3. பத்தவக்³கோ³

1. பத்தஸிக்கா²பத³வண்ணனா

பத்தவக்³க³ஸ்ஸ பட²மே அதிரேகபத்தோதி அனதி⁴ட்டி²தோ ச அவிகப்பிதோ ச, ஸோ ச கோ² உக்கட்ட²மஜ்ஜி²மோமகானம் அஞ்ஞதரோ பமாணயுத்தோவ, தஸ்ஸ பமாணம் ‘‘அட்³டா⁴ள்ஹகோத³னம் க³ண்ஹாதீ’’திஆதி³னா (பாரா 602) நயேன பாளியம் வுத்தம். தத்ராயம் வினிச்ச²யோ – அனுபஹதபுராணஸாலிதண்டு³லானம் ஸுகோட்டிதபரிஸுத்³தா⁴னம் த்³வே மக³த⁴னாளியோ க³ஹேத்வா தேஹி தண்டு³லேஹி அனுத்தண்டு³லமகிலின்னமபிண்டி³கம் ஸுவிஸத³ம் குந்த³மகுளராஸிஸதி³ஸம் அவஸ்ஸாவிதோத³னம் பசித்வா நிரவஸேஸம் பத்தே பக்கி²பித்வா தஸ்ஸ ஓத³னஸ்ஸ சதுத்த²பா⁴க³ப்பமாணோ நாதிக⁴னோ நாதிதனுகோ ஹத்த²ஹாரியோ ஸப்³ப³ஸம்பா⁴ரஸங்க²தோ முக்³க³ஸூபோ பக்கி²பிதப்³போ³, ததோ ஆலோபஸ்ஸ அனுரூபம் யாவசரிமாலோபப்பஹோனகம் மச்ச²மம்ஸாதி³ப்³யஞ்ஜனம் பக்கி²பிதப்³ப³ம், ஸப்பிதேலதக்கரஸகஞ்ஜியாதீ³னி பன க³ணனூபகா³னி ந ஹோந்தி. தானி ஹி ஓத³னக³திகானேவ, நேவ ஹாபேதும், ந வட்³டே⁴தும் ஸக்கோந்தி, ஏவமேதம் ஸப்³ப³ம்பி பக்கி²த்தம் ஸசே பத்தஸ்ஸ முக²வட்டியா ஹேட்டி²மராஜிஸமம் திட்ட²தி, ஸுத்தேன வா ஹீரேன வா சி²ந்த³ந்தஸ்ஸ ஸுத்தஸ்ஸ வா ஹீரஸ்ஸ வா ஹேட்டி²மந்தம் பு²ஸதி, அயம் உக்கட்டோ² நாம பத்தோ. ஸசே தம் ராஜிம் அதிக்கம்ம தூ²பீகதம் திட்ட²தி, அயம் உக்கட்டோ²மகோ நாம பத்தோ. ஸசே தம் ராஜிம் ந ஸம்பாபுணாதி, அந்தோக³த⁴மேவ ஹோதி, அயம் உக்கட்டு²க்கட்டோ² நாம பத்தோ. உக்கட்ட²தோ உபட்³ட⁴ப்பமாணோ மஜ்ஜி²மோ. மஜ்ஜி²மபத்ததோ உபட்³ட⁴ப்பமாணோ ஓமகோ. தேஸம்பி வுத்தனயேனேவ பே⁴தோ³ வேதி³தப்³போ³. இச்சேதேஸு நவஸு உக்கட்டு²க்கட்டோ² ச ஓமகோமகோ சாதி த்³வே அபத்தா, ஸேஸா ஸத்த பத்தா பமாணயுத்தா நாம, அயமேத்த²ஸங்கே²போ, வித்தா²ரோ பன ஸமந்தபாஸாதி³காயம் (பாரா. அட்ட². 2.598 ஆத³யோ) வுத்தோ, தஸ்மா ஏவம் பமாணயுத்தம் ஸமணஸாருப்பேன பக்கம் அயோபத்தம் வா மத்திகாபத்தம் வா லபி⁴த்வா புராணபத்தம் பச்சுத்³த⁴ரித்வா அந்தோத³ஸாஹே அதி⁴ட்டா²தப்³போ³. ஸசே பனஸ்ஸ மூலதோ காகணிகமத்தம்பி தா³தப்³ப³ம் அவஸிட்ட²ம் ஹோதி, அதி⁴ட்டா²னுபகோ³ ந ஹோதி, அப்பச்சுத்³த⁴ரந்தேன விகப்பேதப்³போ³. தத்த² பச்சுத்³த⁴ரணாதி⁴ட்டா²னலக்க²ணம் சீவரவக்³கே³ வுத்தனயேனேவ வேதி³தப்³ப³ம், விகப்பனலக்க²ணம் பரதோ வக்கா²ம. ஸசே பன கோசி அபத்தகோ பி⁴க்கு² த³ஸ பத்தே லபி⁴த்வா ஸப்³பே³ அத்தனாவ பரிபு⁴ஞ்ஜிதுகாமோ ஹோதி, ஏகம் பத்தம் அதி⁴ட்டா²ய புன தி³வஸே தம் பச்சுத்³த⁴ரித்வா அஞ்ஞோ அதி⁴ட்டா²தப்³போ³, ஏதேனுபாயேன வஸ்ஸஸதம்பி பரிஹரிதும் ஸக்கா. யோ பனஸ்ஸ பத்தோ முக²வட்டிதோ ஹேட்டா² த்³வங்கு³லமத்தோகாஸதோ பட்டா²ய யத்த²கத்த²சி கங்கு³ஸித்த²னிக்க²மனமத்தேன சி²த்³தே³ன சி²த்³தோ³ ஹோதி, ஸோ அதி⁴ட்டா²னுபகோ³ ந ஹோதி. புன சி²த்³தே³ பாகதிகே கதே அதி⁴ட்டா²தப்³போ³, ஸேஸம் அதி⁴ட்டா²னவிஜஹனம் திசீவரே வுத்தனயமேவ.

ஸாவத்தி²யம் ச²ப்³ப³க்³கி³யே ஆரப்³ப⁴ அதிரேகபத்ததா⁴ரணவத்து²ஸ்மிம் பஞ்ஞத்தம், அஸாதா⁴ரணபஞ்ஞத்தி, ஸேஸவண்ணனாக்கமோ சீவரவக்³க³ஸ்ஸ பட²மஸிக்கா²பதே³ வுத்தனயேனேவ வேதி³தப்³போ³தி.

பத்தஸிக்கா²பத³வண்ணனா நிட்டி²தா.

