42. தே³ஸனானித்³தே³ஸோ

தே³ஸனாதி –

382. சாகோ³ யோ பி⁴க்கு²பா⁴வஸ்ஸ, ஸா பாராஜிகதே³ஸனா;

யதா²வுத்தேன வுட்டா²னம், க³ருகாபத்திதே³ஸனா.

383. உக்குடிகம் நிஸீதி³த்வா, பக்³க³ண்ஹித்வான அஞ்ஜலிம்;

து²ல்லச்சயாதி³ம் தே³ஸேய்ய, ஏவமேகஸ்ஸ ஸந்திகே.

384. ‘‘அஹம், ப⁴ந்தே, ஏகம் து²ல்லச்சயாபத்திம் ஆபஜ்ஜிம், தம் தும்ஹமூலே படிதே³ஸேமீ’’தி வத்வா தேன ‘‘பஸ்ஸஸி, ஆவுஸோ, தம் ஆபத்தி’’ந்தி வுத்தே ‘‘ஆம, ப⁴ந்தே, பஸ்ஸாமீ’’தி வத்வா புன தேன ‘‘ஆயதிம், ஆவுஸோ, ஸம்வரேய்யாஸீ’’தி வுத்தே ‘‘ஸாது⁴ ஸுட்டு², ப⁴ந்தே, ஸம்வரிஸ்ஸாமீ’’தி வத்தப்³ப³ம். ‘‘அஹம், ப⁴ந்தே, த்³வே து²ல்லச்சயாபத்தியோ ஆபஜ்ஜிம், அஹம் ப⁴ந்தே ஸம்ப³ஹுலா து²ல்லச்சயாபத்தியோ ஆபஜ்ஜிம், தா தும்ஹமூலே படிதே³ஸேமீ’’தி வத்தப்³ப³ம்.

நிஸ்ஸக்³கி³யேஸு பன ‘‘இத³ம் மே, ப⁴ந்தே, சீவரம் த³ஸாஹாதிக்கந்தம் நிஸ்ஸக்³கி³யம், இமாஹம் ஆயஸ்மதோ நிஸ்ஸஜ்ஜாமீ’’தி. ‘‘இமானி மே, ப⁴ந்தே, சீவரானி…பே… ஏதம் மே, ப⁴ந்தே, சீவரம்…பே… ஏதானி மே, ப⁴ந்தே, சீவரானி த³ஸாஹாதிக்கந்தானி நிஸ்ஸக்³கி³யானி, ஏதானாஹம் ஆயஸ்மதோ நிஸ்ஸஜ்ஜாமீ’’தி.

385. நிஸ்ஸஜ்ஜித்வான தே³ஸேய்ய, ஆபத்திம் தேன பி⁴க்கு²னா;

படிக்³க³ஹேத்வா ஆபத்திம், தே³ய்யம் நிஸ்ஸட்ட²சீவரம்.

‘‘இமம், இமானி, ஏதம், ஏதானி சீவரானி ஆயஸ்மதோ த³ம்மீ’’தி.

386. (க) இத³ம் மே, ப⁴ந்தே, சீவரம் ரத்திவிப்பவுத்த²ம் அஞ்ஞத்ர பி⁴க்கு²ஸம்முதியா நிஸ்ஸக்³கி³யம்.

(க²) இத³ம் மே, ப⁴ந்தே, அகாலசீவரம் மாஸாதிக்கந்தம் நிஸ்ஸக்³கி³யம்.

(க³) இத³ம் மே, ப⁴ந்தே, புராணசீவரம் அஞ்ஞாதிகாய பி⁴க்கு²னியா தோ⁴வாபிதம் நிஸ்ஸக்³கி³யம்.

(க⁴) இத³ம் மே, ப⁴ந்தே, சீவரம் அஞ்ஞாதிகாய பி⁴க்கு²னியா ஹத்த²தோ படிக்³க³ஹிதம் அஞ்ஞத்ர பாரிவத்தகா நிஸ்ஸக்³கி³யம்.

(ங) இத³ம் மே, ப⁴ந்தே, சீவரம் அஞ்ஞாதகம் க³ஹபதிகம் அஞ்ஞத்ர ஸமயா விஞ்ஞாபிதம் நிஸ்ஸக்³கி³யம்.

(ச) இத³ம் மே, ப⁴ந்தே, சீவரம் அஞ்ஞாதகம் க³ஹபதிகம் ததுத்தரி விஞ்ஞாபிதம் நிஸ்ஸக்³கி³யம்.

(ச²) இத³ம் மே, ப⁴ந்தே, சீவரம் புப்³பே³ அப்பவாரிதோ அஞ்ஞாதகம் க³ஹபதிகம் உபஸங்கமித்வா விகப்பம் ஆபன்னம் நிஸ்ஸக்³கி³யம்.

(ஜ) இத³ம் மே, ப⁴ந்தே, சீவரம் புப்³பே³ அப்பவாரிதோ அஞ்ஞாதகே க³ஹபதிகே உபஸங்கமித்வா விகப்பம் ஆபன்னம் நிஸ்ஸக்³கி³யம்.

