1. பட²மானியதஸிக்கா²பத³வண்ணனா

அனியதே ஆதி³தோவ இத³ம் பகிண்ணகம். ஸேய்யதி²த³ம் – இத³ம் அனியதகண்ட³ம் நிப்பயோஜனம் தத்த² அபுப்³பா³பா⁴வதோதி சே? ந, க³ருகலஹுகபே⁴த³பி⁴ன்னாபத்திரோபனாரோபனக்கமலக்க²ணதீ³பனப்பயோஜனதோ. ஏத்த² ஹி ‘‘ஸா சே ஏவம் வதே³ய்ய ‘அய்யோ மயா…பே… ஸோ ச தம் படிஜானாதி, ஆபத்தியா காரேதப்³போ³’’’திஆதி³னா (பாரா. 446) ஆபத்தியா க³ருகாய, லஹுகாய ச ஆரோபனக்கமலக்க²ணம், ‘‘ந காரேதப்³போ³’’தி இமினா அனாரோபனக்கமலக்க²ணஞ்ச த³ஸ்ஸிதம். லக்க²ணதீ³பனதோ ஆதி³ம்ஹி, அந்தே வா உத்³தி³ஸிதப்³ப³ந்தி சே? ந, அஸம்ப⁴வதோ. கத²ம் ந தாவ ஆதி³ம்ஹி ஸம்ப⁴வதி, யேஸமித³ம் லக்க²ணம், தேஸம் ஸிக்கா²பதா³னம் அத³ஸ்ஸிதத்தா. ந அந்தே க³ருகமிஸ்ஸகத்தா. தஸ்மா க³ருகலஹுகானம் மஜ்ஜே² ஏவ உத்³தி³ஸிதப்³ப³தம் அரஹதி உப⁴யமிஸ்ஸகத்தா. யா தத்த² பாசித்தியஸங்கா²தா லஹுகாபத்தி த³ஸ்ஸிதா, ஸாபி க³ருகாதி கதி²தா. தேனேவாஹ ‘‘மேது²னத⁴ம்மஸன்னிஸ்ஸிதகிலேஸஸங்கா²தேன ரஹஸ்ஸாதே³னா’’திஆதி³. தஸ்மா க³ருகானம் ஏவ அனந்தரம் உத்³தி³ட்ட²ந்திபி ஏகே. ஏவம் ஸதி பட²மானியதமேவாலம் தாவதா லக்க²ணதீ³பனஸித்³தி⁴தோ, கிம் து³தியேனாதி சே? ந, ஓகாஸனியமபச்சயமிச்சா²கா³ஹனிவாரணப்பயோஜனதோ. ‘‘படிச்ச²ன்னே ஆஸனே அலம்கம்மனியே’’தி ஓகாஸனியமதோ ஹி தப்³பி³பரீதே ஓகாஸே இத³ம் லக்க²ணம் ந விகப்பிதந்தி மிச்சா²கா³ஹோ ஹோதி. தம்னிவாரணதோ து³தியானியதம்பி ஸாத்த²கமேவாதி அதி⁴ப்பாயோ. கஸ்மா? ஓகாஸபே⁴த³தோ, ரஹோபே⁴த³தீ³பனதோ, ரஹோனிஸஜ்ஜஸ்ஸாத³பே⁴த³தீ³பனதோ. ஓகாஸனியமபா⁴வே ச ரஹோனிஸஜ்ஜஸ்ஸாத³பே⁴தோ³ ஜாதோ. த்³வின்னம் ரஹோனிஸஜ்ஜஸிக்கா²பதா³னம் நானாத்தஜானனஞ்ச ஸியா ததா² காயஸம்ஸக்³க³பே⁴த³தீ³பனதோ. நாலம் கம்மனியேபி ஹி ஓகாஸே அப்படிச்ச²ன்னே, படிச்ச²ன்னேபி வா நிஸின்னாய வாதபானகவாடச்சி²த்³தா³தீ³ஹி நிக்க²ந்தகேஸாதி³க்³க³ஹணேன காயஸம்ஸக்³கோ³ லப்³ப⁴தீதி ஏவமாத³யோபி நயா வித்தா²ரதோ வேதி³தப்³பா³.

