹி வாயிதம். ஏதானீதி கோ²மாதீ³னி யதா²வுத்தானி. ஸஹ அனுலோமேஹீதி ஸானுலோமானி. ஜாதிதோ கப்பியானி ச² சீவரானி ப⁴வந்தி.

31. இதா³னி ‘‘து³கூல’’ந்திஆதி³னா தேஸம் அனுலோமானி த³ஸ்ஸேதி. தத்த² து³கூலந்தி து³கூலஸங்கா²தேன கேனசி வாகவிஸேஸேன வாயிதம் சீவரம். சேவாதி ஸமுச்சயே, ஸோ உபரி ஆகட்³டி⁴தப்³போ³. பட்டுண்ணந்தி பட்டுண்ணேஸு ஜாதம் பட்டுண்ணம். தே³ஸவாசினோ ப³ஹுவசனந்தாதி ப³ஹுவசனேன விக்³க³ஹோ. ததா² ஸோமாரா ச சீனா ச, தேஸு ஜாதம் ஸோமாரசீனஜம். இமானி தீணி பாணகேஹி கதஸுத்தமயானி. ஏஹிபி⁴க்கூ²னம் புஞ்ஞித்³தி⁴யா ஜாதம் இத்³தி⁴ஜம், தம் பன கோ²மாதீ³னம் அஞ்ஞதரம். தே³வதி³ன்னந்தி தே³வேஹி தி³ன்னம் கப்பருக்கே² நிப்³ப³த்தம் சீவரம். ததே³தம் து³கூலாதி³ தஸ்ஸ தஸ்ஸ யதா²வுத்தஸ்ஸ கோ²மாதி³னோ அனுலோமிகம் ஹோதி. தத்த² லோமானி அனுக³தம் அனுலோமம், யதா² ஸேஸலோமானி அனுக³தம் லோமம் தத³னுகூலத்தா ‘‘அனுலோம’’ந்தி வுச்சதி, ததா² தம்ஜாதியகம் யேஸம் கேஸஞ்சி அனுகூலம் ஸப்³ப³ம்பி ருள்ஹீவஸேன ‘‘அனுலோம’’ந்தி வுச்சதி. தமேவ அனுலோமிகம், அனுகூலந்தி அத்தோ². கத²ம்? து³கூலம் ஸாணஸ்ஸ அனுலோமம், பட்டுண்ணாதீ³னி தீணி கோஸேய்யஸ்ஸ அனுலோமானி, இத்³தி⁴ஜம் தே³வதி³ன்னஞ்ச கோ²மாதீ³னமனுலோமந்தி.

32-3. ஏவம் ஸானுலோமானி சீவரானி த³ஸ்ஸேத்வா இதா³னி அதி⁴ட்டா²னாதி³கம் த³ஸ்ஸேதும் ‘‘திசீவர’’ந்திஆதி³மாஹ. தத்த² அவுத்தேபி அவஸ்ஸம் வத்தப்³ப³தாய ஸப்³ப³த்த² ச-ஸத்³தோ³ அஜ்ஜா²ஹரிதப்³போ³, திசீவரஞ்ச…பே… கண்டு³ச்சா²தி³ஞ்ச அதி⁴ட்டே²ய்ய ந விகப்பேய்யாதி ஸம்ப³ந்தோ⁴. தத்த² திண்ணம் சீவரானம் ஸமாஹாரோ திசீவரம். பரிக்கா²ரஞ்ச தம் சோளஞ்சாதி பரிக்கா²ரசோளம். வஸ்ஸஸ்ஸ யோக்³கா³ வஸ்ஸிகா, ஸாவ ஸாடிகா வஸ்ஸிகஸாடிகா. புஞ்ச²தி அனேனாதி புஞ்ச²னம், முக²ஸ்ஸ புஞ்ச²னம் முக²புஞ்ச²னம். நிஸீத³ந்தி ஏத்தா²தி நிஸீத³னம், முக²புஞ்ச²னஞ்ச நிஸீத³னஞ்ச முக²புஞ்ச²னனிஸீத³னம். ஸயனஸுகா²தி³ம் படிச்ச அத்த²ரீயதீதி பச்சத்த²ரணம், ததே³வ பச்சத்த²ரணகம். கண்டு³ம் சா²தே³தீதி கண்டு³ச்சா²தி³. அதி⁴ட்ட²ஹேதி ‘‘இமம் ஸங்கா⁴டிம் அதி⁴ட்டா²மீ’’திஆதி³னா நவன்னம் நாமம் க³ஹேத்வா அதி⁴ட்டே²ய்ய. ந விகப்பேய்யாதி தஸ்ஸ தஸ்ஸ நாமம் க³ஹேத்வா ந விகப்பேய்ய, தஸ்ஸ தஸ்ஸ பன நாமம் அக்³க³ஹேத்வா ‘‘இமம் சீவரம் துய்ஹம் விகப்பேமீ’’தி விகப்பேய்யாதி அதி⁴ப்பாயோ. ஏத்தா²தி இமேஸு நவஸு சீவரேஸு. திசீவரந்தி திசீவரனாமேன அதி⁴ட்டி²தம். ததா² ஹி அதி⁴ட்டா²னதோ புப்³பே³ விஸும் திசீவரம் நாம நத்தி² ஸங்கா⁴டிஆதி³ப்பஹோனகஸ்ஸ பச்சத்த²ரணாதி³வஸேனாபி அதி⁴ட்டா²தும் அனுஞ்ஞாதத்தா. தம் வினா ஏகாஹம் ஏகதி³வஸம்பி. ந வஸேய்யாதி அலத்³த⁴ஸம்முதிகோ பி⁴க்கு² அவிப்பவாஸஸீமதோ அஞ்ஞத்த² வாஸம் ந கரேய்யாதி அத்தோ². ஏவம் ஸதி திசீவரஞ்ச நிஸ்ஸஜ்ஜிதப்³ப³ம் ஹோதி, பாசித்தியஞ்ச ஆபத்திம் ஆபஜ்ஜதீதி தீ³பேதி. நிஸீத³னம் வினா சாதுமாஸம் ந வஸேய்யாதி ஸம்ப³ந்தோ⁴. சதுன்னம் மாஸானம் ஸமாஹாரோ சதுமாஸம், தமேவ சாதுமாஸம். தம் அச்சந்தஸம்யோக³வஸேன.

