பி⁴க்கு²னீபாதிமோக்க²பாளி

புப்³ப³கரணம்-4

ஸம்மஜ்ஜனீ பதீ³போ ச, உத³கம் ஆஸனேன ச;

உபோஸத²ஸ்ஸ ஏதானி, ‘‘புப்³ப³கரண’’ந்தி வுச்சதி.

புப்³ப³கிச்சம்-5

ச²ந்த³, பாரிஸுத்³தி⁴, உதுக்கா²னம், பி⁴க்கு²னிக³ணனா ச ஓவாதோ³;

உபோஸத²ஸ்ஸ ஏதானி, ‘‘புப்³ப³கிச்ச’’ந்தி வுச்சதி.

பத்தகல்லஅங்கா³-4

உபோஸதோ², யாவதிகா ச பி⁴க்கு²னீ கம்மப்பத்தா;

ஸபா⁴கா³பத்தியோ ச ந விஜ்ஜந்தி;

வஜ்ஜனீயா ச புக்³க³லா தஸ்மிம் ந ஹோந்தி, ‘‘பத்தகல்ல’’ந்தி வுச்சதி.

புப்³ப³கரணபுப்³ப³கிச்சானி ஸமாபேத்வா தே³ஸிதாபத்திகஸ்ஸ ஸமக்³க³ஸ்ஸ பி⁴க்கு²னிஸங்க⁴ஸ்ஸ அனுமதியா பாதிமோக்க²ம் உத்³தி³ஸிதும் ஆராத⁴னம் கரோம.

நிதா³னுத்³தே³ஸோ

ஸுணாது மே அய்யே ஸங்கோ⁴, அஜ்ஜுபோஸதோ² பன்னரஸோ, யதி³ ஸங்க⁴ஸ்ஸ பத்தகல்லம், ஸங்கோ⁴ உபோஸத²ம் கரேய்ய, பாதிமோக்க²ம் உத்³தி³ஸேய்ய.

கிம் ஸங்க⁴ஸ்ஸ புப்³ப³கிச்சம்? பாரிஸுத்³தி⁴ம் அய்யாயோ ஆரோசேத², பாதிமோக்க²ம் உத்³தி³ஸிஸ்ஸாமி, தம் ஸப்³பா³வ ஸந்தா ஸாது⁴கம் ஸுணோம மனஸி கரோம. யஸ்ஸா ஸியா ஆபத்தி, ஸா ஆவிகரேய்ய, அஸந்தியா ஆபத்தியா துண்ஹீ ப⁴விதப்³ப³ம், துண்ஹீபா⁴வேன கோ² பனாய்யாயோ, ‘‘பரிஸுத்³தா⁴’’தி வேதி³ஸ்ஸாமி. யதா² கோ² பன பச்சேகபுட்ட²ஸ்ஸா வேய்யாகரணம் ஹோதி, ஏவமேவம் ஏவரூபாய பரிஸாய யாவததியம் அனுஸாவிதம் ஹோதி. யா பன பி⁴க்கு²னீ யாவததியம் அனுஸாவியமானே ஸரமானா ஸந்திம் ஆபத்திம் நாவிகரேய்ய, ஸம்பஜானமுஸாவாத³ஸ்ஸா ஹோதி. ஸம்பஜானமுஸாவாதோ³ கோ² பனாய்யாயோ, அந்தராயிகோ த⁴ம்மோ வுத்தோ ப⁴க³வதா, தஸ்மா ஸரமானாய பி⁴க்கு²னியா ஆபன்னாய விஸுத்³தா⁴பேக்கா²ய ஸந்தீ ஆபத்தி ஆவிகாதப்³பா³, ஆவிகதா ஹிஸ்ஸா பா²ஸு ஹோதி.

உத்³தி³ட்ட²ம் கோ², அய்யாயோ, நிதா³னம். தத்தா²ய்யாயோ புச்சா²மி, கச்சித்த² பரிஸுத்³தா⁴, து³தியம்பி புச்சா²மி, கச்சித்த² பரிஸுத்³தா⁴, ததியம்பி புச்சா²மி, கச்சித்த² பரிஸுத்³தா⁴, பரிஸுத்³தே⁴த்தா²ய்யாயோ, தஸ்மா துண்ஹீ, ஏவமேதம் தா⁴ரயாமீதி.

நிதா³னம் நிட்டி²தம்.

பாராஜிகுத்³தே³ஸோ

தத்ரிமே அட்ட² பாராஜிகா த⁴ம்மா உத்³தே³ஸம் ஆக³ச்ச²ந்தி.

மேது²னத⁴ம்மஸிக்கா²பத³ம்

1. யா பன பி⁴க்கு²னீ ச²ந்த³ஸோ மேது²னம் த⁴ம்மம் படிஸேவேய்ய, அந்தமஸோ திரச்சா²னக³தேனபி, பாராஜிகா ஹோதி அஸம்வாஸா.

அதி³ன்னாதா³னஸிக்கா²பத³ம்

2. யா பன பி⁴க்கு²னீ கா³மா வா அரஞ்ஞா வா அதி³ன்னம் தே²ய்யஸங்கா²தம் ஆதி³யேய்ய, யதா²ரூபே அதி³ன்னாதா³னே ராஜானோ சோரம் க³ஹேத்வா ஹனேய்யும் வா ப³ந்தே⁴ய்யும் வா பப்³பா³ஜேய்யும் வா சோராஸி பா³லாஸி மூள்ஹாஸி தே²னாஸீதி, ததா²ரூபம் பி⁴க்கு²னீ அதி³ன்னம் ஆதி³யமானா அயம்பி பாராஜிகா ஹோதி அஸம்வாஸா.

மனுஸ்ஸவிக்³க³ஹஸிக்கா²பத³ம்

3. யா பன பி⁴க்கு²னீ ஸஞ்சிச்ச மனுஸ்ஸவிக்³க³ஹம் ஜீவிதா வோரோபேய்ய, ஸத்த²ஹாரகம் வாஸ்ஸ பரியேஸேய்ய, மரணவண்ணம் வா ஸம்வண்ணேய்ய, மரணாய வா ஸமாத³பேய்ய ‘‘அம்போ⁴ புரிஸ, கிம் துய்ஹிமினா பாபகேன து³ஜ்ஜீவிதேன, மதம் தே ஜீவிதா ஸேய்யோ’’தி, இதி சித்தமனா சித்தஸங்கப்பா அனேகபரியாயேன மரணவண்ணம் வா ஸம்வண்ணேய்ய, மரணாய வா ஸமாத³பேய்ய, அயம்பி பாராஜிகா ஹோதி அஸம்வாஸா.

உத்தரிமனுஸ்ஸத⁴ம்மஸிக்கா²பத³ம்

4. யா பன பி⁴க்கு²னீ அனபி⁴ஜானம் உத்தரிமனுஸ்ஸத⁴ம்மம் அத்துபனாயிகம் அலமரியஞாணத³ஸ்ஸனம் ஸமுதா³சரேய்ய ‘‘இதி ஜானாமி, இதி பஸ்ஸாமீ’’தி, ததோ அபரேன ஸமயேன ஸமனுக்³கா³ஹீயமானா வா அஸமனுக்³கா³ஹீயமானா வா ஆபன்னா விஸுத்³தா⁴பேக்கா² ஏவம் வதே³ய்ய ‘‘அஜானமேவம், அய்யே, அவசம் ஜானாமி, அபஸ்ஸம் பஸ்ஸாமி, துச்ச²ம் முஸா விலபி’’ந்தி, அஞ்ஞத்ர அதி⁴மானா, அயம்பி பாராஜிகா ஹோதி அஸம்வாஸா.

உப்³ப⁴ஜாணுமண்ட³லிகாஸிக்கா²பத³ம்

5. யா பன பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ, அத⁴க்க²கம் உப்³ப⁴ஜாணுமண்ட³லம் ஆமஸனம் வா பராமஸனம் வா க³ஹணம் வா சு²பனம் வா படிபீளனம் வா ஸாதி³யேய்ய, அயம்பி பாராஜிகா ஹோதி அஸம்வாஸா உப்³ப⁴ஜாணுமண்ட³லிகா.

