2. ரதனஸிக்கா²பத³வண்ணனா

து³தியே ரதனந்தி முத்தாதி³த³ஸவித⁴ம். ரதனஸம்மதந்தி யம்கிஞ்சி மனுஸ்ஸானம் உபபோ⁴க³பரிபோ⁴க³ம். அஜ்ஜா²ராமே வாதி பரிக்கி²த்தஸ்ஸ அந்தோபடிக்கே²பே அபரிக்கி²த்தஸ்ஸ த்³வின்னம் லேட்³டு³பாதானம் அந்தோ. அஜ்ஜா²வஸதே²தி பரிக்கி²த்தஸ்ஸ அந்தோபடிக்கே²பே, அபரிக்கி²த்தஸ்ஸ முஸலபாதப்³ப⁴ந்தரே. அயம் பனேத்த² வினிச்ச²யோ – ஜாதரூபரஜதம் அத்தனோ அத்தா²ய உக்³க³ண்ஹந்தஸ்ஸ வா உக்³க³ண்ஹாபேந்தஸ்ஸ வா நிஸ்ஸக்³கி³யம் பாசித்தியம். ஸங்க⁴க³ணபுக்³க³லசேதியனவகம்மானம் அத்தா²ய து³க்கடம், அவஸேஸே முத்தாதி³ரதனே ஸப்³பே³ஸம்பி அத்தா²ய து³க்கடமேவ. கப்பியவத்து²ம் வா அகப்பியவத்து²ம் வா அந்தமஸோ மாதுஸந்தகம்பி ப⁴ண்டா³கா³ரிகஸீஸேன படிஸாமேந்தஸ்ஸ பாசித்தியம், தாதி³ஸம் பன அத்தனோ ஸந்தகம் கத்வா படிஸாமேதும் வட்டதி. ‘‘இத³ம் படிஸாமேதா²’’தி வுத்தே பன ‘‘ந வட்டதீ’’தி படிக்கி²பிதப்³ப³ம். ஸசே குபிதா பாதேத்வா க³ச்ச²ந்தி, பலிபோ³தோ⁴ நாம ஹோதி, படிஸாமேதப்³ப³ம். விஹாரே கம்மம் கரோந்தா வட்³ட⁴கீஆத³யோ வா ராஜவல்லபா⁴ வா ‘‘யம்கிஞ்சி உபகரணம் வா ஸயனப⁴ண்ட³ம் வா படிஸாமேத்வா தே³தா²’’தி வத³ந்தி, ச²ந்தே³னபி ப⁴யேனபி ந காதப்³ப³மேவ, கு³த்தட்டா²னம் பன த³ஸ்ஸேதும் வட்டதி.

அஜ்ஜா²ராமஅஜ்ஜா²வஸதே²ஸுபி யாதி³ஸே டா²னே ‘‘பி⁴க்கூ²ஹி வா ஸாமணேரேஹி வா க³ஹிதம் ப⁴விஸ்ஸதீ’’தி ஆஸங்கா உப்பஜ்ஜதி, தாதி³ஸேயேவ டா²னே உக்³க³ஹேத்வா வா உக்³க³ஹாபேத்வா வா ஸஞ்ஞாணம் கத்வா நிக்கி²பிதப்³ப³ம், ‘‘யஸ்ஸ ப⁴ண்ட³ம் நட்ட²ம், ஸோ ஆக³ச்ச²தூ’’தி ச ஆசிக்கி²தப்³ப³ம். அத² யோ ஆக³ச்ச²தி, ஸோ ‘‘கீதி³ஸம் தே ப⁴ண்ட³ம் நட்ட²’’ந்தி புச்சி²தப்³போ³, ஸசே ஸஞ்ஞாணேன ஸம்பாதே³தி, தா³தப்³ப³ம். நோ சே, ‘விசினாஹீ’தி வத்தப்³போ³. தம்ஹா ஆவாஸா பக்கமந்தேன பதிரூபானம் பி⁴க்கூ²னம் ஹத்தே², தேஸு அஸதி பதிரூபானம் க³ஹபதிகானம் ஹத்தே² நிக்கி²பித்வா பக்கமிதப்³ப³ம். யோ பன நேவ பக்கமதி, ந ஸாமிகம் பஸ்ஸதி, தேன தா²வரம் ஸேனாஸனம் வா சேதியம் வா போக்க²ரணிம் வா காரேதப்³போ³. ஸசே தீ³க⁴ஸ்ஸ அத்³து⁴னோ அச்சயேன ஸாமிகோ ஆக³ச்ச²தி, தம் த³ஸ்ஸேத்வா ‘அனுமோதா³ஹீ’தி வத்தப்³போ³. ஸசே நானுமோத³தி, ‘‘தே³ஹி மே த⁴ன’’ந்தி சோதே³தி, ஸமாத³பேத்வா தா³தப்³ப³ம்.

ஸாவத்தி²யம் அஞ்ஞதரம் பி⁴க்கு²ம் ஆரப்³ப⁴ ரதனஉக்³க³ண்ஹனவத்து²ஸ்மிம் பஞ்ஞத்தம், ‘‘அஞ்ஞத்ர அஜ்ஜா²ராமா வா, அஜ்ஜா²வஸதா² வா’’தி அயமேத்த² து³விதா⁴ அனுபஞ்ஞத்தி, ஸாதா⁴ரணபஞ்ஞத்தி, ஸாணத்திகம், அனுஞ்ஞாதட்டா²னே அனாத³ரியேன உக்³க³ஹேத்வா அனிக்கி²பந்தஸ்ஸ து³க்கடம். அனுஞ்ஞாதட்டா²னே க³ஹேத்வா நிக்கி²பந்தஸ்ஸ, யம் ஹோதி ஆமாஸம் ரதனஸம்மதம், தம் விஸ்ஸாஸம் வா தாவகாலிகம் வா உக்³க³ண்ஹந்தஸ்ஸ, பம்ஸுகூலஸஞ்ஞாய க³ண்ஹதோ, உம்மத்தகாதீ³னஞ்ச அனாபத்தி. அனனுஞ்ஞாதகரணம், பரஸந்தகதா, விஸ்ஸாஸக்³கா³ஹபம்ஸுகூலஸஞ்ஞானம் அபா⁴வோ, உக்³க³ஹணம் வா உக்³க³ஹாபனம் வாதி இமானேத்த² சத்தாரி அங்கா³னி. ஸமுட்டா²னாதீ³னி ஸஞ்சரித்தஸதி³ஸானீதி.

ரதனஸிக்கா²பத³வண்ணனா நிட்டி²தா.