5. சித்தாகா³ரவக்³கோ³

1. ராஜாகா³ரஸிக்கா²பத³வண்ணனா

சித்தாகா³ரவக்³க³ஸ்ஸ பட²மே ராஜாகா³ரந்தி ரஞ்ஞோ கீளனக⁴ரம். சித்தாகா³ரந்தி கீளனசித்தஸாலம். ஆராமந்தி கீளனஉபவனம். உய்யானந்தி கீளனுய்யானம். போக்க²ரணிந்தி கீளனபோக்க²ரணிம். த³ஸ்ஸனாயாதி ‘‘ஏதேஸு யம்கிஞ்சி பஸ்ஸிஸ்ஸாமீ’’தி க³ச்ச²ந்தியா பதே³ பதே³ து³க்கடம், யத்த² ட²த்வா பஸ்ஸதி, தத்த² பத³ம் அனுத்³த⁴ரித்வா பஞ்சாபி பஸ்ஸந்தியா ஏகாவ ஆபத்தி. ஸசே பன தம் தம் விலோகேத்வா பஸ்ஸதி, கீ³வம் பரிவத்தனப்பயோக³க³ணனாய ஆபத்தியோ, ந உம்மீலனக³ணனாய.

ஸாவத்தி²யம் ச²ப்³ப³க்³கி³யா பி⁴க்கு²னியோ ஆரப்³ப⁴ சித்தாகா³ரம் த³ஸ்ஸனாய க³மனவத்து²ஸ்மிம் பஞ்ஞத்தம், பி⁴க்கு²ஸ்ஸ ஸப்³ப³த்த² து³க்கடம், அவஸேஸோ வினிச்ச²யோ நச்சத³ஸ்ஸனஸிக்கா²பதே³ வுத்தனயேனேவ வேதி³தப்³போ³தி.

ராஜாகா³ரஸிக்கா²பத³வண்ணனா நிட்டி²தா.

2. ஆஸந்தி³பரிபு⁴ஞ்ஜனஸிக்கா²பத³வண்ணனா

து³தியே ஆஸந்தீ³ நாம அதிக்கந்தப்பமாணா வுச்சதி. பல்லங்கோ நாம ஸம்ஹாரிமேன வாளேன கதோதி வுத்தோ. பரிபு⁴ஞ்ஜேய்யாதி ஏத்த² பன நிஸீத³னனிபஜ்ஜனப்பயோக³க³ணனாய பாசித்தியம் வேதி³தப்³ப³ம்.

ஸாவத்தி²யம் ஸம்ப³ஹுலா பி⁴க்கு²னியோ ஆரப்³ப⁴ ஆஸந்தி³பல்லங்கபரிபோ⁴க³வத்து²ஸ்மிம் பஞ்ஞத்தம், ஆஸந்தி³யா பாதே³ சி²ந்தி³த்வா, பல்லங்கஸ்ஸ வாளே பி⁴ந்தி³த்வா பரிபு⁴ஞ்ஜந்தியா, உம்மத்திகாதீ³னஞ்ச அனாபத்தி. ஆஸந்தி³பல்லங்கதா, நிஸீத³னம் நிபஜ்ஜனம் வாதி இமானேத்த² த்³வே அங்கா³னி. ஸமுட்டா²னாதீ³னி ஏளகலோமஸதி³ஸானீதி.

ஆஸந்தி³பரிபு⁴ஞ்ஜனஸிக்கா²பத³வண்ணனா நிட்டி²தா.

3. ஸுத்தகந்தனஸிக்கா²பத³வண்ணனா

ததியே ஸுத்தந்தி ச²ன்னம் அஞ்ஞதரம். கந்தேய்யாதி ஏத்த² யத்தகம் ஹத்தே²ன அஞ்சி²தம் ஹோதி, தஸ்மிம் தக்கம்ஹி வேடி²தே ஏகா ஆபத்தி. இத³ஞ்ஹி ஸந்தா⁴ய பத³பா⁴ஜனீயே (பாசி. 988) ‘‘உஜ்ஜவுஜ்ஜவே’’தி வுத்தம்.

