4. அஞ்ஞமஞ்ஞசதுக்கவண்ணனா

246. நிப்பதே³ஸத்தா ப⁴வேன உபாதா³னம் ஸங்க³ஹிதந்தி பச்சயுப்பன்னஸ்ஸ உபாதா³னஸ்ஸ விஸும் டி²தஸ்ஸ அபா⁴வா ‘‘ப⁴வபச்சயாபி உபாதா³ன’’ந்தி ந ஸக்கா வத்துந்தி த³ஸ்ஸேதும் ‘‘யஸ்மா பன ப⁴வோ நிப்பதே³ஸோ’’திஆதி³மாஹ. ஏவம் ஸதி ‘‘நாமபச்சயாபி விஞ்ஞாண’’ந்தி ந வத்தப்³ப³ம் ஸியா, நாமம் பன பச்சயுப்பன்னபூ⁴தம் பச்சயபூ⁴தஞ்ச ஸப்பதே³ஸமேவ க³ஹிதந்தி அதி⁴ப்பாயோ. யதா² பன ‘‘நாமபச்சயா ச²ட்டா²யதனம், நாமபச்சயா ப²ஸ்ஸோ’’திஆதீ³ஸு (விப⁴. 150-154) பச்சயுப்பன்னம் ட²பேத்வா நாமம் க³ஹிதம், ஏவம் ‘‘ப⁴வபச்சயாபி உபாதா³ன’’ந்தி இதா⁴பி பச்சயுப்பன்னம் ட²பேத்வா ப⁴வஸ்ஸ க³ஹணம் ந ந ஸக்கா காதும், தஸ்மா உபாதா³னஸ்ஸ அவிக³தபச்சயனியமாபா⁴வோ விய அஞ்ஞமஞ்ஞபச்சயனியமாபா⁴வோ ப⁴வே புப்³பே³ வுத்தனயேன அத்தீ²தி ‘‘ப⁴வபச்சயாபி உபாதா³ன’’ந்தி ந வுத்தந்தி வேதி³தப்³ப³ம்.

அஞ்ஞமஞ்ஞபச்சயோதி சேத்த² ஸம்பயுத்தவிப்பயுத்தஅத்தி²பச்சயோ அதி⁴ப்பேதோ ஸியா. ‘‘நாமரூபபச்சயாபி விஞ்ஞாண’’ந்தி ஹி வுத்தம், ந ச வத்து² அகுஸலவிஞ்ஞாணஸ்ஸ அஞ்ஞமஞ்ஞபச்சயோ ஹோதி, புரேஜாதவிப்பயுத்தோ பன ஹோதீதி. ததா² ‘‘ச²ட்டா²யதனபச்சயாபி நாமரூப’’ந்தி வுத்தம், ந ச ச²ட்டா²யதனம் சக்கா²யதனுபசயாதீ³னம் சித்தஸமுட்டா²னரூபஸ்ஸ ச அஞ்ஞமஞ்ஞபச்சயோ ஹோதி, பச்சா²ஜாதவிப்பயுத்தோ பன ஹோதீதி.

அஞ்ஞமஞ்ஞசதுக்கவண்ணனா நிட்டி²தா.

