1. பாராஜிகனித்³தே³ஸவண்ணனா

1-2. இதா³னி தே த³ஸ்ஸேதும் ‘‘மக்³க³த்தயே’’திஆதி³ ஆரத்³த⁴ம். ஏவமுபரிபி யதா²யோக³ம் யோஜேதப்³ப³ம். தத்த² மக்³க³த்தயேதி ஏத்த² மக்³கா³ ச நாம திம்ஸ மக்³கா³. மனுஸ்ஸாமனுஸ்ஸதிரச்சா²னக³தவஸேன ஹி திஸ்ஸோ இத்தி²யோ. தத்த² திரச்சா²னக³தாய அயம் பரிச்சே²தோ³ –

‘‘அபதா³னம் அஹீ மச்சா², த்³விபதா³னஞ்ச குக்குடீ;

சதுப்பதா³னம் மஜ்ஜாரீ, வத்து² பாராஜிகஸ்ஸிமா’’தி. (பாரா. அட்ட². 1.55);

தாஸம் வச்சபஸ்ஸாவமுக²மக்³க³வஸேன தயோ தயோ கத்வா நவ மக்³கா³, ததா² உப⁴தோப்³யஞ்ஜனகானம், புரிஸானம் பன வச்சமுக²மக்³க³வஸேன த்³வே த்³வே கத்வா ச², ததா² பண்ட³கானந்தி திம்ஸ. தேஸம் தயே. கீதி³ஸேதி ஆஹ ‘‘ஸந்த²தஸந்த²தே’’தி. ஸந்த²தே அஸந்த²தேதி பத³ச்சே²தோ³. ந ஸந்த²தம் அஸந்த²தம். தஸ்மிம் அஸந்த²தே. ந-காரோ ஏத்த² ‘‘அப்³ராஹ்மணோ’’திஆதீ³ஸு விய பயிருதா³ஸே, தம் கிரியாயுத்தஸ்ஸ தாதி³ஸஸ்ஸ அஞ்ஞஸ்ஸ வத்து²னோ விதா⁴னேன ஸந்த²தஸ்ஸ வத்து²னோ பயிருதா³ஸனம் பரிச்சஜனம் பயிருதா³ஸோதி. ந பஸஜ்ஜப்படிஸேதே⁴, ஸந்த²தம் பஸஜ்ஜ பத்வா தஸ்ஸ ‘‘ப்³ராஹ்மணோ ந ப⁴விஸ்ஸதீ’’திஆதீ³ஸு விய ந நிஸேதோ⁴தி. வா-ஸத்³தோ³ பனேத்த² வசனயுத்திப³லேனேவ லப்³ப⁴தி, தஸ்ஸ பலிவேடே²த்வா, அந்தோ வா பவேஸேத்வா வத்தா²தி³னா கேனசி படிச்ச²ன்னே வா அப்படிச்ச²ன்னே வாதி அத்தோ². ததா²பூ⁴தே அல்லோகாஸே பகதிவாதேன அஸம்பு²ட்டே² திந்தப்பதே³ஸே. நிமித்தந்தி அங்க³ஜாதம். ஸந்திஆதி³ தப்³பி³ஸேஸனம். ஸந்தி அத்தனியம். ஸம்-ஸத்³தோ³ ஹி அத்தனி அத்தனியே ச வத்ததி. ஸந்த²தம் அஸந்த²தந்தி யதா²வுத்தனயேன படிச்ச²ன்னம் வா அப்படிச்ச²ன்னம் வா. உபாதி³ண்ணந்தி அனட்ட²காயப்பஸாத³ம். கித்தகந்தி ஆஹ ‘‘திலமத்தம்பீ’’தி. திலஸ்ஸ மத்தம் ஸாகல்லம் யஸ்ஸ தம் திலமத்தம். ‘‘மத்தம் ஸாகல்லம் நிச்ச²யே’’தி ஹி நிக⁴ண்டு³. ஏத்தா²பி அவயவேன விக்³க³ஹோ ஸமுதா³யோ ஸமாஸத்தோ², திலபீ³ஜப்பமாணம்பீதி வுத்தம் ஹோதி. கிம் தம்? நிமித்தம், பவேஸனம் வா. அபி-ஸத்³தோ³ ஸம்பா⁴வனே, ‘‘திலபீ³ஜமத்தம்பீ’’தி ஸம்பா⁴வீயதி, அதி⁴கே கா நாம கதா²தி இத³மேத்த² ஸம்பா⁴வனம், ஏவம்பூ⁴தம் ஸம் அங்க³ஜாதம் யதா²வுத்தே மக்³க³த்தயே திலமத்தம்பி பவேஸந்தோ பி⁴க்கு² சுதோ பரிப⁴ட்டோ², பாராஜிகோ நாம ஹோதி ஸாஸனதோதி விஞ்ஞாயதி க³ம்மமானத்த²ஸ்ஸ ஸத்³த³ஸ்ஸ பயோக³ம் பதி காமாசாரத்தா. கீதி³ஸோதி ஆஹ ‘‘அனிக்கி²த்தஸிக்கோ²’’தி. நிக்கி²த்தஸிக்கோ² பன அபி⁴க்கு²கத்தா பரிச்சத்தோ. தத்த² நிக்கி²த்தா ஓஹிதா பரிச்சத்தா பச்சக்கா²தா ஸிக்கா² ஏதேனாதி விக்³க³ஹோ. யதா²லக்க²ணம் ந நிக்கி²த்தஸிக்கோ² அனிக்கி²த்தஸிக்கோ². தத்த² சித்தகே²த்தகாலப்பயோக³புக்³க³லவிஜானனவஸேன ஸிக்கா²பச்சக்கா²னம் ஞத்வா தத³பா⁴வேன அபச்சக்கா²னம் வேதி³தப்³ப³ம்.

தத்த² உபஸம்பன்னபா⁴வதோ சவிதுகாமதாசித்தம் சித்தம் நாம. ‘‘பு³த்³த⁴ம் பச்சக்கா²மீ’’திஆதீ³னி ‘‘கி³ஹீதி மம் தா⁴ரேஹி, உபாஸகோ, ஆராமிகோ, ஸாமணேரோதி மம் தா⁴ரேஹீ’’தி ‘‘அலம் மே பு³த்³தே⁴னா’’திஆதீ³னி ச² கே²த்தபதா³னி கே²த்தம் நாம. ‘‘பச்சக்கா²மீ’’திஆதி³னா வுத்தோ வத்தமானகாலோயேவ காலோ நாம. யாய காயசி பா⁴ஸாய வஸேன வாசஸிகப்பயோகோ³வ பயோகோ³ நாம. அனும்மத்தாதி³கோ பச்சக்கா²தோ ச மனுஸ்ஸஜாதிகோ ஸோவ புக்³க³லோ நாம. பச்சக்கா²தகஸ்ஸ வசனஸமனந்தரமேவ ‘‘அயம் உக்கண்டி²தோ’’தி வா ‘‘கி³ஹிபா⁴வம் பத்த²யதீ’’தி வா ஸோதுனோ ஜானனம் விஜானனம் நாமாதி வேதி³தப்³ப³ம்.