வஜ்ஜப்படிச்சா²தி³காஸிக்கா²பத³ம்

6. யா பன பி⁴க்கு²னீ ஜானம் பாராஜிகம் த⁴ம்மம் அஜ்ஜா²பன்னம் பி⁴க்கு²னிம் நேவத்தனா படிசோதே³ய்ய, ந க³ணஸ்ஸ ஆரோசேய்ய, யதா³ ச ஸா டி²தா வா அஸ்ஸ சுதா வா நாஸிதா வா அவஸ்ஸடா வா, ஸா பச்சா² ஏவம் வதே³ய்ய ‘‘புப்³பே³வாஹம், அய்யே, அஞ்ஞாஸிம் ஏதம் பி⁴க்கு²னிம் ‘ஏவரூபா ச ஏவரூபா ச ஸா ப⁴கி³னீ’தி, நோ ச கோ² அத்தனா படிசோதே³ஸ்ஸம், ந க³ணஸ்ஸ ஆரோசேஸ்ஸ’’ந்தி, அயம்பி பாராஜிகா ஹோதி அஸம்வாஸா வஜ்ஜப்படிச்சா²தி³கா.

உக்கி²த்தானுவத்திகாஸிக்கா²பத³ம்

7. யா பன பி⁴க்கு²னீ ஸமக்³கே³ன ஸங்கே⁴ன உக்கி²த்தம் பி⁴க்கு²ம் த⁴ம்மேன வினயேன ஸத்து²ஸாஸனேன அனாத³ரம் அப்படிகாரம் அகதஸஹாயம் தமனுவத்தேய்ய, ஸா பி⁴க்கு²னீ பி⁴க்கு²னீஹி ஏவமஸ்ஸ வசனீயா ‘‘ஏஸோ கோ², அய்யே, பி⁴க்கு² ஸமக்³கே³ன ஸங்கே⁴ன உக்கி²த்தோ, த⁴ம்மேன வினயேன ஸத்து²ஸாஸனேன அனாத³ரோ அப்படிகாரோ அகதஸஹாயோ, மாய்யே, ஏதம் பி⁴க்கு²ம் அனுவத்தீ’’தி, ஏவஞ்ச ஸா பி⁴க்கு²னீ பி⁴க்கு²னீஹி வுச்சமானா ததே²வ பக்³க³ண்ஹேய்ய, ஸா பி⁴க்கு²னீ பி⁴க்கு²னீஹி யாவததியம் ஸமனுபா⁴ஸிதப்³பா³ தஸ்ஸ படினிஸ்ஸக்³கா³ய, யாவததியம் சே ஸமனுபா⁴ஸியமானா தம் படினிஸ்ஸஜ்ஜேய்ய, இச்சேதம் குஸலம், நோ சே படினிஸ்ஸஜ்ஜேய்ய, அயம்பி பாராஜிகா ஹோதி அஸம்வாஸா உக்கி²த்தானுவத்திகா.

அட்ட²வத்து²காஸிக்கா²பத³ம்

8. யா பன பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ ஹத்த²க்³க³ஹணம் வா ஸாதி³யேய்ய, ஸங்கா⁴டிகண்ணக்³க³ஹணம் வா ஸாதி³யேய்ய, ஸந்திட்டே²ய்ய வா, ஸல்லபேய்ய வா, ஸங்கேதம் வா க³ச்சே²ய்ய, புரிஸஸ்ஸ வா அப்³பா⁴க³மனம் ஸாதி³யேய்ய, ச²ன்னம் வா அனுபவிஸேய்ய, காயம் வா தத³த்தா²ய உபஸம்ஹரேய்ய ஏதஸ்ஸ அஸத்³த⁴ம்மஸ்ஸ படிஸேவனத்தா²ய, அயம்பி பாராஜிகா ஹோதி அஸம்வாஸா அட்ட²வத்து²கா.

உத்³தி³ட்டா² கோ², அய்யாயோ, அட்ட² பாராஜிகா த⁴ம்மா. யேஸம் பி⁴க்கு²னீ அஞ்ஞதரம் வா அஞ்ஞதரம் வா ஆபஜ்ஜித்வா ந லப⁴தி பி⁴க்கு²னீஹி ஸத்³தி⁴ம் ஸம்வாஸம் யதா² புரே, ததா² பச்சா², பாராஜிகா ஹோதி அஸம்வாஸா. தத்தா²ய்யாயோ, புச்சா²மி, கச்சித்த² பரிஸுத்³தா⁴, து³தியம்பி புச்சா²மி, கச்சித்த² பரிஸுத்³தா⁴, ததியம்பி புச்சா²மி, கச்சித்த² பரிஸுத்³தா⁴, பரிஸுத்³தே⁴த்தா²ய்யாயோ, தஸ்மா துண்ஹீ, ஏவமேதம் தா⁴ரயாமீதி.

பாராஜிகம் நிட்டி²தம்.

ஸங்கா⁴தி³ஸேஸுத்³தே³ஸோ

இமே கோ² பனாய்யாயோ ஸத்தரஸ ஸங்கா⁴தி³ஸேஸா

த⁴ம்மா உத்³தே³ஸம் ஆக³ச்ச²ந்தி.

உஸ்ஸயவாதி³காஸிக்கா²பத³ம்

1. யா பன பி⁴க்கு²னீ உஸ்ஸயவாதி³கா விஹரேய்ய க³ஹபதினா வா க³ஹபதிபுத்தேன வா தா³ஸேன வா கம்மகாரேன வா அந்தமஸோ ஸமணபரிப்³பா³ஜகேனாபி, அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸம்.

சோரீவுட்டா²பிகாஸிக்கா²பத³ம்

2. யா பன பி⁴க்கு²னீ ஜானம் சோரிம் வஜ்ஜ²ம் விதி³தம் அனபலோகேத்வா ராஜானம் வா ஸங்க⁴ம் வா க³ணம் வா பூக³ம் வா ஸேணிம் வா, அஞ்ஞத்ர கப்பா வுட்டா²பேய்ய, அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸம்.

ஏககா³மந்தரக³மனஸிக்கா²பத³ம்

3. யா பன பி⁴க்கு²னீ ஏகா வா கா³மந்தரம் க³ச்சே²ய்ய, ஏகா வா நதீ³பாரம் க³ச்சே²ய்ய, ஏகா வா ரத்திம் விப்பவஸேய்ய, ஏகா வா க³ணம்ஹா ஓஹியேய்ய, அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸம்.

உக்கி²த்தகஓஸாரணஸிக்கா²பத³ம்

4. யா பன பி⁴க்கு²னீ ஸமக்³கே³ன ஸங்கே⁴ன உக்கி²த்தம் பி⁴க்கு²னிம் த⁴ம்மேன வினயேன ஸத்து²ஸாஸனேன அனபலோகேத்வா காரகஸங்க⁴ம், அனஞ்ஞாய க³ணஸ்ஸ ச²ந்த³ம் ஓஸாரேய்ய, அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸம்.

போ⁴ஜனபடிக்³க³ஹணபட²மஸிக்கா²பத³ம்

5. யா பன பி⁴க்கு²னீ அவஸ்ஸுதா அவஸ்ஸுதஸ்ஸ புரிஸபுக்³க³லஸ்ஸ ஹத்த²தோ கா²த³னீயம் வா, போ⁴ஜனீயம் வா ஸஹத்தா² படிக்³க³ஹேத்வா கா²தே³ய்ய வா பு⁴ஞ்ஜேய்ய வா, அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸம்.

