19. ந்ஹானகப்பனித்³தே³ஸவண்ணனா

168. கப்பனம் கப்பியதா கப்போ, ந்ஹானே கப்போ ந்ஹானகப்போ. நவகோ தே²ரானம் புரதோ உபரி வா ந ச ந்ஹாயேய்யாதி ஸம்ப³ந்தோ⁴. ந சாதி நயேவ. புரதோதி அபி⁴முகே². உபரீதி நதி³யா உபரி.

169-171. குட்டத்த²ம்ப⁴தருட்டானே காயம் ந க⁴ம்ஸயேதி ஸம்ப³ந்தோ⁴. தத்த² குட்டம் நாம இட்ட²கதா³ருஸிலாபி⁴த்தி. த²ம்போ⁴ நாம நஹானதித்தே² நிக²னித்வா ட²பிதோ. தரூதி ருக்கோ². அட்டானம் நாம தச்சே²த்வா அட்ட²பதா³காரேன ராஜியோ சி²ந்தி³த்வா நஹானதித்தே² நிகா²தப²லகம். க³ந்த⁴ப்³ப³ஹத்தே²ன வா…பே… மல்லகேன வா காயம் ஸரீரேன வா அஞ்ஞமஞ்ஞம் ந க⁴ம்ஸயேதி ஸம்ப³ந்தோ⁴. க³ந்த⁴ப்³ப³ஹத்தே²னாதி தா³ருமயஹத்தே²ன. குருவிந்த³கஸுத்தியாதி குருவிந்த³கபாஸாணசுண்ணானி லாகா²ய ப³ந்தி⁴த்வா கதகு³ளிகாவலியா ஸுத்தேன ஆவுணிதஸுத்தியா. மல்லகேனாதி மகரத³ந்தகே சி²ந்தி³த்வா பது³மகண்ணிகஸண்டா²னேன கதமல்லகேன. ஸரீரேனாதி அத்தனோ காயேன. அஞ்ஞமஞ்ஞஸ்ஸ அஞ்ஞமஞ்ஞம் கிரியாகரணஸங்கா²தே கிரியாப்³யபி⁴ஹாரே த்³வித்தம். கபால…பே… புது²பாணி ச ஸப்³பே³ஸம் வட்டதீதி ஸம்ப³ந்தோ⁴. கபாலஞ்ச இட்ட²கா ச, தாஸம் க²ண்டா³னி. புது²பாணீதி புது² நானா பாணி புது²பாணி, ஹத்த²பரிகம்மம் ருள்ஹீவஸேன. ஸப்³பே³ஸந்தி கி³லானாகி³லானானம். கி³லானஸ்ஸ அகதமல்லகம் வட்டதீதி ஸம்ப³ந்தோ⁴. அகதமல்லகம் நாம கதமல்லகவிபரீதம். பே²ணம் நாம ஸமுத்³த³பே²ணந்தி.

ந்ஹானகப்பனித்³தே³ஸவண்ணனா நிட்டி²தா.