3. ஏககா³மந்தரக³மனஸிக்கா²பத³வண்ணனா

ததியே கா³மந்தரந்திஆதீ³ஸு ஸககா³மதோ தாவ நிக்க²மந்தியா அனாபத்தி, நிக்க²மித்வா பன அஞ்ஞம் கா³மம் க³ச்ச²ந்தியா பதே³ பதே³ து³க்கடம், ஏகேன பாதே³ன இதரஸ்ஸ கா³மஸ்ஸ பரிக்கே²பே வா உபசாரே வா அதிக்கந்தே து²ல்லச்சயம், து³தியேன அதிக்கந்தமத்தே ஸங்கா⁴தி³ஸேஸோ, ததோ நிக்க²மித்வா புன ஸககா³மம் பவிஸந்தியாபி ஏஸேவ நயோ. ஸசே பன க²ண்ட³பாகாரேன வா வதிச்சி²த்³தே³ன வா பி⁴க்கு²னிவிஹாரபூ⁴மிம்யேவ ஸக்கா ஹோதி பவிஸிதும், ஏவம் பவிஸமானாய கப்பியபூ⁴மியா பவிட்டா² நாம ஹோதி, தஸ்மா வட்டதி. ப³ஹிகா³மே ட²த்வா யம்கிஞ்சி ஸககா³மம் வா பரகா³மம் வா அகப்பியபூ⁴மிம் பத³ஸா பவிஸந்தியா ஆபத்தீதி அயமேத்த² ஸங்கே²போ.

நதி³பாரக³மனே வுத்தலக்க²ணாய நதி³யா து³தியிகம் வினா பரதீரம் க³ச்ச²ந்தியா வா அந்தரானதி³யம் து³தியிகாய ஸத்³தி⁴ம் ப⁴ண்டி³த்வா புன ஓரிமதீரமேவ பச்சுத்தரந்தியா வா பட²மபாத³ம் உத்³த⁴ரித்வா தீரே ட²பிதக்க²ணே து²ல்லச்சயம், து³தியபாது³த்³தா⁴ரே ஸங்கா⁴தி³ஸேஸோ. இத்³தி⁴ஸேதுயானனாவாஹி பன பரதீரம் ஓதரிதும், நஹானாதி³காரணேன ச ஓதிண்ணாய ஓரிமதீரம் பத³ஸாபி பச்சுத்தரிதும் வட்டதி.

ரத்திவிப்பவாஸே ‘‘புரேஅருணேயேவ து³தியிகாய ஹத்த²பாஸம் ஓக்கமிஸ்ஸாமீ’’தி ஆபோ⁴க³ம் வினா ஏகக³ப்³பே⁴பி து³தியிகாய ஹத்த²பாஸாதிக்கமே ட²த்வா அருணம் உட்டா²பேந்தியா ஆபத்தி.

ஏகா வா க³ணம்ஹாதி ஏத்த² பன ஏகா பி⁴க்கு²னீபி க³ணோயேவ. ஓஹீயேய்யாதி அவஹீயேய்ய, த³ஸ்ஸனூபசாரம் வா ஸவனூபசாரம் வா விஜஹேய்யாதி அத்தோ². தஸ்மா இந்த³கீ²லாதிக்கமதோ பட்டா²ய ப³ஹிகா³மே ருக்க²த²ம்ப⁴ஸாணிபாகாராதி³அந்தரிதபா⁴வேனாபி து³தியிகாய த³ஸ்ஸனூபசாரே விஜஹிதே ஸசேபி ஸவனூபசாரோ அத்தி², ஆபத்தியேவ. அஜ்ஜோ²காஸே பன தூ³ரேபி த³ஸ்ஸனூபசாரோ ஹோதி, தத்த² மக்³க³மூள்ஹஸத்³தே³ன விய த⁴ம்மஸ்ஸவனாரோசனஸத்³தே³ன விய ச ‘அய்யே’தி ஸத்³தா³யந்தியா ஸத்³த³ஸ்ஸவனாதிக்கமே ஆபத்தியேவ. ஸசே பன மக்³க³ம் க³ச்ச²ந்தீ ஓஹீயித்வா ‘‘இதா³னி பாபுணிஸ்ஸாமீ’’தி ஸஉஸ்ஸாஹா அனுப³ந்த⁴தி, வட்டதி.

ஸாவத்தி²யம் அஞ்ஞதரம் பி⁴க்கு²னிம் ஆரப்³ப⁴ கா³மந்தரக³மனவத்து²ஸ்மிம் பஞ்ஞத்தம், ‘‘ஏகா வா நதி³பார’’ந்திஆதி³கா ஏத்த² திவிதா⁴ அனுபஞ்ஞத்தி, புரே அருணே ஸககா³மதோ நிக்க²மித்வா அருணுக்³க³மனகாலே கா³மந்தரபரியாபன்னம் நதி³பாரம் ஓக்கமனந்தியா பன சதஸ்ஸோபி ஆபத்தியோ ஏகக்க²ணேயேவ ஹோந்தி. வுத்தம்பி சேதம் –

‘‘ஸிக்கா²பதா³ பு³த்³த⁴வரேன வண்ணிதா;

ஸங்கா⁴தி³ஸேஸா சதுரோ ப⁴வேய்யும்;

ஆபஜ்ஜேய்ய ஏகபயோகே³ன ஸப்³பா³;

பஞ்ஹா மேஸா குஸலேஹி சிந்திதா’’தி. (பரி. 479);

ஏதேனுபாயேன திண்ணம், த்³வின்னஞ்ச ஏகதோபா⁴வோ வேதி³தப்³போ³. து³தியிகாய பன பக்கந்தாய வா விப்³ப⁴ந்தாய வா காலங்கதாய வா பக்க²ஸங்கந்தாய வா ஆபதா³ஸு வா கா³மந்தரக³மனாதீ³னி கரோந்தியா உம்மத்திகாதீ³னஞ்ச அனாபத்தி. அந்தராயேன ஏகதோபா⁴வோ, கா³மந்தரக³மனாதீ³ஸு அஞ்ஞதரதாபஜ்ஜனம், ஆபதா³ய அபா⁴வோதி இமானேத்த² தீணி அங்கா³னி. ஸமுட்டா²னாதீ³னி பட²மபாராஜிகஸதி³ஸானி, இத³ம் பன பண்ணத்திவஜ்ஜம், திசித்தம், திவேத³னந்தி.

ஏககா³மந்தரக³மனஸிக்கா²பத³வண்ணனா நிட்டி²தா.