45. பவாரணானித்³தே³ஸோ

பவாரணாதி –

433. த்³வின்னம் திண்ணம் சதுன்னஞ்ச, அஞ்ஞமஞ்ஞப்பவாரணா;

ஏகஸ்ஸ ச அதி⁴ட்டா²னம், ஸேஸா ஸங்க⁴ப்பவாரணா.

434. புப்³ப³கிச்சே ச கரணே, பத்தகல்லே ஸமானிதே;

ட²பேத்வா ஞத்திம் ஸங்கே⁴ன, கத்தப்³பே³வம் பவாரணா.

‘‘ஸுணாது மே ப⁴ந்தே ஸங்கோ⁴, அஜ்ஜ பவாரணா பன்னரஸீ, யதி³ ஸங்க⁴ஸ்ஸ பத்தகல்லம், ஸங்கோ⁴ பவாரேய்யா’’தி.

435. ஏகம்ஸம் சீவரம் கத்வா, நிஸீதி³த்வா உக்குடிகம்;

தே²ரேன அஞ்ஜலிம் ஸங்கோ⁴, பக்³க³ய்ஹ ஸமுதீ³ரியோ.

436. ‘‘ஸங்க⁴ம், ஆவுஸோ, பவாரேமி தி³ட்டே²ன வா ஸுதேன வா பரிஸங்காய வா, வத³ந்து மம் ஆயஸ்மந்தோ அனுகம்பம் உபாதா³ய, பஸ்ஸந்தோ படிகரிஸ்ஸாமி. து³தியம்பி…பே… ததியம்பி, ஆவுஸோ, ஸங்க⁴ம் பவாரேமி தி³ட்டே²ன வா ஸுதேன வா பரிஸங்காய வா, வத³ந்து மம் ஆயஸ்மந்தோ அனுகம்பம் உபாதா³ய, பஸ்ஸந்தோ படிகரிஸ்ஸாமீ’’தி.

437. பவாரேந்தேஸு தே²ரேஸு, நிஸஜ்ஜுக்குடிகம் நவோ;

பவாரேதி ஸயம் யாவ, உக்குடிகோவ அச்ச²து.

438. புப்³பா³ரம்ப⁴ம் ஸமாபேத்வா, நவோ ஸங்க⁴முதீ³ரயே.

439. ‘‘ஸங்க⁴ம், ப⁴ந்தே, பவாரேமி தி³ட்டே²ன வா ஸுதேன வா பரிஸங்காய வா, வத³ந்து மம் ஆயஸ்மந்தோ அனுகம்பம் உபாதா³ய, பஸ்ஸந்தோ படிகரிஸ்ஸாமி. து³தியம்பி…பே… ததியம்பி, ப⁴ந்தே, ஸங்க⁴ம் பவாரேமி தி³ட்டே²ன வா ஸுதேன வா பரிஸங்காய வா, வத³ந்து மம் ஆயஸ்மந்தோ அனுகம்பம் உபாதா³ய, பஸ்ஸந்தோ படிகரிஸ்ஸாமீ’’தி.

440. தா³னேன த⁴ம்மஸாகச்சா², கலஹேஹி ச ரத்தியா;

தேவாசிகாய ஓகாஸே-ஸதி கே²பிதபா⁴வதோ;

அந்தராயே த³ஸவிதே⁴, ஞத்திம் வத்வானுரூபதோ.

441. ‘‘ஸுணாது மே ப⁴ந்தே ஸங்கோ⁴, மனுஸ்ஸேஹி தா³னம் தே³ந்தேஹி, த்³வீஹி பி⁴க்கூ²ஹி த⁴ம்மம் ஸாகச்ச²ந்தேஹி, கலஹம் கரோந்தேஹி யேபு⁴ய்யேன ரத்தி கே²பிதா. ஸசே ஸங்கோ⁴ தேவாசிகம் பவாரேஸ்ஸதி, அப்பவாரிதோவ ஸங்கோ⁴ ப⁴விஸ்ஸதி, அதா²யம் ரத்தி விபா⁴யிஸ்ஸதி. அயம் ராஜந்தராயோ, அயம் சோரந்தராயோ, அயம் அக்³யந்தராயோ, அயம் உத³கந்தராயோ, அயம் மனுஸ்ஸந்தராயோ, அயம் அமனுஸ்ஸந்தராயோ, அயம் வாளந்தராயோ, அயம் ஸரீஸபந்தராயோ, அயம் ஜீவிதந்தராயோ, அயம் ப்³ரஹ்மசரியந்தராயோ. ஸசே ஸங்கோ⁴ தேவாசிகம் பவாரேஸ்ஸதி, அப்பவாரிதோவ ஸங்கோ⁴ ப⁴விஸ்ஸதி, அதா²யம் ப்³ரஹ்மசரியந்தராயோ ப⁴விஸ்ஸதி. யதி³ ஸங்க⁴ஸ்ஸ பத்தகல்லம், ஸங்கோ⁴ த்³வேவாசிகம், ஏகவாசிகம், ஸமானவஸ்ஸிகம் பவாரேய்யா’’தி.