போ⁴ஜனபடிக்³க³ஹணது³தியஸிக்கா²பத³ம்

6. யா பன பி⁴க்கு²னீ ஏவம் வதே³ய்ய ‘‘கிம் தே, அய்யே, ஏஸோ புரிஸபுக்³க³லோ கரிஸ்ஸதி அவஸ்ஸுதோ வா அனவஸ்ஸுதோ வா, யதோ த்வம் அனவஸ்ஸுதா, இங்க⁴, அய்யே, யம் தே ஏஸோ புரிஸபுக்³க³லோ தே³தி கா²த³னீயம் வா போ⁴ஜனீயம் வா, தம் த்வம் ஸஹத்தா² படிக்³க³ஹேத்வா கா²த³ வா பு⁴ஞ்ஜ வா’’தி, அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸம்.

ஸஞ்சரித்தஸிக்கா²பத³ம்

7. யா பன பி⁴க்கு²னீ ஸஞ்சரித்தம் ஸமாபஜ்ஜேய்ய இத்தி²யா வா புரிஸமதிம், புரிஸஸ்ஸ வா இத்தி²மதிம், ஜாயத்தனே வா ஜாரத்தனே வா அந்தமஸோ தங்க²ணிகாயபி, அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸம்.

து³ட்ட²தோ³ஸஸிக்கா²பத³ம்

8. யா பன பி⁴க்கு²னீ பி⁴க்கு²னிம் து³ட்டா² தோ³ஸா அப்பதீதா அமூலகேன பாராஜிகேன த⁴ம்மேன அனுத்³த⁴ம்ஸேய்ய ‘‘அப்பேவ நாம நம் இமம்ஹா ப்³ரஹ்மசரியா சாவேய்ய’’ந்தி, ததோ அபரேன ஸமயேன ஸமனுக்³கா³ஹீயமானா வா அஸ மனுக்³கா³ஹீயமானா வா அமூலகஞ்சேவ தம் அதி⁴கரணம் ஹோதி, பி⁴க்கு²னீ ச தோ³ஸம் பதிட்டா²தி, அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸம்.

அஞ்ஞபா⁴கி³யஸிக்கா²பத³ம்

9. யா பன பி⁴க்கு²னீ பி⁴க்கு²னிம் து³ட்டா² தோ³ஸா அப்பதீதா அஞ்ஞபா⁴கி³யஸ்ஸ அதி⁴கரணஸ்ஸ கிஞ்சிதே³ஸம் லேஸமத்தம் உபாதா³ய பாராஜிகேன த⁴ம்மேன அனுத்³த⁴ம்ஸேய்ய ‘‘அப்பேவ நாம நம் இமம்ஹா ப்³ரஹ்மசரியா சாவேய்ய’’ந்தி, ததோ அபரேன ஸமயேன ஸமனுக்³கா³ஹீயமானா வா அஸமனுக்³கா³ஹீயமானா வா அஞ்ஞபா⁴கி³யஞ்சேவ தம் அதி⁴கரணம் ஹோதி. கோசிதே³ஸோ லேஸமத்தோ உபாதி³ன்னோ, பி⁴க்கு²னீ ச தோ³ஸம் பதிட்டா²தி, அயம்பி பி⁴க்கு²னீ பட²மாபத்திகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸம்.

ஸிக்க²ம்பச்சாசிக்க²ணஸிக்கா²பத³ம்

10. யா பன பி⁴க்கு²னீ குபிதா அனத்தமனா ஏவம் வதே³ய்ய ‘‘பு³த்³த⁴ம் பச்சாசிக்கா²மி த⁴ம்மம் பச்சாசிக்கா²மி, ஸங்க⁴ம் பச்சாசிக்கா²மி, ஸிக்க²ம் பச்சாசிக்கா²மி, கின்னுமாவ ஸமணியோ யா ஸமணியோ ஸக்யதீ⁴தரோ, ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா, தாஸாஹம் ஸந்திகே ப்³ரஹ்மசரியம் சரிஸ்ஸாமீ’’தி. ஸா பி⁴க்கு²னீ பி⁴க்கு²னீஹி ஏவமஸ்ஸ வசனீயா ‘‘மாய்யே குபிதா அனத்தமனா ஏவம் அவச ‘பு³த்³த⁴ம் பச்சாசிக்கா²மி, த⁴ம்மம் பச்சாசிக்கா²மி, ஸங்க⁴ம் பச்சாசிக்கா²மி, ஸிக்க²ம் பச்சாசிக்கா²மி, கின்னுமாவ ஸமணியோ யா ஸமணியோ ஸக்யதீ⁴தரோ, ஸந்தஞ்ஞாபி ஸமணியோ லஜ்ஜினியோ குக்குச்சிகா ஸிக்கா²காமா, தாஸாஹம் ஸந்திகே ப்³ரஹ்மசரியம் சரிஸ்ஸாமீ’தி, அபி⁴ரமாய்யே, ஸ்வாக்கா²தோ த⁴ம்மோ, சர ப்³ரஹ்மசரியம் ஸம்மா து³க்க²ஸ்ஸ அந்தகிரியாயா’’தி, ஏவஞ்ச ஸா பி⁴க்கு²னீ பி⁴க்கு²னீஹி வுச்சமானா ததே²வ பக்³க³ண்ஹேய்ய, ஸா பி⁴க்கு²னீ பி⁴க்கு²னீஹி யாவததியம் ஸமனுபா⁴ஸிதப்³பா³ தஸ்ஸ படினிஸ்ஸக்³கா³ய, யாவததியஞ்சே ஸமனுபா⁴ஸியமானா தம் படினிஸ்ஸஜ்ஜேய்ய, இச்சேதம் குஸலம், நோ சே படினிஸ்ஸஜ்ஜேய்ய, அயம்பி பி⁴க்கு²னீ யாவததியகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸம்.

அதி⁴கரணகுபிதஸிக்கா²பத³ம்

11. யா பன பி⁴க்கு²னீ கிஸ்மிஞ்சிதே³வ அதி⁴கரணே பச்சாகதா குபிதா அனத்தமனா ஏவம் வதே³ய்ய ‘‘ச²ந்த³கா³மினியோ ச பி⁴க்கு²னியோ, தோ³ஸகா³மினியோ ச பி⁴க்கு²னியோ, மோஹகா³மினியோ ச பி⁴க்கு²னியோ, ப⁴யகா³மினியோ ச பி⁴க்கு²னியோ’’தி, ஸா பி⁴க்கு²னீ பி⁴க்கு²னீஹி ஏவமஸ்ஸ வசனீயா ‘‘மாய்யே, கிஸ்மிஞ்சிதே³வ அதி⁴கரணே பச்சாகதா குபிதா அனத்தமனா ஏவம் அவச ‘ச²ந்த³கா³மினியோ ச பி⁴க்கு²னியோ, தோ³ஸகா³மினியோ ச பி⁴க்கு²னியோ, மோஹகா³மினியோ ச பி⁴க்கு²னியோ, ப⁴யகா³மினியோ ச பி⁴க்கு²னியோ’தி, அய்யா கோ² ச²ந்தா³பி க³ச்சே²ய்ய, தோ³ஸாபி க³ச்சே²ய்ய, மோஹாபி க³ச்சே²ய்ய, ப⁴யாபி க³ச்சே²ய்யா’’தி. ஏவஞ்ச ஸா பி⁴க்கு²னீ பி⁴க்கு²னீஹி வுச்சமானா ததே²வ பக்³க³ண்ஹேய்ய, ஸா பி⁴க்கு²னீ பி⁴க்கு²னீஹி யாவததியம் ஸமனுபா⁴ஸிதப்³பா³ தஸ்ஸ படினிஸ்ஸக்³கா³ய, யாவததியஞ்சே ஸமனுபா⁴ஸியமானா தம் படினிஸ்ஸஜ்ஜேய்ய, இச்சேதம் குஸலம், நோ சே படினிஸ்ஸஜ்ஜேய்ய, அயம்பி பி⁴க்கு²னீ யாவததியகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸம்.

