3. ததியபாராஜிகவண்ணனா

ததியே ஸஞ்சிச்சாதி ஸம்சேதேத்வா ஸத்³தி⁴ம் சேதேத்வா. ‘‘பாணோ’’திஸஞ்ஞாய ஸத்³தி⁴ம்யேவ ‘‘வதா⁴மி ந’’ந்தி வத⁴கசேதனாய சேதேத்வா பகப்பேத்வா. மனுஸ்ஸவிக்³க³ஹந்தி கலலதோ பட்டா²ய ஜீவமானகமனுஸ்ஸஜாதிகஸரீரம். ஜீவிதா வோரோபேய்யாதி கலலகாலேபி தாபனமத்³த³னேஹி வா பே⁴ஸஜ்ஜஸம்பதா³னேன வா ததோ வா உத்³த⁴ம்பி தத³னுரூபேன உபக்கமேன ஜீவிதா வியோஜேய்ய. இமஸ்ஸ பனத்த²ஸ்ஸ ஆவிபா⁴வத்த²ம் பாணோ வேதி³தப்³போ³, பாணாதிபாதோ வேதி³தப்³போ³, பாணாதிபாதீ வேதி³தப்³போ³, பாணாதிபாதஸ்ஸ பயோகோ³ வேதி³தப்³போ³. தத்த² பாணோதி வோஹாரதோ ஸத்தோ, பரமத்த²தோ ஜீவிதிந்த்³ரியம். பாணாதிபாதோதி யாய சேதனாய ஜீவிதிந்த்³ரியுபச்சே²த³கபயோக³ம் ஸமுட்டா²பேதி, ஸா சேதனா. பாணாதிபாதீதி வுத்தசேதனாய ஸமங்கி³புக்³க³லோ. பாணாதிபாதஸ்ஸ பயோகோ³தி பாணாதிபாதஸ்ஸ ச² பயோகா³ ஸாஹத்தி²கோ நிஸ்ஸக்³கி³யோ ஆணத்திகோ தா²வரோ விஜ்ஜாமயோ இத்³தி⁴மயோதி. தத்த² ஸாஹத்தி²கோதி ஸயம் மாரேந்தஸ்ஸ காயேன வா காயப்படிப³த்³தே⁴ன வா பஹரணம். நிஸ்ஸக்³கி³யோதி தூ³ரே டி²தம் மாரேதுகாமஸ்ஸ காயேன வா காயப்படிப³த்³தே⁴ன வா உஸுஸத்தியந்தபாஸாணாதீ³னம் நிஸ்ஸஜ்ஜனம். தத்த² ஏகேகோ உத்³தி³ஸ்ஸானுத்³தி³ஸ்ஸபே⁴த³தோ து³விதோ⁴. தத்த² உத்³தி³ஸ்ஸகே யம் உத்³தி³ஸ்ஸ பஹரதி, தஸ்ஸேவ மரணேன கம்மப³த்³தோ⁴. ‘‘யோ கோசி மரதூ’’தி ஏவம் அனுத்³தி³ஸ்ஸகே பஹாரப்பச்சயா யஸ்ஸ கஸ்ஸசி மரணேன கம்மப³த்³தோ⁴. உப⁴யத்தா²பி ச பஹரிதமத்தே வா மரது, பச்சா² வா தேனேவ ரோகே³ன, பஹரிதக்க²ணேயேவ கம்மப³த்³தோ⁴. ஆணத்திகோதி ‘‘அஸுகம் நாம மாரேஹீ’’தி அஞ்ஞம் ஆணாபேந்தஸ்ஸ ஆணாபனம்.

தத்த² –

வத்து² காலோ ச ஓகாஸோ, ஆவுத⁴ம் இரியாபதோ²;

க்ரியாவிஸேஸோதி இமே, ச² ஆணத்தி நியாமகா.

