நிஸ்ஸக்³கி³யகண்டோ³

1. பத்தஸன்னிசயஸிக்கா²பத³வண்ணனா

நிஸ்ஸக்³கி³யேஸு ஆதி³வக்³க³ஸ்ஸ தாவ பட²மே பத்தஸன்னிசயம் கரேய்யாதி பத்தஸன்னிதி⁴ம் கரேய்ய, ஏகாஹம் அனதி⁴ட்ட²ஹித்வா வா அவிகப்பேத்வா வா அதி⁴ட்டா²னுபக³ம் பத்தம் ட²பேய்யாதி அத்தோ².

ஸாவத்தி²யம் ச²ப்³ப³க்³கி³யா பி⁴க்கு²னியோ ஆரப்³ப⁴ பத்தஸன்னிசயவத்து²ஸ்மிம் பஞ்ஞத்தம், ஸேஸகதா²மக்³கோ³ பி⁴க்கு²பாதிமோக்க²வண்ணனாயம் வுத்தனயேனேவ வேதி³தப்³போ³, தத்ர ஹி த³ஸாஹாதிக்கமே ஆபத்தி, இத⁴ ஏகாஹாதிக்கமேதி ஏத்தகமேவ தஸ்ஸ ச இமஸ்ஸ ச நானாகரணம், ஸேஸம் தாதி³ஸமேவாதி.

பத்தஸன்னிசயஸிக்கா²பத³வண்ணனா நிட்டி²தா.

2. அகாலசீவரஸிக்கா²பத³வண்ணனா

து³தியே அகாலசீவரந்தி அத்த²தே கதி²னே கதி²னமாஸேஹி, அனத்த²தே சீவரமாஸதோ அஞ்ஞஸ்மிம் காலே உப்பன்னம், யம் வா பன காலேபி ஆதி³ஸ்ஸ தி³ன்னம். ஆதி³ஸ்ஸ தி³ன்னம் நாம ‘‘ஸம்பத்தா பா⁴ஜேந்தூ’’தி வத்வா வா, ‘‘இத³ம் க³ணஸ்ஸ, இத³ம் தும்ஹாகம் த³ம்மீ’’தி வத்வா வா, தா³துகாமதாய பாத³மூலே ட²பேத்வா வா தி³ன்னம். இச்சேதம் அகாலசீவரம் ‘‘காலசீவர’’ந்தி அதி⁴ட்ட²ஹித்வா பா⁴ஜாபேந்தியா பயோகே³ து³க்கடம், யம் அத்தனா லத்³த⁴ம், தம் நிஸ்ஸக்³கி³யம் ஹோதி. நிஸ்ஸட்ட²ம் படிலபி⁴த்வாபி யதா²தா³னேயேவ உபனேதப்³ப³ம், அஞ்ஞஸ்மிம்பி ஏவரூபே ஸிக்கா²பதே³ ஏஸேவ நயோ.

ஸாவத்தி²யம் து²ல்லனந்த³ம் ஆரப்³ப⁴ அகாலசீவரம் ‘‘காலசீவர’’ந்தி அதி⁴ட்ட²ஹித்வா பா⁴ஜனவத்து²ஸ்மிம் பஞ்ஞத்தம், அகாலசீவரே வேமதிகாய, காலசீவரே அகாலசீவரஸஞ்ஞாய சேவ வேமதிகாய ச து³க்கடம். உபோ⁴ஸு காலசீவரஸஞ்ஞாய, உம்மத்திகாதீ³னஞ்ச அனாபத்தி. அகாலசீவரதா, ததா²ஸஞ்ஞிதா, ‘‘காலசீவர’’ந்தி அதி⁴ட்டா²ய லேஸேன பா⁴ஜாபனம், படிலாபோ⁴தி இமானேத்த² சத்தாரி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானீதி.

அகாலசீவரஸிக்கா²பத³வண்ணனா நிட்டி²தா.

3. சீவரபரிவத்தனஸிக்கா²பத³வண்ணனா

ததியே ஹந்தா³தி க³ண்ஹ. அச்சி²ந்தே³ய்யாதி ஸயம் அச்சி²ந்த³ந்தியா ப³ந்தி⁴த்வா ட²பிதேஸு ப³ஹூஸுபி ஏகாபத்தி, இதரேஸு வத்து²க³ணனாய ஆபத்தியோ. அச்சி²ந்தா³பனே பன ஏகாய ஆணத்தியா ப³ஹூஸு அச்சி²ன்னேஸுபி ஏகாவாபத்தி.