ஸங்கா²ராதி³மூலகனயமாதிகாவண்ணனா

247. ‘‘அபுப்³ப³ஸ்ஸ அஞ்ஞஸ்ஸ அவிஜ்ஜாபச்சயஸ்ஸ வத்தப்³ப³ஸ்ஸ அபா⁴வதோ ப⁴வமூலகனயோ ந வுத்தோ’’தி வுத்தம், ஏவம் ஸதி ‘‘ச²ட்டா²யதனபச்சயா அவிஜ்ஜா’’திஆதி³கா ச²ட்டா²யதனாதி³மூலகா ச ந வத்தப்³பா³ ஸியும். ‘‘நாமபச்சயா அவிஜ்ஜா’’தி ஏத்த² ஹி அவிஜ்ஜாபச்சயா ஸப்³பே³ சத்தாரோ க²ந்தா⁴ நாமந்தி வுத்தாதி. தத்தா²யம் அதி⁴ப்பாயோ ஸியா – நாமவிஸேஸானம் ச²ட்டா²யதனாதீ³னம் அவிஜ்ஜாய பச்சயபா⁴வோ வத்தப்³போ³தி ச²ட்டா²யதனாதி³மூலகா வுத்தா. யதே³வ பன நாமம் அவிஜ்ஜாய பச்சயோ, ததே³வ ப⁴வபச்சயா அவிஜ்ஜாதி ஏத்தா²பி வுச்சேய்ய, ந வத்தப்³ப³விஸேஸோ கோசி, தஸ்மா அபுப்³பா³பா⁴வதோ ந வுத்தோதி. ப⁴வக்³க³ஹணேன ச இத⁴ அவிஜ்ஜாய பச்சயபூ⁴தா ஸபா⁴வத⁴ம்மா க³ண்ஹேய்யம்உ, ந ஜாதிஆதீ³னீதி அபுப்³பா³பா⁴வதோ ந வுத்தோதி த³ட்ட²ப்³போ³. ‘‘அவிஜ்ஜாபச்சயா அவிஜ்ஜாதிபி வுத்தம் ஸியா’’தி வுத்தம், யதா² பன ‘‘நாமபச்சயா ப²ஸ்ஸோ’’தி வுத்தே ‘‘ப²ஸ்ஸபச்சயா ப²ஸ்ஸோ’’தி வுத்தம் ந ஹோதி பச்சயுப்பன்னம் ட²பேத்வா பச்சயஸ்ஸ க³ஹணதோ, ஏவமிதா⁴பி ந ஸியா, தஸ்மா ப⁴வனவஸேன ஸபா⁴வத⁴ம்மாஸபா⁴வத⁴ம்மேஸு ஸாமஞ்ஞேன பவத்தோ ப⁴வ-ஸத்³தோ³தி ந ஸோ அவிஜ்ஜாய பச்சயோதி ஸக்கா வத்தும். தேன ப⁴வமூலகனயோ ந வுத்தோதி வேதி³தப்³போ³.

‘‘உபாதா³னபச்சயா ப⁴வோ’’தி ஏத்த² விய ப⁴வேகதே³ஸே விஸும் புப்³பே³ அக்³க³ஹிதே ப⁴வ-ஸத்³தோ³ பச்சயஸோத⁴னத்த²ம் ஆதி³தோ வுச்சமானோ நிரவஸேஸபோ³த⁴கோ ஹோதி, ந நாம-ஸத்³தோ³. ஏவம்ஸபா⁴வா ஹி ஏதா நிருத்தியோதி இமினாவா அதி⁴ப்பாயேன ‘‘அவிஜ்ஜாபச்சயா அவிஜ்ஜாதிபி வுத்தம் ஸியா’’தி ஆஹாதி த³ட்ட²ப்³ப³ம், இமினாவ அதி⁴ப்பாயேன ‘‘ப⁴வஸ்ஸ நிப்பதே³ஸத்தா ப⁴வபச்சயாபி உபாதா³னந்தி ந வுத்த’’ந்தி அயமத்தோ² அஞ்ஞமஞ்ஞபச்சயவாரே வுத்தோதி த³ட்ட²ப்³போ³. தத்த² பச்சி²ன்னத்தாதி ஏதேன ஜாதிஜராமரணானம் அவிஜ்ஜாய பச்சயபா⁴வோ அனுஞ்ஞாதோ விய ஹோதி. ஜாயமானானம் பன ஜாதி, ந ஜாதியா ஜாயமானா, ஜீயமானமீயமானஞ்ச ஜராமரணம், ந ஜராமரணஸ்ஸ ஜீயமானமீயமானாதி ஜாதிஆதீ³னி ஏகசித்தக்க²ணே ந அவிஜ்ஜாய பச்சயோ ஹோந்தி, தஸ்மா அஸம்ப⁴வதோ ஏவ தம்மூலகா நயா ந க³ஹிதா, பச்சே²தோ³பி பன அத்தீ²தி ‘‘தத்த² பச்சி²ன்னத்தா’’தி வுத்தந்தி த³ட்ட²ப்³ப³ம். தேனேவ ‘‘அபிசா’’திஆதி³மாஹ.