34. இதா³னி ‘‘இம’’ந்திஆதி³னா ‘‘அதி⁴ட்டே²ய்யா’’தி வுத்தமதி⁴ட்டா²னம் த³ஸ்ஸேதி. ஸங்கா⁴டிம் ‘‘இமம் ஸங்கா⁴டிம் அதி⁴ட்டா²மீ’’தி அதி⁴ட்ட²ஹேதி ஸம்ப³ந்தோ⁴. தத்த² அதி⁴ட்ட²ஹேதி ஹத்த²பாஸே டி²தம் ஏவம் அதி⁴ட்டே²ய்ய. அஹத்த²பாஸந்தி ஹத்த²ஸ்ஸ பாஸோ ஸமீபோ ஹத்த²பாஸோ, அட்³ட⁴தேய்யஹத்த²ப்³ப⁴ந்தரோ. த்³வாத³ஸஹத்த²ப்³ப⁴ந்தரோதிபி வத³ந்தி. நத்தி² ஹத்த²பாஸோ ஏதிஸ்ஸாதி அஹத்த²பாஸா, தம் ஏதந்தி அதி⁴ட்ட²ஹேதி ஸம்ப³ந்தோ⁴. கிம் வுத்தம் ஹோதி? அந்தோக³ப்³பே⁴ வா உபரிபாஸாதே³ வா தத³ஹேவ க³ந்த்வா நிவத்தனயோக்³கே³ பதே³ஸே வா டி²தம் சீவரம் ஸல்லக்கே²த்வா ‘‘ஏதம் ஸங்கா⁴டிம் அதி⁴ட்டா²மீ’’தி அதி⁴ட்டே²ய்யாதி வுத்தம் ஹோதி. ததோ தூ³ரே டி²தம்பி அதி⁴ட்டா²தப்³ப³ந்திபி வத³ந்தி. ஸேஸேஸுபீதி உத்தராஸங்கா³தி³கண்டு³ப்படிச்சா²தி³பரியந்தேஸுபி அவஸேஸசீவரேஸு. அயம் நயோதி அயமேவ நயோ. யதா² ஸங்கா⁴டியா, ஏவம் ‘‘இமம் உத்தராஸங்க³ம் அதி⁴ட்டா²மீ’’திஆதி³ வுத்தனயோவாதி வுத்தம் ஹோதி. அதி⁴ட்ட²ஹந்தேன பன ஹத்தே²ன க³ஹேத்வா காயவிகாரம் கரோந்தேன ‘‘இமம் ஸங்கா⁴டிம் அதி⁴ட்டா²மீ’’தி சித்தேன ஆபோ⁴க³ம் கத்வா காயேன வா அதி⁴ட்டா²தப்³ப³ம், வசீபே⁴த³மத்தம் கத்வா வாசாய வா. பரிக்கா²ரசோளம் நாம பாடேக்கம் நிதா⁴னமுக²ந்தி திசீவரம் பரிக்கா²ரசோளம்பி அதி⁴ட்டா²தும் வட்டதீதி.

35. இதா³னி ஏவம் அதி⁴ட்ட²ஹதோ அஞ்ஞம் லத்³தா⁴ அதி⁴ட்டா²துகாமேன பச்சுத்³த⁴ரித்வா அதி⁴ட்டா²தப்³ப³ந்தி த³ஸ்ஸேதும் ‘‘அதி⁴ட்ட²ஹந்தோ’’திஆதி³மாஹ. தத்த² ஸங்கா⁴டி பபு⁴தி ஆதி³ யஸ்ஸ தம் ஸங்கா⁴டிப்பபு⁴தி. ஏதம் ‘‘அதி⁴ட்ட²ஹந்தோ’’தி ஏத்தா²பி ‘‘அதி⁴ட்டே²ய்யா’’தி ஏத்தா²பி கம்மபத³ம், ‘‘புப்³ப³சீவர’’ந்தி ஏத்த² பன விஸேஸனம் ஹுத்வா திட்ட²தி. பச்சுத்³த⁴ரித்வாதி பரிச்சஜித்வா. பரிக்கா²ரசோளனாமேன அதி⁴ட்ட²ஹித்வா ட²பிதவத்தே²ஹி ஸங்கா⁴டிஆதீ³னி கரோதி, நிட்டி²தே ரஜனே ச கப்பே ச இமம் பரிக்கா²ரசோளம் பச்சுத்³த⁴ரித்வா புன அதி⁴ட்டா²தப்³பா³னி. பத்தாதி⁴ட்ட²ஹனேதி பத்தஸ்ஸ அதி⁴ட்டா²னே. ததா²தி ச யதா² சீவரே, ததா² பத்தேபி அதி⁴ட்டா²னாதி³கம் ஸப்³ப³ந்தி அத்தோ². ஏத்த² பன ‘‘இமம் பத்தம், ஏதம் பத்த’’ந்தி வா விஸேஸோ.

36. இதா³னி பச்சுத்³தா⁴ரவிதி⁴ம் த³ஸ்ஸேதும் ‘‘ஏத’’ந்திஆதி³மாஹ. தத்த² இமம் வ இதி வா-ஸத்³தோ³ ரஸ்ஸம் கத்வா நித்³தி³ட்டோ², ஸோ இதி-ஸத்³த³தோ பரம் யோஜேதப்³போ³, தஸ்மா ‘‘ஏதம் ஸங்கா⁴டிம் பச்சுத்³த⁴ராமீ’’தி வா ‘‘இமம் ஸங்கா⁴டிம் பச்சுத்³த⁴ராமீ’’தி வா ஸம்ஸேதி ஸம்ப³ந்தோ⁴ வேதி³தப்³போ³. ஸம்ஸேதி வதே³ய்ய. ஏவந்தி யதா² நாமேன ஸங்கா⁴டி பச்சுத்³த⁴ரிதப்³பா³, ததா² உத்தராஸங்கா³தீ³னீதி அத்தோ². விதூ³தி பச்சுத்³த⁴ரேதிமஸ்ஸ கத்துபத³ம், பஞ்ஞவாதி அத்தோ². ஸப்³ப³த்தா²பி தூ³ராஸன்னதாதீ³ வுத்தனயேன வேதி³தப்³பா³.

37-8. இதா³னி ஸங்கா⁴டிஆதீ³னம் ச²ன்னம் பமாணபரிச்சே²த³ம் த³ஸ்ஸேதி ‘‘ஸங்கா⁴டீ’’திஆதி³னா. பச்சி²மோ அந்தோ பச்சி²மந்தோ, தேன, பச்சி²மகோடியாதி அத்தோ². தீ³க⁴ஸோதி தீ³க⁴தோ. முட்டி²யா ஸஹிதம் பஞ்சகம் யஸ்ஸா ஸா முட்டி²பஞ்சகா, லிங்க³விபல்லாஸவஸேன பன முட்டி²பஞ்சகோ. முட்டி²-ஸத்³தே³னேத்த² உபசாரவஸேன கதமுட்டி²கோ ஹத்தோ²வ வுத்தோ. ஸுக³தஸ்ஸ சீவரதோ ஊனாதி ஸமாஸோ. அபீதி வுத்தஸமுச்சயே, தேன யதா²வுத்தபச்சி²மப்பமாணா ச அயஞ்ச உத்தமப்பமாணாதி அத்தோ². ‘‘பச்சி²மந்தேனா’’தி இத³ம் முட்டி²த்திகஞ்ச திரியந்தி ஏத்தா²பி அனுவத்தேத்வா அத்தோ² வேதி³தப்³போ³. ச-ஸத்³தோ³ ‘‘உத்தமந்தேன ஸுக³தசீவரூனாபி வட்டதீ’’தி இத³ம் ஸமுச்சினோதி. தத்த² இதா³னி மஜ்ஜி²மஸ்ஸ புரிஸஸ்ஸ திஸ்ஸோ வித³த்தி²யோ ஏகா ஸுக³தவித³த்தி², தாய வித³த்தி²யா நவ வித³த்தி²யோ தீ³க⁴தோ ஸுக³தசீவரப்பமாணம், திரியம் ச² வித³த்தி²யோ, தம் பன வட்³ட⁴கிஹத்தே²ன தீ³க⁴தோ தேரஸ ஹத்தா² ஏகா ச வித³த்தி², திரியதோ நவ ஹத்தா² ஹோந்தி. தம்வஸேன உப⁴யத்த² ஊனதா விஞ்ஞாதப்³பா³.

