ஸாதா⁴ரணபாராஜிகம்

1…பே…4. மேது²னத⁴ம்மஸிக்கா²பத³வண்ணனா

தத்த² ஸுணாது மேதிஆதீ³னம் பி⁴க்கு²பாதிமோக்க²வண்ணனாயம் வுத்தனயேனேவ அத்தோ² வேதி³தப்³போ³. கேவலஞ்ஹி, ப⁴ந்தே, அய்யேதிஆதி³வஸேன தஸ்மிஞ்ச இத⁴ ச அபி⁴லாபமத்தமேவ லிங்க³பே⁴த³மத்தஞ்ச விஸேஸோ. யஸ்மா ச பி⁴க்கு²னியா ஸிக்கா²பச்சக்கா²னம் நாம நத்தி², தஸ்மா பி⁴க்கு²னீனம் ‘‘ஸிக்கா²ஸாஜீவஸமாபன்னா ஸிக்க²ம் அபச்சக்கா²ய து³ப்³ப³ல்யம் அனாவிகத்வா’’தி அவத்வா யா பன பி⁴க்கு²னீ ச²ந்த³ஸோ மேது²னம் த⁴ம்மம் படிஸேவேய்யாதி வுத்தம். தத்த² ச²ந்த³ஸோதி மேது²னராக³ப்படிஸம்யுத்தேன ச²ந்தே³ன சேவ ருசியா ச. ச²ந்தே³ பன அஸதி ப³லக்காரேன பத⁴ம்ஸிதாய அனாபத்தி, தஸ்மா யா பரிபுண்ணூபஸம்பதா³ பி⁴க்கு²னீ மனுஸ்ஸாமனுஸ்ஸதிரச்சா²னஜாதீஸு புரிஸஉப⁴தோப்³யஞ்ஜனகபண்ட³கானம் யஸ்ஸ கஸ்ஸசி ஸஜீவஸ்ஸ வா நிஜ்ஜீவஸ்ஸ வா ஸந்த²தஸ்ஸ வா அஸந்த²தஸ்ஸ வா அக்கா²யிதஸ்ஸ வா யேபு⁴ய்யேன அக்கா²யிதஸ்ஸ வா அங்க³ஜாதஸ்ஸ அத்தனோ வச்சமக்³க³பஸ்ஸாவமக்³க³முகே²ஸு தீஸு யத்த²கத்த²சி ஸந்த²தே வா அஸந்த²தே வா பகதிவாதேன அஸம்பு²ட்டே² அல்லோகாஸே அந்தமஸோ திலப²லமத்தம்பி பதே³ஸம் ச²ந்த³ஸோ பவேஸேதி, பரேன வா பவேஸியமானா பவேஸனபவிட்ட²ட்டி²தஉத்³த⁴ரணேஸு யம்கிஞ்சி ஸாதி³யதி, அயம் பாராஜிகா ஹோதி. ஸேஸமேத்த² இதோ பரேஸு ச ஸாதா⁴ரணஸிக்கா²பதே³ஸு வுத்தனயானுஸாரேனேவ வேதி³தப்³ப³ம்.