2. ஊனபஞ்சப³ந்த⁴னஸிக்கா²பத³வண்ணனா

து³தியே ஊனானி பஞ்ச ப³ந்த⁴னானி அஸ்ஸாதி ஊனபஞ்சப³ந்த⁴னோ, நாஸ்ஸ பஞ்ச ப³ந்த⁴னானி பூரேந்தீதி அத்தோ², தேன ஊனபஞ்சப³ந்த⁴னேன, இத்த²ம்பூ⁴தஸ்ஸ லக்க²ணே கரணவசனம். தத்த² யஸ்மா அப³ந்த⁴னஸ்ஸாபி பஞ்ச ப³ந்த⁴னானி ந பூரேந்தி ஸப்³ப³ஸோ நத்தி²தாய, தேனஸ்ஸ பத³பா⁴ஜனே ‘‘ஊனபஞ்சப³ந்த⁴னோ நாம பத்தோ அப³ந்த⁴னோ வா ஏகப³ந்த⁴னோ வா’’திஆதி³ (பாரா. 613) வுத்தம். ‘‘ஊனபஞ்சப³ந்த⁴னேனா’’தி ச வுத்தத்தா யஸ்ஸ பஞ்சப³ந்த⁴னோ பத்தோ ஹோதி பஞ்சப³ந்த⁴னோகாஸோ வா, தஸ்ஸ ஸோ அபத்தோ, தஸ்மா அஞ்ஞம் விஞ்ஞாபேதும் வட்டதி. யஸ்மிம் பன பத்தே முக²வட்டிதோ ஹேட்டா² ப⁴ட்டா² த்³வங்கு³லப்பமாணா ஏகாபி ராஜி ஹோதி, தம் தஸ்ஸா ராஜியா ஹேட்டி²மபரியந்தே பத்தவேத⁴கேன விஜ்ஜி²த்வா பசித்வா ஸுத்தரஜ்ஜுகமகசிரஜ்ஜுகாதீ³ஹி வா திபுஸுத்தகேன வா ப³ந்தி⁴த்வா தம் ப³ந்த⁴னம் ஆமிஸஸ்ஸ அலக்³க³னத்த²ம் திபுபட்டகேன வா கேனசி ப³த்³த⁴ஸிலேஸாதி³னா வா படிச்சா²தே³தப்³ப³ம், ஸோ ச பத்தோ அதி⁴ட்ட²ஹித்வா பரிபு⁴ஞ்ஜிதப்³போ³, ஸுகு²மம் வா சி²த்³த³ம் கத்வா ப³ந்தி⁴தப்³போ³, பா²ணிதம் ஜா²பேத்வா பாஸாணசுண்ணேன ப³ந்தி⁴தும்பி வட்டதி. யஸ்ஸ பன த்³வே ராஜியோ வா ஏகாயேவ வா சதுரங்கு³லா, தஸ்ஸ த்³வே ப³ந்த⁴னானி தா³தப்³பா³னி. யஸ்ஸ திஸ்ஸோ வா ஏகாயேவ வா ச²ளங்கு³லா, தஸ்ஸ தீணி. யஸ்ஸ சதஸ்ஸோ வா ஏகாயேவ வா அட்ட²ங்கு³லா, தஸ்ஸ சத்தாரி. யஸ்ஸ பஞ்ச வா ஏகாயேவ வா த³ஸங்கு³லா, ஸோ ப³த்³தோ⁴பி அப³த்³தோ⁴பி அபத்தோயேவ, அஞ்ஞோ விஞ்ஞாபேதப்³போ³, ஏஸ தாவ மத்திகாபத்தே வினிச்ச²யோ.

அயோபத்தே பன ஸசேபி பஞ்ச வா அதிரேகானி வா சி²த்³தா³னி ஹோந்தி, தானி சே அயசுண்ணேன வா ஆணியா வா லோஹமண்ட³லேன வா ப³த்³தா⁴னி மட்டா²னி ஹோந்தி, ஸ்வேவ பரிபு⁴ஞ்ஜிதப்³போ³, அஞ்ஞோ ந விஞ்ஞாபேதப்³போ³. அத² பன ஏகம்பி சி²த்³த³ம் மஹந்தம் ஹோதி, லோஹமண்ட³லேன ப³த்³த⁴ம்பி மட்ட²ம் ந ஹோதி, பத்தே ஆமிஸம் லக்³க³தி, அகப்பியோ ஹோதி அயம் பத்தோ, அஞ்ஞோ விஞ்ஞாபேதப்³போ³. யோ பன ஏவம் பத்தஸங்கே²பக³தே வா அயோபத்தே, ஊனபஞ்சப³ந்த⁴னே வா மத்திகாபத்தே ஸதி அஞ்ஞம் விஞ்ஞாபேதி, பயோகே³ து³க்கடம், படிலாபே⁴ன நிஸ்ஸக்³கி³யோ ஹோதி, நிஸ்ஸஜ்ஜிதப்³போ³. நிஸ்ஸஜ்ஜந்தேன ஸங்க⁴மஜ்ஜே² ஏவ நிஸ்ஸஜ்ஜிதப்³போ³, தேன வுத்தம் ‘‘பி⁴க்கு²பரிஸாய நிஸ்ஸஜ்ஜிதப்³போ³’’தி. யோ ச தஸ்ஸா பி⁴க்கு²பரிஸாயாதிஏத்த² தேஹி பி⁴க்கூ²ஹி பகதியா ஏவ அத்தனோ அத்தனோ அதி⁴ட்டி²தம் பத்தம் க³ஹேத்வா ஸன்னிபதிதப்³ப³ம், ததோ ஸம்மதேன பத்தக்³கா³ஹாபகேன பத்தஸ்ஸ விஜ்ஜமானகு³ணம் வத்வா ‘‘ப⁴ந்தே, இமம் க³ண்ஹதா²’’தி தே²ரோ வத்தப்³போ³. ஸசே தே²ரஸ்ஸ ஸோ பத்தோ ந ருச்சதி, அப்பிச்ச²தாய வா ந க³ண்ஹாதி, வட்டதி. தஸ்மிம் பன அனுகம்பாய அக³ண்ஹந்தஸ்ஸ து³க்கடம். ஸசே பன க³ண்ஹாதி, தே²ரஸ்ஸ பத்தம் து³தியத்தே²ரம் கா³ஹாபேத்வா ஏதேனேவ உபாயேன யாவ ஸங்க⁴னவகா கா³ஹாபேதப்³போ³, தேன பரிச்சத்தபத்தோ பன பத்தபரியந்தோ நாம, ஸோ தஸ்ஸ பி⁴க்கு²னோ பதா³தப்³போ³. தேனாபி ஸோ யதா² விஞ்ஞாபேத்வா க³ஹிதபத்தோ, ஏவமேவ ஸக்கச்சம் பரிபு⁴ஞ்ஜிதப்³போ³. ஸசே பன தம் ஜிகு³ச்ச²ந்தோ அதே³ஸே வா நிக்கி²பதி, அபரிபோ⁴கே³ன வா பரிபு⁴ஞ்ஜதி, விஸ்ஸஜ்ஜேதி வா, து³க்கடம் ஆபஜ்ஜதி.