பாபஸமாசாரபட²மஸிக்கா²பத³ம்

12. பி⁴க்கு²னியோ பனேவ ஸம்ஸட்டா² விஹரந்தி பாபாசாரா பாபஸத்³தா³ பாபஸிலோகா பி⁴க்கு²னிஸங்க⁴ஸ்ஸ விஹேஸிகா அஞ்ஞமஞ்ஞிஸ்ஸா வஜ்ஜப்படிச்சா²தி³கா, தா பி⁴க்கு²னியோ பி⁴க்கு²னீஹி ஏவமஸ்ஸு வசனீயா ‘‘ப⁴கி³னியோ கோ² ஸம்ஸட்டா² விஹரந்தி பாபாசாரா பாபஸத்³தா³ பாபஸிலோகா பி⁴க்கு²னிஸங்க⁴ஸ்ஸ விஹேஸிகா அஞ்ஞமஞ்ஞிஸ்ஸா வஜ்ஜப்படிச்சா²தி³கா, விவிச்சதா²ய்யே, விவேகஞ்ஞேவ ப⁴கி³னீனம் ஸங்கோ⁴ வண்ணேதீ’’தி, ஏவஞ்ச தா பி⁴க்கு²னியோ பி⁴க்கு²னீஹி வுச்சமானா ததே²வ பக்³க³ண்ஹேய்யும், தா பி⁴க்கு²னியோ பி⁴க்கு²னீஹி யாவததியம் ஸமனுபா⁴ஸிதப்³பா³ தஸ்ஸ படினிஸ்ஸக்³கா³ய, யாவததியஞ்சே ஸமனுபா⁴ஸியமானா தம் படினிஸ்ஸஜ்ஜேய்யும், இச்சேதம் குஸலம், நோ சே படினிஸ்ஸஜ்ஜேய்யும், இமாபி பி⁴க்கு²னியோ யாவததியகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸம்.

பாபஸமாசாரது³தியஸிக்கா²பத³ம்

13. யா பன பி⁴க்கு²னீ ஏவம் வதே³ய்ய ‘‘ஸம்ஸட்டா²வ, அய்யே, தும்ஹே விஹரத², மா தும்ஹே நானா விஹரித்த², ஸந்தி ஸங்கே⁴ அஞ்ஞாபி பி⁴க்கு²னியோ ஏவாசாரா ஏவம்ஸத்³தா³ ஏவம்ஸிலோகா பி⁴க்கு²னிஸங்க⁴ஸ்ஸ விஹேஸிகா அஞ்ஞமஞ்ஞிஸ்ஸா வஜ்ஜப்படிச்சா²தி³கா, தா ஸங்கோ⁴ ந கிஞ்சி ஆஹ தும்ஹஞ்ஞேவ ஸங்கோ⁴ உஞ்ஞாய பரிப⁴வேன அக்க²ந்தியா வேப⁴ஸ்ஸியா து³ப்³ப³ல்யா ஏவமாஹ – ‘ப⁴கி³னியோ கோ² ஸம்ஸட்டா² விஹரந்தி பாபாசாரா பாபஸத்³தா³ பாபஸிலோகா பி⁴க்கு²னிஸங்க⁴ஸ்ஸ விஹேஸிகா அஞ்ஞமஞ்ஞிஸ்ஸா வஜ்ஜப்படிச்சா²தி³கா, விவிச்சதா²ய்யே, விவேகஞ்ஞேவ ப⁴கி³னீனம் ஸங்கோ⁴ வண்ணேதீ’’’தி, ஸா பி⁴க்கு²னீ பி⁴க்கு²னீஹி ஏவமஸ்ஸ வசனீயா ‘‘மாய்யே, ஏவம் அவச, ஸம்ஸட்டா²வ அய்யே தும்ஹே விஹரத², மா தும்ஹே நானா விஹரித்த², ஸந்தி ஸங்கே⁴ அஞ்ஞாபி பி⁴க்கு²னியோ ஏவாசாரா ஏவம்ஸத்³தா³ ஏவம்ஸிலோகா பி⁴க்கு²னிஸங்க⁴ஸ்ஸ விஹேஸிகா அஞ்ஞமஞ்ஞிஸ்ஸா வஜ்ஜப்படிச்சா²தி³கா, தா ஸங்கோ⁴ ந கிஞ்சி ஆஹ, தும்ஹஞ்ஞேவ ஸங்கோ⁴ உஞ்ஞாய பரிப⁴வேன அக்க²ந்தியா வேப⁴ஸ்ஸியா து³ப்³ப³ல்யா ஏவமாஹ – ‘ப⁴கி³னியோ கோ² ஸம்ஸட்டா² விஹரந்தி பாபாசாரா பாபஸத்³தா³ பாபஸிலோகா பி⁴க்கு²னிஸங்க⁴ஸ்ஸ விஹேஸிகா அஞ்ஞமஞ்ஞிஸ்ஸா வஜ்ஜப்படிச்சா²தி³கா, விவிச்சதா²ய்யே, விவேகஞ்ஞேவ ப⁴கி³னீனம் ஸங்கோ⁴ வண்ணேதீ’’’தி, ஏவஞ்ச ஸா பி⁴க்கு²னீ பி⁴க்கு²னீஹி வுச்சமானா ததே²வ பக்³க³ண்ஹேய்ய, ஸா பி⁴க்கு²னீ பி⁴க்கு²னீஹி யாவததியம் ஸமனுபா⁴ஸிதப்³பா³ தஸ்ஸ படினிஸ்ஸக்³கா³ய, யாவததியஞ்சே ஸமனுபா⁴ஸியமானா தம் படினிஸ்ஸஜ்ஜேய்ய, இச்சேதம் குஸலம், நோ சே படினிஸ்ஸஜ்ஜேய்ய, அயம்பி பி⁴க்கு²னீ யாவததியகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸம்.

ஸங்க⁴பே⁴த³கஸிக்கா²பத³ம்

14. யா பன பி⁴க்கு²னீ ஸமக்³க³ஸ்ஸ ஸங்க⁴ஸ்ஸ பே⁴தா³ய பரக்கமேய்ய, பே⁴த³னஸம்வத்தனிகம் வா அதி⁴கரணம் ஸமாதா³ய பக்³க³ய்ஹ திட்டே²ய்ய, ஸா பி⁴க்கு²னீ பி⁴க்கு²னீஹி ஏவமஸ்ஸ வசனீயா ‘‘மாய்யா, ஸமக்³க³ஸ்ஸ ஸங்க⁴ஸ்ஸ பே⁴தா³ய பரக்கமி, பே⁴த³னஸம்வத்தனிகம் வா அதி⁴கரணம் ஸமாதா³ய பக்³க³ய்ஹ அட்டா²ஸி, ஸமேதாய்யா, ஸங்கே⁴ன, ஸமக்³கோ³ ஹி ஸங்கோ⁴ ஸம்மோத³மானோ அவிவத³மானோ ஏகுத்³தே³ஸோ பா²ஸு விஹரதீ’’தி. ஏவஞ்ச ஸா பி⁴க்கு²னீ பி⁴க்கு²னீஹி வுச்சமானா ததே²வ பக்³க³ண்ஹேய்ய, ஸா பி⁴க்கு²னீ பி⁴க்கு²னீஹி யாவததியம் ஸமனுபா⁴ஸிதப்³பா³ தஸ்ஸ படினிஸ்ஸக்³கா³ய, யாவததியஞ்சே ஸமனுபா⁴ஸியமானா தம் படினிஸ்ஸஜ்ஜேய்ய, இச்சேதம் குஸலம். நோ சே படினிஸ்ஸஜ்ஜேய்ய, அயம்பி பி⁴க்கு²னீ யாவததியகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸம்.

