29. மிச்சா²ஜீவவிவஜ்ஜனானித்³தே³ஸவண்ணனா

209. ஆக³ம்ம ஜீவந்தி ஏதேனாதி ஆஜீவோ, கோ ஸோ? பச்சயபரியேஸனவாயாமோ. மிச்சா²ய ஆஜீவோ, தஸ்ஸ விவஜ்ஜனா மிச்சா²ஜீவவிவஜ்ஜனா. ஸா பனாயம் அத்த²தோ ‘‘இத⁴ பி⁴க்கு² பாதிமோக்க²ஸம்வரஸம்வுதோ விஹரதி ஆசாரகோ³சரஸம்பன்னோ’’தி (விப⁴. 508) ஏவம் பாதிமோக்க²ஸம்வரஸம்பத்தியா படிபத்தித³ஸ்ஸனவஸேன ஆக³தோ ஆசாரோ சேவ யதா²க்கமேன பாராஜிகஸங்கா⁴தி³ஸேஸது²ல்லச்சயபாசித்தியபாடிதே³ஸனீயது³ப்³பா⁴ஸிதது³க்கடானம் காரணபூ⁴தஸ்ஸ ஆஜீவஹேதுபஞ்ஞத்தானம் அபூ⁴தாரோசனஸஞ்சரித்தஅஞ்ஞாபதே³ஸபூ⁴தாரோசனபணீதபோ⁴ஜனவிஞ்ஞத்தி பி⁴க்கு²னிபோ⁴ஜனவிஞ்ஞத்திஸூபோத³னவிஞ்ஞத்திஸிக்கா²பதா³னம் வீதிக்கமஸ்ஸ ச குஹனலபனனேமித்திகதா நிப்பேஸிகதா லாபே⁴ன லாப⁴ம் நிஜிகீ³ஸனதாதி ஏவமாதீ³னஞ்ச பாபத⁴ம்மானம் வஸேன பவத்தம் மிச்சா²ஜீவவிரதிஸங்கா²தம் ஆஜீவபாரிஸுத்³தி⁴ஸீலஞ்ச. தஸ்ஸா பன கஸ்ஸசி இத⁴ த³ஸ்ஸனம் யதா² த³ஸ்ஸேதுமாரத்³த⁴ம் பாதிமோக்க²ஸம்வரஸங்கா²தாய அதி⁴ஸீலஸிக்கா²ய, சதுராரக்க²விபஸ்ஸனாவஸேன ஆக³தானம் அதி⁴சித்தஅதி⁴பஞ்ஞாஸங்கா²தானம் த்³வின்னம் ஸிக்கா²னஞ்ச உபகாரகத⁴ம்மபரிதீ³பனத்த²ந்தி த³ட்ட²ப்³ப³ம், ஏவமீதி³ஸம் விஞ்ஞேய்யம், தம் த³ஸ்ஸேதி ‘‘தா³ரு’’ந்திஆதி³னா. தத்த² ‘‘தா³ரு’’ந்திஆதீ³னி ‘‘த³தே³’’தி ஏதஸ்ஸ பத்திகம்மம். சுண்ணம் ஸிரீஸசுண்ணாதி³னஹானியசுண்ணம். ந்ஹானமுகோ²த³கந்தி ந்ஹானஞ்ச முக²ஞ்ச, தஸ்ஸ உத³கந்தி ஸமாஸோ. ஆதி³-ஸத்³தே³ன பண்ணாதி³ம் ஸங்க³ண்ஹாதி. குலஸங்க³ஹாதி குலஸங்க³ஹகரணேன.

