பாடிதே³ஸனீயகண்டோ³

1. ஸப்பிவிஞ்ஞாபனஸிக்கா²பத³வண்ணனா

பாடிதே³ஸனீயேஸு பட²மே ஸப்பிந்தி புப்³பே³ வுத்தவினிச்ச²யம் பாளிஆக³தம் (பாசி. 1230) கோ³ஸப்பிஆதி³மேவ. விஞ்ஞாபேத்வா பு⁴ஞ்ஜேய்யாதி ஏத்த² ‘‘விஞ்ஞத்தியா படிலத்³த⁴ம் பு⁴ஞ்ஜிஸ்ஸாமீ’’தி க³ஹணே து³க்கடம், க³ஹிதஸ்ஸ அஜ்ஜோ²ஹாரே அஜ்ஜோ²ஹாரே பாடிதே³ஸனீயம்.

ஸாவத்தி²யம் ச²ப்³ப³க்³கி³யா பி⁴க்கு²னியோ ஆரப்³ப⁴ ஸப்பிம் விஞ்ஞாபேத்வா பு⁴ஞ்ஜனவத்து²ஸ்மிம் பஞ்ஞத்தம், ‘‘அகி³லானா’’தி அயமேத்த² அனுபஞ்ஞத்தி, திகபாடிதே³ஸனீயம், கி³லானாய த்³விகது³க்கடம். யா பன கி³லானா கி³லானஸஞ்ஞா, கி³லானகாலே வா விஞ்ஞாபேத்வா பச்சா² அகி³லானா ஹுத்வா பு⁴ஞ்ஜதி, கி³லானாய வா ஸேஸகம், ஞாதகப்பவாரிதட்டா²னதோ வா விஞ்ஞத்தம், அஞ்ஞஸ்ஸ வா அத்தா²ய, அத்தனோ வா த⁴னேன க³ஹிதம் பு⁴ஞ்ஜதி, தஸ்ஸா, உம்மத்திகாதீ³னஞ்ச அனாபத்தி. வுத்தலக்க²ணஸப்பிதா, அனுஞ்ஞாதகாரணாபா⁴வோ, விஞ்ஞத்தி, அஜ்ஜோ²ஹாரோதி இமானேத்த² சத்தாரி அங்கா³னி. ஸமுட்டா²னாதீ³னி அத்³தா⁴னஸதி³ஸானீதி.

ஸப்பிவிஞ்ஞாபனஸிக்கா²பத³வண்ணனா நிட்டி²தா.

2. தேலவிஞ்ஞாபனாதி³ஸிக்கா²பத³வண்ணனா

து³தியாதீ³ஸுபி தேலாதீ³னி புப்³பே³ வுத்தவினிச்ச²யானி பாளியம் (பாசி. 1236) ஆக³தானேவ, பாளியம் அனாக³தேஸு பன அட்ட²ஸுபி து³க்கடமேவ. ஸேஸம் ஸப்³ப³த்த² பட²மே வுத்தஸதி³ஸமேவாதி.

தேலவிஞ்ஞாபனாதி³ஸிக்கா²பத³வண்ணனா நிட்டி²தா.

கங்கா²விதரணியா பாதிமோக்க²வண்ணனாய

பி⁴க்கு²னிபாதிமோக்கே²

பாடிதே³ஸனீயவண்ணனா நிட்டி²தா.

1. பரிமண்ட³லாதி³ஸிக்கா²பத³வண்ணனா

இதோ பரம் பன ஸேகி²யானி சேவ அதி⁴கரணஸமதா² ச ஸப்³ப³பகாரதோ பி⁴க்கு²பாதிமோக்க²வண்ணனாயம் வுத்தனயேனேவ வேதி³தப்³பா³தி.

கங்கா²விதரணியா பாதிமோக்க²வண்ணனாய

பி⁴க்கு²னிபாதிமோக்க²வண்ணனா நிட்டி²தா.

