2. ஸாமஞ்ஞப²லஸுத்தவண்ணனா

ராஜாமச்சகதா²வண்ணனா

150. ராஜக³ஹேதி ஏத்த² து³க்³க³ஜனபத³ட்டா²னவிஸேஸஸம்பதா³தி³யோக³தோ பதா⁴னபா⁴வேன ராஜூஹி க³ஹிதந்தி ராஜக³ஹந்தி ஆஹ ‘‘மந்தா⁴து…பே… வுச்சதீ’’தி. தத்த² மஹாகோ³விந்தே³ன மஹாஸத்தேன பரிக்³க³ஹிதம் ரேணுஆதீ³ஹி ராஜூஹி பரிக்³க³ஹிதமேவ ஹோதீதி மஹாகோ³விந்த³க்³க³ஹணம். மஹாகோ³விந்தோ³தி மஹானுபா⁴வோ ஏகோ புராதனோ ராஜாதி கேசி. பரிக்³க³ஹிதத்தாதி ராஜதா⁴னீபா⁴வேன பரிக்³க³ஹிதத்தா. பகாரேதி நக³ரமாபனேன ரஞ்ஞா காரிதஸப்³ப³கே³ஹத்தா ராஜக³ஹம், கி³ஜ்ஜ²கூடாதீ³ஹி பரிக்கி²த்தத்தா பப்³ப³தராஜேஹி பரிக்கி²த்தகே³ஹஸதி³ஸந்திபி ராஜக³ஹம், ஸம்பன்னப⁴வனதாய ராஜமானம் கே³ஹந்தி பி ராஜக³ஹம், ஸம்விஹிதாரக்க²தாய அனத்தா²வஹபா⁴வேன உபக³தானம் படிராஜூனம் க³ஹம் கே³ஹபூ⁴தந்திபி ராஜக³ஹம், ராஜூஹி தி³ஸ்வா ஸம்மா பதிட்டா²பிதத்தா தேஸம் க³ஹம் கே³ஹபூ⁴தந்திபி ராஜக³ஹம், ஆராமராமணேய்யகாதீ³ஹி ராஜதே, நிவாஸஸுக²தாதி³னா ஸத்தேஹி மமத்தவஸேன க³ய்ஹதி, பரிக்³க³ய்ஹதீதி வா ராஜக³ஹந்தி ஏதி³ஸே பகாரே ஸோ பதே³ஸோ டா²னவிஸேஸபா⁴வேன உளாரஸத்தபரிபோ⁴கோ³தி ஆஹ ‘‘தம் பனேத’’ந்திஆதி³. தேஸந்தி யக்கா²னம். வஸனவனந்தி ஆபானபூ⁴மிபூ⁴தம் உபவனம்.

அவிஸேஸேனாதி ‘‘பாதிமோக்க²ஸம்வரஸம்வுதோ விஹரதி’’ (ம. நி. 1.69; 3.75; விப⁴. 508), ‘‘பட²மம் ஜா²னம் உபஸம்பஜ்ஜ விஹரதி, (தீ³. நி. 1.226; ஸம். நி. 2.152; அ. நி. 4.123; பாரா. 11) ‘‘மேத்தாஸஹக³தேன சேதஸா ஏகம் தி³ஸம் ப²ரித்வா விஹரதி’’, (தீ³. நி. 1.556; 3.308; ம. நி. 1.77, 459, 509; 2.309, 315, 451, 471; 3.230; விப⁴. 642) ‘‘ஸப்³ப³னிமித்தானம் அமனஸிகாரா அனிமித்தம் சேதோஸமாதி⁴ம் ஸமாபஜ்ஜித்வா விஹரதீ’’திஆதீ³ஸு (ம. நி. 1.459) விய ஸத்³த³ந்தரஸன்னிதா⁴னஸித்³தே⁴ன விஸேஸபராமஸனேன வினா. இரியாய காயிககிரியாய பவத்தனூபாயபா⁴வதோ பதோ²தி இரியாபதோ². டா²னாதீ³னஞ்ஹி க³தினிவத்தி ஆதி³அவத்தா²ஹி வினா ந கஞ்சி காயிககிரியம் பவத்தேதும் ஸக்கா. விஹரதி பவத்ததி ஏதேன, விஹரணஞ்சாதி விஹாரோ, தி³ப்³ப³பா⁴வாவஹோ விஹாரோ தி³ப்³ப³விஹாரோ, மஹக்³க³தஜ்ஜா²னானி. நேத்தியம் பன ‘‘சதஸ்ஸோ ஆருப்பஸமாபத்தியோ ஆனேஞ்ஜா விஹாரா’’தி வுத்தம். தம் தாஸம் மேத்தாஜா²னாதீ³னம் ப்³ரஹ்மவிஹாரதா விய பா⁴வனாவிஸேஸபா⁴வம் ஸந்தா⁴ய வுத்தம். அட்ட²கதா²ஸு பன தி³ப்³ப³பா⁴வாவஹஸாமஞ்ஞதோ தாபி ‘‘தி³ப்³ப³விஹாரா’’ த்வேவ வுத்தா. ஹிதூபஸம்ஹாராதி³வஸேன பவத்தியா ப்³ரஹ்மபூ⁴தா ஸேட்ட²பூ⁴தா விஹாராதி ப்³ரஹ்மவிஹாரா, மேத்தாஜா²னாதி³கா. அனஞ்ஞஸாதா⁴ரணத்தா அரியானம் விஹாராதி அரியவிஹாரா, சதஸ்ஸோபி ப²லஸமாபத்தியோ. ஸமங்கீ³பரிதீ³பனந்தி ஸமங்கி³பா⁴வபரிதீ³பனம். இரியாபத²ஸமாயோக³பரிதீ³பனம் இதரவிஹாரஸமாயோக³பரிதீ³பனஸ்ஸ விஸேஸவசனஸ்ஸ அபா⁴வதோ, இரியாபத²ஸமாயோக³பரிதீ³பனஸ்ஸ ச அத்த²ஸித்³த⁴த்தா. விஹரதீதி ஏத்த² வி-ஸத்³தோ³ விச்சே²த³த்த²ஜோதனோ, ஹரதீதி நேதி, பவத்தேதீதி அத்தோ². தத்த² கஸ்ஸ கேன விச்சி²ந்த³னம், கத²ம் கஸ்ஸ பவத்தனந்தி அந்தோலீனம் சோத³னம் ஸந்தா⁴யாஹ ‘‘ஸோ ஹீ’’திஆதி³.

கோ³சரகா³மத³ஸ்ஸனத்த²ம் ‘‘ராஜக³ஹே’’தி வத்வா பு³த்³தா⁴னம் அனுரூபனிவாஸனட்டா²னத³ஸ்ஸனத்த²ம் ‘‘அம்ப³வனே’’தி வுத்தந்தி ஆஹ ‘‘இத³மஸ்ஸா’’திஆதி³. ஏதந்தி ஏதம் ‘‘ராஜக³ஹே’’தி பு⁴ம்மவசனம் ஸமீபத்தே² ‘‘க³ங்கா³ய கா³வோ சரந்தி, கூபே க³க்³க³குல’’ந்தி ச யதா². குமாரேன ப⁴தோதி குமாரப⁴தோ, ஸோ ஏவ கோமாரப⁴ச்சோ யதா² பி⁴ஸக்³க³மேவ பே⁴ஸஜ்ஜம். தோ³ஸாபி⁴ஸன்னந்தி வாதபித்தாதி³வஸேன உஸ்ஸன்னதோ³ஸம். விரேசேத்வாதி தோ³ஸபகோபதோ விவேசேத்வா.

அட்³ட⁴தேளஸஹீதி அட்³டே⁴ன தேரஸஹி அட்³ட⁴தேரஸஹி பி⁴க்கு²ஸதேஹி. தானி பன பஞ்ஞாஸாய ஊனானி தேரஸபி⁴க்கு²ஸதானி ஹோந்தீதி ஆஹ ‘‘அட்³ட⁴ஸதேனா’’திஆதி³.

ராஜதீதி தி³ப்³ப³தி, ஸோப⁴தீதி அத்தோ². ரஞ்ஜேதீதி ரமேதி. ரஞ்ஞோதி பிது பி³ம்பி³ஸாரரஞ்ஞோ. ஸாஸனட்டே²ன ஹிம்ஸனட்டே²ன ஸத்து.

பா⁴ரியேதி க³ருகே அஞ்ஞேஸம் அஸக்குணேய்யே வா. ஸுவண்ணஸத்த²கேனாதி ஸுவண்ணமயேன ஸத்த²கேன. அயோமயஞ்ஹி ரஞ்ஞோ ஸரீரம் உபனேதும் அயுத்தந்தி வத³தி. ஸுவண்ணஸத்த²கேனாதி வா ஸுவண்ணபரிக்க²தேன ஸத்த²கேன பா³ஹும் பா²லாபேத்வாதி ஸிராவேத⁴வஸேன பா³ஹும் ப²லாபேத்வா உத³கேன ஸம்பி⁴ந்தி³த்வா பாயேஸி கேவலஸ்ஸ லோஹிதஸ்ஸ க³ப்³பி⁴னித்தி²யா து³ஜ்ஜீரபா⁴வதோ. து⁴ராதி து⁴ரபூ⁴தா, க³ணஸ்ஸ, தோ⁴ரய்ஹாதி அத்தோ². து⁴ரம் நீஹராமீதி க³ணது⁴ரம் க³ணப³ந்தி⁴யம் நிப்³ப³த்தேமி. ‘‘புப்³பே³ கோ²’’திஆதி³ க²ந்த⁴கபாளி ஏவ.

போத்த²னியந்தி சு²ரிகம், யம் ‘‘நக²ர’’ந்திபி [போத²னிகந்தி சு²ரிகம், யம் க²ரந்திபி (ஸாரத்த². டீ. 3.339) போத²னிகந்தி சு²ரிகம், க²ரந்திபி (வி. வி. டீ. 2.சூளவக்³க³வண்ணனா 339)] வுச்சதி. தி³வா தி³வஸ்ஸாதி தி³வஸ்ஸபி தி³வா, மஜ்ஜ²ன்ஹிகவேலாயந்தி அத்தோ².

தஸ்ஸா ஸரீரம் லேஹித்வா யாபேதி அத்தூபக்கமேன மரணம் ந யுத்தந்தி. ந ஹி அரியஸாவகா அத்தானம் வினிபாதேந்தீதி. மக்³க³ப²லஸுகே²னாதி மக்³க³ப²லஸுகா²வஹேன ஸோதாபத்திமக்³க³ப²லஸுகூ²பஸஞ்ஹிதேன சங்கமேன யாபேதி.சேதியங்க³ணேதி க³ந்த⁴புப்பா²தீ³ஹி பூஜனட்டா²னபூ⁴தே சேதியங்க³ணே. நிஸஜ்ஜனத்தா²யாதி பி⁴க்கு²ஸங்க⁴னிஸீத³னத்தா²ய. சாதுமஹாராஜிகதே³வலோகே…பே… யக்கோ² ஹுத்வா நிப்³ப³த்தி தத்த² ப³ஹுலம் நிப்³ப³த்தபுப்³ப³தாய சிரபரிசிதனிகந்திவஸேன.

கோ²பே⁴த்வாதி புத்தஸினேஹஸ்ஸ ப³லவபா⁴வதோ, ஸஹஜாதபீதிவேக³ஸ்ஸ ச ஸவிப்பா²ரதாய தம்ஸமுட்டா²னரூபத⁴ம்மேஹி ப²ரணவஸேன ஸகலஸரீரம் ஆலோளேத்வா. தேனாஹ ‘‘அட்டி²மிஞ்ஜம் ஆஹச்ச அட்டா²ஸீ’’தி. பிதுகு³ணந்தி பிது அத்தனி ஸினேஹகு³ணம். முஞ்சாபேத்வாதி ஏத்த² இதி-ஸத்³தோ³ பகாரத்தோ², தேன ‘‘அபி⁴மாரகபுரிஸபேஸனாதி³ப்பகாரேனா’’தி வுத்தே ஏவ பகாரே பச்சாமஸதி. வித்தா²ரகதா²னயோதி அஜாதஸத்துபஸாத³னாதி³வஸேன வித்தா²ரதோ வத்தப்³பா³ய கதா²ய நயமத்தம். கஸ்மா பனேத்த² வித்தா²ரனயா கதா² ந வுத்தாதி ஆஹ ‘‘ஆக³தத்தா பன ஸப்³ப³ம் ந வுத்த’’ந்தி.

கோஸலரஞ்ஞோதி மஹாகோஸலரஞ்ஞோ. பண்டி³தாதி⁴வசனந்தி பண்டி³தவேவசனம். வித³ந்தீதி ஜானந்தி. வேதே³ன ஞாணேன கரணபூ⁴தேன ஈஹதி பவத்ததீதி வேதே³ஹி.

ஏத்தா²தி ஏதஸ்மிம் தி³வஸே. அனஸனேன வாதி வா-ஸத்³தோ³ அனியமத்தோ², தேன ஏகச்சமனோது³ச்சரிதது³ஸ்ஸீல்யாதீ³னி ஸங்க³ண்ஹாதி. ததா² ஹி கோ³பாலகூபோஸதோ² அபி⁴ஜ்ஜா²ஸஹக³தசித்தஸ்ஸ வஸேன வுத்தோ, நிக³ண்டு²போஸதோ² மோஸவஜ்ஜாதி³வஸேன. யதா²ஹ ‘‘ஸோ தேன அபி⁴ஜ்ஜா²ஸஹக³தேன சேதஸா தி³வஸம் அதினாமேதீ’’தி (அ. நி. 1.71), ‘‘இதி யஸ்மிம் ஸமயே ஸச்சே ஸமாத³பேதப்³பா³, முஸாவாதே³ தஸ்மிம் ஸமயே ஸமாத³பேந்தீ’’தி (அ. நி. 1.71) ச ஆதி³. ஏத்தா²தி உபோஸத²ஸத்³தே³. அத்து²த்³தா⁴ரோதி வத்தப்³ப³அத்தா²னம் உத்³தா⁴ரணம்.

நனு ச அத்த²மத்தம் பதி ஸத்³தா³ அபி⁴னிவிஸந்தீதி ந ஏகேன ஸத்³தே³ன அனேகே அத்தா² அபி⁴தீ⁴யந்தீதி? ஸச்சமேதம் ஸத்³த³விஸேஸே அபேக்கி²தே, தேஸம் பன அத்தா²னம் உபோஸத²ஸத்³த³வசனீயதா ஸாமஞ்ஞம் உபாதா³ய வுச்சமானோ அயம் விசாரோ உபோஸத²ஸத்³த³ஸ்ஸ அத்து²த்³தா⁴ரோதி வுத்தோ. ஹேட்டா² ‘‘ஏவம் மே ஸுத’’ந்திஆதீ³ஸு ஆக³தே அத்து²த்³தா⁴ரேபி ஏஸேவ நயோ. காமஞ்ச பாதிமோக்கு²த்³தே³ஸாதி³விஸயோபி உபோஸத²ஸத்³தோ³ ஸாமஞ்ஞரூபோ ஏவ விஸேஸஸத்³த³ஸ்ஸ அவாசகபா⁴வதோ, தாதி³ஸம் பன ஸாமஞ்ஞம் அனாதி³யித்வா அயமத்தோ² வுத்தோதி வேதி³தப்³ப³ம். ஸீலஸுத்³தி⁴வஸேன உபேதேஹி ஸமக்³கே³ஹி வஸீயதி அனுட்டீ²யதீதி உபோஸதோ², பாதிமோக்கு²த்³தே³ஸோ. ஸமாதா³னவஸேன அதி⁴ட்டா²னவஸேன வா உபேச்ச அரியவாஸாதி³அத்த²ம் வஸிதப்³ப³தோ உபோஸதோ², ஸீலம். அனஸனாதி³வஸேன உபேச்ச வஸிதப்³ப³தோ அனுவஸிதப்³ப³தோ உபோஸதோ². உபவாஸோதி ஸமாதா³னம். உபோஸத²குலபூ⁴ததாய நவமஹத்தி²னிகாயபரியாபன்னே ஹத்தி²னாகே³ கிஞ்சி கிரியம் அனபேக்கி²த்வா ரூள்ஹிவஸேன ஸமஞ்ஞாமத்தம் உபோஸதோ²தி ஆஹ ‘‘உபோஸதோ² நாக³ராஜாதிஆதீ³ஸு பஞ்ஞத்தீ’’தி. தி³வஸே பன உபோஸத²ஸத்³த³ப்பவத்தி அட்ட²கதா²யம் வுத்தா ஏவ. ஸுத்³த⁴ஸ்ஸ வே ஸதா³ ப²க்³கூ³தி ஏத்த² பன ஸுத்³த⁴ஸ்ஸாதி ஸப்³ப³ஸோ கிலேஸமலாபா⁴வேன ஸுத்³த⁴ஸ்ஸ. வேதி நிபாதமத்தம். வேதி வா ப்³யத்தந்தி அத்தோ². ஸதா³ ப²க்³கூ³தி நிச்சகாலம்பி ப²க்³கு³ணனக்க²த்தமேவ. யஸ்ஸ ஹி ப²க்³கு³ணமாஸே உத்தரப²க்³கு³ணதி³வஸே தித்த²ன்ஹானம் கரோந்தஸ்ஸ ஸம்வச்ச²ரிகபாபபவாஹனம் ஹோதீதி லத்³தி⁴, தம் ததோ விவேசேதும் இத³ம் ப⁴க³வதா வுத்தம். ஸுத்³த⁴ஸ்ஸுபோஸதோ² ஸதா³தி யதா²வுத்தஸுத்³தி⁴யா ஸுத்³த⁴ஸ்ஸ உபோஸத²ங்கா³னி வதஸமாதா³னானி ச அஸமாதி³யதோபி நிச்சம் உபோஸதோ², உபோஸத²வாஸோ ஏவாதி அத்தோ². பஞ்சத³ஸன்னம் திதீ²னம் பூரணவஸேன பன்னரஸோ.

ப³ஹுஸோ, அதிஸயதோ வா குமுதா³னி ஏத்த² ஸந்தீதி குமுத³வதீ, திஸ்ஸம் குமுத³வதியா. சதுன்னம் மாஸானம் பாரிபூரிபூ⁴தாதி சாதுமாஸீ. ஸா ஏவ பாளியம் சாதுமாஸினீதி வுத்தாதி ஆஹ ‘‘இத⁴ பன சாதுமாஸினீதி வுச்சதீ’’தி. ததா³ கத்திகமாஸஸ்ஸ புண்ணதாய மாஸபுண்ணதா. வஸ்ஸானஸ்ஸ உதுனோ புண்ணதாய உதுபுண்ணதா. கத்திகமாஸலக்கி²தஸ்ஸ ஸம்வச்ச²ரஸ்ஸ புண்ணதாய ஸம்வச்ச²ரபுண்ணதா. ‘‘மா’’ இதி சந்தோ³ வுச்சதி தஸ்ஸ க³தியா தி³வஸஸ்ஸ மினிதப்³ப³தோ. ஏத்த² புண்ணோதி ஏதிஸ்ஸா ரத்தியா ஸப்³ப³கலாபாரிபூரியா புண்ணோ. ததா³ ஹி சந்தோ³ ஸப்³ப³ஸோ பரிபுண்ணோ ஹுத்வா தி³ஸ்ஸதி. ஏத்த² ச ‘‘தத³ஹுபோஸதே² பன்னரஸே’’தி பதா³னி தி³வஸவஸேன வுத்தானி, ‘‘கோமுதி³யா’’திஆதீ³னி ரத்திவஸேன.

ராஜாமச்சபரிவுதோதி ராஜகுலஸமுதா³க³தேஹி அமச்சேஹி பரிவுதோ. அத² வா அனுயுத்தகராஜூஹி சேவ அமச்சேஹி ச பரிவுதோ. சதுருபக்கிலேஸாதி அப்³பா⁴ மஹிகா தூ⁴மரஜோ ராஹூதி இமேஹி சதூஹி உபக்கிலேஸேஹி. ஸன்னிட்டா²னம் கதம் அட்ட²கதா²யம்.

பீதிவசனந்தி பீதிஸமுட்டா²னம் வசனம். யஞ்ஹி வசனம் படிக்³கா³ஹகனிரபேக்க²ம் கேவலம் உளாராய பீதியா வஸேன ஸரஸதோ ஸஹஸாவ முக²தோ நிச்ச²ரதி, தம் இத⁴ ‘‘உதா³ன’’ந்தி அதி⁴ப்பேதம். தேனாஹ ‘‘யம் பீதிவசனம் ஹத³யம் க³ஹேதும் ந ஸக்கோதீ’’திஆதி³.

தோ³ஸேஹி இதா க³தா அபக³தாதி தோ³ஸினா த-காரஸ்ஸ ந-காரம் கத்வா யதா² ‘‘கிலேஸே ஜிதோ விஜிதாவீதி ஜினோ’’தி. அனீய-ஸத்³தோ³ கத்துஅத்தே² வேதி³தப்³போ³தி ஆஹ ‘‘மனம் ரமயதீ’’தி ‘‘ரமணீயா’’தி யதா² ‘‘நிய்யானிகா த⁴ம்மா’’தி. ஜுண்ஹவஸேன ரத்தியா ஸுரூபதாதி ஆஹ ‘‘வுத்ததோ³ஸவிமுத்தாயா’’திஆதி³. தத்த² அப்³பா⁴த³யோ வுத்ததோ³ஸா, தப்³பி³க³மேனேவ சஸ்ஸா த³ஸ்ஸனீயதா, தேன, உதுஸம்பத்தியா ச பாஸாதி³கதா வேதி³தப்³பா³. லக்க²ணம் ப⁴விதும் யுத்தாதி ஏதிஸ்ஸா ரத்தியா யுத்தோ தி³வஸோ மாஸோ உது ஸம்வச்ச²ரோதி ஏவம் தி³வஸமாஸஉதுஸம்வச்ச²ரானம் ஸல்லக்க²ணம் ப⁴விதும் யுத்தா லக்க²ஞ்ஞா, லக்க²ணீயாதி அத்தோ².

‘‘யம் நோ பயிருபாஸதோ சித்தம் பஸீதே³ய்யா’’தி வுத்தத்தா ‘‘ஸமணம் வா ப்³ராஹ்மணம் வா’’தி ஏத்த² பரமத்த²ஸமணோ ச பரமத்த²ப்³ராஹ்மணோ ச அதி⁴ப்பேதோ, ந பப்³ப³ஜ்ஜாமத்தஸமணோ, ந ஜாதிமத்தப்³ராஹ்மணோ சாதி ஆஹ ‘‘ஸமிதபாபதாய ஸமணம். பா³ஹிதபாபதாய ப்³ராஹ்மண’’ந்தி. ப³ஹுவசனே வத்தப்³பே³ ஏகவசனம், ஏகவசனே வா வத்தப்³பே³ ப³ஹுவசனம் வசனப்³யதயோ. அட்ட²கதா²யம் பன ஏகவசனவஸேனேவ ப்³யதயோ த³ஸ்ஸிதோ. அத்தனி, க³ருட்டா²னியே ச ஏகஸ்மிம்பி ப³ஹுவசனப்பயோகோ³ நிரூள்ஹோதி. ஸப்³பே³னபீதி ‘‘ரமணீயா வதா’’திஆதி³னா ஸப்³பே³ன வசனேன. ஓபா⁴ஸனிமித்தகம்மந்தி ஓபா⁴ஸபூ⁴தனிமித்தகம்மம் பரிப்³யத்தம் நிமித்தகரணந்தி அத்தோ². தே³வத³த்தோ சாதி. ச-ஸத்³தோ³ அத்தூபனயனே, தேன யதா² ராஜா அஜாதஸத்து அத்தனோ பிது அரியஸாவகஸ்ஸ ஸத்து²உபட்டா²கஸ்ஸ கா⁴தனேன மஹாபராதோ⁴, ஏவம் ப⁴க³வதோ மஹாஅனத்த²கரஸ்ஸ தே³வத³த்தஸ்ஸ அவஸ்ஸயபா⁴வேன பீதி இமமத்த²ம் உபனேதி. தஸ்ஸ பிட்டி²சா²யாயாதி தஸ்ஸ ஜீவகஸ்ஸ பிட்டி²அபஸ்ஸயேன, தம் பமுக²ம் கத்வா தம் அபஸ்ஸாயாதி அத்தோ². விக்கே²பபச்சே²த³னத்த²ந்தி பா⁴வினியா அத்தனோ கதா²ய உப்பஜ்ஜனகவிக்கே²பனஸ்ஸ பச்சி²ந்த³னத்த²ம், அனுப்பத்திஅத்த²ந்தி அதி⁴ப்பாயோ. தேனாஹ ‘‘தஸ்ஸம் ஹீ’’திஆதி³.

151. ‘‘ஸோ கிரா’’திஆதி³ போராணட்ட²கதா²ய ஆக³தனயோ. ஏஸேவ நயோ பரதோ மக்க²லிபத³னிப்³ப³சனேபி. உபஸங்கமந்தீதி உபக³தா. ததே³வ பப்³ப³ஜ்ஜம் அக்³க³ஹேஸீதி ததே³வ நக்³க³ரூபம் பப்³ப³ஜ்ஜம் கத்வா க³ண்ஹி.