ஸக்கேஸு ச²ப்³ப³க்³கி³யே ஆரப்³ப⁴ ப³ஹூ பத்தே விஞ்ஞாபனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், அப³ந்த⁴னேன அப³ந்த⁴னம், ஏகப³ந்த⁴னம், து³ப³ந்த⁴னம், திப³ந்த⁴னம், சதுப்³ப³ந்த⁴னம், அப³ந்த⁴னோகாஸம், ஏகத்³விதிசதுப்³ப³ந்த⁴னோகாஸம் சேதாபேதி, ஏவம் ஏகேகேன பத்தேன த³ஸதா⁴ த³ஸவித⁴ம் பத்தம். சேதாபனவஸேன பன ஏகம் நிஸ்ஸக்³கி³யபாசித்தியஸதம் ஹோதி. நட்ட²பத்தஸ்ஸ, பி⁴ன்னபத்தஸ்ஸ, அத்தனோ ஞாதகப்பவாரிதே, அஞ்ஞஸ்ஸ ச ஞாதகப்பவாரிதே, தஸ்ஸேவத்தா²ய விஞ்ஞாபேந்தஸ்ஸ, அத்தனோ த⁴னேன க³ண்ஹதோ, உம்மத்தகாதீ³னஞ்ச அனாபத்தி. அதி⁴ட்டா²னுபக³பத்தஸ்ஸ ஊனபஞ்சப³ந்த⁴னதா, அத்துத்³தே³ஸிகதா, அகதவிஞ்ஞத்தி, தாய ச படிலாபோ⁴தி இமானேத்த² சத்தாரி அங்கா³னி. ஸமுட்டா²னாதீ³னி தோ⁴வாபனஸிக்கா²பதே³ வுத்தனயானேவாதி.

ஊனபஞ்சப³ந்த⁴னஸிக்கா²பத³வண்ணனா நிட்டி²தா.

3. பே⁴ஸஜ்ஜஸிக்கா²பத³வண்ணனா

ததியே படிஸாயனீயானீதி படிஸாயிதப்³பா³னி, பரிபு⁴ஞ்ஜிதப்³பா³னீதி அத்தோ². ஏதேன ஸயம் உக்³க³ஹேத்வா நிக்கி²த்தானம் ஸத்தாஹாதிக்கமேபி அனாபத்திம் த³ஸ்ஸேதி, தானி ஹி படிஸாயிதும் ந வட்டந்தி. பே⁴ஸஜ்ஜானீதி பே⁴ஸஜ்ஜகிச்சம் கரோந்து வா, மா வா, ஏவம் லத்³த⁴வோஹாரானி. ஸப்பி நாம க³வாதீ³னம் ஸப்பி, யேஸம் மம்ஸம் கப்பதி, தேஸம் ஸப்பி. ததா² நவனீதம். தேலம் நாம திலஸாஸபமதூ⁴கஏரண்ட³கவஸாதீ³ஹி நிப்³ப³த்திதம். மது⁴ நாம மக்கி²காமது⁴மேவ. பா²ணிதம் நாம உச்சு²ரஸம் உபாதா³ய பன அபக்கா வா அவத்து²கபக்கா வா ஸப்³பா³பி உச்சு²விகதி ‘‘பா²ணித’’ந்தி வேதி³தப்³ப³ம். தானி படிக்³க³ஹேத்வாதி தானி பே⁴ஸஜ்ஜானி படிக்³க³ஹேத்வா, ந தேஸம் வத்தூ²னி. ஏதேன ட²பேத்வா வஸாதேலம் யானேத்த² யாவகாலிகவத்து²கானி, தேஸம் வத்தூ²னி படிக்³க³ஹேத்வா கதானி ஸப்பிஆதீ³னி ஸத்தாஹம் அதிக்காமயதோபி அனாபத்திம் த³ஸ்ஸேதி. வஸாதேலம் பன காலே படிக்³க³ஹிதம் காலே நிபக்கம் காலே ஸம்ஸட்ட²ம் தேலபரிபோ⁴கே³ன பரிபு⁴ஞ்ஜிதும் அனுஞ்ஞாதம், தஸ்மா ட²பேத்வா மனுஸ்ஸவஸம் அஞ்ஞம் யம்கஞ்சி வஸம் புரேப⁴த்தம் படிக்³க³ஹேத்வா ஸாமம் பசித்வா நிப்³ப³த்திததேலம்பி ஸத்தாஹம் நிராமிஸபரிபோ⁴கே³ன வட்டதி. அனுபஸம்பன்னேன பசித்வா தி³ன்னம் பன தத³ஹுபுரேப⁴த்தம் ஸாமிஸம்பி வட்டதி, அஞ்ஞேஸம் யாவகாலிகவத்தூ²னம் வத்து²ம் பசிதும் ந வட்டதியேவ. நிப்³ப³த்திதஸப்பி வா நவனீதம் வா பசிதும் வட்டதி, தம் பன தத³ஹுபுரேப⁴த்தம்பி ஸாமிஸம் பரிபு⁴ஞ்ஜிதும் ந வட்டதி. புரேப⁴த்தம் படிக்³க³ஹிதகீ²ராதி³தோ அனுபஸம்பன்னேன பசித்வா கதஸப்பிஆதீ³னி பன தத³ஹுபுரேப⁴த்தம் ஸாமிஸானிபி வட்டந்தி, பச்சா²ப⁴த்ததோ பட்டா²ய அனஜ்ஜோ²ஹரணீயானி, ஸத்தாஹாதிக்கமேபி அனாபத்தி. ஸன்னிதி⁴காரகம் பரிபு⁴ஞ்ஜிதப்³பா³னீதி ஸன்னிதி⁴ம் கத்வா நித³ஹித்வா புரேப⁴த்தம் படிக்³க³ஹிதானி தத³ஹுபுரேப⁴த்தம் ஸாமிஸபரிபோ⁴கே³னாபி வட்டந்தி, பச்சா²ப⁴த்ததோ பட்டா²ய பன தானி ச, பச்சா²ப⁴த்தம் படிக்³க³ஹிதானி ச ஸத்தாஹம் நிராமிஸபரிபோ⁴கே³ன பரிபு⁴ஞ்ஜிதப்³பா³னீதி அத்தோ². ‘‘பரிபு⁴ஞ்ஜிதப்³பா³னீ’’தி ச வசனதோ அந்தோஸத்தாஹே அப்³ப⁴ஞ்ஜனாதீ³னம் அத்தா²ய அதி⁴ட்ட²ஹித்வா ட²பிதேஸு அனாபத்தி, யாவஜீவிகானி ஸாஸபமதூ⁴கஏரண்ட³கஅட்டீ²னி தேலகரணத்த²ம் படிக்³க³ஹேத்வா தத³ஹேவ கததேலம் ஸத்தாஹகாலிகம், து³தியதி³வஸே கதம் சா²ஹம் வட்டதி, ததியதி³வஸே கதம் பஞ்சாஹம், சதுத்த²பஞ்சமச²ட்ட²ஸத்தமதி³வஸே கதம் தத³ஹேவ வட்டதி. ஸசே யாவ அருணஸ்ஸ உக்³க³மனா திட்ட²தி, நிஸ்ஸக்³கி³யம் ஹோதி, அட்ட²மதி³வஸே கதம் அனஜ்ஜோ²ஹரணீயம், அனிஸ்ஸக்³கி³யத்தா பன பா³ஹிரபரிபோ⁴கே³ன வட்டதி. ஸசேபி ந கரோதி, தேலத்தா²ய படிக்³க³ஹிதஸாஸபாதீ³னம் பன பாளியம் அனாக³தஸப்பிஆதீ³னஞ்ச ஸத்தாஹாதிக்கமே து³க்கடம் ஆபஜ்ஜதி. ஸீதுத³கேன கதமதூ⁴கபுப்ப²பா²ணிதம் பன பா²ணிதக³திகமேவ, அம்ப³பா²ணிதாதீ³னி யாவகாலிகானி. யம் பனேத்த² ஸத்தாஹகாலிகம், தம் நிஸ்ஸட்ட²ம் படிலபி⁴த்வாபி அருஆதீ³னி வா மக்கே²தும், அஜ்ஜோ²ஹரிதும் வா ந வட்டதி. பதீ³பே காளவண்ணே வா உபனேதப்³ப³ம், அஞ்ஞஸ்ஸ பி⁴க்கு²னோ காயிகபரிபோ⁴க³ம் வட்டதி. யம் பன நிரபேக்கோ² பரிச்சஜித்வா புன லப⁴தி, தம் அஜ்ஜோ²ஹரிதும்பி வட்டதி. விஸும் ட²பிதஸப்பிஆதீ³ஸு, ஏகபா⁴ஜனே வா அமிஸ்ஸிதேஸு வத்து²க³ணனாய ஆபத்தியோ.