பே⁴தா³னுவத்தகஸிக்கா²பத³ம்

15. தஸ்ஸாயேவ கோ² பன பி⁴க்கு²னியா பி⁴க்கு²னியோ ஹோந்தி அனுவத்திகா வக்³க³வாதி³கா ஏகா வா த்³வே வா திஸ்ஸோ வா, தா ஏவம் வதே³ய்யும் ‘‘மாய்யாயோ, ஏதம் பி⁴க்கு²னிம் கிஞ்சி அவசுத்த² த⁴ம்மவாதி³னீ சேஸா பி⁴க்கு²னீ, வினயவாதி³னீ சேஸா பி⁴க்கு²னீ, அம்ஹாகஞ்சேஸா பி⁴க்கு²னீ ச²ந்த³ஞ்ச ருசிஞ்ச ஆதா³ய வோஹரதி, ஜானாதி, நோ பா⁴ஸதி, அம்ஹாகம்பேதம் க²மதீ’’தி, தா பி⁴க்கு²னியோ பி⁴க்கு²னீஹி ஏவமஸ்ஸு வசனீயா ‘‘மாய்யாயோ, ஏவம் அவசுத்த², ந சேஸா பி⁴க்கு²னீ த⁴ம்மவாதி³னீ, ந சேஸா பி⁴க்கு²னீ வினயவாதி³னீ, மாய்யானம்பி ஸங்க⁴பே⁴தோ³ ருச்சித்த², ஸமேதாய்யானம் ஸங்கே⁴ன, ஸமக்³கோ³ ஹி ஸங்கோ⁴ ஸம்மோத³மானோ அவிவத³மானோ ஏகுத்³தே³ஸோ பா²ஸு விஹரதீ’’தி, ஏவஞ்ச தா பி⁴க்கு²னியோ பி⁴க்கு²னீஹி வுச்சமானா ததே²வ பக்³க³ண்ஹேய்யும், தா பி⁴க்கு²னியோ பி⁴க்கு²னீஹி யாவததியம் ஸமனுபா⁴ஸிதப்³பா³ தஸ்ஸ படினிஸ்ஸக்³கா³ய, யாவததியஞ்சே ஸமனுபா⁴ஸியமானா தம் படினிஸ்ஸஜ்ஜேய்யும். இச்சேதம் குஸலம். நோ சே படினிஸ்ஸஜ்ஜேய்யும், இமாபி பி⁴க்கு²னியோ யாவததியகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸம்.

து³ப்³ப³சஸிக்கா²பத³ம்

16. பி⁴க்கு²னீ பனேவ து³ப்³ப³சஜாதிகா ஹோதி உத்³தே³ஸபரியாபன்னேஸு ஸிக்கா²பதே³ஸு பி⁴க்கு²னீஹி ஸஹத⁴ம்மிகம் வுச்சமானா அத்தானம் அவசனீயம் கரோதி ‘‘மா மம் அய்யாயோ கிஞ்சி அவசுத்த² கல்யாணம் வா பாபகம் வா, அஹம்பாய்யாயோ, ந கிஞ்சி வக்கா²மி கல்யாணம் வா பாபகம் வா, விரமதா²ய்யாயோ, மம வசனாயா’’தி, ஸா பி⁴க்கு²னீ பி⁴க்கு²னீஹி ஏவமஸ்ஸ வசனீயா ‘‘மாய்யா, அத்தானம் அவசனீயம் அகாஸி, வசனீயமேவ, அய்யா, அத்தானம் கரோது, அய்யாபி பி⁴க்கு²னியோ வத³து ஸஹத⁴ம்மேன, பி⁴க்கு²னியோபி அய்யம் வக்க²ந்தி ஸஹத⁴ம்மேன, ஏவம் ஸம்வத்³தா⁴ ஹி தஸ்ஸ ப⁴க³வதோ பரிஸா யதி³த³ம் அஞ்ஞமஞ்ஞவசனேன அஞ்ஞமஞ்ஞவுட்டா²பனேனா’’தி. ஏவஞ்ச ஸா பி⁴க்கு²னீ பி⁴க்கு²னீஹி வுச்சமானா ததே²வ பக்³க³ண்ஹேய்ய, ஸா பி⁴க்கு²னீ பி⁴க்கு²னீஹி யாவததியம் ஸமனுபா⁴ஸிதப்³பா³ தஸ்ஸ படினிஸ்ஸக்³கா³ய, யாவததியஞ்சே ஸமனுபா⁴ஸியமானா தம் படினிஸ்ஸஜ்ஜேய்ய, இச்சேதம் குஸலம். நோ சே படினிஸ்ஸஜ்ஜேய்ய, அயம்பி பி⁴க்கு²னீ யாவததியகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸம்.

குலதூ³ஸகஸிக்கா²பத³ம்

17. பி⁴க்கு²னீ பனேவ அஞ்ஞதரம் கா³மம் வா நிக³மம் வா உபனிஸ்ஸாய விஹரதி குலதூ³ஸிகா பாபஸமாசாரா, தஸ்ஸா கோ² பாபகா ஸமாசாரா தி³ஸ்ஸந்தி சேவ ஸுய்யந்தி ச, குலானி ச தாய து³ட்டா²னி தி³ஸ்ஸந்தி சேவ ஸுய்யந்தி ச, ஸா பி⁴க்கு²னீ பி⁴க்கு²னீஹி ஏவமஸ்ஸ வசனீயா ‘‘அய்யா, கோ² குலதூ³ஸிகா பாபஸமாசாரா, அய்யாய கோ² பாபகா ஸமாசாரா தி³ஸ்ஸந்தி சேவ ஸுய்யந்தி ச, குலானி சாய்யாய, து³ட்டா²னி தி³ஸ்ஸந்தி சேவ ஸுய்யந்தி ச, பக்கமதாய்யா இமம்ஹா ஆவாஸா, அலம் தே இத⁴ வாஸேனா’’தி. ஏவஞ்ச ஸா பி⁴க்கு²னீ பி⁴க்கு²னீஹி வுச்சமானா தா பி⁴க்கு²னியோ ஏவம் வதே³ய்ய ‘‘ச²ந்த³கா³மினியோ ச பி⁴க்கு²னியோ, தோ³ஸகா³மினியோ ச பி⁴க்கு²னியோ, மோஹகா³மினியோ ச பி⁴க்கு²னியோ, ப⁴யகா³மினியோ ச பி⁴க்கு²னியோ, தாதி³ஸிகாய ஆபத்தியா ஏகச்சம் பப்³பா³ஜேந்தி ஏகச்சம் ந பப்³பா³ஜேந்தீ’’தி, ஸா பி⁴க்கு²னீ பி⁴க்கு²னீஹி ஏவமஸ்ஸ வசனீயா ‘‘மாய்யா, ஏவம் அவச, ந ச பி⁴க்கு²னியோ ச²ந்த³கா³மினியோ, ந ச பி⁴க்கு²னியோ தோ³ஸகா³மினியோ, ந ச பி⁴க்கு²னியோ மோஹகா³மினியோ, ந ச பி⁴க்கு²னியோ ப⁴யகா³மினியோ, அய்யா கோ² குலதூ³ஸிகா பாபஸமாசாரா, அய்யாய கோ² பாபகா ஸமாசாரா தி³ஸ்ஸந்தி சேவ ஸுய்யந்தி ச, குலானி சாய்யாய து³ட்டா²னி தி³ஸ்ஸந்தி சேவ ஸுய்யந்தி ச, பக்கமதாய்யா, இமம்ஹா ஆவாஸா அலம் தே இத⁴ வாஸேனா’’தி. ஏவஞ்ச ஸா பி⁴க்கு²னீ பி⁴க்கு²னீஹி வுச்சமானா ததே²வ பக்³க³ண்ஹேய்ய, ஸா பி⁴க்கு²னீ பி⁴க்கு²னீஹி யாவததியம் ஸமனுபா⁴ஸிதப்³பா³ தஸ்ஸ படினிஸ்ஸக்³கா³ய, யாவததியஞ்சே ஸமனுபா⁴ஸியமானா தம் படினிஸ்ஸஜ்ஜேய்ய, இச்சேதம் குஸலம். நோ சே படினிஸ்ஸஜ்ஜேய்ய, அயம்பி பி⁴க்கு²னீ யாவததியகம் த⁴ம்மம் ஆபன்னா நிஸ்ஸாரணீயம் ஸங்கா⁴தி³ஸேஸம்.

