7. ஆவஸத²சீவரஸிக்கா²பத³வண்ணனா

ஸத்தமே ஆவஸத²சீவரந்தி ‘‘உதுனியோ பி⁴க்கு²னியோ பரிபு⁴ஞ்ஜந்தூ’’தி தி³ன்னசீவரம். அனிஸ்ஸஜ்ஜித்வாதி சதுத்தே² தி³வஸே தோ⁴வித்வா அஞ்ஞிஸ்ஸா அந்தமஸோ ஸாமணேரியாபி உதுனியா அத³த்வா. பாசித்தியந்தி ஏவம் அனிஸ்ஸஜ்ஜித்வா பரிபு⁴ஞ்ஜந்தியா பாசித்தியம்.

ஸாவத்தி²யம் து²ல்லனந்த³ம் ஆரப்³ப⁴ ஆவஸத²சீவரம் அனிஸ்ஸஜ்ஜித்வா பரிபு⁴ஞ்ஜனவத்து²ஸ்மிம் பஞ்ஞத்தம், திகபாசித்தியம், நிஸ்ஸஜ்ஜிதே த்³விகது³க்கடம். தஸ்மிம் பன நிஸ்ஸஜ்ஜிதஸஞ்ஞாய, புன பரியாயேன வா, அஞ்ஞாஸம் உதுனீனம் அபா⁴வேன வா, அச்சி²ன்னனட்ட²சீவரிகாய வா, ஆபதா³ஸு வா பரிபு⁴ஞ்ஜந்தியா, உம்மத்திகாதீ³னஞ்ச அனாபத்தி. ஆவஸத²சீவரதா, சதுத்த²தி³வஸதா, தோ⁴வித்வா அனிஸ்ஸஜ்ஜனம், அனுஞ்ஞாதகாரணாபா⁴வோதி இமானேத்த² சத்தாரி அங்கா³னி. ஸமுட்டா²னாதீ³னி கதி²னஸதி³ஸானி, இத³ம் பன கிரியாகிரியந்தி.

ஆவஸத²சீவரஸிக்கா²பத³வண்ணனா நிட்டி²தா.