(ஜ²) இத³ம் மே, ப⁴ந்தே, சீவரம் அதிரேகதிக்க²த்தும் சோத³னாய அதிரேகச²க்க²த்தும் டா²னேன அபி⁴னிப்பா²தி³தம் நிஸ்ஸக்³கி³யம்.

(ஞ) இத³ம் மே, ப⁴ந்தே, கோஸியமிஸ்ஸகம் ஸந்த²தம் காராபிதம் நிஸ்ஸக்³கி³யம்.

(ட) இத³ம் மே, ப⁴ந்தே, ஸுத்³த⁴காளகானம் ஏளகலோமானம் ஸந்த²தம் காராபிதம் நிஸ்ஸக்³கி³யம்.

(ட²) இத³ம் மே, ப⁴ந்தே, ஸந்த²தம் அனாதி³யித்வா துலம் ஓதா³தானம் துலம் கோ³சரியானம் காராபிதம் நிஸ்ஸக்³கி³யம்.

(ட³) இத³ம் மே, ப⁴ந்தே, ஸந்த²தம் ஊனகச²ப்³ப³ஸ்ஸானி காராபிதம் அஞ்ஞத்ர பி⁴க்கு²ஸம்முதியா நிஸ்ஸக்³கி³யம்.

(ட⁴) இத³ம் மே, ப⁴ந்தே, நிஸீத³னஸந்த²தம் அனாதி³யித்வா புராணஸந்த²தஸ்ஸ ஸாமந்தா ஸுக³தவித³த்தி²ம் காராபிதம் நிஸ்ஸக்³கி³யம்.

(ண) இமானி மே, ப⁴ந்தே, ஏளகலோமானி தியோஜனபரமம் அதிக்காமிதானி நிஸ்ஸக்³கி³யானி.

(த) இமானி மே, ப⁴ந்தே, ஏளகலோமானி அஞ்ஞாதிகாய பி⁴க்கு²னியா தோ⁴வாபிதானி நிஸ்ஸக்³கி³யானி.

(த²) அஹம், ப⁴ந்தே, ரூபியம் படிக்³க³ஹேஸிம், இத³ம் மே, ப⁴ந்தே, நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமி.

(த³) அஹம், ப⁴ந்தே, நானப்பகாரகம் ரூபியஸம்வோஹாரம் ஸமாபஜ்ஜிம், இத³ம் மே, ப⁴ந்தே, நிஸ்ஸக்³கி³யம், இமாஹம் ஸங்க⁴ஸ்ஸ நிஸ்ஸஜ்ஜாமீதி.

387. நிஸ்ஸஜ்ஜித்வான ஆபத்திம், தே³ஸேய்யாத² கி³ஹிம் வதே³;

‘‘ஜானாஹிம’’ந்தி இமினா, ஸோ வதே³ய்யாஹராமி கிம்.

388. அவத்வாமந்தி தேலாதி³ம், வதே³ பி⁴க்கூ²ன கப்பியம்;

யம் ஆஹரதி ஸோ தேன, பரிவத்தேத்வான கப்பியம்.

389. லப்³ப⁴ம் ட²பேத்வா த்³வேபேதே, ஸேஸேஹி பரிபு⁴ஞ்ஜிதும்;

ததோ அஞ்ஞேன லத்³தோ⁴பி, பா⁴கோ³ தேஸம் ந கப்பதி.

390. ருக்க²ச்சா²யாப்யந்தமஸோ, தன்னிப்³ப³த்தா ந கப்பதி;

நிஸ்ஸட்ட²ம் படிலத்³த⁴ம்பி, ஆதி³தோ ஸந்த²தத்தயம்.

391. நோ சே லபே⁴த² ஏவம் ஸோ, இமம் ச²ட்³டே³ஹி ஸம்ஸியோ;

ஏவம்பி பி⁴க்கு² ச²ட்³டே³ய்ய, நோ சே லபே⁴த² ஸம்மதோ.

392. ஏதானி து³தியோ பத்தோ, ஸங்கே⁴ ஸேஸானி லப்³ப⁴ரே;

ஸங்கே⁴கஸ்மிம் க³ணே வத்தும், லப்³ப⁴ம் பா⁴ஸந்தரேனபி.

393. (க) அஹம், ப⁴ந்தே, நானப்பகாரகம் கயவிக்கயம் ஸமாபஜ்ஜிம், இத³ம் மே, ப⁴ந்தே, நிஸ்ஸக்³கி³யம்.

(க²) அயம் மே, ப⁴ந்தே, பத்தோ த³ஸாஹாதிக்கந்தோ நிஸ்ஸக்³கி³யோ.

(க³) அயம் மே, ப⁴ந்தே, பத்தோ ஊனபஞ்சப³ந்த⁴னேன பத்தேன சேதாபிதோ நிஸ்ஸக்³கி³யோ, இமாஹம் ஸங்க⁴ஸ்ஸ நிஸ்ஸஜ்ஜாமீதி.

394. நிஸ்ஸஜ்ஜித்வான தே³ஸேய்ய, ஆபத்திம் பத்தகா³ஹகம்;

ஸம்மன்னித்வான ஸங்க⁴ஸ்ஸ, பத்தந்தம் தஸ்ஸ தா³பயே.

