8. அட்ட²வத்து²காஸிக்கா²பத³வண்ணனா

சதுத்தே² அவஸ்ஸுதாதி லோகஸ்ஸாத³மித்தஸந்த²வவஸேன காயஸம்ஸக்³க³ராகே³ன திந்தா. அயமேவ ஹி அத்தோ² ஸீஹளமாதிகாட்ட²கதா²யம் வுத்தோ, ஸமந்தபாஸாதி³காயம் (பாசி. அட்ட². 675) பனஸ்ஸ விசாரணா கதா, து³தியபதே³பி ஏஸேவ நயோ. புரிஸபுக்³க³லஸ்ஸ ஹத்த²க்³க³ஹணம் வாதிஆதீ³ஸு பன யம் புரிஸபுக்³க³லேன ஹத்தே² க³ஹணம் கதம், தம் ‘‘புரிஸபுக்³க³லஸ்ஸ ஹத்த²க்³க³ஹண’’ந்தி வுத்தம், ஏஸேவ நயோ ஸங்கா⁴டிகண்ணக்³க³ஹணேபி. ஹத்த²க்³க³ஹணந்தி ஏத்த² ச யஸ்ஸ கஸ்ஸசி அபாராஜிகக்கே²த்தபூ⁴தஸ்ஸ அங்க³ஸ்ஸ க³ஹணம் ஹத்த²க்³க³ஹணம், யஸ்ஸ கஸ்ஸசி நிவத்த²ஸ்ஸ வா பாருதஸ்ஸ வா க³ஹணம் ஸங்கா⁴டிகண்ணக்³க³ஹணம். ஸந்திட்டே²ய்ய வாதிஆதீ³ஸு காயஸம்ஸக்³க³ஸங்கா²தஸ்ஸ அஸத்³த⁴ம்மஸ்ஸ படிஸேவனத்தா²ய புரிஸஸ்ஸ ஹத்த²பாஸே ஸந்திட்டே²ய்ய வா, தத்த² டி²தா ஸல்லபேய்ய வா, புரிஸேன வா ‘‘இத்த²ன்னாமம் டா²னம் ஆக³ச்சா²’’தி வுத்தா தம் ஸங்கேதம் க³ச்சே²ய்ய, தஸ்ஸ வா புரிஸஸ்ஸ அப்³பா⁴க³மனம் ஸாதி³யேய்ய, யேன கேனசி வா படிச்ச²ன்னம் ஓகாஸம் பவிஸேய்ய, புரிஸஸ்ஸ ஹத்த²பாஸே ட²த்வா காயம் உபஸம்ஹரேய்யாதி ஏவமத்தோ² த³ட்ட²ப்³போ³. அயம்பி பாராஜிகாதி யதா² புரிமாயோ, ஏவம் அயம்பி பி⁴க்கு²னீ ஏதஸ்ஸ காயஸம்ஸக்³க³ஸங்கா²தஸ்ஸ அஸத்³த⁴ம்மஸ்ஸ படிஸேவனத்தா²ய ஏதானி அட்ட² வத்தூ²னி படிபாடியா வா உப்படிபாடியா வா பூரேத்வா அட்ட²வத்து²கா நாம பாராஜிகா ஹோதீதி.

ஸாவத்தி²யம் ச²ப்³ப³க்³கி³யா பி⁴க்கு²னியோ ஆரப்³ப⁴ அட்ட²மம் வத்து²ம் பரிபூரணவத்து²ஸ்மிம் பஞ்ஞத்தம், ஸங்கேதக³மனே பதே³ பதே³ து³க்கடம், புரிஸஸ்ஸ ஹத்த²பாஸம் ஓக்கந்தமத்தே து²ல்லச்சயம், புரிஸஸ்ஸ அப்³பா⁴க³மனஸாத³யமானேபி து³க்கடம். ஹத்த²பாஸோக்கமனே து²ல்லச்சயம், ஸேஸேஸு ஏகேகஸ்மிம் து²ல்லச்சயமேவ, அட்ட²மே பரிபுண்ணே பாராஜிகம். ஏகேகஸ்மிம் பன வத்து²ஸ்மிம் ஸதக்க²த்தும்பி வீதிக்கந்தே தா ஆபத்தியோ தே³ஸேத்வா முச்சதி, அபிசேத்த² க³ணனூபிகா ஆபத்தி வேதி³தப்³பா³, ‘‘இதா³னி நாபஜ்ஜிஸ்ஸாமீ’’தி ஹி து⁴ரனிக்கே²பம் கத்வா தே³ஸிதா க³ணனூபிகா, தே³ஸிதக³ணனம் உபேதி, பாராஜிகஸ்ஸ அங்க³ம் ந ஹோதி. தஸ்மா யா ஏகம் ஆபன்னா து⁴ரனிக்கே²பம் கத்வா தே³ஸேத்வா புன கிலேஸவஸேன ஆபஜ்ஜதி, புனபி தே³ஸேதி, ஏவம் அட்ட²மம் பரிபூரேந்தீபி பாராஜிகா ந ஹோதி. யா பன ஆபஜ்ஜித்வா ‘‘புனபி அஞ்ஞம் வத்து²ம் ஆபஜ்ஜிஸ்ஸாமீ’’தி ஸஉஸ்ஸாஹாவ தே³ஸேதி, தஸ்ஸா ஸா ஆபத்தி அக³ணனூபிகா, தே³ஸிதாபி அதே³ஸிதா ஹோதி, பாராஜிகஸ்ஸ அங்க³ம் ஹோதி. அஸஞ்சிச்ச, அஸ்ஸதியா, அஜானந்தியா அஸாதி³யந்தியா, உம்மத்திகாதீ³னஞ்ச அனாபத்தி. காயஸம்ஸக்³க³ராகோ³, ஸஉஸ்ஸாஹதா, அட்ட²மஸ்ஸ வத்து²ஸ்ஸ பூரணந்தி இமானேத்த² தீணி அங்கா³னி. ஸமனுபா⁴ஸனஸமுட்டா²னம், கிரியாகிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், த்³விவேத³னந்தி.

அட்ட²வத்து²காஸிக்கா²பத³வண்ணனா நிட்டி²தா.

உத்³தி³ட்டா² கோ² அய்யாயோ அட்ட² பாராஜிகா த⁴ம்மாதி பி⁴க்கூ² ஆரப்³ப⁴ பஞ்ஞத்தா ஸாதா⁴ரணா சத்தாரோ, இமே சத்தாரோதி ஏவம் பாதிமோக்கு²த்³தே³ஸமக்³கே³ன அட்ட² பாராஜிகா த⁴ம்மா உத்³தி³ட்டா²தி ஏவமேத்த² அத்தோ² வேதி³தப்³போ³, ஸேஸம் பி⁴க்கு²பாதிமோக்க²வண்ணனாயம் வுத்தனயமேவாதி.

கங்கா²விதரணியா பாதிமோக்க²வண்ணனாய

பி⁴க்கு²னிபாதிமோக்கே²

பாராஜிகவண்ணனா நிட்டி²தா.