பி⁴க்கு²பாதிமோக்க²பாளி

புப்³ப³கரணம்-4

ஸம்மஜ்ஜனீ பதீ³போ ச, உத³கம் ஆஸனேன ச;

உபோஸத²ஸ்ஸ ஏதானி, ‘‘புப்³ப³கரண’’ந்தி வுச்சதி.

புப்³ப³கிச்சம்-5

ச²ந்த³, பாரிஸுத்³தி⁴, உதுக்கா²னம், பி⁴க்கு²க³ணனா ச ஓவாதோ³;

உபோஸத²ஸ்ஸ ஏதானி, ‘‘புப்³ப³கிச்ச’’ந்தி வுச்சதி.

பத்தகல்லஅங்கா³-4

உபோஸதோ², யாவதிகா ச பி⁴க்கூ² கம்மப்பத்தா;

ஸபா⁴கா³பத்தியோ ச ந விஜ்ஜந்தி;

வஜ்ஜனீயா ச புக்³க³லா தஸ்மிம் ந ஹோந்தி, ‘‘பத்தகல்ல’’ந்தி வுச்சதி.

புப்³ப³கரணபுப்³ப³கிச்சானி ஸமாபேத்வா தே³ஸிதாபத்திகஸ்ஸ ஸமக்³க³ஸ்ஸ பி⁴க்கு²ஸங்க⁴ஸ்ஸ அனுமதியா பாதிமோக்க²ம் உத்³தி³ஸிதும் ஆராத⁴னம் கரோம.

நிதா³னுத்³தே³ஸோ

ஸுணாது மே ப⁴ந்தே ஸங்கோ⁴? அஜ்ஜுபோஸதோ² பன்னரஸோ, யதி³ ஸங்க⁴ஸ்ஸ பத்தகல்லம், ஸங்கோ⁴ உபோஸத²ம் கரேய்ய, பாதிமோக்க²ம் உத்³தி³ஸேய்ய.

கிம் ஸங்க⁴ஸ்ஸ புப்³ப³கிச்சம்? பாரிஸுத்³தி⁴ம் ஆயஸ்மந்தோ ஆரோசேத², பாதிமோக்க²ம் உத்³தி³ஸிஸ்ஸாமி, தம் ஸப்³பே³வ ஸந்தா ஸாது⁴கம் ஸுணோம மனஸி கரோம. யஸ்ஸ ஸியா ஆபத்தி, ஸோ ஆவிகரேய்ய, அஸந்தியா ஆபத்தியா துண்ஹீ ப⁴விதப்³ப³ம், துண்ஹீபா⁴வேன கோ² பனாயஸ்மந்தே ‘‘பரிஸுத்³தா⁴’’தி வேதி³ஸ்ஸாமி. யதா² கோ² பன பச்சேகபுட்ட²ஸ்ஸ வேய்யாகரணம் ஹோதி, ஏவமேவம் ஏவரூபாய பரிஸாய யாவததியம் அனுஸாவிதம் ஹோதி. யோ பன பி⁴க்கு² யாவததியம் அனுஸாவியமானே ஸரமானோ ஸந்திம் ஆபத்திம் நாவிகரேய்ய, ஸம்பஜானமுஸாவாத³ஸ்ஸ ஹோதி. ஸம்பஜானமுஸாவாதோ³ கோ² பனாயஸ்மந்தோ அந்தராயிகோ த⁴ம்மோ வுத்தோ ப⁴க³வதா, தஸ்மா ஸரமானேன பி⁴க்கு²னா ஆபன்னேன விஸுத்³தா⁴பேக்கே²ன ஸந்தீ ஆபத்தி ஆவிகாதப்³பா³, ஆவிகதா ஹிஸ்ஸ பா²ஸு ஹோதி.

உத்³தி³ட்ட²ம் கோ² ஆயஸ்மந்தோ நிதா³னம். தத்தா²யஸ்மந்தே புச்சா²மி, கச்சித்த² பரிஸுத்³தா⁴, து³தியம்பி புச்சா²மி, கச்சித்த² பரிஸுத்³தா⁴, ததியம்பி புச்சா²மி, கச்சித்த² பரிஸுத்³தா⁴, பரிஸுத்³தே⁴த்தா²யஸ்மந்தோ, தஸ்மா துண்ஹீ, ஏவமேதம் தா⁴ரயாமீதி.

நிதா³னம் நிட்டி²தம்.

பாராஜிகுத்³தே³ஸோ

தத்ரிமே சத்தாரோ பாராஜிகா த⁴ம்மா உத்³தே³ஸம் ஆக³ச்ச²ந்தி.

மேது²னத⁴ம்ம ஸிக்கா²பத³ம்

1. யோ பன பி⁴க்கு² பி⁴க்கூ²னம் ஸிக்கா²ஸாஜீவஸமாபன்னோ ஸிக்க²ம் அப்பச்சக்கா²ய து³ப்³ப³ல்யம் அனாவிகத்வா மேது²னம் த⁴ம்மம் படிஸேவேய்ய, அந்தமஸோ திரச்சா²னக³தாயபி, பாராஜிகோ ஹோதி அஸம்வாஸோ.

அதி³ன்னாதா³னஸிக்கா²பத³ம்

2. யோ பன பி⁴க்கு² கா³மா வா அரஞ்ஞா வா அதி³ன்னம் தே²ய்யஸங்கா²தம் ஆதி³யேய்ய, யதா²ரூபே அதி³ன்னாதா³னே ராஜானோ சோரம் க³ஹேத்வா ஹனேய்யும் வா ப³ந்தே⁴ய்யும் வா பப்³பா³ஜேய்யும் வா சோரோஸி பா³லோஸி மூள்ஹோஸி தே²னோஸீதி, ததா²ரூபம் பி⁴க்கு² அதி³ன்னம் ஆதி³யமானோ அயம்பி பாராஜிகோ ஹோதி அஸம்வாஸோ.

மனுஸ்ஸவிக்³க³ஹஸிக்கா²பத³ம்

3. யோ பன பி⁴க்கு² ஸஞ்சிச்ச மனுஸ்ஸவிக்³க³ஹம் ஜீவிதா வோரோபேய்ய, ஸத்த²ஹாரகம் வாஸ்ஸ பரியேஸேய்ய, மரணவண்ணம் வா ஸம்வண்ணேய்ய, மரணாய வா ஸமாத³பேய்ய ‘‘அம்போ⁴ புரிஸ கிம் துய்ஹிமினா பாபகேன து³ஜ்ஜீவிதேன, மதம் தே ஜீவிதா ஸேய்யோ’’தி, இதி சித்தமனோ சித்தஸங்கப்போ அனேகபரியாயேன மரணவண்ணம் வா ஸம்வண்ணேய்ய, மரணாய வா ஸமாத³பேய்ய, அயம்பி பாராஜிகோ ஹோதி அஸம்வாஸோ.