மாதிகாவண்ணனா நிட்டி²தா.

அகுஸலனித்³தே³ஸவண்ணனா

248-249. உபாதா³னஸ்ஸ உபாதா³னபச்சயத்தம் ஆபஜ்ஜேய்யாதி நனு நாயம் தோ³ஸோ. காமுபாதா³னஞ்ஹி தி³ட்டு²பாதா³னஸ்ஸ, தஞ்ச இதரஸ்ஸ பச்சயோ ஹோதீதி? ஸச்சம், காமுபாதா³னஸ்ஸ பன தண்ஹாக³ஹணேன க³ஹிதத்தா நாமே விய விஸேஸபச்சயத்தாபா⁴வா ச உபாதா³னக்³க³ஹணேன தண்ஹாபச்சயா ப⁴வஸ்ஸ ச பச்சயபூ⁴தா தி³ட்டி² ஏவ க³ஹிதாதி அயம் தோ³ஸோ வுத்தோதி த³ட்ட²ப்³போ³. யஸ்மா ச உபாதா³னட்டா²னே பச்சயுப்பன்னம் பச்சயோ ச ஏகமேவ, தஸ்மா ‘‘நாமபச்சயா ப²ஸ்ஸோ, நாமரூபபச்சயா ஸளாயதன’’ந்தி ஏதேஸம் நித்³தே³ஸேஸு விய ‘‘உபாதா³னபச்சயா ப⁴வோ’’தி ஏதஸ்ஸ நித்³தே³ஸே பச்சயோ விஸும் ந விப⁴த்தோ. ஸதிபி வா ப⁴வஸ்ஸ பச்சயபா⁴வேன காமுபாதா³னஸ்ஸபி க³ஹணே ‘‘ட²பேத்வா உபாதா³ன’’ந்தி அவுச்சமானே காமுபாதா³னம் காமுபாதா³னஸ்ஸ, தி³ட்டி² ச தி³ட்டி²யா பச்சயோதி ஆபஜ்ஜேய்யாதி பச்சயபச்சயுப்பன்னதானிவாரணத்த²ம் ‘‘ட²பேத்வா உபாதா³ன’’ந்தி வுத்தந்தி த³ஸ்ஸேதி.

252. சக்கா²யதனாதி³உபத்த²ம்ப⁴கஸ்ஸ சித்தஸமுட்டா²னரூபஸ்ஸ ஜனகம் விஞ்ஞாணம் சக்கா²யதனுபசயாதீ³னம் பச்சயோதி வுத்தம் தத³ஜனகம்பீதி அதி⁴ப்பாயேன ‘‘யஸ்ஸ சித்தஸமுட்டா²னரூபஸ்ஸா’’திஆதி³மாஹ. தாஸம்பி ஹீதி உதுஆஹாரஜஸந்ததீனம்பி ஹி உபத்த²ம்ப⁴கஸமுட்டா²பனபச்சா²ஜாதபச்சயவஸேன விஞ்ஞாணம் பச்சயோ ஹோதி ஏவாதி அத்தோ².

254. யதா²னுரூபந்தி மஹாபூ⁴தஸங்கா²தம் பஞ்சன்னம் ஸஹஜாதாதி³பச்சயோ, வத்து²ஸங்கா²தம் ச²ட்ட²ஸ்ஸ புரேஜாதாதி³பச்சயோ, நாமம் பஞ்சன்னம் பச்சா²ஜாதாதி³பச்சயோ, ச²ட்ட²ஸ்ஸ ஸஹஜாதாதி³பச்சயோதி ஏஸா யதா²னுரூபதா.