தத்த² வத்தூ²தி புக்³க³லோ. யஞ்ஹி புக்³க³லம் ‘‘மாரேஹீ’’தி ஆணத்தோ ஸசே தமேவ மாரேதி, ஆணாபகஸ்ஸ ஆபத்தி. அத² அஞ்ஞம் மாரேதி, தம்மஞ்ஞமானோ வா அஞ்ஞம் மாரேதி, ஆணாபகோ முச்சதி. ‘‘இமம் மாரேஹீ’’தி ஆணத்தே பன ஆணாபகஸ்ஸ து³க்கடம். காலோதி புரேப⁴த்தாதி³காலோ. ஸசே ஹி ‘‘புரேப⁴த்தம் மாரேஹீ’’தி ஆணத்தோ புரேப⁴த்தமேவ மாரேதி, ஆணாபகஸ்ஸ ஆபத்தி. அத² யம் புரேப⁴த்தம் நியாமிதம், ததோ பச்சா² வா புரே வா மாரேதி, ஆணாபகோ முச்சதி. இமினா நயேன ஸப்³ப³த்த² வினிச்ச²யோ வேதி³தப்³போ³. தா²வரோதி அஸம்ஹாரிமேன உபகரணேன மாரேதுகாமஸ்ஸ ஓபாதக்க²ணனம் அபஸ்ஸேனஸம்விதா⁴னம் அஸிஆதீ³னம் உபனிக்கி²பனம் தளாகாதீ³ஸு விஸஸம்பயோஜனம் ரூபூபஹாரோதிஏவமாதி³. வுத்தனயேனேவ சேத்தா²பி உத்³தி³ஸ்ஸானுத்³தி³ஸ்ஸபே⁴தோ³ வேதி³தப்³போ³. விஜ்ஜாமயோதி மாரணத்த²ம் விஜ்ஜாபரிஜப்பனம். இத்³தி⁴மயோதி கம்மவிபாகஜாய இத்³தி⁴யா பயோஜனம்.

ஸத்த²ஹாரகம் வாஸ்ஸ பரியேஸேய்யாதி ஏத்த² ஹரதீதி ஹாரகம், கிம் ஹரதி? ஜீவிதம். அத² வா ஹரிதப்³ப³ந்தி ஹாரகம், உபனிக்கி²பிதப்³ப³ந்தி அத்தோ². ஸத்த²ஞ்ச தம் ஹாரகஞ்சாதி ஸத்த²ஹாரகம். அஸ்ஸாதி மனுஸ்ஸவிக்³க³ஹஸ்ஸ. பரியேஸேய்யாதி யதா² லப⁴தி, ததா² கரேய்ய, உபனிக்கி²பேய்யாதி அத்தோ². ஏதேன தா²வரபயோக³ம் த³ஸ்ஸேதி. இதரதா² ஹி பரியிட்டி²மத்தேயேவ பாராஜிகோ ப⁴வேய்ய, ந சேதம் யுத்தம். பத³பா⁴ஜனே பனஸ்ஸ ப்³யஞ்ஜனம் அனாதி³யித்வா யம் ஏத்த² தா²வரபயோக³ஸங்க³ஹிதம் ஸத்த²ம், ததே³வ த³ஸ்ஸேதும் ‘‘அஸிம் வா’’திஆதி³ வுத்தம். மரணவண்ணம் வா ஸம்வண்ணேய்யாதி வாசாய வா தாலபண்ணாதீ³ஸு லிகி²த்வா வா ‘‘யோ ஏவம் மரதி, ஸோ த⁴னம் வா லப⁴தீ’’திஆதி³னா நயேன மரணே கு³ணம் பகாஸேய்ய. ஏதேன யதா² ‘‘அதி³ன்னாதா³னே ஆதி³யேய்யா’’தி வுத்தத்தா பரியாயகதா²ய முச்சதி, நயித⁴, ஏவம் ‘‘ஸம்வண்ணேய்யா’’தி வசனதோ பன இத⁴ பரியாயகதா²யபி ந முச்சதீதி அயமத்தோ² வேதி³தப்³போ³. மரணாய வா ஸமாத³பேய்யாதி ‘‘ஸத்த²ம் வா ஆஹரா’’திஆதி³னா (பாரா. 172) நயேன மரணத்தா²ய உபாயம் கா³ஹாபேய்ய. ஏதேன ஆணத்திகப்பயோக³ம் த³ஸ்ஸேதி. அம்போ⁴ புரிஸாதி ஆலபனமேதம். கிம் துய்ஹிமினாதிஆதி³ ஸம்வண்ணனாகாரனித³ஸ்ஸனம். இதி சித்தமனோதி இதி சித்தோ இதி மனோ. ‘‘மதம் தே ஜீவிதா ஸேய்யோ’’திஏத்த² வுத்தமரணசித்தோ மரணமனோதி அத்தோ². ஏத்த² ச ‘‘மனோ’’திஇத³ம் சித்தஸ்ஸ அத்த²தீ³பனத்த²ம் வுத்தம். தேனேவஸ்ஸ பத³பா⁴ஜனே ‘‘யம் சித்தம் தம் மனோ’’தி (பாரா. 172) ஆஹ. சித்தஸங்கப்போதி விசித்தஸங்கப்போ. ஏத்தா²பி இதி-ஸத்³தோ³ ஆஹரிதப்³போ³. ‘‘ஸங்கப்போ’’தி ச ஸம்வித³ஹனமத்தஸ்ஸேதம் நாமம், ந விதக்கஸ்ஸேவ. தஞ்ச ஸம்வித³ஹனம் இமஸ்மிம் அத்தே² ஸஞ்ஞாசேதனாதி⁴ப்பாயேஹி ஸங்க³ஹம் க³ச்ச²தி, தஸ்மா ‘‘இதி சித்தஸங்கப்போ’’தி ‘‘மதம் தே ஜீவிதா ஸேய்யோ’’திஏத்த² வுத்தமரணஸஞ்ஞீ மரணசேதனோ மரணாதி⁴ப்பாயோதி ஏவமேத்த² அத்தோ² த³ட்ட²ப்³போ³. பத³பா⁴ஜனேபி ஹி அயமேவ நயோ த³ஸ்ஸிதோ. ஏதேன மரணசித்தாதீ³ஹி வினா ‘‘ஏகாஹம் ஜீவிதம் ஸேய்யோ, வீரியமாரப⁴தோ த³ள்ஹ’’ந்திஆதி³னா (த⁴. ப. 112) நயேன த⁴ம்மம் பா⁴ஸந்தஸ்ஸ ஸம்வண்ணனா நாம ந ஹோதீதி த³ஸ்ஸேதி. அனேகபரியாயேனாதி நானப்பகாரேன உச்சாவசேன காரணேன. புன மரணவண்ணந்திஆதி³ நிக³மனவசனம். பாராஜிகோ ஹோதீதி தங்க²ணூபபன்னம்பி மனுஸ்ஸவிக்³க³ஹம் வுத்தனயேன ஜீவிதா வோரோபேந்தோ பாராஜிகோ ஹோதீதி.