ஸாவத்தி²யம் ச²ப்³ப³க்³கி³யா பி⁴க்கு²னியோ ஆரப்³ப⁴ ஸுத்தம் கந்தனவத்து²ஸ்மிம் பஞ்ஞத்தம், கந்தனதோ புப்³பே³ கப்பாஸவிசினனம் ஆதி³ம் கத்வா ஸப்³ப³ப்பயோகே³ஸு ஹத்த²வாரக³ணனாய து³க்கடம். கந்திதஸுத்தம் கந்தந்தியா, உம்மத்திகாதீ³னஞ்ச அனாபத்தி. அகந்திததா, கந்தனந்தி இமானேத்த² த்³வே அங்கா³னி. ஸமுட்டா²னாதீ³னி ஏளகலோமஸதி³ஸானீதி.

ஸுத்தகந்தனஸிக்கா²பத³வண்ணனா நிட்டி²தா.

4. கி³ஹிவேய்யாவச்சஸிக்கா²பத³வண்ணனா

சதுத்தே² கி³ஹிவேய்யாவச்சந்தி கி³ஹீனம் வேய்யாவச்சம். ஸசேபி ஹி மாதாபிதரோ அத்தனோ கிஞ்சி கம்மம் அகாராபேத்வா தேஸம் யாகு³பசனாதீ³னி கரோந்தி, புப்³ப³ப்பயோகே³ஸு பயோக³க³ணனாய து³க்கடானி ஆபஜ்ஜித்வா யாகு³ஆதீ³ஸு பா⁴ஜனக³ணனாய, கா²த³னீயாதீ³ஸு பூவக³ணனாய பாசித்தியம் ஆபஜ்ஜதி.

ஸாவத்தி²யம் ஸம்ப³ஹுலா பி⁴க்கு²னியோ ஆரப்³ப⁴ கி³ஹீனம் வேய்யாவச்சகரணவத்து²ஸ்மிம் பஞ்ஞத்தம், மனுஸ்ஸேஹி ஸங்க⁴ஸ்ஸ யாகு³பானே வா ப⁴த்தே வா சேதியபூஜாய வா கரீயமானாய தேஸம் ஸஹாயபா⁴வேன யாகு³பசனாதீ³னி, அத்தனோ வேய்யாவச்சகரஸ்ஸ ச தானியேவ கரோந்தியா, உம்மத்திகாதீ³னஞ்ச அனாபத்தி. கி³ஹிவேய்யாவச்சகரணம், அனுஞ்ஞாதகாரணாபா⁴வோதி இமானேத்த² த்³வே அங்கா³னி. ஸமுட்டா²னாதீ³னி ஏளகலோமஸதி³ஸானேவாதி.

கி³ஹிவேய்யாவச்சஸிக்கா²பத³வண்ணனா நிட்டி²தா.

5. அதி⁴கரணஸிக்கா²பத³வண்ணனா

பஞ்சமே அதி⁴கரணந்தி சதுன்னம் அஞ்ஞதரம். பாசித்தியந்தி இத⁴ சீவரஸிப்³ப³னே விய து⁴ரம் நிக்கி²த்தமத்தே பாசித்தியம், ஏகாஹம்பி பரிஹாரோ நத்தி².

ஸாவத்தி²யம் து²ல்லனந்த³ம் ஆரப்³ப⁴ அதி⁴கரணம் நவூபஸமனவத்து²ஸ்மிம் பஞ்ஞத்தம், ஸேஸமேத்த² சீவரஸிப்³ப³னஸிக்கா²பதே³ வுத்தனயேனேவ வேதி³தப்³ப³ந்தி.

அதி⁴கரணஸிக்கா²பத³வண்ணனா நிட்டி²தா.

6. போ⁴ஜனதா³னஸிக்கா²பத³வண்ணனா

ச²ட்டே² ஸஹத்தா²தி காயேன வா காயப்படிப³த்³தே⁴ன வா நிஸ்ஸக்³கி³யேன வா ட²பேத்வா பஞ்சஸஹத⁴ம்மிகே அவஸேஸானம் அஞ்ஞத்ர உத³கத³ந்தபோனா யம்கிஞ்சி அஜ்ஜோ²ஹரணீயம் த³த³ந்தியா பாசித்தியம்.