உத்தரிமனுஸ்ஸத⁴ம்மஸிக்கா²பத³ம்

4. யோ பன பி⁴க்கு² அனபி⁴ஜானம் உத்தரிமனுஸ்ஸத⁴ம்மம் அத்துபனாயிகம் அலமரியஞாணத³ஸ்ஸனம் ஸமுதா³சரேய்ய ‘‘இதி ஜானாமி, இதி பஸ்ஸாமீ’’தி, ததோ அபரேன ஸமயேன ஸமனுக்³கா³ஹீயமானோ வா அஸமனுக்³கா³ஹீயமானோ வா ஆபன்னோ விஸுத்³தா⁴பேக்கோ² ஏவம் வதே³ய்ய ‘‘அஜானமேவம் ஆவுஸோ அவசம் ஜானாமி, அபஸ்ஸம் பஸ்ஸாமி, துச்ச²ம் முஸா விலபி’’ந்தி, அஞ்ஞத்ர அதி⁴மானா, அயம்பி பாராஜிகோ ஹோதி அஸம்வாஸோ.

உத்³தி³ட்டா² கோ² ஆயஸ்மந்தோ சத்தாரோ பாராஜிகா த⁴ம்மா. யேஸம் பி⁴க்கு² அஞ்ஞதரம் வா அஞ்ஞதரம் வா ஆபஜ்ஜித்வா ந லப⁴தி பி⁴க்கூ²ஹி ஸத்³தி⁴ம் ஸம்வாஸம் யதா² புரே, ததா² பச்சா², பாராஜிகோ ஹோதி அஸம்வாஸோ. தத்தா²யஸ்மந்தே புச்சா²மி, கச்சித்த² பரிஸுத்³தா⁴, து³தியம்பி புச்சா²மி, கச்சித்த² பரிஸுத்³தா⁴, ததியம்பி புச்சா²மி, கச்சித்த² பரிஸுத்³தா⁴, பரிஸுத்³தே⁴த்தா²யஸ்மந்தோ, தஸ்மா துண்ஹீ, ஏவமேதம் தா⁴ரயாமீதி.

பாராஜிகம் நிட்டி²தம்.

ஸங்கா⁴தி³ஸேஸுத்³தே³ஸோ

இமே கோ² பனாயஸ்மந்தோ தேரஸ ஸங்கா⁴தி³ஸேஸா

த⁴ம்மா உத்³தே³ஸம் ஆக³ச்ச²ந்தி.

ஸுக்கவிஸ்ஸட்டி²ஸிக்கா²பத³ம்

1. ஸஞ்சேதனிகா ஸுக்கவிஸ்ஸட்டி² அஞ்ஞத்ர ஸுபினந்தா ஸங்கா⁴தி³ஸேஸோ.

காயஸம்ஸக்³க³ஸிக்கா²பத³ம்

2. யோ பன பி⁴க்கு² ஓதிண்ணோ விபரிணதேன சித்தேன மாதுகா³மேன ஸத்³தி⁴ம் காயஸம்ஸக்³க³ம் ஸமாபஜ்ஜேய்ய ஹத்த²க்³கா³ஹம் வா வேணிக்³கா³ஹம் வா அஞ்ஞதரஸ்ஸ வா அஞ்ஞதரஸ்ஸ வா அங்க³ஸ்ஸ பராமஸனம், ஸங்கா⁴தி³ஸேஸோ.

து³ட்டு²ல்லவாசாஸிக்கா²பத³ம்

3. யோ பன பி⁴க்கு² ஓதிண்ணோ விபரிணதேன சித்தேன மாதுகா³மம் து³ட்டு²ல்லாஹி வாசாஹி ஓபா⁴ஸேய்ய யதா² தம் யுவா யுவதிம் மேது²னுபஸம்ஹிதாஹி, ஸங்கா⁴தி³ஸேஸோ.

அத்தகாமபாரிசரியஸிக்கா²பத³ம்

4. யோ பன பி⁴க்கு² ஓதிண்ணோ விபரிணதேன சித்தேன மாதுகா³மஸ்ஸ ஸந்திகே அத்தகாமபாரிசரியாய வண்ணம் பா⁴ஸேய்ய ‘‘ஏதத³க்³க³ம் ப⁴கி³னி பாரிசரியானம் யா மாதி³ஸம் ஸீலவந்தம் கல்யாணத⁴ம்மம் ப்³ரஹ்மசாரிம் ஏதேன த⁴ம்மேன பரிசரேய்யா’’தி மேது²னுபஸம்ஹிதேன, ஸங்கா⁴தி³ஸேஸோ.

ஸஞ்சரித்தஸிக்கா²பத³ம்

5. யோ பன பி⁴க்கு² ஸஞ்சரித்தம் ஸமாபஜ்ஜேய்ய இத்தி²யா வா புரிஸமதிம் புரிஸஸ்ஸ வா இத்தி²மதிம், ஜாயத்தனே வா ஜாரத்தனே வா, அந்தமஸோ தங்க²ணிகாயபி, ஸங்கா⁴தி³ஸேஸோ.

குடிகாரஸிக்கா²பத³ம்

6. ஸஞ்ஞாசிகாய பன பி⁴க்கு²னா குடிம் காரயமானேன அஸ்ஸாமிகம் அத்துத்³தே³ஸம் பமாணிகா காரேதப்³பா³, தத்ரித³ம் பமாணம், தீ³க⁴ஸோ த்³வாத³ஸ வித³த்தி²யோ ஸுக³தவித³த்தி²யா, திரியம் ஸத்தந்தரா, பி⁴க்கூ² அபி⁴னேதப்³பா³ வத்து²தே³ஸனாய, தேஹி பி⁴க்கூ²ஹி வத்து² தே³ஸேதப்³ப³ம் அனாரம்ப⁴ம் ஸபரிக்கமனம். ஸாரம்பே⁴ சே பி⁴க்கு² வத்து²ஸ்மிம் அபரிக்கமனே ஸஞ்ஞாசிகாய குடிம் காரேய்ய, பி⁴க்கூ² வா அனபி⁴னேய்ய வத்து²தே³ஸனாய, பமாணம் வா அதிக்காமேய்ய, ஸங்கா⁴தி³ஸேஸோ.

விஹாரகாரஸிக்கா²பத³ம்

7. மஹல்லகம் பன பி⁴க்கு²னா விஹாரம் காரயமானேன ஸஸ்ஸாமிகம் அத்துத்³தே³ஸம் பி⁴க்கூ² அபி⁴னேதப்³பா³ வத்து²தே³ஸனாய, தேஹி பி⁴க்கூ²ஹி வத்து² தே³ஸேதப்³ப³ம் அனாரம்ப⁴ம் ஸபரிக்கமனம். ஸாரம்பே⁴ சே பி⁴க்கு² வத்து²ஸ்மிம் அபரிக்கமனே மஹல்லகம் விஹாரம் காரேய்ய, பி⁴க்கூ² வா அனபி⁴னேய்ய வத்து²தே³ஸனாய, ஸங்கா⁴தி³ஸேஸோ.

