பாடிதே³ஸனீயகண்டோ³

1. பட²மபாடிதே³ஸனீயஸிக்கா²பத³வண்ணனா

பாடிதே³ஸனீயேஸு பட²மே அந்தரக⁴ரம் பவிட்டா²யாதி வசனதோ ஸசே தஸ்ஸா அந்தராராமாதீ³ஸு ட²த்வாபி த³த³மானாய ஹத்த²தோ ஸயம் ரதி²யாப்³யூஹஸிங்கா⁴டகக⁴ரானம் அஞ்ஞதரஸ்மிம் டி²தோபி க³ண்ஹாதி, தோ³ஸோ நத்தி². தஸ்ஸா பன ரதி²யாதீ³ஸு ட²த்வா த³த³மானாய, ரதி²யாதீ³ஸு வா, அந்தராராமாதீ³ஸு வா ட²த்வாபி யம்கிஞ்சி ஆமிஸம் அஜ்ஜோ²ஹரணத்தா²ய க³ண்ஹதோ படிக்³க³ஹணே து³க்கடம், அஜ்ஜோ²ஹாரே அஜ்ஜோ²ஹாரே பாடிதே³ஸனீயம். தஸ்ஸ தே³ஸேதப்³பா³காரோ கா³ரய்ஹம் ஆவுஸோதிஆதி³னா நயேன ஸிக்கா²பதே³ த³ஸ்ஸிதோயேவ.

ஸாவத்தி²யம் அஞ்ஞதரம் பி⁴க்கு²ம் ஆரப்³ப⁴ அஞ்ஞாதிகாய பி⁴க்கு²னியா அந்தரக⁴ரம் பவிட்டா²ய ஹத்த²தோ ஆமிஸம் படிக்³க³ஹணவத்து²ஸ்மிம் பஞ்ஞத்தம், அஸாதா⁴ரணபஞ்ஞத்தி, அனாணத்திகம், யதா² சேதம், ததா² ஸேஸானிபி, திகபாடிதே³ஸனீயம், யாமகாலிகாதீ³ஸு படிக்³க³ஹணேபி அஜ்ஜோ²ஹரணேபி து³க்கடம், ஏகதோஉபஸம்பன்னாய யாவகாலிகேபி ததே²வ, ஞாதிகாய அஞ்ஞாதிகஸஞ்ஞிவேமதிகானம்பி ஏஸேவ நயோ. ஞாதிகஸஞ்ஞினோ பன, ஞாதிகாய வா தா³பேந்தியா, உபனிக்கி²பித்வா வா த³த³மானாய, யா ச அந்தராராமபி⁴க்கு²னுபஸ்ஸயதித்தி²யஸேய்யபடிக்கமனேஸு ட²த்வா கா³மதோ ப³ஹி நீஹரித்வா, யாமகாலிகாதீ³னி வா ‘‘ஸதி பச்சயே பரிபு⁴ஞ்ஜா’’தி தே³தி, தஸ்ஸ, ஸிக்க²மானஸாமணேரீனஞ்ச ஹத்த²தோ க³ஹேத்வா பரிபு⁴ஞ்ஜந்தஸ்ஸ, உம்மத்தகாதீ³னஞ்ச அனாபத்தி. பரிபுண்ணூபஸம்பன்னதா, அஞ்ஞாதிகதா, அந்தரக⁴ரே டி²தாய ஹத்த²தோ ஸஹத்தா² படிக்³க³ஹணம், யாவகாலிகதா, அஜ்ஜோ²ஹரணந்தி இமானேத்த² பஞ்ச அங்கா³னி. ஸமுட்டா²னாதீ³னி ஏளகலோமஸதி³ஸானீதி.

பட²மபாடிதே³ஸனீயஸிக்கா²பத³வண்ணனா நிட்டி²தா.

2. து³தியபாடிதே³ஸனீயஸிக்கா²பத³வண்ணனா

து³தியே இத⁴ ஸூபந்திஆதி³ வோஸாஸனாகாரத³ஸ்ஸனம். அபஸக்க தாவ ப⁴கி³னீதிஆதி³ அபஸாதே³தப்³பா³காரத³ஸ்ஸனம். தத்ராயம் வினிச்ச²யோ – ஏகேனாபி பி⁴க்கு²னா அனபஸாதி³தே அஜ்ஜோ²ஹரணத்தா²ய ஆமிஸம் க³ண்ஹந்தானம் படிக்³க³ஹணே து³க்கடம், அஜ்ஜோ²ஹாரே அஜ்ஜோ²ஹாரே பாடிதே³ஸனீயந்தி.