ஸாவத்தி²யம் ஸம்ப³ஹுலே பி⁴க்கூ² ஆரப்³ப⁴ ஸத்தாஹம் அதிக்கமனவத்து²ஸ்மிம் பஞ்ஞத்தம், ஸேஸம் சீவரவக்³க³ஸ்ஸ பட²மஸிக்கா²பதே³ வுத்தனயேனேவ வேதி³தப்³ப³ந்தி.

பே⁴ஸஜ்ஜஸிக்கா²பத³வண்ணனா நிட்டி²தா.

4. வஸ்ஸிகஸாடிகஸிக்கா²பத³வண்ணனா

சதுத்தே² மாஸோ ஸேஸோ கி³ம்ஹானந்தி சதுன்னம் கி³ம்ஹமாஸானம் ஏகோ பச்சி²மமாஸோ ஸேஸோ. பரியேஸிதப்³ப³ந்தி கி³ம்ஹானம் பச்சி²மமாஸஸ்ஸ பட²மதி³வஸதோ பட்டா²ய யாவ கத்திகமாஸஸ்ஸ பச்சி²மதி³வஸோ, தாவ ‘‘காலோ வஸ்ஸிகஸாடிகாயா’’திஆதி³னா ஸதுப்பாத³கரணேன, ஸங்க⁴ஸ்ஸ பவாரிதட்டா²னதோ, அத்தனோ ஞாதகப்பவாரிதட்டா²னதோ பன ‘‘தே³த² மே வஸ்ஸிகஸாடிகசீவர’’ந்திஆதி³காய விஞ்ஞத்தியாபி பரியேஸிதப்³ப³ம். அஞ்ஞாதகஅப்பவாரிதட்டா²னே ஸதுப்பாத³ம் கரோந்தஸ்ஸ வத்தபே⁴தே³ து³க்கடம், யதா² வா ததா² வா ‘‘தே³த² மே’’திஆதி³வசனேன விஞ்ஞாபேந்தஸ்ஸ அஞ்ஞாதகவிஞ்ஞத்திஸிக்கா²பதே³ன நிஸ்ஸக்³கி³யம் பாசித்தியம். கத்வா நிவாஸேதப்³ப³ந்தி கி³ம்ஹானம் பச்சி²மத்³த⁴மாஸஸ்ஸ பட²மதி³வஸதோ பட்டா²ய யாவ கத்திகமாஸஸ்ஸ பச்சி²மதி³வஸோ, தாவ ஸூசிகம்மனிட்டா²னேன ஸகிம்பி வண்ணபே⁴த³மத்தரஜனேன கப்பபி³ந்து³கரணேன ச கத்வா பரித³ஹிதப்³பா³. ஏத்தாவதா கி³ம்ஹானம் பச்சி²மோ மாஸோ பரியேஸனக்கே²த்தம், பச்சி²மோ அத்³த⁴மாஸோ கரணனிவாஸனக்கே²த்தம்பி, வஸ்ஸானஸ்ஸ சதூஸு மாஸேஸு ஸப்³ப³ம்பி தம் வட்டதீதி அயமத்தோ² த³ஸ்ஸிதோ ஹோதி. யோ சாயம் கி³ம்ஹானம் பச்சி²மோ மாஸோ அனுஞ்ஞாதோ, ஏத்த² கதபரியேஸிதம்பி வஸ்ஸிகஸாடிகம் அதி⁴ட்டா²தும் ந வட்டதி. ஸசே தஸ்மிம் மாஸே அதிக்கந்தே வஸ்ஸம் உக்கட்³டி⁴யதி, புன மாஸபரிஹாரம் லப⁴தி, தோ⁴வித்வா பன நிக்கி²பித்வா வஸ்ஸூபனாயிகதி³வஸே அதி⁴ட்டா²தப்³பா³. ஸசே ஸதிஸம்மோஸேன வா அப்பஹோனகபா⁴வேன வா அகதா ஹோதி. தே ச த்³வே மாஸே வஸ்ஸானஸ்ஸ சதுமாஸந்தி ச² மாஸே பரிஹாரம் லப⁴தி. ஸசே பன கத்திகமாஸே கதி²னம் அத்த²ரியதி, அபரேபி சத்தாரோ மாஸே லப⁴தி, ஏவம் த³ஸ மாஸா ஹோந்தி. ததோ பரம்பி ஸதியா பச்சாஸாய தம் மூலசீவரம் கத்வா ட²பேந்தஸ்ஸ ஏகமாஸந்தி ஏவம் ஏகாத³ஸ மாஸே பரிஹாரம் லப⁴தி, இதோ பரம் ஏகாஹம்பி ந லப⁴தி.