தத்ரித³ம் முக²மத்தனித³ஸ்ஸனம் – ஓகாஸபே⁴த³தோதி அலம்கம்மனியனாலம்கம்மனியபே⁴த³தோ. படிச்ச²ன்னம்பி ஹி ஏகச்சம் நாலம்கம்மனியம் வாதபானாதி³னா அந்தரிதத்தா, உப⁴யப்படிச்ச²ன்னம்பி ஏகச்சம் நாலம்கம்மனியம் விஜானதம் அஜ்ஜோ²காஸத்தா. ரஹோபே⁴த³தீ³பனதோதி ஏத்த² ரஹபா⁴வஸாமஞ்ஞேபி ரஹோ த்³விதா⁴ படிச்ச²ன்னாபடிச்ச²ன்னபே⁴த³தோதி அதி⁴ப்பாயோ. ரஹோனிஸஜ்ஜஸ்ஸாத³பே⁴த³தீ³பனதோதி மேது²னஸ்ஸாத³வஸேன நிஸஜ்ஜா, து³ட்டு²ல்லஸ்ஸாத³வஸேன நிஸஜ்ஜாதி தாதி³ஸஸ்ஸ பே⁴த³ஸ்ஸ தீ³பனதோதி அத்தோ². ‘‘இத⁴ ஆக³தனயத்தா பி⁴க்கு²னிபாதிமோக்கே² இத³ம் கண்ட³ம் பரிஹீனந்தி வேதி³தப்³ப³’’ந்தி வத³ந்தி. ‘‘அட்டு²ப்பத்தியா தத்த² அனுப்பன்னத்தா’’தி ஏகே, தம் அனேகந்தபா⁴வதீ³பனதோ அயுத்தம். ஸப்³ப³பு³த்³த⁴காலே ஹி பி⁴க்கூ²னம் பஞ்ச, பி⁴க்கு²னீனம் சத்தாரோ ச உத்³தே³ஸா ஸந்தி. பாதிமோக்கு²த்³தே³ஸபஞ்ஞத்தியா அஸாதா⁴ரணத்தா தத்த² நித்³தி³ட்ட²ஸங்கா⁴தி³ஸேஸபாசித்தியானந்தி ஏகே. தாஸஞ்ஹி பி⁴க்கு²னீனம் உப்³ப⁴ஜாணுமண்ட³லிக (பாசி. 658) -அட்ட²வத்து²க (பாசி. 675) -வஸேன காயஸம்ஸக்³க³விஸேஸோ பாராஜிகவத்து², ‘‘ஹத்த²க்³க³ஹணம் வா ஸாதி³யேய்ய, காயம் வா தத³த்தா²ய உபஸம்ஹரேய்யா’’தி (பாசி. 675) வசனதோ ஸாதி³யனம்பி, ‘‘ஸந்திட்டே²ய்ய வா’’தி (பாசி. 675) வசனதோ டா²னம்பி, ‘‘ஸங்கேதம் வா க³ச்சே²ய்யா’’தி (பாசி. 675) வசனதோ க³மனம்பி, ‘‘ச²ன்னம் வா அனுபவிஸேய்யா’’தி (பாசி. 675) வசனதோ படிச்ச²ன்னட்டா²னப்பவேஸோபி ஹோதி, ததா² ‘‘ரத்தந்த⁴காரே அப்பதீ³பே, படிச்ச²ன்னே ஓகாஸே அஜ்ஜோ²காஸே ஏகேனேகா ஸந்திட்டே²ய்ய வா ஸல்லபேய்ய வா’’தி (பாசி. 839) வசனதோ து³ட்டு²ல்லவாசாபி பாசித்தியவத்து²கந்தி கத்வா தாஸம் அஞ்ஞதா² அனியதகண்ட³ஸ்ஸ அவத்தப்³ப³தாபத்திதோ ந வுத்தந்தி தேஸம் அதி⁴ப்பாயோ. பகிண்ணகம்.

‘‘தே³ஸனாவுட்டா²னகா³மினீனம் ஆபத்தீனம் வஸேன அலஜ்ஜிஆத³யோ லஜ்ஜீனம் சோதே³ஸ்ஸந்தீ’’தி ஆக³தத்தா லஜ்ஜிபக்³க³ஹத்தா²ய பதிரூபாயபி உபாஸிகாய வசனேன அகத்வா பி⁴க்கு²ஸ்ஸேவ படிஞ்ஞாய காதப்³ப³ந்தி ஆபத்தியோ பன லக்க²ணத³ஸ்ஸனத்த²ம் பஞ்ஞத்தம் வித்தா²ரனயமேவ க³ஹேத்வா வத்தும் யுத்தம் ‘‘இமே கோ² பனாயஸ்மந்தோ த்³வே அனியதா த⁴ம்மா’’தி (பாரா. 443) உத்³தே³ஸத³ஸ்ஸனத்தாதி லிகி²தம். ஸோதஸ்ஸ ரஹோதி ஏத்த² ரஹோதி வசனஸாமஞ்ஞதோ வுத்தம். து³ட்டு²ல்லஸாமஞ்ஞதோ து³ட்டு²ல்லாரோசனப்படிச்சா²த³னஸிக்கா²பதே³ஸு பாராஜிகவசனம் விய. தஸ்மா ‘‘சக்கு²ஸ்ஸேவ பன ரஹோ ‘ரஹோ’தி இத⁴ அதி⁴ப்பேதோ’’தி வுத்தம். கத²ம் பஞ்ஞாயதீதி சே? ‘‘மாதுகா³மோ நாம…பே… அந்தமஸோ தத³ஹுஜாதாபி தா³ரிகா’’தி (பாரா. 445) வுத்தத்தா து³ட்டு²ல்லோபா⁴ஸனம் இத⁴ நாதி⁴ப்பேதந்தி தீ³பிதமேவாதி. அந்தோத்³வாத³ஸஹத்தே²பீதி பி-ஸத்³தே³ன அபிஹிதகவாடஸ்ஸ க³ப்³ப⁴ஸ்ஸ த்³வாரே நிஸின்னோபீதி அத்தோ². அசேலகவக்³கே³ ரஹோபடிச்ச²ன்னாஸனஸிக்கா²பதே³ (பாசி. 288) ‘‘யோ கோசி விஞ்ஞூ புரிஸோ து³தியோ ஹோதீ’’தி இமஸ்ஸ அனுரூபதோ ‘‘இத்தீ²னம் பன ஸதம்பி அனாபத்திம் ந கரோதியேவா’’தி வுத்தம். ‘‘அலம்கம்மனியேதி ஸக்கா ஹோதி மேது²னம் த⁴ம்மம் படிஸேவிது’’ந்தி (பாரா. 445) விப⁴ங்கே³ வசனதோ ரஹோனிஸஜ்ஜஸ்ஸாதோ³ சேத்த² மேது²னத⁴ம்மஸன்னிஸ்ஸிதகிலேஸோ, ந து³தியே விய து³ட்டு²ல்லவாசஸ்ஸாத³கிலேஸோ. தஸ்மா ச பஞ்ஞாயதி ஸோதஸ்ஸ ரஹோ நாதி⁴ப்பேதோதி.