ராஜக³ஹே ச²ப்³ப³க்³கி³யே ஆரப்³ப⁴ பி⁴க்கு²னியா வோஸாஸந்தியா நனிவாரணவத்து²ஸ்மிம் பஞ்ஞத்தம், திகபாடிதே³ஸனீயம், ஏகதோஉபஸம்பன்னாய வோஸாஸந்தியா நனிவாரேந்தஸ்ஸ து³க்கடம், ததா² அனுபஸம்பன்னாய உபஸம்பன்னஸஞ்ஞினோ வேமதிகஸ்ஸ ச. அனுபஸம்பன்னஸஞ்ஞினோ, பன யோ ச அத்தனோ வா ப⁴த்தம் தா³பேந்தியா, அஞ்ஞேஸம் வா ப⁴த்தம் தே³ந்தியா, யம் வா ந தி³ன்னம், தம் தா³பேந்தியா, யத்த² வா ந தி³ன்னம், தத்த², ஸப்³பே³ஸம் வா ஸமகம் தா³பேந்தியா, ஸிக்க²மானாய வா ஸாமணேரியா வா வோஸாஸந்தியா படிக்³க³ஹேத்வா பு⁴ஞ்ஜதி, தஸ்ஸ, பஞ்ச போ⁴ஜனானி ட²பேத்வா ஸப்³ப³த்த², உம்மத்தகாதீ³னஞ்ச அனாபத்தி. பரிபுண்ணூபஸம்பன்னதா, பஞ்சபோ⁴ஜனதா, அந்தரக⁴ரே அனுஞ்ஞாதபகாரதோ அஞ்ஞதா² வோஸாஸனா, அனிவாரணா, அஜ்ஜோ²ஹரணந்தி இமானேத்த² பஞ்ச அங்கா³னி. ஸமுட்டா²னாதீ³னி கதி²னஸதி³ஸானீதி.

து³தியபாடிதே³ஸனீயஸிக்கா²பத³வண்ணனா நிட்டி²தா.

3. ததியபாடிதே³ஸனீயஸிக்கா²பத³வண்ணனா

ததியே ஸேக்க²ஸம்மதானீதி லத்³த⁴ஸேக்க²ஸம்முதிகானி. புப்³பே³ அனிமந்திதோதி க⁴ரூபசாரோக்கமனதோ பட²மதரம் உபசாரம் அனோக்கமந்தேயேவ புப்³பே³ அனிமந்திதோ. அகி³லானோ நாம யோ ஸக்கோதி பிண்டா³ய சரிதும். பாடிதே³ஸனீயந்தி க⁴ரூபசாரம் ஓக்கமித்வா ஆமிஸம் க³ண்ஹந்தஸ்ஸ படிக்³க³ஹணே தாவ து³க்கடம், தம் க³ஹேத்வா யத்த²கத்த²சி பு⁴ஞ்ஜந்தஸ்ஸ அஜ்ஜோ²ஹாரே அஜ்ஜோ²ஹாரே பாடிதே³ஸனீயந்தி.

ஸாவத்தி²யம் ஸம்ப³ஹுலே பி⁴க்கூ² ஆரப்³ப⁴ ந மத்தம் ஜானித்வா படிக்³க³ஹணவத்து²ஸ்மிம் பஞ்ஞத்தம், ‘‘புப்³பே³ அனிமந்திதோ, அகி³லானோ’’தி இமா பனேத்த² த்³வே அனுபஞ்ஞத்தியோ, திகபாடிதே³ஸனீயம், யாமகாலிகாதீ³ஸு படிக்³க³ஹணேபி அஜ்ஜோ²ஹாரேபி து³க்கடம், ததா² அஸேக்க²ஸம்மதே ஸேக்க²ஸம்மதஸஞ்ஞினோ வேமதிகஸ்ஸ ச. அஸேக்க²ஸம்மதஸஞ்ஞினோ, பன யோ ச புப்³பே³ நிமந்திதோ வா கி³லானோ வா அஞ்ஞஸ்ஸ வா தேஸம் க⁴ரே பஞ்ஞத்தம் பி⁴க்க²ம் க³ண்ஹாதி, யஸ்ஸ ச க⁴ரதோ நீஹரித்வா, ஆஸனஸாலாதீ³ஸு வா பி⁴க்கு²ம் அதி³ஸ்வா பட²மம்யேவ நீஹரித்வா, த்³வாரமூலே வா ட²பிதம் தே³ந்தி, தஸ்ஸ தம் பு⁴ஞ்ஜந்தஸ்ஸ, நிச்சப⁴த்தகே, ஸலாகப⁴த்தே, பக்கி²கே, உபோஸதி²கே, பாடிபதி³கே, யாமகாலிகாதி³ம் ‘‘ஸதி பச்சயே பரிபு⁴ஞ்ஜா’’தி தி³ன்னம் பரிபு⁴ஞ்ஜந்தஸ்ஸ, உம்மத்தகாதீ³னஞ்ச அனாபத்தி. ஸேக்க²ஸம்மததா, புப்³பே³ அனிமந்திததா, அகி³லானதா, க⁴ரூபசாரோக்கமனம், ட²பேத்வா நிச்சப⁴த்தகாதீ³னி அஞ்ஞம் ஆமிஸம் க³ஹேத்வா பு⁴ஞ்ஜனந்தி இமானேத்த² பஞ்ச அங்கா³னி. ஸமுட்டா²னாதீ³னி ஏளகலோமஸதி³ஸானீதி.

