14. ஸங்க⁴பே⁴த³காதி³ஸிக்கா²பத³வண்ணனா

ஸங்க⁴பே⁴தா³தீ³ஸு சதூஸு வுத்தனயேனேவ வினிச்ச²யோ வேதி³தப்³போ³. கேவலஞ்ஹி பி⁴க்கு²னீ ஸங்க⁴ம் ந பி⁴ந்த³தி, பே⁴தா³ய பன பரக்கமதி சேவ அனுவத்ததி ச. உத்³தி³ட்டா² கோ² அய்யாயோ ஸத்தரஸ ஸங்கா⁴தி³ஸேஸா த⁴ம்மாதி பி⁴க்கூ² ஆரப்³ப⁴ பஞ்ஞத்தா ஸாதா⁴ரணா ஸத்த, அஸாதா⁴ரணா த³ஸாதி ஏவம் ஸத்தரஸ. உப⁴தோஸங்கே⁴ பக்க²மானத்தம் சரிதப்³ப³ந்தி பி⁴க்கு²னியா ஹி ஆபத்திம் சா²தே³ந்தியாபி பரிவாஸோ நாம நத்தி², சா²த³னபச்சயாபி ந து³க்கடம் ஆபஜ்ஜதி, தஸ்மா சா²தே³த்வாபி அசா²தே³த்வாபி ஏகம் பக்க²மானத்தமேவ சரிதப்³ப³ம். தம் பி⁴க்கு²னீஹி அத்தனோ ஸீமம் ஸோதே⁴த்வா விஹாரஸீமாய வா, ஸோதே⁴தும் அஸக்கோந்தீஹி க²ண்ட³ஸீமாய வா ஸப்³ப³ந்திமேன பரிச்சே²தே³ன சதுவக்³க³ம் க³ணம் ஸன்னிபாதாபேத்வா தா³தப்³ப³ம். ஸசே ஏகா ஆபத்தி ஹோதி, ஏகிஸ்ஸா வஸேன, ஸசே த்³வே வா திஸ்ஸோ வா ஸம்ப³ஹுலா வா ஏகவத்து²கா வா நானாவத்து²கா வா, தாஸம் தாஸம் வஸேன பி⁴க்கு²பாதிமோக்க²வண்ணனாயம் வுத்தவத்து²கோ³த்தனாமஆபத்திபே⁴தே³ஸு யம் யம் இச்ச²தி, தம் தம் ஆதா³ய யோஜனா காதப்³பா³.

தத்ரித³ம் பட²மாபத்திவஸேன முக²மத்தனித³ஸ்ஸனம் – தாய ஆபன்னாய பி⁴க்கு²னியா பி⁴க்கு²னிஸங்க⁴ம் உபஸங்கமித்வா ஏகம்ஸம் உத்தராஸங்க³ம் கரித்வா வுட்³டா⁴னம் பி⁴க்கு²னீனம் பாதே³ வந்தி³த்வா உக்குடிகம் நிஸீதி³த்வா அஞ்ஜலிம் பக்³க³ஹேத்வா ஏவமஸ்ஸவசனீயோ ‘‘அஹம், அய்யே, ஏகம் ஆபத்திம் ஆபஜ்ஜிம் உஸ்ஸயவாத³ம், ஸாஹம், அய்யே, ஸங்க⁴ம் ஏகிஸ்ஸா ஆபத்தியா உஸ்ஸயவாதா³ய பக்க²மானத்தம் யாசாமீ’’தி, ஏவம் திக்க²த்தும் யாசாபேத்வா ப்³யத்தாய பி⁴க்கு²னியா படிப³லாய ஸங்கோ⁴ ஞாபேதப்³போ³ –

‘‘ஸுணாது மே, அய்யே, ஸங்கோ⁴, அயம் இத்த²ன்னாமா பி⁴க்கு²னீ ஏகம் ஆபத்திம் ஆபஜ்ஜிம் உஸ்ஸயவாத³ம், ஸா ஸங்க⁴ம் ஏகிஸ்ஸா ஆபத்தியா உஸ்ஸயவாதா³ய பக்க²மானத்தம் யாசதி, யதி³ ஸங்க⁴ஸ்ஸ பத்தகல்லம், ஸங்கோ⁴ இத்த²ன்னாமாய பி⁴க்கு²னியா ஏகிஸ்ஸா ஆபத்தியா உஸ்ஸயவாதா³ய பக்க²மானத்தம் த³தே³ய்ய, ஏஸா ஞத்தி.

‘‘ஸுணாது மே, அய்யே, ஸங்கோ⁴, அயம் இத்த²ன்னாமா பி⁴க்கு²னீ…பே… து³தியம்பி…பே… ததியம்பி ஏதமத்த²ம் வதா³மி, ஸுணாது மே, அய்யே, ஸங்கோ⁴…பே… ஸா பா⁴ஸேய்ய. தி³ன்னம் ஸங்கே⁴ன இத்த²ன்னாமாய பி⁴க்கு²னியா ஏகிஸ்ஸா ஆபத்தியா உஸ்ஸயவாதா³ய பக்க²மானத்தம். க²மதி ஸங்க⁴ஸ்ஸ, தஸ்மா துண்ஹீ, ஏவமேதம் தா⁴ரயாமீ’’தி.

