ஸேகி²யகண்டோ³

1. பரிமண்ட³லஸிக்கா²பத³வண்ணனா

ஸேகி²யேஸு பட²மே பரிமண்ட³லந்தி ஸமந்ததோ மண்ட³லம். ஸிக்கா² கரணீயாதி ‘‘ஏவம் நிவாஸேஸ்ஸாமீ’’தி ஆராமேபி அந்தரக⁴ரேபி ஸப்³ப³த்த² ஸிக்கா² காதப்³பா³, ஏத்த² ச யஸ்மா வத்தக்க²ந்த⁴கே வுத்தவத்தானிபி ஸிக்கி²தப்³ப³த்தா ஸேகி²யானேவ ஹோந்தி, தஸ்மா பாராஜிகாதீ³ஸு விய பரிச்சே²தோ³ ந கதோ. சாரித்தவினயத³ஸ்ஸனத்த²ஞ்ச ‘‘யோ பன பி⁴க்கு² ஓலம்பே³ந்தோ நிவாஸேய்ய, து³க்கட’’ந்தி ஏவம் ஆபத்தினாமேன அவத்வா ‘‘ஸிக்கா² கரணீயா’’தி ஏவம் ஸப்³ப³ஸிக்கா²பதே³ஸு பாளி ஆரோபிதா, பத³பா⁴ஜனே (பாசி. 576) பன ‘‘ஆபத்தி து³க்கடஸ்ஸா’’தி வுத்தத்தா ஸப்³ப³த்த² அனாத³ரியகரணே து³க்கடம் வேதி³தப்³ப³ம்.

இதா³னி பரிமண்ட³லந்தி ஏத்த² நாபி⁴மண்ட³லம் படிச்சா²தே³த்வா ஜாணுமண்ட³லஸ்ஸ ஹேட்டா² ஜங்க⁴ட்டி²கதோ பட்டா²ய அட்ட²ங்கு³லமத்தம் நிவாஸனம் ஓதாரேத்வா நிவாஸேந்தேன பரிமண்ட³லம் நிவத்த²ம் நாம ஹோதி, ஏவம் அனிவாஸேத்வா அனாத³ரியேன புரதோ வா பச்ச²தோ வா ஓலம்பே³த்வா நிவாஸேந்தஸ்ஸ து³க்கடம். ந கேவலஞ்ச தஸ்ஸேவ, யே சஞ்ஞே ‘‘தேன கோ² பன ஸமயேன ச²ப்³ப³க்³கி³யா கி³ஹினிவத்த²ம் நிவாஸேந்தி, ஹத்தி²ஸோண்ட³கம் மச்ச²வாலகம் சதுக்கண்ணகம் தாலவண்டகம் ஸதவலிகம் நிவாஸேந்தி, ஸம்வல்லியம் நிவாஸேந்தீ’’தி க²ந்த⁴கே (சூளவ. 280) நிவாஸனதோ³ஸா வுத்தா, ததா² நிவாஸேந்தஸ்ஸபி து³க்கடமேவ.

தத்த² ஹத்தி²ஸோண்ட³கம் நாம நாபி⁴மூலதோ ஹத்தி²ஸோண்ட³ஸண்டா²னம் ஓலம்ப³கம் கத்வா நிவத்த²ம் சோளிகஇத்தீ²னம் நிவாஸனம் விய. மச்ச²வாலகம் நாம ஏகதோத³ஸந்தம் ஏகதோ பாஸந்தம் ஓலம்பே³த்வா நிவத்த²ம். சதுக்கண்ணகம் நாம உபரி த்³வே, ஹேட்ட²தோ த்³வேதி ஏவம் சத்தாரோ கண்ணே த³ஸ்ஸேத்வா நிவத்த²ம். தாலவண்டகம் நாம தாலவண்டாகாரேன ஸாடகம் ஓலம்பே³த்வா நிவத்த²ம். ஸதவலிகம் நாம தீ³க⁴ஸாடகம் அனேகக்க²த்தும் ஓபு⁴ஜித்வா ஓவட்டிகம் கரோந்தேன நிவத்த²ம், வாமத³க்கி²ணபஸ்ஸேஸு வா நிரந்தரம் வலியோ த³ஸ்ஸேத்வா நிவத்த²ம். ஸசே பன ஜாணுதோ பட்டா²ய ஏகா வா த்³வே வா வலியோ பஞ்ஞாயந்தி, வட்டதி. ஸம்வல்லியந்தி மல்லகம்மகாராதீ³ஹி விய கச்ச²ம் ப³ந்தி⁴த்வா நிவத்த²ம். ஏவம் நிவாஸேதும் கி³லானஸ்ஸாபி மக்³க³ப்படிபன்னஸ்ஸாபி ந வட்டதி. யம்பி மக்³க³ம் க³ச்ச²ந்தா ஏகம் வா த்³வே வா கண்ணே உக்கி²பித்வா அந்தரவாஸகஸ்ஸ உபரி லக்³க³ந்தி, அந்தோ வா ஏகம் காஸாவம் ததா² நிவாஸேத்வா ப³ஹி அபரம் நிவாஸேந்தி, ஸப்³ப³ம் ந வட்டதி.

கி³லானோ பன அந்தோகாஸாவஸ்ஸ ஓவட்டிகம் த³ஸ்ஸேத்வா அபரம் உபரி நிவாஸேதும் லப⁴தி, அகி³லானேன த்³வே நிவாஸேந்தேன ஸகு³ணம் கத்வா நிவாஸேதப்³பா³னி. இதி இமம் க²ந்த⁴கே படிக்கி²த்தஞ்ச ஓலம்ப³கஞ்ச ஸப்³ப³ம் விவஜ்ஜேத்வா வுத்தலக்க²ணஸம்பன்னம் நிப்³பி³காரம் பரிமண்ட³லம் நிவாஸேதப்³ப³ம், ததா² அனிவாஸேத்வா யம்கிஞ்சி விகாரம் கரோந்தஸ்ஸ து³க்கடம்.

‘‘நிதா³னம் புக்³க³லம் வத்து²’’ந்திஆதி³கே (கங்கா². அட்ட². பட²மபாராஜிகவண்ணனா ) பன வினிச்ச²யே ஸுருஸுருகாரகம் கோஸம்பி³யம் பஞ்ஞத்தம், ஸாமிஸேன ஹத்தே²ன பானீயதா²லகஸஸித்த²கபத்ததோ⁴வனபடிஸம்யுத்தத்³வயம் ப⁴க்³கே³ஸு ஸம்ப³ஹுலே பி⁴க்கூ² ஆரப்³ப⁴, ஸேஸானி ஸப்³பா³னேவ ஸாவத்தி²யம் ச²ப்³ப³க்³கி³யே ஆரப்³ப⁴ ஓலம்பே³த்வா நிவாஸனாதி³வத்து²ஸ்மிம் பஞ்ஞத்தானி. ஸூபோத³னவிஞ்ஞத்தியம் த⁴ம்மதே³ஸனாதீ³ஸு ச கி³லானவஸேன ஏகா அனுபஞ்ஞத்தி, ஸப்³பா³னி ஸாதா⁴ரணபஞ்ஞத்தியோ, அனாணத்திகானி, ஸப்³பே³ஸு து³க்கடமேவ, அஞ்ஞோ ஆபத்திபே⁴தோ³ நத்தி², விபத்திவிசாரணா வுத்தாயேவ, ஸமுட்டா²னாதீ³னி ஸப்³பே³ஸம் அவஸானே த³ஸ்ஸயிஸ்ஸாம. அனாபத்திமத்தம் பன அங்க³ஞ்ச ஸப்³ப³த்த² வத்தப்³ப³ம், தயித³ம் வுச்சதி. இமஸ்மிம் தாவ ஸிக்கா²பதே³ அஸஞ்சிச்ச, அஸ்ஸதியா, அஜானந்தஸ்ஸ, கி³லானஸ்ஸ, ஆபதா³ஸு, உம்மத்தகாதீ³னஞ்ச அனாபத்தி.