தத்த² நட்ட²காயப்பஸாத³ம் பன பிளகம் வா சம்மகி²லம் வா லோமம் வா பவேஸந்தஸ்ஸ து³க்கடம். அக்கி²னாஸகண்ணச்சி²த்³த³வத்தி²கோஸேஸு, ஸத்த²காதீ³ஹி கதவணே வா மேது²னராகே³ன நிமித்தம் பவேஸந்தஸ்ஸ து²ல்லச்சயம். அவஸேஸஸரீரேஸு உபகச்ச²காதீ³ஸு து³க்கடம். திரச்சா²னக³தானம் ஹத்தி²அஸ்ஸகோ³க³த்³ரப⁴ஓட்ட²மஹிம்ஸாதீ³னம் நாஸாய து²ல்லச்சயம், வத்தி²கோஸே து²ல்லச்சயமேவ. ஸப்³பே³ஸம்பி திரச்சா²னக³தானம் அக்கி²கண்ணவணேஸு து³க்கடம். ததா² அவஸேஸஸரீரே காயஸம்ஸக்³க³ராகே³ன, மேது²னராகே³ன வா ஜீவமானகபுரிஸஸ்ஸ வத்தி²கோஸம் அப்பவேஸந்தோ நிமித்தேன நிமித்தம் சு²பதி, து³க்கடம். ப³ஹி நிக்க²ந்தத³ந்தேஸு வாயமந்தஸ்ஸ பன து²ல்லச்சயந்தி அயமேத்த² ஸவினிச்ச²யோ அத்த²வண்ணனக்கமோ.

இதா³னி பவேஸனம் நாம ந கேவலம் அத்துபக்கமேனேவ, பரூபக்கமேனாபி ஹோதி, தத்ராபி ஸாதி³யந்தோவ சுதோ ஹோதீதி த³ஸ்ஸேதும் ‘‘அத² வா’’திஆதி³ வுத்தம். தத்த² அத² வாதி அயம் நிபாதோ, நிபாதஸமுதா³யோ வா பக்க²ந்தராரம்பே⁴. பவேஸனஞ்ச டி²தஞ்ச உத்³தா⁴ரோ ச பவிட்ட²ஞ்ச பவேஸன…பே… பவிட்டா²னி, இதரீதரயோக³த்³வந்தோ³. இதரீதரயோகோ³ நாம அஞ்ஞமஞ்ஞத்தோ²பாதா³னதாதி பவேஸனாதீ³னி டி²தாதி³அத்தா²னிபி ஹோந்தீதி பவிட்ட²-ஸத்³தோ³பி பவேஸனாதி³அத்தோ² ஹோதி, ததோயேவேத்த² தஸ்மா ப³ஹுவசனஸம்ப⁴வோ. அஞ்ஞதா² த்³வந்தே³ அவயவத்த²பதா⁴னத்தா ஏகத்த²வாசகாபி பவிட்ட²-ஸத்³தா³ கத²ம் ப³ஹுவசனப்பஸங்கோ³. ஸமாஹாரே வா த்³வந்தோ³. க²ணோதி காலவிஸேஸோ. ஸோ ச யோக³வந்தானம் க²ணந்தரவினிமுத்தோ நத்தீ²தி பவேஸன…பே…பவிட்டா²னியேவ க²ணோதி கம்மதா⁴ரயோ, அபே⁴தே³ பே⁴த³பரிகப்பனாய வா பவேஸன…பே… பவிட்டா²னம் க²ணோதி ச²ட்டீ²தப்புரிஸோ. தஸ்ஸ ஸாத³கோ, தஸ்மிம் வா ஸாத³கோ பவேஸன…பே… ஸாத³கோ. க²ண-ஸத்³தோ³ பனேத்த² பச்சேகம் யோஜேதப்³போ³ த்³வந்த³ஸமாஸத்தா, பவேஸனகாலம் டி²தகாலம் உத்³தா⁴ரகாலம் பவிட்ட²காலம், தஸ்மிம் வா ஸாதி³யந்தோதி ஏவமேத்த² அத்தோ² த³ட்ட²ப்³போ³. ஏவம் ஸேவனசித்தபச்சுபட்டா²னேன ஸாத³கோ பி⁴க்கு² சுதோதி யோஜேதப்³ப³ம். தத்த² யதா²வுத்தப்பதே³ஸஸ்ஸ அந்தோகரணம் பவேஸனம் நாம. யாவ உத்³த⁴ரணாரம்பா⁴ நிவத்தம் டி²தம் நாம. அட்ட²கதா²யம் (பாரா. அட்ட². 1.58) பன மாதுகா³மஸ்ஸ ஸுக்கவிஸ்ஸட்டி²ம் பத்வா ஸப்³ப³தா² வாயமதோ ஓரமித்வா டி²தகாலம் ஸந்தா⁴ய ‘‘ஸுக்கவிஸ்ஸட்டி²ஸமயே’’தி வுத்தம். யாவ அக்³கா³ நீஹரணம் உத்³தா⁴ரோ நாம. யாவ பவேஸனாரஹட்டா²னா அந்தோகதம் பவிட்ட²ம் நாம.

பட²மம்.

3-4. இதா³னி து³தியம் த³ஸ்ஸேதும் ‘‘ஆதி³யேய்யா’’திஆதி³மாஹ. தத்த² அதி³ன்னம் தே²ய்யசித்தேன ஆதி³யேய்ய…பே… ஸங்கேதம் வீதினாமயே, பாராஜிகோ ப⁴வேதி ஸம்ப³ந்தோ⁴. அதி³ன்னந்தி மனுஸ்ஸஸாமிகேஹி காயவாசாஹி ந தி³ன்னம். தே²ய்யசித்தேனாதி தே²னோதி சோரோ, தஸ்ஸ பா⁴வோ தே²ய்யம் ந-காரஸ்ஸ ய-காரம் கத்வா த்³வித்தேன. ப⁴வந்தி ஏதஸ்மா அபி⁴தா⁴னபு³த்³தீ⁴தி பா⁴வோ, ஸத்³த³ப்பவத்தினிமித்தம் ஜாதிகு³ணாதி³. இத⁴ பன அவஹரணசித்தஸங்கா²தம் த³ப்³ப³ம் தே²ய்யம். தே²ய்யஞ்ச தம் சித்தஞ்சாதி தே²ய்யசித்தம், தேன. ஆதி³யேய்யாதி ஆராமாதி³ம் அபி⁴யுஞ்ஜித்வா க³ண்ஹேய்ய. ஹரேய்யாதி ஹரந்தோ க³ண்ஹேய்ய. அவஹரேய்யாதி உபனிக்கி²த்தம் ப⁴ண்ட³ம் ‘‘தே³ஹி மே ப⁴ண்ட³’’ந்தி வுச்சமானோ ‘‘ந மயா க³ஹித’’ந்திஆதீ³னி வத³ந்தோ க³ண்ஹேய்ய. இரியாபத²ம் கோபேய்யாதி ப⁴ண்ட³ஹாரகஸ்ஸ க³மனாதி³இரியாபத²ம் விச்சி²ந்தி³த்வா க³ண்ஹேய்ய. கோபம் கத்வா க³ண்ஹாதீதி ஹி ஏதஸ்மிம் அத்தே² ‘‘கோபீ’’தி நாமதா⁴து. டா²னா சாவேய்யாதி ட²பிதட்டா²னதோ சாவேய்ய. ஸங்கேதம் வீதினாமயேதி பரிகப்பிதட்டா²னம் வா ஸுங்ககா⁴தம் வா அதிக்காமேய்ய.