பப்³ப³ஜிதஸமூஹஸங்கா²தோ ஸங்கோ⁴தி பப்³ப³ஜிதஸமூஹதாமத்தேன ஸங்கோ⁴, ந நிய்யானிகதி³ட்டி²ஸுவிஸுத்³த⁴ஸீலஸாமஞ்ஞவஸேன ஸம்ஹதத்தாதி அதி⁴ப்பாயோ. அஸ்ஸ அத்தீ²தி அஸ்ஸ ஸத்து²படிஞ்ஞஸ்ஸ பரிவாரபூ⁴தோ அத்தி². ஸ்வேவாதி பப்³ப³ஜிதஸமூஹஸங்கா²தோவ. கேசி பன ‘‘பப்³ப³ஜிதஸமூஹவஸேன ஸங்கீ⁴, க³ஹட்ட²ஸமூஹவஸேன க³ணீ’’தி வத³ந்தி, தம் தேஸம் மதிமத்தம் க³ணே ஏவ லோகே ஸங்க⁴-ஸத்³த³ஸ்ஸ நிரூள்ஹத்தா. ஆசாரஸிக்கா²பனவஸேனாதி அசேலக வதசரியாதி³ஆசாரஸிக்கா²பனவஸேன. பாகடோதி ஸங்கீ⁴ஆதி³பா⁴வேன பகாஸிதோ. ‘‘அப்பிச்சோ²’’தி வத்வா தத்த² லப்³ப⁴மானம் அப்பிச்ச²த்தம் த³ஸ்ஸேதும் ‘‘அப்பிச்ச²தாய வத்த²ம்பி ந நிவாஸேதீ’’தி வுத்தம். ந ஹி தஸ்மிம் ஸாஸனிகே விய ஸந்தகு³ணனிகூ³ஹணலக்க²ணா அப்பிச்ச²தா லப்³ப⁴தீதி. யஸோதி கித்திஸத்³தோ³. ‘‘தரந்தி ஏதேன ஸம்ஸாரோக⁴’’ந்தி ஏவம் ஸம்மதத்தா தித்த²ம் வுச்சதி லத்³தீ⁴தி ஆஹ ‘‘தித்த²கரோதி லத்³தி⁴கரோ’’தி. ஸாது⁴ஸம்மதோதி ‘‘ஸாதூ⁴’’தி ஸம்மதோ, ந ஸாதூ⁴ஹி ஸம்மதோதி ஆஹ ‘‘அயம் ஸாதூ⁴’’திஆதி³. ‘‘இமானி மே வதஸமாதா³னானி ஏத்தகம் காலம் ஸுசிணானீ’’தி பப்³ப³ஜிததோ பட்டா²ய அதிக்கந்தா ப³ஹூ ரத்தியோ ஜானாதீதி ரத்தஞ்ஞூ. தா பனஸ்ஸ ரத்தியோ சிரகாலபூ⁴தாதி கத்வா சிரம் பப்³ப³ஜிதஸ்ஸ அஸ்ஸாதி சிரபப்³ப³ஜிதோ. தத்த² சிரபப்³ப³ஜிததாக³ஹணேன பு³த்³தி⁴ஸீலதம் த³ஸ்ஸேதி, ரத்தஞ்ஞுதாக³ஹணேன தத்த² ஸம்பஜானதம். அத்³தா⁴னந்தி தீ³க⁴காலம். கித்தகோ பன ஸோதி ஆஹ ‘‘த்³வே தயோ ராஜபரிவட்டே’’தி, த்³வின்னம் திண்ணம் ராஜூனம் ரஜ்ஜம் அனுஸாஸனபடிபாடியோதி அத்தோ². ‘‘அத்³த⁴க³தோ’’தி வத்வா கதம் வயோக³ஹணம் ஓஸானவயாபேக்க²ந்தி ஆஹ ‘‘பச்சி²மவயம் அனுப்பத்தோ’’தி. உப⁴யந்தி ‘‘அத்³த⁴க³தோ, வயோஅனுப்பத்தோ’’தி பத³த்³வயம்.

புப்³பே³ பிதரா ஸத்³தி⁴ம் ஸத்து² ஸந்திகம் க³ந்த்வா தே³ஸனாய ஸுதபுப்³ப³தம் ஸந்தா⁴யாஹ ‘‘ஜா²னாபி⁴ஞ்ஞாதி³…பே… ஸோதுகாமோ’’தி. த³ஸ்ஸனேனாதி ந த³ஸ்ஸனமத்தம், தி³ஸ்வா பன தேன ஸத்³தி⁴ம் ஆலாபஸல்லாபம் கத்வா ததோ அகிரியவாத³ம் ஸுத்வா தேஸம் அனத்தமனோ அஹோஸி. கு³ணகதா²யாதி அபூ⁴தகு³ணகதா²ய. தேனாஹ ‘‘ஸுட்டு²தரம் அனத்தமனோ ஹுத்வா’’தி. யதி³ அனத்தமனோ, கஸ்மா துண்ஹீ அஹோஸீதி ஆஹ ‘‘அனத்தமனோ ஸமானோபீ’’திஆதி³.

152. கோ³ஸாலாயாதி ஏவம் நாமகே கா³மே. வஸ்ஸானகாலே கு³ன்னம் திட்ட²னஸாலாதி ஏகே.

153. படிகிட்ட²தரந்தி நிஹீனதரம். தந்தாவுதானீதி தந்தே பஸாரேத்வா வீதானி. ‘‘ஸீதே ஸீதோ’’திஆதி³னா ச²ஹாகாரேஹி தஸ்ஸ நிஹீனஸ்ஸ நிஹீனதரதம் த³ஸ்ஸேதி.

154. வச்சம் கத்வாபீதி பி-ஸத்³தே³ன போ⁴ஜனம் பு⁴ஞ்ஜித்வாபி கேனசி அஸுசினா மக்கி²தோ பீதி இமமத்த²ம் ஸம்பிண்டே³தி. வாலிகதூ²பம் கத்வாதி வத்தவஸேன வாலிகாய தூ²பம் கத்வா.

156. பலிபு³த்³த⁴னகிலேஸோதி ஸம்ஸாரே பலிபு³த்³த⁴னகிச்சோ ராகா³தி³கிலேஸோ கே²த்தவத்து²புத்ததா³ராதி³விஸயோ.

கோமாரப⁴ச்சஜீவககதா²வண்ணனா

157. ந யதா²தி⁴ப்பாயம் வத்ததீதி கத்வா வுத்தம் ‘‘அனத்தோ² வத மே’’தி. ஜீவகஸ்ஸ துண்ஹீபா⁴வோ மம அதி⁴ப்பாயஸ்ஸ மத்³த³னஸதி³ஸோ, தஸ்மா தம் புச்சி²த்வா கதா²பனேன மம அதி⁴ப்பாயோ பூரேதப்³போ³தி அயமேத்த² ரஞ்ஞோ அஜ்ஜா²ஸயோதி த³ஸ்ஸேந்தோ ‘‘ஹத்தி²ம்ஹி நு கோ² பனா’’திஆதி³மாஹ. கிம் துண்ஹீதி கிம் காரணா துண்ஹீ, கிம் தம் காரணம், யேன துவம் துண்ஹீதி வுத்தம் ஹோதி. தேனாஹ ‘‘கேன காரணேன துண்ஹீ’’தி.

காமம் ஸப்³பா³பி ததா²க³தஸ்ஸ படிபத்தி அனஞ்ஞஸாதா⁴ரணா அச்ச²ரியஅப்³பு⁴தரூபா ச, ததா²பி க³ப்³போ⁴க்கந்தி- அபி⁴ஜாதிஅபி⁴னிக்க²மனஅபி⁴ஸம்போ³தி⁴த⁴ம்மசக்கப்பவத்தன- யமகபாடிஹாரியதே³வோரோஹணானி ஸதே³வகே லோகே அதிவிய ஸுபாகடானி, ந ஸக்கா கேனசி படிபா³ஹிதுந்தி தானியேவேத்த² உத்³த⁴டானி. இத்த²ம்பூ⁴தாக்²யானத்தே²தி இத்த²ம் ஏவம் பகாரோ பூ⁴தோ ஜாதோதி ஏவம் கத²னத்தே². உபயோக³வசனந்தி. ‘‘அப்³பு⁴க்³க³தோ’’தி ஏத்த² அபீ⁴தி உபஸக்³கோ³ இத்த²ம்பூ⁴தாக்²யானத்த²ஜோதகோ, தேன யோக³தோ ‘‘தம் கோ² பன ப⁴க³வந்த’’ந்தி இத³ம் ஸாமிஅத்தே² உபயோக³வசனம், தேனாஹ ‘‘தஸ்ஸ கோ² பன ப⁴க³வதோதி அத்தோ²’’தி. கல்யாணகு³ணஸமன்னாக³தோதி கல்யாணேஹி கு³ணேஹி யுத்தோ, தம் நிஸ்ஸிதோ தப்³பி³ஸயதாயாதி அதி⁴ப்பாயோ. ஸேட்டோ²தி ஏத்தா²பி ஏஸேவ நயோ. கித்தேதப்³ப³தோ கித்தி, ஸா ஏவ ஸத்³த³னீயதோ ஸத்³தோ³தி ஆஹ ‘‘கித்திஸத்³தோ³தி கித்தியேவா’’தி. அபி⁴த்த²வனவஸேன பவத்தோ ஸத்³தோ³ து²திகோ⁴ஸோ. அனஞ்ஞஸாதா⁴ரணகு³ணே ஆரப்³ப⁴ பவத்தத்தா ஸதே³வகம் லோகம் அஜ்ஜோ²த்த²ரித்வா அபி⁴ப⁴வித்வா உக்³க³தோ.

ஸோ ப⁴க³வாதி யோ ஸோ ஸமதிம் ஸபாரமியோ பூரேத்வா ஸப்³ப³கிலேஸே ப⁴ஞ்ஜித்வா அனுத்தரம் ஸம்மாஸம்போ³தி⁴ம் அபி⁴ஸம்பு³த்³தோ⁴ தே³வானம் அதிதே³வோ ஸக்கானம் அதிஸக்கோ ப்³ரஹ்மானம் அதிப்³ரஹ்மா லோகனாதோ² பா⁴க்³யவந்ததாதீ³ஹி காரணேஹி ஸதே³வகே லோகே ‘‘ப⁴க³வா’’தி ஸப்³ப³த்த² பத்த²டகித்திஸத்³தோ³, ஸோ ப⁴க³வா. ‘‘ப⁴க³வா’’தி ச இத³ம் ஸத்து² நாமகித்தனம். தேனாஹ ஆயஸ்மா த⁴ம்மஸேனாபதி ‘‘ப⁴க³வாதி நேதம் நாமம் மாதரா கத’’ந்திஆதி³ (மஹானி. 84). பரதோ பன ப⁴க³வாதி கு³ணகித்தனம்.

யதா² கம்மட்டா²னிகேன ‘‘அரஹ’’ந்திஆதீ³ஸு நவட்டா²னேஸு பச்சேகம் இதி-ஸத்³த³ம் யோஜேத்வா பு³த்³த⁴கு³ணா அனுஸ்ஸரீயந்தி, ஏவம் பு³த்³த⁴கு³ணஸங்கித்தகேனாபீதி த³ஸ்ஸேந்தோ ‘‘இதிபி அரஹம், இதிபி ஸம்மாஸம்பு³த்³தோ⁴…பே… இதிபி ப⁴க³வா’’தி ஆஹ. ‘‘இதிபேதம் அபூ⁴தம், இதிபேதம் அதச்ச²’’ந்திஆதீ³ஸு (தீ³. நி. 1.5) விய இத⁴ இதி-ஸத்³தோ³ ஆஸன்னபச்சக்க²கரணத்தோ², பி-ஸத்³தோ³ ஸம்பிண்ட³னத்தோ², தேன ச தேஸம் கு³ணானம் ப³ஹுபா⁴வோ தீ³பிதோ. தானி ச ஸங்கித்தேந்தேன விஞ்ஞுனா சித்தஸ்ஸ ஸம்முகீ²பூ⁴தானேவ கத்வா ஸங்கித்தேதப்³பா³னீதி த³ஸ்ஸேந்தோ ‘‘இமினா ச இமினா ச காரணேனாதி வுத்தம் ஹோதீ’’தி ஆஹ. ஏவஞ்ஹி நிரூபேத்வா கித்தேந்தே யஸ்ஸ ஸங்கித்தேதி, தஸ்ஸ ப⁴க³வதி அதிவிய அபி⁴ப்பஸாதோ³ ஹோதி. ஆரகத்தாதி ஸுவிதூ³ரத்தா. அரீனந்தி கிலேஸாரீனம். அரானந்தி ஸம்ஸாரசக்கஸ்ஸ அரானம். ஹதத்தாதி விஹதத்தா. பச்சயாதீ³னந்தி சீவராதி³பச்சயானஞ்சேவ பூஜாவிஸேஸானஞ்ச. ததோதி விஸுத்³தி⁴மக்³க³தோ. யதா² ச விஸுத்³தி⁴மக்³க³தோ, ஏவம் தம்ஸம்வண்ணனதோபி நேஸம் வித்தா²ரோ க³ஹேதப்³போ³.

யஸ்மா ஜீவகோ ப³ஹுஸோ ஸத்து²ஸந்திகே பு³த்³த⁴கு³ணே ஸுத்வா டி²தோ, தி³ட்ட²ஸச்சதாய ச ஸத்து²ஸாஸனே விக³தகத²ம்கதோ² வேஸாரஜ்ஜப்பத்தோ, தஸ்மா ஆஹ ‘‘ஜீவகோ பனா’’திஆதி³. பஞ்சவண்ணாயாதி கு²த்³தி³காதி³வஸேன பஞ்சப்பகாராய. நிரந்தரம் பு²டம் அஹோஸி கதாதி⁴காரபா⁴வதோ. கம்மந்தராயவஸேன ஹிஸ்ஸ ரஞ்ஞோ கு³ணஸரீரம் க²துபஹதம் அஹோஸி.

158. ‘‘உத்தம’’ந்தி வத்வா ந கேவலம் ஸேட்ட²பா⁴வோ ஏவேத்த² காரணம், அத² கோ² அப்பஸத்³த³தாபி காரணந்தி த³ஸ்ஸேதும் ‘‘அஸ்ஸயானரத²யானானீ’’திஆதி³ வுத்தம். ஹத்தி²யானேஸு நிப்³பி³ஸேவனமேவ க³ண்ஹந்தோ ஹத்தி²னியோவ கப்பாபேஸி. ரஞ்ஞோ ஆஸங்கானிவத்தனத்த²ம் ஆஸன்னசாரீபா⁴வேன தத்த² இத்தி²யோவ நிஸஜ்ஜாபிதா. ரஞ்ஞோ பரேஸம் து³ருபஸங்கமனபா⁴வத³ஸ்ஸனத்த²ம் தா புரிஸவேஸம் கா³ஹாபேத்வா ஆவுத⁴ஹத்தா² காரிதா. படிவேதே³ஸீதி ஞாபேஸி. ததே³வாதி க³மனம், அக³மனமேவ வா.

159. மஹஞ்சாதி கரணத்தே² பச்சத்தவசனந்தி ஆஹ ‘‘மஹதாசா’’தி. மஹச்சாதி மஹதியா, லிங்க³விபல்லாஸவஸேன வுத்தம், மஹந்தேனாதி வுத்தம் ஹோதி. தேனாஹ ‘‘ராஜானுபா⁴வேனா’’தி ‘‘த்³வின்னம் மஹாரட்டா²னம் இஸ்ஸரியஸிரீ’’தி அங்க³மக³த⁴ரட்டா²னம் ஆதி⁴பச்சமாஹ. ஆஸத்தக²க்³கா³னீதி அம்ஸே ஓலம்ப³னவஸேன ஸன்னத்³த⁴அஸீனி. குலபோ⁴க³இஸ்ஸரியாதி³வஸேன மஹதீ மத்தா ஏதேஸந்தி மஹாமத்தா, மஹானுபா⁴வா ராஜபுரிஸா. விஜ்ஜாத⁴ரதருணா வியாதி விஜ்ஜாத⁴ரகுமாரா விய. ரட்டி²யபுத்தாதி போ⁴ஜபுத்தா. ஹத்தி²க⁴டாதி ஹத்தி²ஸமூஹா. அஞ்ஞமஞ்ஞஸங்க⁴ட்டனாதி அவிச்சே²த³வஸேன க³மனேன அஞ்ஞமஞ்ஞஸம்ப³ந்தா⁴.

சித்துத்ராஸோ ஸயம் பா⁴யனட்டே²ன ப⁴யம் யதா² ததா² பா⁴யதீதி கத்வா. ஞாணம் பா⁴யிதப்³பே³ ஏவ வத்து²ஸ்மிம் ப⁴யதோ உபட்டி²தே ‘‘பா⁴யிதப்³ப³மித³’’ந்தி ப⁴யதோ தீரணதோ ப⁴யம். தேனேவாஹ ‘‘ப⁴யதுபட்டா²னஞாணம் பன பா⁴யதி நபா⁴யதீதி? ந பா⁴யதி. தஞ்ஹி அதீதா ஸங்கா²ரா நிருத்³தா⁴, பச்சுப்பன்னா நிருஜ்ஜ²ந்தி, அனாக³தா நிருஜ்ஜி²ஸ்ஸந்தீதி தீரணமத்தமேவ ஹோதீ’’தி (விஸுத்³தி⁴. 2.751). ஆரம்மணம் பா⁴யதி ஏதஸ்மாதி ப⁴யம். ஓதப்பம் பாபதோ பா⁴யதி ஏதேனாதி ப⁴யம். ப⁴யானகந்தி பா⁴யனாகாரோ. ப⁴யந்தி ஞாணப⁴யம். ஸம்வேக³ந்தி ஸஹோத்தப்பஞாணம் ஸந்தாஸந்தி ஸப்³ப³ஸோ உப்³பி³ஜ்ஜனம். பா⁴யிதப்³ப³ட்டே²ன ப⁴யம் பீ⁴மபா⁴வேன பே⁴ரவந்தி ப⁴யபே⁴ரவம், பீ⁴தப்³ப³வத்து². தேனாஹ ‘‘ஆக³ச்ச²தீ’’தி.

பீ⁴ரும் பஸம்ஸந்தீதி பாபதோ பா⁴யனதோ உத்தஸனதோ பீ⁴ரும் பஸம்ஸந்தி பண்டி³தா. ந ஹி தத்த² ஸூரந்தி தஸ்மிம் பாபகரணே ஸூரம் பக³ப்³ப⁴த⁴ம்ஸினம் ந ஹி பஸம்ஸந்தி. தேனாஹ ‘‘ப⁴யா ஹி ஸந்தோ ந கரோந்தி பாப’’ந்தி. தத்த² ப⁴யாதி பாபுத்ராஸதோ, ஓத்தப்பஹேதூதி அத்தோ². ஸரீரசலனந்தி ப⁴யவஸேனஸரீரஸம்கம்போ. ஏகேதி உத்தரவிஹாரவாஸினோ. ‘‘ராஜக³ஹே’’திஆதி³ தேஸம் அதி⁴ப்பாயவிவரணம். காமம் வயதுல்யோ ‘‘வயஸ்ஸோ’’தி வுச்சதி, ரூள்ஹிரேஸோ, யோ கோசி பன ஸஹாயோ வயஸ்ஸோ, தஸ்மா வயஸ்ஸாபி⁴லாபோதி ஸஹாயாபி⁴லாபோ. ந விப்பலம்பே⁴ஸீதி ந விஸம்வாதே³ஸி. வினஸ்ஸேய்யாதி சித்தவிகா⁴தேன விஹஞ்ஞேய்ய.

ஸாமஞ்ஞப²லபுச்சா²வண்ணனா

160. ப⁴க³வதோ தேஜோதி பு³த்³தா⁴னுபா⁴வோ. ரஞ்ஞோ ஸரீரம் ப²ரி யதா² தம் ஸோணத³ண்ட³ஸ்ஸ ப்³ராஹ்மணஸ்ஸ ப⁴க³வதோ ஸந்திகம் க³ச்ச²ந்தஸ்ஸ அந்தோவனஸண்ட³க³தஸ்ஸ. ஏகேதி உத்தரவிஹாரவாஸினோ.

161. யேன, தேனாதி ச பு⁴ம்மத்தே² கரணவசனந்தி ஆஹ ‘‘யத்த² ப⁴க³வா, தத்த² க³தோ’’தி. ததா³ தஸ்மிம் பி⁴க்கு²ஸங்கே⁴ துண்ஹீபா⁴வஸ்ஸ அனவஸேஸதோ ப்³யாபிபா⁴வம் த³ஸ்ஸேதும் ‘‘துண்ஹீபூ⁴தம் துண்ஹீபூ⁴த’’ந்தி வுத்தந்தி ஆஹ ‘‘யதோ யதோ…பே… மேவாதி அத்தோ²’’தி. ஹத்த²ஸ்ஸ குகதத்தா அஸம்யமோ அஸம்பஜஞ்ஞகிரியா ஹத்த²குக்குச்சந்தி வேதி³தப்³போ³. வா-ஸத்³தோ³ அவுத்தவிகப்பத்தோ², தேன தத³ஞ்ஞோ அஸம்யமபா⁴வோ விபா⁴விதோதி த³ட்ட²ப்³ப³ம். தத்த² பன சக்கு²அஸம்யமோ ஸப்³ப³பட²மோ, து³ன்னிவாரோ சாதி தத³பா⁴வம் த³ஸ்ஸேதும் ‘‘ஸப்³பா³லங்காரபடிமண்டி³த’’ந்திஆதி³ வுத்தம். காயிகவாசஸிகேன உபஸமேன லத்³தே⁴ன இதரோபி அனுமானதோ லத்³தோ⁴ ஏவ ஹோதீதி ஆஹ ‘‘மானஸிகேன சா’’தி. உபஸமந்தி ஸம்யமம், ஆசாரஸம்பத்திந்தி அத்தோ². பஞ்சபரிவட்டேதி பஞ்சபுரிஸபரிவட்டே. பஞ்சஹாகாரேஹீதி ‘‘இட்டா²னிட்டே² தாதீ³’’தி (மஹானி. 38, 192) ஏவம் ஆதி³னா ஆக³தேஹி, பஞ்சவித⁴அரியித்³தி⁴ஸித்³தே⁴ஹி ச பஞ்சஹி பகாரேஹி. தாதி³லக்க²ணேதி தாதி³பா⁴வே.

162. ந மே பஞ்ஹவிஸ்ஸஜ்ஜனே பா⁴ரோ அத்தீ²தி ஸத்து² ஸப்³ப³த்த² அப்படிஹதஞாணசாரதாத³ஸ்ஸனம். யதா³கங்க²ஸீதி ந வத³ந்தி, கத²ம் பன வத³ந்தீதி ஆஹ ‘‘ஸுத்வா வேதி³ஸ்ஸாமா’’தி பதே³ஸஞாணே டி²தத்தா. பு³த்³தா⁴ பன ஸப்³ப³ஞ்ஞுபவாரணம் பவாரேந்தீதி ஸம்ப³ந்தோ⁴. ‘‘யக்க²னரிந்த³தே³வஸமணப்³ராஹ்மணபரிப்³பா³ஜகான’’ந்தி இத³ம் ‘‘புச்சா²வுஸோ யதா³கங்க²ஸீ’’திஆதீ³னி (ஸம். நி. 1.237, 246; ஸு. நி. ஆளவகஸுத்தே) ஸுத்தபதா³னி புச்ச²ந்தானம் யேஸம் புக்³க³லானம் வஸேன ஆக³தானி, தம் த³ஸ்ஸனத்த²ம். ‘‘புச்சா²வுஸோ யதா³கங்க²ஸீ’’தி இத³ம் ஆளவகஸ்ஸ யக்க²ஸ்ஸ ஓகாஸகரணம், ஸேஸானி நரிந்தா³தீ³னம். மனஸிச்ச²ஸீதி மனஸா இச்ச²ஸி. புச்ச²வ்ஹோ, யம் கிஞ்சி மனஸிச்ச²தா²தி பா³வரிஸ்ஸ ஸம்ஸயம் மனஸா புச்ச²வ்ஹோ. தும்ஹாகம் பன ஸப்³பே³ஸம் யம் கிஞ்சி ஸப்³ப³ஸம்ஸயம் மனஸா, அஞ்ஞதா² ச, யதா² இச்ச²த², ததா² புச்ச²வ்ஹோதி அதி⁴ப்பாயோ.

ஸாது⁴ரூபாதி ஸாது⁴ஸபா⁴வா. த⁴ம்மோதி பவேணீத⁴ம்மோ. வுத்³த⁴ந்தி ஸீலாதீ³ஹி பு³த்³தி⁴ப்பத்தம், க³ருந்தி அத்தோ². ஏஸ பா⁴ரோதி ஏஸ ஸம்ஸயூபச்சே²த³னஸங்கா²தோ பா⁴ரோ, ஆக³தோ பா⁴ரோ அவஸ்ஸம் ஆவஹிதப்³போ³தி அதி⁴ப்பாயோ. ஞத்வா ஸயந்தி பரூபதே³ஸேன வினா ஸயமேவ ஞத்வா.

ஸுசிரதேனாதி ஏவம் நாமகேன ப்³ராஹ்மணேன. தக்³கா⁴தி ஏகம்ஸேன. யதா²பி குஸலோ ததா²தி யதா² ஸப்³ப³த⁴ம்மகுஸலோ ஸப்³ப³விதூ³ ஜானாதி கதே²தி, ததா² அஹமக்கி²ஸ்ஸம். ராஜா ச கோ² தம் யதி³ காஹதி வா ந வாதி யோ தம் இத⁴ புச்சி²தும் பேஸேஸி, ஸோ ராஜானம் தயா புச்சி²தம் கரோது வா மா வா, அஹம் பன தே அக்கி²ஸ்ஸம் அக்கி²ஸ்ஸாமி, ஆசிக்கி²ஸ்ஸாமீதி அத்தோ².

163. ஸிப்பனட்டே²ன ஸிக்கி²தப்³ப³தாய ச ஸிப்பமேவ ஸிப்பாயதனம் ஜீவிகாய காரணபா⁴வதோ. ஸேய்யதி²த³ந்தி நிபாதோ, தஸ்ஸ தே கதமேதி அத்தோ². புது² ஸிப்பாயதனானீதி ஹி ஸாதா⁴ரணதோ ஸிப்பானி உத்³தி³ஸித்வா உபரி தம்தம்ஸிப்பூபஜீவினோ நித்³தி³ட்டா² புக்³க³லாதி⁴ட்டா²னகதா²ய பபஞ்சம் பரிஹரிதும். அஞ்ஞதா² யதா²தி⁴ப்பேதானி தாவ ஸிப்பாயதனானி த³ஸ்ஸேத்வா புன தம்தம்ஸிப்பூபஜீவீஸு த³ஸ்ஸியமானேஸு பபஞ்சோ ஸியாதி. தேனாஹ ‘‘ஹத்தா²ரோஹா’’திஆதி³.