உத்தராஸங்கோ³பி தத்தகோவாதி த³ஸ்ஸேதும் ‘‘ததா² ஏகம்ஸிகஸ்ஸபீ’’தி ஆஹ. ஏகோ அம்ஸோ ஏகம்ஸோ, தத்த² காதப்³ப³ந்தி தத்³தி⁴தே ஏகம்ஸிகம். ‘‘அந்தரவாஸகோ’’ச்சாதி³னா நிவாஸனம் த³ஸ்ஸேதி. தத்த² அந்தரம் மஜ்ஜ²பதே³ஸோ, அந்தரே மஜ்ஜே² கடிப்பதே³ஸே வாஸோ வத்த²ம் அந்தரவாஸோ, ஸோயேவ அந்தரவாஸகோ. சாபீதி ஸமுதா³யோ, ஏகோ வா ஸமுச்சயோ. அட்³டே⁴ன ததியோ பா⁴கோ³ அட்³ட⁴தேய்யோ. ஏத்த² த்³வின்னம் ஹத்த²கோட்டா²ஸானம் ஸம்புண்ணானம் ததியகோட்டா²ஸஸம்ஸிஜ்ஜ²னே கரணபூ⁴தா அட்³ட⁴-ஸத்³த³னித்³தி³ட்டா² யா வித³த்தி², ஸாவ ததியோதி நித்³தி³ட்டோ²தி உபட்³ட⁴ஹத்த²ஸங்கா²தோ ததியோ பா⁴கோ³ அட்³ட⁴தேய்யோ. ஸோ ச நானந்தரேன த்³விஹத்த²ததியதா லப்³ப⁴தீதி த்³வே ஹத்தா², ஏகா ச வித³த்தி² அட்³ட⁴தேய்யோ. தம்ஸன்னியோகே³ன பனேத்த² அந்தரவாஸகோவ அட்³ட⁴தேய்யோதி வேதி³தப்³போ³. த்³வே ஹத்தா² யஸ்ஸாதி பா³ஹிரத்த²ஸமாஸோ. பாருபனேனாபி ஸக்கா நாபி⁴ம் படிச்சா²தே³துந்தி ‘‘த்³விஹத்தோ²’’தி வுத்தம். வா-ஸத்³தோ³ அட்³ட⁴தேய்யம் விகப்பேதி. திரியஸ்ஸ அந்தோதி ச²ட்டீ²தப்புரிஸோ, திரியமேவ அந்தோதி வா கம்மதா⁴ரயோ ‘‘கா³மந்தோ’’திஆதீ³ஸு விய.

39. ‘‘நிஸீத³னஸ்ஸா’’திஆதி³னா நிஸீத³னசீவரம் த³ஸ்ஸேதி. ஏத்த² நிஸீத³னம் நாம ஸமே பூ⁴மிபா⁴கே³ ஏளகலோமானி உபரூபரி ஸந்த²ரித்வா கஞ்ஜிகாதீ³ஹி ஸிஞ்சித்வா கதோ த்³வீஸு டா²னேஸு பா²லிதத்தா தீஹி த³ஸாஹி யுத்தோ பரிக்கா²ரவிஸேஸோ. வித³த்தீ² த்³வேதி த்³வே வித³த்தீ². விஸாலதோ புது²லதோ.

40. ‘‘கண்டு³ப்படிச்சா²தீ³’’திஆதி³னா கண்டு³ப்படிச்சா²தி³ம் த³ஸ்ஸேதி. தத்த² கண்டூ³தி ஹி ந அத்த²தோ நானம், தக்³க³ஹணேன பனேத்த² பிளகஸ்ஸாவது²ல்லகச்சா²பா³த⁴ம் க³ய்ஹதி. கண்டு³ம் யதா²வுத்தம் பிளகாதி³ம் படிச்சா²தே³தீதி கண்டு³ப்படிச்சா²தி³. படிச்ச²த³னம் வா படிச்சா²தோ³, யதா²வுத்தகண்டு³யா படிச்சா²தோ³ கண்டு³ப்படிச்சா²தோ³, ஸோ அஸ்ஸ அத்தீ²தி கண்டு³ப்படிச்சா²தீ³, தஸ்ஸ. திரியந்தி திரியதோ.

41. ‘‘வஸ்ஸிகா’’திஆதி³னா வஸ்ஸிகஸாடிகம் த³ஸ்ஸேதி, தம் ஸுவிஞ்ஞேய்யம்.

42. ஏவம் பமாணவந்தானம் பமாணம் த³ஸ்ஸேத்வா வுத்தப்பமாணாதிக்கமே தோ³ஸம், கேஸஞ்சி பமாணாபா⁴வக³ணனாபா⁴வஞ்ச த³ஸ்ஸேதும் ‘‘ஏத்தா²’’திஆதி³மாஹ. தத்த² ஏத்தா²தி வுத்தப்பமாணவந்தேஸு சீவரேஸு. தது³த்தரி ததோ வுத்தப்பமாணதோ உத்தரி நிபாதேன உத்தரி-ஸத்³தே³ன தப்புரிஸோ. கரோந்தஸ்ஸ ஸம்பாதே³ந்தஸ்ஸ. சே²த³னபாசித்தீதி சே²த³னேன ஸஹிதா பாசித்தி, அதிரேகம் சி²ந்தி³த்வா பாசித்தியம் தே³ஸேதப்³ப³ந்தி வுத்தம் ஹோதி. வுத்தப்பமாணதோ பன அதிரேகஞ்ச ஊனகஞ்ச ‘‘பரிக்கா²ரசோள’’ந்தி அதி⁴ட்டா²தப்³ப³ம். யேன முக²ம் புஞ்ச²ந்தி, தம் முக²ஸம்ப³ந்தீ⁴தி முக²ஸ்ஸ சோளந்தி ஸமாஸே த்³வந்தோ³. ஆகங்கி²தம் இச்சி²தம் பமாணந்தி கம்மதா⁴ரயோ. தமேதேஸமத்தீ²தி ஆகங்கி²தப்பமாணிகா. ஏத்த² ச திசீவராதீ³ஸு அவுத்தேபி க³ணனவிபா⁴கே³ பச்சத்த²ரணமுக²புஞ்ச²னபரிக்கா²ரசோளே ட²பேத்வா ஆதி³தோ பட்டா²ய ச²க்கமேகேகமேவ வட்டதி. முக²புஞ்ச²னசோளானி பச்சத்த²ரணானி ச ப³ஹூனிபீதி விஞ்ஞாதப்³ப³ம்.