ஸாவத்தி²யம் து²ல்லனந்த³ம் ஆரப்³ப⁴ அகா³ரிகஸ்ஸ கா²த³னீயபோ⁴ஜனீயதா³னவத்து²ஸ்மிம் பஞ்ஞத்தம், உத³கத³ந்தபோனே து³க்கடம். யா பன தா³பேதி ந தே³தி, உபனிக்கி²பித்வா தே³தி, பா³ஹிரலேபம் தே³தி, தஸ்ஸா, உம்மத்திகாதீ³னஞ்ச அனாபத்தி. அஞ்ஞத்ர உத³கத³ந்தபோனா அஜ்ஜோ²ஹரணியம், ட²பேத்வா பஞ்ச ஸஹத⁴ம்மிகே அஞ்ஞஸ்ஸ ஸஹத்தா² தா³னந்தி இமானேத்த² த்³வே அங்கா³னி. ஸமுட்டா²னாதீ³னி ஏளகலோமஸதி³ஸானீதி.

போ⁴ஜனதா³னஸிக்கா²பத³வண்ணனா நிட்டி²தா.

7. ஆவஸத²சீவரஸிக்கா²பத³வண்ணனா

ஸத்தமே ஆவஸத²சீவரந்தி ‘‘உதுனியோ பி⁴க்கு²னியோ பரிபு⁴ஞ்ஜந்தூ’’தி தி³ன்னசீவரம். அனிஸ்ஸஜ்ஜித்வாதி சதுத்தே² தி³வஸே தோ⁴வித்வா அஞ்ஞிஸ்ஸா அந்தமஸோ ஸாமணேரியாபி உதுனியா அத³த்வா. பாசித்தியந்தி ஏவம் அனிஸ்ஸஜ்ஜித்வா பரிபு⁴ஞ்ஜந்தியா பாசித்தியம்.

ஸாவத்தி²யம் து²ல்லனந்த³ம் ஆரப்³ப⁴ ஆவஸத²சீவரம் அனிஸ்ஸஜ்ஜித்வா பரிபு⁴ஞ்ஜனவத்து²ஸ்மிம் பஞ்ஞத்தம், திகபாசித்தியம், நிஸ்ஸஜ்ஜிதே த்³விகது³க்கடம். தஸ்மிம் பன நிஸ்ஸஜ்ஜிதஸஞ்ஞாய, புன பரியாயேன வா, அஞ்ஞாஸம் உதுனீனம் அபா⁴வேன வா, அச்சி²ன்னனட்ட²சீவரிகாய வா, ஆபதா³ஸு வா பரிபு⁴ஞ்ஜந்தியா, உம்மத்திகாதீ³னஞ்ச அனாபத்தி. ஆவஸத²சீவரதா, சதுத்த²தி³வஸதா, தோ⁴வித்வா அனிஸ்ஸஜ்ஜனம், அனுஞ்ஞாதகாரணாபா⁴வோதி இமானேத்த² சத்தாரி அங்கா³னி. ஸமுட்டா²னாதீ³னி கதி²னஸதி³ஸானி, இத³ம் பன கிரியாகிரியந்தி.

ஆவஸத²சீவரஸிக்கா²பத³வண்ணனா நிட்டி²தா.

8. ஆவஸத²விஹாரஸிக்கா²பத³வண்ணனா

அட்ட²மே ஆவஸத²ந்தி கவாடப³த்³த⁴விஹாரம். அனிஸ்ஸஜ்ஜித்வாதி ரக்க²ணத்தா²ய அத³த்வா, ‘‘இத³ம் ஜக்³கே³ய்யாஸீ’’தி ஏவம் அனாபுச்சி²த்வாதி அத்தோ². சாரிகம் பக்கமேய்ய பாசித்தியந்தி ஏத்த² ஸககா³மதோ அஞ்ஞம் கா³மம் ஏகரத்திவாஸத்தா²யபி பக்கமந்தியா பரிக்கி²த்தஸ்ஸ ஆவஸத²ஸ்ஸ பரிக்கே²பம், அபரிக்கி²த்தஸ்ஸ உபசாரம் பட²மபாதே³ன அதிக்கந்தமத்தே து³க்கடம், து³தியேன பாசித்தியம்.