ஹத்தி²ம் ஆரோஹந்தி, ஆரோஹாபயந்தி சாதி ஹத்தா²ரோஹா. யேஹி பயோகே³ஹி புரிஸோ ஹத்தி²னோ ஆரோஹனயோக்³கோ³ ஹோதி, ஹத்தி²ஸ்ஸ தம் பயோக³ம் விதா⁴யதம் ஸப்³பே³ஸம் பேதேஸம் க³ஹணம். தேனாஹ ‘‘ஸப்³பே³பீ’’திஆதி³. தத்த² ஹத்தா²சரியா நாம யே ஹத்தி²னோ ஹத்தா²ரோஹகானஞ்ச ஸிக்க²பகா. ஹத்தி²வேஜ்ஜா நாம ஹத்தி²பி⁴ஸக்கா. ஹத்தி²மேண்டா³ நாம ஹத்தீ²னம் பாத³ரக்க²கா. ஆதி³-ஸத்³தே³ன ஹத்தீ²னம் யவஸதா³யகாதி³கே ஸங்க³ண்ஹாதி. அஸ்ஸாரோஹா ரதி²காதி ஏத்தா²பி ஏஸேவ நயோ. ரதே² நியுத்தா ரதி²கா. ரத²ரக்கா² நாம ரத²ஸ்ஸ ஆணிரக்க²கா. த⁴னும் க³ண்ஹந்தி, க³ண்ஹாபேந்தி சாதி த⁴னுக்³க³ஹா, இஸ்ஸாஸா த⁴னுஸிப்பஸ்ஸ ஸிக்கா²பகா ச. தேனாஹ ‘‘த⁴னுஆசரியா இஸ்ஸாஸா’’தி. சேலேன சேலபடாகாய யுத்³தே⁴ அகந்தி க³ச்ச²ந்தீதி சேலகாதி ஆஹ ‘‘யே யுத்³தே⁴ ஜயத⁴ஜம் க³ஹேத்வா புரதோ க³ச்ச²ந்தீ’’தி. யதா² ததா² டி²தே ஸேனிகே ப்³யூஹகரணவஸேன ததோ சலயந்தி உச்சாலேந்தீதி சலகா. ஸகுணக்³கி⁴ஆத³யோ விய மம்ஸபிண்ட³ம் பரஸேனாஸமூஹம் ஸாஹஸிகமஹாயோத⁴தாய சே²த்வா சே²த்வா த³யந்தி உப்பதித்வா உப்பதித்வா க³ச்ச²ந்தீதி பிண்ட³தா³யகா. து³தியவிகப்பே பிண்டே³ த³யந்தி ஜனஸம்மத்³தே³ உப்பதந்தா விய க³ச்ச²ந்தீதி பிண்ட³தா³யகாதி அத்தோ² வேதி³தப்³போ³. உக்³க³துக்³க³தாதி தா²மஜவபரக்கமாதி³வஸேன அதிவிய உக்³க³தா உக்³கா³தி அத்தோ². பக்க²ந்த³ந்தீதி அத்தனோ வீரஸூரபா⁴வேன அஸஜ்ஜமானா பரஸேனம் அனுபவிஸந்தீதி அத்தோ². தா²மஜவப³லபரக்கமாதி³ஸம்பத்தியா மஹானாகா³ விய மஹானாகா³. ஏகந்தஸூராதி ஏகாகிஸூரா அத்தனோ ஸூரபா⁴வேனேவ ஏகாகினோ ஹுத்வா யுஜ்ஜ²னகா. ஸஜாலிகாதி ஸவம்மிகா. ஸரபரித்தாணசம்மந்தி சம்மபரிஸிப்³பி³தம் கே²டகம், சம்மமயம் வா ப²லகம். க⁴ரதா³ஸயோதா⁴தி அந்தோஜாதயோதா⁴.

ஆளாரம் வுச்சதி மஹானஸம், தத்த² நியுத்தாதி ஆளாரிகா, ப⁴த்தகாரா. பூவிகாதி பூவஸம்பாத³கா, யே பூவமேவ நானப்பகாரதோ ஸம்பாதே³த்வா விக்கிணந்தா ஜீவந்தி. கேஸனக²லிக²னாதி³வஸேன மனுஸ்ஸானம் அலங்காரவிதி⁴ம் கப்பேந்தி ஸம்வித³ஹந்தீதி கப்பகா. ந்ஹாபகாதி சுண்ணவிலேபனாதீ³ஹி மலஹரணவண்ணஸம்பாத³னவிதி⁴னா ந்ஹாபேந்தீதி ந்ஹாபகா. நவந்தாதி³விதி⁴னா பவத்தோ க³ணனக³ந்தோ² அந்தரா சி²த்³தா³பா⁴வேன அச்சி²த்³த³கோதி வுச்சதி, தம் க³ணனம் உபனிஸ்ஸாய ஜீவந்தா அச்சி²த்³த³கபாட²கா. ஹத்தே²ன அதி⁴ப்பாயவிஞ்ஞாபனம் ஹத்த²முத்³தா³ ஹத்த²-ஸத்³தோ³ சேத்த² ததே³கதே³ஸேஸு அங்கு³லீஸு த³ட்ட²ப்³போ³. ‘‘ந பு⁴ஞ்ஜமானோ ஸப்³ப³ம் ஹத்த²ம் முகே² பக்கி²பிஸ்ஸாமீ’’திஆதீ³ஸு விய, தஸ்மா அங்கு³லிஸங்கோசனாதி³னா க³ணனா ஹத்த²முத்³தா³ய க³ணனா. சித்தகாராதீ³னீதி. ஆதி³-ஸத்³தே³ன ப⁴மகாரகோட்டகலேக²க விலீவகாராதீ³னம் ஸங்க³ஹோ த³ட்ட²ப்³போ³. தி³ட்டே²வ த⁴ம்மேதி இமஸ்மிம்யேவ அத்தபா⁴வே. ஸந்தி³ட்டி²கமேவாதி அஸம்பராயிகதாய ஸாமம் த³ட்ட²ப்³ப³ம், ஸயம் அனுப⁴விதப்³ப³ம் அத்தபச்சக்க²ம் தி³ட்ட²த⁴ம்மிகந்தி அத்தோ². ஸுகி²தந்தி ஸுக²ப்பத்தம். உபரீதி தே³வலோகே. ஸோ ஹி மனுஸ்ஸலோகதோ உபரிமோ. கம்மஸ்ஸ கதத்தா நிப்³ப³த்தனதோ தஸ்ஸ ப²லம் தஸ்ஸ அக்³கி³ஸிகா² விய ஹோதி, தஞ்ச உத்³த⁴ம் தே³வலோகேதி ஆஹ ‘‘உத்³த⁴ம் அக்³க³ம் அஸ்ஸா அத்தீ²தி உத்³த⁴க்³கி³கா’’தி. ஸக்³க³ம் அரஹதீதி அத்தனோ ப²லபூ⁴தம் ஸக்³க³ம் அரஹதி, தத்த² ஸா நிப்³ப³த்தனாரஹோதி அத்தோ². ஸுக²விபாகாதி இட்ட²விபாகவிபச்சனீகா. ஸுட்டு² அக்³கே³தி அதிவிய உத்தமே உளாரே. த³க்க²ந்தி வட்³ட⁴ந்தி ஏதாயாதி த³க்கி²ணா, பரிச்சாக³மயம் புஞ்ஞந்தி ஆஹ ‘‘த³க்கி²ணம் தா³ன’’ந்தி.

மக்³கோ³ ஸாமஞ்ஞம் ஸமிதபாபஸமணபா⁴வோதி கத்வா. யஸ்மா அயம் ராஜா பப்³ப³ஜிதானம் தா³ஸகஸ்ஸகாதீ³னம் லோகதோ அபி⁴வாத³னாதி³லாபோ⁴ ஸந்தி³ட்டி²கம் ஸாமஞ்ஞப²லந்தி சிந்தேத்வா ‘‘அத்தி² நு கோ² கோசி ஸமணோ வா ப்³ராஹ்மணோ வா ஈதி³ஸமத்த²ம் ஜானந்தோ’’தி வீமம்ஸந்தோ பூரணாதி³கே புச்சி²த்வா தேஸம் கதா²ய அனாராதி⁴தசித்தோ ப⁴க³வந்தம்பி தமத்த²ம் புச்சி², தஸ்மா வுத்தம் ‘‘உபரி ஆக³தம் பன தா³ஸகஸ்ஸகோபமம் ஸந்தா⁴ய புச்ச²தீ’’தி.

கண்ஹபக்க²ந்தி யதா²புச்சி²தே அத்தே² லப்³ப⁴மானம் தி³ட்டி²க³தூபஸஞ்ஹிதம் ஸம்கிலேஸபக்க²ம். ஸுக்கபக்க²ந்தி தப்³பி³து⁴ரம் உபரிஸுத்தாக³தம் வோதா³னபக்க²ம். ஸமணகோலாஹலந்தி ஸமணகோதூஹலம் தம்தம்ஸமணவாதா³னம் அஞ்ஞமஞ்ஞவிரோத⁴ம். ஸமணப⁴ண்ட³னந்தி தேனேவ விரோதே⁴ன ‘‘ஏவம்வாதீ³னம் தேஸம் ஸமணப்³ராஹ்மணானம் அயம் தோ³ஸோ, ஏவம்வாதீ³னம் அயம் தோ³ஸோ’’தி ஏவம் தம்தம்வாத³ஸ்ஸ பரிபா⁴ஸனம். ரஞ்ஞோ பா⁴ரம் கரோந்தோ அத்தனோ தே³ஸனாகோஸல்லேனாதி அதி⁴ப்பாயோ.

164. பண்டி³தபதிரூபகானந்தி ஆமம் விய பக்கானம் பண்டி³தாபா⁴ஸானம்.

பூரணகஸ்ஸபவாத³வண்ணனா

165. ஏகம் இதா³ஹந்தி ஏகாஹம். இத⁴-ஸத்³தோ³ சேத்த² நிபாதமத்தம், ஏகாஹம் ஸமயம் திச்சேவ அத்தோ². ஸரிதப்³ப³யுத்தந்தி அனுஸ்ஸரணானுச்ச²விகம்.

166. ஸஹத்தா² கரோந்தஸ்ஸாதி ஸஹத்தே²னேவ கரோந்தஸ்ஸ. நிஸ்ஸக்³கி³யதா²வராத³யோபி இத⁴ ஸஹத்த²கரணேனேவ ஸங்க³ஹிதா. ஹத்தா²தீ³னீதி ஹத்த²பாத³கண்ணனாஸாதீ³னி. பசனம் த³ஹனம் விபா³த⁴னந்தி ஆஹ ‘‘த³ண்டே³ன உப்பீளேந்தஸ்ஸா’’தி. பபஞ்சஸூத³னியம் ‘‘தஜ்ஜேந்தஸ்ஸ வா’’தி அத்தோ² வுத்தோ, இத⁴ பன தஜ்ஜனம் பரிபா⁴ஸனம் த³ண்டே³னேவ ஸங்க³ஹேத்வா ‘‘த³ண்டே³ன உப்பீளேந்தஸ்ஸ’’ இச்சேவ வுத்தம். ஸோகம் ஸயம் கரோந்தஸ்ஸாதி பரஸ்ஸ ஸோககாரணம் ஸயம் கரோந்தஸ்ஸ, ஸோகம் வா உப்பாதே³ந்தஸ்ஸ. பரேஹீதி அத்தனோ வசனகரேஹி. ஸயம்பி ப²ந்த³தோதி பரஸ்ஸ விபா³த⁴னபயோகே³ன ஸயம்பி ப²ந்த³தோ. ‘‘அதிபாதாபயதோ’’தி பத³ம் ஸுத்³த⁴கத்துஅத்தே² ஹேதுகத்துஅத்தே² ச வத்ததீதி ஆஹ ‘‘ஹனந்தஸ்ஸாபி ஹனாபேந்தஸ்ஸாபீ’’தி. காரணவஸேனாதி காராபனவஸேன.

க⁴ரஸ்ஸ பி⁴த்தி அந்தோ ப³ஹி ச ஸந்தி⁴தா ஹுத்வா டி²தா க⁴ரஸந்தி⁴. கிஞ்சிபி அஸேஸேத்வா நிரவஸேஸோ லோபோ நில்லோபோ. ஏகாகா³ரே நியுத்தோ விலோபோ ஏகாகா³ரிகோ. பரிதோ ஸப்³ப³ஸோ பந்தே² ஹனனம் பரிபந்தோ². பாபம் ந கரீயதி புப்³பே³ அஸஞ்ஞதோ உப்பாதே³தும் அஸக்குணேய்யத்தா, தஸ்மா நத்தி² பாபம். யதி³ ஏவம் கத²ம் ஸத்தா பாபே படிபஜ்ஜந்தீதி ஆஹ ‘‘ஸத்தா பன பாபம் கரோமாதி ஏவம் ஸஞ்ஞினோ ஹோந்தீ’’தி. ஏவம் கிரஸ்ஸ ஹோதி – இமேஸஞ்ஹி ஸத்தானம் ஹிம்ஸாதி³கிரியா ந அத்தானம் பு²ஸதி தஸ்ஸ நிச்சதாய நிப்³பி³காரத்தா ஸரீரம் பன அசேதனம் கட்ட²கலிங்க³ரூபமம், தஸ்மிம் விகோபிதேபி ந கிஞ்சி பாபந்தி. கு²ரனேமினாதி நிஸிதகு²ரமயனேமினா.

க³ங்கா³ய த³க்கி²ணா தி³ஸா அப்பதிரூபதே³ஸோ, உத்தரா தி³ஸா பதிரூபதே³ஸோதி அதி⁴ப்பாயேன‘‘த³க்கி²ணஞ்ச’’திஆதி³ வுத்தந்தி ஆஹ ‘‘த³க்கி²ணதீரே மனுஸ்ஸா கக்க²ளா’’திஆதி³. மஹாயாக³ந்தி மஹாவிஜிதயஞ்ஞஸதி³ஸம் மஹாயாக³ம். உபோஸத²கம்மேன வாதி உபோஸத²கம்மேன ச. த³ம-ஸத்³தோ³ ஹி இந்த்³ரியஸம்வரஸ்ஸ உபோஸத²ஸீலஸ்ஸ ச வாசகோ இதா⁴தி⁴ப்பேதோ. கேசி பன ‘‘உபோஸத²கம்மேனாதி இத³ம் இந்த்³ரியத³மனஸ்ஸ விஸேஸனம், தஸ்மா ‘உபோஸத²கம்மபூ⁴தேன இந்த்³ரியத³மனேனா’’தி அத்த²ம் வத³ந்தி. ஸீலஸம்யமேனாதி காயிகவாசஸிகஸம்வரேன. ஸச்சவஜ்ஜேனாதி ஸச்சவாசாய, தஸ்ஸா விஸும் வசனம் லோகே க³ருதரபுஞ்ஞஸம்மதபா⁴வதோ. யதா² ஹி பாபத⁴ம்மேஸு முஸாவாதோ³ க³ரு, ஏவம் புஞ்ஞத⁴ம்மேஸு ஸச்சவாசா. தேனாஹ ப⁴க³வா ‘‘ஏகம் த⁴ம்மம் அதீதஸ்ஸா’’திஆதி³. பவத்தீதி யோ ‘‘கரோதீ’’தி வுச்சதி, தஸ்ஸ ஸந்தானே ப²லுப்பத்திபச்சயபா⁴வேன உப்பத்தி. ஸப்³ப³தா²தி ‘‘கரோதோ’’திஆதி³னா வுத்தேன ஸப்³ப³ப்பகாரேன. கிரியமேவ படிக்கி²பதி, ந ரஞ்ஞா புட்ட²ம் ஸந்தி³ட்டி²கம் ஸாமஞ்ஞப²லம் ப்³யாகரோதீதி அதி⁴ப்பாயோ. இத³ம் அவதா⁴ரணம் விபாகபடிக்கே²பனிவத்தனத்த²ம். யோ ஹி கம்மம் படிக்கி²பதி, தேன அத்த²தோ விபாகோபி படிக்கி²த்தோ ஏவ நாம ஹோதி. ததா² ஹி வக்க²தி ‘‘கம்மம் படிபா³ஹந்தேனாபீ’’திஆதி³ (தீ³. நி. அட்ட². 1.170-172).

படிராஜூஹி அனபி⁴ப⁴வனீயபா⁴வேன விஸேஸதோ ஜிதந்தி விஜிதம், ஆணாபவத்திதே³ஸோ. ‘‘மா மய்ஹம் விஜிதே வஸதா²’’தி அபஸாத³னா பப்³ப³ஜிதஸ்ஸ விஹேட²னா பப்³பா³ஜனாதி கத்வா வுத்தம் ‘‘அபஸாதே³தப்³ப³ந்தி விஹேடே²தப்³ப³’’ந்தி. உக்³க³ண்ஹனம் தேன வுத்தஸ்ஸ அத்த²ஸ்ஸ ‘‘ஏவமேத’’ந்தி உபதா⁴ரணம் ஸல்லக்க²ணம், நிகுஜ்ஜனம் தஸ்ஸ அத்³த⁴னியபா⁴வாபாத³னவஸேன சித்தேன ஸந்தா⁴ரணம். தது³ப⁴யம் படிக்கி²பந்தோ ஆஹ ‘‘அனுக்³க³ண்ஹந்தோ அனிகுஜ்ஜந்தோ’’தி. தேனாஹ ‘‘ஸாரவஸேன அக்³க³ண்ஹந்தோ’’திஆதி³.

மக்க²லிகோ³ஸாலவாத³வண்ணனா

168. உப⁴யேனாதி ஹேதுபச்சயபடிஸேத⁴னவசனேன. ஸம்கிலேஸபச்சயந்தி ஸம்கிலிஸ்ஸனஸ்ஸ மலீனபா⁴வஸ்ஸ காரணம். விஸுத்³தி⁴பச்சயந்தி ஸங்கிகிலேஸதோ விஸுத்³தி⁴யா வோதா³னஸ்ஸ காரணம். அத்தகாரோதி தேன தேன ஸத்தேன அத்தனா காதப்³ப³கம்மம் அத்தனா நிப்பா²தே³தப்³ப³பயோகோ³. பரகாரந்தி பரஸ்ஸ வாஹஸா இஜ்ஜ²னகபயோஜனம். தேனாஹ ‘‘யேனா’’திஆதி³. மஹாஸத்தந்தி அந்திமப⁴விகம் மஹாபோ³தி⁴ஸத்தம், பச்சேகபோ³தி⁴ஸத்தஸ்ஸபி ஏத்தே²வ ஸங்க³ஹோ வேதி³தப்³போ³. மனுஸ்ஸஸோப⁴க்³யதந்தி மனுஸ்ஸேஸு ஸுப⁴க³பா⁴வம். ஏவந்தி வுத்தப்பகாரேன. கம்மவாத³ஸ்ஸ கிரியவாத³ஸ்ஸ படிக்கி²பனேன ‘‘அத்தி² பி⁴க்க²வே கம்மம் கண்ஹம் கண்ஹவிபாக’’ந்திஆதி³ (அ. நி. 4.232) நயப்பவத்தே ஜினசக்கே பஹாரம் தே³தி நாம. நத்தி² புரிஸகாரேதி யதா²வுத்தஅத்தகாரபரகாராபா⁴வதோ ஏவ ஸத்தானம் பச்சத்தபுரிஸகாரோ நாம கோசி நத்தீ²தி அத்தோ². தேனாஹ ‘‘யேனா’’திஆதி³. நத்தி² ப³லந்தி ஸத்தானம் தி³ட்ட²த⁴ம்மிகஸம்பராயிகனிப்³பா³னஸம்பத்திஆவஹம் ப³லம் நாம கிஞ்சி நத்தி². தேனாஹ ‘‘யம்ஹீ’’திஆதி³. நித³ஸ்ஸனமத்தஞ்சேதம், ஸம்கிலேஸிகம்பி சாயம் ப³லம் படிக்கி²பதேவ. யதி³ வீரியாதீ³னி புரிஸகாரவேவசனானி, கஸ்மா விஸும் க³ஹணந்தி ஆஹ ‘‘இத³ம் நோ வீரியேனா’’திஆதி³. ஸத்³த³த்த²தோ பன தஸ்ஸா தஸ்ஸா கிரியாய உஸ்ஸன்னட்டே²ன ப³லம். ஸூரவீரபா⁴வாவஹட்டே²ன வீரியம். ததே³வ த³ள்ஹபா⁴வதோ, போரிஸது⁴ரம் வஹந்தேன பவத்தேதப்³ப³தோ ச புரிஸதா²மோ. பரம் பரம் டா²னம் அக்கமனப்பவத்தியா புரிஸபரக்கமோதி வுத்தோதி வேதி³தப்³ப³ம்.

ஸத்தயோக³தோ ரூபாதீ³ஸு ஸத்தவிஸத்ததாய ஸத்தா. பாணனதோ அஸ்ஸஸனபஸ்ஸஸனவஸேன பவத்தியா பாணா. தே பன ஸோ ஏகிந்த்³ரியாதி³வஸேன விப⁴ஜித்வா வத³தீதி ஆஹ ‘‘ஏகிந்த்³ரியோ’’திஆதி³. அண்ட³கோஸாதீ³ஸு ப⁴வனதோ ‘‘பூ⁴தா’’தி வுச்சந்தீதி ஆஹ ‘‘அண்ட³கோஸ…பே… வத³தீ’’தி. ஜீவனதோ பாணம் தா⁴ரேந்தா விய வட்³ட⁴னதோ ஜீவா. தேனாஹ ‘‘ஸாலியவா’’திஆதி³. நத்தி² ஏதேஸம் ஸம்கிலேஸவிஸுத்³தீ⁴ஸு வஸோதி அவஸா. நத்தி² நேஸம் ப³லம் வீரியம் சாதி அப³லா அவீரியா. நியதாதி அச்சே²ஜ்ஜஸுத்தாவுதாபே⁴ஜ்ஜமணினோ விய நியதப்பவத்திதாய க³திஜாதிப³ந்தா⁴பவக்³க³வஸேன நியாமோ. தத்த² தத்த² க³மனந்தி ச²ன்னம் அபி⁴ஜாதீனம் தாஸு தாஸு க³தீஸு உபக³மனம் ஸமவாயேன ஸமாக³மோ. ஸபா⁴வோயேவாதி யதா² கண்டகஸ்ஸ திகி²ணதா, கபித்த²ப²லானம் பரிமண்ட³லதா, மிக³பக்கீ²னம் விசித்தாகாரதா, ஏவம் ஸப்³ப³ஸ்ஸாபி லோகஸ்ஸ ஹேதுபச்சயேன வினா ததா² ததா² பரிணாமோ அயம் ஸபா⁴வோ ஏவ அகித்திமோயேவ. தேனாஹ ‘‘யேன ஹீ’’திஆதி³. ச²ளாபி⁴ஜாதியோ பரதோ வித்தா²ரீயந்தி. ‘‘ஸுக²ஞ்ச து³க்க²ஞ்ச படிஸம்வேதே³ந்தீ’’தி வத³ந்தோ அது³க்க²மஸுக²பூ⁴மிம் ஸப்³பே³ன ஸப்³ப³ம் ந ஜானாதீதி உல்லிங்க³ந்தோ ‘‘அஞ்ஞா அது³க்க²மஸுக²பூ⁴மி நத்தீ²தி த³ஸ்ஸேதீ’’தி ஆஹ.

பமுக²யோனீனந்தி மனுஸ்ஸதிரச்சா²னாதீ³ஸு க²த்தியப்³ராஹ்மணாதி³ஸீஹப்³யக்³கா⁴தி³வஸேன பதா⁴னயோனீனம். ஸட்டி²ஸதானீதி ச²ஸஹஸ்ஸானி. ‘‘பஞ்ச ச கம்முனோ ஸதானீ’’தி பத³ஸ்ஸ அத்த²த³ஸ்ஸனம் ‘‘பஞ்சகம்மஸதானி சா’’தி. ‘‘ஏஸேவ நயோ’’தி இமினா ‘‘கேவலம் தக்கமத்தகேன நிரத்த²கம் தி³ட்டி²ம் தீ³பேதீ’’தி இமமேவத்த²ம் அதிதி³ஸதி. ஏத்த² ச ‘‘தக்கமத்தகேனா’’தி இமினா யஸ்மா தக்கிகா நிரங்குஸதாய பரிகப்பனஸ்ஸ யம் கிஞ்சி அத்தனோ பரிகப்பிதம் ஸாரதோ மஞ்ஞமானா ததே²வ அபி⁴னிவிஸ்ஸ தக்கதி³ட்டி²கா³ஹம் க³ண்ஹந்தி, தஸ்மா ந தேஸம் தி³ட்டி²வத்து²ஸ்மிம் விஞ்ஞூஹி விசாரணா காதப்³பா³தி த³ஸ்ஸேதி. கேசீதி உத்தரவிஹாரவாஸினோ. தே ஹி ‘‘பஞ்ச கம்மானீதி சக்கு²ஸோதகா⁴னஜிவ்ஹாகாயா இமானி பஞ்சிந்த்³ரியானி ‘பஞ்ச கம்மானீ’தி பஞ்ஞாபேந்தீ’’தி வத³ந்தி. கம்மந்தி லத்³தீ⁴தி ஓளாரிகபா⁴வதோ பரிபுண்ணகம்மந்தி லத்³தி⁴. மனோகம்மம் அனோளாரிகத்தா உபட்³ட⁴கம்மந்தி லத்³தீ⁴தி யோஜனா. த்³வட்டி²படிபதா³தி ‘‘த்³வாஸட்டி² படிபதா³’’தி வத்தப்³பே³ ஸபா⁴வனிருத்திம் அஜானந்தோ ‘‘த்³வட்டி²படிபதா³’’தி வத³தி. ஏகஸ்மிம் கப்பேதி ஏகஸ்மிம் மஹாகப்பே, தத்தா²பி ச விவட்டட்டா²யீஸஞ்ஞிதே ஏகஸ்மிம் அஸங்க்²யேய்யேகப்பே.

உரப்³பே⁴ ஹனந்தீதி ஓரப்³பி⁴கா. ஏவம் ஸூகரிகாத³யோ வேதி³தப்³பா³. லுத்³தா³தி அஞ்ஞேபி யே கேசி மாக³விகனேஸாதா³. தே பாபகம்மபஸுததாய ‘‘கண்ஹாபி⁴ஜாதீதி வத³தி. பி⁴க்கூ²’’தி பு³த்³த⁴ஸாஸனே பி⁴க்கூ². தே கிர ‘‘ஸச²ந்த³ராகா³ பரிபு⁴ஞ்ஜந்தீ’’தி அதி⁴ப்பாயேன ‘‘சதூஸு பச்சயேஸு கண்டகே பக்கி²பித்வா கா²த³ந்தீ’’தி வத³தி. கஸ்மாதி சே? யஸ்மா ‘‘தே பணீதபணீதே பச்சயே படிஸேவந்தீ’’தி தஸ்ஸ மிச்சா²கா³ஹோ, தஸ்மா ஞாயலத்³தே⁴பி பச்சயே பு⁴ஞ்ஜமானா ஆஜீவகஸமயஸ்ஸ விலோமகா³ஹிதாய பச்சயேஸு கண்டகே பக்கி²பித்வா கா²த³ந்தி நாமாதி வத³தீதி அபரே. ஏகே பப்³ப³ஜிதா, யே ஸவிஸேஸம் அத்தகிலமதா²னுயோக³ம் அனுயுத்தா. ததா² ஹி தே கண்டகே வத்தந்தா விய ஹோந்தீதி ‘‘கண்டகவுத்திகா’’தி வுத்தா. ட²த்வா பு⁴ஞ்ஜனனஹானபடிக்கே²பாதி³வதஸமாயோகே³ன பண்ட³ரதரா. ‘‘அசேலகஸாவகா’’தி ஆஜீவகஸாவகே வத³தி. தே கிர ஆஜீவகலத்³தி⁴யா விஸுத்³த⁴சித்ததாய நிக³ண்டே²ஹிபி பண்ட³ரதரா. நந்தா³த³யோ ஹி ததா²ரூபம் ஆஜீவகபடிபத்திம் உக்கம்ஸம் பாபேத்வா டி²தா. தஸ்மா நிக³ண்டே²ஹி ஆஜீவகஸாவகேஹி ச பண்ட³ரதரா பரமஸுக்காபி⁴ஜாதீதி அயம் தஸ்ஸ லத்³தி⁴.