43. க³ணனாதி ஏத்த² நபும்ஸகஸ்ஸ இத்தி²வசனேன யோகா³பா⁴வா ‘‘ந தீ³பிதா’’தி லிங்க³ம் விபரிணாமேத்வா ஸம்ப³ந்தி⁴தப்³ப³ம், அட்ட²கதா²யம் ந பகாஸிதாதி அத்தோ². திண்ணம் பனேதேஸம் உக்கட்ட²பரிச்சே²த³வஸேனேவ வுத்தம், விகப்பனூபக³பச்சி²மேன பச்சி²மப்பமாணம் அத்தி²யேவ. இதா³னி யஸ்மா தத்த² தம் ஸப்³ப³ம் ந தீ³பிதம், தஸ்மா விகப்பனூபக³த²விகாதி³ ஸப்³ப³ம் ஏகம் ‘‘பரிக்கா²ரசோள’’ந்தி, ப³ஹூனி ஏகதோ கத்வா ‘‘பரிக்கா²ரசோளானீ’’திபி வத்வா அதி⁴ட்டா²தப்³ப³ந்தி த³ஸ்ஸேந்தோ ‘‘ததா²’’திஆதி³மாஹ. இமினா பரிக்கா²ரசோளம் நாம பாடேக்கம் நிதா⁴னமுக²ந்தி த³ஸ்ஸேதி. த²விகாதி³ம் த²விகா ஆதி³ யஸ்ஸ பரிஸ்ஸாவனாதி³னோதி ஸமாஸோ. விகப்பஸ்ஸ உபக³ம் விகப்பியம், தஞ்ச உபரி வக்க²தி.

44. இதா³னி திண்ணம் சீவரானம் படிபா⁴க³ம் த³ஸ்ஸேதும் ‘‘அஹதா’’திஆதி³ ஆரத்³த⁴ம். தத்த² அஹதேன நவேன அதோ⁴தேன கப்பம் ஸதி³ஸம் அஹதகப்பம், ஏகவாரதோ⁴தம். அஹதஞ்ச அஹதகப்பஞ்ச அஹதாஹதகப்பானி, வத்தா²னி, தேஸம். த்³வே கு³ணா படலானி யஸ்ஸ ஸாதி து³கு³ணா. ‘‘கு³ணோ படலராஸீஸூ’’தி ஹி அபி⁴தா⁴னப்பதீ³பிகா. து³கு³ணா து³பட்டா, உத்தரஸ்மிம் தே³ஹபா⁴கே³ ஆஸஞ்ஜீயதீதி உக்கராஸங்கோ³. ஏகச்சம் ஏகபட்டம் அஸ்ஸ அத்தீ²தி ஏகச்சீ, ஏகபட்டோதி அத்தோ². நிபாதோ வா ஏகச்சீதி. ததா²தி ஸமுச்சயே, அந்தரவாஸகோ சாதி வுத்தம் ஹோதி. உபமாயம் வா, யதா² உத்தராஸங்கோ³ ஏகச்சியோ, ஏவம் அந்தரவாஸகோதி அத்தோ².

45. ‘‘உதூ’’தி அனேகஉது க³ஹிதாதி உதுதோ தீ³க⁴காலதோ உத்³த⁴டா உதுத்³த⁴டா, தேஸம் பிலோதிகானந்தி அத்தோ². ஸேஸாதி உத்தராஸங்க³அந்தரவாஸகா. பம்ஸு விய குச்சி²தம் உலதி பவத்ததீதி பம்ஸுகூலம், ரதி²காஸுஸானஸங்காரகூடாதீ³னம் யத்த² கத்த²சி டி²தம் சோளக²ண்ட³ம், தஸ்மிம். யா யா ருசீதி அப்³யயீபா⁴வே யதா²ருசி, யாவத³த்த²ம் ஸதபட்டம்பி வட்டதீதி அதி⁴ப்பாயோ.

46. இதா³னி தீஸு சி²ந்தி³த்வா காதும் அப்பஹோந்தேஸு காதப்³ப³விதி⁴ம் த³ஸ்ஸேதும் ‘‘தீஸூ’’திஆதி³மாஹ. தத்த² திசீவரஸமுதா³யதோ ஏகதே³ஸபூ⁴தானம் த்³வின்னமேகஸ்ஸ ச ஸங்கா²கு³ணேன நித்³தா⁴ரியமானத்தா தீஸூதி நித்³தா⁴ரணே பு⁴ம்மம். ஏகவசனஸ்ஸ ப³ஹ்வத்தே²ன யோகா³பா⁴வதோ த்³விசீவரஸங்கா²தப³ஹ்வத்த²வஸேன வசனம் விபரிணாமேத்வா யானி பஹோந்தி, தானி த்³வே வாபி சி²ந்தி³தப்³பா³னி, யம் பஹோதி, தம் ஏகம் வா சி²ந்தி³தப்³ப³ந்தி யோஜேதப்³ப³ம். பஹோந்தீதி பச்சி²மசீவரப்பமாணசி²ன்னகானி பஹோந்தி. அபீதி ஸம்பா⁴வனே, தீஸு கா கதா²தி அத்தோ². அன்வாதி⁴ந்தி ஆக³ந்துகபத்தம். அனு பச்சா² ஆதீ⁴யதீதி அன்வாதி⁴, யம் சீவரஸ்ஸோபரி ஸங்கா⁴டிஆகாரேன ஆரோபேதப்³ப³ம். அனாதி³ண்ணந்தி அனாரோபிதம் அன்வாதி⁴கம். ந தா⁴ரேய்யாதி இமினா யதி³ தா⁴ரேய்ய, து³க்கடந்தி தீ³பேதி.

47-8. இதா³னி ‘‘திசீவரம் ந வஸேய்ய வினேகாஹ’’ந்தி வுத்தானம் திண்ணம் அவிப்பவாஸலக்க²ணம் த³ஸ்ஸேதும் ‘‘கா³மே’’திஆதி³னா உதோ³ஸிதஸிக்கா²பதே³ (பாரா. 471 ஆத³யோ) வுத்தபரிஹாரமாஹ. தத்த² கா³மே வா…பே… விஹாரே வா திசீவரம் நிக்கி²பித்வாதி ஸம்ப³ந்தோ⁴. தத்த² ‘‘படோ த³ட்³டோ⁴’’திஆதீ³ஸு விய அவயவேபி ஸமுதா³யவோஹாரவஸேன தீஸு ஏகம்பி ‘‘திசீவர’’ந்தி வுத்தம். பி⁴க்கு²ஸம்முதியஞ்ஞத்ராதி ஸங்கே⁴ன கி³லானஸ்ஸ பி⁴க்கு²னோ தீ³யமானம் சீவரேன விப்பவாஸஸம்முதிம் வினா. விப்பவத்து²ந்தி ஏகூபசாரனானூபசாரகா³மாதி³தோ ப³ஹி, அத² வா நிவேஸனாதீ³னம், தத்த² ச க³ப்³போ⁴வரகானம் சீவரஸ்ஸ வா ஹத்த²பாஸம் அதிக்கம்ம சீவரேன விப்பயுத்தோ ஹுத்வா வஸிதும். ஏத்த² ச கா³மாதீ³னம் ஏகூபசாரனானூபசாரதா ஏககுலனானாகுலஸந்தகஸ்ஸ கா³மாதி³னோ பரிக்கே²பஸ்ஸ, பரிக்கே²போகாஸஸ்ஸ ச வஸேன ஸத்த²அப்³போ⁴காஸானம் ஸத்தப்³ப⁴ந்தரவஸேன ச வேதி³தப்³பா³. தத்த² ஏகோ அப்³ப⁴ந்தரோ அட்ட²வீஸதிஹத்தோ² ஹோதி. ஏத்த² ச நிவேஸனாதீ³னி கா³மதோ ப³ஹி ஸன்னிவிட்டா²னீதி த³ட்ட²ப்³ப³ம் விஸும் கா³மஸ்ஸ க³ஹிதத்தா, ததா² உதோ³ஸிதாதீ³ஹி அஞ்ஞம் நிவேஸனம்.