து³ட்ட²தோ³ஸஸிக்கா²பத³ம்

8. யோ பன பி⁴க்கு² பி⁴க்கு²ம் து³ட்டோ² தோ³ஸோ அப்பதீதோ அமூலகேன பாராஜிகேன த⁴ம்மேன அனுத்³த⁴ம்ஸேய்ய ‘‘அப்பேவ நாம நம் இமம்ஹா ப்³ரஹ்மசரியா சாவேய்ய’’ந்தி, ததோ அபரேன ஸமயேன ஸமனுக்³கா³ஹீயமானோ வா அஸமனுக்³கா³ஹீயமானோ வா அமூலகஞ்சேவ தம் அதி⁴கரணம் ஹோதி, பி⁴க்கு² ச தோ³ஸம் பதிட்டா²தி, ஸங்கா⁴தி³ஸேஸோ.

அஞ்ஞபா⁴கி³யஸிக்கா²பத³ம்

9. யோ பன பி⁴க்கு² பி⁴க்கு²ம் து³ட்டோ² தோ³ஸோ அப்பதீதோ அஞ்ஞபா⁴கி³யஸ்ஸ அதி⁴கரணஸ்ஸ கிஞ்சிதே³ஸம் லேஸமத்தம் உபாதா³ய பாராஜிகேன த⁴ம்மேன அனுத்³த⁴ம்ஸேய்ய ‘‘அப்பேவ நாம நம் இமம்ஹா ப்³ரஹ்மசரியா சாவேய்ய’’ந்தி, ததோ அபரேன ஸமயேன ஸமனுக்³கா³ஹீயமானோ வா அஸமனுக்³கா³ஹீயமானோ வா அஞ்ஞபா⁴கி³யஞ்சேவ தம் அதி⁴கரணம் ஹோதி கோசிதே³ஸோ லேஸமத்தோ உபாதி³ன்னோ, பி⁴க்கு² ச தோ³ஸம் பதிட்டா²தி, ஸங்கா⁴தி³ஸேஸோ.

ஸங்க⁴பே⁴த³ஸிக்கா²பத³ம்

10. யோ பன பி⁴க்கு² ஸமக்³க³ஸ்ஸ ஸங்க⁴ஸ்ஸ பே⁴தா³ய பரக்கமேய்ய, பே⁴த³னஸம்வத்தனிகம் வா அதி⁴கரணம் ஸமாதா³ய பக்³க³ய்ஹ திட்டே²ய்ய, ஸோ பி⁴க்கு² பி⁴க்கூ²ஹி ஏவமஸ்ஸ வசனீயோ ‘‘மாயஸ்மா ஸமக்³க³ஸ்ஸ ஸங்க⁴ஸ்ஸ பே⁴தா³ய பரக்கமி, பே⁴த³னஸம்வத்தனிகம் வா அதி⁴கரணம் ஸமாதா³ய பக்³க³ய்ஹ அட்டா²ஸி, ஸமேதாயஸ்மா ஸங்கே⁴ன, ஸமக்³கோ³ ஹி ஸங்கோ⁴ ஸம்மோத³மானோ அவிவத³மானோ ஏகுத்³தே³ஸோ பா²ஸு விஹரதீ’’தி, ஏவஞ்ச ஸோ பி⁴க்கு² பி⁴க்கூ²ஹி வுச்சமானோ ததே²வ பக்³க³ண்ஹேய்ய, ஸோ பி⁴க்கு² பி⁴க்கூ²ஹி யாவததியம் ஸமனுபா⁴ஸிதப்³போ³ தஸ்ஸ படினிஸ்ஸக்³கா³ய, யாவததியஞ்சே ஸமனுபா⁴ஸியமானோ தம் படினிஸ்ஸஜ்ஜேய்ய, இச்சேதம் குஸலம், நோ சே படினிஸ்ஸஜ்ஜேய்ய, ஸங்கா⁴தி³ஸேஸோ.

பே⁴தா³னுவத்தகஸிக்கா²பத³ம்

11. தஸ்ஸேவ கோ² பன பி⁴க்கு²ஸ்ஸ பி⁴க்கூ² ஹோந்தி அனுவத்தகா வக்³க³வாத³கா ஏகோ வா த்³வே வா தயோ வா, தே ஏவம் வதே³ய்யும் ‘‘மாயஸ்மந்தோ ஏதம் பி⁴க்கு²ம் கிஞ்சி அவசுத்த², த⁴ம்மவாதீ³ சேஸோ பி⁴க்கு², வினயவாதீ³ சேஸோ பி⁴க்கு², அம்ஹாகஞ்சேஸோ பி⁴க்கு² ச²ந்த³ஞ்ச ருசிஞ்ச ஆதா³ய வோஹரதி, ஜானாதி, நோ பா⁴ஸதி, அம்ஹாகம்பேதம் க²மதீ’’தி, தே பி⁴க்கூ² பி⁴க்கூ²ஹி ஏவமஸ்ஸு வசனீயா ‘‘மாயஸ்மந்தோ ஏவம் அவசுத்த², ந சேஸோ பி⁴க்கு² த⁴ம்மவாதீ³, ந சேஸோ பி⁴க்கு² வினயவாதீ³, மாயஸ்மந்தானம்பி ஸங்க⁴பே⁴தோ³ ருச்சித்த², ஸமேதாயஸ்மந்தானம் ஸங்கே⁴ன, ஸமக்³கோ³ ஹி ஸங்கோ⁴ ஸம்மோத³மானோ அவிவத³மானோ ஏகுத்³தே³ஸோ பா²ஸு விஹரதீ’’தி, ஏவஞ்ச தே பி⁴க்கூ² பி⁴க்கூ²ஹி வுச்சமானா ததே²வ பக்³க³ண்ஹேய்யும், தே பி⁴க்கூ² பி⁴க்கூ²ஹி யாவததியம் ஸமனுபா⁴ஸிதப்³பா³ தஸ்ஸ படினிஸ்ஸக்³கா³ய, யாவததியஞ்சே ஸமனுபா⁴ஸியமானா தம் படினிஸ்ஸஜ்ஜேய்யும், இச்சேதம் குஸலம், நோ சே படினிஸ்ஸஜ்ஜேய்யும், ஸங்கா⁴தி³ஸேஸோ.