புரிஸபூ⁴மியோதி பதா⁴னபுக்³க³லேன நித்³தே³ஸோ. இத்தீ²னம்பி தா பூ⁴மியோ இச்ச²ந்தேவ. ‘‘பி⁴க்கு² ச பன்னகோ’’திஆதி³ தேஸம் பாளியேவ. தத்த² பன்னகோதி பி⁴க்கா²ய விசரணகோ, தேஸம் வா படிபத்தியா படிபன்னகோ. ஜினோதி ஜிண்ணோ ஜராவஸேன ஹீனதா⁴துகோ, அத்தனோ வா படிபத்தியா படிபக்க²ம் ஜினித்வா டி²தோ. ஸோ கிர ததா²பூ⁴தோ த⁴ம்மம்பி கஸ்ஸசி ந கதே²ஸி. தேனாஹ ‘‘ந கிஞ்சி ஆஹா’’தி. ஓட்ட²வத³னாதி³விப்பகாரே கதேபி க²மனவஸேன ந கிஞ்சி வத³தீதிபி வத³ந்தி. அலாபி⁴ந்தி ‘‘ஸோ ந கும்பி⁴முகா² படிக்³க³ண்ஹாதீ’’திஆதி³னா (தீ³. நி. 1.394) நயேன வுத்தஅலாப⁴ஹேதுஸமாயோகே³ன அலாபி⁴ம், ததோயேவ ஜிக⁴ச்சா²து³ப்³ப³லபரேததாய ஸயனபராயனம் ‘‘ஸமணம் பன்னபூ⁴மீ’’தி வத³தி.

ஆஜீவவுத்திஸதானீதி ஸத்தானம் ஆஜீவபூ⁴தானி ஜீவிகாவுத்திஸதானி. பஸுக்³க³ஹணேன ஏளகஜாதி க³ஹிதா, மிக³க்³க³ஹணேன ருருக³வயாதி³ஸப்³ப³மிக³ஜாதி. ப³ஹூ தே³வாதி சாதுமஹாராஜிகாதி³ப்³ரஹ்மகாயிகாதி³வஸேன, தேஸம் அந்தரபே⁴த³வஸேன ப³ஹூ தே³வா. தத்த² சாதுமஹாராஜிகானம் ஏகச்சபே⁴தோ³ மஹாஸமயஸுத்தவஸேன (தீ³. நி. 2.331) தீ³பேதப்³போ³. மனுஸ்ஸாபி அனந்தாதி தீ³பதே³ஸகுலவம்ஸாஜீவாதி³விபா⁴க³வஸேன மனுஸ்ஸாபி அனந்தபே⁴தா³. பிஸாசா ஏவ பேஸாசா. தே அபரபேதாத³யோ மஹந்தமஹந்தா. ச²த்³த³ந்தத³ஹமந்தா³கினியோ குவாளியமுசலிந்த³னாமேன வத³தி.

பவுடாதி பப்³ப³க³ண்டி²கா. பண்டி³தோபி …பே… உத்³த⁴ம் ந க³ச்ச²தி, கஸ்மா? ஸத்தானம் ஸம்ஸரணகாலஸ்ஸ நியதபா⁴வதோ. அபரிபக்கம் ஸம்ஸரணனிமித்தம் ஸீலாதி³னா பரிபாசேதி நாம ஸீக⁴ம்யேவ விஸுத்³தி⁴ப்பத்தியா. பரிபக்கம் கம்மம் பு²ஸ்ஸ பு²ஸ்ஸ பத்வா பத்வா காலேன பரிபக்கபா⁴வானாபாத³னேன ப்³யந்திம் கரோதி நாம.

ஸுத்தகு³ளேதி ஸுத்தவட்டியம். ‘‘நிப்³பே³டி²யமானமேவ பலேதீ’’தி உபமாய ஸத்தானம் ஸம்ஸாரோ அனுக்கமேன கீ²யதேவ, ந தஸ்ஸ வட்³ட⁴தீதி த³ஸ்ஸேதி பரிச்சி²ன்னரூபத்தா.

அஜிதகேஸகம்ப³லவாத³வண்ணனா

171. தி³ன்னந்தி தே³ய்யத⁴ம்மஸீஸேன தா³னம் வுத்தந்தி ஆஹ ‘‘தி³ன்னஸ்ஸ ப²லாபா⁴வம் வத³தீ’’தி, தி³ன்னம் பன அன்னாதி³வத்து²ம் கத²ம் படிக்கி²பதி. ஏஸேவ நயோ யிட்ட²ம் ஹுதந்தி ஏத்தா²பி. மஹாயாகோ³தி ஸப்³ப³ஸாதா⁴ரணம் மஹாதா³னம். பாஹுனகஸக்காரோதி பாஹுனபா⁴வேன காதப்³ப³ஸக்காரோ. ப²லந்தி ஆனிஸம்ஸப²லம், நிஸ்ஸந்த³ப²லஞ்ச. விபாகோதி ஸதி³ஸப²லம். பரலோகே டி²தஸ்ஸ அயம் லோகோ நத்தீ²தி பரலோகே டி²தஸ்ஸ கம்முனா லத்³த⁴ப்³போ³ அயம் லோகோ ந ஹோதி. இத⁴லோகே டி²தஸ்ஸாபி பரலோகோ நத்தீ²தி இத⁴லோகே டி²தஸ்ஸ கம்முனா லத்³த⁴ப்³போ³ பரலோகோ ந ஹோதி. தத்த² காரணமாஹ ‘‘ஸப்³பே³ தத்த² தத்தே²வ உச்சி²ஜ்ஜந்தீ’’தி. இமே ஸத்தா யத்த² யத்த² ப⁴வே, யோனிஆதீ³ஸு ச டி²தா தத்த² தத்தே²வ உச்சி²ஜ்ஜந்தி நிருத³யவினாஸவஸேன வினஸ்ஸந்தி. ப²லாபா⁴வவஸேனாதி மாதாபிதூஸு ஸம்மாபடிபத்திமிச்சா²படிபத்தீனம் ப²லஸ்ஸ அபா⁴வவஸேன ‘‘நத்தி² மாதா, நத்தி² பிதா’’தி வத³தி, ந மாதாபிதூனம், நாபி தேஸு இதா³னி கயிரமானஸக்காராஸக்காரானம் அபா⁴வவஸேன தேஸம் லோகபச்சக்க²த்தா. புப்³பு³ளகஸ்ஸ விய இமேஸம் ஸத்தானம் உப்பாதோ³ நாம கேவலோ, ந சவித்வா ஆக³மனபுப்³ப³கோதி த³ஸ்ஸனத்த²ம் ‘‘நத்தி² ஸத்தா ஓபபாதிகா’’தி வுத்தந்தி ஆஹ ‘‘சவித்வா உபபஜ்ஜனகஸத்தா நாம நத்தீ²தி வத³தீ’’தி. ஸமணேன நாம யாதா²வதோ ஜானந்தேன கஸ்ஸசி கிஞ்சி அகதே²த்வா ஸஞ்ஞதேன ப⁴விதப்³ப³ம், அஞ்ஞதா² ஆஹோபுரிஸிகா நாம ஸியா. கிஞ்ஹி பரோ பரஸ்ஸ கரிஸ்ஸதி? ததா² ச அத்தனோ ஸம்பாத³னஸ்ஸ கஸ்ஸசி அவஸ்ஸயோ ஏவ ந ஸியா தத்த² தத்தே²வ உச்சி²ஜ்ஜனதோதி ஆஹ ‘‘யே இமஞ்ச…பே… பவேதே³ந்தீ’’தி.

சதூஸு மஹாபூ⁴தேஸு நியுத்தோதி சாதுமஹாபூ⁴திகோ. யதா² பன மத்திகாய நிப்³ப³த்தம் பா⁴ஜனம் மத்திகாமயம், ஏவம் அயம் சதூஹி மஹாபூ⁴தேஹி நிப்³ப³த்தோதி ஆஹ ‘‘சதுமஹாபூ⁴தமயோ’’தி. அஜ்ஜ²த்திகபத²வீதா⁴தூதி ஸத்தஸந்தானக³தா பத²வீதா⁴து. பா³ஹிரபத²வீதா⁴துந்தி ப³ஹித்³தா⁴ மஹாபத²விம். உபக³ச்ச²தீதி பா³ஹிரபத²விகாயதோ ததே³கதே³ஸபூ⁴தா பத²வீ ஆக³ந்த்வா அஜ்ஜ²த்திகபா⁴வப்பத்தியா ஸத்தபா⁴வேன ஸண்டி²தா இதா³னி க⁴டாதி³க³தபத²வீ விய தமேவ பா³ஹிரபத²விகாயம் உபேதி உபக³ச்ச²தி ஸப்³ப³ஸோ தேன நிப்³பி³ஸேஸதம் ஏகீபா⁴வமேவ க³ச்ச²தி. ஆபாதீ³ஸுபி ஏஸேவ நயோதி ஏத்த² பஜ்ஜுன்னேன மஹாஸமுத்³த³தோ க³ஹிதஆபோ விய வஸ்ஸோத³கபா⁴வேன புனபி மஹாஸமுத்³த³மேவ, ஸூரியரஸ்மிதோ க³ஹிதம் இந்த³க்³கி³ஸங்கா²ததேஜோ விய புன ஸூரியரஸ்மிம், மஹாவாயுக²ந்த⁴தோ நிக்³க³தமஹாவாதோ விய தமேவ வாயுக²ந்த⁴ம் உபேதி உபக³ச்ச²தீதி தி³ட்டி²க³திகஸ்ஸ அதி⁴ப்பாயோ. மனச்ச²ட்டா²னி இந்த்³ரியானி ஆகாஸம் பக்க²ந்த³ந்தி தேஸம் விஸயாபா⁴வாதி வத³ந்தி. விஸயிக³ஹணேன ஹி விஸயாபி க³ஹிதா ஏவ ஹோந்தீதி. கு³ணாகு³ணபதா³னீதி கு³ணதோ³ஸகோட்டா²ஸா. ஸரீரமேவ பதா³னீதி அதி⁴ப்பேதம் ஸரீரேன தம்தம்கிரியாய பஜ்ஜிதப்³ப³தோ. த³ப்³ப³ந்தி முய்ஹந்தீதி த³த்தூ, மூள்ஹபுக்³க³லா. தேஹி த³த்தூஹி பா³லமனுஸ்ஸேஹி. ‘‘பரலோகோ அத்தீ²’’தி மதி யேஸம், தே அத்தி²கா, தேஸம் வாதோ³தி அத்தி²கவாதோ³, தம் அத்தி²கவாத³ம்.

கம்மம் படிபா³ஹதி அகிரியவாதி³பா⁴வதோ. விபாகம் படிபா³ஹதி ஸப்³பே³ன ஸப்³ப³ம் ஆயதிம் உபபத்தியா படிக்கி²பனதோ. உப⁴யம் படிபா³ஹதி ஸப்³ப³ஸோ ஹேதுபடிபா³ஹனேனேவ ப²லஸ்ஸபி படிக்கி²த்தத்தா. உப⁴யந்தி ஹி கம்மம் விபாகஞ்சாதி உப⁴யம். ஸோ ஹி ‘‘அஹேதூ அப்பச்சயா ஸத்தா ஸம்கிலிஸ்ஸந்தி, விஸுஜ்ஜ²ந்தி சா’’தி (தீ³. நி. 1.168; ம. நி. 2.100, 227; ஸம். நி. 3.212) வத³ந்தோ கம்மஸ்ஸ விய விபாகஸ்ஸாபி ஸம்கிலேஸவிஸுத்³தீ⁴னம் பச்சயத்தாபா⁴வவசனதோ தது³ப⁴யம் படிபா³ஹதி நாம. விபாகோ படிபா³ஹிதோ ஹோதி அஸதி கம்மே விபாகாபா⁴வதோ. கம்மம் படிபா³ஹிதம் ஹோதி அஸதி விபாகே கம்மஸ்ஸ நிரத்த²கபா⁴வாபத்திதோ. அத்த²தோதி ஸரூபேன. உப⁴யப்படிபா³ஹகாதி விஸும் விஸும் தம்தம்தி³ட்டி²தீ³பகபா⁴வேன பாளியம் ஆக³தாபி பச்சேகம் திவித⁴தி³ட்டி²கா ஏவ உப⁴யபடிபா³ஹகத்தா. உப⁴யப்படிபா³ஹகாதி ஹி ஹேதுவசனம். ‘‘அஹேதுகவாதா³ சேவா’’திஆதி³ படிஞ்ஞாவசனம். யோ ஹி விபாகபடிபா³ஹனேன நத்தி²கதி³ட்டி²கோ உச்சே²த³வாதீ³, ஸோ அத்த²தோ கம்மபடிபா³ஹனேன அகிரியதி³ட்டி²கோ, உப⁴யபடிபா³ஹனேன அஹேதுகதி³ட்டி²கோ ச ஹோதி. ஸேஸத்³வயேபி ஏஸேவ நயோ.

ஸஜ்ஜா²யந்தீதி தம் தி³ட்டி²தீ³பகம் க³ந்த²ம் உக்³க³ஹேத்வா பட²ந்தி. வீமம்ஸந்தீதி தஸ்ஸ அத்த²ம் விசாரேந்தி. ‘‘தேஸ’’ந்திஆதி³ வீமம்ஸனாகாரத³ஸ்ஸனம். தஸ்மிம் ஆரம்மணேதி யதா²பரிகப்பிதகம்மப²லாபா⁴வாதி³கே ‘‘கரோதோ ந கரீயதி பாப’’ந்தி ஆதி³னயப்பவத்தாய லத்³தி⁴யா ஆரம்மணே. மிச்சா²ஸதி ஸந்திட்ட²தீதி ‘‘கரோதோ ந கரீயதி பாப’’ந்திஆதி³வஸேன அனுஸ்ஸவூபலத்³தே⁴ அத்தே² ததா³காரபரிவிதக்கனேஹி ஸவிக்³க³ஹே விய ஸரூபதோ சித்தஸ்ஸ பச்சுபட்டி²தே சிரகாலபரிசயேன ஏவமேதந்தி நிஜ்ஜா²னக்க²மபா⁴வூபக³மனேன நிஜ்ஜா²னக்க²ந்தியா ததா²க³ஹிதே புனப்புனம் ததே²வ ஆஸேவந்தஸ்ஸ ப³ஹுலீகரோந்தஸ்ஸ மிச்சா²விதக்கேன ஸமாதி³யமானா மிச்சா²வாயாமூபத்த²ம்பி⁴தா அதம்ஸபா⁴வம் ‘‘தம்ஸபா⁴வ’’ந்தி க³ண்ஹந்தீ மிச்சா²ஸதீதி லத்³த⁴னாமா தம்லத்³தி⁴ஸஹக³தா தண்ஹா ஸந்திட்ட²தி. சித்தம் ஏகக்³க³ம் ஹோதீதி யதா²ஸகம் விதக்காதி³பச்சயலாபே⁴ன தஸ்மிம் ஆரம்மணே அவட்டி²ததாய அனேகக்³க³தம் பஹாய ஏகக்³க³ம் அப்பிதம் விய ஹோதி. சித்தஸீஸேன மிச்சா²ஸமாதி⁴ ஏவ வுத்தோ. ஸோபி ஹி பச்சயவிஸேஸேஹி லத்³த⁴பா⁴வனாப³லோ ஈதி³ஸே டா²னே ஸமாதா⁴னபதிரூபகிச்சகரோயேவ, வாளவிஜ்ஜ²னாதீ³ஸு வியாதி த³ட்ட²ப்³ப³ம். ஜவனானி ஜவந்தீதி அனேகக்க²த்தும் தேனாகாரேன புப்³ப³பா⁴கி³யேஸு ஜவனவாரேஸு பவத்தேஸு ஸப்³ப³பச்சி²மே ஜவனவாரே ஸத்த ஜவனானி ஜவந்தி. பட²மே ஜவனே ஸதேகிச்சா² ஹோந்தி. ததா² து³தியாதீ³ஸூதி த⁴ம்மஸபா⁴வத³ஸ்ஸனமத்தமேதம், ந பன தஸ்மிம் க²ணே தேஸம் திகிச்சா² கேனசி ஸக்கா காதும்.

தத்தா²தி தேஸு தீஸு மிச்சா²த³ஸ்ஸனேஸு. கோசி ஏகம் த³ஸ்ஸனம் ஓக்கமதீதி யஸ்ஸ ஏகஸ்மிம்யேவ அபி⁴னிவேஸோ ஆஸேவனா ச பவத்தா, ஸோ ஏகமேவ த³ஸ்ஸனம் ஓக்கமதி. யஸ்ஸ பன த்³வீஸு தீஸுபி வா அபி⁴னிவேஸோ ஆஸேவனா ச பவத்தா, ஸோ த்³வே தீணிபி ஓக்கமதி, ஏதேன யா புப்³பே³ உப⁴யபடிபா³ஹகதாமுகே²ன தீ³பிதா அத்த²ஸித்³தா⁴ ஸப்³ப³தி³ட்டி²கதா, ஸா புப்³ப³பா⁴கி³யா. யா பன மிச்ச²த்தனியாமோக்கந்திபூ⁴தா, ஸா யதா²ஸகம் பச்சயஸமுதா³க³மஸித்³தி⁴தோ பி⁴ன்னாரம்மணானம் விய விஸேஸாதி⁴க³மானம் ஏகஜ்ஜ²ம் அனுப்பத்தியா அஸங்கிண்ணா ஏவாதி த³ஸ்ஸேதி. ‘‘ஏகஸ்மிம் ஓக்கந்தேபீ’’திஆதி³னா திஸ்ஸன்னம்பி தி³ட்டீ²னம் ஸமானப³லதம் ஸமானப²லதஞ்ச த³ஸ்ஸேதி. தஸ்மா திஸ்ஸோபி சேதா ஏகஸ்ஸ உப்பன்னா அப்³போ³கிண்ணா ஏவ, ஏகாய விபாகே தி³ன்னே இதரா அனுப³லப்பதா³யிகாயோ ஹோந்தி. ‘‘வட்டகா²ணு நாமேஸா’’தி இத³ம் வசனம் நேய்யத்த²ம், ந நீதத்த²ம். ததா² ஹி பபஞ்சஸூத³னியம் ‘‘கிம் பனேஸ ஏகஸ்மிம்யேவ அத்தபா⁴வே நியதோ ஹோதி, உதா³ஹு அஞ்ஞஸ்மிம் பீதி? ஏகஸ்மிம்யேவ நியதோ, ஆஸேவனவஸேன பன ப⁴வந்தரேபி தம் தம் தி³ட்டி²ம் ரோசேதி யேவா’’தி (ம. நி. அட்ட². 3.129) வுத்தம். அகுஸலஞ்ஹி நாமேதம் அப³லம் து³ப்³ப³லம், ந குஸலம் விய ஸப³லம் மஹாப³லம். தஸ்மா ‘‘ஏகஸ்மிம்யேவ அத்தபா⁴வே நியதோ’’தி வுத்தம். அஞ்ஞதா² ஸம்மத்தனியாமோ விய மிச்ச²த்தனியாமோபி அச்சந்திகோ ஸியா, ந ச அச்சந்திகோ. யதி³ ஏவம் வட்டகா²ணுஜோதனா கத²ந்தி ஆஹ ‘‘ஆஸேவனவஸேன பனா’’திஆதி³. தஸ்மா யதா² ‘‘ஸகிம் நிமுக்³கோ³பி நிமுக்³கோ³ ஏவ பா³லோ’’தி வுத்தம், ஏவம் வட்டகா²ணுஜோதனா. யாதி³ஸே ஹி பச்சயே படிச்ச அயம் தம் தம் த³ஸ்ஸனம் ஓக்கந்தோ புன கதா³சி தப்படிபக்கே² பச்சயே படிச்ச ததோ ஸீஸுக்கி²பனமஸ்ஸ ந ஹோதீதி ந வத்தப்³ப³ம், தஸ்மா ‘‘யேபு⁴ய்யேன ஹி ஏவரூபஸ்ஸ ப⁴வதோ வுட்டா²னம் நாம நத்தீ²’’தி வுத்தம்.

தஸ்மாதி யஸ்மா ஏவம் ஸம்ஸாரகா²ணுபா⁴வஸ்ஸபி பச்சயோ அபண்ணகஜாதோ, தஸ்மா. பூ⁴திகாமோதி தி³ட்ட²த⁴ம்மிகஸம்பராயிகபரமத்தா²னம் வஸேன அத்தனோ கு³ணேஹி வட்³டி⁴காமோ.

பகுத⁴கச்சாயனவாத³வண்ணனா

174. அகதாதி ஸமேன விஸமேன வா கேனசி ஹேதுனா ந கதா ந விஹிதா. கதவிதோ⁴ கரணவிதி⁴ நத்தி² ஏதேஸந்தி அகதவிதா⁴னா. பத³த்³வயேனாபி லோகே கேனசி ஹேதுபச்சயேன நேஸம் அனிப்³ப³த்தனபா⁴வம் த³ஸ்ஸேதி. இத்³தி⁴யாபி ந நிம்மிதாதி கஸ்ஸசி இத்³தி⁴மதோ சேதோவஸிப்பத்தஸ்ஸ தே³வஸ்ஸ, இஸ்ஸராதி³னோ வா இத்³தி⁴யாபி ந நிம்மிதா. அனிம்மாபிதா கஸ்ஸசி அனிம்மாபிதா. வுத்தத்த²மேவாதி ப்³ரஹ்மஜாலவண்ணனாயம் (தீ³. நி. அட்ட². 1.30) வுத்தத்த²மேவ. வஞ்ஜா²தி வஞ்ஜ²பஸுவஞ்ஜ²தாலாத³யோ விய அப²லா, கஸ்ஸசி அஜனகாதி அத்தோ², ஏதேன பத²விகாயாதீ³னம் ரூபாதி³ஜனகபா⁴வம் படிக்கி²பதி. ரூபஸத்³தா³த³யோ ஹி பத²விகாயாதீ³ஹி அப்படிப³த்³த⁴வுத்திகாதி தஸ்ஸ லத்³தி⁴. பப்³ப³தகூடம் விய டி²தாதி கூடட்டா², யதா² பப்³ப³தகூடம் கேனசி அனிப்³ப³த்திதம், கஸ்ஸசி ச அனிப்³ப³த்தகம், ஏவமேதே பீதி அதி⁴ப்பாயோ. யமித³ம் ‘‘பீ³ஜதோ அங்குராதி³ ஜாயதீ’’தி வுச்சதி, தம் விஜ்ஜமானமேவ ததோ நிக்க²மதி, ந அவிஜ்ஜமானம், அஞ்ஞதா² அஞ்ஞதோபி அஞ்ஞஸ்ஸ உபலத்³தி⁴ ஸியாதி அதி⁴ப்பாயோ. டி²தத்தாதி நிப்³பி³காராபா⁴வேன டி²தத்தா. ந சலந்தீதி விகாரம் நாபஜ்ஜந்தி. விகாராபா⁴வதோ ஹி தேஸம் ஸத்தன்னம் காயானம் ஏஸிகட்டா²யிட்டி²ததா. அனிஞ்ஜனஞ்ச அத்தனோ பகதியா அவட்டா²னமேவ. தேனாஹ ‘‘ந விபரிணமந்தீ’’தி. அவிபரிணாமத⁴ம்மத்தா ஏவ ஹி தே அஞ்ஞமஞ்ஞம் ந ப்³யாபா³தே⁴ந்தி. ஸதி ஹி விகாரம் ஆபாதே³தப்³ப³தாய ப்³யாபா³த⁴கதாபி ஸியா, ததா² அனுக்³க³ஹேதப்³ப³தாய அனுக்³கா³ஹகதாதி தத³பா⁴வம் த³ஸ்ஸேதும் பாளியம் நாலந்திஆதி³ வுத்தம். பத²வீ ஏவ காயேகதே³ஸத்தா பத²விகாயோ. ஜீவஸத்தமானம் காயானம் நிச்சதாய நிப்³பி³காரபா⁴வதோ ந ஹந்தப்³ப³தா, ந கா⁴தேதப்³ப³தா சாதி நேவ கோசி ஹந்தா வா கா⁴தேதா வா, தேனேவாஹ ‘‘ஸத்தன்னம் த்வேவ காயான’’ந்திஆதி³. யதி³ கோசி ஹந்தா நத்தி², கத²ம் ஸத்த²ப்பஹாரோதி ஆஹ ‘‘யதா² முக்³க³ராஸி ஆதீ³ஸூ’’திஆதி³. கேவலம் ஸஞ்ஞாமத்தமேவ ஹோதி. ஹனனகா⁴தனாதி³ பன பரமத்த²தோ நத்தே²வ காயானம் அவிகோபனீயபா⁴வதோதி அதி⁴ப்பாயோ.

நிக³ண்ட²னாடபுத்தவாத³வண்ணனா

177. சத்தாரோ யாமா பா⁴கா³ சதுயாமா, சதுயாமா ஏவ சாதுயாமா, பா⁴க³த்தோ² ஹி இத⁴ யாம-ஸத்³தோ³ யதா² ‘‘ரத்தியா பட²மோ யாமோ’’தி. ஸோ பனேத்த² பா⁴கோ³ ஸம்வரலக்க²ணோதி ஆஹ ‘‘சாதுயாமஸம்வுதோதி சதுகோட்டா²ஸேன ஸம்வரேன ஸம்வுதோ’’தி. படிக்கி²த்தஸப்³ப³ஸீதோத³கோதி படிக்கி²த்தஸப்³ப³ஸீதோத³கபரிபோ⁴கோ³. ஸப்³பே³ன பாபவாரணேன யுத்தோதி ஸப்³ப³ப்பகாரேன ஸம்வரலக்க²ணேன ஸமன்னாக³தோ. து⁴தபாபோதி ஸப்³பே³ன நிஜ்ஜரலக்க²ணேன பாபவாரணேன விது⁴தபாபோ. பு²ட்டோ²தி அட்ட²ன்னம்பி கம்மானம் கே²பனேன மோக்க²ப்பத்தியா கம்மக்க²யலக்க²ணேன ஸப்³பே³ன பாபவாரணேன பு²ட்டோ² தம் பத்வா டி²தோ. கோடிப்பத்தசித்தோதி மோக்கா²தி⁴க³மேனேவ உத்தமமரியாத³ப்பத்தசித்தோ. யதத்தோதி காயாதீ³ஸு இந்த்³ரியேஸு ஸம்யமேதப்³ப³ஸ்ஸ அபா⁴வதோ ஸம்யதசித்தோ. ஸுப்பதிட்டி²தசித்தோதி நிஸ்ஸேஸதோ ஸுட்டு² பதிட்டி²தசித்தோ. ஸாஸனானுலோமம் நாம பாபவாரணேன யுத்ததா. தேனாஹ ‘‘து⁴தபாபோ’’திஆதி³. அஸுத்³த⁴லத்³தி⁴தாயாதி ‘‘அத்தி² ஜீவோ, ஸோ ச ஸியா நிச்சோ, ஸியா அனிச்சோ’’தி ஏவமாதி³அஸுத்³த⁴லத்³தி⁴தாய. ஸப்³பா³தி கம்மபகதிவிபா⁴கா³தி³விஸயா ஸப்³பா³ நிஜ்ஜா²னக்க²ந்தியோ. தி³ட்டி²யே வாதி மிச்சா²தி³ட்டி²யோ ஏவ ஜாதா.

