4. சதுத்த²பாராஜிகவண்ணனா

சதுத்தே² அனபி⁴ஜானந்தி ஸகஸந்தானே அனுப்பன்னத்தா அத்தனி அத்தி²பா⁴வம் அஜானந்தோ. உத்தரிமனுஸ்ஸத⁴ம்மந்தி உத்தரிமனுஸ்ஸானம் ஜா²யீனஞ்சேவ அரியானஞ்ச த⁴ம்மம். அத்துபனாயிகந்தி அத்தனி தம் உபனேதி ‘‘மயி அத்தீ²’’தி ஸமுதா³சரந்தோ, அத்தானம் வா தத்த² உபனேதி ‘‘அஹம் ஏத்த² ஸந்தி³ஸ்ஸாமீ’’தி ஸமுதா³சரந்தோதி அத்துபனாயிகோ, தம் அத்துபனாயிகம். ஏவம் கத்வா ஸமுதா³சரேய்யாதி ஸம்ப³ந்தோ⁴. அலமரியஞாணத³ஸ்ஸனந்திஏத்த² மஹக்³க³தலோகுத்தரபஞ்ஞா ஜானனட்டே²ன ஞாணம், சக்கு²னா ச தி³ட்ட²மிவ த⁴ம்மம் பச்சக்க²கரணதோ த³ஸ்ஸனத்தே²ன த³ஸ்ஸனந்தி ஞாணத³ஸ்ஸனம், அரியம் விஸுத்³த⁴ம் உத்தமம் ஞாணத³ஸ்ஸனந்தி அரியஞாணத³ஸ்ஸனம், அலம் பரியத்தம் கிலேஸவித்³த⁴ம்ஸனஸமத்த²ம் அரியஞாணத³ஸ்ஸனமேத்த² ஜா²னாதி³பே⁴தே³ உத்தரிமனுஸ்ஸத⁴ம்மே, அலம் வா அரியஞாணத³ஸ்ஸனமஸ்ஸாதி அலமரியஞாணத³ஸ்ஸனோ, தம் அலமரியஞாணத³ஸ்ஸனம். ஸமுதா³சரேய்யாதி வுத்தப்பகாரமேதம் உத்தரிமனுஸ்ஸத⁴ம்மம் அத்துபனாயிகம் கத்வா காயேன வா வாசாய வா தது³ப⁴யேன வா விஞ்ஞுஸ்ஸ மனுஸ்ஸஜாதிகஸ்ஸ ஆரோசேய்ய. இதி ஜானாமி இதி பஸ்ஸாமீதி ஸமுதா³சரணாகாரத³ஸ்ஸனமேதம், அத்துபனாயிகஞ்ஹி கத்வா வினா அஞ்ஞாபதே³ஸேன ஸமுதா³சரந்தோ ஏவம் ஸமுதா³சரதி, தஸ்மா ய்வாயம் பத³பா⁴ஜனே (பாரா. 209) ‘‘பட²மம் ஜா²னம் ஸமாபஜ்ஜிம், ஸமாபஜ்ஜாமி, ஸமாபன்னோ’’திஆதி³பே⁴தோ³ வுத்தோ, ஸோ ஸப்³போ³ இதே⁴வ ஸங்க³ஹம் க³ச்ச²தீதி வேதி³தப்³போ³. ‘‘இதி ஜானாமி இதி பஸ்ஸாமீ’’தி ஹி வத³ந்தோ ந யித³ம் வசனமத்தமேவ வத³தி, அத² கோ² ‘‘இமினா ச இமினா ச காரணேன அயம் த⁴ம்மோ மயி அத்தீ²’’தி தீ³பேதி, ‘‘ஸமாபஜ்ஜி’’ந்திஆதீ³னி ச வத³ந்தேன ஹி ஸமாபஜ்ஜனாதீ³ஹி காரணேஹி அத்தி²தா தீ³பிதா ஹோதி, தேன வுத்தம் ‘‘ய்வாயம் பத³பா⁴ஜனே பட²மம் ஜா²னம் ஸமாபஜ்ஜிம், ஸமாபஜ்ஜாமி, ஸமாபன்னோதிஆதி³பே⁴தோ³ வுத்தோ, ஸோ ஸப்³போ³ இதே⁴வ ஸங்க³ஹம் க³ச்ச²தீ’’தி. ததோ அபரேன ஸமயேனாதி ததோ ஆரோசிதகாலதோ அஞ்ஞதரஸ்மிம் காலே. இதி ஆபத்திபடிஜானனகாலத³ஸ்ஸனமேதம், அயம் பன ஆரோசிதக்க²ணேவ ஆபத்திம் ஆபஜ்ஜதி. ஆபத்திம் பன ஆபன்னோ யஸ்மா பரேன சோதி³தோ வா அசோதி³தோ வா படிஜானாதி, தஸ்மா ‘‘ஸமனுக்³கா³ஹீயமானோ வா அஸமனுக்³கா³ஹீயமானோ வா’’தி வுத்தம். ஆபன்னோதி ஆரோசிதக்க²ணேயேவ பாராஜிகம் ஆபன்னோ. விஸுத்³தா⁴பேக்கோ²தி அத்தனோ கி³ஹிபா⁴வாதி³கம் விஸுத்³தி⁴ம் அபேக்க²மானோ இச்ச²மானோ. அயஞ்ஹி யஸ்மா பாராஜிகம் ஆபன்னோ, தஸ்மா பி⁴க்கு²பா⁴வே ட²த்வா அப⁴ப்³போ³ ஜா²னாதீ³னி அதி⁴க³ந்தும், இச்சஸ்ஸ பி⁴க்கு²பா⁴வோ விஸுத்³தி⁴ நாம ந ஹோதி. யஸ்மா பன கி³ஹி வா உபாஸகாராமிகஸாமணேரானம் வா அஞ்ஞதரோ ஹுத்வா தா³னாதீ³ஹி ஸக்³க³மக்³க³ம் வா ஜா²னாதீ³ஹி மோக்க²மக்³க³ம் வா ஆராதே⁴தும் ப⁴ப்³போ³ ஹோதி, தஸ்மாஸ்ஸ கி³ஹிஆதி³பா⁴வோ விஸுத்³தி⁴ நாம ஹோதி. தேன வுத்தம் ‘‘கி³ஹிபா⁴வாதி³கம் விஸுத்³தி⁴ம் அபேக்க²மானோ’’தி. ஏவம் வதே³ய்யாதி ஏவம் ப⁴ணேய்ய, கத²ம்? ‘‘அஜானமேவம், ஆவுஸோ’’திஆதி³ம். தத்த² அஜானந்தி அஜானந்தோ. அபஸ்ஸந்தி அபஸ்ஸந்தோ. துச்ச²ம் முஸா விலபிந்தி அஹம் வசனத்த²விரஹதோ துச்ச²ம், வஞ்சனாதி⁴ப்பாயதோ முஸா விலபிம் அப⁴ணிந்தி வுத்தம் ஹோதி. அஞ்ஞத்ர அதி⁴மானாதி ய்வாயம் திலக்க²ணம் ஆரோபேத்வா ஸங்கா²ரே ஸம்மஸந்தஸ்ஸ ஆரத்³த⁴விபஸ்ஸகஸ்ஸ அபத்தே பத்தஸஞ்ஞிதாஸங்கா²தோ அதி⁴மானோ உப்பஜ்ஜதி, தம் அதி⁴மானம் ட²பேத்வா கேவலம் பாபிச்ச²தாய யோ ஸமுதா³சரேய்ய, அயம்பி பாராஜிகோ ஹோதீதி அத்தோ².