442. பவாரேய்யானுரூபேன, யதா²ட²பிதஞத்தியா;

ஆக³ச்சே²ய்யும் யதி³ ஸமா, ஆதி³கா சேத்த² ஆஹரே.

443. ஏவம் திசதுவக்³கோ³ ச, ஞத்திம் வத்வா பவாரயே. ‘‘ஸுணந்து மே ஆயஸ்மந்தா, அஜ்ஜ பவாரணா பன்னரஸீ, யதா³யஸ்மந்தானம் பத்தகல்லம், மயம் அஞ்ஞமஞ்ஞம் பவாரேய்யாமா’’தி.

444. ஏகம்ஸம் சீவரம் கத்வா, நிஸீதி³த்வா உக்குடிகம்;

தே²ரேன அஞ்ஜலிம் தேவம், பக்³க³ய்ஹ ஸமுதீ³ரியா.

445. ‘‘அஹம், ஆவுஸோ, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா, வத³ந்து மம் ஆயஸ்மந்தா அனுகம்பம் உபாதா³ய, பஸ்ஸந்தோ படிகரிஸ்ஸாமி. து³தியம்பி…பே… ததியம்பி அஹம், ஆவுஸோ, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா, வத³ந்து மம் ஆயஸ்மந்தா அனுகம்பம் உபாதா³ய, பஸ்ஸந்தோ படிகரிஸ்ஸாமீ’’தி.

நவேனாபி ‘‘அஹம், ப⁴ந்தே, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா, வத³ந்து மம் ஆயஸ்மந்தா அனுகம்பம் உபாதா³ய, பஸ்ஸந்தோ படிகரிஸ்ஸாமி. து³தியம்பி…பே… ததியம்பி அஹம், ப⁴ந்தே, ஆயஸ்மந்தே பவாரேமி தி³ட்டே²ன வா ஸுதேன வா பரிஸங்காய வா, வத³ந்து மம் ஆயஸ்மந்தா அனுகம்பம் உபாதா³ய, பஸ்ஸந்தோ படிகரிஸ்ஸாமீ’’தி.

446. த்³வீஸு தே²ரேன கத்தப்³ப³ம், நவோ கத்வேவமீரியோ.

447. ‘‘அஹம், ஆவுஸோ, ஆயஸ்மந்தம் பவாரேமி தி³ட்டே²ன வா ஸுதேன வா பரிஸங்காய வா, வத³து மம் ஆயஸ்மா அனுகம்பம் உபாதா³ய, பஸ்ஸந்தோ படிகரிஸ்ஸாமி. து³தியம்பி…பே… ததியம்பி அஹம், ஆவுஸோ, ஆயஸ்மந்தம் பவாரேமி தி³ட்டே²ன வா ஸுதேன வா பரிஸங்காய வா, வத³து மம் ஆயஸ்மா அனுகம்பம் உபாதா³ய, பஸ்ஸந்தோ படிகரிஸ்ஸாமீ’’தி.

நவேனாபி ‘‘அஹம், ப⁴ந்தே, ஆயஸ்மந்தம் பவாரேமி தி³ட்டே²ன வா ஸுதேன வா பரிஸங்காய வா, வத³து மம் ஆயஸ்மா அனுகம்பம் உபாதா³ய, பஸ்ஸந்தோ படிகரிஸ்ஸாமி. து³தியம்பி…பே… ததியம்பி அஹம், ப⁴ந்தே, ஆயஸ்மந்தம் பவாரேமி தி³ட்டே²ன வா ஸுதேன வா பரிஸங்காய வா, வத³து மம் ஆயஸ்மா அனுகம்பம் உபாதா³ய, பஸ்ஸந்தோ படிகரிஸ்ஸாமீ’’தி.

448. புப்³ப³கிச்சம் ஸமாபேத்வா, அதி⁴ட்டே²ய்யேவமேககோ. ‘‘அஜ்ஜ மே பவாரணா சாதுத்³த³ஸீதி வா பன்னரஸீதி வா அதி⁴ட்டா²மீ’’தி வத்தப்³ப³ம்.

449. யஸ்மிம் வஸந்தி வா பஞ்ச, சத்தாரோ வா தயோ து³வே;

பவாரணம் ஹரித்வான, ஏகேகஸ்ஸிதரீதரே.

450. தம் தம் பவாரணம் கயிரும்,

ஸியா ஆபத்தி து³க்கடம்;

ஸேஸா உபோஸதே² வுத்தா,

கா³தா²யோ சேத்த² ஆஹரே.

451. பவாரிதேவ ஸங்க⁴ம்ஹி, பாரிஸுத்³தி⁴உபோஸத²ம்;

கரேய்ய சி²ன்னவஸ்ஸோ வா, அவுத்தோ² வானுபக³தோ.

452. சாதுமாஸினியா சாபி, கதே ஸங்கே⁴னுபோஸதே²;

வுத்த²வஸ்ஸா பவாரேய்யும், ஸசே அப்பதரா ஸியுந்தி.