ஸஞ்சயபே³லட்ட²புத்தவாத³வண்ணனா

179-181. அமராவிக்கே²பே வுத்தனயோ ஏவாதி ப்³ரஹ்மஜாலே அமராவிக்கே²பவாத³ஸம்வண்ணனாயம் (தீ³. நி. அட்ட². 1.61-63) வுத்தனயோ ஏவ விக்கே²பப்³யாகரணபா⁴வதோ, ததே²வ சேத்த² விக்கே²பவாத³ஸ்ஸ ஆக³தத்தா.

பட²மஸந்தி³ட்டி²கஸாமஞ்ஞப²லவண்ணனா

183. யதா² தே ருச்சேய்யாதி இதா³னி மயா புச்சி²யமானோ அத்தோ² யதா² தவ சித்தே ரோசேய்ய. க⁴ரதா³ஸியா குச்சி²ஸ்மிம் ஜாதோ அந்தோஜாதோ. த⁴னேன கீதோ த⁴னக்கீதோ. ப³ந்த⁴க்³கா³ஹக³ஹிதோ கரமரானீதோ. ஸாமந்தி ஸயமேவ. தா³ஸப்³யந்தி தா³ஸபா⁴வம். கோசி தா³ஸோபி ஸமானோ அலஸோ கம்மம் அகரோந்தோ ‘‘கம்மகாரோ’’தி ந வுச்சதீதி ஆஹ ‘‘அனலஸோ கம்மகரணஸீலோயேவா’’தி. பட²மமேவாதி ஆஸன்னதரட்டா²னூபஸங்கமனதோ பகே³வ புரேதரமேவ. பச்சா²தி ஸாமிகஸ்ஸ நிபஜ்ஜாய பச்சா². ஸயனதோ அவுட்டி²தேதி ரத்தியா விபா⁴யனவேலாய ஸேய்யதோ அவுட்டி²தே. பச்சூஸகாலதோ பட்டா²யாதி அதீதாய ரத்தியா பச்சூஸகாலதோ பட்டா²ய. யாவ ஸாமினோ ரத்திம் நித்³தோ³க்கமனந்தி அபராய பதோ³ஸவேலாயம் யாவ நித்³தோ³க்கமனம். கிம் காரந்தி கிம் கரணீயம், கிம்காரபா⁴வதோ புச்சி²த்வா காதப்³ப³வேய்யாவச்சந்தி அத்தோ².

தே³வோ வியாதி ஆதி⁴பச்சபரிவாராதி³ஸம்பத்திஸமன்னாக³தோ பதா⁴னதே³வோ விய. ஸோ வதஸ்ஸாஹந்தி ஸோ வத அஸ்ஸம் அஹம். ஸோ ராஜா விய அஹம்பி ப⁴வேய்யம், கத²ம் புஞ்ஞானி கரேய்யம், யதி³ புஞ்ஞானி உளாரானி கரேய்யந்தி யோஜனா. ‘‘ஸோ வதஸ்ஸ’ஸ்ஸ’’ந்தி பாடே² ஸோ ராஜா அஸ்ஸ அஹம் அஸ்ஸம் வத, யதி³ புஞ்ஞானி கரேய்யந்தி யோஜனா. தேனாஹ ‘‘அயமேவத்தோ²’’தி. அஸ்ஸந்தி உத்தமபுரிஸப்பயோகே³ அஹம்-ஸத்³தோ³ அப்பயுத்தோபி பயுத்தோ ஏவ ஹோதி. யாவஜீவம் ந ஸக்கி²ஸ்ஸாமி தா³துந்தி யாவஜீவம் தா³னத்தா²ய உஸ்ஸாஹம் கரோந்தோபி யம் ராஜா ஏகம் தி³வஸம் தே³தி, ததோ ஸதபா⁴க³ம்பி தா³தும் ந ஸக்கி²ஸ்ஸாமி. தஸ்மா பப்³ப³ஜிஸ்ஸாமீதி பப்³ப³ஜ்ஜாயம் உஸ்ஸாஹம் கத்வாதி யோஜனா.

காயேன ஸம்வுதோதி காயேன ஸம்வரிதப்³ப³ம் காயத்³வாரேன பவத்தனகம் பாபத⁴ம்மம் ஸம்வரித்வா விஹரேய்யாதி அயமேத்த² அத்தோ²தி ஆஹ ‘‘காயேன பிஹிதோ ஹுத்வா’’திஆதி³. கா⁴ஸச்சா²த³னேன பரமதாயாதி கா⁴ஸச்சா²த³னபரியேஸனே ஸல்லேக²வஸேன பரமதாய, உக்கட்ட²பா⁴வே ஸண்டி²தோ கா⁴ஸச்சா²த³னமேவ வா பரமம் பரா கோடி ஏதஸ்ஸ, ந ததோ பரம் கிஞ்சி ஆமிஸஜாதம் பரியேஸதி பச்சாஸிஸதி சாதி கா⁴ஸச்சா²த³னபரமோ, தப்³பா⁴வோ கா⁴ஸச்சா²த³னபரமதா, தஸ்ஸா கா⁴ஸச்சா²த³னபரமதாய. விவேகட்ட²காயானந்தி க³ணஸங்க³ணிகதோ பவிவித்தே டி²தகாயானம். நேக்க²ம்மாபி⁴ரதானந்தி ஜா²னாபி⁴ரதானம். தாய ஏவ ஜா²னாபி⁴ரதியா பரமம் உத்தமம் வோதா³னம் விஸுத்³தி⁴ம் பத்ததாய பரமவோதா³னப்பத்தானம். கிலேஸூபதி⁴அபி⁴ஸங்கா²ரூபதீ⁴னம் அச்சந்தவிக³மேன நிருபதீ⁴னம். விஸங்கா²ரக³தானந்தி அதி⁴க³தனிப்³பா³னானம். ஏத்த² ச பட²மோ விவேகோ இதரேஹி த்³வீஹி விவேகேஹி ஸஹாபி பத்தப்³போ³ வினாபி, ததா² து³தியோ. ததியோ பன இதரேஹி த்³வீஹி ஸஹேவ பத்தப்³போ³, ந வினாதி த³ட்ட²ப்³ப³ம். க³ணே ஜனஸமாக³மே ஸன்னிபதனம் க³ணஸங்க³ணிகா, தம் பஹாய ஏகோ விஹரதி சரதி புக்³க³லவஸேன அஸஹாயத்தா. சித்தே கிலேஸானம் ஸன்னிபதனம் சித்தகிலேஸஸங்க³ணிகா, தம் பஹாய ஏகோ விஹரதி கிலேஸவஸேன அஸஹாயத்தா. மக்³க³ஸ்ஸ ஏகசித்தக்க²ணிகத்தா, கோ³த்ரபு⁴ஆதீ³னஞ்ச ஆரம்மணமத்தத்தா ந தேஸம் வஸேன ஸாதிஸயா நிப்³பு³திஸுக²ஸம்பு²ஸனா, ப²லஸமாபத்தினிரோத⁴ஸமாபத்திவஸேன ஸாதிஸயாதி ஆஹ ‘‘ப²லஸமாபத்திம் வா நிரோத⁴ஸமாபத்திம் வா பவிஸித்வா’’தி. ப²லபரியோஸானோ ஹி நிரோதோ⁴தி.

184. அபி⁴ஹரித்வாதி அபி⁴முகீ²பா⁴வேன நேத்வா. ‘‘அஹம் சீவராதீ³ஹி பயோஜனம் ஸாதே⁴ஸ்ஸாமீ’’தி வசனஸேஸோ. ஸப்பாயந்தி ஸப்³ப³கே³லஞ்ஞபஹரணவஸேன உபகாராவஹம். பா⁴வினா அனத்த²தோ பரிபாலனவஸேன கோ³பனா ரக்கா²கு³த்தி. பச்சுப்பன்னஸ்ஸ நிஸேத⁴வஸேன ஆவரணகு³த்தி.

து³தியஸந்தி³ட்டி²கஸாமஞ்ஞப²லவண்ணனா

186. கஸதீதி கஸிம் கரோதி. க³ஹபதிகோதி ஏத்த² க-ஸத்³தோ³ அப்பத்தோ²தி ஆஹ ‘‘ஏககே³ஹமத்தே ஜேட்ட²கோ’’தி, தேன அனேககுலஜேட்ட²கபா⁴வம் படிக்கி²பதி. கரம் கரோதீதி கரம் ஸம்பாதே³தி. வட்³டே⁴தீதி உபரூபரி ஸம்பாத³னேன வட்³டே⁴தி. ஏவம் அப்பம்பி பஹாய பப்³ப³ஜிதும் து³க்கரந்தி அயமத்தோ² லடுகிகோபமஸுத்தேன (ம. நி. 2.151, 152) தீ³பேதப்³போ³. தேனாஹ ‘‘ஸேய்யதா²பி, உதா³யி, புரிஸோ த³லித்³தோ³ அஸ்ஸகோ அனாள்ஹியோ, தஸ்ஸஸ்ஸ ஏகம் அகா³ரகம் ஓலுக்³க³விலுக்³க³ம் காகாதிதா³யிம் நபரமரூப’’ந்தி வித்தா²ரோ. யதி³ அப்பம்பி போ⁴க³ம் பஹாய பப்³ப³ஜிதும் து³க்கரம், கஸ்மா தா³ஸவாரே போ⁴க³க்³க³ஹணம் ந கதந்தி ஆஹ ‘‘தா³ஸவாரே பனா’’திஆதி³. யதா² ச தா³ஸஸ்ஸ போ⁴கா³பி அபோ⁴கா³ பராயத்தபா⁴வதோ, ஏவம் ஞாதயோ பீதி தா³ஸவாரே ஞாதிபரிவட்டக்³க³ஹணம்பி ந கதந்தி த³ட்ட²ப்³ப³ம்.

பணீததரஸாமஞ்ஞப²லவண்ணனா

189. ஏவரூபாஹீதி யதா²வுத்ததா³ஸகஸ்ஸகூபமாஸதி³ஸாஹி உபமாஹி ஸாமஞ்ஞப²லம் தீ³பேதும் பஹோதி ப⁴க³வா ஸகலம்பி ரத்திந்தி³வம் ததோ பி⁴ய்யோபி அனந்தபடிபா⁴னதாய விசித்தனயதே³ஸனபா⁴வதோ. ததா²பீதி ஸதிபி தே³ஸனாய உத்தருத்தராதி⁴கனானானயவிசித்தபா⁴வே.

ஏகத்த²மேதம் பத³ம் ஸாது⁴ஸத்³த³ஸ்ஸேவ க-காரேன வட்³டி⁴த்வா வுத்தத்தா, தேனேவ ஸாது⁴க-ஸத்³த³ஸ்ஸ அத்த²ம் வத³ந்தேன அத்து²த்³தா⁴ரவஸேன ஸாது⁴-ஸத்³தோ³ உதா³ஹடோ. ஆயாசனேதி அபி⁴முக²யாசனே, அபி⁴பத்த²னாயந்தி அத்தோ². ஸம்படிச்ச²னேதி படிக்³க³ண்ஹனே. ஸம்பஹம்ஸனேதி ஸம்விஜ்ஜமானகு³ணவஸேன ஹம்ஸனே தோஸனே, உத³க்³க³தாகரணேதி அத்தோ². த⁴ம்மருசீதி புஞ்ஞகாமோ. பஞ்ஞாணவாதி பஞ்ஞவா. அத்³து³ப்³போ⁴தி அதூ³ஸகோ, அனுபகா⁴தகோதி அத்தோ². இதா⁴பீதி இமஸ்மிம் ஸாமஞ்ஞப²லேபி. அயம் ஸாது⁴-ஸத்³தோ³. த³ள்ஹீகம்மேதி ஸக்கச்ச கிரியாயம். ஆணத்தியந்தி ஆணாபனே. ‘‘ஸுணோஹி ஸாது⁴கம் மனஸி கரோஹீ’’தி ஹி வுத்தே ஸாது⁴க-ஸத்³தே³ன ஸவனமனஸிகாரானம் ஸக்கச்சகிரியா விய ததா³ணாபனம்பி ஜோதிதம் ஹோதி, ஆயாசனத்த²தா விய சஸ்ஸ ஆணாபனத்த²தா வேதி³தப்³பா³. ஸுந்த³ரேபீதி ஸுந்த³ரத்தே²பி. இதா³னி யதா²வுத்தேன ஸாது⁴க-ஸத்³த³ஸ்ஸ அத்த²த்தயேன பகாஸிதம் விஸேஸம் த³ஸ்ஸேதும் ‘‘த³ள்ஹீகம்மத்தே²ன ஹீ’’திஆதி³ வுத்தம்.

மனஸி கரோஹீதி ஏத்த² மனஸிகாரோ ந ஆரம்மணபடிபாத³னலக்க²ணோ, அத² கோ² வீதி²படிபாத³னஜவனபடிபாத³னமனஸிகாரபுப்³ப³கம் சித்தே ட²பனலக்க²ணோதி த³ஸ்ஸேந்தோ ‘‘ஆவஜ்ஜா’’திஆதி³மாஹ. ஸோதிந்த்³ரியவிக்கே²பவாரணம் ஸவனே நியோஜனவஸேன கிரியந்தரபடிஸேத⁴னபா⁴வதோ, ஸோதம் ஓத³ஹாதி அத்தோ². மனிந்த்³ரியவிக்கே²பவாரணம் அஞ்ஞசிந்தாபடிஸேத⁴னதோ. ப்³யஞ்ஜனவிபல்லாஸக்³கா³ஹவாரணம் ‘‘ஸாது⁴க’’ந்தி விஸேஸேத்வா வுத்தத்தா. பச்சி²மஸ்ஸ அத்த²விபல்லாஸக்³கா³ஹவாரணேபி ஏஸேவ நயோ. தா⁴ரணூபபரிக்கா²தீ³ஸூதி ஆதி³-ஸத்³தே³ன துலனதீரணாதி³கே, தி³ட்டி²யா ஸுப்படிவிதே⁴ ச ஸங்க³ண்ஹாதி. ஸப்³யஞ்ஜனோதி ஏத்த² யதா²தி⁴ப்பேதமத்த²ம் ப்³யஞ்ஜயதீதி ப்³யஞ்ஜனம், ஸபா⁴வனிருத்தி. ஸஹ ப்³யஞ்ஜனேனாதி ஸப்³யஞ்ஜனோ, ப்³யஞ்ஜனஸம்பன்னோதி அத்தோ². ஸாத்தோ²தி அரணீயதோ உபக³ந்தப்³ப³தோ அனுதா⁴தப்³ப³தோ அத்தோ², சதுபாரிஸுத்³தி⁴ஸீலாதி³கோ. தேன ஸஹ அத்தே²னாதி ஸாத்தோ², அத்த²ஸம்பன்னோதி அத்தோ². த⁴ம்மக³ம்பீ⁴ரோதிஆதீ³ஸு த⁴ம்மோ நாம தந்தி. தே³ஸனா நாம தஸ்ஸா மனஸா வவத்தா²பிதாய தந்தியா தே³ஸனா. அத்தோ² நாம தந்தியா அத்தோ². படிவேதோ⁴ நாம தந்தியா, தந்திஅத்த²ஸ்ஸ ச யதா²பூ⁴தாவபோ³தோ⁴. யஸ்மா சேதே த⁴ம்மதே³ஸனா அத்த²ப்படிவேதா⁴ ஸஸாதீ³ஹி விய மஹாஸமுத்³தோ³ மந்த³பு³த்³தீ⁴ஹி து³க்கோ²கா³ஹா, அலப்³ப⁴னேய்யபதிட்டா² ச, தஸ்மா க³ம்பீ⁴ரா. தேன வுத்தம் ‘‘யஸ்மா அயம் த⁴ம்மோ…பே… ஸாது⁴கம் மனஸி கரோஹீ’’தி. ஏத்த² ச படிவேத⁴ஸ்ஸ து³க்கரபா⁴வதோ த⁴ம்மத்தா²னம், தே³ஸனாஞாணஸ்ஸ து³க்கரபா⁴வதோ தே³ஸனாய து³க்கோ²கா³ஹதா, படிவேத⁴ஸ்ஸ பன உப்பாதே³தும் அஸக்குணேய்யதாய, ஞாணுப்பத்தியா ச து³க்கரபா⁴வதோ து³க்கோ²கா³ஹதா வேதி³தப்³பா³. தே³ஸனம் நாம உத்³தி³ஸனம், தஸ்ஸ நித்³தி³ஸனம் பா⁴ஸனந்தி இதா⁴தி⁴ப்பேதந்தி ஆஹ ‘‘வித்தா²ரதோ பா⁴ஸிஸ்ஸாமீ’’தி. பரிப்³யத்தம் கத²னஞ்ஹி பா⁴ஸனம், தேனாஹ ‘‘தே³ஸேஸ்ஸாமீதி…பே… வித்தா²ரதீ³பன’’ந்தி.

யதா²வுத்தமத்த²ம் ஸுத்தபதே³ன ஸமத்தே²தும் ‘‘தேனாஹா’’திஆதி³ வுத்தம். ஸாளிகாயிவ நிக்³கோ⁴ஸோதி ஸாளிகாய ஆலாபோ விய மது⁴ரோ கண்ணஸுகோ² பேமனீயோ. படிபா⁴னந்தி ஸத்³தோ³. உதீ³ரயீதி உச்சாரீயதி, வுச்சதி வா.

ஏவம் வுத்தே உஸ்ஸாஹஜாதோதி ஏவம் ‘‘ஸுணோஹி ஸாது⁴கம் மனஸி கரோஹி பா⁴ஸிஸ்ஸாமீ’’தி வுத்தே ‘‘ந கிர ப⁴க³வா ஸங்கே²பேனேவ தே³ஸேஸ்ஸதி, வித்தா²ரேனபி பா⁴ஸிஸ்ஸதீ’’தி ஸஞ்ஜாதுஸ்ஸாஹோ ஹட்ட²துட்டோ² ஹுத்வா.

190. ‘‘இதா⁴’’தி இமினா வுச்சமானம் அதி⁴கரணம் ததா²க³தஸ்ஸ உப்பத்திட்டா²னபூ⁴தம் அதி⁴ப்பேதந்தி ஆஹ ‘‘தே³ஸாபதே³ஸே நிபாதோ’’தி. ‘‘ஸ்வாய’’ந்தி ஸாமஞ்ஞதோ இத⁴ஸத்³த³மத்தம் க³ண்ஹாதி, ந யதா²விஸேஸிதப்³ப³ம் இத⁴-ஸத்³த³ம். ததா² ஹி வக்க²தி ‘‘கத்த²சி பத³பூரணமத்தமேவா’’தி (தீ³. நி. அட்ட². 1.190). லோகம் உபாதா³ய வுச்சதி லோக-ஸத்³தே³ன ஸமானாதி⁴கரணபா⁴வேன வுத்தத்தா. ஸேஸபத³த்³வயே பன பத³ந்தரஸன்னிதா⁴னமத்தேன தம் தம் உபாதா³ய வுத்ததா த³ட்ட²ப்³பா³. இத⁴ ததா²க³தோ லோகேதி ஹி ஜாதிகே²த்தம், தத்தா²பி அயம் சக்கவாளோ ‘‘லோகோ’’தி அதி⁴ப்பேதோ. ஸமணோதி ஸோதாபன்னோ. து³தியோ ஸமணோதி ஸகதா³கா³மீ. வுத்தஞ்ஹேதம் ‘‘கதமோ ச பி⁴க்க²வே ஸமணோ? இத⁴ பி⁴க்க²வே பி⁴க்கு² திண்ணம் ஸம்யோஜனானம் பரிக்க²யா ஸோதாபன்னோ ஹோதீ’’திஆதி³ (அ. நி. 4.241). ‘‘கதமோ ச பி⁴க்க²வே து³தியோ ஸமணோ? இத⁴ பி⁴க்க²வே பி⁴க்கு² திண்ணம் ஸம்யோஜனானம் பரிக்க²யா ராக³தோ³ஸமோஹானம் தனுத்தா’’திஆதி³ (அ. நி. 4.241). ஓகாஸந்தி கஞ்சி பதே³ஸம். இதே⁴வ திட்ட²மானஸ்ஸாதி இமிஸ்ஸா ஏவ இந்த³ஸாலகு³ஹாயம் திட்ட²மானஸ்ஸ.

பத³பூரணமத்தமேவ ஓகாஸாபதி³ஸனஸ்ஸாபி அஸம்ப⁴வதோ அத்த²ந்தரஸ்ஸ அபோ³த⁴னதோ. அரஹந்தி ஆத³யோ ஸத்³தா³ வித்தா²ரிதாதி யோஜனா. அத்த²தோ வித்தா²ரணம் ஸத்³த³முகே²னேவ ஹோதீதி ஸத்³த³க்³க³ஹணம். யஸ்மா. ‘‘அபரேஹிபி அட்ட²ஹி காரணேஹி ப⁴க³வா ததா²க³தோ’’திஆதி³னா உதா³னட்ட²கதா²தீ³ஸு, (உதா³. அட்ட². 18; இதிவு. அட்ட². 38) அரஹந்தி ஆத³யோ விஸுத்³தி⁴மக்³க³டீகாயம் அபரேஹி பகாரேஹி வித்தா²ரிதா, தஸ்மாதேஸு வுத்தானயேனபி ஸோ (விஸுத்³தி⁴. டீ. 1.129, 130) அத்தோ² வேதி³தப்³போ³. ததா²க³தஸ்ஸ ஸத்தனிகாயந்தோக³த⁴தாய ‘‘இத⁴ பன ஸத்தலோகோ அதி⁴ப்பேதோ’’தி வத்வா தத்தா²யம் யஸ்மிம் ஸத்தனிகாயே யஸ்மிஞ்ச ஓகாஸே உப்பஜ்ஜதி, தம் த³ஸ்ஸேதும் ‘‘ஸத்தலோகே உப்பஜ்ஜமானோபி சா’’திஆதி³ வுத்தம். ‘‘ததா²க³தோ ந தே³வலோகே உப்பஜ்ஜதீ’’திஆதீ³ஸு யம் வத்தப்³ப³ம், தம் பரதோ ஆக³மிஸ்ஸதி. ஸாரப்பத்தாதி குலபோ⁴கி³ஸ்ஸரியாதி³வஸேன ஸாரபூ⁴தா. ப்³ராஹ்மணக³ஹபதிகாதி ப்³ரஹ்மாயுபோக்க²ரஸாதிஆதி³ப்³ராஹ்மணா சேவ அனாத²பிண்டி³காதி³க³ஹபதிகா ச.

‘‘ஸுஜாதாயா’’திஆதி³னா வுத்தேஸு சதூஸு விகப்பேஸு பட²மோ விகப்போ பு³த்³த⁴பா⁴வாய ஆஸன்னதரபடிபத்தித³ஸ்ஸனவஸேன வுத்தோ. ஆஸன்னதராய ஹி படிபத்தியா டி²தோ ‘‘உப்பஜ்ஜதீதி’’ வுச்சதி உப்பாத³ஸ்ஸ ஏகந்திகத்தா, பகே³வ படிபத்தியா மத்த²கே டி²தோ. து³தியோ பு³த்³த⁴பா⁴வாவஹபப்³ப³ஜ்ஜதோ பட்டா²ய ஆஸன்னபடிபத்தித³ஸ்ஸனவஸேன, ததியோ பு³த்³த⁴கரத⁴ம்ம பாரிபூரிதோ பட்டா²ய பு³த்³த⁴பா⁴வாய படிபத்தித³ஸ்ஸனவஸேன. ந ஹி மஹாஸத்தானம் உப்பதிப⁴வூபபத்திதோ பட்டா²ய போ³தி⁴ஸம்பா⁴ரஸம்ப⁴ரணம் நாம அத்தி². சதுத்தோ² பு³த்³த⁴கரத⁴ம்மஸமாரம்ப⁴தோ பட்டா²ய. போ³தி⁴யா நியதபா⁴வப்பத்திதோ பபு⁴தி ஹி விஞ்ஞூஹி ‘‘பு³த்³தோ⁴ உப்பஜ்ஜதீ’’தி வத்தும் ஸக்கா உப்பாத³ஸ்ஸ ஏகந்திகத்தா. யதா² பன ஸந்த³ந்தி நதி³யோதி ஸந்த³னகிரியாய அவிச்சே²த³முபாதா³ய வத்தமானப்பயோகோ³, ஏவம் உப்பாத³த்தா²ய படிபஜ்ஜனகிரியாய அவிச்சே²த³முபாதா³ய சதூஸு விகப்பேஸு ‘‘உப்பஜ்ஜதி நாமா’’தி வுத்தம். ஸப்³ப³பட²மம் உப்பன்னபா⁴வந்தி சதூஸு விகப்பேஸு ஸப்³ப³பட²மம் வுத்தம் ததா²க³தஸ்ஸ உப்பன்னதாஸங்கா²தம் அத்தி²பா⁴வம். தேனாஹ ‘‘உப்பன்னோ ஹோதீதி அயஞ்ஹேத்த² அத்தோ²’’தி.