ஸாவத்தி²யம் து²ல்லனந்த³ம் ஆரப்³ப⁴ ஆவஸத²ம் அனிஸ்ஸஜ்ஜித்வா சாரிகம் பக்கமனவத்து²ஸ்மிம் பஞ்ஞத்தம், திகபாசித்தியம், அகவாடப³த்³தே⁴ து³க்கடம், நிஸ்ஸஜ்ஜிதே த்³விகது³க்கடம். தஸ்மிம் பன நிஸ்ஸஜ்ஜிதஸஞ்ஞாய, ஸதி அந்தராயே, படிஜக்³கி³கம் பரியேஸித்வா அலப⁴ந்தியா, கி³லானாய, ஆபதா³ஸு, உம்மத்திகாதீ³னஞ்ச அனாபத்தி. ஸகவாடப³த்³த⁴தா, வுத்தனயேன பக்கமனம், அனுஞ்ஞாதகாரணாபா⁴வோதி இமானேத்த² தீணி அங்கா³னி. ஸமுட்டா²னாதீ³னி கதி²னஸதி³ஸானீதி, இத³ம் பன கிரியாகிரியந்தி.

ஆவஸத²விஹாரஸிக்கா²பத³வண்ணனா நிட்டி²தா.

9. திரச்சா²னவிஜ்ஜாபரியாபுணனஸிக்கா²பத³வண்ணனா

நவமே திரச்சா²னவிஜ்ஜந்தி யம்கிஞ்சி பா³ஹிரகம் அனத்த²ஸம்ஹிதம் ஹத்தி²அஸ்ஸரத²த⁴னுத²ருஸிப்பஆத²ப்³ப³ணகி²லனவஸீகரணஸோஸாபனமந்தாக³த³ப்பயோகா³தி³பே⁴த³ம் பரூபகா⁴தகரம் விஜ்ஜம். பரியாபுணேய்யாதி ஏத்த² யஸ்ஸ கஸ்ஸசி ஸந்திகே தம் பதா³தி³வஸேன பரியாபுணந்தியா பத³க³ணனாய சேவ அக்க²ரக³ணனாய ச பாசித்தியந்தி.

திரச்சா²னவிஜ்ஜாபரியாபுணனஸிக்கா²பத³வண்ணனா நிட்டி²தா.

10. திரச்சா²னவிஜ்ஜாவாசனஸிக்கா²பத³வண்ணனா

த³ஸமே வாசேய்யாதி பத³ம் விஸேஸோ. உப⁴யம்பி ஸாவத்தி²யம் ச²ப்³ப³க்³கி³யா சேவ ஸம்ப³ஹுலா பி⁴க்கு²னியோ ச ஆரப்³ப⁴ திரச்சா²னவிஜ்ஜம் பரியாபுணனவாசனவத்து²ஸ்மிம் பஞ்ஞத்தம். லேகே², தா⁴ரணாய ச, கு³த்தத்தா²ய ச யக்க²பரித்தனாக³மண்ட³லாதி³கே ஸப்³ப³பரித்தே, உம்மத்திகாதீ³னஞ்ச அனாபத்தி. திரச்சா²னவிஜ்ஜதா, பரியாபுணனவாசனா, அனுஞ்ஞாதகாரணாபா⁴வோதி இமானேத்த² த்³வீஸுபி தீணி அங்கா³னி. ஸமுட்டா²னாதீ³னி பத³ஸோத⁴ம்மஸதி³ஸானீதி.

திரச்சா²னவிஜ்ஜாவாசனஸிக்கா²பத³வண்ணனா நிட்டி²தா.

சித்தாகா³ரவக்³கோ³ பஞ்சமோ.