ஸாவத்தி²யம் து²ல்லனந்த³ம் ஆரப்³ப⁴ சீவரம் பரிவத்தேத்வா அச்சி²ந்த³னவத்து²ஸ்மிம் பஞ்ஞத்தம், ஸாணத்திகம், திகபாசித்தியம், அஞ்ஞஸ்மிம் பரிக்கா²ரே திகது³க்கடம், அனுபஸம்பன்னாய சீவரேபி திகது³க்கடமேவ. யா பன தாய வா தி³ய்யமானம், தஸ்ஸா வா விஸ்ஸாஸம் க³ண்ஹாதி, தஸ்ஸா, உம்மத்திகாதீ³னஞ்ச அனாபத்தி. உபஸம்பன்னதா, பரிவத்திதசீவரஸ்ஸ விகப்பனுபக³தா, ஸகஸஞ்ஞாய அச்சி²ந்த³னம் வா அச்சி²ந்தா³பனம் வாதி இமானேத்த² தீணி அங்கா³னி. ஸமுட்டா²னாதீ³னி அதி³ன்னாதா³னஸதி³ஸானி, இத³ம் பன து³க்க²வேத³னந்தி.

சீவரபரிவத்தனஸிக்கா²பத³வண்ணனா நிட்டி²தா.

4. அஞ்ஞவிஞ்ஞாபனஸிக்கா²பத³வண்ணனா

சதுத்தே² விஞ்ஞாபேத்வாதி ஜானாபேத்வா, ‘‘இத³ம் நாம ஆஹரா’’தி யாசித்வா வா. அஞ்ஞம் விஞ்ஞாபேய்யாதி யம் புப்³பே³ ‘‘கிந்தே, அய்யே, அபா²ஸு, கிம் ஆஹரியதூ’’தி வுத்தாய விஞ்ஞாபிதம், தம் படிக்கி²பித்வா தஞ்சேவ அஞ்ஞஞ்ச க³ஹேதுகாமா ததோ அஞ்ஞம் விஞ்ஞாபேய்ய, தஸ்ஸா விஞ்ஞத்தியா து³க்கடம், படிலாபே⁴ன நிஸ்ஸக்³கி³யம் ஹோதி.

ஸாவத்தி²யம் து²ல்லனந்த³ம் ஆரப்³ப⁴ அஞ்ஞம் விஞ்ஞாபேத்வா அஞ்ஞம் விஞ்ஞாபனவத்து²ஸ்மிம் பஞ்ஞத்தம், திகபாசித்தியம், அனஞ்ஞே த்³விகது³க்கடம். அனஞ்ஞே அனஞ்ஞஸஞ்ஞாய பன, தஸ்மிம் அப்பஹோந்தே புன தஞ்ஞேவ, அஞ்ஞேனபி அத்தே² ஸதி தேன ஸத்³தி⁴ம் அஞ்ஞஞ்ச, யஞ்ச விஞ்ஞத்தம், ததோ சே அஞ்ஞம் ஸமக்³க⁴தரம் ஹோதி, இமம் ஆனிஸம்ஸம் த³ஸ்ஸேத்வா ஸுத்³த⁴ம் அஞ்ஞமேவ ச விஞ்ஞாபேந்தியா, உம்மத்திகாதீ³னஞ்ச அனாபத்தி. லேஸேன க³ஹேதுகாமதா, அஞ்ஞஸ்ஸ விஞ்ஞாபனம், படிலாபோ⁴தி இமானேத்த² தீணி அங்கா³னி. ஸமுட்டா²னாதீ³னி ஸஞ்சரித்தஸதி³ஸானீதி.

அஞ்ஞவிஞ்ஞாபனஸிக்கா²பத³வண்ணனா நிட்டி²தா.

5. அஞ்ஞசேதாபனஸிக்கா²பத³வண்ணனா

பஞ்சமே அஞ்ஞம் சேதாபேத்வாதி அத்தனோ கப்பியப⁴ண்டே³ன ‘‘இத³ம் நாம ஆஹரா’’தி அஞ்ஞம் பரிவத்தாபேத்வா. அஞ்ஞம் சேதாபேய்யாதி ‘‘ஏவம் மே இத³ம் த³த்வா அஞ்ஞம்பி ஆஹரிஸ்ஸதீ’’தி மஞ்ஞமானா ‘‘ந மே இமினா அத்தோ², இத³ம் நாம மே ஆஹரா’’தி ததோ அஞ்ஞம் சேதாபேய்ய. தஸ்ஸா சேதாபனப்பயோகே³ து³க்கடம், படிலாபே⁴ன தேன வா அஞ்ஞேன வா மூலேன ஆஹடம் நிஸ்ஸக்³கி³யம் ஹோதி, ஸேஸம் சதுத்த²ஸதி³ஸமேவாதி.