ஸோ ப⁴க³வாதி யோ ‘‘ததா²க³தோ அரஹ’’ந்திஆதி³னா கித்திதகு³ணோ, ஸோ ப⁴க³வா. ‘‘இமம் லோக’’ந்தி நயித³ம் மஹாஜனஸ்ஸ ஸம்முக²மத்தம் ஸந்தா⁴ய வுத்தம், அத² கோ² அனவஸேஸம் பரியாதா³யாதி த³ஸ்ஸேதும் ‘‘ஸதே³வக’’ந்திஆதி³ வுத்தம், தேனாஹ ‘‘இதா³னி வத்தப்³ப³ம் நித³ஸ்ஸேதீ’’தி. பஜாதத்தாதி யதா²ஸகம் கம்மகிலேஸேஹி நிப்³ப³த்தத்தா. பஞ்சகாமாவசரதே³வக்³க³ஹணம் பாரிஸேஸஞாயேன இதரேஸம் பத³ந்தரேஹி ஸங்க³ஹிதத்தா. ஸதே³வகந்தி ச அவயவேன விக்³க³ஹோ ஸமுதா³யோ ஸமாஸத்தோ². ச²ட்ட²காமாவசரதே³வக்³க³ஹணம் பச்சாஸத்திஞாயேன. தத்த² ஹி ஸோ ஜாதோ, தம்னிவாஸீ ச. ப்³ரஹ்மகாயிகாதி³ப்³ரஹ்மக்³க³ஹணந்தி ஏத்தா²பி ஏஸேவ நயோ. பச்சத்தி²க …பே… ஸமணப்³ராஹ்மணக்³க³ஹணந்தி நித³ஸ்ஸனமத்தமேதம் அபச்சத்தி²கானம், அஸமிதாபா³ஹிதபாபானஞ்ச ஸமணப்³ராஹ்மணானம் ஸஸ்ஸமணப்³ராஹ்மணீவசனேன க³ஹிதத்தா. காமம் ‘‘ஸதே³வக’’ந்திஆதி³ விஸேஸனானம் வஸேன ஸத்தவிஸயோ லோகஸத்³தோ³தி விஞ்ஞாயதி துல்யயோக³விஸயத்தா தேஸம், ‘‘ஸலோமகோ ஸபக்க²கோ’’திஆதீ³ஸு பன அதுல்யயோகே³பி அயம் ஸமாஸோ லப்³ப⁴தீதி ப்³யபி⁴சாரத³ஸ்ஸனதோ பஜாக³ஹணந்தி ஆஹ ‘‘பஜாவசனேன ஸத்தலோகக்³க³ஹண’’ந்தி.

அரூபினோ ஸத்தா அத்தனோ ஆனேஞ்ஜவிஹாரேன விஹரந்தா தி³ப்³ப³ந்தீதி தே³வாதி இமம் நிப்³ப³சனம் லப⁴ந்தீதி ஆஹ ‘‘ஸதே³வகக்³க³ஹணேன அரூபாவசரலோகோ க³ஹிதோ’’தி. தேனாஹ ‘‘ஆகாஸானஞ்சாயதனூபகா³னம் தே³வானம் ஸஹப்³யத’’ந்தி (அ. நி. 3.117). ஸமாரகக்³க³ஹணேன ச²காமாவசரதே³வலோகோ க³ஹிதோ தஸ்ஸ ஸவிஸேஸம் மாரஸ்ஸ வஸே வத்தனதோ. ரூபீ ப்³ரஹ்மலோகோ க³ஹிதோ அரூபீப்³ரஹ்மலோகஸ்ஸ விஸும் க³ஹிதத்தா. சதுபரிஸவஸேனாதி க²த்தியாதி³சதுபரிஸவஸேன, இதரா பன சதஸ்ஸோ பரிஸா ஸமாரகாதி³க்³க³ஹணேன க³ஹிதா ஏவாதி. அவஸேஸஸப்³ப³ஸத்தலோகோ நாக³க³ருளாதி³பே⁴தோ³.

ஏத்தாவதா ச பா⁴க³ஸோ லோகம் க³ஹேத்வா யோஜனம் த³ஸ்ஸேத்வா இதா³னி தேன தேன விஸேஸேன அபா⁴க³ஸோ லோகம் க³ஹேத்வா யோஜனம் த³ஸ்ஸேதும் ‘‘அபி சேத்தா²’’திஆதி³ வுத்தம். தத்த² உக்கட்ட²பரிச்சே²த³தோதி உக்கம்ஸக³திவிஜானனேன. பஞ்சஸு ஹி க³தீஸு தே³வக³திபரியாபன்னாவ ஸேட்டா², தத்தா²பி அரூபினோ தூ³ரஸமுஸ்ஸாரிதகிலேஸது³க்க²தாய, ஸந்தபணீதஆனேஞ்ஜவிஹாரஸமங்கி³தாய, அதிதீ³கா⁴யுகதாயாதி ஏவமாதீ³ஹி விஸேஸேஹி அதிவிய உக்கட்டா². ‘‘ப்³ரஹ்மா மஹானுபா⁴வோ’’திஆதி³ த³ஸஸஹஸ்ஸியம் மஹாப்³ரஹ்முனோ வஸேன வத³தி. ‘‘உக்கட்ட²பரிச்சே²த³தோ’’தி ஹி வுத்தம். அனுத்தரந்தி ஸேட்ட²ம் நவ லோகுத்தரம். பா⁴வானுக்கமோதி பா⁴வவஸேன பரேஸம் அஜ்ஜா²ஸயவஸேன ‘‘ஸதே³வக’’ந்திஆதீ³னம் பதா³னம் அனுக்கமோ.

தீஹாகாரேஹீதி தே³வமாரப்³ரஹ்மஸஹிததாஸங்கா²தேஹி தீஹி பகாரேஹி. தீஸு பதே³ஸூதி ‘‘ஸதே³வக’’ந்திஆதீ³ஸு தீஸு பதே³ஸு. தேன தேனாகாரேனாதி ஸதே³வகத்தாதி³னா தேன தேன பகாரேன. தேதா⁴துகமேவ பரியாதி³ன்னந்தி போராணா பனாஹூதி யோஜனா.

அபி⁴ஞ்ஞாதி ய-காரலோபேனாயம் நித்³தே³ஸோ, அபி⁴ஜானித்வாதி அயமேத்த² அத்தோ²தி ஆஹ ‘‘அபி⁴ஞ்ஞாய அதி⁴கேன ஞாணேன ஞத்வா’’தி. அனுமானாதி³படிக்கே²போதி அனுமானஉபமானஅத்தா²பத்திஆதி³படிக்கே²போ ஏகப்பமாணத்தா. ஸப்³ப³த்த² அப்படிஹதஞாணசாரதாய ஹி ஸப்³ப³பச்சக்கா² பு³த்³தா⁴ ப⁴க³வந்தோ.

அனுத்தரம் விவேகஸுக²ந்தி ப²லஸமாபத்திஸுக²ம், தேன டி²திமிஸ்ஸாபி [வீதி²மிஸ்ஸாபி (ஸாரத்த². டீ. 1.வேரஞ்ஜகண்ட³வண்ணனாயம்) தி⁴திமிஸ்ஸாபி (க)] கதா³சி ப⁴க³வதோ த⁴ம்மதே³ஸனா ஹோதீதி ஹித்வாபீதி பி-ஸத்³த³க்³க³ஹணம். ப⁴க³வா ஹி த⁴ம்மம் தே³ஸேந்தோ யஸ்மிம் க²ணே பரிஸா ஸாது⁴காரம் வா தே³தி, யதா²ஸுதம் வா த⁴ம்மம் பச்சவேக்க²தி, தம் க²ணம் புப்³ப³பா⁴கே³ன பரிச்சி²ந்தி³த்வா ப²லஸமாபத்திம் ஸமாபஜ்ஜதி, யதா²பரிச்சே²த³ஞ்ச ஸமாபத்திதோ வுட்டா²ய டி²தட்டா²னதோ பட்டா²ய த⁴ம்மம் தே³ஸேதி. உக்³க⁴டிதஞ்ஞுஸ்ஸ வஸேன அப்பம் வா விபஞ்சிதஞ்ஞுஸ்ஸ, நேய்யஸ்ஸ வா வஸேன ப³ஹும் வா தே³ஸேந்தோ. த⁴ம்மஸ்ஸ கல்யாணதா நிய்யானிகதாய, நிய்யானிகதா ச ஸப்³ப³ஸோ அனவஜ்ஜபா⁴வேனேவாதி ஆஹ ‘‘அனவஜ்ஜமேவ கத்வா’’தி. தே³ஸகாயத்தேன ஆணாதி³விதி⁴னா அபி⁴ஸஜ்ஜனம் பபோ³த⁴னம் தே³ஸனாதி ஸா பரியத்தித⁴ம்மவஸேன வேதி³தப்³பா³தி ஆஹ ‘‘தே³ஸனாய தாவ சதுப்பதி³காயபி கா³தா²யா’’திஆதி³. நிதா³னனிக³மனானிபி ஸத்து²னோ தே³ஸனாய அனுவிதா⁴னதோ தத³ந்தோக³தா⁴னி ஏவாதி ஆஹ ‘‘நிதா³னமாதி³, இத³ம் ஏவோசாதி பரியோஸான’’ந்தி.

ஸாஸிதப்³ப³புக்³க³லக³தேன யதா²பராதா⁴தி³ஸாஸிதப்³ப³பா⁴வேன அனுஸாஸனம் தத³ங்க³வினயாதி³வஸேன வினயனம் ஸாஸனந்தி தம் படிபத்தித⁴ம்மவஸேன வேதி³தப்³ப³ந்தி ஆஹ ‘‘ஸீலஸமாதி⁴விபஸ்ஸனா’’திஆதி³. குஸலானம் த⁴ம்மானந்தி அனவஜ்ஜத⁴ம்மானம் ஸீலஸ்ஸ, ஸமத²விபஸ்ஸனானஞ்ச ஸீலதி³ட்டீ²னம் ஆதி³பா⁴வோ தம் மூலகத்தா உத்தரிமனுஸ்ஸத⁴ம்மானம். அரியமக்³க³ஸ்ஸ அந்தத்³வயவிக³மேன மஜ்ஜி²மபடிபதா³பா⁴வோ விய, ஸம்மாபடிபத்தியா ஆரப்³ப⁴னிப்ப²த்தீனம் வேமஜ்ஜ²த்தாபி மஜ்ஜ²பா⁴வோதி வுத்தம். ‘‘அத்தி² பி⁴க்க²வே…பே… மஜ்ஜ²ம் நாமா’’தி. ப²லம் பரியோஸானம் நாம ஸஉபாதி³ஸேஸதாவஸேன, நிப்³பா³னம் பரியோஸானம் நாம அனுபாதி³ஸேஸதாவஸேன. இதா³னி தேஸம் த்³வின்னம்பி ஸாஸனஸ்ஸ பரியோஸானதம் ஆக³மேன த³ஸ்ஸேதும் ‘‘ஏதத³த்த²மித³’’ந்திஆதி³ ஆஹ. இத⁴ தே³ஸனாய ஆதி³மஜ்ஜ²பரியோஸானம் அதி⁴ப்பேதம் ‘‘ஸப்³யஞ்ஜன’’ந்திஆதி³ வசனதோ. தஸ்மிம் தஸ்மிம் அத்தே² கதாவதி⁴ஸத்³த³ப்பப³ந்தோ⁴ கா³தா²வஸேன, ஸுத்தவஸேன ச வவத்தி²தோ பரியத்தித⁴ம்மோ, யோ இத⁴ ‘‘தே³ஸனா’’தி வுத்தோ, தஸ்ஸ பன அத்தோ² விஸேஸதோ ஸீலாதி³ ஏவாதி ஆஹ ‘‘ப⁴க³வா ஹி த⁴ம்மம் தே³ஸேந்தோ…பே… த³ஸ்ஸேதீ’’தி. தத்த² ஸீலம் த³ஸ்ஸேத்வாதி ஸீலக்³க³ஹணேன ஸஸம்பா⁴ரம் ஸீலம் க³ஹிதம், ததா² மக்³க³க்³க³ஹணேன ஸஸம்பா⁴ரோ மக்³கோ³தி தது³ப⁴யவஸேன அனவஸேஸதோ பரியத்தி அத்த²ம் பரியாதி³யதி. தேனாதி ஸீலாதி³த³ஸ்ஸனேன. அத்த²வஸேன ஹி இத⁴ தே³ஸனாய ஆதி³கல்யாணாதி³பா⁴வோ அதி⁴ப்பேதோ. கதி²கஸண்டி²தீதி கதி²கஸ்ஸ ஸண்டா²னம் கத²னவஸேன ஸமவட்டா²னம்.

ந ஸோ ஸாத்த²ம் தே³ஸேதி நிய்யானத்த²விரஹதோ தஸ்ஸா தே³ஸனாய. ஏகப்³யஞ்ஜனாதி³யுத்தா வாதி ஸிதி²லாதி³பே⁴தே³ஸு ப்³யஞ்ஜனேஸு ஏகப்பகாரேமேவ, த்³விபகாரேமேவ வா ப்³யஞ்ஜனேன யுத்தா வா த³மிளபா⁴ஸா விய. விவடகரணதாய ஓட்டே² அபு²ஸாபேத்வா உச்சாரேதப்³ப³தோ ஸப்³ப³னிரோட்ட²ப்³யஞ்ஜனா வா கிராதபா⁴ஸா விய. ஸப்³ப³ஸ்ஸேவ [ஸப்³ப³த்தே²வ (ஸாரத்த². டீ. 1.வேரஞ்ஜகண்ட³வண்ணனாயம் 1)] விஸ்ஸஜ்ஜனீயயுத்ததாய ஸப்³ப³விஸ்ஸட்ட²ப்³யஞ்ஜனா வா ஸவரபா⁴ஸா [யவனபா⁴ஸா (ஸாரத்த². டீ. 1.வேரஞ்ஜகண்ட³வண்ணனாயம்)] விய. ஸப்³ப³ஸ்ஸேவ [ஸப்³ப³த்தே²வ (ஸாரத்த². டீ. 1.வேரஞ்ஜகண்ட³வண்ணனாயம்)] ஸானுஸாரதாய ஸப்³ப³னிக்³க³ஹிதப்³யஞ்ஜனா வா பாரஸிகாதி³மிலக்கு²பா⁴ஸா விய. ஸப்³பா³பேஸா ப்³யஞ்ஜனேகதே³ஸவஸேன பவத்தியா அபரிபுண்ணப்³யஞ்ஜனாதி கத்வா ‘‘அப்³யஞ்ஜனா’’தி வுத்தா.

டா²னகரணானி ஸிதி²லானி கத்வா உச்சாரேதப்³ப³ம் அக்க²ரம் பஞ்சஸு வக்³கே³ஸு பட²மததியந்தி ஏவமாதி³ ஸிதி²லம். தானி அஸிதி²லானி கத்வா உச்சாரேதப்³ப³ம் அக்க²ரம் வக்³கே³ஸு து³தியசதுத்த²ந்தி ஏவமாதி³ த⁴னிதம். த்³விமத்தகாலம் தீ³க⁴ம். ஏகமத்தகாலம் ரஸ்ஸம் ததே³வ லஹுகம். லஹுகமேவ ஸம்யோக³பரம், தீ³க⁴ஞ்ச க³ருகம். டா²னகரணானி நிக்³க³ஹேத்வா உச்சாரேதப்³ப³ம் நிக்³க³ஹிதம். பரேன ஸம்ப³ந்த⁴ம் கத்வா உச்சாரேதப்³ப³ம் ஸம்ப³ந்த⁴ம். ததா² நஸம்ப³ந்த⁴ம் வவத்தி²தம். டா²னகரணானி நிஸ்ஸட்டா²னி கத்வா உச்சாரேதப்³ப³ம் விமுத்தம். த³ஸதா⁴தி ஏவம் ஸிதி²லாதி³வஸேன ப்³யஞ்ஜனபு³த்³தி⁴யா அக்க²ருப்பாத³கசித்தஸ்ஸ ஸப்³பா³காரேன பபே⁴தோ³. ஸப்³பா³னி ஹி அக்க²ரானி சித்தஸமுட்டா²னானி யதா²தி⁴ப்பேதத்த²ம் ப்³யஞ்ஜனதோ ப்³யஞ்ஜனானி சாதி.

அமக்கே²த்வாதி அமிலேச்சே²த்வா, அவினாஸேத்வா, அஹாபேத்வாதி வா அத்தோ². ப⁴க³வா யமத்த²ம் ஞாபேதும் ஏகம் கா³த²ம், ஏகம் வாக்யம் வா தே³ஸேதி, தமத்த²ம் தாய தே³ஸனாய பரிமண்ட³லபத³ப்³யஞ்ஜனாய ஏவ தே³ஸேதீதி ஆஹ ‘‘பரிபுண்ணப்³யஞ்ஜனமேவ கத்வா த⁴ம்மம் தே³ஸேதீ’’தி. இத⁴ கேவலஸத்³தோ³ அனவஸேஸவாசகோ, ந அவோமிஸ்ஸகாதி³வாசகோதி ஆஹ ‘‘ஸகலாதி⁴வசன’’ந்தி. பரிபுண்ணந்தி ஸப்³ப³ஸோ புண்ணம், தம் பன கேனசி ஊனம், அதி⁴கம் வா ந ஹோதீதி ‘‘அனூனாதி⁴கவசன’’ந்தி வுத்தம். தத்த² யத³த்த²ம் தே³ஸிதோ, தஸ்ஸ ஸாத⁴கத்தா அனூனதா வேதி³தப்³பா³, தப்³பி³து⁴ரஸ்ஸ பன அஸாத⁴கத்தா அனதி⁴கதா. ஸகலந்தி ஸப்³ப³பா⁴க³வந்தம். பரிபுண்ணந்தி ஸப்³ப³ஸோ பரிபுண்ணமேவ, தேனாஹ ‘‘ஏகதே³ஸனாபி அபரிபுண்ணா நத்தீ²’’தி. அபரிஸுத்³தா⁴ தே³ஸனா ஹோதி தண்ஹாய ஸம்கிலிட்ட²த்தா. லோகாமிஸம் சீவராத³யோ பச்சயா தத்த² அக³தி⁴தசித்ததாய லோகாமிஸனிரபேக்கோ². ஹிதப²ரணேனாதி ஹிதூபஸம்ஹாரேன. மேத்தாபா⁴வனாய கரணபூ⁴தாய முது³ஹத³யோ. உல்லும்பனஸபா⁴வஸண்டி²தேனாதி ஸகலஸம்கிலேஸதோ, வட்டது³க்க²தோ ச உத்³த⁴ரணாகாராவட்டி²தேன சித்தேன, காருணாதி⁴ப்பாயேனாதி அத்தோ².

‘‘இதோ பட்டா²ய த³ஸ்ஸாமேவ, ஏவஞ்ச த³ஸ்ஸாமீ’’தி ஸமாதா³தப்³ப³ட்டே²ன வதம். பண்டி³தபஞ்ஞத்ததாய ஸேட்ட²ட்டே²ன ப்³ரஹ்மம் ப்³ரஹ்மானம் வா சரியந்தி ப்³ரஹ்மசரியம் தா³னம். மச்ச²ரியலோபா⁴தி³னிக்³க³ண்ஹனேன ஸுசிண்ணஸ்ஸ. இத்³தீ⁴தி தே³வித்³தி⁴. ஜுதீதி பபா⁴, ஆனுபா⁴வோ வா. ப³லவீரியூபபத்தீதி ஏவம் மஹதா ப³லேன ச வீரியேன ச ஸமன்னாக³மோ. புஞ்ஞந்தி புஞ்ஞப²லம். வேய்யாவச்சம் ப்³ரஹ்மசரியம் ஸேட்டா² சரியாதி கத்வா. ஏஸ நயோ ஸேஸேபி.

தஸ்மாதி யஸ்மா ஸிக்க²த்தயஸங்க³ஹம் ஸகலம் ஸாஸனம் இத⁴ ‘‘ப்³ரஹ்மசரிய’’ந்தி அதி⁴ப்பேதம் தஸ்மா. ‘‘ப்³ரஹ்மசரிய’’ந்தி இமினா ஸமானாதி⁴கரணானி ஸப்³ப³பதா³னி யோஜேத்வா அத்த²ம் த³ஸ்ஸேந்தோ ‘‘ஸோ த⁴ம்மம் தே³ஸேதி…பே… பகாஸேதீதி ஏவமேத்த² அத்தோ² த³ட்ட²ப்³போ³’’தி ஆஹ.

191. வுத்தப்பகாரஸம்பத³ந்தி யதா²வுத்தம் ஆதி³கல்யாணதாதி³கு³ணஸம்பத³ம், தூ³ரஸமுஸ்ஸாரிதமானஸ்ஸேவ ஸாஸனே ஸம்மாபடிபத்தி ஸம்ப⁴வதி, ந மானஜாதிகஸ்ஸாதி ஆஹ ‘‘நிஹதமானத்தா’’தி. உஸ்ஸன்னத்தாதி ப³ஹுலபா⁴வதோ. போ⁴கா³ரோக்³யாதி³வத்து²கா மதா³ ஸுப்பஹேய்யா ஹோந்தி நிமித்தஸ்ஸ அனவத்தா²னதோ, ந ததா² குலவிஜ்ஜாமதா³, தஸ்மா க²த்தியப்³ராஹ்மணகுலானம் பப்³ப³ஜிதானம்பி ஜாதிவிஜ்ஜா நிஸ்ஸாய மானஜப்பனம் து³ப்பஜஹந்தி ஆஹ ‘‘யேபு⁴ய்யேன ஹி…பே… மானம் கரோந்தீ’’தி. விஜாதிதாயாதி நிஹீனஜாதிதாய. பதிட்டா²தும் ந ஸக்கோந்தீதி ஸுவிஸுத்³த⁴ம் கத்வா ஸீலம் ரக்கி²தும் ந ஸக்கோந்தி. ஸீலவஸேன ஹி ஸாஸனே பதிட்டா², பதிட்டா²துந்தி வா ஸச்சபடிவேதே⁴ன லோகுத்தராய பதிட்டா²ய பதிட்டா²தும். ஸா ஹி நிப்பரியாயதோ ஸாஸனே பதிட்டா² நாம, யேபு⁴ய்யேன ச உபனிஸ்ஸயஸம்பன்னா ஸுஜாதா ஏவ ஹோந்தி, ந து³ஜ்ஜாதா.

பரிஸுத்³த⁴ந்தி ராகா³தீ³னம் அச்சந்தமேவ பஹானதீ³பனதோ நிருபக்கிலேஸதாய ஸப்³ப³ஸோ பரிஸுத்³த⁴ம். ஸத்³த⁴ம் படிலப⁴தீதி போது²ஜ்ஜனிகஸத்³தா⁴வஸேன ஸத்³த³ஹதி. விஞ்ஞூஜாதிகானஞ்ஹி த⁴ம்மஸம்பத்திக்³க³ஹணபுப்³பி³கா ஸத்³தா⁴ ஸித்³தி⁴ த⁴ம்மப்பமாணத⁴ம்மப்பஸன்னபா⁴வதோ. ‘‘ஸம்மாஸம்பு³த்³தோ⁴ வத ஸோ ப⁴க³வா, யோ ஏவம் ஸ்வாக்கா²தத⁴ம்மோ’’தி ஸத்³த⁴ம் படிலப⁴தி. ஜாயம்பதிகாதி க⁴ரணீபதிகா. காமம் ‘‘ஜாயம்பதிகா’’தி வுத்தே க⁴ரஸாமிகக⁴ரஸாமினீவஸேன த்³வின்னம்யேவ க³ஹணம் விஞ்ஞாயதி. யஸ்ஸ பன புரிஸஸ்ஸ அனேகா பஜாபதியோ, தத்த² கிம் வத்தப்³ப³ம், ஏகாயாபி ஸம்வாஸோ ஸம்பா³தோ⁴தி த³ஸ்ஸனத்த²ம் ‘‘த்³வே’’தி வுத்தம். ராகா³தி³னா ஸகிஞ்சனட்டே²ன, கே²த்தவத்து² ஆதி³னா ஸபலிபோ³த⁴ட்டே²ன ராக³ரஜாதீ³னம் ஆக³மனபத²தாபி உட்டா²னட்டா²னதா ஏவாதி த்³வேபி வண்ணனா ஏகத்தா², ப்³யஞ்ஜனமேவ நானம். அலக்³க³னட்டே²னாதி அஸ்ஸஜ்ஜனட்டே²ன அப்படிப³த்³த⁴பா⁴வேன. ஏவம் அகுஸலகுஸலப்பவத்தீனம் டா²னபா⁴வேன க⁴ராவாஸபப்³ப³ஜ்ஜானம் ஸம்பா³த⁴ப்³போ⁴காஸதம் த³ஸ்ஸேத்வா இதா³னி குஸலப்பவத்தியா ஏவ அட்டா²னட்டா²னபா⁴வேன தேஸம் தம் த³ஸ்ஸேதும் ‘‘அபிசா’’திஆதி³ வுத்தம்.

ஸங்கே²பகதா²தி விஸும் விஸும் பது³த்³தா⁴ரம் அகத்வா ஸமாஸதோ அத்த²வண்ணனா. ஏகம்பி தி³வஸந்தி ஏகதி³வஸமத்தம்பி. அக²ண்ட³ம் கத்வாதி து³க்கடமத்தஸ்ஸபி அனாபஜ்ஜனேன அக²ண்டி³தம் கத்வா. கிலேஸமலேன அமலீனந்தி தண்ஹாஸம்கிலேஸாதி³னா அஸம்கிலிட்ட²ம் கத்வா. பரியோதா³தட்டே²ன நிம்மலபா⁴வேன ஸங்க²ம் விய லிகி²தம் தோ⁴தந்தி ஸங்க²லிகி²தந்தி ஆஹ ‘‘தோ⁴தஸங்க²ஸப்படிபா⁴க³’’ந்தி. ‘‘அஜ்ஜா²வஸதா’’தி பத³ப்பயோகே³ன ‘‘அகா³ர’’ந்தி பு⁴ம்மத்தே² உபயோக³வசனந்தி ஆஹ ‘‘அகா³ரமஜ்ஜே²’’தி. கஸாயேன ரத்தானி வத்தா²னி காஸாயானீதி ஆஹ ‘‘கஸாயரஸபீததாயா’’தி. பரித³ஹித்வாதி நிவாஸேத்வா சேவ பாருபித்வா ச. அகா³ரவாஸோ அகா³ரம் உத்தரபத³லோபேன, தஸ்ஸ வட்³டி⁴ஆவஹம் அகா³ரஸ்ஸ ஹிதம்.

192. போ⁴க³க்க²ந்தோ⁴தி போ⁴க³ஸமுதா³யோ. ஆப³ந்த⁴னட்டே²னாதி ‘‘புத்தோ நத்தா’’திஆதி³னா பேமவஸேன ஸபரிச்சே²த³ம் ப³ந்த⁴னட்டே²ன. ‘‘அம்ஹாகமேதே’’தி ஞாயந்தீதி ஞாதீ. பிதாமஹபிதுபுத்தாதி³வஸேன பரிவத்தனட்டே²ன பரிவட்டோ.