உத்³தி³ட்டா² கோ² அய்யாயோ ஸத்தரஸ ஸங்கா⁴தி³ஸேஸா த⁴ம்மா நவ பட²மாபத்திகா, அட்ட² யாவததியகா,

யேஸம் பி⁴க்கு²னீ அஞ்ஞதரம் வா அஞ்ஞதரம் வா ஆபஜ்ஜதி, தாய பி⁴க்கு²னியா உப⁴தோஸங்கே⁴ பக்க²மானத்தம் சரிதப்³ப³ம். சிண்ணமானத்தா பி⁴க்கு²னீ யத்த² ஸியா வீஸதிக³ணோ பி⁴க்கு²னிஸங்கோ⁴, தத்த² ஸா பி⁴க்கு²னீ அப்³பே⁴தப்³பா³. ஏகாயபி சே ஊனோ வீஸதிக³ணோ பி⁴க்கு²னிஸங்கோ⁴ தம் பி⁴க்கு²னிம் அப்³பே⁴ய்ய, ஸா ச பி⁴க்கு²னீ அனப்³பி⁴தா, தா ச பி⁴க்கு²னியோ கா³ரய்ஹா, அயம் தத்த² ஸாமீசி. தத்தா²ய்யாயோ புச்சா²மி, கச்சித்த² பரிஸுத்³தா⁴, து³தியம்பி, புச்சா²மி, கச்சித்த² பரிஸுத்³தா⁴, ததியம்பி புச்சா²மி, கச்சித்த² பரிஸுத்³தா⁴, பரிஸுத்³தே⁴த்தா²ய்யாயோ, தஸ்மா துண்ஹீ, ஏவமேதம் தா⁴ரயாமீதி.

ஸங்கா⁴தி³ஸேஸோ நிட்டி²தோ.

நிஸ்ஸக்³கி³ய பாசித்தியா

இமே கோ² பனாய்யாயோ திம்ஸ நிஸ்ஸக்³கி³யா பாசித்தியா

த⁴ம்மா உத்³தே³ஸம் ஆக³ச்ச²ந்தி.

பத்தஸன்னிசயஸிக்கா²பத³ம்

1. யா பன பி⁴க்கு²னீ பத்தஸன்னிசயம் கரேய்ய, நிஸ்ஸக்³கி³யம் பாசித்தியம்.

அகாலசீவரபா⁴ஜனஸிக்கா²பத³ம்

2. யா பன பி⁴க்கு²னீ அகாலசீவரம் ‘‘காலசீவர’’ந்தி அதி⁴ட்ட²ஹித்வா பா⁴ஜாபேய்ய, நிஸ்ஸக்³கி³யம் பாசித்தியம்.

சீவரபரிவத்தனஸிக்கா²பத³ம்

3. யா பன பி⁴க்கு²னீ பி⁴க்கு²னியா ஸத்³தி⁴ம் சீவரம் பரிவத்தேத்வா ஸா பச்சா² ஏவம் வதே³ய்ய ‘‘ஹந்தா³ய்யே, துய்ஹம் சீவரம், ஆஹர மேதம் சீவரம், யம் துய்ஹம் துய்ஹமேவேதம், யம் மய்ஹம் மய்ஹமேவேதம், ஆஹர மேதம் சீவரம், ஸகம் பச்சாஹரா’’தி அச்சி²ந்தே³ய்ய வா அச்சி²ந்தா³பேய்ய வா, நிஸ்ஸக்³கி³யம் பாசித்தியம்.

அஞ்ஞவிஞ்ஞாபனஸிக்கா²பத³ம்

4. யா பன பி⁴க்கு²னீ அஞ்ஞம் விஞ்ஞாபேத்வா அஞ்ஞம் விஞ்ஞாபேய்ய, நிஸ்ஸக்³கி³யம் பாசித்தியம்.

அஞ்ஞசேதாபன ஸிக்கா²பத³ம்

5. யா பன பி⁴க்கு²னீ அஞ்ஞம் சேதாபேத்வா அஞ்ஞம் சேதாபேய்ய, நிஸ்ஸக்³கி³யம் பாசித்தியம்.

பட²மஸங்கி⁴கசேதாபனஸிக்கா²பத³ம்

6. யா பன பி⁴க்கு²னீ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன ஸங்கி⁴கேன அஞ்ஞம் சேதாபேய்ய, நிஸ்ஸக்³கி³யம் பாசித்தியம்.

து³தியஸங்கி⁴கசேதாபனஸிக்கா²பத³ம்

7. யா பன பி⁴க்கு²னீ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன ஸங்கி⁴கேன ஸஞ்ஞாசிகேன அஞ்ஞம் சேதாபேய்ய, நிஸ்ஸக்³கி³யம் பாசித்தியம்.

பட²மக³ணிகசேதாபனஸிக்கா²பத³ம்

8. யா பன பி⁴க்கு²னீ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன மஹாஜனிகேன அஞ்ஞம் சேதாபேய்ய, நிஸ்ஸக்³கி³யம் பாசித்தியம்.

து³தியக³ணிகசேதாபனஸிக்கா²பத³ம்

9. யா பன பி⁴க்கு²னீ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன மஹாஜனிகேன ஸஞ்ஞாசிகேன அஞ்ஞம் சேதாபேய்ய, நிஸ்ஸக்³கி³யம் பாசித்தியம்.

புக்³க³லிகசேதாபனஸிக்கா²பத³ம்

10. யா பன பி⁴க்கு²னீ அஞ்ஞத³த்தி²கேன பரிக்கா²ரேன அஞ்ஞுத்³தி³ஸிகேன புக்³க³லிகேன ஸஞ்ஞாசிகேன அஞ்ஞம் சேதாபேய்ய, நிஸ்ஸக்³கி³யம் பாசித்தியம்.

பத்தவக்³கோ³ பட²மோ.

க³ருபாவுரணஸிக்கா²பத³ம்

11. க³ருபாவுரணம் பன பி⁴க்கு²னியா சேதாபேந்தியா சதுக்கம்ஸபரமம் சேதாபேதப்³ப³ம். ததோ சே உத்தரி சேதாபேய்ய, நிஸ்ஸக்³கி³யம் பாசித்தியம்.

லஹுபாவுரணஸிக்கா²பத³ம்

12. லஹுபாவுரணம் பன பி⁴க்கு²னியா சேதாபேந்தியா அட்³ட⁴தேய்யகம்ஸபரமம் சேதாபேதப்³ப³ம். ததோ சே உத்தரி சேதாபேய்ய, நிஸ்ஸக்³கி³யம் பாசித்தியம்.

கதி²னஸிக்கா²பத³ம்

13. நிட்டி²தசீவரஸ்மிம் பி⁴க்கு²னியா உப்³ப⁴தஸ்மிம் கதி²னே த³ஸாஹபரமம் அதிரேகசீவரம் தா⁴ரேதப்³ப³ம். தம் அதிக்காமேந்தியா, நிஸ்ஸக்³கி³யம் பாசித்தியம்.

உதோ³ஸிதஸிக்கா²பத³ம்

14. நிட்டி²தசீவரஸ்மிம் பி⁴க்கு²னியா உப்³ப⁴தஸ்மிம் கதி²னே ஏகரத்தம்பி சே பி⁴க்கு²னீ திசீவரேன விப்பவஸேய்ய, அஞ்ஞத்ர பி⁴க்கு²னிஸம்முதியா நிஸ்ஸக்³கி³யம் பாசித்தியம்.