210. பரிப⁴டதி பரேஸம் தா³ரகே பரிஹரதீதி பரிப⁴டோ, பரிப⁴டஸ்ஸ கம்மம் பாரிப⁴டகோ, ஸகத்தே² தமேவ பாரிப⁴டகதா. அலங்கரணாதி³னா குலதா³ரகபரிஹரணஸ்ஸேதம் நாமம். முக்³க³ஸ்ஸ ஸூபோ முக்³க³ஸூபோ, ஸோயேவ முக்³க³ஸுப்போ. யதா² முக்³க³ஸூபே பச்சமானே கோசிதே³வ முக்³கோ³ ந பச்சதி, அவஸேஸா பச்சந்தி, ஏவம் யஸ்ஸ புக்³க³லஸ்ஸ வசனே கிஞ்சிதே³வ ஸச்சம் ஹோதி, ஸேஸம் அலிகம், அயம் புக்³க³லோ முக்³க³ஸூபஸதி³ஸதாய உபசாரேன ‘‘முக்³க³ஸுப்போ’’தி வுச்சதி, தஸ்ஸ பா⁴வோ முக்³க³ஸுப்பதா. ஸச்சாலிகேன ஜீவிதகப்பனஸ்ஸேதம் அதி⁴வசனம். க⁴ரவத்து²ஆதி³ஸம்ப³ந்தி⁴னீ விஜ்ஜா வத்து²விஜ்ஜா. பாரிப⁴டகதா சாதிஆதி³னா த்³வந்தோ³ நபும்ஸகத்தாபா⁴வே பாரி…பே… விஜ்ஜா, தாய. ரஸ்ஸோ பன கா³தா²ப³ந்த⁴வஸேன, ததா² தீ³கோ⁴. பஹிணானம் தஸ்மிம் தஸ்மிம் கம்மே தேஸம் தேஸம் நியுஞ்ஜனம் பஹேணம். ஆத³ரேன தூ³தேன காரேதப்³ப³ம் யம் கிஞ்சி கம்மம் தூ³தகம்மம். பிஸனம் பேஸனம், ஜங்கா⁴ய பாதே³ன பேஸனம் ஜங்க⁴பேஸனம், தமஸ்ஸ அத்தீ²தி ஜங்க⁴பேஸனியம். தேஸம் தேஸம் கி³ஹீனம் கா³மந்தரதே³ஸந்தராதீ³ஸு ஸாஸனபடிஸாஸனஹரணஸ்ஸேதமதி⁴வசனம்.

211. லாபா⁴ஸாய லஞ்ஜதா³னம் அனுப்பதா³னம். ஸம்பு³த்³த⁴ப்படிகுட்டே²ன பு³த்³த⁴க³ரஹிதேன அங்க³விஜ்ஜானக்க²த்தவிஜ்ஜாஸுபினவிஜ்ஜாபூ⁴தவிஜ்ஜாதி³னா அஞ்ஞேன வா.

212. அஞ்ஞாதகானம் அப்பவாரிதானம் விஞ்ஞாபனம் விஞ்ஞத்தி, யாசனவஸேன பவத்தோ காயவசீபயோகோ³. பு³த்³த⁴ப்படிகுட்டே²ன மிச்சா²ஜீவேன பச்சயபரியேஸனா அனேஸனா. அபூ⁴தஸ்ஸ அத்தனி அவிஜ்ஜமானஸ்ஸ உத்தரிமனுஸ்ஸத⁴ம்மஸ்ஸ உல்லபனம் கத²னம் அபூ⁴துல்லபனா. குஹனாதீ³ஹீதி குஹனாலபனாதீ³ஹி. தத்த² லாப⁴ஸக்காரஸிலோகஸன்னிஸ்ஸிதஸ்ஸ பச்சயப்படிஸேவனஸாமந்தஜப்பனஇரியாபத²ஸண்டா²பனவஸேன ஜனவிம்ஹாபனா குஹனா. விஹாரம் ஆக³தே மனுஸ்ஸே தி³ஸ்வா ‘‘கிமத்தா²ய போ⁴ந்தோ ஆக³தா, கிம் பி⁴க்கூ² நிமந்தேது’’ந்தி வா ‘‘மயி ராஜா பஸன்னோ, அஸுகோ ச அஸுகோ ச ராஜமஹாமத்தோ பஸன்னோ’’தி வா ஆதி³னா நயேன ஆலபனா லபனா. கா²த³னீயம் க³ஹேத்வா க³ச்ச²ந்தே தி³ஸ்வா ‘‘கிம் கா²த³னீயம் லபி⁴த்தா²’’திஆதி³னா நயேன நிமித்தகரணாதி³ நேமித்தகதா. ‘‘அஸ்ஸத்³தோ⁴ அப்பஸன்னோ’’திஆதி³னா நயேன க³ரஹணானி ச ‘‘ஏதம் ஏத்த² கதே²தா²’’திஆதி³னா நயேன வாசாய உக்கி²பனாதி³ ச நிப்பேஸிகதா. அப்பேன லாபே⁴ன ப³ஹுகம் வஞ்சேத்வா க³ஹேதும் இச்ச²னம் லாபே⁴ன லாப⁴ம் நிஜிகீ³ஸனதா. குலதூ³ஸாதீ³தி ஏத்த² ஆதி³-ஸத்³தே³ன ரூபியப்படிக்³க³ஹணரூபியஸம்வோஹாரா ஸங்க³ய்ஹந்தீதி.

மிச்சா²ஜீவவிவஜ்ஜனானித்³தே³ஸவண்ணனா நிட்டி²தா.