ஏத்த² ச ஆராமாதி³அபி⁴யுஞ்ஜனே, ஸாமிகஸ்ஸ விமதுப்பாத³னது⁴ரனிக்கே²பே, ப⁴ண்ட³ஹாரகஸ்ஸ ஸீஸபா⁴ராமஸனப²ந்தா³பனக²ந்தோ⁴ரோபனே, உபனிக்கி²த்தே ‘‘தே³ஹி மே ப⁴ண்ட³’’ந்தி சோதி³யமானஸ்ஸ ‘‘நாஹம் க³ண்ஹாமீ’’தி ப⁴ணனவிமதுப்பாத³னது⁴ரனிக்கே²பே, த²லட்ட²ஸ்ஸ தே²ய்யசித்தேனாமஸனப²ந்தா³பனடா²னாசாவனே சாதி சதூஸு பச்சேகம் யதா²க்கமம் து³க்கடது²ல்லச்சயபாராஜிகாயோ வேதி³தப்³பா³. ‘‘ஸஹப⁴ண்ட³ஹாரகம் நேஸ்ஸாமீ’’தி பட²மது³தியபாத³ஸங்காமனே, பரிகப்பிதஸுங்ககா⁴தட்டா²னதோ பட²மது³தியபாதா³திக்காமே சாதி த்³வீஸு பச்சேகம் கமேன து²ல்லச்சயபாராஜிகாயோ வேதி³தப்³பா³. அயமேத்த² ஸவிஞ்ஞாணகாவிஞ்ஞாணகமிஸ்ஸகத்தா நானாப⁴ண்ட³வஸேன யோஜனா. ஏகப⁴ண்ட³வஸேன பன ஸஸ்ஸாமிகஸ்ஸ தா³ஸஸ்ஸ வா திரச்சா²னக³தஸ்ஸ வா யதா²வுத்தேன அபி⁴யோகா³தி³னா நயேன ஆதி³யனஹரணாதி³வஸேன யோஜனா த³ட்ட²ப்³பா³.

அபிச இமானி ச² பதா³னி வண்ணயந்தேன நானாப⁴ண்ட³ஏகப⁴ண்ட³ஸாஹத்தி²கபுப்³ப³ப்பயோக³தே²ய்யாவஹாரஸங்கா²தே பஞ்சபஞ்சகே ஸமோதா⁴னேத்வா பஞ்சவீஸதி அவஹாரா த³ஸ்ஸேதப்³பா³ ச²ப்பத³ந்தோக³த⁴த்தா ஸப்³பே³ஸம்பி அவஹாரானம். தே பன அவஹாரா யேன கேனசி அபி⁴யோகா³தி³ஆகாரனானத்தமத்தேன பி⁴ன்னாதி தம்வஸேன பஞ்சபஞ்சகம் நாம ஜாதம். ஏவம் ஸம்வண்ணிதஞ்ஹி இத³ம் அதி³ன்னாதா³னபாராஜிகம் ஸுவண்ணிதம் நாம ஹோதீதி த³ட்ட²ப்³ப³ம். தத்த² புரிமானி த்³வே பஞ்சகானி ‘‘ஆதி³யேய்யா’’திஆதீ³னம் பஞ்சன்னம் பதா³னம் வஸேன லப்³ப⁴ந்தி. யம் பனேதம் ‘‘ஸங்கேதம் வீதினாமயே’’தி ச²ட்ட²ம் பத³ம், தம் ததியபஞ்சமேஸு பஞ்சகேஸு நிஸ்ஸக்³கி³யபரிகப்பாவஹாரவஸேன யோஜேதப்³ப³ம்.

தத்த² ஸாஹத்தி²க-ஸத்³தே³ன உபசாரதோ தம்ஸஹசரிதபஞ்சகம் க³ஹேத்வா ‘‘ஸாஹத்தி²கஞ்ச தம் பஞ்சகஞ்சா’’தி வா ‘‘ஸாஹத்தி²காதி³ பஞ்சக’’ந்தி மஜ்ஜே²பத³லோபவஸேன வா ஸாஹத்தி²கபஞ்சகம். ஏவமுபரிபி. தம் பன ஸாஹத்தி²கோ ஆணத்திகோ நிஸ்ஸக்³கி³யோ அத்த²ஸாத⁴கோ து⁴ரனிக்கே²போ சாதி. தத்த² ஸகோ ஹத்தோ² ஸஹத்தோ², ஸஹத்தே²ன நிப்³ப³த்தோ ஸாஹத்தி²கோ. ஏவம் ஆணத்திகோ. ஸுங்ககா⁴தபரிகப்பிதோகாஸானம் அந்தோ ட²த்வா ப³ஹி நிஸ்ஸஜ்ஜனம் நிஸ்ஸக்³கோ³, ஸோ ஏவ நிஸ்ஸக்³கி³யோ. காலம் அனியமேத்வா ஆணத்தஸ்ஸ ப⁴ண்ட³க்³க³ஹணதோ ச பரஸ்ஸ தேலகும்பி⁴யா பாத³க்³க⁴னகம் தேலம் அவஸ்ஸம் பிவனகானம் உபாஹனாதீ³னம் நிக்கி²த்தானம் தேலபாதனதோ ச புரேதரமேவ பாராஜிகஸங்கா²தம் அத்த²ம் ஸாதே⁴தீதி அத்த²ஸாத⁴கோ. ஸோ பன ஆணாபனப்பயோகோ³, உபாஹனாதீ³னம் நிக்கே²பப்பயோகோ³ ச. ஆராமாபி⁴யோகே³ ச உபனிக்கி²த்தப⁴ண்டே³ ச தாவகாலிகப⁴ண்ட³தே³ய்யானமதா³னே ச து⁴ரஸ்ஸ நிக்கே²போ து⁴ரனிக்கே²போ.

புப்³ப³ப்பயோக³பஞ்சகம் நாம புப்³ப³ப்பயோகோ³ ஸஹப்பயோகோ³ ஸம்விதா⁴வஹாரோ ஸங்கேதகம்மம் நிமித்தகம்மந்தி. தத்த² ஆணாபனம் ப⁴ண்ட³க்³க³ஹணதோ புப்³ப³த்தா புப்³ப³ப்பயோகோ³ நாம. டா²னாசாவனகி²லஸங்காமனப்பயோகே³ன ஸஹ வத்தமானோ ஸஹப்பயோகோ³. ஸம்விதா⁴ய ஸம்மந்தயித்வா க³தேஸு ஏகேனாபி ப⁴ண்டே³ டா²னா சாவிதே ஸப்³பே³ஸம் அவஹாரோ ஸம்விதா⁴வஹாரோ. ஸங்கேதகம்மந்தி புப்³ப³ண்ஹாதி³காலபரிச்சே²த³வஸேன ஸஞ்ஜானனகரணம். நிமித்தகம்மம் நாம ஸஞ்ஞுப்பாத³னத்த²ம் அக்கி²னிக²ணனாதி³கரணம்.