ஓரேன சே மாஸோ ஸேஸோ கி³ம்ஹானந்தி கி³ம்ஹானம் பச்சி²மமாஸஸ்ஸ ஓரிமபா⁴கே³ யாவ ஹேமந்தஸ்ஸ பட²மதி³வஸோ, தாவாதி அத்தோ². பரியேஸேய்யாதி ஏதேஸு ஸத்தஸு பிட்டி²ஸமயமாஸேஸு அஞ்ஞாதகஅப்பவாரிதட்டா²னதோ ஸதுப்பாத³கரணேன பரியேஸந்தஸ்ஸ நிஸ்ஸக்³கி³யம் பாசித்தியம், விஞ்ஞாபேந்தஸ்ஸ அஞ்ஞாதகவிஞ்ஞத்திஸிக்கா²பதே³ன நிஸ்ஸக்³கி³யம் பாசித்தியம், ஞாதகப்பவாரிதே விஞ்ஞாபேந்தஸ்ஸ தேன ஸிக்கா²பதே³ன அனாபத்தி, ஸதுப்பாத³ம் கரோந்தஸ்ஸ இமினா ஸிக்கா²பதே³ன ஆபத்தி. ஓரேனத்³த⁴மாஸோ ஸேஸோ கி³ம்ஹானந்தி கி³ம்ஹானஸ்ஸ பச்சி²மத்³த⁴மாஸதோ ஓரிமபா⁴கே³ ஏகஸ்மிம் அத்³த⁴மாஸே. கத்வா நிவாஸேய்யாதி ஏத்த²ந்தரே த⁴ம்மேன உப்பன்னம்பி கத்வா நிவாஸேந்தஸ்ஸ நிஸ்ஸக்³கி³யம் ஹோதி.

ஸாவத்தி²யம் ச²ப்³ப³க்³கி³யே பி⁴க்கூ² ஆரப்³ப⁴ வஸ்ஸிகஸாடிகபரியேஸனவத்து²ஸ்மிம் பஞ்ஞத்தம், அஸாதா⁴ரணபஞ்ஞத்தி, அனாணத்திகம், திகபாசித்தியம், ஊனகமாஸத்³த⁴மாஸேஸு அதிரேகஸஞ்ஞினோ வேமதிகஸ்ஸ வா து³க்கடம், ததா² ஸதியா வஸ்ஸிகஸாடிகாய நக்³க³ஸ்ஸ காயம் ஓவஸ்ஸாபயதோ. போக்க²ரணியாதீ³ஸு பன ந்ஹாயந்தஸ்ஸ வா அச்சி²ன்னசீவரஸ்ஸ வா நட்ட²சீவரஸ்ஸ வா ‘‘அனிவத்த²ம் சோரா ஹரந்தீ’’தி ஏவம் ஆபதா³ஸு வா நிவாஸயதோ உம்மத்தகாதீ³னஞ்ச அனாபத்தி. ஏத்த² ச வஸ்ஸிகஸாடிகாய அத்துத்³தே³ஸிகதா, அஸமயே பரியேஸனதா, தாய ச படிலாபோ⁴தி இமானி தாவ பரியேஸனாபத்தியா தீணி அங்கா³னி. ஸசீவரதா, ஆபதா³பா⁴வோ, வஸ்ஸிகஸாடிகாய ஸகபா⁴வோ, அஸமயே நிவாஸனந்தி இமானி நிவாஸனாபத்தியா சத்தாரி அங்கா³னி. ஸமுட்டா²னாதீ³னி தோ⁴வாபனஸிக்கா²பதே³ வுத்தனயானேவாதி.

வஸ்ஸிகஸாடிகஸிக்கா²பத³வண்ணனா நிட்டி²தா.

5. சீவரஅச்சி²ந்த³னஸிக்கா²பத³வண்ணனா

பஞ்சமே ஸாமம் சீவரம் த³த்வாதி வேய்யாவச்சாதீ³னி பச்சாஸிஸமானோ ஸயமேவ த³த்வா. அச்சி²ந்தே³ய்யாதி வேய்யாவச்சாதீ³னி அகரோந்தம் தி³ஸ்வா ஸகஸஞ்ஞாய அச்சி²ந்த³ந்தஸ்ஸ வத்து²க³ணனாய ஆபத்தியோ. அச்சி²ந்தா³பேய்யாதிஏத்த² பன ‘‘அச்சி²ந்தா³’’தி ஆணத்தியா து³க்கடம், அச்சி²ந்தே³ஸு யத்தகானி ஆணத்தானி, தேஸம் க³ணனாய ஆபத்தியோ.

ஸாவத்தி²யம் உபனந்த³ம் ஆரப்³ப⁴ சீவரஅச்சி²ந்த³னவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, ஸாணத்திகம், திகபாசித்தியம். அனுபஸம்பன்னே உபஸம்பன்னஸஞ்ஞினோ, வேமதிகஸ்ஸ, அனுபஸம்பன்னஸஞ்ஞினோ வா, உபஸம்பன்னஸ்ஸாபி விகப்பனுபக³பச்சி²மசீவரம் ட²பேத்வா அஞ்ஞம் பரிக்கா²ரம், அனுபஸம்பன்னஸ்ஸ ச யம்கிஞ்சி அச்சி²ந்த³தோ வா து³க்கடம். தேன துட்டே²ன வா குபிதேன வா தி³ன்னம் பன தஸ்ஸ விஸ்ஸாஸம் வா க³ண்ஹந்தஸ்ஸ உம்மத்தகாதீ³னஞ்ச அனாபத்தி. விகப்பனுபக³பச்சி²மசீவரதா, ஸாமம் தி³ன்னதா, ஸகஸஞ்ஞிதா, உபஸம்பன்னதா, கோத⁴வஸேன அச்சி²ந்த³னம் வா அச்சி²ந்தா³பனம் வாதி இமானேத்த² பஞ்ச அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி அஞ்ஞத்ர வேத³னாய. வேத³னா பன இத⁴ து³க்க²வேத³னாயேவாதி.

சீவரஅச்சி²ந்த³னஸிக்கா²பத³வண்ணனா நிட்டி²தா.

6. ஸுத்தவிஞ்ஞத்திஸிக்கா²பத³வண்ணனா

ச²ட்டே² ஸுத்தந்தி ச²ப்³பி³த⁴ம் கோ²மஸுத்தாதி³ம் வா தேஸம் அனுலோமம் வா. விஞ்ஞாபேத்வாதி சீவரத்தா²ய யாசித்வா. வாயாபேய்யாதி ‘‘சீவரம் மே, ஆவுஸோ, வாயதா²’’தி அகப்பியாய விஞ்ஞத்தியா வாயாபேய்ய. நிஸ்ஸக்³கி³யந்தி ஏவம் வாயாபேந்தஸ்ஸ யோ தந்தவாயோ சீவரவாயனத்த²ம் துரிவேமஸஜ்ஜனாதி³கே பயோகே³ கரோதி, தஸ்ஸ ஸப்³ப³ப்பயோகே³ஸு து³க்கடம், படிலாபே⁴ன நிஸ்ஸக்³கி³யம் ஹோதி.