வேஸாலியம் வக்³கு³முதா³தீரியே பி⁴க்கூ² ஆரப்³ப⁴ தேஸம் உத்தரிமனுஸ்ஸத⁴ம்மாரோசனவத்து²ஸ்மிம் பஞ்ஞத்தம், ‘‘அஞ்ஞத்ர அதி⁴மானா’’தி அயமேத்த² அனுபஞ்ஞத்தி, ஸாதா⁴ரணபஞ்ஞத்தி, அனாணத்திகம், ‘‘பட²மம் ஜா²னம் ஸமாபஜ்ஜி’’ந்திஆதி³னா நயேன வுத்தப்பகாரம் அஸந்தம் ஜா²னாதி³த⁴ம்மம் ஆரோசேந்தஸ்ஸ ஸசே யஸ்ஸ கஸ்ஸசி ஆரோசேதி, ஸோ மனுஸ்ஸஜாதிகோ ஹோதி, அனந்தரமேவ ‘‘அயம் ஜா²னலாபீ⁴’’தி வா ‘‘அரியோ’’தி வா யேன கேனசி ஆகாரேன தமத்த²ம் ஜானாதி, பாராஜிகம். ஸசே ந ஜானாதி, து²ல்லச்சயம். ஸசே பன ‘‘யோ தே விஹாரே வஸி, ஸோ பி⁴க்கு² பட²மம் ஜா²னம் ஸமாபஜ்ஜீ’’திஆதி³னா (பாரா. 220) நயேன அஞ்ஞாபதே³ஸேன ஆரோசேந்தஸ்ஸ ஜானாதி, து²ல்லச்சயம். ஸசே ந ஜானாதி, து³க்கடம். அதி⁴மானேன ஆரோசேந்தஸ்ஸ, அனுல்லபனாதி⁴ப்பாயஸ்ஸ, உம்மத்தகாதீ³னஞ்ச அனாபத்தி. ஸீலவிபத்தி, உத்தரிமனுஸ்ஸத⁴ம்மஸ்ஸ அத்தனி அஸந்ததா, பாபிச்ச²தாய தஸ்ஸ ஆரோசனம், அனஞ்ஞாபதே³ஸோ, யஸ்ஸ ஆரோசேதி, தஸ்ஸ மனுஸ்ஸஜாதிகதா, தங்க²ணவிஜானனந்தி இமானேத்த² பஞ்ச அங்கா³னி. ஸமுட்டா²னாதீ³னி அதி³ன்னாதா³னே வுத்தஸதி³ஸானேவாதி.