தே²ய்யாவஹாரபஞ்சகம் பன ஸயமேவ த³ஸ்ஸேதும் ‘‘அத² வா’’திஆதி³மாஹ. நனு ச ச²ப்பத³ந்தோக³த⁴த்தா ‘‘ஸப்³பே³ஸம்பி அவஹாரான’’ந்தி வுத்தம், ஏவம் ஸதி ‘‘அத² வா’’தி பக்க²ந்தரவஸேன விஸும் விய இத³ம் பஞ்சகம் கஸ்மா வுத்தந்தி? நனு அவோசும்ஹா ‘‘யேன கேனசி அபி⁴யோகா³தி³ஆகாரனானத்தமத்தேன பி⁴ன்னா’’தி, ஏதாதி³ஸஸ்ஸ பே⁴த³ஸ்ஸ ஸம்ப⁴வதோ பக்க²ந்தரவஸேனாபி யுஜ்ஜதீதி ஏவம் வுத்தம். இமஸ்ஸ பஞ்சகஸ்ஸ விஸும் உத்³த⁴ரித்வா வசனம் பன பஸித்³தி⁴வஸேனாதி த³ட்ட²ப்³ப³ம், குஸ-ஸத்³தே³ன குஸஸங்காமனமதி⁴ப்பேதம் அபே⁴தோ³பசாரேன. தே²ய்யஞ்ச ப³லஞ்ச குஸோ ச ச²ன்னஞ்ச பரிகப்போ ச தே²ய்யா…பே… பரிகப்பம், தீ³கோ⁴ ஸந்தி⁴வஸேன. தேன அவஹாரகோ பாராஜிகோ ப⁴வேதி ஸம்ப³ந்தோ⁴. யோ பன படிச்ச²ன்னேன அவஹாரகோ, ஸோ அத்த²தோ படிச்ச²ன்னஸ்ஸ அவஹாரகோ ஹோதீதி த்³வந்த³ஸமாஸந்தோக³த⁴த்தேபிசஸ்ஸ விரோதா⁴பா⁴வோபா⁴வஸாத⁴னோ சாயம் ச²ன்ன-ஸத்³தோ³ த³ட்ட²ப்³போ³. தத்த² ஸந்தி⁴ச்சே²த³னாதீ³னி கத்வா வா துலாகூடமானகூடகஹாபணகூடாதீ³ஹி வஞ்சேத்வா வா க³ண்ஹந்தோ தே²ய்யாவஹாரகோ. ப³லக்காரேன பரஸந்தகம் க³ண்ஹந்தோ ப³லாவஹாரகோ. குஸம் ஸங்காமேத்வா க³ண்ஹந்தோ குஸாவஹாரகோ. திணபண்ணாதீ³ஹி யம் கிஞ்சி படிச்சா²தே³த்வா பச்சா² கஸ்ஸ படிச்ச²ன்னஸ்ஸ அவஹாரகோ படிச்ச²ன்னாவஹாரகோ. ஸாடகாதி³ப⁴ண்ட³வஸேன, க³ப்³ப⁴த்³வாராதி³ஓகாஸவஸேன வா பரிகப்பேத்வா க³ண்ஹந்தோ பரிகப்பாவஹாரகோ. ஏத்த² பன பரிகப்பிதப⁴ண்ட³க்³க³ஹணே பரிகப்பிதபரிச்சே²தா³திக்கமே ச பாராஜிகம் வேதி³தப்³ப³ம்.

இதா³னி பனேத்த² வினிச்ச²யம் த³ஸ்ஸேதும் ‘‘ப⁴ண்ட³காலக்³க⁴தே³ஸேஹீ’’திஆதி³ வுத்தம். ஏத்த² அதி³ன்னாதா³னே ப⁴ண்ட³ஞ்ச காலோ ச அக்³கோ⁴ ச தே³ஸோ ச தேஹி ச பரிபோ⁴கே³ன ச வினிச்ச²யோ காதப்³போ³தி அத்தோ². தத்த² அவஹடப⁴ண்ட³ஸ்ஸ ஸஸ்ஸாமிகஸ்ஸாமிகபா⁴வம் ஸஸ்ஸாமிகேபி ஸாமிகானம் ஸாலயனிராலயபா⁴வஞ்ச உபபரிக்கி²த்வா ஸாலயகாலே சே அவஹடம், ப⁴ண்ட³ம் அக்³கா⁴பேத்வா காதப்³போ³ வினிச்ச²யோ ப⁴ண்டே³ன வினிச்ச²யோ. நிராலயகாலே சே அவஹடம், பாராஜிகம் நத்தி², ஸாமிகேஸு புன ஆஹராபேந்தேஸு தா³தப்³ப³ம். ததே³வ ஹி ப⁴ண்ட³ம் கதா³சி மஹக்³க⁴ம், கதா³சி அப்பக்³க⁴ம், தஸ்மா யஸ்மிம் காலே ப⁴ண்ட³ம் அவஹடம், தஸ்மிம்யேவ காலே யோ தஸ்ஸ அக்³கோ⁴, தேன காதப்³போ³ வினிச்ச²யோ காலேன வினிச்ச²யோ. நவப⁴ண்ட³ஸ்ஸ யோ அக்³கோ⁴, ஸோ பச்சா² பரிஹாயதி, தஸ்மா ஸப்³ப³தா³ பகதிஅக்³க⁴வஸேன அகத்வா காதப்³போ³ வினிச்ச²யோ அக்³கே⁴ன வினிச்ச²யோ. ப⁴ண்டு³ட்டா²னதே³ஸே ப⁴ண்ட³ம் அப்பக்³க⁴ம் ஹோதி, அஞ்ஞத்த² மஹக்³க⁴ம், தஸ்மா யஸ்மிம் தே³ஸே ப⁴ண்ட³ம் அவஹடம், தஸ்மிம்யேவ தே³ஸே அக்³கே⁴ன காதப்³போ³ வினிச்ச²யோ தே³ஸேன வினிச்ச²யோ. பரிபோ⁴கே³ன ஸாடகாதி³னோ ப⁴ண்ட³ஸ்ஸ அக்³கோ⁴ பரிஹாயதி, தஸ்மா தஸ்ஸ பரிபோ⁴க³வஸேன பரிஹீனாபரிஹீனபா⁴வம் உபபரிக்கி²த்வா காதப்³போ³ வினிச்ச²யோ பரிபோ⁴கே³ன வினிச்ச²யோ.

து³தியம்.

5-7. இதா³னி ததியம் த³ஸ்ஸேதும் ‘‘மனுஸ்ஸவிக்³க³ஹ’’ந்திஆதி³ ஆரத்³த⁴ம். தத்த² மனுஸ்ஸவிக்³க³ஹம் கலலதோ பட்டா²ய ஜீவமானகமனுஸ்ஸஜாதிகானம் ஸரீரம். சிச்ச பாணோதி ஸஞ்ஞாய ஸத்³தி⁴ம்யேவ ‘‘வதா⁴மி ந’’ந்தி வத⁴கசேதனாய சேதேத்வா பகப்பேத்வா. ஜீவிதா வா வியோஜயேதி யோ பி⁴க்கு² ஜாதிஉண்ணம்ஸுனா ஸமுத்³த⁴டதேலபி³ந்து³மத்தம் கலலரூபகாலே தாபனாதீ³ஹி வா ததோ வா உத்³த⁴மபி தத³னுரூபேன உபக்கமேன ரூபஜீவிதிந்த்³ரியோபக்கமே ஸதி ததா³யத்தவுத்தினோ அரூபஜீவிதஸ்ஸாபி வோரோபனஸம்ப⁴வதோ உப⁴யஜீவிதா வோரோபேய்ய. வா-ஸத்³தோ³ விகப்பே. மரணசேதனோதி மரணே சேதனா யஸ்ஸ ஸோ மரணாதி⁴ப்பாயோ. ஸத்த²ஹாரகந்தி ஜீவிதம் ஹரதீதி ஹாரகம், ஸத்த²ஞ்ச தம் ஹாரகஞ்சாதி ஸத்த²ஹாரகம், தம். அஸ்ஸ மனுஸ்ஸவிக்³க³ஹஸ்ஸ. உபனிக்கி²பேதி ஸமீபே நிக்கி²பேய்ய வா. ஏதேன தா²வரப்பயோக³ம் த³ஸ்ஸேதி. கா³ஹேய்ய மரணூபாயந்தி ‘‘ஸத்த²ம் வா ஆஹர, விஸம் வா கா²தா³’’திஆதி³னா நயேன மரணத்தா²ய உபாயம் கா³ஹாபேய்ய வா. ஏதேன ஆணத்திப்பயோகோ³ த³ஸ்ஸிதோ. வதே³ய்ய மரணே கு³ணந்தி காயவாசாதூ³தலேகா²ஹி ‘‘யோ ஏவம் மரதி, ஸோ த⁴னம் வா லப⁴தீ’’திஆதி³னா நயேன மரணே கு³ணம் பகாஸேய்ய வா. உப⁴யத்த² அதி⁴காரவஸேன வா-ஸத்³தோ³ ஆஹரிதப்³போ³. ஸோ பி⁴க்கு² சுதோதி ஸம்ப³ந்தோ⁴, ஸாஸனதோதி விஞ்ஞாயதி.

