4. ஸூசிக⁴ரஸிக்கா²பத³வண்ணனா

சதுத்தே² பே⁴த³னமேவ பே⁴த³னகம், தம் அஸ்ஸ அத்தீ²தி பே⁴த³னகம். தஸ்மா ஏவரூபே ஸூசிக⁴ரே கரணகாராபனேஸு து³க்கடம், படிலாபே⁴ன பன தம் பி⁴ந்தி³த்வா பாசித்தியம் தே³ஸேதப்³ப³ம்.

ஸக்கேஸு ஸம்ப³ஹுலே பி⁴க்கூ² ஆரப்³ப⁴ ப³ஹுஸூசிக⁴ரவிஞ்ஞாபனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, ஸாணத்திகம், அத்தனா விப்பகதம் அத்தனா வா, பரேஹி வா, பரேஹி விப்பகதம்பி அத்தனா வா, பரேஹி வா பரியோஸாபேத்வா லப⁴ந்தஸ்ஸ சதுக்கபாசித்தியம். அஞ்ஞஸ்ஸத்தா²ய கரணகாராபனேஸு, அஞ்ஞேன கதம் படிலபி⁴த்வா பரிபு⁴ஞ்ஜனே து³க்கடம். க³ண்டி²கே அரணிகே விதே⁴ அஞ்ஜனியா அஞ்ஜனிஸலாகாய வாஸிஜடே உத³கபுஞ்ச²னியாதி ஏதேஸு யம்கிஞ்சி அட்டி²ஆதீ³ஹி கரோந்தஸ்ஸ, உம்மத்தகாதீ³னஞ்ச அனாபத்தி. ஸூசிக⁴ரதா, அட்டி²மயாதி³தா, அத்தனோ அத்தா²ய கரணம் வா காராபேத்வா வா படிலாபோ⁴தி இமானேத்த² தீணி அங்கா³னி. ஸமுட்டா²னாதீ³னி ஸஞ்சரித்தஸதி³ஸானீதி.

ஸூசிக⁴ரஸிக்கா²பத³வண்ணனா நிட்டி²தா.