தத்த² அஸஞ்சிச்சாதி ‘‘அபரிமண்ட³லம் நிவாஸேஸ்ஸாமீ’’தி ஏவம் அஸஞ்சிச்ச, அத² கோ² ‘‘பரிமண்ட³லம்யேவ நிவாஸேஸ்ஸாமீ’’தி விரஜ்ஜி²த்வா அபரிமண்ட³லம் நிவாஸேந்தஸ்ஸ அனாபத்தி. அஸ்ஸதியாதி அஞ்ஞாவிஹிதஸ்ஸாபி ததா² நிவாஸேந்தஸ்ஸ அனாபத்தி. அஜானந்தஸ்ஸாதி பரிமண்ட³லம் நிவாஸேதும் அஜானந்தஸ்ஸ அனாபத்தி, அபிச நிவாஸனவத்தம் உக்³க³ஹேதப்³ப³ம். யோ பன ஸுக்க²ஜங்கோ⁴ வா ஹோதி மஹாபிண்டி³கமம்ஸோ வா, தஸ்ஸ ஸாருப்பத்தா²ய அட்ட²ங்கு³லாதி⁴கம்பி ஓதாரேத்வா நிவாஸேதும் வட்டதி. கி³லானஸ்ஸாதி யஸ்ஸ ஜங்கா⁴ய வா பாதே³ வா வணோ ஹோதி, தஸ்ஸ உக்கி²பித்வா வா ஓதாரேத்வா வா நிவாஸேதும் வட்டதி. ஆபதா³ஸூதி வாளா வா சோரா வா அனுப³ந்த⁴ந்தி, ஏவரூபாஸு ஆபதா³ஸு அனாபத்தி. உம்மத்தகாத³யோ வுத்தனயா ஏவ. அனாத³ரியம், அனாபத்திகாரணாபா⁴வோ, அபரிமண்ட³லனிவாஸனந்தி இமானேத்த² தீணி அங்கா³னி. யதா² சேத்த², ஏவம் ஸப்³ப³த்த² புரிமானி த்³வே தத்த² தத்த² வுத்தப்படிபக்க²கரணஞ்சாதி தீணியேவ ஹோந்தி, தஸ்மா இதோ பரம் தானிபி அவத்வா அனாபத்திமத்தமேவ வக்கா²மாதி.

2. து³தியபரிமண்ட³லஸிக்கா²பத³வண்ணனா

து³தியே ‘‘ந, பி⁴க்க²வே, கி³ஹிபாருதம் பாருபிதப்³ப³’’ந்தி (சூளவ. 280) ஏவம் படிக்கி²த்தம் கி³ஹிபாருதம் அபாருபித்வா உபோ⁴ கண்ணே ஸமம் கத்வா பாருபனம் பரிமண்ட³லபாருபனம் நாம, தத்த² யம்கிஞ்சி ஸேதபடபாருதம் பரிப்³பா³ஜகபாருதம் ஏகஸாடகபாருதம் ஸுராஸோண்ட³பாருதம் அந்தேபுரிகபாருதம் மஹாஜேட்ட²பாருதம் குடிப்பவேஸகபாருதம் ப்³ராஹ்மணபாருதம் பாளிகாரகபாருதந்தி ஏவமாதி³ பரிமண்ட³லலக்க²ணதோ அஞ்ஞதா² பாருதம், ஸப்³ப³மேதம் கி³ஹிபாருதம் நாம. தஸ்மா யதா² ஸேதபடா அட்³ட⁴பாலகனிக³ண்டா² பாருபந்தி, யதா² ச ஏகச்சே பரிப்³பா³ஜகா உரம் விவரித்வா த்³வீஸு அம்ஸகூடேஸு பாவுரணம் ட²பேந்தி, யதா² ச ஏகஸாடகா மனுஸ்ஸா நிவத்த²ஸாடகஸ்ஸ ஏகேன அந்தேன பிட்டி²ம் பாருபித்வா உபோ⁴ கண்ணே உபோ⁴ஸு அம்ஸகூடேஸு ட²பேந்தி, யதா² ச ஸுராஸோண்டா³த³யோ ஸாடகேன கீ³வம் பரிக்கி²பித்வா உபோ⁴ அந்தே உரே வா ஓலம்பே³ந்தி, பிட்டி²யம் வா கி²பந்தி, யதா² ச அந்தேபுரிகாயோ அக்கி²தாரகமத்தம் த³ஸ்ஸேத்வா ஓகு³ண்டி²தம் பாருபந்தி, யதா² ச மஹாஜேட்டா² தீ³க⁴ஸாடகம் நிவாஸேத்வா தஸ்ஸேவ ஏகேனந்தேன ஸகலஸரீரம் பாருபந்தி, யதா² ச கஸ்ஸகா கே²த்தகுடிம் பவிஸந்தா ஸாடகம் பலிவேடே²த்வா உபகச்ச²கே பக்கி²பித்வா தஸ்ஸேவ ஏகேனந்தேன ஸரீரம் பாருபந்தி, யதா² ச ப்³ராஹ்மணா உபி⁴ன்னம் உபகச்ச²கானம் அந்தரே ஸாடகம் பவேஸேத்வா அம்ஸகூடேஸு பக்கி²பந்தி, யதா² ச பாளிகாரகோ பி⁴க்கு² ஏகம்ஸபாருபனேன பாருதம் வாமபா³ஹும் விவரித்வா சீவரம் அம்ஸகூடே ஆரோபேதி, ஏவம் அபாருபித்வா ஸப்³பே³பி ஏதே, அஞ்ஞே ச ஏவரூபே பாருபனதோ³ஸே வஜ்ஜேத்வா நிப்³பி³காரம் பரிமண்ட³லம் பாருபிதப்³ப³ம். ததா² அபாருபித்வா ஆராமே வா அந்தரக⁴ரே வா அனாத³ரேன யம்கிஞ்சி விகாரம் கரோந்தஸ்ஸ து³க்கடம், அனாபத்தி புரிமஸதி³ஸாயேவ, யதா² சேத்த², ஏவம் ஸப்³ப³த்த². யத்த² பன விஸேஸோ ப⁴விஸ்ஸதி, தத்த² வக்கா²மாதி.

3-4. ஸுப்படிச்ச²ன்னஸிக்கா²பத³வண்ணனா

ததியே ஸுப்படிச்ச²ன்னோதி ஸுட்டு² படிச்ச²ன்னோ, க³ண்டி²கம் படிமுஞ்சித்வா அனுவாதந்தேன கீ³வம் படிச்சா²தே³த்வா உபோ⁴ கண்ணே ஸமம் கத்வா படிஸங்க⁴ரித்வா யாவ மணிப³ந்த⁴ம் படிச்சா²தே³த்வா அந்தரக⁴ரே க³மிஸ்ஸாமீதி அத்தோ², ததா² அகத்வா பன ஜாணும் வா உரம் வா விவரித்வா க³ச்ச²ந்தஸ்ஸ து³க்கடம்.

சதுத்தே² க³லவாடகதோ பட்டா²ய ஸீஸம், மணிப³ந்த⁴தோ பட்டா²ய ஹத்தே², பிண்டி³கமம்ஸதோ பட்டா²ய பாதே³ விவரித்வா ஸேஸம் சா²தே³த்வா நிஸின்னோ ஸுப்படிச்ச²ன்னோ நாம ஹோதி, ஏத்த² பன வாஸூபக³தஸ்ஸ அனாபத்தி.

5-6. ஸுஸம்வுதஸிக்கா²பத³வண்ணனா

பஞ்சமே ஸுஸம்வுதோதி ஹத்த²ம் வா பாத³ம் வா அகீளாபேந்தோ ஸுவினீதோதி அத்தோ². ச²ட்டே²பி ஏஸேவ நயோ.

7-8. ஓக்கி²த்தசக்கு²ஸிக்கா²பத³வண்ணனா

ஸத்தமே ஓக்கி²த்தசக்கூ²தி ஹேட்டா² கி²த்தசக்கு² ஹுத்வா புரதோ யுக³மத்தம் பூ⁴மிபா⁴க³ம் பேக்க²மானோ, ஏகஸ்மிம் பன டா²னே ட²த்வா ஹத்தி²அஸ்ஸாதி³பரிஸ்ஸயாபா⁴வம் ஓலோகேதும் வட்டதி. அட்ட²மேபி ஏஸேவ நயோ.

9-10. உக்கி²த்தகஸிக்கா²பத³வண்ணனா

நவமே உக்கி²த்தகாயாதி உக்கே²பேன, இத்த²ம்பூ⁴தலக்க²ணே கரணவசனம், ஏகதோ வா உப⁴தோ வா உக்கி²த்தசீவரோ ஹுத்வாதி அத்தோ², அந்தோ இந்த³கீ²லதோ பட்டா²ய ஏவம் ந க³ந்தப்³ப³ம்.