இதா³னி பனஸ்ஸ ச²ப்³பி³தே⁴ பயோகே³த³ஸ்ஸேதும் ‘‘பயோகா³’’திஆதி³மாஹ. தத்த² ஸாஹத்தி²…பே… இத்³தி⁴விஜ்ஜாமயா பயோகா³தி இமே ச² பயோகா³தி ஸம்ப³ந்தோ⁴. க-காரலோபேன பனேத்த² ‘‘ஸாஹத்தீ²’’தி வுத்தம். அத² வா அனேகத்தே² அனேகதத்³தி⁴தஸம்ப⁴வேன ஸஹத்த²ஸ்ஸாயம் பயோகோ³ ஸாஹத்தீ²தி பத³ஸித்³தி⁴ வேதி³தப்³பா³. ஸாஹத்தி² ச நிஸ்ஸக்³கோ³ ச ஆணத்தி ச தா²வரோ சாதி த்³வந்தோ³. இத்³தி⁴ ச விஜ்ஜா ச, தாஸமிமேதி இத்³தி⁴விஜ்ஜாமயா, இத்³தி⁴மயோ விஜ்ஜாமயோதி வுத்தம் ஹோதி. பயோகா³தி இமே ச²ப்பயோகா³ நாம ஹோந்தீதி அத்தோ². தத்த² ஸயம் மாரேந்தஸ்ஸ காயேன வா காயப்படிப³த்³தே⁴ன வா பஹரணம் ஸாஹத்தி²கோ பயோகோ³. தூ³ரே டி²தம் மாரேதுகாமஸ்ஸ காயாதீ³ஹி உஸுஸத்திஆதீ³னம் நிஸ்ஸஜ்ஜனம் நிஸ்ஸக்³கோ³. ‘‘அஸுகம் நாம மாரேஹீ’’திஆதி³னா ஆணாபேந்தஸ்ஸ ஆணாபனம் ஆணத்தி, ஓபாதக²ணனம் அபஸ்ஸேனஸம்விதா⁴னம் அஸிஆதீ³னம் உபனிக்கி²பனாதி³ தா²வரோ. மாரணத்த²ம் கம்மவிபாகஜாய இத்³தி⁴யா பயோஜனம் இத்³தி⁴மயோ. கம்மவிபாகஜித்³தி⁴ ச நாமேஸா ராஜாதீ³னம் ராஜித்³தி⁴ஆத³யோ. தத்த² பிதுரஞ்ஞோ ஸீஹளிந்த³ஸ்ஸ தா³டா²கோடனேன சூளஸுமனகுடும்பி³யமாரணே ராஜித்³தி⁴ த³ட்ட²ப்³பா³, தத³த்த²மேவ அத²ப்³ப³ணாதி³விஜ்ஜாய பரிஜப்பனம் விஜ்ஜாமயோ பயோகோ³.

ஏவம் ச²ப்பயோகே³ த³ஸ்ஸேத்வா தேஸு ஆணத்திப்பயோக³ஸ்ஸ நியாமகே த³ஸ்ஸேதும் ‘‘காலா’’திஆதி³ வுத்தம். தத்த² யதா²வுத்தம் ஆணத்திம் நியமேந்தி ஸங்கேதவிஸங்கேததாவஸேன பரிச்சி²ந்த³ந்தீதி ஆணத்தினியாமகா. தே பன காலோ ச வத்து² ச ஆவுத⁴ஞ்ச இரியாபதோ² சாதி சத்தாரோ, ததா² கிரியாவிஸேஸோ ஓகாஸோதி க³ணனபரிச்சே²த³வஸேன ச² ஹோந்தீதி அத்தோ². தத்த² காலோ புப்³ப³ண்ஹாதி³ யோப்³ப³னாதி³ ச. வத்து² மாரேதப்³போ³ ஸத்தோ. ஆவுத⁴ம் அஸிஆதி³. இரியாபதோ² மாரேதப்³ப³ஸ்ஸ க³மனாதி³. கிரியாவிஸேஸோ விஜ்ஜ²னாதி³. ஓகாஸோ கா³மாதி³. யோ ஹி ‘‘அஜ்ஜ, ஸ்வே’’தி அனியமேத்வா ‘‘புப்³ப³ண்ஹே மாரேஹீ’’தி வுத்தோ யதா³ கதா³சி புப்³ப³ண்ஹே மாரேதி, நத்தி² விஸங்கேதோ. யோ பன ‘‘புப்³ப³ண்ஹே’’தி வுத்தோ மஜ்ஜ²ன்ஹாதீ³ஸு மாரேதி, விஸங்கேதோ ஹோதி, ஆணாபகஸ்ஸ அனாபத்தி. ஏவம் காலஸ்ஸ ஸங்கேதவிஸங்கேததாவஸேன நியாமகதா வேதி³தப்³பா³. இமினாவ நயேன வத்து²ஆதீ³ஸுபி வினிச்ச²யோ வேதி³தப்³போ³தி.

ததியம்.

8-9. இதா³னி சதுத்த²ம் த³ஸ்ஸேதும் ‘‘ஜா²னாதி³பே⁴த³’’ந்திஆதி³மாஹ. தத்த² அத்தனி நோஸந்தம் அத்துபனாயிகஞ்ச பச்சுப்பன்னப⁴வஸ்ஸிதஞ்ச அஞ்ஞாபதே³ஸரஹிதஞ்ச ஜா²னாதி³பே⁴த³ம் கோட்டா²ஸம் கத்வா வா ஏகேகம் கத்வா வா காயேன வா வாசாய வா விஞ்ஞத்திபதே² தீ³பேந்தோ நாதி⁴மானிகோ ஞாதே சுதோ ப⁴வேதி ஸம்ப³ந்தோ⁴. தத்த² அத்தனி ஸகஸந்தானே நோஸந்தம் அனுப்பன்னத்தாயேவ அவிஜ்ஜமானம், ஏத்த² நோஸந்தோதி அத்தே² தப்புரிஸோ. ஜா²னாதி³பே⁴த³ந்தி ஜா²னம் ஆதி³ யஸ்ஸ ‘‘விமோக்க²ஸமாதி⁴ ஸமாபத்தி ஞாணத³ஸ்ஸன மக்³க³பா⁴வனா ப²லஸச்சி² கிரியாகிலேஸப்பஹானவினீவரணதாசித்தஸ்ஸ ஸுஞ்ஞாகா³ரே அபி⁴ரதீ’’தி (பாரா. 198) வுத்தஸ்ஸ ஸோ ஜா²னாதி³, ஸோவ பே⁴தோ³ விஸேஸோதி ஸமாஸோ. தம் ஜா²னாதி³பே⁴த³ம் உத்தரிமனுஸ்ஸத⁴ம்மம். அத்துபனாயிகந்தி ‘‘அயம் மயி அத்தீ²’’தி ஆரோசனவஸேன அத்தனி உபனீயதி, ‘‘அஹம் வா ஏத்த² ஸந்தி³ஸ்ஸாமீ’’தி அத்தா உபனீயதி ஏத்த² த⁴ம்மேதி வா அத்துபனாயிகோ, ஜா²னாதி³பே⁴தோ³, தம். பச்சுப்பன்னப⁴வஸ்ஸிதந்தி பச்சுப்பன்னப⁴வோ நாம இதா³னி வத்தமானோ அத்தபா⁴வோ, தன்னிஸ்ஸிதோதி ஸமாஸோ, ஸோ ச ஜா²னாதி³பே⁴தோ³யேவ, தம்.