து³ப்³ப³சஸிக்கா²பத³ம்

12. பி⁴க்கு² பனேவ து³ப்³ப³சஜாதிகோ ஹோதி உத்³தே³ஸபரியாபன்னேஸு ஸிக்கா²பதே³ஸு பி⁴க்கூ²ஹி ஸஹத⁴ம்மிகம் வுச்சமானோ அத்தானம் அவசனீயம் கரோதி ‘‘மா மம் ஆயஸ்மந்தோ கிஞ்சி அவசுத்த² கல்யாணம் வா பாபகம் வா, அஹம்பாயஸ்மந்தே ந கிஞ்சி வக்கா²மி கல்யாணம் வா பாபகம் வா, விரமதா²யஸ்மந்தோ மம வசனாயா’’தி, ஸோ பி⁴க்கு² பி⁴க்கூ²ஹி ஏவமஸ்ஸ வசனீயோ ‘‘மாயஸ்மா அத்தானம் அவசனீயம் அகாஸி, வசனீயமேவாயஸ்மா அத்தானம் கரோது, ஆயஸ்மாபி பி⁴க்கூ² வத³து ஸஹத⁴ம்மேன, பி⁴க்கூ²பி ஆயஸ்மந்தம் வக்க²ந்தி ஸஹத⁴ம்மேன, ஏவம் ஸம்வத்³தா⁴ ஹி தஸ்ஸ ப⁴க³வதோ பரிஸா யதி³த³ம் அஞ்ஞமஞ்ஞவசனேன அஞ்ஞமஞ்ஞவுட்டா²பனேனா’’தி, ஏவஞ்ச ஸோ பி⁴க்கு² பி⁴க்கூ²ஹி வுச்சமானோ ததே²வ பக்³க³ண்ஹேய்ய, ஸோ பி⁴க்கு² பி⁴க்கூ²ஹி யாவததியம் ஸமனுபா⁴ஸிதப்³போ³ தஸ்ஸ படினிஸ்ஸக்³கா³ய, யாவததியஞ்சே ஸமனுபா⁴ஸியமானோ தம் படினிஸ்ஸஜ்ஜேய்ய, இச்சேதம் குஸலம், நோ சே படினிஸ்ஸஜ்ஜேய்ய, ஸங்கா⁴தி³ஸேஸோ.

குலதூ³ஸகஸிக்கா²பத³ம்

13. பி⁴க்கு² பனேவ அஞ்ஞதரம் கா³மம் வா நிக³மம் வா உபனிஸ்ஸாய விஹரதி குலதூ³ஸகோ பாபஸமாசாரோ, தஸ்ஸ கோ² பாபகா ஸமாசாரா தி³ஸ்ஸந்தி சேவ ஸுய்யந்தி ச, குலானி ச தேன து³ட்டா²னி தி³ஸ்ஸந்தி சேவ ஸுய்யந்தி ச, ஸோ பி⁴க்கு² பி⁴க்கூ²ஹி ஏவமஸ்ஸ வசனீயோ ‘‘ஆயஸ்மா கோ² குலதூ³ஸகோ பாபஸமாசாரோ, ஆயஸ்மதோ கோ² பாபகா ஸமாசாரா தி³ஸ்ஸந்தி சேவ ஸுய்யந்தி ச, குலானி சாயஸ்மதா து³ட்டா²னி தி³ஸ்ஸந்தி சேவ ஸுய்யந்தி ச, பக்கமதாயஸ்மா இமம்ஹா ஆவாஸா, அலம் தே இத⁴ வாஸேனா’’தி, ஏவஞ்ச ஸோ பி⁴க்கு² பி⁴க்கூ²ஹி வுச்சமானோ தே பி⁴க்கூ² ஏவம் வதே³ய்ய ‘‘ச²ந்த³கா³மினோ ச பி⁴க்கூ², தோ³ஸகா³மினோ ச பி⁴க்கூ², மோஹகா³மினோ ச பி⁴க்கூ², ப⁴யகா³மினோ ச பி⁴க்கூ² தாதி³ஸிகாய ஆபத்தியா ஏகச்சம் பப்³பா³ஜேந்தி, ஏகச்சம் ந பப்³பா³ஜேந்தீ’’தி, ஸோ பி⁴க்கு² பி⁴க்கூ²ஹி ஏவமஸ்ஸ வசனீயோ ‘‘மாயஸ்மா ஏவம் அவச, ந ச பி⁴க்கூ² ச²ந்த³கா³மினோ, ந ச பி⁴க்கூ² தோ³ஸகா³மினோ, ந ச பி⁴க்கூ² மோஹகா³மினோ, ந ச பி⁴க்கூ² ப⁴யகா³மினோ, ஆயஸ்மா கோ² குலதூ³ஸகோ பாபஸமாசாரோ, ஆயஸ்மதோ கோ² பாபகா ஸமாசாரா தி³ஸ்ஸந்தி சேவ ஸுய்யந்தி ச, குலானி சாயஸ்மதா து³ட்டா²னி தி³ஸ்ஸந்தி சேவ ஸுய்யந்தி ச, பக்கமதாயஸ்மா இமம்ஹா ஆவாஸா, அலம் தே இத⁴ வாஸேனா’’தி, ஏவஞ்ச ஸோ பி⁴க்கு² பி⁴க்கூ²ஹி வுச்சமானோ ததே²வ பக்³க³ண்ஹேய்ய, ஸோ பி⁴க்கு² பி⁴க்கூ²ஹி யாவததியம் ஸமனுபா⁴ஸிதப்³போ³ தஸ்ஸ படினிஸ்ஸக்³கா³ய, யாவததியஞ்சே ஸமனுபா⁴ஸியமானோ தம் படினிஸ்ஸஜ்ஜேய்ய, இச்சேதம் குஸலம், நோ சே படினிஸ்ஸஜ்ஜேய்ய, ஸங்கா⁴தி³ஸேஸோ.

உத்³தி³ட்டா² கோ² ஆயஸ்மந்தோ தேரஸ ஸங்கா⁴தி³ஸேஸா த⁴ம்மா நவ பட²மாபத்திகா, சத்தாரோ யாவததியகா. யேஸம் பி⁴க்கு² அஞ்ஞதரம் வா அஞ்ஞதரம் வா ஆபஜ்ஜித்வா யாவதீஹம் ஜானம் படிச்சா²தே³தி, தாவதீஹம் தேன பி⁴க்கு²னா அகாமா பரிவத்த²ப்³ப³ம். பரிவுத்த²பரிவாஸேன பி⁴க்கு²னா உத்தரி சா²ரத்தம் பி⁴க்கு²மானத்தாய படிபஜ்ஜிதப்³ப³ம், சிண்ணமானத்தோ பி⁴க்கு² யத்த² ஸியா வீஸதிக³ணோ பி⁴க்கு²ஸங்கோ⁴, தத்த² ஸோ பி⁴க்கு² அப்³பே⁴தப்³போ³. ஏகேனபி சே ஊனோ வீஸதிக³ணோ பி⁴க்கு²ஸங்கோ⁴ தம் பி⁴க்கு²ம் அப்³பே⁴ய்ய, ஸோ ச பி⁴க்கு² அனப்³பி⁴தோ, தே ச பி⁴க்கூ² கா³ரய்ஹா, அயம் தத்த² ஸாமீசி. தத்தா²யஸ்மந்தே புச்சா²மி, கச்சித்த² பரிஸுத்³தா⁴, து³தியம்பி புச்சா²மி, கச்சித்த² பரிஸுத்³தா⁴, ததியம்பி புச்சா²மி, கச்சித்த² பரிஸுத்³தா⁴, பரிஸுத்³தே⁴த்தா²யஸ்மந்தோ, தஸ்மா துண்ஹீ, ஏவமேதம் தா⁴ரயாமீதி.

ஸங்கா⁴தி³ஸேஸோ நிட்டி²தோ.

அனியதுத்³தே³ஸோ

இமே கோ² பனாயஸ்மந்தோ த்³வே அனியதா த⁴ம்மா

உத்³தே³ஸம் ஆக³ச்ச²ந்தி.

