ஸேகி²யகண்ட³ம்

ஸேகி²யேஸு ஸதிபி வீதிக்கமே அனாத³ரியாபேக்க²ஸ்ஸேவ ஆபத்தீதி த³ஸ்ஸனத்த²ம் காரகோ ந வுத்தோ. அயஞ்ஹி வினயத⁴ம்மதா, யதி³த³ம் ஸாபேக்கே² காரகனித்³தே³ஸோ, ஸோ வுத்தனியமே விதி⁴, பு⁴ம்மகரணஞ்ச. அட்ட²ங்கு³லாதி⁴கம்பி ஓதாரேத்வா நிவாஸேதும் வட்டதி. ததோ பரம் ஓதாரேந்தஸ்ஸ து³க்கடந்தி மஹாஅட்ட²கதா²யம் வுத்தம். ஆராமே வாதி பு³த்³து⁴பட்டா²னாதி³காலே. பாருபிதப்³ப³ந்தி உத்தராஸங்க³கிச்சவஸேன வுத்தம்.

ட²த்வாதி ஏத்த² க³ச்ச²ந்தோபி பரிஸ்ஸயாபா⁴வம் ஓலோகேதும் லப⁴தியேவாதி (வஜிர. டீ. பாசித்திய 582) லிகி²தம். யதா² வாஸூபக³தஸ்ஸ அந்தரக⁴ரே காயம் விவரித்வா நிஸீதி³தும் வட்டதி, ததா² தஸ்ஸ ஸந்திகே க³ந்துகாமஸ்ஸபி காயப³ந்த⁴னம் அப³ந்தி⁴த்வா ஸங்கா⁴டிம் அபாருபித்வா கா³மப்பவேஸனமனாரோசேத்வா யதா²காமம் க³ந்தும் வட்டதி. தஸ்மா அத்³தா⁴னமக்³க³க³மனகாலே ஏகோ பி⁴க்கு² கா³மப்பவேஸனவத்தம் பூரேத்வா கா³மம் பவிஸித்வா ஏகம் ஆவஸத²ம் புரதோவ டி²தம் பத்வா பரிக்கா²ரம் ட²பேத்வா வாஸூபக³தோ சே ஹோதி, இதரேஹி தஸ்ஸ ஸந்திகம் யதா²ஸுக²ம் க³ந்தும் வட்டதி. கோ பன வாதோ³ சதூஹபஞ்சாஹம் வாஸமதி⁴ட்டா²ய வஸிதபி⁴க்கூ²னம் ஸந்திகம் க³ந்துஞ்ச வாஸூபக³தானம் ஸந்திகம் க³ந்துஞ்ச வட்டதீதி. பு³த்³த⁴பூஜம்பி யதா²ஸுக²ம் க³ந்தும் வட்டதி. வுத்தம்பி சேதம் அட்ட²கதா²யம் ‘‘அனாபத்தி காரணம் படிச்ச தஹம் தஹம் ஓலோகேதீ’’தி. தத்த² காரணம் நாம ஆமிஸபூஜாதி வேதி³தப்³பா³தி லிகி²தம்.

ச²ப்³பீ³ஸதிஸாருப்பவண்ணனா நிட்டி²தா.

யஸ்மா ‘‘ஸமதித்திகோ பிண்ட³பாதோ படிக்³க³ஹேதப்³போ³’’தி (பாசி. 602-603) வசனம் பிண்ட³பாதோ ஸமபுண்ணோ படிக்³க³ஹேதப்³போ³தி தீ³பேதி, தஸ்மா அத்தனோ ஹத்த²க³தே பத்தே பிண்ட³பாதோ தி³ய்யமானோ தூ²பீகதோபி சே ஹோதி, வட்டதீதி தீ³பிதோ ஹோதி. ஸூபோத³னவிஞ்ஞத்தியம் முகே² பக்கி²பித்வா விப்படிஸாரே உப்பன்னே புன உக்³கி³ரிதுகாமஸ்ஸாபி ஸஹஸா சே பவிஸதி, ஏத்த² அஸஞ்சிச்ச பு⁴ஞ்ஜதி நாம. விஞ்ஞத்திகதஞ்ச அகதஞ்ச ஏகஸ்மிம் டா²னே டி²தம் ஸஹஸா அனுபதா⁴ரேத்வா க³ஹேத்வா பு⁴ஞ்ஜதி, அஸ்ஸதியா பு⁴ஞ்ஜதி நாம.

ஸயம் யானக³தோ ஹுத்வா, யதா² யானக³தஸ்ஸ சே;

அலம் வத்து²ம் ததா² நாலம், ஸச²த்தோ ச²த்தபாணினோ.

‘‘ஸூபோத³னவிஞ்ஞத்திஸிக்கா²பத³ம் தே²ய்யஸத்த²ஸமுட்டா²னம், கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³ன’’ந்தி பாடோ².

ஸேகி²யவண்ணனா நிட்டி²தா.

பி⁴க்கு²பாதிமோக்க²வண்ணனா நிட்டி²தா.

நமோ தஸ்ஸ ப⁴க³வதோ அரஹதோ ஸம்மாஸம்பு³த்³த⁴ஸ்ஸ