அஞ்ஞாபதே³ஸரஹிதந்தி ‘‘யோ தே விஹாரே வஸி, ஸோ பி⁴க்கு² பட²மம் ஜா²னம் ஸமாபஜ்ஜீ’’திஆதி³னா (பாரா. 220) நயேன அஞ்ஞஸ்ஸ அபதே³ஸோ, தேன ரஹிதோ சத்தோதி தப்புரிஸஸமாஸோ, ஸோ ரஹிதோ தேனாதி வா ப³ஹுப்³பீ³ஹி, ஜா²னாதி³பே⁴தோ³வ, தம். கோட்டா²ஸம் கத்வா வாதி ‘‘பட²மம் ஜா²னம் து³தியம் ஜா²னம் ஸமாபஜ்ஜிம், பட²மம் ஜா²னம் ததியம் ஜா²னம் ஸமாபஜ்ஜி’’ந்திஆதி³னா நயேன கோட்டா²ஸம் கத்வா வா. ஏகேகம் கத்வா வாதி ‘‘பட²மம் ஜா²னம் ஸமாபஜ்ஜிம், து³தியம் ஜா²னம் ஸமாபஜ்ஜி’’ந்திஆதி³னா நயேன ஏகேகம் கத்வா வா. ஏத்த² ச ஏகந்தி டி²தே விச்சா²யம் த்³வித்தம். ஏத்த² பன கத்வாதி கரணகிரியாய ஏகேகவஸேன பி⁴ன்னஸ்ஸ ஜா²னாதி³னோ அத்த²ஸ்ஸ ஸம்ப³ந்த⁴னிச்சா² விச்சா²தி வேதி³தப்³பா³. டீகாயம் பன ‘‘கோட்டா²ஸம் வாதி ஏத்த² ‘ஜா²னலாபீ⁴, விமோக்க²லாபீ⁴, ஸமாதி⁴லாபீ⁴, ஸமாபத்திலாபீ⁴ம்ஹீ’தி ஏவமாதி³னா நயேன கோட்டா²ஸதோ வாதி அத்தோ²’’தி ச ‘‘ஏகேகம் வாதி ‘பட²மஸ்ஸ ஜா²னஸ்ஸ லாபீ⁴, து³தியஸ்ஸ ஜா²னஸ்ஸ லாபீ⁴ம்ஹீ’தி ஏவமாதி³னா நயேன ஏகேகம் வாதி அத்தோ²’’தி ச வுத்தம். ஸோ பாளியம் அட்ட²கதா²யஞ்ச அவுத்தக்கமோதி வேதி³தப்³போ³. காயேன வாதி ஹத்த²முத்³தா³தி³வஸேன காயேன வா. வாசாதி ஏத்த² ய-காரோ லுத்தனித்³தி³ட்டோ² ‘‘அலஜ்ஜிதா’’திஆதீ³ஸு விய. விஞ்ஞத்திபதே²தி காயவசீவிஞ்ஞத்தீனம் க³ஹணயோக்³யே பதே³ஸே ட²த்வாதி அஜ்ஜா²ஹரிதப்³ப³ம். தீ³பேந்தோதி ‘‘இமினா ச இமினா ச காரணேன அயம் த⁴ம்மோ மயி அத்தீ²’’தி பகாஸேந்தோ. நாதி⁴மானிகோதி அப்பத்தே பத்தஸஞ்ஞிதாஸங்கா²தோ அதி⁴கோ மானோ, ஸோ நத்தி² ஏதஸ்ஸாதி நாதி⁴மானிகோ, பி⁴க்கு². ஞாதேதி விஞ்ஞுனா மனுஸ்ஸஜாதிகேன ஸிக்கா²பச்சக்கா²னே வுத்தனயேன விஞ்ஞாதே ஸதி சுதோ ப⁴வே ஸாஸனதோதி விஞ்ஞாயதி. அஞ்ஞாபதே³ஸேன தீ³பயதோ பன து²ல்லச்சயம். ஏத்த² ச –

து³க்கடம் பட²மஸ்ஸேவ, ஸாமந்தமிதி வண்ணிதம்;

ஸேஸானம் பன திண்ணம்பி, து²ல்லச்சயமுதீ³ரிதந்தி.

சதுத்த²ம்.

10. இதா³னி சதுன்னம்பி சேதேஸமஸம்வாஸதம் அப⁴ப்³ப³தஞ்ச தீ³பேதும் ‘‘பாராஜிகேதே’’திஆதி³ ஆரத்³த⁴ம். ஏதே சத்தாரோ பாராஜிகா புக்³க³லா யதா² புரே புப்³பே³ கி³ஹிகாலே, அனுபஸம்பன்னகாலே ச விய அஸம்வாஸாதி ஸம்ப³ந்தோ⁴. ஸஹ வஸந்தி யஸ்மா ஸப்³பே³பி லஜ்ஜினோ ஏதேஸு கம்மாதீ³ஸு ந ஏகோபி ததோ ப³ஹித்³தா⁴ ஸந்தி³ஸ்ஸதீதி ஏககம்மம் ஏகுத்³தே³ஸோ ஸமஸிக்க²தாதி இமே தயோ ஸம்வாஸா நாம. தத்த² அபலோகனாதி³கம் சதுப்³பி³த⁴ம்பி ஸங்க⁴கம்மம் ஸீமாபரிச்சி²ன்னேஹி பகதத்தேஹி பி⁴க்கூ²ஹி ஏகதோ கத்தப்³ப³தா ஏககம்மம் நாம. ததா² பஞ்சவிதோ⁴பி பாதிமோக்கு²த்³தே³ஸோ ஏகதோ உத்³தி³ஸிதப்³ப³த்தா ஏகுத்³தே³ஸோ நாம. பஞ்ஞத்தம் பன ஸிக்கா²பத³ம் ஸப்³பே³ஹிபி லஜ்ஜீபுக்³க³லேஹி ஸமம் ஸிக்கி²தப்³ப³பா⁴வதோ ஸமஸிக்க²தா நாம. நத்தி² தே ஸம்வாஸா ஏதேஸந்தி அஸம்வாஸா. ‘‘அப⁴ப்³பா³’’திஆதீ³ஸு பி⁴க்கு²பா⁴வாயாதி துமத்தே² ஸம்பதா³னவசனம், தஸ்மா யதா² ஸீஸச்சி²ன்னோ ஜீவிதும் அப⁴ப்³போ³, ஏவம் சத்தாரோமே புக்³க³லா பி⁴க்கு²பா⁴வாய பி⁴க்கூ² ப⁴விதும் அப⁴ப்³பா³தி அத்தோ².

11. இதா³னி பரியாயாணத்தீஹி ஸம்ப⁴வந்தே த³ஸ்ஸேதும் ‘‘பரியாயோ சா’’திஆதி³மாஹ. பரியாயோ ச ஆணத்தி ச ததியே மனுஸ்ஸவிக்³க³ஹே லப்³ப⁴தீதி ஸம்ப³ந்தோ⁴. தத்த² காயாதீ³ஹி யதா²வுத்தேஹி ‘‘யோ ஏவம் மரதி, ஸோ த⁴னம் வா லப⁴தீ’’தி ஏவமாதி³விஞ்ஞாபகோ ப்³யஞ்ஜனபூ⁴தோ காயவசீபயோகோ³ பரியாயோ. இமினா இத³ம் தீ³பேதி – யதா² அதி³ன்னாதா³னே ‘‘ஆதி³யேய்யா’’தி (பாரா. 92) வுத்தத்தா பாரியாயகதா²ய முச்சதி, ந இத⁴ ஏவம். ‘‘ஸம்வண்ணேய்யா’’தி (பாரா. 172) பரியாயகயாயபி ந முச்சதீதி. ‘‘து³தியே பனா’’திஆதீ³ஸு அத்தோ² பாகடோயேவ. ஏவமுபரிபி பாகடமுபேக்கி²ஸ்ஸாம.