த³ஸமே நிஸின்னகாலே த⁴மகரணம் நீஹரந்தேனாபி சீவரம் அனுக்கி²பித்வாவ நீஹரிதப்³ப³ம், வாஸூபக³தஸ்ஸ பன அனாபத்தி.

11-12. உஜ்ஜக்³கி⁴கஸிக்கா²பத³வண்ணனா

ஏகாத³ஸமே உஜ்ஜக்³கி⁴காயாதி மஹாஹஸிதம் ஹஸந்தோதி அத்தோ². இதா⁴பி ஹி இத்த²ம்பூ⁴தலக்க²ணேயேவ கரணவசனம்.

த்³வாத³ஸமேபி ஏஸேவ நயோ. உப⁴யத்த² ஹஸனீயஸ்மிம் வத்து²ஸ்மிம் மிஹிதமத்தம் கரோந்தஸ்ஸ அனாபத்தி.

13-14. உச்சஸத்³த³ஸிக்கா²பத³வண்ணனா

தேரஸமே அப்பஸத்³தோ³தி ந உச்சாஸத்³த³மஹாஸத்³தோ³ ஹுத்வா. சுத்³த³ஸமேபி ஏஸேவ நயோ. அயம் பனேத்த² அப்பஸத்³த³தாபரிச்சே²தோ³ – ஸசே த்³வாத³ஸஹத்தே² கே³ஹே ஆதி³ம்ஹி ஸங்க⁴த்தே²ரோ, மஜ்ஜே² து³தியத்தே²ரோ, அந்தே ததியத்தே²ரோதி ஏவம் நிஸின்னேஸு யம் ஸங்க⁴த்தே²ரோ து³தியத்தே²ரேன ஸத்³தி⁴ம் மந்தேதி, து³தியத்தே²ரோ ச தஸ்ஸ ஸத்³த³ம் ஸுணாதி, கத²ஞ்ச வவத்த²பேதி. ததியத்தே²ரோ பன ஸத்³த³மேவ ஸுணாதி, கத²ம் ந வவத்த²பேதி, ஏத்தாவதா அப்பஸத்³தோ³ ஹோதி. ஸசே பன ததியத்தே²ரோ கத²ஞ்ச வவத்த²பேதி, மஹாஸத்³தோ³ நாம ஹோதி.

15…பே…20. காயப்பசாலகாதி³ஸிக்கா²பத³வண்ணனா

இதோ பரேஸு ச²ஸு காயப்பசாலகந்தி காயம் சாலேத்வா சாலேத்வா, ஏஸ நயோ ஸப்³ப³த்த². தஸ்மா காயாதீ³னி பக்³க³ஹேத்வா நிச்சலானி உஜுகானி ட²பேத்வா க³ந்தப்³ப³ஞ்சேவ நிஸீதி³தப்³ப³ஞ்ச, நிஸீத³னப்படிஸம்யுத்தேஸு தீஸு வாஸூபக³தஸ்ஸ அனாபத்தி.

21-22. க²ம்ப⁴கதஸிக்கா²பத³வண்ணனா

ஏகவீஸத்³வாவீஸேஸு க²ம்ப⁴கதோதி கடியம் ஹத்த²ம் ட²பேத்வா கதக²ம்போ⁴.

23-24. ஓகு³ண்டி²தஸிக்கா²பத³வண்ணனா

தேவீஸசதுவீஸேஸு ஓகு³ண்டி²தோதி ஸஸீஸம் பாருதோ.

25. உக்குடிகஸிக்கா²பத³வண்ணனா

பஞ்சவீஸே உக்குடிகா வுச்சதி பண்ஹியோ உக்கி²பித்வா அக்³க³பாதே³ஹேவ, அக்³க³பாதே³ வா உக்கி²பித்வா பண்ஹீஹியேவ பூ⁴மியம் பு²ஸந்தஸ்ஸ க³மனம், கரணவசனம் பனேத்த² வுத்தலக்க²ணமேவ.

26. பல்லத்தி²கஸிக்கா²பத³வண்ணனா

ச²ப்³பீ³ஸே ந பல்லத்தி²காயாதி ஹத்த²பல்லத்தி²காய வா து³ஸ்ஸபல்லத்தி²காய வா ந நிஸீதி³தப்³ப³ம். அனாத³ரேன நிஸீத³ந்தஸ்ஸ து³க்கடம், வாஸூபக³தஸ்ஸ பன இதா⁴பி புரிமேஸு ச த்³வாவீஸசதுவீஸேஸு அனாபத்தி.

ச²ப்³பீ³ஸதிஸாருப்பஸிக்கா²பத³வண்ணனா நிட்டி²தா.

27. ஸக்கச்சபடிக்³க³ஹணஸிக்கா²பத³வண்ணனா

போ⁴ஜனப்படிஸம்யுத்தேஸு பட²மே ஸக்கச்சந்தி ஸதிம் உபட்டா²பேத்வா.

28. பத்தஸஞ்ஞீபடிக்³க³ஹணஸிக்கா²பத³வண்ணனா

து³தியே பத்தே ஸஞ்ஞா பத்தஸஞ்ஞா, ஸா அஸ்ஸ அத்தீ²தி பத்தஸஞ்ஞீ, அத்தனோ பா⁴ஜனே உபனிப³த்³த⁴ஸஞ்ஞீ ஹுத்வாதி அத்தோ².

29. ஸமஸூபகபடிக்³க³ஹணஸிக்கா²பத³வண்ணனா

ததியே ஸமஸூபகோ நாம யத்த² முக்³க³மாஸேஹி வா குலத்தா²தீ³ஹி வா கதோ ஹத்த²ஹாரியோ ஸூபோ ப⁴த்தஸ்ஸ சதுத்த²பா⁴க³ப்பமாணோ ஹோதி, ததோ ஹி அதி⁴கம் க³ண்ஹந்தஸ்ஸ து³க்கடம். ட²பேத்வா பன ஸூபம் அவஸேஸா ஸப்³பா³பி ஸூபேய்யப்³யஞ்ஜனவிகதி ரஸரஸோ நாம ஹோதி, தஸ்மிம் ரஸரஸே, ஞாதகானம் வா பவாரிதானம் வா அஞ்ஞஸ்ஸத்தா²ய வா அத்தனோ த⁴னேன வா இத⁴ அனாபத்தி.

30…பே…32. ஸமதித்திகஸிக்கா²பத³வண்ணனா

சதுத்தே² ஸமதித்திகந்தி ஸமபுண்ணம் ஸமப⁴ரிதம் அதி⁴ட்டா²னுபக³பத்தஸ்ஸ அந்தோமுக²வட்டிலேக²ம் அனதிக்கமித்வா ரசிதம். பிண்ட³பாதந்தி யம்கிஞ்சி யாவகாலிகம். அனதி⁴ட்டா²னுபகே³ பன யாவகாலிகம் யாமகாலிகாதீ³னி ச யத்த²கத்த²சி தூ²பீகதானிபி வட்டந்தி, யம் பன த்³வீஸு பத்தேஸு க³ஹேத்வா ஏகம் பூரேத்வா விஹாரம் ஹரதி, யம் வா பக்கி²பியமானம் பூவஉச்சு²க்க²ண்ட³ப²லாப²லாதி³ ஹேட்டா² ஓரோஹதி, தக்கோலவடம்ஸகாத³யோ வா உபரி ட²பேத்வா தி³ய்யந்தி, யஞ்ச பண்ணே வா தா²லகே வா பக்கி²பித்வா பத்தமத்த²கே ட²பிதம் ஹோதி, ந தம் தூ²பீகதம் நாம, தஸ்மா தம் ஸப்³ப³ம் வட்டதி. இத⁴ பன கி³லானஸ்ஸாபி அனாபத்தி நத்தி², தஸ்மா தேனபி ஸமதித்திகோயேவ க³ஹேதப்³போ³. ஸப்³ப³த்த² பன படிக்³க³ஹேதுமேவ ந வட்டதி, படிக்³க³ஹிதம் பன ஸுப்படிக்³க³ஹிதம் பரிபு⁴ஞ்ஜிதும் வட்டதி. பஞ்சமச²ட்டா²னி வுத்தனயானேவ.

