1. ஓவாத³ஸிக்கா²பத³வண்ணனா

ஓவாத³வக்³க³ஸ்ஸ பட²மே அஸம்மதோதி யா அட்ட²ங்க³ஸமன்னாக³தஸ்ஸ பி⁴க்கு²னோ ப⁴க³வதா ஞத்திசதுத்தே²ன கம்மேன (பாசி. 146) பி⁴க்கு²னோவாத³கஸம்முதி அனுஞ்ஞாதா, தாய அஸம்மதோ. ஓவதே³ய்யாதி பி⁴க்கு²னிஸங்க⁴ம் வா ஸம்ப³ஹுலா வா ஏகம் பி⁴க்கு²னிம் வா ‘‘வஸ்ஸஸதூபஸம்பன்னாய பி⁴க்கு²னியா தத³ஹுபஸம்பன்னஸ்ஸ பி⁴க்கு²னோ அபி⁴வாத³னம் பச்சுட்டா²னம் அஞ்ஜலிகம்மம் ஸாமீசிகம்மம் காதப்³ப³’’ந்தி ஆதி³கே (சூளவ. 403) அட்ட² க³ருத⁴ம்மே ஓவாத³வஸேன ஓஸாரேந்தோ ஓவதே³ய்ய. பாசித்தியந்தி ஓவாத³பரியோஸானே பாசித்தியம்.

ஸாவத்தி²யம் ச²ப்³ப³க்³கி³யே பி⁴க்கூ² ஆரப்³ப⁴ ஓவத³னவத்து²ஸ்மிம் பஞ்ஞத்தம், அஸாதா⁴ரணபஞ்ஞத்தி, அனாணத்திகம், அஞ்ஞேன வா த⁴ம்மேன பி⁴க்கு²னீஸு உபஸம்பன்னமத்தம் வா ஓவத³தோ து³க்கடம். ஸம்மதஸ்ஸாபி தஞ்சே ஸம்முதிகம்மம் அத⁴ம்மகம்மம் ஹோதி, தஸ்மிம் அத⁴ம்மகம்மே அத⁴ம்மகம்மஸஞ்ஞினோ வக்³கே³ பி⁴க்கு²னிஸங்கே⁴ ஓவத³தோ திகபாசித்தியம், ததா² வேமதிகஸ்ஸ த⁴ம்மகம்மஸஞ்ஞினோ சாதி நவ பாசித்தியானி, ஸமக்³கே³பி பி⁴க்கு²னிஸங்கே⁴ன வாதி அத⁴ம்மகம்மவஸேன அட்டா²ரஸ. ஸசே பன தம் த⁴ம்மகம்மம் ஹோதி, ‘‘த⁴ம்மகம்மே த⁴ம்மகம்மஸஞ்ஞீ ஸமக்³க³ம் பி⁴க்கு²னிஸங்க⁴ம் ஸமக்³க³ஸஞ்ஞீ ஓவத³தீ’’தி (பாசி. 151) இத³ம் அவஸானபத³ம் ட²பேத்வா தேனேவ நயேன ஸத்தரஸ து³க்கடானி, ‘‘ஸமக்³க³ம்ஹாய்யா’’தி ச வுத்தே அஞ்ஞம் த⁴ம்மம், ‘‘வக்³க³ம்ஹாய்யா’’தி ச வுத்தே அட்ட² க³ருத⁴ம்மே ப⁴ணந்தஸ்ஸ, ஓவாத³ஞ்ச அனிய்யாதேத்வா அஞ்ஞம் த⁴ம்மம் ப⁴ணந்தஸ்ஸ து³க்கடமேவ. யோ பன த⁴ம்மகம்மே த⁴ம்மகம்மஸஞ்ஞீ ஸமக்³க³ம் பி⁴க்கு²னிஸங்க⁴ம் ஸமக்³க³ஸஞ்ஞீ ஓவத³தி, க³ருத⁴ம்மபாளிம் உத்³தே³ஸம் தே³தி, பரிபுச்ச²ம் தே³தி, ‘‘ஓஸாரேஹி அய்யா’’தி வுச்சமானோ ஓஸாரேதி, பஞ்ஹம் புட்டோ² கதே²தி, பி⁴க்கு²னீனம் ஸுணமானானம் அஞ்ஞஸ்ஸத்தா²ய ப⁴ணதி, ஸிக்க²மானாய வா ஸாமணேரியா வா ப⁴ணதி, தஸ்ஸ, உம்மத்தகாதீ³னஞ்ச அனாபத்தி. அஸம்மததா, பி⁴க்கு²னியா பரிபுண்ணூபஸம்பன்னதா, ஓவாத³வஸேன அட்ட²க³ருத⁴ம்மப⁴ணனந்தி இமானேத்த² தீணி அங்கா³னி. ஸமுட்டா²னாதீ³னி பத³ஸோத⁴ம்மஸதி³ஸானேவாதி.

ஓவாத³ஸிக்கா²பத³வண்ணனா நிட்டி²தா.