12. இதா³னி மேது²னத⁴ம்மாதீ³னம் அங்கா³னி த³ஸ்ஸேதும் ‘‘ஸேவேதூ’’திஆதி³மாஹ. ஸேவேதுகாமதாசித்தந்தி மேது²னம் ஸேவேதும் காமேதீதி ஸேவேதுகாமோ, தஸ்ஸ பா⁴வோ நாம தண்ஹா, தாய ஸேவேதுகாமதாய ஸம்பயுத்தம் சித்தந்தி தப்புரிஸோ. மேது²னத⁴ம்மஸ்ஸாதி மிது²னானம் இத்தி²புரிஸானம் இத³ந்தி மேது²னம், தமேவ த⁴ம்மோதி மேது²னத⁴ம்மோ. இத⁴ பன உபசாரவஸேன பாராஜிகாபத்தி மேது²னத⁴ம்மோ நாம. அத² வா மேது²னேன ஜாதோ த⁴ம்மோ பாராஜிகாபத்தி மேது²னத⁴ம்மோ, தஸ்ஸ மேது²னத⁴ம்மஸ்ஸ மேது²னத⁴ம்மபாராஜிகாபத்தியா. அங்க³த்³வயந்தி அங்கா³னம் காரணானம் த்³வயம். பு³தா⁴தி வினயத⁴ரா விஞ்ஞுனோ.

13. மனுஸ்ஸஸந்தி மனுஸ்ஸானம் ஸம் மனுஸ்ஸஸம், ததா³யத்தவத்து²கா ச. ஏதேன பேததிரச்சா²னக³தாயத்தம் நிவத்தேதி. ததா²ஸஞ்ஞீதி ததா² தாதி³ஸா ஸஞ்ஞா ததா²ஸஞ்ஞா, ஸா அஸ்ஸ அத்தீ²தி ததா²ஸஞ்ஞீ. பராயத்தஸஞ்ஞிதா சாதி அத்தோ². பா⁴வப்பதா⁴னா இமே நித்³தே³ஸா, பா⁴வபச்சயலோபோ வா ‘‘பு³த்³தே⁴ ரதன’’ந்திஆதீ³ஸு (கு². பா. 6.3) விய. ஏவமுபரிபி ஈதி³ஸேஸு. தே²ய்யசித்தந்தி தே²னபா⁴வஸங்கா²தம் சித்தஞ்ச. வத்து²னோ க³ருதாதி ப⁴ண்ட³ஸ்ஸ பாத³அதிரேகபாதா³ரஹபா⁴வேன க³ருதா ச. ஊனபஞ்சமாஸகே வா அதிரேகமாஸகே வா து²ல்லச்சயம். மாஸகே வா ஊனமாஸகே வா து³க்கடம். அவஹாரோதி பஞ்சவீஸதியா அவஹாரானம் அஞ்ஞதரேன அவஹரணஞ்சாதி இமே பஞ்ச அதி³ன்னாதா³னஹேதுயோ அதி³ன்னாதா³னபாராஜிகாபத்தியா அங்கா³னி.

14. பாணோ மானுஸ்ஸகோதி மனுஸ்ஸஜாதிஸம்ப³ந்தோ⁴ பாணோ ச, பாணோதி ஹி வோஹாரதோ ஸத்தோ, பரமத்த²தோ பன ஜீவிதிந்த்³ரியம் வுச்சதி. பாணஸஞ்ஞிதாதி பாணோதி ஸஞ்ஞிதா ச, கா⁴தனம் கா⁴தோ, ஸோ ஏவ சேதனா கா⁴தசேதனா, ‘‘வதா⁴மி ந’’ந்தி ஏவம் பவத்தா ஸா ச, தம்ஸமுட்டி²தோ ஸாஹத்தி²காதீ³னம் ச²ன்னமஞ்ஞதரோ பயோகோ³ ச, தேன பயோகே³ன மரணஞ்சாதி ஏதே யதா²வுத்தா பஞ்ச வத⁴ஹேதுயோ பாணகா⁴தாபஜ்ஜிதப்³ப³ஆபத்தியா அங்கா³னீதி அத்தோ².

15. அத்தனி அஸந்ததாதி உத்தரிமனுஸ்ஸத⁴ம்மஸ்ஸ ஸந்தானே அவிஜ்ஜமானதா ச. பாபமிச்ச²தாயாரோசனாதி யா ஸா ‘‘இதே⁴கச்சோ து³ஸ்ஸீலோ ஸமானோ ‘ஸீலவாதி மம் ஜனோ ஜானாதூ’’திஆதி³னா (விப⁴. 851) நயேன வுத்தா பாபஇச்ச²தாய ஸமன்னாக³தா, தாய உத்தரிமனுஸ்ஸத⁴ம்மஸ்ஸ ஆரோசனா ச. தஸ்ஸாதி யஸ்ஸ ஆரோசேதி, தஸ்ஸ. மனுஸ்ஸஜாதிதாதி மனுஸ்ஸானம் ஜாதி யஸ்ஸ, தஸ்ஸ பா⁴வோ மனுஸ்ஸஜாதிதா, ஸா ச, நஞ்ஞாபதே³ஸோதி ந அஞ்ஞாபதே³ஸோ அஞ்ஞாபதே³ஸாபா⁴வோ ச, ததே³வ ஜானனந்தி தங்க²ணம்யேவ விஜானனஞ்சாதி இமானி பஞ்ச ஏத்த² அஸந்ததீ³பனே அஸ்மிம் ஸந்தானே அவிஜ்ஜமானஉத்தரிமனுஸ்ஸத⁴ம்மப்பகாஸனனிமித்தே பாராஜிகே அங்கா³னி ஹேதுயோதி அத்தோ².

16. ஏவம் தேஸமஸம்வாஸதாப⁴ப்³ப³தாதீ³னி த³ஸ்ஸேத்வா இதா³னி ந தே சத்தாரோவ, அத² கோ² ஸந்தஞ்ஞேபீதி தே ஸப்³பே³பி ஸமோதா⁴னேத்வா த³ஸ்ஸேந்தோ ‘‘அஸாதா⁴ரணா’’திஆதி³மாஹ. தத்த² அஸாதா⁴ரணாதி பாராஜிகா த⁴ம்மா அதி⁴ப்பேதா. தேனேவ சேத்த² புல்லிங்க³னித்³தே³ஸோ. தஸ்மா பி⁴க்கு²னீனம் பி⁴க்கூ²ஹி அஸாதா⁴ரணா பாராஜிகா த⁴ம்மா சத்தாரோ சாதி ஏவமேத்த² அத்தோ² த³ட்ட²ப்³போ³. உபசாரவஸேன து உப்³ப⁴ஜாணுமண்ட³லிகாதி³கா பாராஜிகாபன்னா பரிக்³க³ய்ஹந்தி. தாஸு யா அவஸ்ஸுதா அவஸ்ஸுதஸ்ஸ மனுஸ்ஸபுரிஸஸ்ஸ அக்க²கானம் அதோ⁴ ஜாணுமண்ட³லானம் கப்பரானஞ்ச உபரி காயஸம்ஸக்³க³ம் ஸாதி³யதி, அயம் உப்³ப⁴ஜாணுமண்ட³லிகா. யா பன அஞ்ஞிஸ்ஸா பி⁴க்கு²னியா பாராஜிகம் படிச்சா²தே³தி, ஸா வஜ்ஜப்படிச்சா²தி³கா. யா உக்கி²த்தகம் பி⁴க்கு²ம் தஸ்ஸா தி³ட்டி²யா க³ஹணவஸேன அனுவத்ததி, ஸா உக்கி²த்தானுவத்திகா. காயஸம்ஸக்³க³ராகே³ன திந்தஸ்ஸ ஹத்த²க்³க³ஹணம் ஸங்கா⁴டிகண்ணக்³க³ஹணம் காயஸம்ஸக்³க³த்தா²ய புரிஸஸ்ஸ ஹத்த²பாஸே டா²னம் ட²த்வா ஸல்லபனம் ஸங்கேதக³மனம் புரிஸஸ்ஸாக³மனஸாதி³யனம் படிச்ச²ன்னோகாஸவவிஸனம் ஹத்த²பாஸே ட²த்வா காயோபஸம்ஹரணந்தி இமானி அட்ட² வத்தூ²னி யஸ்ஸா அவஸ்ஸுதாய, ஸா அட்ட²வத்து²கா நாம.

