2. சோரிவுட்டா²பிகாஸிக்கா²பத³வண்ணனா

து³தியே யாய பஞ்சமாஸக்³க⁴னகதோ பட்டா²ய யம்கிஞ்சி பரஸந்தகம் அவஹரிதம், அயம் சோரீ நாம, தம் சோரிம். வஜ்ஜ²ம் விதி³தந்தி தேன கம்மேன ‘‘வதா⁴ரஹா அய’’ந்தி ஏவம் விதி³தம். அனபலோகேத்வாதி அனாபுச்சா². க³ணந்தி மல்லக³ணப⁴டிபுத்தக³ணாதி³கம். பூக³ந்தி த⁴ம்மக³ணம். ஸேணிந்தி க³ந்தி⁴கஸேணிது³ஸ்ஸிகஸேணிஆதி³கம். யத்த² யத்த² ஹி ராஜானோ க³ணாதீ³னம் கா³மனிக³மே நிய்யாதேந்தி ‘‘தும்ஹேவ ஏத்த² அனுஸாஸதா²’’தி, தத்த² தத்த² தேயேவ இஸ்ஸரா ஹோந்தி, தஸ்மா தே ஸந்தா⁴ய இத³ம் வுத்தம். ஏத்த² ச ராஜானம் வா க³ணாதி³கே வா அபலோகேத்வாபி பி⁴க்கு²னிஸங்கோ⁴ அபலோகேதப்³போ³வ. அஞ்ஞத்ர கப்பாதி தித்தி²யேஸு வா அஞ்ஞபி⁴க்கு²னீஸு வா பப்³ப³ஜிதபுப்³பா³ கப்பா நாம, தம் ட²பேத்வா அஞ்ஞம் உபஸம்பாதே³ந்தியா க³ணஆசரினீ பத்தசீவரபரியேஸனேஸு ஸீமாஸம்முதியா ஞத்தியா ச து³க்கடம், த்³வீஹி கம்மவாசாஹி து²ல்லச்சயம், கம்மவாசாபரியோஸானே ஸங்கா⁴தி³ஸேஸோ.

ஸாவத்தி²யம் து²ல்லனந்த³ம் ஆரப்³ப⁴ சோரிம் வுட்டா²பனவத்து²ஸ்மிம் பஞ்ஞத்தம், சோரியா வேமதிகாய து³க்கடம், ததா² அசோரியா சோரிஸஞ்ஞாய சேவ வேமதிகாய ச. அசோரிஸஞ்ஞாய, அஜானந்தியா, அபலோகேத்வா வுட்டா²பேந்தியா, கப்பம் வுட்டா²பேந்தியா, உம்மத்திகாதீ³னஞ்ச அனாபத்தி. சோரிதா, சோரிஸஞ்ஞிதா, அஞ்ஞத்ர அனுஞ்ஞாதகாரணா வுட்டா²பனந்தி, இமானேத்த² தீணி அங்கா³னி. சோரிவுட்டா²பனஸமுட்டா²னம், கிரியாகிரியம், ஸஞ்ஞாவிமோக்க²ம், ஸசித்தகம், பண்ணத்திவஜ்ஜம், காயகம்மம், வசீகம்மம், திசித்தம், திவேத³னந்தி.

சோரிவுட்டா²பிகாஸிக்கா²பத³வண்ணனா நிட்டி²தா.