7. க³ப்³பி⁴னீவக்³கோ³

1. க³ப்³பி⁴னீஸிக்கா²பத³வண்ணனா

க³ப்³பி⁴னிவக்³க³ஸ்ஸ பட²மே ‘‘க³ப்³பி⁴னீ’’தி ஜானித்வா உபஜ்ஜா²யாய வுட்டா²பேந்தியா க³ணபரியேஸனாதீ³ஸு ச ஞத்திகம்மவாசாத்³வயே ச து³க்கடம், கம்மவாசாபரியோஸானே பாசித்தியம்.

ஸாவத்தி²யம் ஸம்ப³ஹுலா பி⁴க்கு²னியோ ஆரப்³ப⁴ க³ப்³பி⁴னிம் வுட்டா²பனவத்து²ஸ்மிம் பஞ்ஞத்தம், க³ப்³பி⁴னியா வேமதிகாய அக³ப்³பி⁴னியா க³ப்³பி⁴னிஸஞ்ஞாய சேவ வேமதிகாய ச து³க்கடம். உபோ⁴ஸு அக³ப்³பி⁴னிஸஞ்ஞாய, உம்மத்திகாதீ³னஞ்ச அனாபத்தி. க³ப்³பி⁴னிதா, ‘க³ப்³பி⁴னீ’தி ஜானனம், வுட்டா²பனந்தி இமானேத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ம் பன பண்ணத்திவஜ்ஜம், திசித்தம், திவேத³னந்தி.

க³ப்³பி⁴னீஸிக்கா²பத³வண்ணனா நிட்டி²தா.

2. பாயந்தீஸிக்கா²பத³வண்ணனா

து³தியே பாயந்திந்தி த²ஞ்ஞம் பாயமானம், யம் பாயேதி, தஸ்ஸ மாதா வா, தா⁴தி வா. இத³ம் வத்து²மத்தமேவேத்த² விஸேஸோ, ஸேஸம் பட²மஸிக்கா²பத³ஸதி³ஸமேவாதி.

பாயந்தீஸிக்கா²பத³வண்ணனா நிட்டி²தா.

3. பட²மஸிக்க²மானஸிக்கா²பத³வண்ணனா

ததியே த்³வே வஸ்ஸானீதி பவாரணாவஸேன த்³வே ஸம்வச்ச²ரானி. ச²ஸு த⁴ம்மேஸூதி பாணாதிபாதாவேரமணிஆதீ³ஸு விகாலபோ⁴ஜனாவேரமணிபரியோஸானேஸு ச²ஸு ஸிக்கா²பதே³ஸு. அஸிக்கி²தஸிக்க²ந்தி பத³பா⁴ஜனே (பாசி. 1077) வுத்தனயேனேவ அதி³ன்னஸிக்க²ம் வா குபிதஸிக்க²ம் வா. ஸிக்க²மானம் வுட்டா²பேய்யாதி தேஸு ச²ஸு த⁴ம்மேஸு ஸிக்க²னதோ, தே வா ஸிக்கா²ஸங்கா²தே த⁴ம்மே மானனதோ ஏவம்லத்³த⁴னாமம் அனுபஸம்பன்னம் உபஸம்பாதே³ய்ய. பாசித்தியந்தி பட²மஸிக்கா²பதே³ வுத்தனயேனேவ கம்மவாசாபரியோஸானே பாசித்தியம்.

ஸாவத்தி²யம் ஸம்ப³ஹுலா பி⁴க்கு²னியோ ஆரப்³ப⁴ ஏவரூபம் ஸிக்க²மானம் வுட்டா²பனவத்து²ஸ்மிம் பஞ்ஞத்தம், த⁴ம்மகம்மே திகபாசித்தியம், அத⁴ம்மகம்மே திகது³க்கடம். த்³வே வஸ்ஸானி ச²ஸு த⁴ம்மேஸு ஸிக்கி²தஸிக்க²ம் ஸிக்க²மானம் வுட்டா²பேந்தியா, உம்மத்திகாதீ³னஞ்ச அனாபத்தி. வுத்தனயேன அஸிக்கி²தஸிக்க²தா, த⁴ம்மகம்மதா, கம்மவாசாபரியோஸானந்தி இமானேத்த² தீணி அங்கா³னி. ஸமுட்டா²னாதீ³னி பட²மே வுத்தனயானேவாதி.

பட²மஸிக்க²மானஸிக்கா²பத³வண்ணனா நிட்டி²தா.

4. து³தியஸிக்க²மானஸிக்கா²பத³வண்ணனா

சதுத்தே² ஸங்கே⁴ன அஸம்மதந்தி யஸ்ஸா ஸங்கே⁴ன அந்தமஸோ உபஸம்பதா³மாளகேபி பத³பா⁴ஜனே (பாசி. 1086) வுத்தா உபஸம்பதா³ஸம்முதி ந தி³ன்னா ஹோதி, தம் இமா த்³வேபி மஹாஸிக்க²மானா நாம. இத⁴ ஸங்கே⁴ன ஸம்மதம் வுட்டா²பேந்தியா, உம்மத்திகாதீ³னஞ்ச அனாபத்தி. ஸேஸம் ததியே வுத்தஸதி³ஸமேவ, இத³ம் பன கிரியாகிரியம் ஹோதீதி.

து³தியஸிக்க²மானஸிக்கா²பத³வண்ணனா நிட்டி²தா.