அகாலசீவரஸிக்கா²பத³ம்

15. நிட்டி²தசீவரஸ்மிம் பி⁴க்கு²னியா உப்³ப⁴தஸ்மிம் கதி²னே பி⁴க்கு²னியா பனேவ அகாலசீவரம் உப்பஜ்ஜேய்ய, ஆகங்க²மானாய பி⁴க்கு²னியா படிக்³க³ஹேதப்³ப³ம், படிக்³க³ஹேத்வா கி²ப்பமேவ காரேதப்³ப³ம், நோ சஸ்ஸ பாரிபூரி, மாஸபரமம் தாய பி⁴க்கு²னியா தம் சீவரம் நிக்கி²பிதப்³ப³ம் ஊனஸ்ஸ பாரிபூரியா ஸதியா பச்சாஸாய. ததோ சே உத்தரி நிக்கி²பேய்ய ஸதியாபி பச்சாஸாய, நிஸ்ஸக்³கி³யம் பாசித்தியம்.

அஞ்ஞாதகவிஞ்ஞத்திஸிக்கா²பத³ம்

16. யா பன பி⁴க்கு²னீ அஞ்ஞாதகம் க³ஹபதிம் வா க³ஹபதானிம் வா சீவரம் விஞ்ஞாபேய்ய அஞ்ஞத்ர ஸமயா, நிஸ்ஸக்³கி³யம் பாசித்தியம். தத்தா²யம் ஸமயோ அச்சி²ன்னசீவரா வா ஹோதி பி⁴க்கு²னீ, நட்ட²சீவரா வா, அயம் தத்த² ஸமயோ.

ததுத்தரிஸிக்கா²பத³ம்

17. தஞ்சே அஞ்ஞாதகோ க³ஹபதி வா க³ஹபதானீ வா ப³ஹூஹி சீவரேஹி அபி⁴ஹட்டு²ம் பவாரேய்ய, ஸந்தருத்தரபரமம் தாய பி⁴க்கு²னியா ததோ சீவரம் ஸாதி³தப்³ப³ம். ததோ சே உத்தரி ஸாதி³யேய்ய, நிஸ்ஸக்³கி³யம் பாசித்தியம்.

பட²மஉபக்க²டஸிக்கா²பத³ம்

18. பி⁴க்கு²னிம் பனேவ உத்³தி³ஸ்ஸ அஞ்ஞாதகஸ்ஸ க³ஹபதிஸ்ஸ வா க³ஹபதானியா வா சீவரசேதாபன்னம் உபக்க²டம் ஹோதி ‘‘இமினா சீவரசேதாபன்னேன சீவரம் சேதாபேத்வா இத்த²ன்னாமம் பி⁴க்கு²னிம் சீவரேன அச்சா²தே³ஸ்ஸாமீ’’தி. தத்ர சேஸா பி⁴க்கு²னீ புப்³பே³ அப்பவாரிதா உபஸங்கமித்வா சீவரே விகப்பம் ஆபஜ்ஜேய்ய ‘‘ஸாது⁴ வத, மம் ஆயஸ்மா இமினா சீவரசேதாபன்னேன ஏவரூபம் வா ஏவரூபம் வா சீவரம் சேதாபேத்வா அச்சா²தே³ஹீ’’தி கல்யாணகம்யதம் உபாதா³ய, நிஸ்ஸக்³கி³யம் பாசித்தியம்.

து³தியஉபக்க²டஸிக்கா²பத³ம்

19. பி⁴க்கு²னிம் பனேவ உத்³தி³ஸ்ஸ உபி⁴ன்னம் அஞ்ஞாதகானம் க³ஹபதீனம் வா க³ஹபதானீனம் வா பச்சேகசீவரசேதாபன்னானி உபக்க²டானி ஹோந்தி ‘‘இமேஹி மயம் பச்சேகசீவரசேதாபன்னேஹி பச்சேகசீவரானி சேதாபேத்வா இத்த²ன்னாமம் பி⁴க்கு²னிம் சீவரேஹி அச்சா²தே³ஸ்ஸாமா’’தி. தத்ர சேஸா பி⁴க்கூ²னீ புப்³பே³ அப்பவாரிதா உபஸங்கமித்வா சீவரே விகப்பம் ஆபஜ்ஜேய்ய ‘‘ஸாது⁴ வத மம் ஆயஸ்மந்தோ இமேஹி பச்சேகசீவரசேதாபன்னேஹி ஏவரூபம் வா ஏவரூபம் வா சீவரம் சேதாபேத்வா அச்சா²தே³த² உபோ⁴வ ஸந்தா ஏகேனா’’தி கல்யாணகம்யதம் உபாதா³ய, நிஸ்ஸக்³கி³யம் பாசித்தியம்.

ராஜஸிக்கா²பத³ம்

20. பி⁴க்கு²னிம் பனேவ உத்³தி³ஸ்ஸ ராஜா வா ராஜபோ⁴க்³கோ³ வா ப்³ராஹ்மணோ வா க³ஹபதிகோ வா தூ³தேன சீவரசேதாபன்னம் பஹிணேய்ய ‘‘இமினா சீவரசேதாபன்னேன சீவரம் சேதாபேத்வா இத்த²ன்னாமம் பி⁴க்கு²னிம் சீவரேன அச்சா²தே³ஹீ’’தி. ஸோ சே தூ³தோ தம் பி⁴க்கு²னிம் உபஸங்கமித்வா ஏவம் வதே³ய்ய ‘‘இத³ம் கோ², அய்யே, அய்யம் உத்³தி³ஸ்ஸ சீவரசேதாபன்னம் ஆப⁴தம், படிக்³க³ண்ஹாதாய்யா சீவரசேதாபன்ன’’ந்தி. தாய பி⁴க்கு²னியா ஸோ தூ³தோ ஏவமஸ்ஸ வசனீயோ ‘‘ந கோ² மயம், ஆவுஸோ, சீவரசேதாபன்னம் படிக்³க³ண்ஹாம, சீவரஞ்ச கோ² மயம் படிக்³க³ண்ஹாம காலேன கப்பிய’’ந்தி. ஸோ சே தூ³தோ தம் பி⁴க்கு²னிம் ஏவம் வதே³ய்ய ‘‘அத்தி² பனாய்யாய, கோசி வேய்யாவச்சகரோ’’தி, சீவரத்தி²காய, பி⁴க்க²வே, பி⁴க்கு²னியா வேய்யாவச்சகரோ நித்³தி³ஸிதப்³போ³ ஆராமிகோ வா உபாஸகோ வா ‘‘ஏஸோ கோ², ஆவுஸோ, பி⁴க்கு²னீனம் வேய்யாவச்சகரோ’’தி. ஸோ சே தூ³தோ தம் வேய்யாவச்சகரம் ஸஞ்ஞாபேத்வா தம் பி⁴க்கு²னிம் உபஸங்கமித்வா ஏவம் வதே³ய்ய ‘‘யம் கோ², அய்யே, அய்யா வேய்யாவச்சகரம் நித்³தி³ஸி, ஸஞ்ஞத்தோ ஸோ மயா, உபஸங்கமதாய்யா காலேன, சீவரேன தம் அச்சா²தே³ஸ்ஸதீ’’தி. சீவரத்தி²காய, பி⁴க்க²வே, பி⁴க்கு²னியா வேய்யாவச்சகரோ உபஸங்கமித்வா த்³வத்திக்க²த்தும் சோதே³தப்³போ³ ஸாரேதப்³போ³ ‘‘அத்தோ² மே, ஆவுஸோ, சீவரேனா’’தி, த்³வத்திக்க²த்தும் சோத³யமானா ஸாரயமானா தம் சீவரம் அபி⁴னிப்பா²தே³ய்ய, இச்சேதம் குஸலம், நோ சே அபி⁴னிப்பா²தே³ய்ய, சதுக்க²த்தும் பஞ்சக்க²த்தும் ச²க்க²த்துபரமம் துண்ஹீபூ⁴தாய உத்³தி³ஸ்ஸ டா²தப்³ப³ம், சதுக்க²த்தும் பஞ்சக்க²த்தும் ச²க்க²த்துபரமம் துண்ஹீபூ⁴தா உத்³தி³ஸ்ஸ திட்ட²மானா தம் சீவரம் அபி⁴னிப்பா²தே³ய்ய, இச்சேதம் குஸலம். ததோ சே உத்தரி வாயமமானா தம் சீவரம் அபி⁴னிப்பா²தே³ய்ய, நிஸ்ஸக்³கி³யம் பாசித்தியம். நோ சே அபி⁴னிப்பா²தே³ய்ய, யதஸ்ஸா சீவரசேதாபன்னம் ஆப⁴தம், தத்த² ஸாமம் வா க³ந்தப்³ப³ம், தூ³தோ வா பாஹேதப்³போ³ ‘‘யம் கோ² தும்ஹே ஆயஸ்மந்தோ பி⁴க்கு²னிம் உத்³தி³ஸ்ஸ சீவரசேதாபன்னம் பஹிணித்த², ந தம் தஸ்ஸா பி⁴க்கு²னியா கிஞ்சி அத்த²ம் அனுபோ⁴தி, யுஞ்ஜந்தாயஸ்மந்தோ ஸகம், மா வோ ஸகம் வினஸ்ஸா’’தி, அயம் தத்த² ஸாமீசி.