நிக³மனகதா²

ஏத்தாவதா ச –

வண்ணனம் பாதிமோக்க²ஸ்ஸ, ஸோணத்தே²ரேன யாசிதோ;

வினயே ஜாதகங்கா²னம், கங்கா²விதரணத்தி²கோ.

ஆரபி⁴ம் யமஹம் ஸப்³ப³ம், ஸீஹளட்ட²கதா²னயம்;

மஹாவிஹாரவாஸீனம், வாசனாமக்³க³னிஸ்ஸிதம்.

நிஸ்ஸாய ஸா அயம் நிட்ட²ம், க³தா ஆதா³ய ஸப்³ப³ஸோ;

ஸப்³ப³ம் அட்ட²கதா²ஸாரம், பாளியத்த²ஞ்ச கேவலம்.

ந ஹேத்த² தம் பத³ம் அத்தி², யம் விருஜ்ஜே²ய்ய பாளியா;

மஹாவிஹாரவாஸீனம், போராணட்ட²கதா²ஹி வா.

யஸ்மா தஸ்மா அகத்வாவ, ஏத்த² கங்க²ம் ஹிதேஸினா;

ஸிக்கி²தப்³பா³வ ஸக்கச்சம், கங்கா²விதரணீ அயம்.

யதா² ச நிட்ட²ம் ஸம்பத்தா, கங்கா²விதரணீ அயம்;

த்³வாவீஸதி பா⁴ணவாரபஅமாணாய பாளியா.

ஏவம் அனந்தராயேன, நிட்ட²ம் கல்யாணனிஸ்ஸிதா;

அசிரம் ஸப்³ப³ஸத்தானம், யந்து ஸப்³பே³ மனோரதா²தி.

பரமவிஸுத்³த⁴ஸத்³தா⁴பு³த்³தி⁴வீரியப்படிமண்டி³தேன ஸீலாசாரஜ்ஜவமத்³த³வாதி³கு³ணஸமுத³யஸமுதி³தேன ஸகஸமயஸமயந்தரக³ஹனஜ்ஜோ²கா³ஹணஸமத்தே²ன பஞ்ஞாவேய்யத்தியஸமன்னாக³தேன திபிடகபரியத்திப்பபே⁴தே³ ஸாட்ட²கதே² ஸத்து²ஸாஸனே அப்படிஹதஞாணப்பபா⁴வேன மஹாவேய்யாகரணேன கரணஸம்பத்திஜனிதஸுவினிக்³க³தமத⁴உரோதா³ரவசனலாவண்ணயுத்தேன யுத்தமுத்தவாதி³னா வாதீ³வரேன மஹாகவினா பபி⁴ன்னபடிஸம்பி⁴தா³பரிவாரே ச²ளபி⁴ஞ்ஞாதி³ப்பபே⁴த³கு³ணப்படிமண்டி³தே உத்தரிமனுஸ்ஸத⁴ம்மே ஸுப்பதிட்டி²தபு³த்³தீ⁴னம் தே²ரவம்ஸப்பதீ³பானம் தே²ரானம் மஹாவிஹாரவாஸீனம் வம்ஸாலங்காரபூ⁴தேன விபுலவிஸுத்³த⁴பு³த்³தி⁴னா பு³த்³த⁴கோ⁴ஸோதி க³ரூஹி க³ஹிதனாமதே⁴ய்யேன தே²ரேன கதா அயம் கங்கா²விதரணீ நாம பாதிமோக்க²வண்ணனா –

தாவ திட்ட²து லோகஸ்மிம், லோகனித்த²ரணேஸினம்;

த³ஸ்ஸேந்தீ குலபுத்தானம், நயம் ஸீலவிஸுத்³தி⁴யா.

யாவ ‘‘பு³த்³தோ⁴’’தி நாமம்பி, ஸுத்³த⁴சித்தஸ்ஸ தாதி³னோ;

லோகம்ஹி லோகஜேட்ட²ஸ்ஸ, பவத்ததி மஹேஸினோதி.

கங்கா²விதரணீ-அட்ட²கதா² நிட்டி²தா.