திண்ணம் த⁴ம்மானம் அஞ்ஞதரேன வதே³ய்யாதி ரஹோனிஸஜ்ஜஸிக்கா²பத³வஸேன நிஸின்னஸ்ஸ தஸ்ஸானுஸாரேன பாசித்தியமேவ அவத்வா பாராஜிகஸங்கா⁴தி³ஸேஸாயபி ஆபத்தியா பே⁴த³த³ஸ்ஸனத்த²ம் வுத்தம். புன ஆபத்திப்படிஜானனம் அவத்வா கஸ்மா ‘‘நிஸஜ்ஜம் பி⁴க்கு² படிஜானமானோ’’தி வத்து²ப்படிஜானனம் வுத்தந்தி? வுச்சதே – ஆபத்தியா சோதி³தே வினயத⁴ரேன ‘‘கிஸ்மிம் வத்து²ஸ்மி’’ந்தி புச்சி²தே சுதி³தகேன ‘‘இமஸ்மிம் வத்து²ஸ்மி’’ந்தி வுத்தே வினயத⁴ரேன ‘‘ஈதி³ஸம் நாம அகாஸீ’’தி புச்சி²தே ஸோ வத்து²ம் படிஜானமானோவ காரேதப்³போ³தி த³ஸ்ஸனத்த²ம் ‘‘நிஸஜ்ஜம் பி⁴க்கு² படிஜானமானோ’’தி வுத்தம். யதி³ ஏவம் நிஸஜ்ஜம் படிஜானமானோபி ஆபத்தியாவ காரேதப்³போ³தி? அனுரூபமேவ. ஏவம் பன க³ஹேதப்³ப³ம் – திண்ணம்பி ஆபத்தீனம் வத்தூ²னி அக்³க³ஹேத்வா இத⁴ ஸிக்கா²பத³வஸேன நிஸஜ்ஜமேவ வுத்தம். தஸ்மிம் க³ஹிதேபி ஹி ஆபத்தி க³ஹிதாவ ஹோதீதி. யேன வா ஸாதி ஏத்த² வா-ஸத்³தோ³ ‘‘தேன ஸோ பி⁴க்கு² காரேதப்³போ³ வா’’தி யோஜேதப்³போ³. ஸோ ச விகப்பத்தோ². தஸ்மா ‘‘காரேதப்³போ³ வா படிஜானமானோ, ந வா காரேதப்³போ³ அப்படிஜானமானோ’’தி அத்தோ². தேன வுத்தம் ‘‘படிஜானமானோ வா’’திஆதி³. ரஹோனிஸஜ்ஜஸிக்கா²பத³வஸேன நிஸஜ்ஜபச்சயா ஆபத்தியா வுத்தத்தா ஸேஸேஸுபி ஸேஸஸிக்கா²பத³வஸேன ஆபத்தி க³ஹேதப்³பா³. ‘‘ஸமுட்டா²னாதீ³னி பட²மபாராஜிகஸதி³ஸானேவா’’தி வுத்தத்தா இத⁴ து³ட்டு²ல்லோபா⁴ஸனஸ்ஸ அனதி⁴ப்பேதபா⁴வோ வேதி³தப்³போ³.

பட²மானியதஸிக்கா²பத³வண்ணனா நிட்டி²தா.