33-34. ஸபதா³னஸிக்கா²பத³வண்ணனா

ஸத்தமே ஸபதா³னந்தி தத்த² தத்த² ஓதி⁴ம் அகத்வா அனுபடிபாடியா. யோ பன அஞ்ஞேஸம் வா தே³ந்தோ, அஞ்ஞபா⁴ஜனே வா ஆகிரந்தோ ததோ ததோ ஓமஸதி, தஸ்ஸ, உத்தரிப⁴ங்க³ஞ்ச உப்படிபாடியா க³ண்ஹந்தஸ்ஸாபி இத⁴ அனாபத்தி. அட்ட²மம் வுத்தனயமேவ.

35. தூ²பகதஸிக்கா²பத³வண்ணனா

நவமே தூ²பகதோதி மத்த²கதோ வேமஜ்ஜ²தோதி அத்தோ². யோ பன பரித்தகே ஸேஸே ஏகதோ ஸங்கட்³டி⁴த்வா ஓமத்³தி³த்வா பு⁴ஞ்ஜதி, தஸ்ஸாபி அனாபத்தி.

36. ஓத³னப்படிச்சா²த³னஸிக்கா²பத³வண்ணனா

த³ஸமே யஸ்ஸ ப⁴த்தஸாமிகா மாகா⁴தஸமயாதீ³ஸு ப்³யஞ்ஜனம் படிச்சா²தே³த்வா தே³ந்தி, யோ ச ந பி⁴ய்யோகம்யதாய படிச்சா²தே³தி, தேஸம் அனாபத்தி, கி³லானஸ்ஸ பன அனாக³தத்தா ஆபத்தியேவ.

37. ஸூபோத³னவிஞ்ஞத்திஸிக்கா²பத³வண்ணனா

ஏகாத³ஸமே ஞாதகானம் வா பவாரிதானம் வா அஞ்ஞஸ்ஸத்தா²ய அத்தனோ த⁴னேனாதி இத³ம் அனாபத்தியம் அதி⁴கம்.

38. உஜ்ஜா²னஸஞ்ஞீஸிக்கா²பத³வண்ணனா

த்³வாத³ஸமே உஜ்ஜா²னே ஸஞ்ஞா உஜ்ஜா²னஸஞ்ஞா, ஸா அஸ்ஸ அத்தீ²தி உஜ்ஜா²னஸஞ்ஞீ. இதா⁴பி கி³லானோ ந முச்சதி, ‘‘த³ஸ்ஸாமீ’’தி வா, ‘‘தா³பேஸ்ஸாமீ’’தி வா ஓலோகேந்தஸ்ஸ பன, ந உஜ்ஜா²னஸஞ்ஞிஸ்ஸ ச அனாபத்தி.

39. கப³ளஸிக்கா²பத³வண்ணனா

தேரஸமே நாதிமஹந்தந்தி மயூரண்ட³ம் அதிமஹந்தம், குக்குடண்ட³ம் அதிகு²த்³த³கம், தேஸம் வேமஜ்ஜ²ப்பமாணம். மூலகா²த³னீயாதி³பே⁴தே³ பன ஸப்³ப³க²ஜ்ஜகே ப²லாப²லே ச அனாபத்தி.

40. ஆலோபஸிக்கா²பத³வண்ணனா

சுத்³த³ஸமே பரிமண்ட³லந்தி அதீ³க⁴ம். இத⁴ பன க²ஜ்ஜகப²லாப²லேஹி ஸத்³தி⁴ம் உத்தரிப⁴ங்கே³பி அனாபத்தி.

41-42. அனாஹடஸிக்கா²பத³வண்ணனா

பன்னரஸமே அனாஹடேதி அனாஹரிதே, முக²த்³வாரம் அஸம்பத்தேதி அத்தோ². ஸோளஸமே ஸப்³ப³ஹத்த²ந்தி ஸகலம் ஹத்த²ம்.

43. ஸகப³ளஸிக்கா²பத³வண்ணனா

ஸத்தரஸமே ஸகப³ளேனாதி ஏத்த² யத்தகேன வசனம் அபரிபுண்ணம் ஹோதி, தத்தகே ஸதி கதே²ந்தஸ்ஸ ஆபத்தி. யோ பன த⁴ம்மம் கதே²ந்தோ ஹரிடகாதீ³னி முகே² பக்கி²பித்வா கதே²தி, யத்தகேன வசனம் அபரிபுண்ணம் ந ஹோதி, தத்தகே முக²ம்ஹி ஸதி வட்டதி.

44. பிண்டு³க்கே²பகஸிக்கா²பத³வண்ணனா

அட்டா²ரஸமே பிண்டு³க்கே²பகந்தி பிண்ட³ம் உக்கி²பித்வா உக்கி²பித்வா, இதா⁴பி க²ஜ்ஜகப²லாப²லேஸு அனாபத்தி.

45. கப³ளாவச்சே²த³கஸிக்கா²பத³வண்ணனா

ஏகூனவீஸதிமே கப³ளாவச்சே²த³கந்தி கப³ளம் அவச்சி²ந்தி³த்வா அவச்சி²ந்தி³த்வா, இத⁴ க²ஜ்ஜகப²லாப²லேஹி ஸத்³தி⁴ம் உத்தரிப⁴ங்கே³பி அனாபத்தி.

46. அவக³ண்ட³காரகஸிக்கா²பத³வண்ணனா

வீஸதிமே அவக³ண்ட³காரகந்தி மக்கடோ விய க³ண்டே³ கத்வா கத்வா, இத⁴ ப²லாப²லமத்தகே அனாபத்தி.

47. ஹத்த²னித்³து⁴னகஸிக்கா²பத³வண்ணனா

ஏகவீஸதிமே ஹத்த²னித்³து⁴னகந்தி ஹத்த²ம் நித்³து⁴னித்வா நித்³து⁴னித்வா, அனாபத்தியம் பனேத்த² ‘‘கசவரம் ச²ட்³டே³ந்தோ ஹத்த²ம் நித்³து⁴னாதீ’’தி (பாசி. 623) இத³ம் அதி⁴கம்.

48. ஸித்தா²வகாரகஸிக்கா²பத³வண்ணனா

த்³வாவீஸதிமே ஸித்தா²வகாரகந்தி ஸித்தா²னி அவகிரித்வா அவகிரித்வா, இதா⁴பி ‘‘கசவரம் ச²ட்³டே³ந்தோ ஸித்த²ம் ச²ட்³ட³யதீ’’தி (பாசி. 623) இத³ம் அனாபத்தியம் அதி⁴கம்.

49. ஜிவ்ஹானிச்சா²ரகஸிக்கா²பத³வண்ணனா

தேவீஸதிமே ஜிவ்ஹானிச்சா²ரகந்தி ஜிவ்ஹம் நிச்சா²ரேத்வா நிச்சா²ரேத்வா.

50-51. சபுசபுகாரகஸிக்கா²பத³வண்ணனா

சதுவீஸதிமே சபுசபுகாரகந்தி சபு சபூதி ஏவம் ஸத்³த³ம் கத்வா கத்வா. பஞ்சவீஸதிமேபி ஏஸேவ நயோ.

52…பே…54. ஹத்த²னில்லேஹகாதி³ஸிக்கா²பத³வண்ணனா

ச²ப்³பீ³ஸதிமே ஹத்த²னில்லேஹகந்தி ஹத்த²ம் நில்லேஹித்வா நில்லேஹித்வா. பு⁴ஞ்ஜந்தேன ஹி அங்கு³லிமத்தம்பி நில்லேஹிதும் ந வட்டதி. க⁴னயாகு³பா²ணிதபாயாஸாதி³கே பன அங்கு³லீஹி க³ஹேத்வா அங்கு³லியோ முகே² பவேஸேத்வா பு⁴ஞ்ஜிதும் வட்டதி, ஸத்தவீஸதிமஅட்ட²வீஸதிமேஸுபி ஏஸேவ நயோ. தஸ்மா ஏகங்கு³லியாபி பத்தோ ந நில்லேஹிதப்³போ³, ஏகஓட்டோ²பி ச ஜிவ்ஹாய ந நில்லேஹிதப்³போ³, ஓட்ட²மம்ஸேஹி ஏவ பன க³ஹேத்வா அந்தோ பவேஸேதும் வட்டதி.

