8. காலிகனித்³தே³ஸோ

காலிகா சாதி –

84. படிக்³க³ஹிதா சத்தாரோ, காலிகா யாவகாலிகம்;

யாமகாலிகம் ஸத்தாஹ-காலிகம் யாவஜீவிகம்.

85. பிட்ட²ம் மூலம் ப²லம் க²ஜ்ஜம், கோ³ரஸோ த⁴ஞ்ஞபோ⁴ஜனம்;

யாகு³ஸூபப்பபு⁴தயோ, ஹோந்தேதே யாவகாலிகா.

86. மது⁴முத்³தி³கஸாலூக-சோசமோசம்ப³ஜம்பு³ஜம்;

பா²ருஸம் நக்³கி³ஸந்தத்தம், பானகம் யாமகாலிகம்.

87. ஸானுலோமானி த⁴ஞ்ஞானி, ட²பேத்வா ப²லஜோ ரஸோ;

மதூ⁴கபுப்ப²மஞ்ஞத்ர, ஸப்³போ³ புப்ப²ரஸோபி ச.

88. ஸப்³ப³பத்தரஸோ சேவ, ட²பேத்வா பக்கடா³கஜம்;

ஸீதோத³மத்³தி³தோதி³ச்ச-பாகோ வா யாமகாலிகோ.

89. ஸப்பினோனீததேலானி, மது⁴பா²ணிதமேவ ச;

ஸத்தாஹகாலிகா ஸப்பி, யேஸம் மம்ஸமவாரிதம்.

90. தேலம் திலவஸேரண்ட³-மது⁴ஸாஸபஸம்ப⁴வம்;

கு²த்³தா³ப⁴மரமது⁴கரி-மக்கி²காஹி கதம் மது⁴;

ரஸாதி³உச்சு²விகதி, பக்காபக்கா ச பா²ணிதம்.

91. ஸவத்து²பக்கா ஸாமம் வா, வஸா காலே அமானுஸா;

அஞ்ஞேஸம் ந பசே வத்து²ம், யாவகாலிகவத்து²னம்.

92. ஹலித்³தி³ம் ஸிங்கி³வேரஞ்ச, வசத்தம் லஸுணம் வசா;

உஸீரம் ப⁴த்³த³முத்தஞ்சாதிவிஸா கடுரோஹிணீ;

பஞ்சமூலாதி³கஞ்சாபி, மூலம் தம் யாவஜீவிகம்.

93. பி³ளங்க³ம் மரிசம் கோ³ட்ட²-ப²லம் பிப்ப²லி ராஜிகா;

திப²லேரண்ட³காதீ³னம், ப²லம் தம் யாவஜீவிகம்.

94. கப்பாஸனிம்ப³குடஜபடோலஸுலஸாதி³னம்;

ஸூபேய்யபண்ணம் வஜ்ஜேத்வா, பண்ணம் தம் யாவஜீவிகம்.

95. ட²பேத்வா உச்சு²னிய்யாஸம்,

ஸரஸம் உச்சு²ஜம் தசம்;

நிய்யாஸோ ச தசோ ஸப்³போ³,

லோணம் லோஹம் ஸிலா ததா².

96. ஸுத்³த⁴ஸித்த²ஞ்ச ஸேவாலோ, யஞ்ச கிஞ்சி ஸுஜா²பிதம்;

விகடாதி³ப்பபே⁴த³ஞ்ச, ஞாதப்³ப³ம் யாவஜீவிகம்.

97. மூலம் ஸாரம் தசோ பே²க்³கு³, பண்ணம் புப்ப²ம் ப²லம் லதா;

ஆஹாரத்த² மஸாதே⁴ந்தம், ஸப்³ப³ம் தம் யாவஜீவிகம்.

98. ஸப்³ப³காலிகஸம்போ⁴கோ³, காலே ஸப்³ப³ஸ்ஸ கப்பதி;

ஸதி பச்சயே விகாலே, கப்பதே காலிகத்தயம்.

99. காலயாமமதிக்கந்தா, பாசித்திம் ஜனயந்துபோ⁴;

ஜனயந்தி உபோ⁴பேதே, அந்தோவுத்த²ஞ்ச ஸன்னிதி⁴ம்.

100. ஸத்தாஹகாலிகே ஸத்த, அஹானி அதினாமிதே;

பாசித்தி பாளினாருள்ஹே, ஸப்பிஆதி³ம்ஹி து³க்கடம்.

101. நிஸ்ஸட்ட²லத்³த⁴ம் மக்கே²ய்ய, நங்க³ம் நஜ்ஜோ²ஹரேய்ய ச;

விகப்பேந்தஸ்ஸ ஸத்தாஹே, ஸாமணேரஸ்ஸதி⁴ட்ட²தோ;

மக்க²னாதி³ஞ்ச நாபத்தி, அஞ்ஞஸ்ஸ த³த³தோபி ச.

102. யாவகாலிகஆதீ³னி, ஸம்ஸட்டா²னி ஸஹத்தனா;

கா³ஹாபயந்தி ஸப்³பா⁴வம், தஸ்மா ஏவமுதீ³ரிதம்.

103. புரே படிக்³க³ஹிதஞ்ச, ஸத்தாஹம் யாவஜீவிகம்;

ஸேஸகாலிகஸம்மிஸ்ஸம், பாசித்தி பரிபு⁴ஞ்ஜதோ.

104. யாவகாலிகஸம்மிஸ்ஸம், இதரம் காலிகத்தயம்;

படிக்³க³ஹிதம் தத³ஹு, தத³ஹேவ ச பு⁴ஞ்ஜயே.

105. யாமகாலிகஸம்மிஸ்ஸம், ஸேஸமேவம் விஜானியம்;

ஸத்தாஹகாலிகமிஸ்ஸஞ்ச, ஸத்தாஹம் கப்பதேதரந்தி.