பட²மஅனியதஸிக்கா²பத³ம்

1. யோ பன பி⁴க்கு² மாதுகா³மேன ஸத்³தி⁴ம் ஏகோ ஏகாய ரஹோ படிச்ச²ன்னே ஆஸனே அலம்கம்மனியே நிஸஜ்ஜம் கப்பேய்ய, தமேனம் ஸத்³தே⁴ய்யவசஸா உபாஸிகா தி³ஸ்வா திண்ணம் த⁴ம்மானம் அஞ்ஞதரேன வதே³ய்ய பாராஜிகேன வா ஸங்கா⁴தி³ஸேஸேன வா பாசித்தியேன வா, நிஸஜ்ஜம் பி⁴க்கு² படிஜானமானோ திண்ணம் த⁴ம்மானம் அஞ்ஞதரேன காரேதப்³போ³ பாராஜிகேன வா ஸங்கா⁴தி³ஸேஸேன வா பாசித்தியேன வா, யேன வா ஸா ஸத்³தே⁴ய்யவசஸா உபாஸிகா வதே³ய்ய, தேன ஸோ பி⁴க்கு² காரேதப்³போ³, அயம் த⁴ம்மோ அனியதோ.

து³தியஅனியதஸிக்கா²பத³ம்

2. ந ஹேவ கோ² பன படிச்ச²ன்னம் ஆஸனம் ஹோதி நாலம்கம்மனியம், அலஞ்ச கோ² ஹோதி மாதுகா³மம் து³ட்டு²ல்லாஹி வாசாஹி ஓபா⁴ஸிதும், யோ பன பி⁴க்கு² ததா²ரூபே ஆஸனே மாதுகா³மேன ஸத்³தி⁴ம் ஏகோ ஏகாய ரஹோ நிஸஜ்ஜம் கப்பேய்ய, தமேனம் ஸத்³தே⁴ய்யவசஸா உபாஸிகா தி³ஸ்வா த்³வின்னம் த⁴ம்மானம் அஞ்ஞதரேன வதே³ய்ய ஸங்கா⁴தி³ஸேஸேன வா பாசித்தியேன வா, நிஸஜ்ஜம் பி⁴க்கு² படிஜானமானோ த்³வின்னம் த⁴ம்மானம் அஞ்ஞதரேன காரேதப்³போ³ ஸங்கா⁴தி³ஸேஸேன வா பாசித்தியேன வா, யேன வா ஸா ஸத்³தே⁴ய்யவசஸா உபாஸிகா வதே³ய்ய, தேன ஸோ பி⁴க்கு² காரேதப்³போ³, அயம்பி த⁴ம்மோ அனியதோ.

உத்³தி³ட்டா² கோ² ஆயஸ்மந்தோ த்³வே அனியதா த⁴ம்மா. தத்தா²யஸ்மந்தே புச்சா²மி, கச்சித்த² பரிஸுத்³தா⁴, து³தியம்பி புச்சா²மி, கச்சித்த² பரிஸுத்³தா⁴, ததியம்பி புச்சா²மி, கச்சித்த² பரிஸுத்³தா⁴, பரிஸுத்³தே⁴த்தா²யஸ்மந்தோ, தஸ்மா துண்ஹீ, ஏவமேதம் தா⁴ரயாமீதி.

அனியதோ நிட்டி²தோ.

நிஸ்ஸக்³கி³யபாசித்தியா

இமே கோ² பனாயஸ்மந்தோ திம்ஸ நிஸ்ஸக்³கி³யா பாசித்தியா

த⁴ம்மா உத்³தே³ஸம் ஆக³ச்ச²ந்தி.

கதி²னஸிக்கா²பத³ம்

1. நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே த³ஸாஹபரமம் அதிரேகசீவரம் தா⁴ரேதப்³ப³ம், தம் அதிக்காமயதோ நிஸ்ஸக்³கி³யம் பாசித்தியம்.

உதோ³ஸிதஸிக்கா²பத³ம்

2. நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே ஏகரத்தம்பி சே பி⁴க்கு² திசீவரேன விப்பவஸேய்ய, அஞ்ஞத்ர பி⁴க்கு²ஸம்முதியா நிஸ்ஸக்³கி³யம் பாசித்தியம்.

அகாலசீவரஸிக்கா²பத³ம்

3. நிட்டி²தசீவரஸ்மிம் பி⁴க்கு²னா உப்³ப⁴தஸ்மிம் கதி²னே பி⁴க்கு²னோ பனேவ அகாலசீவரம் உப்பஜ்ஜேய்ய, ஆகங்க²மானேன பி⁴க்கு²னா படிக்³க³ஹேதப்³ப³ம், படிக்³க³ஹேத்வா கி²ப்பமேவ காரேதப்³ப³ம், நோ சஸ்ஸ பாரிபூரி, மாஸபரமம் தேன பி⁴க்கு²னா தம் சீவரம் நிக்கி²பிதப்³ப³ம் ஊனஸ்ஸ பாரிபூரியா ஸதியா பச்சாஸாய. ததோ சே உத்தரி நிக்கி²பேய்ய ஸதியாபி பச்சாஸாய, நிஸ்ஸக்³கி³யம் பாசித்தியம்.

புராணசீவரஸிக்கா²பத³ம்

4. யோ பன பி⁴க்கு² அஞ்ஞாதிகாய பி⁴க்கு²னியா புராணசீவரம் தோ⁴வாபேய்ய வா ரஜாபேய்ய வா ஆகோடாபேய்ய வா, நிஸ்ஸக்³கி³யம் பாசித்தியம்.

சீவரபடிக்³க³ஹணஸிக்கா²பத³ம்

5. யோ பன பி⁴க்கு² அஞ்ஞாதிகாய பி⁴க்கு²னியா ஹத்த²தோ சீவரம் படிக்³க³ண்ஹேய்ய அஞ்ஞத்ர பாரிவத்தகா, நிஸ்ஸக்³கி³யம் பாசித்தியம்.

அஞ்ஞாதகவிஞ்ஞத்திஸிக்கா²பத³ம்

6. யோ பன பி⁴க்கு² அஞ்ஞாதகம் க³ஹபதிம் வா க³ஹபதானிம் வா சீவரம் விஞ்ஞாபேய்ய அஞ்ஞத்ர ஸமயா, நிஸ்ஸக்³கி³யம் பாசித்தியம். தத்தா²யம் ஸமயோ, அச்சி²ன்னசீவரோ வா ஹோதி பி⁴க்கு², நட்ட²சீவரோ வா, அயம் தத்த² ஸமயோ.

ததுத்தரிஸிக்கா²பத³ம்

7. தஞ்சே அஞ்ஞாதகோ க³ஹபதி வா க³ஹபதானீ வா ப³ஹூஹி சீவரேஹி அபி⁴ஹட்டு²ம் பவாரேய்ய, ஸந்தருத்தரபரமம் தேன பி⁴க்கு²னா ததோ சீவரம் ஸாதி³தப்³ப³ம். ததோ சே உத்தரி ஸாதி³யேய்ய, நிஸ்ஸக்³கி³யம் பாசித்தியம்.

