10. பஸாகே²ஜாதஸிக்கா²பத³வண்ணனா

த³ஸமே பஸாகே²தி நாபி⁴யா ஹேட்டா² ஜாணுமண்ட³லானம் உபரிபதே³ஸே. ததோ ஹி யஸ்மா ருக்க²ஸ்ஸ ஸாகா² விய உபோ⁴ ஊரூ பபி⁴ஜ்ஜித்வா க³தா, தஸ்மா ஸோ ‘‘பஸாகோ²’’தி வுச்சதி, தஸ்மிம் பஸாகே². க³ண்ட³ந்தி யம்கிஞ்சி க³ண்ட³ம். ருதி⁴தந்தி வணம். பே⁴தா³பேய்ய வாதிஆதீ³ஸு ஸசே ‘‘பி⁴ந்த³ பா²லேஹீ’’தி ஸப்³பா³னி ஆணாபேதி, ஸோ ச ததே²வ கரோதி, ச² து³க்கடானி ச² ச பாசித்தியானி. அதா²பி ‘‘யம்கிஞ்சி ஏத்த² கத்தப்³ப³ம், தம் ஸப்³ப³ம் கரோஹீ’’தி ஏவம் ஆணாபேதி, ஸோ ச ஸப்³பா³னிபி பே⁴த³னாதீ³னி கரோதி, ஏகவாசாய ச² து³க்கடானி ச² ச பாசித்தியானி. ஸசே பன பே⁴த³னாதீ³ஸு ஏகம்யேவ ‘‘இத³ம் நாம கரோஹீ’’தி ஆணாபேதி, ஸோ ச ஸப்³பா³னி கரோதி. யம் ஆணத்தம், தஸ்ஸேவ கரணே பாசித்தியம்.

ஸாவத்தி²யம் அஞ்ஞதரம் பி⁴க்கு²னிம் ஆரப்³ப⁴ பஸாகே² ஜாதம் க³ண்ட³ம் புரிஸேன பே⁴தா³பனவத்து²ஸ்மிம் பஞ்ஞத்தம், அபலோகேத்வா வா விஞ்ஞும் வா யம்கஞ்சி து³தியிகம் க³ஹேத்வா ஏவம் கரோந்தியா, உம்மத்திகாதீ³னஞ்ச அனாபத்தி. பஸாகே² ஜாததா, அனபலோகனம், து³தியிகாபா⁴வோ, புரிஸேன பே⁴தா³தீ³னம் காராபனந்தி இமானேத்த² சத்தாரி அங்கா³னி. ஸமுட்டா²னாதீ³னி கதி²னஸதி³ஸானி, இத³ம் பன கிரியாகிரியந்தி.

பஸாகே²ஜாதஸிக்கா²பத³வண்ணனா நிட்டி²தா.

ஆராமவக்³கோ³ ச²ட்டோ².