ராஜக³ஹே ச²ப்³ப³க்³கி³யே பி⁴க்கூ² ஆரப்³ப⁴ சீவரவாயாபனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், விஞ்ஞாபிதஸுத்தம் விஞ்ஞாபிததந்தவாயேன வாயாபேந்தஸ்ஸ தீ³க⁴தோ வித³த்தி²மத்தே திரியஞ்ச ஹத்த²மத்தே வீதே நிஸ்ஸக்³கி³யம் பாசித்தியம். இதி யாவ சீவரம் வட்³ட⁴தி, தாவ இமினா பமாணேன ஆபத்தியோ வட்³ட⁴ந்தி. தேனேவ பன அவிஞ்ஞத்தியா லத்³த⁴ஸுத்தம் வாயாபேந்தஸ்ஸ யதா² புப்³பே³ நிஸ்ஸக்³கி³யம், ஏவம் இத⁴ து³க்கடம். தேனேவ விஞ்ஞத்தஞ்ச அவிஞ்ஞத்தஞ்ச வாயாபேந்தஸ்ஸ ஸசே வுத்தப்பமாணேன கேதா³ரப³த்³த⁴ம் விய சீவரம் ஹோதி, அகப்பியஸுத்தமயே பரிச்சே²தே³ பாசித்தியம், இதரஸ்மிம் ததே²வ து³க்கடம். ததோ சே ஊனதரா பரிச்சே²தா³, ஸப்³ப³பரிச்சே²தே³ஸு து³க்கடானேவ. அத² ஏகந்தரிகேன வா ஸுத்தேன தீ³க⁴தோ வா கப்பியம் திரியம் அகப்பியம் கத்வா வீதம் ஹோதி, புப்³பே³ வுத்தப்பமாணக³ணனாய து³க்கடானி. ஏதேனேவ உபாயேன கப்பியதந்தவாயேன அகப்பியஸுத்தே, கப்பியாகப்பியேஹி தந்தவாயேஹி ஸுத்தேபி கப்பியே அகப்பியே கப்பியாகப்பியே ச ஆபத்திபே⁴தோ³ வேதி³தப்³போ³. திகபாசித்தியம், அவாயாபிதே வாயாபிதஸஞ்ஞினோ வேமதிகஸ்ஸ வா து³க்கடம். சீவரஸிப்³ப³னஆயோக³காயப³ந்த⁴னஅம்ஸப³த்³த⁴கபத்தத்த²விகபரிஸ்ஸாவனானம் அத்தா²ய ஸுத்தம் விஞ்ஞாபேந்தஸ்ஸ, ஞாதகப்பவாரிதேஹி கப்பியஸுத்தம் வாயாபேந்தஸ்ஸ, அஞ்ஞஸ்ஸத்தா²ய, அத்தனோ த⁴னேன, உம்மத்தகாதீ³னஞ்ச அனாபத்தி, சீவரத்தா²ய விஞ்ஞாபிதஸுத்தம், அத்துத்³தே³ஸிகதா, அகப்பியதந்தவாயேன அகப்பியவிஞ்ஞத்தியா வாயாபனந்தி இமானேத்த² தீணி அங்கா³னி. ஸமுட்டா²னாதீ³னி தோ⁴வாபனஸிக்கா²பதே³ வுத்தனயானேவாதி.

ஸுத்தவிஞ்ஞத்திஸிக்கா²பத³வண்ணனா நிட்டி²தா.

7. மஹாபேஸகாரஸிக்கா²பத³வண்ணனா

ஸத்தமே தத்ர சே ஸோ பி⁴க்கூ²தி யத்ர கா³மே வா நிக³மே வா தந்தவாயா, தத்ர. புப்³பே³ அப்பவாரிதோதி சீவரஸாமிகேஹி அப்பவாரிதோ ஹுத்வா. விகப்பம் ஆபஜ்ஜேய்யாதி விஸிட்ட²கப்பம் அதி⁴கவிதா⁴னம் ஆபஜ்ஜேய்ய. இதா³னி யேனாகாரேன விகப்பம் ஆபன்னோ ஹோதி, தம் த³ஸ்ஸேதும் இத³ம் கோ², ஆவுஸோதிஆதி³ வுத்தம். தத்த² ஆயதந்தி தீ³க⁴ம். வித்த²தந்தி புது²லம். அப்பிதந்தி க⁴னம். ஸுவீதந்தி ஸுட்டு² வீதம், ஸப்³ப³ட்டா²னேஸு ஸமம் கத்வா வீதம். ஸுப்பவாயிதந்தி ஸுட்டு² பவாயிதம், ஸப்³ப³ட்டா²னேஸு ஸமம் கத்வா தந்தே பஸாரிதம். ஸுவிலேகி²தந்தி லேக²னியா ஸுட்டு² விலேகி²தம். ஸுவிதச்சி²தந்தி கோச்சே²ன ஸுட்டு² விதச்சி²தம், ஸுட்டு² நித்³தோ⁴தந்தி அத்தோ². பிண்ட³பாதமத்தம்பீதி ஏத்த² ச ந பி⁴க்கு²னோ பிண்ட³பாததா³னமத்தேன தம் நிஸ்ஸக்³கி³யம் ஹோதி, ஸசே பன தே தஸ்ஸ வசனேன சீவரஸாமிகானம் ஹத்த²தோ ஸுத்தம் க³ஹேத்வா ஈஸகம்பி ஆயதம் வா வித்த²தம் வா அப்பிதம் வா கரோந்தி, அத² தேஸம் பயோகே³ பி⁴க்கு²னோ து³க்கடம், படிலாபே⁴ன நிஸ்ஸக்³கி³யம் ஹோதி.

ஸாவத்தி²யம் உபனந்த³ம் ஆரப்³ப⁴ சீவரே விகப்பம் ஆபஜ்ஜனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், திகபாசித்தியம், ஞாதகே அஞ்ஞாதகஸஞ்ஞினோ வேமதிகஸ்ஸ வா து³க்கடம். ஞாதகப்பவாரிதானம் தந்தவாயேஹி, அஞ்ஞஸ்ஸ வா அத்தா²ய, அத்தனோ வா த⁴னேன, மஹக்³க⁴ம் வாயாபேதுகாமம் அப்பக்³க⁴ம் வாயாபேந்தஸ்ஸ, உம்மத்தகாதீ³னஞ்ச அனாபத்தி. அஞ்ஞாதகஅப்பவாரிதானம் தந்தவாயே உபஸங்கமித்வா விகப்பமாபஜ்ஜனதா, சீவரஸ்ஸ அத்துத்³தே³ஸிகதா, தஸ்ஸ வசனேன ஸுத்தவட்³ட⁴னம், சீவரப்படிலாபோ⁴தி இமானேத்த² சத்தாரி அங்கா³னி. ஸமுட்டா²னாதீ³னி தோ⁴வாபனஸிக்கா²பதே³ வுத்தனயானேவாதி.