பட²மஉபக்க²டஸிக்கா²பத³ம்

8. பி⁴க்கு²ம் பனேவ உத்³தி³ஸ்ஸ அஞ்ஞாதகஸ்ஸ க³ஹபதிஸ்ஸ வா க³ஹபதானியா வா சீவரசேதாபன்னம் உபக்க²டம் ஹோதி ‘‘இமினா சீவரசேதாபன்னேன சீவரம் சேதாபேத்வா இத்த²ன்னாமம் பி⁴க்கு²ம் சீவரேன அச்சா²தே³ஸ்ஸாமீ’’தி, தத்ர சே ஸோ பி⁴க்கு² புப்³பே³ அப்பவாரிதோ உபஸங்கமித்வா சீவரே விகப்பம் ஆபஜ்ஜேய்ய ‘‘ஸாது⁴ வத மம் ஆயஸ்மா இமினா சீவரசேதாபன்னேன ஏவரூபம் வா ஏவரூபம் வா சீவரம் சேதாபேத்வா அச்சா²தே³ஹீ’’தி கல்யாணகம்யதம் உபாதா³ய, நிஸ்ஸக்³கி³யம் பாசித்தியம்.

து³தியஉபக்க²டஸிக்கா²பத³ம்

9. பி⁴க்கு²ம் பனேவ உத்³தி³ஸ்ஸ உபி⁴ன்னம் அஞ்ஞாதகானம் க³ஹபதீனம் வா க³ஹபதானீனம் வா பச்சேகசீவரசேதாபன்னானி உபக்க²டானி ஹோந்தி ‘‘இமேஹி மயம் பச்சேகசீவரசேதாபன்னேஹி பச்சேகசீவரானி சேதாபேத்வா இத்த²ன்னாமம் பி⁴க்கு²ம் சீவரேஹி அச்சா²தே³ஸ்ஸாமா’’தி, தத்ர சே ஸோ பி⁴க்கு² புப்³பே³ அப்பவாரிதோ உபஸங்கமித்வா சீவரே விகப்பம் ஆபஜ்ஜேய்ய ‘‘ஸாது⁴ வத மம் ஆயஸ்மந்தோ இமேஹி பச்சேகசீவரசேதாபன்னேஹி ஏவரூபம் வா ஏவரூபம் வா சீவரம் சேதாபேத்வா அச்சா²தே³த² உபோ⁴வ ஸந்தா ஏகேனா’’தி கல்யாணகம்யதம் உபாதா³ய, நிஸ்ஸக்³கி³யம் பாசித்தியம்.

ராஜஸிக்கா²பத³ம்

10. பி⁴க்கு²ம் பனேவ உத்³தி³ஸ்ஸ ராஜா வா ராஜபோ⁴க்³கோ³ வா ப்³ராஹ்மணோ வா க³ஹபதிகோ வா தூ³தேன சீவரசேதாபன்னம் பஹிணேய்ய ‘‘இமினா சீவரசேதாபன்னேன சீவரம் சேதாபேத்வா இத்த²ன்னாமம் பி⁴க்கு²ம் சீவரேன அச்சா²தே³ஹீ’’தி. ஸோ சே தூ³தோ தம் பி⁴க்கு²ம் உபஸங்கமித்வா ஏவம் வதே³ய்ய ‘‘இத³ம் கோ², ப⁴ந்தே, ஆயஸ்மந்தம் உத்³தி³ஸ்ஸ சீவரசேதாபன்னம் ஆப⁴தம், படிக்³க³ண்ஹாது ஆயஸ்மா சீவரசேதாபன்ன’’ந்தி. தேன பி⁴க்கு²னா ஸோ தூ³தோ ஏவமஸ்ஸ வசனீயோ ‘‘ந கோ² மயம், ஆவுஸோ, சீவரசேதாபன்னம் படிக்³க³ண்ஹாம, சீவரஞ்ச கோ² மயம் படிக்³க³ண்ஹாம காலேன கப்பிய’’ந்தி. ஸோ சே தூ³தோ தம் பி⁴க்கு²ம் ஏவம் வதே³ய்ய ‘‘அத்தி² பனாயஸ்மதோ கோசி வேய்யாவச்சகரோ’’தி. சீவரத்தி²கேன, பி⁴க்க²வே, பி⁴க்கு²னா வேய்யாவச்சகரோ நித்³தி³ஸிதப்³போ³ ஆராமிகோ வா உபாஸகோ வா ‘‘ஏஸோ கோ², ஆவுஸோ, பி⁴க்கூ²னம் வேய்யாவச்சகரோ’’தி. ஸோ சே தூ³தோ தம் வேய்யாவச்சகரம் ஸஞ்ஞாபேத்வா தம் பி⁴க்கு²ம் உபஸங்கமித்வா ஏவம் வதே³ய்ய ‘‘யம் கோ², ப⁴ந்தே, ஆயஸ்மா வேய்யாவச்சகரம் நித்³தி³ஸி, ஸஞ்ஞத்தோ ஸோ மயா, உபஸங்கமதாயஸ்மா காலேன, சீவரேன தம் அச்சா²தே³ஸ்ஸதீ’’தி. சீவரத்தி²கேன, பி⁴க்க²வே, பி⁴க்கு²னா வேய்யாவச்சகரோ உபஸங்கமித்வா த்³வத்திக்க²த்தும் சோதே³தப்³போ³ ஸாரேதப்³போ³ ‘‘அத்தோ² மே, ஆவுஸோ, சீவரேனா’’தி, த்³வத்திக்க²த்தும் சோத³யமானோ ஸாரயமானோ தம் சீவரம் அபி⁴னிப்பா²தே³ய்ய, இச்சேதம் குஸலம், நோ சே அபி⁴னிப்பா²தே³ய்ய, சதுக்க²த்தும் பஞ்சக்க²த்தும் ச²க்க²த்துபரமம் துண்ஹீபூ⁴தேன உத்³தி³ஸ்ஸ டா²தப்³ப³ம், சதுக்க²த்தும் பஞ்சக்க²த்தும் ச²க்க²த்துபரமம் துண்ஹீபூ⁴தோ உத்³தி³ஸ்ஸ திட்ட²மானோ தம் சீவரம் அபி⁴னிப்பா²தே³ய்ய, இச்சேதம் குஸலம், ததோ சே உத்தரி வாயமமானோ தம் சீவரம் அபி⁴னிப்பா²தே³ய்ய, நிஸ்ஸக்³கி³யம் பாசித்தியம். நோ சே அபி⁴னிப்பா²தே³ய்ய, யதஸ்ஸ சீவரசேதாபன்னம் ஆப⁴தம், தத்த² ஸாமம் வா க³ந்தப்³ப³ம், தூ³தோ வா பாஹேதப்³போ³ ‘‘யம் கோ² தும்ஹே ஆயஸ்மந்தோ பி⁴க்கு²ம் உத்³தி³ஸ்ஸ சீவரசேதாபன்னம் பஹிணித்த², ந தம் தஸ்ஸ பி⁴க்கு²னோ கிஞ்சி அத்த²ம் அனுபோ⁴தி, யுஞ்ஜந்தாயஸ்மந்தோ ஸகம், மா வோ ஸகம் வினஸ்ஸா’’தி, அயம் தத்த² ஸாமீசி.

