5. பத்தனித்³தே³ஸோ

பத்தோ சாதி –

60. அயோபத்தோ பூ⁴மிபத்தோ, ஜாதியா கப்பியா து³வே;

உக்கட்டோ² மஜ்ஜி²மோ சேவ, ஓமகோ ச பமாணதோ.

61. உக்கட்டோ² மக³தே⁴ நாளி-த்³வயதண்டு³லஸாதி⁴தம்;

க³ண்ஹாதி ஓத³னம் ஸூபம், ப்³யஞ்ஜனஞ்ச ததூ³பியம்.

62. மஜ்ஜி²மோ தஸ்ஸுபட்³டோ⁴வ, ததோபட்³டோ⁴வ ஓமகோ;

உக்கட்ட²தோ ச உக்கட்டோ², அபத்தோ ஓமகோமகோ.

63. அதிரேகபத்தோ தா⁴ரேய்யோ, த³ஸாஹபரமம் ஸகோ;

கப்போ நிஸ்ஸக்³கி³யோ ஹோதி, தஸ்மிம் காலேதினாமிதே.

64. அச்சே²த³தா³னகா³ஹேஹி, விப்³ப⁴மா மரணுத்³த⁴டா;

லிங்க³ஸிக்கா²ஹி சி²த்³தே³ன, பத்தாதி⁴ட்டா²னமுஜ்ஜ²தி.

65. பத்தம் ந படிஸாமேய்ய, ஸோத³கம் ந ச ஓதபே;

உண்ஹே ந நித³ஹே பு⁴ம்யா, ந ட²பே நோ ச லக்³க³யே.

66. மிட்³ட⁴ந்தே பரிப⁴ண்ட³ந்தே, அங்கே வா ஆதபத்தகே;

பாதே³ஸு மஞ்சபீடே² வா, ட²பேதும் ந ச கப்பதி.

67. ந நீஹரேய்ய உச்சி²ட்டோ²-த³கஞ்ச சலகட்டி²கம்;

பத்தேன பத்தஹத்தோ² வா, கவாடம் ந பணாமயே.

68. பூ⁴மிஆதா⁴ரகே தா³ருத³ண்டா³தா⁴ரே ஸுஸஜ்ஜிதே;

து³வே பத்தே ட²பேய்யேகம், நிக்குஜ்ஜித்வான பூ⁴மியம்.

69. தா³ருரூபியஸோவண்ண-மணிவேளுரியாமயா;

கம்ஸகாசதிபுஸீஸப²லிகாதம்ப³லோஹஜா.

70. ச²வஸீஸமயோ சாபி, க⁴டீதும்ப³கடாஹஜா;

பத்தா அகப்பியா ஸப்³பே³, வுத்தா து³க்கடவத்து²காதி.