தத்த² உதோ³ஸிதோ நாம யானாதீ³னம் ப⁴ண்டா³னம் ஸாலா. பாஸாதோ³ தீ³க⁴பாஸாதோ³. ஹம்மியம் முண்ட³ச்ச²த³னபாஸாதோ³. நாவா ச அட்டோ ச மாளோ ச ஆராமோ ச நாவா…பே… ஆராமம், தஸ்மிம். அட்டோ நாம படிராஜாதீ³னம் படிபா³ஹனத்த²ம் இட்ட²காஹி கதோ ப³ஹலபி⁴த்திகோ சதுபஞ்சபூ⁴மிகோ பதிஸ்ஸயவிஸேஸோ. மாளோ ஏககூடஸங்க³ஹிதோ சதுரஸ்ஸபாஸாதோ³. ஆராமோ புப்பா²ராமோ வா ப²லாராமோ வா. ஸத்தோ² ச கே²த்தஞ்ச க²லஞ்சாதி த்³வந்தோ³. ஸத்தோ² நாம ஜங்க⁴ஸத்தோ² வா ஸகடஸத்தோ² வா. க²லம் வுச்சதி த⁴ஞ்ஞகரணம். து³மோ நாம து³மமூலம் சா²யாய பு²ட்டோ²காஸோ உபசாரவஸேன. அப்³போ⁴காஸோ பன அகா³மகே அரஞ்ஞேவ அதி⁴ப்பேதோ.

49. இதா³னி ‘‘ஏதம்…பே… ஸங்கா⁴டி’’ந்திஆதி³னா நவன்னமேவ பச்சுத்³தா⁴ரோ வுத்தோ, ந பன தேஸம் காலபரிச்சே²தோ³தி தம் த³ஸ்ஸேதும் ‘‘ரோகா³’’திஆதி³ ஆரத்³த⁴ம். தத்த² தே³வத³த்தோ த³த்தோதி நாமேகதே³ஸேனாபி நாமவோஹாரதோ வஸ்ஸிகஸாடிகாவ ‘‘ஸாடிகா’’தி பகரணவஸேன க³ம்மமானத்த²த்தா வுத்தா. கண்டு³ப்படிச்சா²தி³கா ச ரோக³வஸ்ஸானபரியந்தா. ரோகா³ ச வஸ்ஸானா ச மாஸா ரோக³வஸ்ஸானா, தே தத³திக்கமேன பச்சுத்³த⁴ரிதப்³ப³தாய பரியந்தா யாஸந்தி விக்³க³ஹோ.

கிம் வுத்தம் ஹோதி? வஸ்ஸிகஸாடிகா வஸ்ஸானமாஸாதிக்கமே கத்திகபுண்ணமாய ஏவ பச்சுத்³த⁴ரிதப்³பா³. ததா² கண்டு³ப்படிச்சா²தி³கா ஆபா³தே⁴ஸு வூபஸந்தேஸூதி வுத்தம் ஹோதி. ‘‘பச்சுத்³த⁴ரித்வா விகப்பேதப்³பா³’’தி ஹி அட்ட²கதா²யம் (பாரா. அட்ட². 2.469) வுத்தம். ஏத்த² பன கேசி ஆசரியா ‘‘பச்சுத்³த⁴ரித்வாதி வஸ்ஸிகஸாடிகபா⁴வதோ அபனேத்வா’’தி வதி³ம்ஸு, தம் ந யுஜ்ஜதி. பச்சுத்³தா⁴ரவினயகம்மவிஸயேயேவ பச்சுத்³தா⁴ர-ஸத்³த³ஸ்ஸ தி³ட்ட²த்தா, ‘‘சாதுமாஸம் அதி⁴ட்டா²தும் ததோ பரம் விகப்பேது’’ந்தி (மஹாவ. 358) பாளிவசனதோ ச. ‘‘சாதுமாஸம் அதி⁴ட்டா²து’’ந்தி ச சதுன்னம் மாஸானம் அதி⁴ட்டா²னேன ஸஹ அச்சந்தஸம்யோகோ³ த³ஸ்ஸிதோதி ந தேன அதி⁴ட்டா²னபே⁴தோ³ விஞ்ஞாயதி. தேனேவ குருந்த³ட்ட²கதா²யம்பி ‘‘வஸ்ஸானம் சாதுமாஸம் அதி⁴ட்டா²தும், ததோ பரம் விகப்பேது’’ந்தி (மஹாவ. 358) வசனதோ கத்திகபுண்ணமாய ஏவ பச்சுத்³த⁴ரித்வா ஹேமந்தே விகப்பேதப்³பா³தி வுத்தம். தஸ்மா ‘‘வஸ்ஸிகஸாடிகா வஸ்ஸானமாஸாதிக்கமேனாபி கண்டு³ப்படிச்சா²தி³ ஆபா³த⁴வூபஸமேனாபி அதி⁴ட்டா²னம் விஜஹதீ’’தி (கங்கா. அட்ட². கதி²னஸிக்கா²பத³வண்ணனா) வுத்தம். மாதிகாட்ட²கதா²யம்பி பச்சுத்³தா⁴ரவஸேனாபி அதி⁴ட்டா²னம் விஜஹதீதி ஏவமத்தோ² க³ஹேதப்³போ³. ஏவஞ்ஹி ஸதி ஸப்³ப³ட்ட²கதா²யோ ஸமேந்தி, யுத்தி ச அவிருத்³தா⁴ ஹோந்தீதி. ததோ பரந்தி பச்சுத்³தா⁴ரதோ உபரி. விகப்பேய்யாதி கண்டு³ப்படிச்சா²தி³ம் பச்சுத்³த⁴ரித்வா விகப்பேய்ய. வஸ்ஸிகஸாடிகம் கத்திகபுண்ணமாயம் பச்சுத்³த⁴ரித்வா ஹேமந்தஸ்ஸ பட²மதி³வஸே விகப்பேய்ய, ஏவம் அஸதி து³க்கடந்தி அதி⁴ப்பாயோ. ஸேஸாதி அபரே ஸத்த சீவரானி ஸேஸா. நத்தி² பரியந்தம் வுத்தஸதி³ஸோ காலபரிச்சே²தோ³ ஏதேஸந்தி அபரியந்திகா.