அஞ்ஞசேதாபனஸிக்கா²பத³வண்ணனா நிட்டி²தா.

6. பட²மஸங்கி⁴கசேதாபனஸிக்கா²பத³வண்ணனா

ச²ட்டே² அஞ்ஞத³த்தி²கேனாதி அஞ்ஞஸ்ஸத்தா²ய தி³ன்னேன. அஞ்ஞுத்³தி³ஸிகேனாதி அஞ்ஞம் உத்³தி³ஸித்வா தி³ன்னேன. ஸங்கி⁴கேனாதி ஸங்க⁴ஸ்ஸ பரிச்சத்தேன. பரிக்கா²ரேனாதி கப்பியப⁴ண்டே³ன. அஞ்ஞம் சேதாபேய்யாதி ‘‘இத³ம் நாம பரிபு⁴ஞ்ஜேய்யாதா²’’தி யம் உத்³தி³ஸித்வா நியமேத்வா யோ பரிக்கா²ரோ தி³ன்னோ, ததோ அஞ்ஞம் பரிவத்தாபேய்ய, தஸ்ஸா பயோகே³ து³க்கடம், படிலாபே⁴ன நிஸ்ஸக்³கி³யம்.

ஸாவத்தி²யம் ஸம்ப³ஹுலா பி⁴க்கு²னியோ ஆரப்³ப⁴ தாதி³ஸேன பரிக்கா²ரேன அஞ்ஞம் சேதாபனவத்து²ஸ்மிம் பஞ்ஞத்தம், திகபாசித்தியம், அனஞ்ஞத³த்தி²கே த்³விகது³க்கடம். தஸ்மிம் பன அனஞ்ஞத³த்தி²கஸஞ்ஞாய, ஸேஸகம் உபனேந்தியா, ‘‘தும்ஹேஹி ஏதத³த்தா²ய தி³ன்னோ, அம்ஹாகஞ்ச இமினா நாம அத்தோ²’’தி ஸாமிகே அபலோகேத்வா உபனேந்தியா, யதா³ பி⁴க்கு²னியோ விஹாரம்பி ச²ட்³டே³த்வா பக்கமந்தி, ஏவரூபாஸு ஆபதா³ஸு உபனேந்தீனம், உம்மத்திகாதீ³னஞ்ச அனாபத்தி. ஸேஸம் சதுத்த²ஸதி³ஸமேவாதி.

பட²மஸங்கி⁴கசேதாபனஸிக்கா²பத³வண்ணனா நிட்டி²தா.

7. து³தியஸங்கி⁴கசேதாபனஸிக்கா²பத³வண்ணனா

ஸத்தமே ஸஞ்ஞாசிகேனாதி ஸயம் யாசிதகேனாபி. ஏததே³வேத்த² நானாகரணம், ஸேஸம் ச²ட்ட²ஸதி³ஸமேவாதி.

து³தியஸங்கி⁴கசேதாபனஸிக்கா²பத³வண்ணனா நிட்டி²தா.

8. பட²மக³ணிகசேதாபனஸிக்கா²பத³வண்ணனா

அட்ட²மே மஹாஜனிகேனாதி க³ணஸ்ஸ பரிச்சத்தேன, இத³மேத்த² ச²ட்ட²தோ நானாகரணம்.

பட²மக³ணிகசேதாபனஸிக்கா²பத³வண்ணனா நிட்டி²தா.

9. து³தியக³ணிகசேதாபனஸிக்கா²பத³வண்ணனா

நவமே ஸஞ்ஞாசிகேனாதி இத³ம் அட்ட²மதோ அதிரித்தம், ஸேஸம் த்³வீஸுபி ச²ட்ட²ஸிக்கா²பத³ஸதி³ஸமேவாதி.

து³தியக³ணிகசேதாபனஸிக்கா²பத³வண்ணனா நிட்டி²தா.

10. புக்³க³லிகசேதாபனஸிக்கா²பத³வண்ணனா

த³ஸமே புக்³க³லிகேனாதி ஏகபி⁴க்கு²னியா பரிச்சத்தேன. ஸஞ்ஞாசிகேனாதி ஸயம் யாசிதகேன ச. அஞ்ஞம் சேதாபேய்யாதி யம் உத்³தி³ஸித்வா தி³ன்னம், ததோ அஞ்ஞம் சேதாபேந்தியா பயோகே³ து³க்கடம், படிலாபே⁴ன நிஸ்ஸக்³கி³யம் ஹோதி.