5. பட²மகி³ஹிக³தஸிக்கா²பத³வண்ணனா

பஞ்சமே கி³ஹிக³தந்தி புரிஸந்தரக³தம், இதா⁴பி இத³ம் வத்து²மத்தமேவ விஸேஸோ. ஊனத்³வாத³ஸவஸ்ஸஞ்ச பரிபுண்ணஸஞ்ஞாய வுட்டா²பேந்தியா கிஞ்சாபி அனாபத்தி, ஸா பன அனுபஸம்பன்னாவ ஹோதி. ஸேஸம் பட²மஸிக்கா²பத³ஸதி³ஸமேவாதி.

பட²மகி³ஹிக³தஸிக்கா²பத³வண்ணனா நிட்டி²தா.

6-7. து³தியததியகி³ஹிக³தஸிக்கா²பத³வண்ணனா

ச²ட்டே² ஸப்³ப³ம் ததியே வுத்தனயேன. ஸத்தமேபி ஸப்³ப³ம் சதுத்தே² வுத்தனயேனேவ வேதி³தப்³ப³ந்தி.

து³தியததியகி³ஹிக³தஸிக்கா²பத³வண்ணனா நிட்டி²தா.

8. பட²மஸஹஜீவினிஸிக்கா²பத³வண்ணனா

அட்ட²மே ஸஹஜீவினிந்தி ஸத்³தி⁴விஹாரினிம். நேவ அனுக்³க³ண்ஹேய்யாதி ஸயம் உத்³தே³ஸாதீ³ஹி நானுக்³க³ண்ஹேய்ய. ந அனுக்³க³ண்ஹாபேய்யாதி ‘‘இமிஸ்ஸா, அய்யே, உத்³தே³ஸாதீ³னி தே³ஹீ’’தி ஏவம் ந அஞ்ஞாய அனுக்³க³ண்ஹாபேய்ய. பாசித்தியந்தி து⁴ரே நிக்கி²த்தமத்தே பாசித்தியம்.

ஸாவத்தி²யம் து²ல்லனந்த³ம் ஆரப்³ப⁴ ஏவரூபே வத்து²ஸ்மிம் பஞ்ஞத்தம், ஸேஸமேத்த² துவட்டவக்³கே³ து³க்கி²தஸஹஜீவினிஸிக்கா²பதே³ வுத்தஸதி³ஸமேவாதி.

பட²மஸஹஜீவினிஸிக்கா²பத³வண்ணனா நிட்டி²தா.

9. நானுப³ந்த⁴னஸிக்கா²பத³வண்ணனா

நவமே வுட்டா²பிதம் பவத்தினிந்தி வுட்டா²பிதம் பவத்தினிம் யாய உபஸம்பாதி³தா, தம் உபஜ்ஜா²யினிந்தி அத்தோ². நானுப³ந்தே⁴ய்யாதி சுண்ணேன மத்திகாய த³ந்தகட்டே²ன முகோ²த³கேனாதி ஏவம் தேன தேன கரணீயேன ந உபட்ட²ஹேய்ய. பாசித்தியந்தி நானுப³ந்தி⁴ஸ்ஸந்தி து⁴ரே நிக்கி²த்தமத்தே பாசித்தியம்.

ஸாவத்தி²யம் ஸம்ப³ஹுலா பி⁴க்கு²னியோ ஆரப்³ப⁴ நானுப³ந்த⁴னவத்து²ஸ்மிம் பஞ்ஞத்தம். பா³லம் பன அலஜ்ஜினிம் வா அனனுப³ந்த⁴ந்தியா, கி³லானாய, ஆபதா³ஸு, உம்மத்திகாதீ³னஞ்ச அனாபத்தி. வுட்டா²பிதப்பவத்தினிதா, த்³வே வஸ்ஸானி அனனுப³ந்த⁴னே து⁴ரனிக்கே²போ, அனுஞ்ஞாதகாரணாபா⁴வோதி இமானேத்த² தீணி அங்கா³னி. ஸமுட்டா²னாதீ³னி பட²மபாராஜிகஸதி³ஸானி, இத³ம் பன அகிரியம், து³க்க²வேத³னந்தி.

நானுப³ந்த⁴னஸிக்கா²பத³வண்ணனா நிட்டி²தா.

10. து³தியஸஹஜீவினிஸிக்கா²பத³வண்ணனா

த³ஸமே நேவ வூபகாஸேய்யாதி ந க³ஹேத்வா க³ச்சே²ய்ய. ந வூபகாஸாபேய்யாதி ‘‘இமம், அய்யே, க³ஹேத்வா க³ச்சா²ஹீ’’தி அஞ்ஞம் ந ஆணாபேய்ய. பாசித்தியந்தி து⁴ரே நிக்கி²த்தமத்தே பாசித்தியம்.

ஸாவத்தி²யம் து²ல்லனந்த³ம் ஆரப்³ப⁴ ஸஹஜீவினியா அவூபகாஸனவத்து²ஸ்மிம் பஞ்ஞத்தம். ஸதி பன அந்தராயே, பரியேஸித்வா து³தியிகம் அலப⁴ந்தியா, கி³லானாய, ஆபதா³ஸு, உம்மத்திகாதீ³னஞ்ச அனாபத்தி. ஸஹஜீவினிதா, வூபகாஸவூபகாஸாபனே து⁴ரனிக்கே²போ, அனுஞ்ஞாதகாரணாபா⁴வோதி இமானேத்த² தீணி அங்கா³னி. ஸமுட்டா²னாதீ³னி ஸமனுபா⁴ஸனஸதி³ஸானீதி.

து³தியஸஹஜீவினிஸிக்கா²பத³வண்ணனா நிட்டி²தா.

க³ப்³பி⁴னீவக்³கோ³ ஸத்தமோ.