50. இதா³னி பச்சத்த²ரணாதி³கம் சீவரசதுக்கம் ஸத³ஸாதி³கம் வட்டதி, நாபரந்தி த³ஸ்ஸேதும் ‘‘பச்சத்த²ரணா’’திஆதி³மாஹ. தத்த² பரிக்கா²ரோ ச முக²புஞ்ச²னஞ்சாதி த்³வந்தோ³. பரிக்கா²ரமுக²புஞ்ச²னமேவ சோளகந்தி கம்மதா⁴ரயோ. த்³வந்த³ஸமாஸந்தே ஸுய்யமானத்தா பன சோளக-ஸத்³தோ³ பரிக்கா²ர-ஸத்³த³தோ ச பரம் த³ட்ட²ப்³போ³ ‘‘பரிக்கா²ரசோளக’’ந்தி. தம் பன ஸாமஞ்ஞஜோதனாய விஸேஸேபி அவட்டா²னதோ ட²பேத்வா பஞ்ச சீவரானி பரிக்கா²ரசோளனாமேனாதி⁴ட்டி²தானி அவஸேஸம் த³ட்ட²ப்³ப³ம். பச்சத்த²ரணஞ்ச பரிக்கா²ரமுக²புஞ்ச²னசோளகஞ்ச பச்சத்த²ரண…பே… சோளகஞ்ச நிஸீத³னஞ்சாதி ஏதம் சீவரசதுக்கம் ஸத³ஸம்பி அரத்தம்பி அனாதி³ண்ணகப்பம்பி லப்³ப⁴ந்தி ஸம்ப³ந்தோ⁴. ஸத³ஸந்தி ஸஹ யாஹி காஹிசி த³ஸாஹீதி ஸத³ஸம். ஸத³ஸகே லப்³ப⁴மானே அத³ஸம்பி லப்³ப⁴தேவாதி ஸத³ஸம்பி அத³ஸம்பி புப்ப²த³ஸம்பீதி ஏத்த² அத்தோ². பி-ஸத்³தோ³ வுத்தாவுத்தஸம்பிண்ட³னத்தோ². அரத்தந்தி நீலபீதாதி³ரஜனேன அரஞ்ஜிதம்பி. பி-ஸத்³தே³ன ரஞ்ஜிதனீலபீதாதி³கம்பி அனாதி³ண்ணகப்பம்பீதி. ஆதி³ண்ணோ கப்போ யஸ்ஸ நத்தீ²தி தம் அனாதி³ண்ணகப்பம்பி. பி-ஸத்³தே³ன ஆதி³ண்ணகப்பம்பி.

நனு ச ‘‘ந பி⁴க்க²வே ஸப்³ப³னீலகானி சீவரானி தா⁴ரேதப்³பா³னீ’’திஆதி³னா (மஹாவ. 372) ஸப்³ப³னீலகஸப்³ப³பீதகஸப்³ப³லோஹிதகசீவரானி ஸாமஞ்ஞேன படிக்கி²த்தானீதி கத²மித³ம் சீவரசதுக்கம் ஸத³ஸாதி³கம் வட்டதி, கத²ஞ்ச அனாதி³ண்ணகப்பம்பி வட்டதீதி? வுச்சதே – ‘‘தேன கோ² பன ஸமயேன அஞ்ஞதரோ பி⁴க்கு² குஸசீரம் நிவாஸேத்வா’’திஆதி³னா உப்பன்னவத்தூ²ஸு (மஹாவ. 371) ‘‘ந பி⁴க்க²வே குஸசீரம்…பே… தித்தி²யத்³த⁴ஜோ தா⁴ரேதப்³போ³. யோ தா⁴ரேய்ய, ஆபத்தி து²ல்லச்சயஸ்ஸா’’திஆதி³னா (மஹாவ. 371) உப்பன்னவத்து²வஸேனேவ நிவாஸனபாருபனஸங்கா²ததா⁴ரணஸ்ஸ படிக்கி²த்தத்தா ச தத்தே²வ அட்ட²கதா²யஞ்ச (மஹாவ. அட்ட². 372) ‘‘ஸப்³ப³னீலகாதீ³னி ரஜனம் தோ⁴வித்வா புன ரஜித்வா தா⁴ரேதப்³பா³னி, ந ஸக்கா சே ஹோந்தி தோ⁴விதும், பச்சத்த²ரணானி வா காதப்³பா³னி, து³பட்டசீவரஸ்ஸ வா மஜ்ஜே² தா³தப்³பா³னி, அச்சி²ன்னத³ஸதீ³க⁴த³ஸானி த³ஸா சி²ந்தி³த்வா தா⁴ரேதப்³பா³னி, கஞ்சுகம் லபி⁴த்வா பா²லேத்வா ரஜித்வா பரிபு⁴ஞ்ஜிதும் வட்டதி, வேட²னேபி ஏஸேவ நயோ’’தி நிவாஸனபாருபனவஸேனேவ தா⁴ரணபரிபோ⁴கா³னம் வுத்தத்தா ச து³ப்³ப³ண்ணகரணஸிக்கா²பதே³ (பாசி. அட்ட². 368) ‘‘யம் நிவாஸேதும் வா பாருபிதும் வா ஸக்கா ஹோதி, ததே³வ சீவரந்தி வேதி³தப்³ப³’’ந்தி பஞ்சன்னம்யேவ கப்பபி³ந்து³னோ அனுஞ்ஞாதத்தா ச திசீவரகண்டு³ப்படிச்சா²தி³வஸ்ஸிகஸாடிகஸங்கா²தானி பஞ்ச சீவரானி காயபரிஹாரியானேவ அத³ஸானி அஸப்³ப³னீலகாதீ³னி கப்பியரஜனரஜிதானி ஆதி³ண்ணகப்பானியேவ ஹோந்தி, ந நியமேன நிவத்திதானி பரானி சத்தாரீதி சீவரசதுக்கமேவ ஸத³ஸாதி³கம் அனாதி³ண்ணகப்பம்பி வட்டதீதி.

51. ஸேஸசீவரபஞ்சகம் அத³ஸம்யேவ ரஜிதம்யேவ ஆதி³ண்ணகப்பம்வ கப்பதீதி யோஜனா. ரஜிதந்தி கப்பியரஜனேன ரஜிதம். நிஸீத³னஸ்ஸ யதா²வுத்தேனத்தே²ன ஸப்³ப³த்த² அத³ஸத்த²ம் நிஸேதே⁴தும் ‘‘ஸத³ஸம்வ நிஸீத³ன’’ந்தி வுத்தம். ஸதி ஹி ஸம்ப⁴வே ப்³யபி⁴சாரே ச விஸேஸனம் ஸாத்த²கம் ஹோதி.