ததியபாடிதே³ஸனீயஸிக்கா²பத³வண்ணனா நிட்டி²தா.

4. சதுத்த²பாடிதே³ஸனீயஸிக்கா²பத³வண்ணனா

சதுத்தே² யானி கோ² பன தானி ஆரஞ்ஞகானீதிஆதி³ சீவரவிப்பவாஸஸிக்கா²பதே³ வுத்தனயேனேவ வேதி³தப்³ப³ம். புப்³பே³ அப்படிஸம்விதி³தந்தி ஏத்த² யம் இத்தி²யா வா புரிஸேன வா க³ஹட்டே²ன வா பப்³ப³ஜிதேன வா ஆராமம் வா ஆராமூபசாரம் வா பவிஸித்வா ‘‘இத்த²ன்னாமஸ்ஸ, ப⁴ந்தே, குலஸ்ஸ கா²த³னீயம் வா போ⁴ஜனீயம் வா ஆஹரியிஸ்ஸதீ’’தி (பாசி. 573) ஆரோசிதம், தம் பச்சா² யதா²ஆரோசிதமேவ வா ஆஹரியது, தஸ்ஸ பரிவாரம் கத்வா அஞ்ஞம் வா தேன ஸத்³தி⁴ம் ப³ஹுகம்பி, ‘‘இத்த²ன்னாமம் குலம் படிஸம்விதி³தம் கத்வா கா²த³னீயம் வா போ⁴ஜனீயம் வா க³ஹேத்வா க³ச்ச²தீ’’தி ஸுத்வா அஞ்ஞானி வா குலானி தேஹி ஸத்³தி⁴ம் ஆஹரந்து, தம் ஸப்³ப³ம் படிஸம்விதி³தம் நாம. யம் பன ஏவம் அனாரோசிதம் அனாஹடஞ்ச, தம் அப்படிஸம்விதி³தம் நாம. அகி³லானோ நாம யோ ஸக்கோதி பிண்டா³ய க³ந்தும். பாடிதே³ஸனீயந்தி ஏவரூபம் அந்தமஸோ ஆராமமஜ்ஜே²ன க³ச்ச²ந்தேஹி அத்³தி⁴கேஹி தி³ன்னம்பி ஆராமே வா ஆராமூபசாரே வா படிக்³க³ஹேத்வா அஜ்ஜோ²ஹரந்தஸ்ஸ படிக்³க³ஹணே து³க்கடம், அஜ்ஜோ²ஹாரே அஜ்ஜோ²ஹாரே பாடிதே³ஸனீயந்தி.

ஸக்கேஸு ஸம்ப³ஹுலே பி⁴க்கூ² ஆரப்³ப⁴ ஆராமே சோரே படிவஸந்தே அனாரோசனவத்து²ஸ்மிம் பஞ்ஞத்தம், ‘‘அகி³லானோ’’தி அயமேத்த² ஏகா அனுபஞ்ஞத்தி, திகபாடிதே³ஸனீயம், யாமகாலிகாதீ³ஸு ஆஹாரத்தா²ய படிக்³க³ஹணேபி அஜ்ஜோ²ஹாரேபி து³க்கடமேவ, ததா² படிஸம்விதி³தே அப்படிஸம்விதி³தஸஞ்ஞினோ வேமதிகஸ்ஸ ச, படிஸம்விதி³தஸஞ்ஞினோ, பன கி³லானஸ்ஸ, யோ ச படிஸம்விதி³தம் கத்வா ஆஹடம் வா கி³லானாவஸேஸகம் வா ப³ஹாராமே வா படிக்³க³ஹிதம், தத்த²ஜாதகமேவ வா மூலப²லாதி³ம், யாமகாலிகாதீ³ஸு வா யம்கிஞ்சி ‘‘ஸதி பச்சயே பரிபு⁴ஞ்ஜா’’தி லத்³த⁴ம் பரிபு⁴ஞ்ஜந்தஸ்ஸ, உம்மத்தகாதீ³னஞ்ச அனாபத்தி. யதா²வுத்தஆரஞ்ஞகஸேனாஸனதா, யாவகாலிகஸ்ஸ அதத்த²ஜாதகதா, அகி³லானதா, அகி³லானாவஸேஸகதா, அப்படிஸம்விதி³ததா, அஜ்ஜா²ராமே படிக்³க³ஹணம், அஜ்ஜோ²ஹரணந்தி இமானேத்த² ஸத்த அங்கா³னி. ஸமுட்டா²னாதீ³னி கதி²னஸதி³ஸானேவ, இத³ம் பன கிரியாகிரியந்தி.

சதுத்த²பாடிதே³ஸனீயஸிக்கா²பத³வண்ணனா நிட்டி²தா.

கங்கா²விதரணியா பாதிமோக்க²வண்ணனாய

பாடிதே³ஸனீயவண்ணனா நிட்டி²தா.