55. ஸாமிஸஸிக்கா²பத³வண்ணனா

ஏகூனதிம்ஸதிமே ந ஸாமிஸேனாதி ஏதம் படிகூலவஸேன படிக்கி²த்தம், தஸ்மா ஸங்கி⁴கம்பி புக்³க³லிகம்பி கி³ஹிஸந்தகம்பி அத்தனோ ஸந்தகம்பி ஸங்கோ²பி ஸராவகம்பி தா²லகம்பி ந க³ஹேதப்³ப³மேவ, க³ண்ஹந்தஸ்ஸ து³க்கடம். ஸசே பன ஹத்த²ஸ்ஸ ஏகதே³ஸோ ஆமிஸமக்கி²தோ ந ஹோதி, தேன பதே³ஸேன க³ஹேதும் வட்டதி, இத⁴ ‘‘தோ⁴விஸ்ஸாமீதி வா, தோ⁴வாபேஸ்ஸாமீதி வா படிக்³க³ண்ஹாதீ’’தி (பாசி. 631) இத³ம் அனாபத்தியம் அதி⁴கம்.

56. ஸஸித்த²கஸிக்கா²பத³வண்ணனா

திம்ஸதிமே ‘‘உத்³த⁴ரித்வா வா பி⁴ந்தி³த்வா வா படிக்³க³ஹே வா நீஹரித்வா வா ச²ட்³டே³தீ’’தி இத³ம் அனாபத்தியம் அதி⁴கம். தத்த² உத்³த⁴ரித்வா வாதி ஸித்தா²னி உத³கதோ உத்³த⁴ரித்வா, ஏகஸ்மிம் டா²னே ராஸிம் கத்வா உத³கம் ச²ட்³டே³தி. பி⁴ந்தி³த்வா வாதி ஸித்தா²னி பி⁴ந்தி³த்வா உத³கக³திகானி கத்வா ச²ட்³டே³தி. படிக்³க³ஹே வாதி படிக்³க³ஹேன படிச்ச²ந்தானம் படிக்³க³ஹே ச²ட்³டே³தி. நீஹரித்வாதி ப³ஹி நீஹரித்வா ச²ட்³டே³தி, ஏவம் ச²ட்³டே³ந்தஸ்ஸ அனாபத்தி.

திம்ஸபோ⁴ஜனப்படிஸம்யுத்தஸிக்கா²பத³வண்ணனா நிட்டி²தா.

57. ச²த்தபாணிஸிக்கா²பத³வண்ணனா

த⁴ம்மதே³ஸனாபடிஸம்யுத்தேஸு பட²மே யம்கிஞ்சி ச²த்தம் பாணிம்ஹி அஸ்ஸாதி ச²த்தபாணி. ஸோ தம் ச²த்தம் யத்த²கத்த²சி ஸரீராவயவே ட²பேத்வாபி யாவ ஹத்தே²ன ந முஞ்சதி, தாவஸ்ஸ த⁴ம்மம் தே³ஸேதும் ந வட்டதி. ஸசே பனஸ்ஸ அஞ்ஞோ ச²த்தம் தா⁴ரேதி, பஸ்ஸே வா டி²தம் ஹோதி, ஹத்த²தோ அபக³தமத்தே ச²த்தபாணி நாம ந ஹோதி, தஸ்ஸ தே³ஸேதும் வட்டதி. த⁴ம்மபரிச்சே²தோ³ சேத்த² பத³ஸோத⁴ம்மே வுத்தனயேனேவ வேதி³தப்³போ³.

58-59. த³ண்ட³பாணிஸிக்கா²பத³வண்ணனா

து³தியே த³ண்டோ³ நாம மஜ்ஜி²மஸ்ஸ புரிஸஸ்ஸ சதுஹத்த²ப்பமாணோ, த³ண்ட³பாணிபா⁴வோ பனஸ்ஸ ச²த்தபாணிம்ஹி வுத்தனயேனேவ வேதி³தப்³போ³. ததியேபி ஏஸேவ நயோ. அஸிம் ஸன்னஹித்வா டி²தோபி ஹி ஸத்த²பாணிஸங்க்²யம் ந க³ச்ச²தி.

60. ஆவுத⁴பாணிஸிக்கா²பத³வண்ணனா

சதுத்தே² ஸப்³பா³பி த⁴னுவிகதி ஸத்³தி⁴ம் ஸரவிகதியா ஆவுத⁴ந்தி வேதி³தப்³பா³, தஸ்மா ஸத்³தி⁴ம் வா ஸரேன த⁴னும் க³ஹேத்வா, ஸுத்³த⁴த⁴னும் வா ஸுத்³த⁴ஸரம் வா ஸஜியத⁴னும் வா நிஜ்ஜியத⁴னும் வா க³ஹேத்வா டி²தஸ்ஸ வா நிஸின்னஸ்ஸ வா த⁴ம்மம் தே³ஸேதும் ந வட்டதி. ஸசே பனஸ்ஸ த⁴னு க²ந்தே⁴பி படிமுக்கம் ஹோதி, யாவ ந க³ண்ஹாதி, தாவ வட்டதி.

61-62. பாது³கஸிக்கா²பத³வண்ணனா

பஞ்சமே பாது³காருள்ஹஸ்ஸாதி ச²த்தத³ண்ட³கே அங்கு³லந்தரிகம் அப்பவேஸேத்வா கேவலம் அக்கந்தஸ்ஸ வா, பவேஸேத்வா டா²னவஸேன படிமுக்கஸ்ஸ வா. ச²ட்டே²பி ஏஸேவ நயோ. இத⁴ பன ய்வாயம் பண்ஹிகப³ந்த⁴ம் ஓமுஞ்சித்வா டா²னவஸேன ‘‘ஓமுக்கோ’’தி வுச்சதி, தஸ்ஸாபி ந வட்டதி.

63. யானஸிக்கா²பத³வண்ணனா

ஸத்தமே ஸசேபி த்³வீஹி ஜனேஹி ஹத்த²ஸங்கா⁴டேன க³ஹிதோ, ஸாடகே வா ட²பேத்வா வம்ஸேன வய்ஹதி, அயுத்தே வா வய்ஹாதி³கே யானே விஸங்க²ரித்வா வா ட²பிதே சக்கமத்தேபி நிஸின்னோ ஹோதி, யானக³தோத்வேவ ஸங்க²ம் க³ச்ச²தி. ஸசே பன த்³வேபி ஏகயானே நிஸின்னா ஹோந்தி, வட்டதி. விஸும் நிஸின்னேஸுபி உச்சே யானே நிஸின்னேன நீசே நிஸின்னஸ்ஸ தே³ஸேதும் வட்டதி, ஸமப்பமாணேபி வட்டதி, ததா² புரிமே நிஸின்னேன பச்சி²மே நிஸின்னஸ்ஸ. பச்சி²மே பன உச்சதரேபி நிஸின்னேன தே³ஸேதும் ந வட்டதி.

64. ஸயனஸிக்கா²பத³வண்ணனா

அட்ட²மே ஸயனக³தஸ்ஸாதி அந்தமஸோ கடஸாரகேபி பகதிபூ⁴மியம்பி நிபன்னஸ்ஸ உச்சேபி மஞ்சே வா பீடே² வா பூ⁴மிப்பதே³ஸே வா டி²தேன நிஸின்னேன வா தே³ஸேதும் ந வட்டதி. ஸயனக³தேன பன ஸயனக³தஸ்ஸ உச்சதரே வா ஸமப்பமாணே வா நிபன்னேன தே³ஸேதும் வட்டதி. நிபன்னேன பன டி²தஸ்ஸ வா நிஸின்னஸ்ஸ வா நிபன்னஸ்ஸ வா, நிஸின்னேன ச டி²தஸ்ஸ வா நிஸின்னஸ்ஸ வா, டி²தேன டி²தஸ்ஸேவ வட்டதி.

65. பல்லத்தி²கஸிக்கா²பத³வண்ணனா

நவமே ஹத்த²பல்லத்தி²காதீ³ஸு யாய காயசி நிஸின்னஸ்ஸ தே³ஸேதும் ந வட்டதி.

66. வேடி²தஸிக்கா²பத³வண்ணனா

த³ஸமே வேடி²தஸீஸஸ்ஸாதி து³ஸ்ஸவேடே²ன வா மோளிஆதீ³ஹி வா யதா² கேஸந்தோ ந தி³ஸ்ஸதி, ஏவம் வேடி²தஸீஸஸ்ஸ, தேனேவஸ்ஸ அனாபத்தியம் ‘‘கேஸந்தம் விவராபேத்வா தே³ஸேதீ’’தி (பாசி. 643) வுத்தம்.