52. இதா³னி அனதி⁴ட்டி²தே அனிஸ்ஸட்டே² ச கா பவத்தீதி தம் த³ஸ்ஸேதும் ‘‘அனதி⁴ட்டி²த’’ந்திஆதி³மாஹ. தத்த² அனதி⁴ட்டி²தந்தி திசீவராதி³வஸேன அனதி⁴ட்டி²தம். அனிஸ்ஸட்ட²ந்தி யஸ்ஸ கஸ்ஸசி தா³னலக்க²ணேன அதி³ன்னம். விகப்பேத்வா பரிபு⁴ஞ்ஜயேதி வக்க²மானனயேன ஏகப³ஹுபா⁴வம், ஸன்னிஹிதாஸன்னிஹிதபா⁴வஞ்ச ஸல்லக்கே²த்வா விகப்பேத்வா பச்சுத்³த⁴ரித்வா பரிபு⁴ஞ்ஜேய்ய. வக்க²மானனயேன பன விஞ்ஞாயதீதி ‘‘பச்சுத்³த⁴ரித்வா’’தி ந வுத்தம்.

இதா³னி ‘‘விகப்பேத்வா’’தி வுத்தம் கீதி³ஸம் தம் ஹேட்டி²மந்தேன விகப்பியந்தி ஆஹ ‘‘ஹத்தா²’’திஆதி³. தத்த² ஹத்தோ² தீ³கே⁴ன யஸ்ஸ தம் ஹத்த²தீ³க⁴ம். ததோதி தஸ்மா ஹத்த²தோ. உபட்³டோ⁴ ஹத்த²ஸ்ஸ து³தியோ பா⁴கோ³ வித³த்தி²ஸங்கா²தோ வித்தா²ரேன யஸ்ஸ தம் உபட்³ட⁴வித்தா²ரம்.

53. இதா³னி யதா²வுத்தவிதா⁴னம் தேசீவரிகஸ்ஸேவ வஸேன, அபரோ பன அஞ்ஞதா² படிபஜ்ஜதீதி தம் த³ஸ்ஸேதும் ‘‘திசீவரஸ்ஸா’’திஆதி³மாஹ. தத்த² நாமேனாதி⁴ட்டி²தானி தீணி சீவரானி ஏதஸ்ஸாதி திசீவரோ. தஸ்ஸ வினயதேசீவரிகஸ்ஸாதி அத்தோ², ந பரிக்கா²ரசோளனாமேன அதி⁴ட்டி²தசீவரஸ்ஸ. வினயதேசீவரிகஸ்ஸ பன உதோ³ஸிதஸிக்கா²பதே³ வுத்தபரிஹாரோ நத்தி². பரிக்கா²ரசோளியோதி பரிக்கா²ரசோளமஸ்ஸ அத்தீ²தி ணிகேன ய-காரோ. ஸப்³ப³ந்தி ஸகலம் நவவித⁴ம்பி சீவரம். ததா² வத்வாதி ஏகப³ஹுபா⁴வம், ஸன்னிஹிதாஸன்னிஹிதபா⁴வஞ்ச ஞத்வா ‘‘இமம் பரிக்கா²ரசோளம் அதி⁴ட்டா²மீ’’திஆதி³னா வத்வா. அதி⁴ட்ட²தீதி அதி⁴ட்டா²தி.

54. அதி⁴ட்டி²தசீவரம் பன பரிபு⁴ஞ்ஜதோ கத²ம் அதி⁴ட்டா²னம் விஜஹதீதி தம் த³ஸ்ஸேந்தோ ‘‘அச்சே²தா³’’திஆதி³மாஹ. தத்த² அச்சே²தோ³ ச விஸ்ஸஜ்ஜனஞ்ச கா³ஹோ ச விப்³ப⁴மோ சாதி த்³வந்தோ³. அச்சே²தோ³ நாம சோராதீ³ஹி அச்சி²ந்தி³த்வா க³ஹணம். விஸ்ஸஜ்ஜனம் பரேஸம் தா³னம். கா³ஹோ விஸ்ஸாஸேன க³ஹணம். விப்³ப⁴மோ ஸிக்க²ம் அப்பச்சக்கா²ய கி³ஹிபா⁴வூபக³மனம். ததா³பி தஸ்ஸ அஞ்ஞஸ்ஸ தா³னே விய சீவரஸ்ஸ நிராலயபா⁴வேன பன பரிச்சாகோ³தி. டீகாயம் பன பா⁴தி³ஸோ பி⁴க்கு²யேவாதி அதி⁴ட்டா²னம் ந விஜஹதீதி அத்த²ம் விகப்பேத்வா பி⁴க்கு²னியா கி³ஹிபா⁴வூபக³மனம் வுத்தம், தம் ந க³ஹேதப்³ப³ம், காரணம் பனேத்த² அம்ஹாகம் க³ரூஹியேவ ஸாரத்த²தீ³பனியம் (ஸாரத்த². டீ. 2.469) ‘‘பி⁴க்கு²னியா ‘ஹீனாயாவத்தனேனா’தி விஸேஸேத்வா அவுத்தத்தா பி⁴க்கு²னியா ஹி கி³ஹிபா⁴வூபக³மனே அதி⁴ட்டா²னவிஜஹனம் விஸும் வத்தப்³ப³ம் நத்தி² தஸ்ஸா விப்³ப⁴மனேனேவ அஸ்ஸமணீபா⁴வதோ’’தி வுத்தம். நனு ச பி⁴க்கு²னோ அப்பச்சக்கா²தஸிக்க²ஸ்ஸ கி³ஹிபா⁴வூபக³மனேன அதி⁴ட்டா²னவிஜஹனேன நிராலயபா⁴வோ காரணபா⁴வேன வுத்தோ, ஏவம் ஸதி பரிவத்தலிங்க³ஸ்ஸ நத்தி² நிராலயபா⁴வோதி கத²மஸ்ஸ அதி⁴ட்டா²னம் விஜஹதீதி? ஸச்சமேதம், ததா²பி பு³த்³த⁴மதஞ்ஞூஹி அட்ட²கதா²சரியேஹி அட்ட²கதா²யம் (பாரா. அட்ட². 1.69) ‘‘யம் பனஸ்ஸ பி⁴க்கு²பா⁴வே அதி⁴ட்டி²தம் திசீவரஞ்ச பத்தோ ச, தம் அதி⁴ட்டா²னம் விஜஹதி, புன அதி⁴ட்டா²தப்³ப³’’ந்தி வுத்தத்தா நத்தே²த்த² தோ³ஸோதி.