சீவரவக்³கோ³ து³தியோ.

ரூபியஸிக்கா²பத³ம்

21. யா பன பி⁴க்கு²னீ ஜாதரூபரஜதம் உக்³க³ண்ஹேய்ய வா உக்³க³ண்ஹாபேய்ய வா உபனிக்கி²த்தம் வா ஸாதி³யேய்ய, நிஸ்ஸக்³கி³யம் பாசித்தியம்.

ரூபியஸம்வோஹாரஸிக்கா²பத³ம்

22. யா பன பி⁴க்கு²னீ நானப்பகாரகம் ரூபியஸம்வோஹாரம் ஸமாபஜ்ஜேய்ய, நிஸ்ஸக்³கி³யம் பாசித்தியம்.

கயவிக்கயஸிக்கா²பத³ம்

23. யா பன பி⁴க்கு²னீ நானப்பகாரகம் கயவிக்கயம் ஸமாபஜ்ஜேய்ய, நிஸ்ஸக்³கி³யம் பாசித்தியம்.

ஊனபஞ்சப³ந்த⁴னஸிக்கா²பத³ம்

24. யா பன பி⁴க்கு²னீ ஊனபஞ்சப³ந்த⁴னேன பத்தேன அஞ்ஞம் நவம் பத்தம் சேதாபேய்ய, நிஸ்ஸக்³கி³யம் பாசித்தியம். தாய பி⁴க்கு²னியா ஸோ பத்தோ பி⁴க்கு²னிபரிஸாய நிஸ்ஸஜ்ஜிதப்³போ³, யோ ச தஸ்ஸா பி⁴க்கு²னிபரிஸாய பத்தபரியந்தோ, ஸோ தஸ்ஸா பி⁴க்கு²னியா பதா³தப்³போ³ ‘‘அயம் தே பி⁴க்கு²னி பத்தோ யாவபே⁴த³னாய தா⁴ரேதப்³போ³’’தி, அயம் தத்த² ஸாமீசி.

பே⁴ஸஜ்ஜஸிக்கா²பத³ம்

25. யானி கோ² பன தானி கி³லானானம் பி⁴க்கு²னீனம் படிஸாயனீயானி பே⁴ஸஜ்ஜானி, ஸேய்யதி²த³ம் – ஸப்பி நவனீதம் தேலம் மது⁴ பா²ணிதம், தானி படிக்³க³ஹேத்வா ஸத்தாஹபரமம் ஸன்னிதி⁴காரகம் பரிபு⁴ஞ்ஜிதப்³பா³னி. தம் அதிக்காமேந்தியா, நிஸ்ஸக்³கி³யம் பாசித்தியம்.

சீவரஅச்சி²ந்த³னஸிக்கா²பத³ம்

26. யா பன பி⁴க்கு²னீ பி⁴க்கு²னியா ஸாமம் சீவரம் த³த்வா குபிதா அனத்தமனா அச்சி²ந்தே³ய்ய வா அச்சி²ந்தா³பேய்ய வா, நிஸ்ஸக்³கி³யம் பாசித்தியம்.

ஸுத்தவிஞ்ஞத்திஸிக்கா²பத³ம்

27. யா பன பி⁴க்கு²னீ ஸாமம் ஸுத்தம் விஞ்ஞாபேத்வா தந்தவாயேஹி சீவரம் வாயாபேய்ய, நிஸ்ஸக்³கி³யம் பாசித்தியம்.

மஹாபேஸகாரஸிக்கா²பத³ம்

28. பி⁴க்கு²னிம் பனேவ உத்³தி³ஸ்ஸ அஞ்ஞாதகோ க³ஹபதி வா க³ஹபதானீ வா தந்தவாயேஹி சீவரம் வாயாபேய்ய, தத்ர சேஸா பி⁴க்கு²னீ புப்³பே³ அப்பவாரிதா தந்தவாயே உபஸங்கமித்வா சீவரே விகப்பம் ஆபஜ்ஜேய்ய ‘‘இத³ம் கோ² ஆவுஸோ சீவரம் மம் உத்³தி³ஸ்ஸ விய்யதி, ஆயதஞ்ச கரோத², வித்த²தஞ்ச அப்பிதஞ்ச ஸுவீதஞ்ச ஸுப்பவாயிதஞ்ச ஸுவிலேகி²தஞ்ச ஸுவிதச்சி²தஞ்ச கரோத², அப்பேவ நாம மயம்பி ஆயஸ்மந்தானம் கிஞ்சிமத்தம் அனுபத³ஜ்ஜேய்யாமா’’தி, ஏவஞ்ச ஸா பி⁴க்கு²னீ வத்வா கிஞ்சிமத்தம் அனுபத³ஜ்ஜேய்ய அந்தமஸோ பிண்ட³பாதமத்தம்பி, நிஸ்ஸக்³கி³யம் பாசித்தியம்.

அச்சேகசீவரஸிக்கா²பத³ம்

29. த³ஸாஹானாக³தம் கத்திகதேமாஸிகபுண்ணமம் பி⁴க்கு²னியா பனேவ அச்சேகசீவரம் உப்பஜ்ஜேய்ய, அச்சேகம் மஞ்ஞமானாய பி⁴க்கு²னியா படிக்³க³ஹேதப்³ப³ம், படிக்³க³ஹேத்வா யாவ சீவரகாலஸமயம் நிக்கி²பிதப்³ப³ம். ததோ சே உத்தரி நிக்கி²பேய்ய, நிஸ்ஸக்³கி³யம் பாசித்தியம்.

பரிணதஸிக்கா²பத³ம்

30. யா பன பி⁴க்கு²னீ ஜானம் ஸங்கி⁴கம் லாப⁴ம் பரிணதம் அத்தனோ பரிணாமேய்ய, நிஸ்ஸக்³கி³யம் பாசித்தியம்.

பத்தவக்³கோ³ ததியோ.

உத்³தி³ட்டா² கோ², அய்யாயோ, திம்ஸ நிஸ்ஸக்³கி³யா பாசித்தியா த⁴ம்மா. தத்தா²ய்யாயோ, புச்சா²மி, கச்சித்த² பரிஸுத்³தா⁴, து³தியம்பி புச்சா²மி, கச்சித்த² பரிஸுத்³தா⁴, ததியம்பி புச்சா²மி, கச்சித்த² பரிஸுத்³தா⁴, பரிஸுத்³தே⁴த்தா²ய்யாயோ, தஸ்மா துண்ஹீ, ஏவமேதம் தா⁴ரயாமீதி.

நிஸ்ஸக்³கி³யபாசித்தியா நிட்டி²தா.

ஸுத்³த⁴பாசித்தியா

இமே கோ² பனாய்யாயோ, ச²ஸட்டி²ஸதா பாசித்தியா

த⁴ம்மா உத்³தே³ஸம் ஆக³ச்ச²ந்தி.

லஸுணஸிக்கா²பத³ம்

1. யா பன பி⁴க்கு²னீ லஸுணம் கா²தே³ய்ய பாசித்தியம்.