264. யஸ்ஸாதி யஸ்ஸ பச்சயுப்பன்னஸ்ஸ நாமஸ்ஸ விஞ்ஞாணஸ்ஸ ஸம்பயுத்தபச்சயபா⁴வோ ஹோதீதி யோஜேதப்³ப³ம்.

272. ‘‘ப²ஸ்ஸபச்சயாபி நாம’’ந்தி ப²ஸ்ஸபச்சயபா⁴வேன வத்தப்³ப³ஸ்ஸேவ நாமஸ்ஸ அத்தனோ பச்சயுப்பன்னேன பவத்தி த³ஸ்ஸிதாதி ‘‘ட²பேத்வா ப²ஸ்ஸ’’ந்தி புன வசனே கோசி அத்தோ² அத்தீ²தி ந வுத்தந்தி த³ஸ்ஸேந்தோ ‘‘ததா²பீ’’திஆதி³மாஹ.

280. யஸ்மா அதி⁴மோக்கோ²பி நத்தி², தஸ்மா உபாதா³னட்டா²னம் பரிஹீனமேவாதி ஸம்ப³ந்தோ⁴. ப³லவகிலேஸேன பன பத³பூரணஸ்ஸ காரணம் தண்ஹாய அபா⁴வோ தோ³மனஸ்ஸஸஹக³தேஸு வுத்தோ ஏவாதி தஸ்ஸ தேன ஸம்ப³ந்தோ⁴ யோஜேதப்³போ³. ஸப்³ப³த்தா²தி ததியசித்தாதீ³ஸு ‘‘தண்ஹாபச்சயா அதி⁴மோக்கோ²’’திஆதி³ம்ஹி விஸ்ஸஜ்ஜனமேவ விஸேஸம் த³ஸ்ஸேத்வா பாளி ஸம்கி²த்தா. ஹேட்டா²தி சித்துப்பாத³கண்டா³தீ³ஸு.

அகுஸலனித்³தே³ஸவண்ணனா நிட்டி²தா.

குஸலாப்³யாகதனித்³தே³ஸவண்ணனா

292. பஸாதோ³தி ஸத்³தா⁴.

306. ‘‘அலோபோ⁴ நிதா³னம் கம்மானம் ஸமுத³யாயா’’திஆதி³வசனதோ (அ. நி. 3.34) ஸப்³யாபாரானி குஸலமூலானி ஸங்கா²ரானம் நிதா³னானி ஹோந்தி, ந கம்மவேக³க்கி²த்தேஸு விபாகேஸு அலோபா⁴தி³ஸஹக³தகம்மபடிபி³ம்ப³பூ⁴தா விய பவத்தமானா அலோபா⁴த³யோதி பஞ்சவிஞ்ஞாணேஸு விய நிதா³னரஹிததா ஸோதபதிததாதி த³ட்ட²ப்³பா³. கிரியத⁴ம்மா கிரியமத்தத்தா கம்மனிதா³னரஹிதாஇச்சேவ பரிஹீனாவிஜ்ஜாட்டா²னா வேதி³தப்³பா³.