மாரணலிங்க³ஸிக்கா²தி உத்தரபத³லோபேன உபசாரேன வா லிங்க³பரிவத்தனம் ஸிக்கா²பச்சக்கா²னஞ்ச ‘‘லிங்க³ஸிக்கா²’’தி ச வுத்தம். இதி ஏதே அட்ட² ஸப்³பே³ஸு நவஸு சீவரேஸு அதி⁴ட்டா²னஸ்ஸ வியோகோ³ விப்பவாஸோ, தஸ்ஸ காரணா ஹோந்தீதி பாட²ஸேஸோ. திசீவரஸ்ஸ பன ந கேவலம் இமேயேவ அட்ட², வினிவித்³த⁴சி²த்³த³ஞ்ச அதி⁴ட்டா²னவியோக³காரணந்தி லிங்க³வசனஞ்ச பரிவத்தேத்வா யோஜேதப்³ப³ம். தத்த² அப்³ப⁴ந்தரே ஏகஸ்ஸபி தந்துனோ அபா⁴வேன வினிவித்³த⁴ம் வினிவிஜ்ஜி²த்வா க³தசி²த்³த³ம்கனிட்ட²ங்கு³லினக²பிட்டி²ப்பமாணம் வினிவித்³த⁴சி²த்³த³ம். தத்த² ஸங்கா⁴டியா ச உத்தராஸங்க³ஸ்ஸ ச தீ³க⁴ந்ததோ வித³த்தி²ப்பமாணஸ்ஸ, திரியந்ததோ அட்ட²ங்கு³லப்பமாணஸ்ஸ, அந்தரவாஸகஸ்ஸ பன தீ³க⁴ந்ததோ வித³த்தி²ப்பமாணஸ்ஸேவ திரியந்ததோ சதுரங்கு³லப்பமாணஸ்ஸ பதே³ஸஸ்ஸ ஓரதோ சி²த்³த³ம் அதி⁴ட்டா²னம் பி⁴ந்த³தி, ஸூசிகம்மம் கத்வா புன அதி⁴ட்டா²தப்³ப³ம். ஸூசிகம்மம் கரோந்தேன ச சி²ந்தி³த்வா து³ப்³ப³லட்டா²னாபனயனேன சி²த்³த³ம் அத³ஸ்ஸேத்வா காதப்³ப³ம்.

55. இதா³னி அகப்பியானி த³ஸ்ஸேதும் ‘‘குஸா’’திஆதி³ வுத்தம். தத்த² குஸா ச வாகா ச ப²லகானி ச, தேஸம் சீரானி குஸ…பே… சீரானி. தத்த² குஸேன க³ந்தே²த்வா கதம் குஸசீரம். ததா² வாகேன க³ந்தே²த்வா கதம் வாகசீரம், தாபஸானம் வக்கலம். ப²லகஸண்டா²னானி ப²லகானி ஸிப்³பி³த்வா கதம் ப²லகசீரம். கேஸவாலஜந்தி கேஸேஹி ச வாலேஹி ச ஜாதம் வாயிதம் கம்ப³லந்தி ஸம்ப³ந்தோ⁴. உலூகபக்கா²ஜினக்கி²பேதி உலூகானம் கோஸியஸகுணானம் பக்க²ம் பக்கே²ன கதம் நிவாஸனஞ்ச அஜினக்கி²பம் ஸலோமம் ஸகு²ரம் அஜினமிகா³னம் சம்மஞ்ச தா⁴ரயதோ து²ல்லச்சயந்தி ஸம்ப³ந்தோ⁴.

56. கத³லேரகக்கது³ஸ்ஸேஸூதி கத³லியோ ச ஏரகோ ச அக்கோ ச, தேஸம் து³ஸ்ஸானி வத்தா²னி, தேஸு சேவ மகசிவாகேஹி கதே போத்த²கே சாபி து³க்கடம். நிமித்தத்தே² சேதம் பு⁴ம்மம். கத³லிது³ஸ்ஸாதி³ஸத்³தே³ன தம்தா⁴ரணமதி⁴ப்பேதம், தஸ்மா தம்தா⁴ரணனிமித்தம் து³க்கடம் ஹோதீதி அத்தோ². ஏவம் ஸப்³ப³த்த². ‘‘நீலகோ சா’’திஆதி³னா த்³வந்தோ³. ஸப்³பா³ நீலக…பே… கண்ஹகாதி கம்மதா⁴ரயோ. நீலாதி³வண்ணயோகே³ன வத்த²ம் நீலாதி³. நீலகம் உமாபுப்ப²வண்ணம். மஞ்ஜேட்ட²ம் மஞ்ஜேட்டி²கவண்ணம். பீதம் கணிகாரபுப்ப²வண்ணம். லோஹிதம் ஜயஸுமனபுப்ப²வண்ணம். கண்ஹகம் அத்³தா³ரிட்ட²கவண்ணம். ஸப்³ப³-ஸத்³தோ³ பனேத்த² பச்சேகம் யோஜேதப்³போ³.

57. மஹா…பே… ரத்தேதி மஹாரங்கோ³ ச மஹானாமரங்கோ³ ச, தேஹி ரத்தே. ஏத்தா²பி புன ஸுய்யமானம் ஸப்³ப³ஸத்³த³மனுவத்தியம், ‘‘ஸப்³ப³மஹாரங்க³ரத்தே’’திஆதி³னா அத்தோ² வேதி³தப்³போ³. இமினா ச அஸப்³ப³னீலகாதி³ கப்பியரஜனரஜிதம் பரிபு⁴ஞ்ஜந்தஸ்ஸ நத்தி² தோ³ஸோதி தீ³பேதி. தத்த² மஹாரங்கோ³ ஸதபதி³பிட்டி²வண்ணோ. மஹானாமரங்கோ³ ஸம்பி⁴ன்னவண்ணோ, ஸோ பன பண்டு³பலாஸவண்ணோ ஹோதி, பது³மவண்ணோதிபி வத³ந்தி. திரீடகேதி தம் நாமக ருக்க²தசே. அச்சி²ன்னதீ³க⁴த³ஸகேதி ஸப்³ப³ஸோ அச்சி²ன்னத்தா அச்சி²ன்னா ச மஜ்ஜே² சி²ன்னத்தா தீ³கா⁴ ச ஸா த³ஸா ச வத்த²கோடி யஸ்ஸாதி அஞ்ஞபத³த்த²ஸமாஸோ. ப²லபுப்ப²த³ஸேதி அஞ்ஞமஞ்ஞம் ஸம்ஸிப்³பி³த்வா கதா ப²லஸதி³ஸா த³ஸா ‘‘ப²லா’’தி வுச்சந்தி, கேதகாதி³ புப்ப²ஸதி³ஸானி ‘‘புப்பா²னீ’’தி ச, ப²லா ச புப்பா² ச த³ஸா யஸ்ஸ, ப²லஸதி³ஸே த³ஸே, புப்ப²ஸதி³ஸே த³ஸே சாதி அத்தோ². வேட²னேதி ஸீஸவேட²னே. ததா²தி இமினா ஸப்³ப³னீலகாதீ³ஸு து³க்கடம் அதிதி³ஸதி. ஸப்³ப³ந்தி குஸசீராதி³கம் ஸகலம். அச்சி²ன்னம் சீவரம் யஸ்ஸ ஸோ லப⁴தீதி ஸம்ப³ந்தோ⁴.

சீவரனித்³தே³ஸவண்ணனா நிட்டி²தா.