10…பே…16. முஸாவாதா³தி³வக்³கோ³

முஸாவாதா³தி³ஸிக்கா²பத³வண்ணனா

இதோ பரேஸு முஸாவாத³வக்³கா³தீ³ஸு ஸத்தஸு வக்³கே³ஸு பி⁴க்கு²பாதிமோக்க²வண்ணனாயம் வுத்தனயேனேவ வினிச்ச²யோ வேதி³தப்³போ³தி.

ஸோளஸமவக்³கோ³.

உத்³தி³ட்டா² கோ² அய்யாயோ ச²ஸட்டி²ஸதா பாசித்தியா த⁴ம்மாதி பி⁴க்கூ² ஆரப்³ப⁴ பஞ்ஞத்தா ஸாதா⁴ரணா ஸத்ததி, அஸாதா⁴ரணா ச²ன்னவுதீதி ஏவம் ச²ஸட்டி²ஸதா. ஸேஸம் ஸப்³ப³த்த² உத்தானமேவாதி.

கங்கா²விதரணியா பாதிமோக்க²வண்ணனாய

பி⁴க்கு²னிபாதிமோக்கே²

ஸுத்³த⁴பாசித்தியவண்ணனா நிட்டி²தா.

தத்ராயம் ஸங்கே²பதோ அஸாதா⁴ரணஸிக்கா²பதே³ஸு ஸமுட்டா²னவினிச்ச²யோ – கி³ரக்³க³ஸமஜ்ஜா சித்தாகா³ரஸிக்கா²பத³ம் ஸங்கா⁴ணீ இத்தா²லங்காரோ க³ந்த⁴வண்ணகோ வாஸிதகபிஞ்ஞாகோ பி⁴க்கு²னிஆதீ³ஹி உம்மத்³த³னபரிமத்³த³னாதி இமானி த³ஸ ஸிக்கா²பதா³னி அசித்தகானி லோகவஜ்ஜானி அகுஸலசித்தானி. அயம் பனேத்த² அதி⁴ப்பாயோ, வினாபி சித்தேன ஆபஜ்ஜிதப்³ப³த்தா அசித்தகானி, சித்தே பன ஸதி அகுஸலேனேவ ஆபஜ்ஜிதப்³ப³த்தா லோகவஜ்ஜானி சேவ அகுஸலசித்தானி சாதி. அவஸேஸானி ஸசித்தகானி பண்ணத்திவஜ்ஜானேவ. சோரிவுட்டா²பனம் கா³மந்தரம் ஆராமஸிக்கா²பத³ம் க³ப்³பி⁴னிவக்³கே³ ஆதி³தோ பட்டா²ய ஸத்த, குமாரிபூ⁴தவக்³கே³ ஆதி³தோ பட்டா²ய பஞ்ச புரிஸாதி³ஸம்ஸட்ட²ம் பாரிவாஸிகச²ந்த³தா³னம் அனுவஸ்ஸவுட்டா²பனம் ஏகந்தரிகவுட்டா²பனந்தி இமானி ஏகூனவீஸதி ஸிக்கா²பதா³னி ஸசித்தகானி பண்ணத்திவஜ்ஜானி. அவஸேஸானி ஸசித்தகானி லோகவஜ்ஜானேவாதி.