அப⁴ப்³ப³கா ஏகாத³ஸ சாதி ஏத்த² பண்ட³கோ தே²ய்யஸம்வாஸகோ தித்தி²யபக்கந்தகோ திரச்சா²னக³தோ மாதுகா⁴தகோ பிதுகா⁴தகோ அரஹந்தகா⁴தகோ பி⁴க்கு²னிதூ³ஸகோ ஸங்க⁴பே⁴த³கோ லோஹிதுப்பாத³கோ உப⁴தோப்³யஞ்ஜனகோதி இமே அப⁴ப்³பா³ ஏகாத³ஸ ச. தேஸு பண்ட³கோதி ஓபக்கமிகனபும்ஸகபண்ட³கா ச பண்ட³கபா⁴வபக்கே² பக்க²பண்ட³கோ ச இத⁴ அதி⁴ப்பேதா. ஆஸித்தஉஸூயபண்ட³கானம் பன பப்³ப³ஜ்ஜா ச உபஸம்பதா³ ச ந வாரிதா. தே²ய்யஸம்வாஸகோ பன லிங்க³த்தே²னகாதி³வஸேன திவிதோ⁴. தத்த² ஸயம் பப்³ப³ஜிதத்தா லிங்க³மத்தம் தே²னேதீதி லிங்க³த்தே²னகோ. பி⁴க்கு²வஸ்ஸக³ணனாதி³கம் ஸம்வாஸம் தே²னேதீதி ஸம்வாஸத்தே²னகோ. ஸிக்க²ம் பச்சக்கா²ய ஏவம் படிபஜ்ஜந்தேபி ஏஸேவ நயோ. யதா²வுத்தமுப⁴யம் தே²னேதீதி உப⁴யத்தே²னகோ. ட²பேத்வா பன இமம் திவித⁴ம் –

ராஜது³ப்³பி⁴க்க²கந்தார-ரோக³வேரிப⁴யேன வா;

சீவராஹரணத்த²ம் வா, லிங்க³ம் ஆதி³யதீத⁴ யோ.

ஸம்வாஸம் நாதி⁴வாஸேதி, யாவ ஸோ ஸுத்³த⁴மானஸோ;

தே²ய்யஸம்வாஸகோ நாம, தாவ ஏஸ ந வுச்சதீதி. (மஹாவ. அட்ட². 110; கங்கா². அட்ட². பட²மபாராஜிகவண்ணனா);

தித்தி²யபக்கந்தகாத³யோ து தம்தம்வசனத்தா²னுஸாரேன வேதி³தப்³பா³. திரச்சா²னக³தோ பன ட²பேத்வா மனுஸ்ஸஜாதிகம் அவஸேஸோ ஸப்³போ³ வேதி³தப்³போ³. இமே ஏகாத³ஸ புக்³க³லா பி⁴க்கு²பா⁴வாய அப⁴ப்³ப³த்தா பாராஜிகாபன்னஸதி³ஸதாய ‘‘பாராஜிகா’’தி வுச்சந்தி. விப்³ப⁴ந்தா பி⁴க்கு²னீதி கி³ஹினிவாஸனனிவத்தா² பி⁴க்கு²னீ ச. ஸா ஹி ஏத்தாவதா பாராஜிகா. முது³கா பிட்டி² யஸ்ஸ, ஸோ ச. ஸோ ஹி அனபி⁴ரதியா பீளிதோ யதா³ அத்தனோ அங்க³ஜாதம் அத்தனோ வச்சமுக²மக்³கே³ஸு பவேஸேதி, ததா³ பாராஜிகோ ஹோதி.

17-18. லம்ப³மானமங்க³ஜாதமேதஸ்ஸாதி லம்பீ³. ஸோ யதா²வுத்தேஸு பவேஸிதோ பாராஜிகோ. முகே²ன க³ண்ஹந்தோ அங்க³ஜாதம் பரஸ்ஸ சாதி யோ அனபி⁴ரதியா பீளிதோ பரஸ்ஸ ஸுத்தஸ்ஸ வா மதஸ்ஸ வா அங்க³ஜாதம் முகே²ன க³ண்ஹாதி, ஸோ பரஸ்ஸ அங்க³ஜாதம் முகே²ன க³ண்ஹந்தோ ச. தத்தே²வாபி⁴னிஸீத³ந்தோதி யோ அனபி⁴ரதியா பீளிதோ தத்தே²வ பரஸ்ஸ அங்க³ஜாதே வச்சமக்³கே³ன அபி⁴னிஸீத³தி, ஸோ சாதி ஏதே த்³வயம்த்³வயஸமாபத்தியா அபா⁴வேபி மக்³கே³ மக்³க³ப்பவேஸனஹேது மேது²னஸ்ஸ அனுலோமிகா சத்தாரோ ச. இதா⁴க³தா சத்தாரோதி இத⁴ கு²த்³த³ஸிக்கா²யம் யதா²வுத்தா மேது²னத⁴ம்மா பாராஜிகாத³யோ சத்தாரோ சாதி ஸமோதா⁴னா பிண்டீ³கரணவஸேன சதுவீஸதி பாராஜிகா ப⁴வந்தீதி ஸேஸோ. ஏத்த² ச கா³தா²ப³ந்த⁴வஸேன ரஸ்ஸம் கத்வா ‘‘பராஜிகா’’தி வுத்தம். ஏத்தா²ஹ – மாதுகா⁴தகாத³யோ ததியம் பாராஜிகம் ஆபன்னா, பி⁴க்கு²னிதூ³ஸகோ, முது³பிட்டி²காத³யோ சத்தாரோ ச பட²மபாராஜிகம் ஆபன்னா ஏவாதி குதோ சதுவீஸதீதி? வுச்சதே – மாதுகா⁴தகாத³யோ ஹி சத்தாரோ இத⁴ அனுபஸம்பன்னா ஏவ அதி⁴ப்பேதா. முது³பிட்டி²காத³யோ சத்தாரோ கிஞ்சாபி பட²மபாராஜிகேன ஸங்க³ஹிதா, யஸ்மா பன ஏகேன பரியாயேன மேது²னத⁴ம்மம் அப்படிஸேவினோ ஹோந்தி, தஸ்மா விஸும் வுத்தாதி.

பாராஜிகனித்³தே³ஸவண்ணனா நிட்டி²தா.