கதி²னவக்³கோ³ பட²மோ.

கோஸியஸிக்கா²பத³ம்

11. யோ பன பி⁴க்கு² கோஸியமிஸ்ஸகம் ஸந்த²தம் காராபேய்ய, நிஸ்ஸக்³கி³யம் பாசித்தியம்.

ஸுத்³த⁴காளகஸிக்கா²பத³ம்

12. யோ பன பி⁴க்கு² ஸுத்³த⁴காளகானம் ஏளகலோமானம் ஸந்த²தம் காராபேய்ய, நிஸ்ஸக்³கி³யம் பாசித்தியம்.

த்³வேபா⁴க³ஸிக்கா²பத³ம்

13. நவம் பன பி⁴க்கு²னா ஸந்த²தம் காரயமானேன த்³வே பா⁴கா³ ஸுத்³த⁴காளகானம் ஏளகலோமானம் ஆதா³தப்³பா³, ததியம் ஓதா³தானம், சதுத்த²ம் கோ³சரியானம். அனாதா³ சே பி⁴க்கு² த்³வே பா⁴கே³ ஸுத்³த⁴காளகானம் ஏளகலோமானம், ததியம் ஓதா³தானம், சதுத்த²ம் கோ³சரியானம், நவம் ஸந்த²தம் காராபேய்ய, நிஸ்ஸக்³கி³யம் பாசித்தியம்.

ச²ப்³ப³ஸ்ஸஸிக்கா²பத³ம்

14. நவம் பன பி⁴க்கு²னா ஸந்த²தம் காராபேத்வா ச²ப்³ப³ஸ்ஸானி தா⁴ரேதப்³ப³ம், ஓரேன சே ச²ன்னம் வஸ்ஸானம் தம் ஸந்த²தம் விஸ்ஸஜ்ஜேத்வா வா அவிஸ்ஸஜ்ஜேத்வா வா அஞ்ஞம் நவம் ஸந்த²தம் காராபேய்ய அஞ்ஞத்ர பி⁴க்கு²ஸம்முதியா, நிஸ்ஸக்³கி³யம் பாசித்தியம்.

நிஸீத³னஸந்த²தஸிக்கா²பத³ம்

15. நிஸீத³னஸந்த²தம் பன பி⁴க்கு²னா காரயமானேன புராணஸந்த²தஸ்ஸ ஸாமந்தா ஸுக³தவித³த்தி² ஆதா³தப்³பா³ து³ப்³ப³ண்ணகரணாய. அனாதா³ சே பி⁴க்கு² புராணஸந்த² தஸ்ஸ ஸாமந்தா ஸுக³தவித³த்தி²ம், நவம் நிஸீத³னஸந்த²தம் காராபேய்ய, நிஸ்ஸக்³கி³யம் பாசித்தியம்.

ஏளகலோமஸிக்கா²பத³ம்

16. பி⁴க்கு²னோ பனேவ அத்³தா⁴னமக்³க³ப்படிபன்னஸ்ஸ ஏளகலோமானி உப்பஜ்ஜேய்யும், ஆகங்க²மானேன பி⁴க்கு²னா படிக்³க³ஹேதப்³பா³னி, படிக்³க³ஹேத்வா தியோஜனபரமம் ஸஹத்தா² ஹரிதப்³பா³னி அஸந்தே ஹாரகே. ததோ சே உத்தரி ஹரேய்ய, அஸந்தேபி ஹாரகே, நிஸ்ஸக்³கி³யம் பாசித்தியம்.

ஏளகலோமதோ⁴வாபனஸிக்கா²பத³ம்

17. யோ பன பி⁴க்கு² அஞ்ஞாதிகாய பி⁴க்கு²னியா ஏளகலோமானி தோ⁴வாபேய்ய வா ரஜாபேய்ய வா விஜடாபேய்ய வா, நிஸ்ஸக்³கி³யம் பாசித்தியம்.

ரூபியஸிக்கா²பத³ம்

18. யோ பன பி⁴க்கு² ஜாதரூபரஜதம் உக்³க³ண்ஹேய்ய வா உக்³க³ண்ஹாபேய்ய வா உபனிக்கி²த்தம் வா ஸாதி³யேய்ய, நிஸ்ஸக்³கி³யம் பாசித்தியம்.

ரூபியஸம்வோஹாரஸிக்கா²பத³ம்

19. யோ பன பி⁴க்கு² நானப்பகாரகம் ரூபியஸம்வோஹாரம் ஸமாபஜ்ஜேய்ய, நிஸ்ஸக்³கி³யம் பாசித்தியம்.

கயவிக்கயஸிக்கா²பத³ம்

20. யோ பன பி⁴க்கு² நானப்பகாரகம் கயவிக்கயம் ஸமாபஜ்ஜேய்ய, நிஸ்ஸக்³கி³யம் பாசித்தியம்.

கோஸியவக்³கோ³ து³தியோ.

பத்தஸிக்கா²பத³ம்

21. த³ஸாஹபரமம் அதிரேகபத்தோ தா⁴ரேதப்³போ³, தம் அதிக்காமயதோ நிஸ்ஸக்³கி³யம் பாசித்தியம்.

ஊனபஞ்சப³ந்த⁴னஸிக்கா²பத³ம்

22. யோ பன பி⁴க்கு² ஊனபஞ்சப³ந்த⁴னேன பத்தேன அஞ்ஞம் நவம் பத்தம் சேதாபேய்ய, நிஸ்ஸக்³கி³யம் பாசித்தியம். தேன பி⁴க்கு²னா ஸோ பத்தோ பி⁴க்கு²பரிஸாய நிஸ்ஸஜ்ஜிதப்³போ³, யோ ச தஸ்ஸா பி⁴க்கு²பரிஸாய பத்தபரியந்தோ, ஸோ தஸ்ஸ பி⁴க்கு²னோ பதா³தப்³போ³ ‘‘அயம் தே பி⁴க்கு² பத்தோ யாவ பே⁴த³னாய தா⁴ரேதப்³போ³’’தி, அயம் தத்த² ஸாமீசி.

பே⁴ஸஜ்ஜஸிக்கா²பத³ம்

23. யானி கோ² பன தானி கி³லானானம் பி⁴க்கூ²னம் படிஸாயனீயானி பே⁴ஸஜ்ஜானி, ஸேய்யதி²த³ம் – ஸப்பி நவனீதம் தேலம் மது⁴ பா²ணிதம், தானி படிக்³க³ஹேத்வா ஸத்தாஹபரமம் ஸன்னிதி⁴காரகம் பரிபு⁴ஞ்ஜிதப்³பா³னி, தம் அதிக்காமயதோ நிஸ்ஸக்³கி³யம் பாசித்தியம்.