மஹாபேஸகாரஸிக்கா²பத³வண்ணனா நிட்டி²தா.

8. அச்சேகசீவரஸிக்கா²பத³வண்ணனா

அட்ட²மே த³ஸாஹானாக³தந்தி த³ஸ அஹானி த³ஸாஹம், தேன த³ஸாஹேன அனாக³தா த³ஸாஹானாக³தா, த³ஸாஹேன அஸம்பத்தாதி அத்தோ², தம் த³ஸாஹானாக³தம், அச்சந்தஸம்யோக³வஸேன பு⁴ம்மத்தே² உபயோக³வசனம். கத்திகதேமாஸிகபுண்ணமந்தி பட²மகத்திகபுண்ணமம், இதா⁴பி பட²மபத³ஸ்ஸ அனுபயோக³தா புரிமனயேனேவ பு⁴ம்மத்தே² உபயோக³வசனம். இத³ம் வுத்தம் ஹோதி – யதோ பட்டா²ய பட²மப்பவாரணா ‘‘த³ஸாஹானாக³தா’’தி வுச்சதி, ஸசேபி தானி தி³வஸானி அச்சந்தமேவ பி⁴க்கு²னோ அச்சேகசீவரம் உப்பஜ்ஜேய்ய, ‘‘அச்சேகம் இத³’’ந்தி ஜானமானேன பி⁴க்கு²னா ஸப்³ப³ம்பி படிக்³க³ஹேதப்³ப³ந்தி. தேன பவாரணாமாஸஸ்ஸ ஜுண்ஹபக்க²பஞ்சமிதோ பட்டா²ய உப்பன்னஸ்ஸ சீவரஸ்ஸ நிதா⁴னகாலோ த³ஸ்ஸிதோ ஹோதி. காமஞ்சேஸ ‘‘த³ஸாஹபரமம் அதிரேகசீவரம் தா⁴ரேதப்³ப³’’ந்திஇமினாவ ஸித்³தோ⁴, அட்டு²ப்பத்திவஸேன பன அபுப்³ப³ம் விய அத்த²ம் த³ஸ்ஸேத்வா ஸிக்கா²பத³ம் ட²பிதம். அச்சேகசீவரந்தி க³மிககி³லானக³ப்³பி⁴னிஅபி⁴னவுப்பன்னஸத்³தா⁴னம் புக்³க³லானம் அஞ்ஞதரேன ‘‘வஸ்ஸாவாஸிகம் த³ஸ்ஸாமீ’’தி ஏவம் ஆரோசேத்வா தி³ன்னம். ஸசே தம் புரே பவாரணாய விப⁴ஜிதம், யேன க³ஹிதம், தேன வஸ்ஸச்சே²தோ³ ந காதப்³போ³, கரோதி சே, தம் சீவரம் ஸங்கி⁴கம் ஹோதி. யாவ சீவரகாலஸமயந்தி அனத்த²தே கதி²னே யாவ வஸ்ஸானஸ்ஸ பச்சி²மோ மாஸோ, அத்த²தே கதி²னே யாவ பஞ்ச மாஸா, தாவ நிக்கி²பிதப்³ப³ம்.

ஸாவத்தி²யம் ஸம்ப³ஹுலே பி⁴க்கூ² ஆரப்³ப⁴ அச்சேகசீவரஸ்ஸ சீவரகாலஸமயம் அதிக்கமனவத்து²ஸ்மிம் பஞ்ஞத்தம், ஸேஸமேத்த² சீவரவக்³க³ஸ்ஸ பட²மஸிக்கா²பதே³ வுத்தனயேனேவ வேதி³தப்³ப³ந்தி.

அச்சேகசீவரஸிக்கா²பத³வண்ணனா நிட்டி²தா.

9. ஸாஸங்கஸிக்கா²பத³வண்ணனா

நவமே உபவஸ்ஸம் கோ² பனாதி ஏத்த² உபவஸ்ஸந்தி உபவஸ்ஸ, உபவஸித்வாதி வுத்தம் ஹோதி, உபஸம்பஜ்ஜந்திஆதீ³ஸு (விப⁴. 570) விய ஹேத்த² அனுனாஸிகோ த³ட்ட²ப்³போ³, வஸ்ஸம் உபக³ந்த்வா வஸித்வா சாதி அத்தோ². இமஸ்ஸ ச பத³ஸ்ஸ ‘‘ததா²ரூபேஸு பி⁴க்கு² ஸேனாஸனேஸு விஹரந்தோ’’திஇமினா ஸம்ப³ந்தோ⁴, இத³ம் வுத்தம் ஹோதி – வஸ்ஸம் உபக³ந்த்வா வஸித்வா ச ததோ பரம் பச்சி²மகத்திகபுண்ணமபரியோஸானகாலம் யானி கோ² பன தானி ஆரஞ்ஞகானி…பே… அந்தரக⁴ரே நிக்கி²பேய்யாதி. தத்த² ஆரஞ்ஞகானீதி ஸப்³ப³பச்சி²மானி ஆரோபிதேன ஆசரியத⁴னுனா கா³மஸ்ஸ இந்த³கீ²லதோ பட்டா²ய பஞ்சத⁴னுஸதப்பமாணே பதே³ஸே கதஸேனாஸனானி. ஸசே பன அபரிக்கி²த்தோ கா³மோ ஹோதி, பரிக்கே²பாரஹட்டா²னதோ பட்டா²ய மினேதப்³ப³ம். ஸசே விஹாரஸ்ஸ பரிக்கே²போ வா அபரிக்கி²த்தஸ்ஸ யம் கா³மதோ ஸப்³ப³பட²மம் ஸேனாஸனம் வா சேதியம் வா போ³தி⁴ வா து⁴வஸன்னிபாதட்டா²னம் வா யாவ, தம் தாவ பகதிமக்³கே³ன மினேதப்³ப³ம், அஞ்ஞம் மக்³க³ம் காதும், அமக்³கே³ன வா மினேதும் ந வட்டதி. ஸாஸங்கஸம்மதானீதி சோராதீ³னம் நிவிட்டோ²காஸாதி³த³ஸ்ஸனேன ‘‘ஸாஸங்கானீ’’தி ஸம்மதானி, ஏவம் ஸஞ்ஞாதானீதி அத்தோ². ஸஹ படிப⁴யேன ஸப்படிப⁴யானி, சோரேஹி மனுஸ்ஸானம் ஹதவிலுத்தாகோடிதபா⁴வத³ஸ்ஸனதோ ஸன்னிஹிதப³லவப⁴யானீதி அத்தோ².