சதுத்த²பாராஜிகவண்ணனா நிட்டி²தா.

உத்³தி³ட்டா² கோ² ஆயஸ்மந்தோ சத்தாரோ பாராஜிகா த⁴ம்மாதிஇத³ம் இத⁴ உத்³தி³ட்ட²பாராஜிகபரிதீ³பனமேவ. ஸமோதா⁴னேத்வா பன ஸப்³பா³னேவ சதுவீஸதி பாராஜிகானி வேதி³தப்³பா³னி. கதமானி சதுவீஸதி? பாளியம் ஆக³தானி தாவ பி⁴க்கூ²னம் சத்தாரி பி⁴க்கு²னீனம் அஸாதா⁴ரணானி சத்தாரீதி அட்ட², தானி ஏகாத³ஸன்னம் பண்ட³காதீ³னம் அப⁴ப்³ப³பா⁴வஸங்கா²தேஹி ஏகாத³ஸஹி பாராஜிகேஹி ஸத்³தி⁴ம் ஏகூனவீஸதி, கி³ஹிபா⁴வம் பத்த²யமானாய பி⁴க்கு²னியா விப்³ப⁴ந்தபா⁴வபாராஜிகேன ஸத்³தி⁴ம் வீஸதி, அபரானிபி லம்பீ³, முது³பிட்டி²கோ, பரஸ்ஸ அங்க³ஜாதம் முகே²ன க³ண்ஹாதி, பரஸ்ஸ அங்க³ஜாதே அபி⁴னிஸீத³தீதி இமேஸம் சதுன்னம் வஸேன ‘‘சத்தாரி அனுலோமபாராஜிகானீ’’தி வத³ந்தி, இதி இமானி ச சத்தாரி, புரிமானி ச வீஸதீதி ஸமோதா⁴னேத்வா ஸப்³பா³னேவ சதுவீஸதி பாராஜிகானி வேதி³தப்³பா³னி. ந லப⁴தி பி⁴க்கூ²ஹி ஸத்³தி⁴ம் ஸம்வாஸந்தி உபோஸதா²தி³பே⁴த³ம் ஸம்வாஸம் பி⁴க்கூ²ஹி ஸத்³தி⁴ம் ந லப⁴தி. யதா² புரே, ததா² பச்சா²தி யதா² புப்³பே³ கி³ஹிகாலே அனுபஸம்பன்னகாலே ச, பச்சா² பாராஜிகம் ஆபன்னோபி ததே²வ அஸம்வாஸோ ஹோதி, நத்தி² தஸ்ஸ பி⁴க்கூ²ஹி ஸத்³தி⁴ம் உபோஸதா²தி³பே⁴தோ³ ஸம்வாஸோதி. தத்தா²யஸ்மந்தே புச்சா²மீதி தேஸு சதூஸு பாராஜிகேஸு ஆயஸ்மந்தே ‘‘கச்சித்த² பரிஸுத்³தா⁴’’தி புச்சா²மி. கச்சித்தா²தி கச்சி ஏத்த², ஏதேஸு சதூஸு பாராஜிகேஸு கச்சி பரிஸுத்³தா⁴தி அத்தோ². அத² வா கச்சித்த² பரிஸுத்³தா⁴தி கச்சி பரிஸுத்³தா⁴ அத்த², ப⁴வதா²தி அத்தோ². ஸேஸம் ஸப்³ப³த்த² உத்தானமேவாதி.

கங்கா²விதரணியா பாதிமோக்க²வண்ணனாய

பாராஜிகவண்ணனா நிட்டி²தா.