67. ஓகு³ண்டி²தஸிக்கா²பத³வண்ணனா

ஏகாத³ஸமே ஓகு³ண்டி²தஸீஸஸ்ஸாதி ஸஸீஸம் பாருதஸ்ஸ, அனாபத்தியம் பனேத்த² ‘‘ஸீஸம் விவராபேத்வா தே³ஸேதீ’’தி (பாசி. 644) அதி⁴கம்.

68. ச²மாஸிக்கா²பத³வண்ணனா

த்³வாத³ஸமே ச²மாயம் நிஸீதி³த்வாதி பூ⁴மியம் நிஸீதி³த்வா. ஆஸனேதி அந்தமஸோ வத்த²ம்பி திணானிபி ஸந்த²ரித்வா நிஸின்னஸ்ஸ.

69. நீசாஸனஸிக்கா²பத³வண்ணனா

தேரஸமே உச்சே ஆஸனேதி அந்தமஸோ பூ⁴மிப்பதே³ஸேபி உன்னதப்பதே³ஸே நிஸின்னஸ்ஸ.

70. டி²தஸிக்கா²பத³வண்ணனா

சுத்³த³ஸமே ந டி²தோ நிஸின்னஸ்ஸாதி ஸசே தே²ரஸ்ஸ உபட்டா²னம் க³ந்த்வா டி²தம் த³ஹரம் ஆஸனே நிஸின்னோ மஹாதே²ரோ பஞ்ஹம் புச்ச²தி, ந கதே²தப்³ப³ம். கா³ரவேன பன தே²ரம் ‘‘உட்ட²ஹித்வா புச்சா²’’தி வத்தும் ந ஸக்கா, தஸ்மா ‘‘பஸ்ஸே டி²தஸ்ஸ பி⁴க்கு²னோ கதே²ஸ்ஸாமீ’’தி கதே²தும் வட்டதி.

71. பச்ச²தோக³மனஸிக்கா²பத³வண்ணனா

பன்னரஸமே ஸசே புரதோ க³ச்ச²ந்தோ பஞ்ஹம் புச்ச²தி, தஸ்ஸ தம் அகதே²த்வா ‘‘பச்சி²மஸ்ஸ பி⁴க்கு²னோ கதே²ஸ்ஸாமீ’’தி கதே²தப்³ப³ம். ஸத்³தி⁴ம் உக்³க³ஹிதத⁴ம்மம் பன ஸஜ்ஜா²யிதும், ஸமது⁴ரேன வா க³ச்ச²ந்தஸ்ஸ கதே²தும் வட்டதி.

72. உப்பதே²னக³மனஸிக்கா²பத³வண்ணனா

ஸோளஸமே ந உப்பதே²னாதி ஏத்த² ஸசே த்³வேபி ஸகடமக்³க³ஸ்மிம் ஏகேகசக்கபதே²ன வா உப்பதே²ன வா ஸமது⁴ரம் க³ச்ச²ந்தி, வட்டதி.

73. டி²தோஉச்சாரஸிக்கா²பத³வண்ணனா

ஸத்தரஸமே ‘‘அஸஞ்சிச்சா’’தி அனாபத்தியம் ஸசே படிச்ச²ன்னட்டா²னம் க³ச்ச²ந்தஸ்ஸ ஸஹஸா உச்சாரோ வா பஸ்ஸாவோ வா நிக்க²மதி, அஸஞ்சிச்ச கதோ நாம ஹோதி.

74. ஹரிதேஉச்சாரஸிக்கா²பத³வண்ணனா

அட்டா²ரஸமே யம்பி ஜீவமானருக்க²ஸ்ஸ மூலம் பத²வியம் தி³ஸ்ஸமானம் க³ச்ச²தி, ஸாகா² வா பூ⁴மிலக்³கா³ க³ச்ச²தி, ஸப்³ப³ம் ஹரிதஸங்கா²தமேவ. க²ந்தே⁴ நிஸீதி³த்வா பன அப்பஹரிதட்டா²னே பாதேதும் வட்டதி. ஸசே அப்பஹரிதட்டா²னம் ஓலோகேந்தஸ்ஸேவ ஸஹஸா நிக்க²மதி, கி³லானட்டா²னே டி²தோ ஹோதி, ‘‘அப்பஹரிதே கதோ ஹரிதம் ஓத்த²ரதீ’’தி (பாசி. 652) இத³மேத்த² அனாபத்தியம் அதி⁴கம். தத்த² ஸசேபி அப்பஹரிதம் அலப⁴ந்தேன திணண்டு³பகம் வா பலலண்டு³பகம் வா ட²பேத்வா கதோ பச்சா² ஹரிதம் ஓத்த²ரதி, வட்டதியேவ. கே²ளேன சேத்த² ஸிங்கா⁴ணிகாபி ஸங்க³ஹிதா.

75. உத³கேஉச்சாரஸிக்கா²பத³வண்ணனா

ஏகூனவீஸதிமே ந உத³கேதி ஏதம் பரிபோ⁴க³உத³கமேவ ஸந்தா⁴ய வுத்தம், வச்சகுடிஸமுத்³தா³தி³உத³கேஸு பன அபரிபோ⁴கே³ஸு அனாபத்தி. தே³வே வஸ்ஸந்தே ஸமந்ததோ உத³கோகே⁴ ஜாதே அனுத³கட்டா²னம் அலப⁴ந்தேன உத³கே காதும் வட்டதி, இதா⁴பி ‘‘த²லே கதோ உத³கம் ஓத்த²ரதீ’’தி (பாசி. 654) இத³ம் அனாபத்தியம் அதி⁴கம், ஸேஸம் ஸப்³ப³ஸிக்கா²பதே³ஸு உத்தானமேவ.

ஸமுட்டா²னாதி³தீ³பனத்தா²ய பனேத்த² இத³ம் பகிண்ணகம் – உஜ்ஜக்³கி⁴கஉச்சாஸத்³த³ப்படிஸம்யுத்தானி சத்தாரி, ஸகப³ளேன முகே²ன ப்³யாஹரணம் ஏகம், ச²மானீசாஸனனிஸின்னடி²தபச்ச²தோக³மனஉப்பத²க³மனப்படிஸம்யுத்தானி பஞ்சாதி இமானி த³ஸ ஸிக்கா²பதா³னி ஸமனுபா⁴ஸனஸமுட்டா²னானி, ஏகேகமேத்த² கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னம். ஸூபோத³னவிஞ்ஞத்திஸிக்கா²பத³ம் தே²ய்யஸத்த²ஸமுட்டா²னம், கிரியம், ஸஞ்ஞாவிமோக்க²ம், ஸசித்தகம், லோகவஜ்ஜம், காயகம்மம், வசீகம்மம், அகுஸலசித்தம், து³க்க²வேத³னம். ச²த்தபாணித³ண்ட³பாணிஸத்த²பாணிஆவுத⁴பாணிபாது³காஉபாஹனயானஸயனபல்லத்தி²கவேடி²தஓகு³ண்டி²தனாமகானி ஏகாத³ஸ த⁴ம்மதே³ஸனாஸமுட்டா²னானி, கிரியாகிரியானி, ஸஞ்ஞாவிமோக்கா²னி, ஸசித்தகானி, லோகவஜ்ஜானி, வசீகம்மானி, அகுஸலசித்தானி, து³க்க²வேத³னானி. ஸேஸானி தேபண்ணாஸ பட²மபாராஜிகஸமஉட்டா²னாதி³பே⁴தா³னீதி.

ஏகூனவீஸதித⁴ம்மதே³ஸனாபடிஸம்யுத்தஸிக்கா²பத³வண்ணனா நிட்டி²தா.

கங்கா²விதரணியா பாதிமோக்க²வண்ணனாய

ஸேகி²யவண்ணனா நிட்டி²தா.