ததியசதுத்த²வாரா அஸம்ப⁴வதோ ஏவாதி கஸ்மா வுத்தம், கிம் சக்கு²விஞ்ஞாணாதீ³னி சக்கா²யதனுபசயாதீ³னம் பச்சா²ஜாதபச்சயா ந ஹோந்தீதி? ஹோந்தி, தது³பத்த²ம்ப⁴கஸ்ஸ பன சித்தஸமுட்டா²னஸ்ஸ அஸமுட்டா²பனம் ஸந்தா⁴ய ‘‘அஸம்ப⁴வதோ’’தி வுத்தந்தி த³ட்ட²ப்³ப³ம். ஸஹஜாதபச்சா²ஜாதவிஞ்ஞாணஸ்ஸ பன வஸேன ததா³பி விஞ்ஞாணபச்சயா நாமரூபம், பச்சா²ஜாதஸஹஜாதனாமஸ்ஸ ஸஹஜாதபுரேஜாதபூ⁴தசக்கா²தி³ரூபஸ்ஸ ச வஸேன நாமரூபபச்சயா ஸளாயதனஞ்ச லப்³ப⁴தீதி ததியசதுத்த²வாரா ந ந ஸம்ப⁴வந்தீதி.

குஸலாப்³யாகதனித்³தே³ஸவண்ணனா நிட்டி²தா.

அவிஜ்ஜாமூலககுஸலனித்³தே³ஸவண்ணனா

334. ஸம்மோஹவஸேனாதி குஸலப²லே அனிச்சாதி³தாய ஸப⁴யே ஸாது³ரஸவிஸருக்க²பீ³ஜஸதி³ஸே தம்னிப்³ப³த்தககுஸலே ச அனாதீ³னவத³ஸ்ஸிதாவஸேன. ஸமதிக்கமத்த²ம் பா⁴வனா ஸமதிக்கமபா⁴வனா, தத³ங்க³விக்க²ம்ப⁴னவஸேன ஸமதிக்கமபூ⁴தா வா பா⁴வனா ஸமதிக்கமபா⁴வனா.

ததா² இத⁴ ந லப்³ப⁴ந்தீதி அவிஜ்ஜாய ஏவ ஸங்கா²ரானம் அவிக³தாதி³பச்சயத்தாபா⁴வம் ஸந்தா⁴ய வுத்தம், விஞ்ஞாணாதீ³னம் பன ஸங்கா²ராத³யோ அவிக³தாதி³பச்சயா ஹோந்தீதி அவிஜ்ஜாபச்சயா ஸங்கா²ரோ, ஸங்கா²ரபச்சயா விஞ்ஞாணம் ஸங்கா²ரஹேதுகந்திஆதி³னா யோஜனா ந ந ஸக்கா காதுந்தி அவிக³தசதுக்காதீ³னிபி ந இத⁴ லப்³ப⁴ந்தி. விஞ்ஞாணபச்சயா நாமரூபம் விஞ்ஞாணஸம்பயுத்தம் நாமந்திஆதி³னா ஹி யதா²லாப⁴யோஜனாய நயோ த³ஸ்ஸிதோதி.

அவிஜ்ஜாமூலககுஸலனித்³தே³ஸவண்ணனா நிட்டி²தா.

குஸலமூலகவிபாகனித்³தே³ஸவண்ணனா

343. ‘‘நானாக்க²ணிககம்மபச்சயே பன வத்தப்³ப³மேவ நத்தீ²’’தி வுத்தம், கிம் குஸலமூலம் அகுஸலமூலஞ்ச கம்மபச்சயோ ஹோதீதி? ந ஹோதி, கம்மபச்சயபூ⁴தாய பன சேதனாய ஸம்ஸட்ட²ம் கம்மம் விய பச்சயோ ஹோதி. தேன ஏகீபா⁴வமிவ க³தத்தாதி ஏவம் வுத்தந்தி த³ட்ட²ப்³ப³ம். யதா² குஸலாகுஸலமூலேஹி வினா கம்மம் விபாகம் ந ஜனேதீதி தானி விபாகஸ்ஸ பரியாயேன உபனிஸ்ஸயோதி வுத்தானி, ஏவம் கம்மேன ஏகீபூ⁴தானி ஸம்ஸட்டா²னி ஹுத்வா கம்மஜானம் பச்சயா ஹோந்தீதி பரியாயேன தேஸம் கம்மபச்சயதா வுத்தா. ஏஸாதி ஏஸ குஸலமூலபச்சயோ அகுஸலமூலபச்சயோ சாதி யோஜேதப்³ப³ம்.