அந்தரக⁴ரே நிக்கி²பேய்யாதி ஆரஞ்ஞகஸ்ஸ ஸேனாஸனஸ்ஸ ஸமந்தா ஸப்³ப³தி³ஸாபா⁴கே³ஸு அத்தனா அபி⁴ருசிதே கோ³சரகா³மே நிக்கி²பேய்ய. தஞ்ச கோ² ஸதியா அங்க³ஸம்பத்தியா, தத்ராயம் அங்க³ஸம்பத்தி – புரிமிகாய உபக³ந்த்வா மஹாபவாரணாய பவாரிதோ ஹோதி, இத³மேகம் அங்க³ம். கத்திகமாஸோயேவ ஹோதி, இத³ம் து³தியம் அங்க³ம். பஞ்சத⁴னுஸதிகபச்சி²மப்பமாணயுத்தம் ஸேனாஸனம் ஹோதி, இத³ம் ததியம் அங்க³ம். ஊனப்பமாணே வா கா³வுததோ அதிரேகப்பமாணே வா ந லப⁴தி, யத்ர ஹி பிண்டா³ய சரித்வா பு⁴த்தவேலாயமேவ புன விஹாரம் ஸக்கா ஆக³ந்தும், ததே³வ இதா⁴தி⁴ப்பேதம். ஸாஸங்கஸப்படிப⁴யமேவ ஹோதி, இத³ம் சதுத்த²ம் அங்க³ம் ஹோதீதி. கோசிதே³வ பச்சயோதி கிஞ்சிதே³வ காரணம். தேன சீவரேனாதி தேன அந்தரக⁴ரே நிக்கி²த்தசீவரேன. விப்பவாஸாயாதி வியோக³வாஸாய. ததோ சே உத்தரி விப்பவஸேய்யாதி சா²ரத்ததோ உத்தரி தஸ்மிம் ஸேனாஸனே ஸத்தமம் அருணம் உட்டா²பேய்யாதி அத்தோ², ததா² அஸக்கோந்தேன பன கா³மஸீமம் ஓக்கமித்வா ஸபா⁴யம் வா யத்த² கத்த²சி வா வஸித்வா சீவரப்பவத்திம் ஞத்வா பக்கமிதும் வட்டதி. அஞ்ஞத்ர பி⁴க்கு²ஸம்முதியாதி யம் ஸங்கோ⁴ கி³லானஸ்ஸ பி⁴க்கு²னோ சீவரேன விப்பவாஸஸம்முதிம் தே³தி, தம் ட²பேத்வா அலத்³த⁴ஸம்முதிகஸ்ஸ அதிரேகசா²ரத்தம் விப்பவஸதோ நிஸ்ஸக்³கி³யம் ஹோதி.

ஸாவத்தி²யம் ஸம்ப³ஹுலே பி⁴க்கூ² ஆரப்³ப⁴ சீவரவிப்பவாஸவத்து²ஸ்மிம் பஞ்ஞத்தம், ஸேஸமேத்த² சீவரவக்³க³ஸ்ஸ து³தியஸிக்கா²பதே³ வுத்தனயேனேவ வேதி³தப்³ப³ந்தி.

ஸாஸங்கஸிக்கா²பத³வண்ணனா நிட்டி²தா.

10. பரிணதஸிக்கா²பத³வண்ணனா

த³ஸமே ஸங்கி⁴கந்தி ஸங்க⁴ஸ்ஸ ஸந்தகம். ஸோ ஹி ஸங்க⁴ஸ்ஸ பரிணதத்தா ஹத்தே² அனாருள்ஹோபி ஏகேன பரியாயேன ஸங்க⁴ஸந்தகோ ஹோதி. லாப⁴ந்தி லபி⁴தப்³ப³ம் சீவராதி³வத்து²ம். பரிணதந்தி ‘‘த³ஸ்ஸாம கரிஸ்ஸாமா’’தி வசீபே⁴தே³ன வா ஹத்த²முத்³தா³ய வா ஸங்க⁴ஸ்ஸ நின்னம் ஹுத்வா டி²தம். அத்தனோ பரிணாமேய்யாதி ‘‘இத³ம் மய்ஹம் தே³தா²’’திஆதீ³னி வத³ந்தோ அத்தனின்னம் கரேய்ய. ஸசே பன ஸங்க⁴ஸ்ஸ தி³ன்னம் ஹோதி, தம் க³ஹேதும் ந வட்டதி, ஸங்க⁴ஸ்ஸேவ தா³தப்³ப³ம். பரிணதம் பன ஸஹத⁴ம்மிகானம் வா கி³ஹீனம் வா அந்தமஸோ மாதுஸந்தகம்பி அத்தனோ பரிணாமேந்தஸ்ஸ பயோகே³ து³க்கடம், படிலாபே⁴ன நிஸ்ஸக்³கி³யம் ஹோதி.

ஸாவத்தி²யம் ச²ப்³ப³க்³கி³யே பி⁴க்கூ² ஆரப்³ப⁴ பரிணாமனவத்து²ஸ்மிம் பஞ்ஞத்தம், ஸாதா⁴ரணபஞ்ஞத்தி, அனாணத்திகம், பரிணதே வேமதிகஸ்ஸ, அபரிணதே பரிணதஸஞ்ஞினோ சேவ வேமதிகஸ்ஸ ச, ஸங்க⁴சேதியபுக்³க³லேஸு யஸ்ஸ கஸ்ஸசி பரிணதம் அஞ்ஞஸங்கா⁴தீ³னம் பரிணாமேந்தஸ்ஸ ச து³க்கடம். அபரிணதஸஞ்ஞினோ, ‘‘கத்த² தே³மா’’தி புச்சி²தே ‘‘யத்த² தும்ஹாகம் சித்தம் பஸீத³தி, தத்த² தே³த², தும்ஹாகம் தே³ய்யத⁴ம்மோ பரிபோ⁴க³ம் வா லபே⁴ய்யா’’திஆதீ³னி வத³ந்தஸ்ஸ, உம்மத்தகாதீ³னஞ்ச அனாபத்தி. ஸங்கே⁴ பரிணதபா⁴வோ, தம் ஞத்வா அத்தனோ பரிணாமனம், படிலாபோ⁴தி இமானேத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானீதி.

பரிணதஸிக்கா²பத³வண்ணனா நிட்டி²தா.

பத்தவக்³கோ³ ததியோ.

இதி கங்கா²விதரணியா பாதிமோக்க²வண்ணனாய

நிஸ்ஸக்³கி³யபாசித்தியவண்ணனா நிட்டி²தா.