6. தூலோனத்³த⁴ஸிக்கா²பத³வண்ணனா

ச²ட்டே² தூலம் ஓனத்³த⁴மேத்தா²தி தூலோனத்³த⁴ம், சிமிலிகம் பத்த²ரித்வா தூலம் பக்கி²பித்வா உபரி சிமிலிகாய ஓனத்³த⁴ந்தி வுத்தம் ஹோதி. உத்³தா³லனகம் பே⁴த³னகஸதி³ஸமேவ.

ஸாவத்தி²யம் ச²ப்³ப³க்³கி³யே ஆரப்³ப⁴ தூலோனத்³த⁴காராபனவத்து²ஸ்மிம் பஞ்ஞத்தம், ஆயோகே³ காயப³ந்த⁴னே அம்ஸப³த்³த⁴கே பத்தத்த²விகாய பரிஸ்ஸாவனே பி³ம்போ³ஹனே, அஞ்ஞேன கதம் தூலோனத்³த⁴ம் படிலபி⁴த்வா உத்³தா³லேத்வா பரிபு⁴ஞ்ஜந்தஸ்ஸ, உம்மத்தகாதீ³னஞ்ச அனாபத்தி. பி³ம்போ³ஹனஞ்சேத்த² ஸீஸப்பமாணமேவ வட்டதி, ஸீஸப்பமாணம் நாம யஸ்ஸ வித்தா²ரதோ தீஸு கோணேஸு த்³வின்னம் அந்தரம் வித³த்தி²சதுரங்கு³லம் ஹோதி, மஜ்ஜே² முட்டி²ரதனம், தீ³க⁴தோ தி³யட்³ட⁴ரதனம் வா த்³விரதனம் வா. தூலோனத்³த⁴மஞ்சபீட²தா, அத்தனோ அத்தா²ய கரணம் வா காராபேத்வா வா படிலாபோ⁴தி இமானேத்த² த்³வே அங்கா³னி. ஸேஸம் வுத்தனயேனேவ வேதி³தப்³ப³ந்தி.

தூலோனத்³த⁴ஸிக்கா²பத³வண்ணனா நிட்டி²தா.