வஸ்ஸிகஸாடிகஸிக்கா²பத³ம்

24. ‘‘மாஸோ ஸேஸோ கி³ம்ஹான’’ந்தி பி⁴க்கு²னா வஸ்ஸிகஸாடிகசீவரம் பரியேஸிதப்³ப³ம், ‘‘அத்³த⁴மாஸோ ஸேஸோ கி³ம்ஹான’’ந்தி கத்வா நிவாஸேதப்³ப³ம். ஓரேன சே ‘‘மாஸோ ஸேஸோ கி³ம்ஹான’’ந்தி வஸ்ஸிகஸாடிகசீவரம் பரியேஸேய்ய, ஓரேன‘‘த்³த⁴மாஸோ ஸேஸோ கி³ம்ஹான’’ந்தி கத்வா நிவாஸேய்ய, நிஸ்ஸக்³கி³யம் பாசித்தியம்.

சீவரஅச்சி²ந்த³னஸிக்கா²பத³ம்

25. யோ பன பி⁴க்கு² பி⁴க்கு²ஸ்ஸ ஸாமம் சீவரம் த³த்வா குபிதோ அனத்தமனோ அச்சி²ந்தே³ய்ய வா அச்சி²ந்தா³பேய்ய வா, நிஸ்ஸக்³கி³யம் பாசித்தியம்.

ஸுத்தவிஞ்ஞத்திஸிக்கா²பத³ம்

26. யோ பன பி⁴க்கு² ஸாமம் ஸுத்தம் விஞ்ஞாபேத்வா தந்தவாயேஹி சீவரம் வாயாபேய்ய, நிஸ்ஸக்³கி³யம் பாசித்தியம்.

மஹாபேஸகாரஸிக்கா²பத³ம்

27. பி⁴க்கு²ம் பனேவ உத்³தி³ஸ்ஸ அஞ்ஞாதகோ க³ஹபதி வா க³ஹபதானீ வா தந்தவாயேஹி சீவரம் வாயாபேய்ய, தத்ர சே ஸோ பி⁴க்கு² புப்³பே³ அப்பவாரிதோ தந்தவாயே உபஸங்கமித்வா சீவரே விகப்பம் ஆபஜ்ஜேய்ய ‘‘இத³ம் கோ², ஆவுஸோ, சீவரம் மம் உத்³தி³ஸ்ஸ விய்யதி, ஆயதஞ்ச கரோத², வித்த²தஞ்ச, அப்பிதஞ்ச, ஸுவீதஞ்ச, ஸுப்பவாயிதஞ்ச, ஸுவிலேகி²தஞ்ச, ஸுவிதச்சி²தஞ்ச கரோத², அப்பேவ நாம மயம்பி ஆயஸ்மந்தானம் கிஞ்சிமத்தம் அனுபத³ஜ்ஜேய்யாமா’’தி. ஏவஞ்ச ஸோ பி⁴க்கு² வத்வா கிஞ்சிமத்தம் அனுபத³ஜ்ஜேய்ய அந்தமஸோ பிண்ட³பாதமத்தம்பி, நிஸ்ஸக்³கி³யம் பாசித்தியம்.

அச்சேகசீவரஸிக்கா²பத³ம்

28. த³ஸாஹானாக³தம் கத்திகதேமாஸிகபுண்ணமம் பி⁴க்கு²னோ பனேவ அச்சேகசீவரம் உப்பஜ்ஜேய்ய, அச்சேகம் மஞ்ஞமானேன பி⁴க்கு²னா படிக்³க³ஹேதப்³ப³ம், படிக்³க³ஹேத்வா யாவ சீவரகாலஸமயம் நிக்கி²பிதப்³ப³ம். ததோ சே உத்தரி நிக்கி²பேய்ய, நிஸ்ஸக்³கி³யம் பாசித்தியம்.

ஸாஸங்கஸிக்கா²பத³ம்

29. உபவஸ்ஸம் கோ² பன கத்திகபுண்ணமம் யானி கோ² பன தானி ஆரஞ்ஞகானி ஸேனாஸனானி ஸாஸங்கஸம்மதானி ஸப்படிப⁴யானி, ததா²ரூபேஸு பி⁴க்கு² ஸேனாஸனேஸு விஹரந்தோ ஆகங்க²மானோ திண்ணம் சீவரானம் அஞ்ஞதரம் சீவரம் அந்தரக⁴ரே நிக்கி²பேய்ய, ஸியா ச தஸ்ஸ பி⁴க்கு²னோ கோசிதே³வ பச்சயோ தேன சீவரேன விப்பவாஸாய, சா²ரத்தபரமம் தேன பி⁴க்கு²னா தேன சீவரேன விப்பவஸிதப்³ப³ம். ததோ சே உத்தரி விப்பவஸேய்ய அஞ்ஞத்ர பி⁴க்கு²ஸம்முதியா, நிஸ்ஸக்³கி³யம் பாசித்தியம்.

பரிணதஸிக்கா²பத³ம்

30. யோ பன பி⁴க்கு² ஜானம் ஸங்கி⁴கம் லாப⁴ம் பரிணதம் அத்தனோ பரிணாமேய்ய, நிஸ்ஸக்³கி³யம் பாசித்தியம்.

பத்தவக்³கோ³ ததியோ.

உத்³தி³ட்டா² கோ² ஆயஸ்மந்தோ திம்ஸ நிஸ்ஸக்³கி³யா பாசித்தியா த⁴ம்மா. தத்தா²யஸ்மந்தே புச்சா²மி, கச்சித்த² பரிஸுத்³தா⁴, து³தியம்பி புச்சா²மி, கச்சித்த² பரிஸுத்³தா⁴, ததியம்பி புச்சா²மி, கச்சித்த² பரிஸுத்³தா⁴, பரிஸுத்³தே⁴த்தா²யஸ்மந்தோ, தஸ்மா துண்ஹீ, ஏவமேதம் தா⁴ரயாமீதி.

நிஸ்ஸக்³கி³யபாசித்தியா நிட்டி²தா.

ஸுத்³த⁴பாசித்தியா

இமே கோ² பனாயஸ்மந்தோ த்³வேனவுதி பாசித்தியா

த⁴ம்மா உத்³தே³ஸம் ஆக³ச்ச²ந்தி.

முஸாவாத³ஸிக்கா²பத³ம்

1. ஸம்பஜானமுஸாவாதே³ பாசித்தியம்.

ஓமஸவாத³ஸிக்கா²பத³ம்

2. ஓமஸவாதே³ பாசித்தியம்.

பேஸுஞ்ஞஸிக்கா²பத³ம்

3. பி⁴க்கு²பேஸுஞ்ஞே பாசித்தியம்.

பத³ஸோத⁴ம்மஸிக்கா²பத³ம்

4. யோ பன பி⁴க்கு² அனுபஸம்பன்னம் பத³ஸோ த⁴ம்மம் வாசேய்ய, பாசித்தியம்.

பட²மஸஹஸேய்யஸிக்கா²பத³ம்

5. யோ பன பி⁴க்கு² அனுபஸம்பன்னேன உத்தரிதி³ரத்ததிரத்தம் ஸஹஸேய்யம் கப்பேய்ய, பாசித்தியம்.