193. பாதிமோக்க²ஸம்வரஸம்வுதோதி பாதிமோக்க²ஸம்வரேன பிஹிதகாயவசீத்³வாரோ, ததா²பூ⁴தோ ச யஸ்மா தேன ஸம்வரேன உபேதோ நாம ஹோதி, தஸ்மா வுத்தம் ‘‘பாதிமோக்க²ஸம்வரேன ஸமன்னாக³தோ’’தி. ‘‘ஆசாரகோ³சரஸம்பன்னோ’’திஆதி³ தஸ்ஸேவ பாதிமோக்க²ஸம்வரஸமன்னாக³மஸ்ஸ பச்சயத³ஸ்ஸனம். அப்பமத்தகேஸூதி அஸஞ்சிச்ச ஆபன்னஅனுகு²த்³த³கேஸு சேவ ஸஹஸா உப்பன்னஅகுஸலசித்துப்பாதே³ஸு ச. ப⁴யத³ஸ்ஸாவீதி ப⁴யத³ஸ்ஸனஸீலோ. ஸம்மா ஆதி³யித்வாதி ஸக்கச்சம் யாவஜீவம் அவீதிக்கமவஸேன ஆதி³யித்வா. தம் தம் ஸிக்கா²பத³ந்தி தம் தம் ஸிக்கா²கோட்டா²ஸம். ஏத்தா²தி ஏதஸ்மிம் ‘‘பாதிமோக்க²ஸம்வரஸம்வுதோ’’தி பாடே². ஸங்கே²போதி ஸங்கே²பவண்ணனா. வித்தா²ரோ விஸுத்³தி⁴மக்³கே³ (விஸுத்³தி⁴. 1.14) வுத்தோ, தஸ்மா ஸோ தத்த², தம்ஸம்வண்ணனாய (விஸுத்³தி⁴. டீ. 1.14) ச வுத்தனயேன வேதி³தப்³போ³.

ஆசாரகோ³சரக்³க³ஹணேனேவாதி ‘‘ஆசாரகோ³சரஸம்பன்னோ’’தி வசனேனேவ. தேனாஹ ‘‘குஸலே காயகம்மவசீகம்மே க³ஹிதேபீ’’தி. அதி⁴கவசனம் அஞ்ஞமத்த²ம் போ³தே⁴தீதி கத்வா தஸ்ஸ ஆஜீவபாரிஸுத்³தி⁴ஸீலஸ்ஸ உப்பத்தித்³வாரத³ஸ்ஸனத்த²ம்…பே… குஸலேனாதி வுத்தம், ஸப்³ப³ஸோ அனேஸனப்பஹானேன அனவஜ்ஜேனாதி அத்தோ². யஸ்மா ‘‘கதமே ச த²பதி குஸலா ஸீலா குஸலம் காயகம்மம் குஸலம் வசீகம்ம’’ந்தி (ம. நி. 2.265) ஸீலஸ்ஸ குஸலகாயவசீபா⁴வம் த³ஸ்ஸேத்வா ‘‘ஆஜீவபரிஸுத்³த⁴ம்பி கோ² அஹம் த²பதி ஸீலஸ்மிம் வதா³மீ’’தி (ம. நி. 2.265) ஏவம் பவத்தாய முண்டி³கஸுத்ததே³ஸனாய ‘‘காயகம்மவசீகம்மேன ஸமன்னாக³தோ குஸலேன, பரிஸுத்³தா⁴ஜீவோ’’தி அயம் தே³ஸனா ஏகஸங்க³ஹா அஞ்ஞத³த்து² ஸம்ஸந்த³தி ஸமேதீதி த³ஸ்ஸேந்தோ ஆஹ ‘‘முண்டி³கஸுத்தவஸேன வா ஏவம் வுத்த’’ந்தி. ஸீலஸ்மிம் வதா³மீதி ‘‘ஸீல’’ந்தி வதா³மி, ‘‘ஸீலஸ்மிம் அந்தோக³த⁴ம் பரியாபன்ன’’ந்தி வதா³மீதி வா அத்தோ². பரியாதா³னத்த²ந்தி பரிக்³க³ஹத்த²ம்.

திவிதே⁴ன ஸீலேனாதி சூளஸீலம் மஜ்ஜி²மஸீலம் மஹாஸீலந்தி ஏவம் திவிதே⁴ன ஸீலேன. மனச்ச²ட்டே²ஸு இந்த்³ரியேஸு, ந காயபஞ்சமேஸு. யதா²லாப⁴யதா²ப³லயதா²ஸாருப்பப்பகாரவஸேன திவிதே⁴ன ஸந்தோஸேன.

சூளமஜ்ஜி²மமஹாஸீலவண்ணனா

194-211. ‘‘ஸீலஸ்மி’’ந்தி இத³ம் நித்³தா⁴ரணே பு⁴ம்மந்தி ஆஹ ‘‘ஏகம் ஸீலம் ஹோதீதி அத்தோ²’’தி. அயமேவ அத்தோ²தி பச்சத்தவசனத்தோ² ஏவ. ப்³ரஹ்மஜாலேதி ப்³ரஹ்மஜாலவண்ணனாயம் (தீ³. நி. அட்ட². 1.7).

212. அத்தானுவாத³பரானுவாத³த³ண்ட³ப⁴யாதீ³னி அஸம்வரமூலகானி. ஸீலஸ்ஸாஸம்வரதோதி ஸீலஸ்ஸ அஸம்வரணதோ, ஸீலஸம்வராபா⁴வதோதி அத்தோ². ப⁴வேய்யாதி உப்பஜ்ஜேய்ய. யதா²விதா⁴னவிஹிதேனாதி யதா²விதா⁴னஸம்பாதி³தேன. அவிப்படிஸாராதி³னிமித்தம் உப்பன்னசேதஸிகஸுக²ஸமுட்டா²னேஹி பணீதரூபேஹி பு²ட்ட²ஸரீரஸ்ஸ உளாரம் காயிகம் ஸுக²ம் ப⁴வதீதி ஆஹ ‘‘அவிப்படிஸார…பே… படிஸம்வேதே³தீ’’தி.

இந்த்³ரியஸம்வரகதா²வண்ணனா

213. விஸேஸோ கம்மத்தா²பேக்க²தாய ஸாமஞ்ஞஸ்ஸ ந தேஹி பரிசத்தோதி ஆஹ ‘‘சக்கு²-ஸத்³தோ³ கத்த²சி பு³த்³த⁴சக்கு²ம்ஹி வத்ததீ’’தி. விஜ்ஜமானமேவ ஹி அபி⁴தே⁴ய்யே விஸேஸத்த²ம் விஸேஸந்தரனிவத்தனவஸேன விஸேஸஸத்³தோ³ விபா⁴வேதி, ந அவிஜ்ஜமானம். ஸேஸபதே³ஸுபி ஏஸேவ நயோ. அஞ்ஞேஹி அஸாதா⁴ரணம் பு³த்³தா⁴னம்யேவ சக்கு²த³ஸ்ஸனந்தி பு³த்³த⁴சக்கு², ஆஸயானுஸயஞாணம், இந்த்³ரியபரோபரியத்தஞாணஞ்ச. ஸமந்ததோ ஸப்³ப³ஸோ த³ஸ்ஸனட்டே²ன ஸமந்தசக்கு², ஸப்³ப³ஞ்ஞுதஞ்ஞாணம். அரியமக்³க³த்தயபஞ்ஞாதி ஹேட்டி²மே அரியமக்³க³த்தயே பஞ்ஞா. இதா⁴தி ‘‘சக்கு²னா ரூப’’ந்தி இமஸ்மிம் பாடே². அயம் சக்கு²-ஸத்³தோ³ பஸாத³…பே… வத்ததி நிஸ்ஸயவோஹாரே நிஸ்ஸிதஸ்ஸ வத்தப்³ப³தோ யதா². ‘‘மஞ்சா உக்குட்டி²ம் கரோந்தீ’’தி. அஸம்மிஸ்ஸந்தி கிலேஸது³க்கே²ன அவோமிஸ்ஸம். தேனாஹ ‘‘பரிஸுத்³த⁴’’ந்தி. ஸதி ஹி ஸுவிஸுத்³தே⁴ இந்த்³ரியஸம்வரே, பதா⁴னபூ⁴தபாபத⁴ம்மவிக³மேன அதி⁴சித்தானுயோகோ³ ஹத்த²க³தோ ஏவம் ஹோதீதி ஆஹ ‘‘அதி⁴சித்தஸுக²ம் படிஸம்வேதே³தீ’’தி.

ஸதிஸம்பஜஞ்ஞகதா²வண்ணனா

214. ஸமந்ததோ, பகட்ட²ம் வா ஸவிஸேஸம் ஜானாதீதி ஸம்பஜானோ, ஸம்பஜானஸ்ஸ பா⁴வோ ஸம்பஜஞ்ஞம், ததா²பவத்தஞாணம். தஸ்ஸ விப⁴ஜனம் ஸம்பஜஞ்ஞபா⁴ஜனீயம், தஸ்மிம் ஸம்பஜஞ்ஞபா⁴ஜனீயம்ஹி. அபி⁴க்கமனம் அபி⁴க்கந்தந்தி ஆஹ ‘‘அபி⁴க்கந்தம் வுச்சதி க³மன’’ந்தி. ததா² படிக்கமனம் படிக்கந்தந்தி ஆஹ ‘‘படிக்கந்தம் நிவத்தன’’ந்தி. நிவத்தனந்தி ச நிவத்திமத்தம். நிவத்தித்வா பன க³மனம் க³மனமேவ. அபி⁴ஹரந்தோதி க³மனவஸேன காயம் உபனேந்தோ. டா²னனிஸஜ்ஜாஸயனேஸு யோ க³மனவிது⁴ரோ காயஸ்ஸ புரதோ அபி⁴ஹாரோ, ஸோ அபி⁴க்கமோ, பச்ச²தோ அபஹரணம் படிக்கமோதி த³ஸ்ஸேந்தோ ‘‘டா²னேபீ’’திஆதி³மாஹ. ஆஸனஸ்ஸாதி பீட²காதி³ஆஸனஸ்ஸ. புரிமஅங்கா³பி⁴முகோ²தி அடனிகாதி³புரிமாவயவாபி⁴முகோ². ஸம்ஸரந்தோதி ஸம்ஸப்பந்தோ. பச்சாஸம்ஸரந்தோதி படிஆஸப்பந்தோ. ‘‘ஏஸேவ நயோ’’தி இமினா நிபன்னஸ்ஸேவ அபி⁴முக²ஸம்ஸப்பனபடிஆஸப்பனானி நித³ஸ்ஸேதி.

ஸம்மா பஜானனம் ஸம்பஜானம், தேன அத்தனா காதப்³ப³கிச்சஸ்ஸ கரணஸீலோ ஸம்பஜானகாரீதி ஆஹ ‘‘ஸம்பஜஞ்ஞேன ஸப்³ப³கிச்சகாரீ’’தி. ஸம்பஜானஸத்³த³ஸ்ஸ ஸம்பஜஞ்ஞபரியாயதா புப்³பே³ வுத்தா ஏவ. ஸம்பஜஞ்ஞம் கரோதேவாதி அபி⁴க்கந்தாதீ³ஸு அஸம்மோஹம் உப்பாதே³தி ஏவ. ஸம்பஜஞ்ஞஸ்ஸ வா காரோ ஏதஸ்ஸ அத்தீ²தி ஸம்பஜானகாரீ. த⁴ம்மதோ வட்³டி⁴ஸங்கா²தேன ஸஹ அத்தே²ன வத்ததீதி ஸாத்த²கம், அபி⁴க்கந்தாதி³. ஸாத்த²கஸ்ஸ ஸம்பஜானனம் ஸாத்த²கஸம்பஜஞ்ஞம். ஸப்பாயஸ்ஸ அத்தனோ ஹிதஸ்ஸ ஸம்பஜானனம் ஸப்பாயஸம்பஜஞ்ஞம். அபி⁴க்கமாதீ³ஸு பி⁴க்கா²சாரகோ³சரே, அஞ்ஞத்தா²பி ச பவத்தேஸு அவிஜஹிதே கம்மட்டா²னஸங்கா²தே கோ³சரே ஸம்பஜஞ்ஞம் கோ³சரஸம்பஜஞ்ஞம். அபி⁴க்கமாதீ³ஸு அஸம்முய்ஹனமேவ ஸம்பஜஞ்ஞம் அஸம்மோஹஸம்பஜஞ்ஞம். பரிக்³க³ஹேத்வாதி தூலேத்வா தீரேத்வா படிஸங்கா²யாதி, அத்தோ². ஸங்க⁴த³ஸ்ஸனேனேவ உபோஸத²பவாரணாதி³அத்த²ம் க³மனம் ஸங்க³ஹிதம். அஸுப⁴த³ஸ்ஸனாதீ³தி ஆதி³-ஸத்³தே³ன கஸிணபரிகம்மாதீ³னம் ஸங்க³ஹோ த³ட்ட²ப்³போ³. ஸங்கே²பதோ வுத்தமத்த²ம் விவரிதும் ‘‘சேதியம் வா போ³தி⁴ம் வா தி³ஸ்வாபி ஹீ’’திஆதி³ வுத்தம். அரஹத்தம் பாபுணாதீதி உக்கட்ட²னித்³தே³ஸோ ஏஸோ. ஸமத²விபஸ்ஸனுப்பாத³னம்பி ஹி பி⁴க்கு²னோ வட்³டி⁴யேவ. கேசீதி அப⁴யகி³ரிவாஸினோ.

தஸ்மிம் பனாதி ஸாத்த²கஸம்பஜஞ்ஞவஸேன பரிக்³க³ஹிதஅத்தே². ‘‘அத்தோ²தி த⁴ம்மதோ வட்³டீ⁴’’தி யம் ஸாத்த²கந்தி அதி⁴ப்பேதம், தம் ஸப்பாயம் ஏவாதி ஸியா கஸ்ஸசி ஆஸங்காதி தன்னிவத்தனத்த²ம் ‘‘சேதியத³ஸ்ஸனம் தாவா’’திஆதி³ ஆரத்³த⁴ம். சித்தகம்மரூபகானி வியாதி சித்தகம்மகதா படிமாயோ விய, யந்தபயோகே³ன வா விசித்தகம்மா படிமாயோ விய. அஸமபேக்க²னம் கே³ஹஸ்ஸித அஞ்ஞாணுபேக்கா²வஸேன ஆரம்மணஸ்ஸ அயோனிஸோ க³ஹணம். யம் ஸந்தா⁴ய வுத்தம். ‘‘சக்கு²னா ரூபம் தி³ஸ்வா உப்பஜ்ஜதி உபேக்கா² பா³லஸ்ஸ மூள்ஹஸ்ஸ புது²ஜ்ஜனஸ்ஸா’’திஆதி³ (ம. நி. 3.308). ஹத்தி²ஆதி³ஸம்மத்³தே³ன ஜீவிதந்தராயோ. விஸபா⁴க³ரூபத³ஸ்ஸனாதி³னா ப்³ரஹ்மசரியந்தராயோ.

பப்³ப³ஜிததி³வஸதோ பட்டா²ய பி⁴க்கூ²னம் அனுவத்தனகதா² ஆசிண்ணா, அனனுவத்தனகதா² பன தஸ்ஸா து³தியா நாம ஹோதீதி ஆஹ ‘‘த்³வே கதா² நாம ந கதி²தபுப்³பா³’’தி. ஏவந்தி ‘‘ஸசே பனா’’திஆதி³கம் ஸப்³ப³ம்பி வுத்தாகாரம் பச்சாமஸதி, ந ‘‘புரிஸஸ்ஸ மாதுகா³மாஸுப⁴’’ந்திஆதி³கம் வுச்சமானம்.

யோக³கம்மஸ்ஸ பவத்திட்டா²னதாய பா⁴வனாய ஆரம்மணம் ‘‘கம்மட்டா²ன’’ந்தி வுச்சதீதி ஆஹ ‘‘கம்மட்டா²னஸங்கா²தம் கோ³சர’’ந்தி. உக்³க³ஹேத்வாதி யதா² உக்³க³ஹனிமித்தம் உப்பஜ்ஜதி, ஏவம் உக்³க³ஹகோஸல்லஸ்ஸ ஸம்பாத³னவஸேன உக்³க³ஹேத்வா.

ஹரதீதி கம்மட்டா²னம் பவத்தேதி, யாவ பிண்ட³பாதபடிக்கமா அனுயுஞ்ஜதீதி அத்தோ². ந பச்சாஹரதீதி ஆஹாரூபயோக³தோ யாவ தி³வாடா²னுபஸங்கமனா கம்மட்டா²னம் ந படினேதி. ஸரீரபரிகம்மந்தி முக²தோ⁴வனாதி³ஸரீரபடிஜக்³க³னம். த்³வே தயோ பல்லங்கேதி த்³வே தயோ நிஸஜ்ஜாவாரே த்³வே தீணி உண்ஹாஸனானி. தேனாஹ ‘‘உஸுமம் கா³ஹாபேந்தோ’’தி. கம்மட்டா²னஸீஸேனேவாதி கம்மட்டா²னமுகே²னேவ கம்மட்டா²னம் அவிஜஹந்தோ ஏவ, தேன ‘‘பத்தோபி அசேதனோ’’திஆதி³னா (தீ³. நி. அட்ட². 1.214) வக்க²மானம் கம்மட்டா²னம், யதா²பரிஹரியமானம் வா அவிஜஹித்வாதி த³ஸ்ஸேதி. ததே²வாதி திக்க²த்துமேவ. பரிபோ⁴க³சேதியதோ ஸாரீரிகசேதியம் க³ருதரந்தி கத்வா ‘‘சேதியம் வந்தி³த்வா’’தி புப்³ப³காலகிரியாய வஸேன வுத்தம். ததா² ஹி அட்ட²கதா²யம் ‘‘சேதியம் பா³த⁴யமானா போ³தி⁴ஸாகா² ஹரிதப்³பா³’’தி வுத்தா. பு³த்³த⁴கு³ணானுஸ்ஸரணவஸேனேவ போ³தி⁴யம் பணிபாதகரணந்தி ஆஹ ‘‘பு³த்³த⁴ஸ்ஸ ப⁴க³வதோ ஸம்முகா² விய நிபச்சகாரம் த³ஸ்ஸேத்வா’’தி. கா³மஸமீபேதி கா³மஸ்ஸ உபசாரட்டா²னே. ஜனஸங்க³ஹத்த²ந்தி ‘‘மயி அகதே²ந்தே ஏதேஸம் கோ கதே²ஸ்ஸதீ’’தி த⁴ம்மானுக்³க³ஹேன ஜனஸங்க³ஹத்த²ம். தஸ்மாதி யஸ்மா ‘‘த⁴ம்மகதா² நாம கதே²தப்³பா³ ஏவா’’தி அட்ட²கதா²சரியா வத³ந்தி, யஸ்மா ச த⁴ம்மகதா² கம்மட்டா²னவினிமுத்தா நாம நத்தி², தஸ்மா. கம்மட்டா²னஸீஸேனேவாதி அத்தனா பரிஹரியமானம் கம்மட்டா²னம் அவிஜஹந்தோ தத³னுகு³ணம்யேவ த⁴ம்மகத²ம் கதே²த்வா. அனுமோத³னம் வத்வாதி ஏத்தா²பி ‘‘கம்மட்டா²னஸீஸேனேவா’’தி ஆனேத்வா ஸம்ப³ந்தி⁴தப்³ப³ம்.

ஸம்பத்தபரிச்சே²தே³னேவாதி ‘‘பரிசிதோ அபரிசிதோ’’திஆதி³ விபா⁴க³ம் அகத்வா ஸம்பத்தகோடியா ஏவ, ஸமாக³மமத்தேனேவாதி அத்தோ². ப⁴யேதி பரசக்காதி³ப⁴யே.

‘‘கம்மஜதேஜோ’’தி க³ஹணிம் ஸந்தா⁴யாஹ. கம்மட்டா²னம் வீதி²ம் நாரோஹதி கு²தா³பரிஸ்ஸமேன கிலந்தகாயத்தா ஸமாதா⁴னாபா⁴வதோ. அவஸேஸட்டா²னேதி யாகு³யா அக்³க³ஹிதட்டா²னே. போங்கா²னுபோங்க²ந்தி கம்மட்டா²னுபட்டா²னஸ்ஸ அவிச்சே²த³த³ஸ்ஸனமேதம், யதா² போங்கா²னுபோங்க²ம் பவத்தாய ஸரபடிபாதியா அனவிச்சே²தோ³, ஏவமேதஸ்ஸபீதி.

நிக்கி²த்தது⁴ரோ பா⁴வனானுயோகே³. வத்தபடிபத்தியா அபூரணேன ஸப்³ப³வத்தானி பி⁴ந்தி³த்வா. ‘‘காமேஸு அவீதராகோ³ ஹோதி, காயே அவீதராகோ³, ரூபே அவீதராகோ³, யாவத³த்த²ம் உத³ராவதே³ஹகம் பு⁴ஞ்ஜித்வா ஸேய்யஸுக²ம் பஸ்ஸஸுக²ம் மித்³த⁴ஸுக²ம் அனுயுத்தோ விஹரதி, அஞ்ஞதரம் தே³வனிகாயம் பணிதா⁴ய ப்³ரஹ்மசரியம் சரதீ’’தி (தீ³. நி. 3.320; ம. நி. 1.186) ஏவம் வுத்தபஞ்சவித⁴சேதோகி²லவினிப³ந்த⁴சித்தோ. சரித்வாதி பவத்தித்வா.

க³தபச்சாக³திகவத்தவஸேனாதி பா⁴வனாஸஹிதம்யேவ பி⁴க்கா²ய க³தபச்சாக³தம் க³மனபச்சாக³மனம் ஏதஸ்ஸ அத்தீ²தி க³தபச்சாக³திகம், ததே³வ வத்தம், தஸ்ஸ வஸேன. அத்தகாமாதி அத்தனோ ஹிதஸுக²ம் இச்ச²ந்தா, த⁴ம்மச்ச²ந்த³வந்தோதி அத்தோ². த⁴ம்மோ ஹி ஹிதம் தன்னிமித்தகஞ்ச ஸுக²ந்தி. அத² வா விஞ்ஞூனம் நிப்³பி³ஸேஸத்தா, அத்தபா⁴வபரியாபன்னத்தா ச அத்தா நாம த⁴ம்மோ, தம் காமேந்தி இச்ச²ந்தீதி அத்தகாமா.

உஸப⁴ம் நாம வீஸதி யட்டி²யோ. தாய ஸஞ்ஞாயாதி தாய பாஸாணஸஞ்ஞாய, ஏத்தகம் டா²னம் ஆக³தாதி ஜானந்தாதி அதி⁴ப்பாயோ. ஸோயேவ நயோதி ‘‘அயம் பி⁴க்கூ²’’திஆதி³கோ யோ டா²னே வுத்தோ, ஸோ ஏவ நிஸஜ்ஜாயபி நயோ. பச்ச²தோ ஆக³ச்ச²ந்தானம் சி²ன்னப⁴த்தபா⁴வப⁴யேனபி யோனிஸோமனஸிகாரம் பரிப்³ரூஹேதி. மத்³த³ந்தாதி த⁴ஞ்ஞகரணட்டா²னே ஸாலிஸீஸானி மத்³த³ந்தா.

மஹாபதா⁴னம் பூஜேஸ்ஸாமீதி அம்ஹாகம் அத்தா²ய லோகனாதே²ன ச²வஸ்ஸானி கதம் து³க்கரசரியமேவாஹம் யதா²ஸத்தி பூஜேஸ்ஸாமீதி. படிபத்திபூஜா ஹி ஸத்து²பூஜா, ந ஆமிஸபூஜாதி. ‘‘டா²னசங்கமமேவா’’தி அதி⁴ட்டா²தப்³ப³இரியாபத²வஸேன வுத்தம், ந போ⁴ஜனாதி³காலேஸு அவஸ்ஸம் கத்தப்³ப³னிஸஜ்ஜாய படிக்கே²பவஸேன.

வீதி²ம் ஓதரித்வா இதோ சிதோ ச அனோலோகேத்வா பட²மமேவ வீதி²யோ ஸல்லக்கே²தப்³பா³தி ஆஹ ‘‘வீதி²யோ ஸல்லக்கே²த்வா’’தி. யம் ஸந்தா⁴ய வுச்சதி ‘‘பாஸாதி³கேன அபி⁴க்கந்தேனா’’தி, தம் த³ஸ்ஸேதும் ‘‘தத்த² சா’’திஆதி³ வுத்தம். ‘‘ஆஹாரே படிக்கூலஸஞ்ஞம் உபட்ட²பேத்வா’’திஆதீ³ஸு யம் வத்தப்³ப³ம், தம் பரதோ ஆக³மிஸ்ஸதி. அட்ட²ங்க³ஸமன்னாக³தந்தி ‘‘யாவதே³வ இமஸ்ஸ காயஸ்ஸ டி²தியா’’திஆதி³னா (ம. நி. 1.23; அ. நி. 6.58; மஹானி. 206) வுத்தேஹி அட்ட²ஹி அங்கே³ஹி ஸமன்னாக³தம் கத்வா. ‘‘நேவ த³வாயா’’திஆதி³ படிக்கே²பத³ஸ்ஸனம்.

பச்சேகபோ³தி⁴ம் ஸச்சி²கரோதி, யதி³ உபனிஸ்ஸயஸம்பன்னோ ஹோதீதி ஸம்ப³ந்தோ⁴. ஏவம் ஸப்³ப³த்த² இதோ பரேஸுபி. தத்த² பச்சேகபோ³தி⁴யா உபனிஸ்ஸயஸம்பதா³ கப்பானம் த்³வே அஸங்க்²யேய்யானி, ஸதஸஹஸ்ஸஞ்ச தஜ்ஜாபுஞ்ஞஞாணஸம்ப⁴ரணம். ஸாவகபோ³தி⁴யா அக்³க³ஸாவகானம் அஸங்க்²யேய்யம், கப்பஸதஸஹஸ்ஸஞ்ச, மஹாஸாவகானம் (தே²ரகா³. அட்ட². 2.1288) ஸதஸஹஸ்ஸமேவ தஜ்ஜாபுஞ்ஞஞாணஸம்ப⁴ரணம். இதரேஸம் அதீதாஸு ஜாதீஸு விவட்டஸன்னிஸ்ஸயவஸேன நிப்³ப³த்திதம் நிப்³பே³த⁴பா⁴கி³யம் குஸலம். பா³ஹியோ தா³ருசீரியோதி பா³ஹியவிஸயே ஸஞ்ஜாதஸம்வட்³ட⁴தாய பா³ஹியோ, தா³ருசீரபரிஹரணேன தா³ருசீரியோதி ச ஸமஞ்ஞாதோ. ஸோ ஹி ஆயஸ்மா ‘‘தஸ்மாதிஹ தே, பா³ஹிய, ஏவம் ஸிக்கி²தப்³ப³ம் ‘தி³ட்டே² தி³ட்ட²மத்தம் ப⁴விஸ்ஸதி, ஸுதே, முதே, விஞ்ஞாதே விஞ்ஞாதமத்தம் ப⁴விஸ்ஸதீ’தி, ஏவஞ்ஹி தே பா³ஹிய ஸிக்கி²தப்³ப³ம். யதோ கோ² தே பா³ஹிய தி³ட்டே² தி³ட்ட²மத்தம் ப⁴விஸ்ஸதி, ஸுதே, முதே, விஞ்ஞாதே விஞ்ஞாதமத்தம் ப⁴விஸ்ஸதி, ததோ த்வம், பா³ஹிய, ந தேன. யதோ த்வம், பா³ஹிய, ந தேன, ததோ த்வம், பா³ஹிய, ந தத்த². யதோ த்வம், பா³ஹிய, ந தத்த², ததோ த்வம், பா³ஹிய, நேவித⁴ ந ஹுரம் ந உப⁴யமந்தரேன. ஏஸேவந்தோ து³க்க²ஸ்ஸா’’தி (உதா³. 10) ஏத்தகாய தே³ஸனாய அரஹத்தம் ஸச்சா²காஸி. ஏவம் ஸாரிபுத்தத்தே²ராதீ³னம் மஹாபஞ்ஞதாதி³தீ³பனானி ஸுத்தபதா³னி வித்தா²ரதோ வேதி³தப்³பா³னி.

