4. ஆமிஸஸிக்கா²பத³வண்ணனா

சதுத்தே² ஆமிஸஹேதூதி சீவராதீ³னம் அஞ்ஞதரஹேது. பி⁴க்கூ²தி ஸம்மதா பி⁴க்கூ² இதா⁴தி⁴ப்பேதா. பாசித்தியந்தி ஏவரூபே பி⁴க்கூ² அவண்ணகாமதாய ஏவம் ப⁴ணந்தஸ்ஸ பாசித்தியம்.

ஸாவத்தி²யம் ச²ப்³ப³க்³கி³யே பி⁴க்கூ² ஆரப்³ப⁴ ‘‘ஆமிஸஹேது ஓவத³ந்தீ’’தி ப⁴ணனவத்து²ஸ்மிம் பஞ்ஞத்தம், அஸாதா⁴ரணபஞ்ஞத்தி, அனாணத்திகம், த⁴ம்மகம்மே திகபாசித்தியம், அத⁴ம்மகம்மே திகது³க்கடம், அஸம்மதம் உபஸம்பன்னஞ்ச, அனுபஸம்பன்னஞ்ச ஸம்மதம் வா அஸம்மதம் வா ஏவம் ப⁴ணந்தஸ்ஸ து³க்கடமேவ. தத்த² யோ பி⁴க்கு² காலே ஸம்முதிம் லபி⁴த்வா ஸாமணேரபூ⁴மியம் ஸண்டி²தோ, அயம் ஸம்மதோ நாம அனுபஸம்பன்னோ. பகதியா சீவராதி³ஹேது ஓவத³ந்தம் பன ஏவம் ப⁴ணந்தஸ்ஸ, உம்மத்தகாதீ³னஞ்ச அனாபத்தி. உபஸம்பன்னதா, த⁴ம்மேன லத்³த⁴ஸம்முதிதா, அனாமிஸந்தரதா, அவண்ணகாமதாய ஏவம் ப⁴ணனந்தி இமானேத்த² சத்தாரி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ம் பன து³க்க²வேத³னமேவாதி.

ஆமிஸஸிக்கா²பத³வண்ணனா நிட்டி²தா.