அதி⁴கரணஸமத²வண்ணனா

அதி⁴கரணஸமதே²ஸு ஸத்தாதி தேஸம் க³ணனபரிச்சே²தோ³. அதி⁴கரணானி ஸமேந்தி வூபஸமேந்தீதி அதி⁴கரணஸமதா². உத்³தே³ஸம் ஆக³ச்ச²ந்தீதி ஆபத்தாதி⁴கரணஸங்கா²தாஸு ச அவஸேஸாதி⁴கரணத்தயபச்சயாஸு ச ஆபத்தீஸு பரிஸுத்³த⁴பா⁴வம் புச்ச²னத்த²ம் உத்³தி³ஸிதப்³ப³தம் ஆக³ச்ச²ந்தி. உப்பன்னுப்பன்னானந்தி உப்பன்னானம் உப்பன்னானம். அதி⁴கரணானந்தி விவாதா³தி⁴கரணம் அனுவாதா³தி⁴கரணம் ஆபத்தாதி⁴கரணம் கிச்சாதி⁴கரணந்தி இமேஸம் சதுன்னம். ஸமதா²ய வூபஸமாயாதி ஸமனத்த²ஞ்சேவ வூபஸமனத்த²ஞ்ச ஸம்முகா²வினயோ தா³தப்³போ³…பே… திணவத்தா²ரகோதி இமே ஸத்த ஸமதா² தா³தப்³பா³. தத்ராயம் வினிச்ச²யோ – அதி⁴கரணேஸு தாவ ‘‘த⁴ம்மோ’’தி வா, ‘‘அத⁴ம்மோ’’தி வா அட்டா²ரஸஹி வத்தூ²ஹி விவத³ந்தானம் பி⁴க்கூ²னம் யோ விவாதோ³, இத³ம் விவாதா³தி⁴கரணம் நாம. ஸீலவிபத்தியா வா ஆசாரதி³ட்டி²ஆஜீவவிபத்தியா வா அனுவத³ந்தானம் யோ அனுவாதோ³ உபவத³னா சேவ சோத³னா ச, இத³ம் அனுவாதா³தி⁴கரணம் நாம. மாதிகாய ஆக³தா பஞ்ச, விப⁴ங்கே³ த்³வேதி ஸத்தபி ஆபத்திக்க²ந்தா⁴ ஆபத்தாதி⁴கரணம், நாம. யம் ஸங்க⁴ஸ்ஸ அபலோகனாதீ³னம் சதுன்னம் கம்மானம் கரணம், இத³ம் கிச்சாதி⁴கரணம் நாம.

தத்த² விவாதா³தி⁴கரணம் (சூளவ. 228) த்³வீஹி ஸமதே²ஹி ஸம்மதி ஸம்முகா²வினயேன ச யேபு⁴ய்யஸிகாய ச, ஸம்முகா²வினயேனேவ ஸம்மமானம் யஸ்மிம் விஹாரே உப்பன்னம், தஸ்மிம்யேவ வா, அஞ்ஞத்த² வூபஸமேதும் க³ச்ச²ந்தானம் அந்தராமக்³கே³ வா, யத்த² க³ந்த்வா ஸங்க⁴ஸ்ஸ நிய்யாதிதம், தத்த² ஸங்கே⁴ன வா வூபஸமேதும் அஸக்கோந்தே தத்தே²வ உப்³பா³ஹிகாய ஸம்மதபுக்³க³லேஹி வா வினிச்சி²தம் ஸம்மதி, ஏவம் ஸம்மமானே ச பன தஸ்மிம் யா ஸங்க⁴ஸம்முக²தா த⁴ம்மஸம்முக²தா வினயஸம்முக²தா புக்³க³லஸம்முக²தா அயம் ஸம்முகா²வினயோ நாம. தத்த² ச காரகஸங்க⁴ஸ்ஸ ஸங்க⁴ஸாமக்³கி³வஸேன ஸம்முகீ²பா⁴வோ ஸங்க⁴ஸம்முக²தா, ஸமேதப்³ப³ஸ்ஸ வத்து²னோ பூ⁴ததா த⁴ம்மஸம்முக²தா, யதா² தம் ஸமேதப்³ப³ம், ததே²வஸ்ஸ ஸமனம் வினயஸம்முக²தா, யோ ச விவத³தி, யேன ச விவத³தி, தேஸம் உபி⁴ன்னம் அத்த²பச்சத்தி²கானம் ஸம்முகீ²பா⁴வோ புக்³க³லஸம்முக²தா. உப்³பா³ஹிகாய வூபஸமனே பனேத்த² ஸங்க⁴ஸம்முக²தா பரிஹாயதி, ஏவம் தாவ ஸம்முகா²வினயேனேவ ஸம்மதி.

ஸசே பனேவம்பி ந ஸம்மதி, அத² நம் உப்³பா³ஹிகாய ஸம்மதா பி⁴க்கூ² ‘‘ந மயம் ஸக்கோம வூபஸமேது’’ந்தி ஸங்க⁴ஸ்ஸேவ நிய்யாதேந்தி, ததோ ஸங்கோ⁴ பஞ்சங்க³ஸமன்னாக³தம் பி⁴க்கு²ம் ஸலாகக்³கா³ஹாபகம் ஸம்மன்னித்வா தேன கு³ள்ஹகவிவட்டகஸகண்ணஜப்பகேஸு தீஸு ஸலாகக்³கா³ஹேஸு அஞ்ஞதரவஸேன ஸலாகம் கா³ஹேத்வா ஸன்னிபதிதபரிஸாய த⁴ம்மவாதீ³னம் யேபு⁴ய்யதாய யதா² தே த⁴ம்மவாதி³னோ வத³ந்தி, ஏவம் வூபஸந்தம் அதி⁴கரணம் ஸம்முகா²வினயேன ச யேபு⁴ய்யஸிகாய ச வூபஸந்தம் ஹோதி. தத்த² ஸம்முகா²வினயோ வுத்தனயோ ஏவ, யம் பன யேபு⁴ய்யஸிககம்மஸ்ஸ கரணம். அயம் யேபு⁴ய்யஸிகா நாம, ஏவம் விவாதா³தி⁴கரணம் த்³வீஹி ஸமதே²ஹி ஸம்மதி.

அனுவாதா³தி⁴கரணம் (சூளவ. 236) சதூஹி ஸமதே²ஹி ஸம்மதி ஸம்முகா²வினயேன ச ஸதிவினயேன ச அமூள்ஹவினயேன ச தஸ்ஸபாபியஸிகாய ச. ஸம்முகா²வினயேனேவ ஸம்மமானம் யோ ச அனுவத³தி, யஞ்ச அனுவத³தி, தேஸம் வசனம் ஸுத்வா ஸசே காசி ஆபத்தி நத்தி², உபோ⁴ க²மாபேத்வா, ஸசே அத்தி², ‘‘அயம் நாமேத்த² ஆபத்தீ’’தி ஏவம் வினிச்சி²தம் வூபஸம்மதி, தத்த² ஸம்முகா²வினயலக்க²ணம் வுத்தனயமேவ. யதா³ பன கீ²ணாஸவஸ்ஸ பி⁴க்கு²னோ அமூலிகாய ஸீலவிபத்தியா அனுத்³த⁴ம்ஸிதஸ்ஸ ஸதிவினயம் யாசமானஸ்ஸ ஸங்கோ⁴ ஞத்திசதுத்தே²ன கம்மேன ஸதிவினயம் தே³தி, ததா³ ஸம்முகா²வினயேன ச ஸதிவினயேன ச வூபஸந்தம் ஹோதி, தி³ன்னே பன ஸதிவினயே புன தஸ்மிம் புக்³க³லே கஸ்ஸசி அனுவாதோ³ ந ருஹதி. யதா³ உம்மத்தகோ பி⁴க்கு² உம்மாத³வஸேன க³தே அஸ்ஸாமணகே அஜ்ஜா²சாரே ‘‘ஸரதாயஸ்மா ஏவரூபிம் ஆபத்தி’’ந்தி பி⁴க்கூ²ஹி சோதி³யமானோ ‘‘உம்மத்தகேன மே, ஆவுஸோ, ஏதம் கதம், நாஹம் தம் ஸராமீ’’தி ப⁴ணந்தோபி பி⁴க்கூ²ஹி சோதி³யமானோவ புன அசோத³னத்தா²ய அமூள்ஹவினயம் யாசதி, ஸங்கோ⁴ சஸ்ஸ ஞத்திசதுத்தே²ன கம்மேன அமூள்ஹவினயம் தே³தி. ததா³ ஸம்முகா²வினயேன ச அமூள்ஹவினயேன ச வூபஸந்தம் ஹோதி, தி³ன்னே பன அமூள்ஹவினயே புன தஸ்மிம் புக்³க³லே கஸ்ஸசி தப்பச்சயா அனுவாதோ³ ந ருஹதி.