வேஸாலியம் ஸம்ப³ஹுலே பி⁴க்கூ² ஆரப்³ப⁴ அஞ்ஞமஞ்ஞம் ஜீவிதா வோரோபனவத்து²ஸ்மிம் பஞ்ஞத்தம், ‘‘மரணவண்ணம் வா’’தி அயமேத்த² அனுபஞ்ஞத்தி, ஸாதா⁴ரணபஞ்ஞத்தி, ஸாணத்திகம், மாரணத்தா²ய ஓபாதக்க²ணனாதீ³ஸு து³க்கடம், அனோதி³ஸ்ஸ க²தே ஓபாதே யஸ்ஸ கஸ்ஸசி பதனேபி து³க்கடம், யக்க²பேததிரச்சா²னக³தமனுஸ்ஸவிக்³க³ஹானம் திரச்சா²னக³தஸ்ஸ ச து³க்கு²ப்பத்தியம் து³க்கடமேவ, மனுஸ்ஸஜாதிகஸ்ஸ து³க்கு²ப்பத்தியம் து²ல்லச்சயம், ததா² யக்கா²தீ³னம் மரணே, திரச்சா²னக³தமரணே பன பாசித்தியம், மனுஸ்ஸமரணே பாராஜிகந்தி. இமினா நயேன ஸப்³ப³த்த² பயோக³பே⁴த³வஸேன ஆபத்திபே⁴தோ³ வேதி³தப்³போ³. அஸஞ்சிச்ச மாரேந்தஸ்ஸ அஜானந்தஸ்ஸ நமரணாதி⁴ப்பாயஸ்ஸ உம்மத்தகாதீ³னஞ்ச அனாபத்தி. தத்த² அஸஞ்சிச்சாதி ‘‘இமினா உபக்கமேன இமம் மாரேமீ’’தி அசேதேத்வா கதேன உபக்கமேன முஸலுஸ்ஸாபனவத்து²ஸ்மிம் (பாரா. 180 ஆத³யோ) விய பரே மதேபி அனாபத்தி. அஜானந்தஸ்ஸாதி ‘‘இமினா அயம் மரிஸ்ஸதீ’’தி அஜானந்தஸ்ஸ உபக்கமேன விஸக³தபிண்ட³பாதவத்து²ஸ்மிம் (பாரா. 181) விய பரே மதேபி அனாபத்தி. நமரணாதி⁴ப்பாயஸ்ஸாதி மரணம் அனிச்ச²ந்தஸ்ஸ உபக்கமேன பே⁴ஸஜ்ஜவத்து²ஸ்மிம் (பாரா. 187) விய பரே மதேபி அனாபத்தி. ஏவம் அஸஞ்சிச்சாதிஆதீ³ஸு வினிச்ச²யோ வேதி³தப்³போ³. ஸீலவிபத்தி, மனுஸ்ஸஜாதிகபாணோ, பாணஸஞ்ஞிதா, வத⁴கசித்தம், உபக்கமோ, தேன மரணந்தி இமானேத்த² பஞ்ச அங்கா³னி. அதி³ன்னாதா³னஸமஉட்டா²னம், கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னந்தி.

ததியபாராஜிகவண்ணனா நிட்டி²தா.