395. (க) இத³ம் மே, ப⁴ந்தே, பே⁴ஸஜ்ஜம் ஸத்தாஹாதிக்கந்தம் நிஸ்ஸக்³கி³யம்.

(க²) இத³ம் மே, ப⁴ந்தே, வஸ்ஸிகஸாடிகசீவரம் அதிரேகமாஸே ஸேஸே கி³ம்ஹானே பரியிட்ட²ம், அதிரேகட்³ட⁴மாஸே ஸேஸே கி³ம்ஹானே கத்வா பரித³ஹிதம் நிஸ்ஸக்³கி³யம்.

(க³) இத³ம் மே, ப⁴ந்தே, சீவரம் பி⁴க்கு²ஸ்ஸ ஸாமம் த³த்வா அச்சி²ன்னம் நிஸ்ஸக்³கி³யம்.

(க⁴) இத³ம் மே, ப⁴ந்தே, சீவரம் ஸாமம் ஸுத்தம் விஞ்ஞாபேத்வா தந்தவாயேஹி வாயாபிதம் நிஸ்ஸக்³கி³யம்.

(ங) இத³ம் மே, ப⁴ந்தே, சீவரம் புப்³பே³ அப்பவாரிதோ அஞ்ஞாதகஸ்ஸ க³ஹபதிகஸ்ஸ தந்தவாயே உபஸங்கமித்வா விகப்பம் ஆபன்னம் நிஸ்ஸக்³கி³யம்.

(ச) இத³ம் மே, ப⁴ந்தே, அச்சேகசீவரம் சீவரகாலஸமயம் அதிக்காமிதம் நிஸ்ஸக்³கி³யம்.

(ச²) இத³ம் மே, ப⁴ந்தே, சீவரம் அதிரேகசா²ரத்தம் விப்பவுத்த²ம் அஞ்ஞத்ர பி⁴க்கு²ஸம்முதியா நிஸ்ஸக்³கி³யம்.

(ஜ) இத³ம் மே, ப⁴ந்தே, ஜானம் ஸங்கி⁴கம் லாப⁴ம் பரிணதம் அத்தனோ பரிணாமிதம் நிஸ்ஸக்³கி³யம், இமாஹம் ஆயஸ்மதோ நிஸ்ஸஜ்ஜாமீதி.

396. ஸேஸம் ஸப்³ப³ம் யதா²யோக³ம், ஆதி³ம்ஹி விய யோஜயே.

397. (க) அஹம், ப⁴ந்தே, ஏகம் பாசித்தியாபத்திம் ஆபஜ்ஜிம். த்³வே ஸம்ப³ஹுலா பாசித்தியாபத்தியோ ஆபஜ்ஜிம்.

(க²) கா³ரய்ஹம், ப⁴ந்தே, த⁴ம்மம் ஆபஜ்ஜிம் அஸப்பாயம் பாடிதே³ஸனீயம், தம் படிதே³ஸேமீதி. தேன ‘‘பஸ்ஸஸி, ஆவுஸோ, தம் த⁴ம்ம’’ந்தி வத்தப்³ப³ம்.

(க³) அஹம், ப⁴ந்தே, ஏகம் து³க்கடாபத்திம் ஆபஜ்ஜிம். த்³வே ஸம்ப³ஹுலா து³க்கடாபத்தியோ ஆபஜ்ஜிம்.

(க⁴) அஹம், ப⁴ந்தே, ஏகம் து³ப்³பா⁴ஸிதாபத்திம் ஆபஜ்ஜிம். த்³வே ஸம்ப³ஹுலா து³ப்³பா⁴ஸிதாபத்தியோ ஆபஜ்ஜிம். தா தும்ஹமூலே படிதே³ஸேமீதி.

(ங) ‘‘அஹம், ப⁴ந்தே, த்³வே நானாவத்து²கா து²ல்லச்சயாபத்தியோ ஆபஜ்ஜிம். ஸம்ப³ஹுலா நானாவத்து²கா து²ல்லச்சயாபத்தியோ ஆபஜ்ஜிம், தா தும்ஹமூலே படிதே³ஸேமீ’’தி வத்வா தேன ‘‘பஸ்ஸஸி, ஆவுஸோ, தா ஆபத்தியோ’’தி வுத்தே ‘‘ஆம, ப⁴ந்தே, பஸ்ஸாமீ’’தி வத்வா புன தேன ‘‘ஆயதிம், ஆவுஸோ, ஸம்வரேய்யாஸீ’’தி வுத்தே ‘‘ஸாது⁴ ஸுட்டு², ப⁴ந்தே, ஸம்வரிஸ்ஸாமீ’’தி வத்தப்³ப³ம்.

398. அதே³ஸனாகா³மினியம், அனாபத்திஞ்ச தே³ஸிதம்;

நானா ஸம்வாஸனிஸ்ஸீமட்டி²தானம் சதுபஞ்சஹி;

மனஸா பகதத்தானம், நானேகாதி ந தே³ஸயேதி.