யதா³ பன பாராஜிகேன வா பாராஜிகஸாமந்தேன வா சோதி³யமானஸ்ஸ அஞ்ஞேனஞ்ஞம் படிசரதோ பாபுஸ்ஸன்னதாய பாபியஸ்ஸ புக்³க³லஸ்ஸ ‘‘ஸசாயம் அச்சி²ன்னமூலோ ப⁴விஸ்ஸதி, ஸம்மா வத்தித்வா ஓஸாரணம் லபி⁴ஸ்ஸதி, ஸசே சி²ன்னமூலோ, ஸயமேவஸ்ஸ நாஸனா ப⁴விஸ்ஸதீ’’தி மஞ்ஞமானோ ஸங்கோ⁴ ஞத்திசதுத்தே²ன கம்மேன தஸ்ஸபாபியஸிகம் கம்மம் கரோதி, ததா³ ஸம்முகா²வினயேன ச தஸ்ஸபாபியஸிகாய ச வூபஸந்தம் ஹோதி, ஏவம் அனுவாதா³தி⁴கரணம் சதூஹி ஸமதே²ஹி ஸம்மதி.

ஆபத்தாதி⁴கரணம் (சூளவ. 239) தீஹி ஸமதே²ஹி ஸம்மதி ஸம்முகா²வினயேன ச படிஞ்ஞாதகரணேன ச திணவத்தா²ரகேன ச. தஸ்ஸ ஸம்முகா²வினயேனேவ வூபஸமோ நத்தி², யதா³ பன ஏகஸ்ஸ வா பி⁴க்கு²னோ, நிஸ்ஸக்³கி³யவண்ணனாயம் வுத்தனயேன ஸங்க⁴க³ணமஜ்ஜே²ஸு வா பி⁴க்கு² லஹுகம் ஆபத்திம் தே³ஸேதி, ததா³ ஆபத்தாதி⁴கரணம் ஸம்முகா²வினயேன ச படிஞ்ஞாதகரணேன ச வூபஸம்மதி. தத்த² ஸம்முகா²வினயே தாவ யோ ச தே³ஸேதி, யஸ்ஸ ச தே³ஸேதி, தேஸம் ஸம்முகீ²பா⁴வோ புக்³க³லஸம்முக²தா, ஸேஸம் வுத்தனயமேவ. புக்³க³லஸ்ஸ ச க³ணஸ்ஸ ச தே³ஸனாகாலே ஸங்க⁴ஸம்முக²தா பரிஹாயதி.

யா பனேத்த² ‘‘அஹம், ப⁴ந்தே, இத்த²ன்னாமம் ஆபத்திம் ஆபன்னோ’’தி ச, ‘‘பஸ்ஸஸீ’’தி, ‘‘ஆம பஸ்ஸாமீ’’தி ச படிஞ்ஞா, தாய ‘‘ஆயதிம் ஸம்வரேய்யாஸீ’’தி கரணம் படிஞ்ஞாதகரணம் நாம. ஸங்கா⁴தி³ஸேஸே பரிவாஸாதி³யாசனா படிஞ்ஞா, பரிவாஸாதீ³னம் தா³னம் படிஞ்ஞாதகரணம் நாம. த்³வேபக்க²ஜாதா பன ப⁴ண்ட³னகாரகா பி⁴க்கூ² ப³ஹும் அஸ்ஸாமணகம் அஜ்ஜா²சாரம் சரித்வா புன லஜ்ஜித⁴ம்மே உப்பன்னே ‘‘ஸசே மயம் இமாஹி ஆபத்தீஹி அஞ்ஞமஞ்ஞம் கரிஸ்ஸாம, ஸியாபி தம் அதி⁴கரணம் கக்க²ளத்தா²ய வாளத்தா²ய ஸம்வத்தேய்யா’’தி அஞ்ஞமஞ்ஞம் ஆபத்தியா காராபனே தோ³ஸம் தி³ஸ்வா யதா³ திணவத்தா²ரககம்மம் கரோந்தி, ததா³ ஆபத்தாதி⁴கரணம் ஸம்முகா²வினயேன ச திணவத்தா²ரகேன ச ஸம்மதி. தத்ர ஹி யத்தகா ஹத்த²பாஸூபக³தா ‘‘ந மேதம் க²மதீ’’தி ஏவம் தி³ட்டா²விகம்மம் அகத்வா நித்³த³ம்பி ஓக்கமந்தா ஹோந்தி, ஸப்³பே³ஸம் ட²பேத்வா து²ல்லவஜ்ஜஞ்ச கி³ஹிப்படிஸம்யுத்தஞ்ச ஸப்³பா³பத்தியோ வுட்ட²ஹந்தி, ஏவம் ஆபத்தாதி⁴கரணம் தீஹி ஸமதே²ஹி ஸம்மதி.

கிச்சாதி⁴கரணம் (சூளவ. 242) ஏகேன ஸமதே²ன ஸம்மதி ஸம்முகா²வினயேனேவ. இதி இமானி சத்தாரி அதி⁴கரணானி யதா²னுரூபம் இமேஹி ஸத்தஹி ஸமதே²ஹி ஸம்மந்தி, தேன வுத்தம் ‘‘உப்பன்னுப்பன்னானம் அதி⁴கரணானம் ஸமதா²ய வூபஸமாய ஸம்முகா²வினயோ தா³தப்³போ³…பே… திணவத்தா²ரகோ’’தி. அயமேத்த² வினிச்ச²யனயோ, வித்தா²ரோ பன ஸமத²க்க²ந்த⁴கே ஆக³தோயேவ, வினிச்ச²யோபிஸ்ஸ ஸமந்தபாஸாதி³காயம் வுத்தோ.

தத்தா²யஸ்மந்தே புச்சா²மி, கச்சித்த² பரிஸுத்³தா⁴தி தேஸு ஸத்தஸு அதி⁴கரணஸமதே²ஸு கச்சித்த² பரிஸுத்³தா⁴, நத்தி² வோ கிஞ்சி ஸமதே²ஹி வூபஸமேதப்³ப³ந்தி புச்சா²மி, ஏதேன ஸப்³பா³பத்தீஹி பரிஸுத்³த⁴பா⁴வோ புச்சி²தோ ஹோதி.

உத்³தி³ட்ட²ம் கோ² ஆயஸ்மந்தோ நிதா³னந்திஆதி³ நிக³மனவசனம். தத்த² ஏத்தகந்தி ஏத்தகம் ஸிக்கா²பத³ம். ஸுத்தாக³தந்தி ஸுத்தே பாதிமோக்கே² ஆக³தம். ஸுத்தபரியாபன்னந்தி தத்தே²வ அந்தோக³த⁴ம். அன்வத்³த⁴மாஸம் உத்³தே³ஸம் ஆக³ச்ச²தீதி அத்³த⁴மாஸே அத்³த⁴மாஸே உபோஸத²வஸேன உத்³தி³ஸிதப்³ப³தம் ஆக³ச்ச²தி. ஸமக்³கே³ஹீதி காயஸாமக்³கி³வஸேன ஸமக்³கே³ஹி. ஸம்மோத³மானேஹீதி சித்தஸாமக்³கி³வஸேன ஏகஜ்ஜா²ஸயதாய ஸுட்டு² மோத³மானேஹி. அவிவத³மானேஹீதி அட்டா²ரஸஸு விவாத³வத்தூ²ஸு அஞ்ஞதரவஸேனாபி அவிவத³மானேஹி. ஸிக்கி²தப்³ப³ந்தி தம் தம் ஸிக்கா²பத³ம் அவீதிக்கமந்தேஹி அதி⁴ஸீலஸிக்கா² ஸம்பாதே³தப்³பா³. அந்தரந்தரா பன யம் ந வுத்தம், தம் ஸப்³ப³ம் புரிமே புரிமே ஸிக்கா²பதே³ வுத்தத்தா சேவ உத்தானத்த²த்தா சாதி.

அதி⁴கரணஸமத²வண்ணனா நிட்டி²தா.

கங்கா²விதரணியா பாதிமோக்க²வண்ணனாய

பி⁴க்கு²பாதிமோக்க²வண்ணனா நிட்டி²தா.

நமோ தஸ்ஸ ப⁴க³வதோ அரஹதோ ஸம்மஸம்பு³த்³த⁴ஸ்ஸ