கம்மவாசாபரியோஸானே ‘‘வத்தம் ஸமாதி³யாமி, மானத்தம் ஸமாதி³யாமீ’’தி ஸமாதி³யித்வா ஸங்க⁴ஸ்ஸ ஆரோசேத்வா நிக்கி²த்தவத்தேன தாவ வஸிதுகாமாய தத்தே²வ ஸங்க⁴மஜ்ஜே² வா பக்கந்தாஸு பி⁴க்கு²னீஸு ஏகபி⁴க்கு²னியா வா து³தியிகாய வா ஸந்திகே ‘‘வத்தம் நிக்கி²பாமி, மானத்தம் நிக்கி²பாமீ’’தி நிக்கி²பிதப்³ப³ம். அஞ்ஞிஸ்ஸா பன ஆக³ந்துகாய ஸந்திகே ஆரோசேத்வா நிக்கி²பிதப்³ப³ம், நிக்கி²த்தகாலதோ பட்டா²ய பகதத்தட்டா²னே திட்ட²தி, ததோ புரேஅருணேயேவ சதூஹி பி⁴க்கு²னீஹி தம் பி⁴க்கு²னிம் க³ஹேத்வா கா³மூபசாரதோ ச பி⁴க்கூ²னம் விஹாரூபசாரதோ ச த்³வே லேட்³டு³பாதே அதிக்கமித்வா மஹாமக்³கா³ ஓக்கம்ம கு³ம்ப³வதிஆதீ³ஹி படிச்ச²ன்னே ஓகாஸே நிஸீதி³தப்³ப³ம். சதூஹி பி⁴க்கூ²ஹிபி தத்த² க³ந்தப்³ப³ம், க³ந்த்வா பி⁴க்கு²னீனம் அவிதூ³ரே விஸும் நிஸீதி³தப்³ப³ம். அத² தாய பி⁴க்கு²னியா வுத்தனயேனேவ வத்தம் ஸமாதி³யித்வா பி⁴க்கு²னிஸங்க⁴ஸ்ஸ தாவ ஏவம் ஆரோசேதப்³ப³ம் –

‘‘அஹம், அய்யே, ஏகம் ஆபத்திம் ஆபஜ்ஜிம் உஸ்ஸயவாத³ம், ஸாஹம் ஸங்க⁴ம் ஏகிஸ்ஸா ஆபத்தியா உஸ்ஸயவாதா³ய பக்க²மானத்தம் யாசிம், தஸ்ஸா மே ஸங்கோ⁴ ஏகிஸ்ஸா ஆபத்தியா உஸ்ஸயவாதா³ய பக்க²மானத்தம் அதா³ஸி, ஸாஹம் மானத்தம் சராமி, வேத³யாமஹம், அய்யே, ‘வேத³யதீ’தி மம் ஸங்கோ⁴ தா⁴ரேதூ’’தி.

ததோ பி⁴க்கு²ஸங்க⁴ஸ்ஸ ஸந்திகம் க³ந்த்வா ஏவம் ஆரோசேதப்³ப³ம் ‘‘அஹம், அய்யா, ஏகம் ஆபத்திம் ஆபஜ்ஜிம்…பே… வேத³யாமஹம், அய்யா, ‘வேத³யதீ’தி மம் ஸங்கோ⁴ தா⁴ரேதூ’’தி. ஆரோசேத்வா பி⁴க்கு²னிஸங்க⁴ஸ்ஸேவ ஸந்திகே நிஸீதி³தப்³ப³ம், ததோ பட்டா²ய பி⁴க்கூ²ஸு வா, து³தியிகம் ட²பேத்வா பி⁴க்கு²னீஸு வா பக்கந்தாஸுபி உப⁴தோஸங்கே⁴ மானத்தம் சிண்ணமேவ ஹோதி. யாவ அருணம் ந உட்ட²ஹதி, தாவ யம் பட²மம் பஸ்ஸதி பி⁴க்கு²ம் வா பி⁴க்கு²னிம் வா, தஸ்ஸா ஆரோசேதப்³ப³ம். உட்டி²தே அருணே வத்தம் நிக்கி²பித்வா உபஸ்ஸயம் க³ந்தப்³ப³ம், ஏவம் பஞ்சத³ஸ அருணா க³ஹேதப்³பா³.

அனிக்கி²த்தவத்தாய பன ஆக³ந்துகேஸு அஸதி சதுன்னம் பி⁴க்கூ²னஞ்ச பி⁴க்கு²னீனஞ்ச தே³வஸிகம் ஆரோசேத்வா, ஆக³ந்துகேஸு ஸதி ஸப்³பே³ஸம்பி ஆக³ந்துகானம் ஆரோசேந்தியா பஞ்சத³ஸ தி³வஸானி பாரிவாஸிகக்க²ந்த⁴கே (சூளவ. 75 ஆத³யோ) வுத்தனயேனேவ ஸம்மா வத்திதப்³ப³ந்தி அயமேத்த² ஸங்கே²போ, வித்தா²ரோ பன ஸமந்தபாஸாதி³காயம் (சூளவ. அட்ட². 75 ஆத³யோ) வுத்தோ, சிண்ணமானத்தாய பி⁴க்கு²னியாதி யதா³ ஏவம் சிண்ணமானத்தா பி⁴க்கு²னீ ஹோதி, அத²ஸ்ஸா யத்த² ஸியா வீஸதிக³ணோ பி⁴க்கு²னிஸங்கோ⁴தி வுத்தனயேனேவ அப்³பா⁴னகம்மம் காதப்³ப³ம், ஸேஸம் உத்தானமேவாதி.

கங்கா²விதரணியா பாதிமோக்க²வண்ணனாய

பி⁴க்கு²னிபாதிமோக்கே²

ஸங்கா⁴தி³ஸேஸவண்ணனா நிட்டி²தா.