ஸாவத்தி²யம் து²ல்லனந்த³ம் ஆரப்³ப⁴ தாதி³ஸேன பரிக்கா²ரேன அஞ்ஞம் சேதாபனவத்து²ஸ்மிம் பஞ்ஞத்தம், ஸேஸம் ச²ட்ட²ஸதி³ஸமேவாதி.

புக்³க³லிகசேதாபனஸிக்கா²பத³வண்ணனா நிட்டி²தா.

பத்தவக்³கோ³ பட²மோ.

11. க³ருபாவுரணஸிக்கா²பத³வண்ணனா

து³தியஸ்ஸ பட²மே க³ருபாவுரணந்தி ஸீதகாலே பாவுரணம். சதுக்கம்ஸபரமந்தி கம்ஸோ நாம சதுக்கஹாபணிகோ ஹோதி, தஸ்மா ஸோளஸகஹாபணக்³க⁴னகம். சேதாபேதப்³ப³ந்தி ட²பேத்வா ஸஹத⁴ம்மிகே ச ஞாதகப்பவாரிதே ச அஞ்ஞேன கிஸ்மிஞ்சிதே³வ கு³ணே பரிதுட்டே²ன ‘‘வதே³தா²ய்யே, யேனத்தோ²’’தி வுத்தாய விஞ்ஞாபேதப்³ப³ம். ததோ சே உத்தரீதி ததுத்தரி விஞ்ஞாபேந்தியா து³க்கடம், படிலத்³த⁴ம் நிஸ்ஸக்³கி³யம் ஹோதி.

ஸாவத்தி²யம் து²ல்லனந்த³ம் ஆரப்³ப⁴ ராஜானம் கம்ப³லம் விஞ்ஞாபனவத்து²ஸ்மிம் பஞ்ஞத்தம், திகபாசித்தியம், ஊனகசதுக்கம்ஸே த்³விகது³க்கடம். தஸ்மிம் பன ஊனகஸஞ்ஞாய, சதுக்கம்ஸபரமம் சேதாபேந்தியா, ஞாதகப்பவாரிதே வா, அஞ்ஞஸ்ஸ வா அத்தா²ய, அத்தனோ வா த⁴னேன, மஹக்³க⁴ம் சேதாபேந்தம் அப்பக்³க⁴ம் சேதாபேந்தியா, உம்மத்திகாதீ³னஞ்ச அனாபத்தி. க³ருபாவுரணதா, அதிரேகசதுக்கம்ஸதா, அனனுஞ்ஞாதட்டா²னே விஞ்ஞத்தி, படிலாபோ⁴தி இமானேத்த² சத்தாரி அங்கா³னி. ஸமுட்டா²னாதீ³னி ஸஞ்சரித்தஸதி³ஸானீதி.

க³ருபாவுரணஸிக்கா²பத³வண்ணனா நிட்டி²தா.

12. லஹுபாவுரணஸிக்கா²பத³வண்ணனா

து³தியே லஹுபாவுரணந்தி உண்ஹகாலே பாவுரணம். அட்³ட⁴தேய்யகம்ஸபரமந்தி த³ஸகஹாபணக்³க⁴னகம், ஸேஸம் பட²மஸதி³ஸமேவாதி.

லஹுபாவுரணஸிக்கா²பத³வண்ணனா நிட்டி²தா.

இதோ பரானி இமஸ்மிம் வக்³கே³ அட்ட², ததியவக்³கே³ த³ஸாதி இமானி அட்டா²ரஸ ஸிக்கா²பதா³னி பி⁴க்கு²பாதிமோக்க²வண்ணனாயம் வுத்தனயேனேவ வேதி³தப்³பா³னீதி.

ஜாதரூபவக்³கோ³ ததியோ.

உத்³தி³ட்டா² கோ² அய்யாயோ திம்ஸ நிஸ்ஸக்³கி³யா பாசித்தியா த⁴ம்மாதி பி⁴க்கூ² ஆரப்³ப⁴ பஞ்ஞத்தா ஸாதா⁴ரணா அட்டா²ரஸ, அஸாதா⁴ரணா த்³வாத³ஸாதி ஏவம் திம்ஸ. ஸேஸம் ஸப்³ப³த்த² உத்தானமேவாதி.

கங்கா²விதரணியா பாதிமோக்க²வண்ணனாய பி⁴க்கு²னிபாதிமோக்கே²

நிஸ்ஸக்³கி³யபாசித்தியவண்ணனா நிட்டி²தா.