தந்தி அஸம்முய்ஹனம் ஏவந்தி இதா³னி வுச்சமானமாகாரேனேவ வேதி³தப்³ப³ம். ‘‘அத்தா அபி⁴க்கமதீ’’தி இமினா அந்த⁴புது²ஜ்ஜனஸ்ஸ தி³ட்டி²கா³ஹவஸேன அபி⁴க்கமே ஸம்முய்ஹனம் த³ஸ்ஸேதி, ‘‘அஹம் அபி⁴க்கமாமீ’’தி பன இமினா மானகா³ஹவஸேன. தது³ப⁴யம் பன தண்ஹாய வினா ந ஹோதீதி தண்ஹகா³ஹவஸேனபி ஸம்முய்ஹனம் த³ஸ்ஸிதமேவ ஹோதி. ‘‘ததா² அஸம்முய்ஹந்தோ’’தி வத்வா தம் அஸம்முய்ஹனம் யேன க⁴னவினிப்³போ⁴கே³ன ஹோதி, தம் த³ஸ்ஸேந்தோ ‘‘அபி⁴க்கமாமீ’’திஆதி³மாஹ. தத்த² யஸ்மா வாயோதா⁴துயா அனுக³தா தேஜோதா⁴து உத்³த⁴ரணஸ்ஸ பச்சயோ. உத்³த⁴ரணக³திகா ஹி தேஜோதா⁴தூதி. உத்³த⁴ரணே வாயோதா⁴துயா தஸ்ஸா அனுக³தபா⁴வோ, தஸ்மா இமாஸம் த்³வின்னமேத்த² ஸாமத்தி²யதோ அதி⁴மத்ததா, இதராஸஞ்ச ஓமத்ததாதி த³ஸ்ஸேந்தோ ‘‘ஏகேகபாது³த்³த⁴ரணே…பே… ப³லவதியோதி ஆஹ. யஸ்மா பன தேஜோதா⁴துயா அனுக³தா வாயோதா⁴து அதிஹரணவீதிஹரணானம் பச்சயோ. திரியக³திகாய ஹி வாயோதா⁴துயா அதிஹரணவீதிஹரணேஸு ஸாதிஸயோ ப்³யாபாரோதி. தேஜோதா⁴துயா தஸ்ஸா அனுக³தபா⁴வோ, தஸ்மா இமாஸம் த்³வின்னமேத்த² ஸாமத்தி²யதோ அதி⁴மத்ததா, இதராஸஞ்ச ஓமத்ததாதி த³ஸ்ஸேந்தோ ‘‘ததா² அதிஹரணவீதிஹரணேஸூ’’தி ஆஹ. ஸதிபி அனுக³மகஅனுக³ந்தப்³ப³தாவிஸேஸே தேஜோதா⁴துவாயோதா⁴துபா⁴வமத்தம் ஸந்தா⁴ய ததா²-ஸத்³த³க்³க³ஹணம்,. தத்த² அக்கந்தட்டா²னதோ பாத³ஸ்ஸ உக்கி²பனம் உத்³த⁴ரணம். டி²தட்டா²னம் அதிக்கமித்வா புரதோ ஹரணம் அதிஹரணம், கா²ணுஆதி³பரிஹரணத்த²ம், பதிட்டி²தபாத³க⁴ட்டனபரிஹரணத்த²ம் வா பஸ்ஸேன ஹரணம் வீதிஹரணம். யாவ பதிட்டி²தபாதோ³, தாவ ஆஹரணம் அதிஹரணம், ததோ பரம் ஹரணம் வீதிஹரணந்தி அயம் வா ஏதேஸம் விஸேஸோ.

யஸ்மா பத²வீதா⁴துயா அனுக³தா ஆபோதா⁴து வோஸ்ஸஜ்ஜனஸ்ஸ பச்சயோ. க³ருதரஸபா⁴வா ஹி ஆபோதா⁴தூதி. வோஸ்ஸஜ்ஜனே பத²வீதா⁴துயா தஸ்ஸா அனுக³தபா⁴வோ, தஸ்மா தாஸம் த்³வின்னமேத்த² ஸாமத்தி²யதோ அதி⁴மத்ததா, இதராஸஞ்ச ஓமத்ததாதி த³ஸ்ஸேந்தோ ஆஹ ‘‘வோஸ்ஸஜ்ஜனே…பே… ப³லவதியோ’’தி. யஸ்மா பன ஆபோதா⁴துயா அனுக³தா பத²வீதா⁴து ஸன்னிக்கே²பனஸ்ஸ பச்சயோ, பதிட்டா²பா⁴வே விய பதிட்டா²பனேபி தஸ்ஸா ஸாதிஸயகிச்சத்தா ஆபோதா⁴துயா தஸ்ஸா அனுக³தபா⁴வோ, ததா² க⁴ட்டனகிரியாய பத²வீதா⁴துயா வஸேன ஸன்னிருஜ்ஜ²னஸ்ஸ ஸிஜ்ஜ²னதோ தத்தா²பி பத²வீதா⁴துயா ஆபோதா⁴துஅனுக³தபா⁴வோ, தஸ்மா வுத்தம் ‘‘ததா² ஸன்னிக்கே²பனஸன்னிருஜ்ஜ²னேஸூ’’தி.

தத்தா²தி தஸ்மிம் அபி⁴க்கமனே, தேஸு வா வுத்தேஸு உத்³த³ரணாதீ³ஸு கோட்டா²ஸேஸு. உத்³த⁴ரணேதி உத்³த⁴ரணக்க²ணே. ரூபாரூபத⁴ம்மாதி உத்³த⁴ரணாகாரேன பவத்தா ரூபத⁴ம்மா, தம்ஸமுட்டா²பகா அரூபத⁴ம்மா ச. அதிஹரணம் ந பாபுணந்தி க²ணமத்தாவட்டா²னதோ. தத்த² தத்தே²வாதி யத்த² யத்த² உப்பன்னா, தத்த² தத்தே²வ. ந ஹி த⁴ம்மானம் தே³ஸந்தரஸங்கமனம் அத்தி². ‘‘பப்³ப³ம் பப்³ப³’’திஆதி³ உத்³த⁴ரணாதி³கோட்டா²ஸே ஸந்தா⁴ய ஸபா⁴க³ஸந்ததிவஸேன வுத்தந்தி வேதி³தப்³ப³ம். அதிஇத்தரோ ஹி ரூபத⁴ம்மானம்பி பவத்திக்க²ணோ, க³மனஸ்ஸாதீ³னம், தே³வபுத்தானம் ஹேட்டு²பரியேன படிமுக²ம் தா⁴வந்தானம் ஸிரஸி பாதே³ ச ப³ந்த⁴கு²ரதா⁴ரா ஸமாக³மதோபி ஸீக⁴தரோ. யதா² திலானம் ப⁴ஜ்ஜியமானானம் படபடாயனேன பே⁴தோ³ லக்கீ²யதி, ஏவம் ஸங்க²தத⁴ம்மானம் உப்பாதே³னாதி த³ஸ்ஸனத்த²ம் ‘‘படபடாயந்தா’’தி வுத்தம். உப்பன்னா ஹி ஏகந்ததோ பி⁴ஜ்ஜந்தீதி. ‘‘ஸத்³தி⁴ம் ரூபேனா’’தி இத³ம் தஸ்ஸ தஸ்ஸ சித்தஸ்ஸ நிரோதே⁴ன ஸத்³தி⁴ம் நிருஜ்ஜ²னகரூபத⁴ம்மானம் வஸேன வுத்தம், யம் ததோ ஸத்தரஸமசித்தஸ்ஸ உப்பாத³க்க²ணே உப்பன்னம். அஞ்ஞதா² யதி³ ரூபாரூபத⁴ம்மா ஸமானக்க²ணா ஸியும், ‘‘ரூபம் க³ருபரிணாமம் த³ந்த⁴னிரோத⁴’’ந்திஆதி³வசனேஹி விரோதோ⁴ ஸியா, ததா² ‘‘நாஹம் பி⁴க்க²வே அஞ்ஞம் ஏகத⁴ம்மம்பி ஸமனுபஸ்ஸாமி, யம் ஏவம் லஹுபரிவத்தம், யத²யித³ம் சித்த’’ந்தி (அ. நி. 1.48) ஏவம் ஆதி³பாளியா. சித்தசேதஸிகா ஹி ஸாரம்மணஸபா⁴வா யதா²ப³லம் அத்தனோ ஆரம்மணபச்சயபூ⁴தமத்த²ம் விபா⁴வேந்தோ ஏவ உப்பஜ்ஜந்தீதி தேஸம் தம்ஸபா⁴வனிப்ப²த்திஅனந்தரம் நிரோதோ⁴. ரூபத⁴ம்மா பன அனாரம்மணா பகாஸேதப்³பா³, ஏவம் தேஸம் பகாஸேதப்³ப³பா⁴வனிப்ப²த்தி ஸோளஸஹி சித்தேஹி ஹோதீதி தங்க²ணாயுகதா தேஸம் இச்சி²தா, லஹுவிஞ்ஞாணவிஸயஸங்க³திமத்தப்பச்சயதாய திண்ணம் க²ந்தா⁴னம், விஸயஸங்க³திமத்ததாய ச விஞ்ஞாணஸ்ஸ லஹுபரிவத்திதா, த³ந்த⁴மஹாபூ⁴தப்பச்சயதாய ரூபத⁴ம்மானம் த³ந்த⁴பரிவத்திதா. நானாதா⁴துயா யதா²பூ⁴தஞாணம் கோ² பன ததா²க³தஸ்ஸேவ, தேன ச புரேஜாதபச்சயோ ரூபத⁴ம்மோவ வுத்தோ, பச்சா²ஜாதபச்சயோ ச ததே²வாதி ரூபாரூபத⁴ம்மானம் ஸமானக்க²ணதா ந யுஜ்ஜதேவ. தஸ்மா வுத்தனயேனேவேத்த² அத்தோ² வேதி³தப்³போ³.

அஞ்ஞம் உப்பஜ்ஜதே சித்தம், அஞ்ஞம் சித்தம் நிருஜ்ஜ²தீதி யம் புரிமுப்பன்னம் சித்தம், தம் அஞ்ஞம், தம் பன நிருஜ்ஜ²ந்தம் அபரஸ்ஸ அனந்தராதி³பச்சயபா⁴வேனேவ நிருஜ்ஜ²தீதி ததா²லத்³த⁴பச்சயம் அஞ்ஞம் உப்பஜ்ஜதே சித்தம். யதி³ ஏவம் தேஸம் அந்தரோ லப்³பே⁴ய்யாதி? நோதி ஆஹ ‘‘அவீசி மனுப்பப³ந்தோ⁴’’தி, யதா² வீசி அந்தரோ ந லப்³ப⁴தி, ‘‘ததே³வேத’’ந்தி அவிஸேஸவிதூ³ மஞ்ஞந்தி, ஏவம் அனு அனு பப³ந்தோ⁴ சித்தஸந்தானோ ரூபஸந்தானோ ச நதீ³ஸோதோவ நதி³யம் உத³கப்பவாஹோ விய வத்ததி.

அபி⁴முக²ம் லோகிதம் ஆலோகிதந்தி ஆஹ ‘‘புரதோ பேக்க²ன’’ந்தி. யஸ்மா யம்தி³ஸாபி⁴முகோ² க³ச்ச²தி, திட்ட²தி, நிஸீத³தி வா தத³பி⁴முக²ம் பேக்க²னம் ஆலோகிதம், தஸ்மா தத³னுக³தவிதி³ஸாலோகனம் விலோகிதந்தி ஆஹ ‘‘விலோகிதம் நாம அனுதி³ஸாபேக்க²ன’’ந்தி. ஸம்மஜ்ஜனபரிப⁴ண்டா³தி³கரணே ஓலோகிதஸ்ஸ, உல்லோகஹரணாதீ³ஸு உல்லோகிதஸ்ஸ, பச்ச²தோ ஆக³ச்ச²ந்தபரிஸ்ஸயஸ்ஸ பரிவஜ்ஜனாதீ³ஸு அபலோகிதஸ்ஸ ஸியா ஸம்ப⁴வோதி ஆஹ ‘‘இமினா வா முகே²ன ஸப்³பா³னிபி தானி க³ஹிதானேவா’’தி.

காயஸக்கி²ந்தி காயேன ஸச்சி²கதவந்தம், பச்சக்க²காரினந்தி அத்தோ². ஸோ ஹி ஆயஸ்மா விபஸ்ஸனாகாலே ‘‘யமேவாஹம் இந்த்³ரியேஸு அகு³த்தத்³வாரதம் நிஸ்ஸாய ஸாஸனே அனபி⁴ரதிஆதி³விப்பகாரம் பத்தோ, தமேவ ஸுட்டு² நிக்³க³ஹேஸ்ஸாமீ’’தி உஸ்ஸாஹஜாதோ ப³லவஹிரோத்தப்போ, தத்த² ச கதாதி⁴காரத்தா இந்த்³ரியஸம்வரே உக்கம்ஸபாரமிப்பத்தோ, தேனேவ நம் ஸத்தா² ‘‘ஏதத³க்³க³ம் பி⁴க்க²வே மம ஸாவகானம் பி⁴க்கூ²னம் இந்த்³ரியேஸு கு³த்தத்³வாரானம், யதி³த³ம் நந்தோ³’’தி (அ. நி. 1.235) ஏதத³க்³கே³ ட²பேஸி.

ஸாத்த²கதா ச ஸப்பாயதா ச வேதி³தப்³பா³ ஆலோகிதவிலோகிதஸ்ஸாதி ஆனேத்வா ஸம்ப³ந்தோ⁴. தஸ்மாதி கம்மட்டா²னாவிஜஹனஸ்ஸேவ கோ³சரஸம்பஜஞ்ஞபா⁴வதோதி வுத்தமேவத்த²ம் ஹேதுபா⁴வேன பச்சாமஸதி. அத்தனோ கம்மட்டா²னவஸேனேவ ஆலோகனவிலோகனம் காதப்³ப³ம், க²ந்தா⁴தி³கம்மட்டா²னா அஞ்ஞோ உபாயோ ந க³வேஸிதப்³போ³தி அதி⁴ப்பாயோ. ஆலோகிதாதி³ஸமஞ்ஞாபி யஸ்மா த⁴ம்மமத்தஸ்ஸேவ பவத்திவிஸேஸோ, தஸ்மா தஸ்ஸ யாதா²வதோ பஜானனம் அஸம்மோஹஸம்பஜஞ்ஞந்தி த³ஸ்ஸேதும் ‘‘அப்³ப⁴ந்தரே’’திஆதி³ வுத்தம். சித்தகிரியவாயோதா⁴துவிப்பா²ரவஸேனாதி கிரியமயசித்தஸமுட்டா²னாய வாயோதா⁴துயா சலனாகாரப்பவத்திவஸேன. அதோ⁴ ஸீத³தீதி அதோ⁴ க³ச்ச²தி. உத்³த⁴ம் லங்கே⁴தீதி லங்க⁴ம் விய உபரி க³ச்ச²தி.

அங்க³கிச்சம் ஸாத⁴யமானந்தி பதா⁴னபூ⁴தஅங்க³கிச்சம் நிப்பா²தே³ந்தம் ஹுத்வாதி அத்தோ². ‘‘பட²மஜவனேபி…பே… ந ஹோதீ’’தி இத³ம் பஞ்சத்³வாரவீதி²யம் ‘‘இத்தீ² புரிஸோ’’தி ரஜ்ஜனாதீ³னம் அபா⁴வம் ஸந்தா⁴ய வுத்தம். தத்த² ஹி ஆவஜ்ஜன வோட்ட²ப்³ப³பனானம் அயோனிஸோ ஆவஜ்ஜனவோட்ட²ப்³ப³னவஸேன இட்டே² இத்தி²ரூபாதி³ம்ஹி லோப⁴மத்தம், அனிட்டே² ச படிக⁴மத்தம் உப்பஜ்ஜதி, மனோத்³வாரே பன ‘‘இத்தீ² புரிஸோ’’தி ரஜ்ஜனாதி³ ஹோதி. தஸ்ஸ பஞ்சத்³வாரஜவனம் மூலம், யதா²வுத்தம் வா ஸப்³ப³ம் ப⁴வங்கா³தி³. ஏவம் மனோத்³வாரஜவனஸ்ஸ மூலவஸேன மூலபரிஞ்ஞா வுத்தா. ஆக³ந்துகதாவகாலிகதா பன பஞ்சத்³வாரஜவனஸ்ஸேவ அபுப்³ப³பா⁴வவஸேன, இத்தரபா⁴வவஸேன ச வுத்தா. ‘‘ஹேட்டு²பரியவஸேன பி⁴ஜ்ஜித்வா பதிதேஸூ’’தி ஹேட்டி²மஸ்ஸ உபரிமஸ்ஸ ச அபராபரம் ப⁴ங்க³ப்பத்திமாஹ.

தந்தி ஜவனம், தஸ்ஸ அயுத்தந்தி ஸம்ப³ந்தோ⁴. ஆக³ந்துகோ அப்³பா⁴க³தோ.

உத³யப்³ப³யபரிச்சி²ன்னோ தாவதகோ காலோ ஏதேஸந்தி தாவகாலிகானி.

ஏதம் அஸம்மோஹஸம்பஜஞ்ஞம். ஸமவாயேதி ஸாமக்³கி³யம். தத்தா²தி பஞ்சக்க²ந்த⁴வஸேன ஆலோகனவிலோகனே பஞ்ஞாயமானே தப்³பி³னிமுத்தோ கோ ஏகோ ஆலோகேதி, கோ விலோகேதி.

‘‘உபனிஸ்ஸயபச்சயோ’’தி இத³ம் ஸுத்தந்தனயேன பரியாயதோ வுத்தம். ஸஹஜாதபச்சயோதி நித³ஸ்ஸனமத்தமேதம் அஞ்ஞமஞ்ஞஸம்பயுத்தஅத்தி²அவிக³தாதி³பச்சயானம்பி லப்³ப⁴னதோ.

காலே ஸமஞ்சி²தும் யுத்தகாலே ஸமஞ்ச²ந்தஸ்ஸ. ததா² பஸாரேந்தஸ்ஸாதி ஏத்தா²பி. மணிஸப்போ நாம ஏகா ஸப்பஜாதீதி வத³ந்தி. லளனந்தி கம்பனம், லீளாகரணம் வா.

உண்ஹபகதிகோ பரிளாஹப³ஹுலகாயோ. ஸீலவிதூ³ஸனேன அஹிதாவஹத்தா மிச்சா²ஜீவவஸேன உப்பன்னம் அஸப்பாயம். ‘‘சீவரம்பி அசேதன’’ந்திஆதி³னா சீவரஸ்ஸ விய காயோபி அசேதனோதி காயஸ்ஸ அத்தஸுஞ்ஞதாவிபா⁴வனேன ‘‘அப்³ப⁴ந்தரே’’திஆதி³னா வுத்தமேவத்த²ம் பரிதீ³பேந்தோ இதரீதரஸந்தோஸஸ்ஸ காரணம் த³ஸ்ஸேதி, தேனாஹ ‘‘தஸ்மா’’திஆதி³.

சதுபஞ்சக³ண்டி²காஹதோதி ஆஹதசதுபஞ்சக³ண்டி²கோ, சதுபஞ்சக³ண்டி²காஹி வா ஆஹதோ ததா².

அட்ட²விதோ⁴பி அத்தோ²தி அட்ட²விதோ⁴பி பயோஜனவிஸேஸோ மஹாஸிவத்தே²ரவாத³வஸேன ‘‘இமஸ்ஸ காயஸ்ஸ டி²தியா’’திஆதி³னா (ம. நி. 1.23, 422; ம. நி. 2.387; அ. நி. 2.341; 8.9; த⁴. ஸ. 1355; விப⁴. 518; மஹானி. 206) நயேன வுத்தோ த³ட்ட²ப்³போ³. இமஸ்மிம் பக்கே² ‘‘நேவ த³வாயாதிஆதி³னா (ம. நி. 1.23, 422; ம. நி. 2.387; அ. நி. 8.9; த⁴. ஸ. 1355; விப⁴. 518; மஹானி. 206) நயேனா’’தி பன படிக்கே²பங்க³த³ஸ்ஸனமுகே²ன தே³ஸனாய ஆக³தத்தா வுத்தந்தி த³ட்ட²ப்³ப³ம்.

பத²விஸந்தா⁴ரகஜலஸ்ஸ தம்ஸந்தா⁴ரகவாயுனா விய பரிபு⁴த்தஸ்ஸ ஆஹாரஸ்ஸ வாயோதா⁴துயாவ ஆஸயே அவட்டா²னந்தி ஆஹ ‘‘வாயோதா⁴துவஸேனேவ திட்ட²தீ’’தி. அதிஹரதீதி யாவ முகா² அபி⁴ஹரதி. வீதிஹரதீதி ததோ குச்சி²யம் வீமிஸ்ஸம் கரோந்தோ ஹரதி. அதிஹரதீதி வா முக²த்³வாரம் அதிக்காமேந்தோ ஹரதி. வீதிஹரதீதி குச்சி²க³தம் பஸ்ஸதோ ஹரதி, பரிவத்தேதீதி அபராபரம் சாரேதி. ஏத்த² ச ஆஹாரஸ்ஸ தா⁴ரணபரிவத்தனஸஞ்சுண்ணனவிஸோஸனானி பத²வீதா⁴துஸஹிதா ஏவ வாயோதா⁴து கரோதி, ந கேவலாதி தானி பத²வீதா⁴துயாபி கிச்சபா⁴வேன வுத்தானி. அல்லத்தஞ்ச அனுபாலேதீதி யதா² வாயோதா⁴து ஆதீ³ஹி அஞ்ஞேஹி விஸோஸனம் ந ஹோதி, ததா² அல்லத்தஞ்ச அனுபாலேதி. தேஜோதா⁴தூதி க³ஹணீஸங்கா²தா தேஜோதா⁴து. ஸா ஹி அந்தோபவிட்ட²ம் ஆஹாரம் பரிபாசேதி. அஞ்ஜஸோ ஹோதீதி ஆஹாரஸ்ஸ பவேஸனாதீ³னம் மக்³கோ³ ஹோதி. ஆபு⁴ஜதீதி பரியேஸனவஸேன, அஜ்ஜோ²ஹரணஜிண்ணாஜிண்ணதாதி³படிஸம்வேத³னவஸேன ச ஆவஜ்ஜேதி, விஜானாதீதி அத்தோ². தம்தம்விஜானனஸ்ஸ பச்சயபூ⁴தோயேவ ஹி பயோகோ³ ‘‘ஸம்மாபயோகோ³’’தி வுத்தோ. யேன ஹி பயோகே³ன பரியேஸனாதி³ நிப்ப²ஜ்ஜதி, ஸோ தப்³பி³ஸயவிஜானனம்பி நிப்பா²தே³தி நாம தத³வினாபா⁴வதோ. அத² வா ஸம்மாபயோக³ம் ஸம்மாபடிபத்தி மன்வாய ஆக³ம்ம ஆபு⁴ஜதி ஸமன்னாஹரதி. ஆபோ⁴க³புப்³ப³கோ ஹி ஸப்³போ³பி விஞ்ஞாணப்³யாபாரோதி ததா² வுத்தம்.

க³மனதோதி பி⁴க்கா²சாரவஸேன கோ³சரகா³மம் உத்³தி³ஸ்ஸ க³மனதோ. பரியேஸனதோதி கோ³சரகா³மே பி⁴க்க²த்த²ம் ஆஹிண்ட³னதோ. பரிபோ⁴க³தோதி ஆஹாரஸ்ஸ பரிபு⁴ஞ்ஜனதோ. ஆஸயதோதி பித்தாதி³ஆஸயதோ. ஆஸயதி ஏத்த² ஏகஜ்ஜ²ம் பவத்தமானோபி கம்மப²லவவத்தி²தோ ஹுத்வா மரியாத³வஸேன அஞ்ஞமஞ்ஞம் அஸங்கரதோ ஸயதி திட்ட²தி பவத்ததீதி ஆஸயோ, ஆமாஸயஸ்ஸ உபரி திட்ட²னகோ பித்தாதி³கோ. மரியாத³த்தோ² ஹி அயமாகாரோ. நிதா⁴னந்தி யதா²பு⁴த்தோ ஆஹாரோ நிசிதோ ஹுத்வா திட்ட²தி ஏத்தா²தி நிதா⁴னம், ஆமாஸயோ. ததோ நிதா⁴னதோ. அபரிபக்கதோதி க³ஹணீஸங்கா²தேன கம்மஜதேஜேன அவிபக்கதோ. பரிபக்கதோதி யதா²பு⁴த்தஸ்ஸ ஆஹாரஸ விபக்கபா⁴வதோ. ப²லதோதி நிப்ப²த்திதோ. நிஸ்ஸந்த³தோதி இதோ சிதோ ச நிஸ்ஸந்த³னதோ. ஸம்மக்க²னதோதி ஸப்³ப³ஸோ மக்க²னதோ. அயமேத்த² ஸங்கே²போ, வித்தா²ரோ பன விஸுத்³தி⁴மக்³க³ஸம்வண்ணனாய (விஸுத்³தி⁴. டீ. 1.294) க³ஹேதப்³போ³.

ஸரீரதோ ஸேதா³ முச்சந்தீதி வேக³ஸம்தா⁴ரணேன உப்பன்னபரிளாஹதோ ஸரீரதோ ஸேதா³ முச்சந்தி. அஞ்ஞே ச ரோகா³ கண்ணஸூலப⁴க³ந்த³ராத³யோ. அட்டா²னேதி மனுஸ்ஸாமனுஸ்ஸபரிக்³க³ஹிதே அயுத்தட்டா²னே கே²த்ததே³வாயதனாதி³கே. குத்³தா⁴ ஹி அமனுஸ்ஸா, மனுஸ்ஸாபி வா ஜீவிதக்க²யம் பாபேந்தி. நிஸ்ஸட்ட²த்தா நேவ அத்தனோ, கஸ்ஸசி அனிஸ்ஸஜ்ஜிதத்தா, ஜிகு³ச்ச²னீயத்தா ச ந பரஸ்ஸ. உத³கதும்ப³தோதி வேளுனாளிஆதி³உத³கபா⁴ஜனதோ. தந்தி ச²ட்³டி³தஉத³கம்.