குஸலாகுஸலவிபாகானம் விய கிரியானம் உப்பாத³கானி அவிஜ்ஜாகுஸலாகுஸலமூலானி ச ந ஹோந்தீதி ஆஹ ‘‘உபனிஸ்ஸயதம் ந லப⁴ந்தீ’’தி. மனஸிகாரோபி ஜவனவீதி²படிபாத³கமத்தத்தா குஸலாகுஸலானி விய அவிஜ்ஜம் உபனிஸ்ஸயம் ந கரோதி, அவிஜ்ஜூபனிஸ்ஸயானம் பன பவத்திஅத்த²ம் ப⁴வங்கா³வட்டனமத்தம் ஹோதி, பஹீனாவிஜ்ஜானஞ்ச கிரியானம் அவிஜ்ஜா நேவுப்பாதி³கா, ஆரம்மணமத்தமேவ பன ஹோதி. ஏவஞ்ச கத்வா ‘‘குஸலோ த⁴ம்மோ அப்³யாகதஸ்ஸ த⁴ம்மஸ்ஸ உபனிஸ்ஸயபச்சயேன பச்சயோ’’தி (பட்டா². 1.1.423), ‘‘விபாகத⁴ம்மத⁴ம்மோ நேவவிபாகனவிபாகத⁴ம்மத⁴ம்மஸ்ஸ உபனிஸ்ஸயபச்சயேன பச்சயோ’’தி (பட்டா². 1.3.103) ச ஏவமாதீ³ஸு கிரியானம் அகுஸலா உபனிஸ்ஸயபச்சயபா⁴வேன ந உத்³த⁴டாதி. அபிச ‘‘அவிஜ்ஜாபச்சயா ஸங்கா²ரா’’தி ஏதஸ்ஸ வஸேன அவிஜ்ஜாமூலகோ குஸலனயோ வுத்தோ, ‘‘ஸங்கா²ரபச்சயா விஞ்ஞாண’’ந்தி ஏதஸ்ஸ வஸேன குஸலாகுஸலமூலகோ விபாகனயோ, கிரியானம் பன நேவ ஸங்கா²ரக்³க³ஹணேன, ந ச விஞ்ஞாணக்³க³ஹணேன க³ஹணம் க³ச்ச²தீதி தம்மூலகோ கிரியானயோ ந லப்³ப⁴தீதி ந வுத்தோதி த³ட்ட²ப்³போ³.

அனேகபே⁴த³தோதி அவிஜ்ஜாதீ³னம் மூலபதா³னம் ஏகசித்தக்க²ணிகானம் கிரியந்தே பட²மனயே ஸஹஜாதாதி³அனேகபச்சயபா⁴வேன க³ஹிதத்தா தேஸம் பச்சயானம் வஸேன நவாதி³மூலபதா³னம் நயானம் வஸேன, அனேகப்பகாரதோ சதுன்னம் சதுக்கானம் வஸேனாதி வா அதி⁴ப்பாயோ. குஸலாகுஸலானம் பன விபாகே சாதி ஏத்த² குஸலாகுஸலேஸு குஸலாகுஸலானம் விபாகே சாதி வத்தப்³ப³ம். புரிமபச்சி²மேஸு ஹி நயேஸு யதா² பச்சயாகாரோ வுத்தோ, தம்த³ஸ்ஸனத்த²ம் ‘‘அனேகபே⁴த³தோ ஏகதா⁴வா’’தி வுத்தம், ந ச பச்சி²மனயே குஸலே அனேகபே⁴த³தோ பச்சயாகாரோ வுத்தோ, அத² கோ² ‘‘ஏகதா⁴வா’’தி. ஏகதா⁴வாதி ச மூலபதே³கபச்சயதாவஸேன, ஏகஸ்ஸேவ வா நயஸ்ஸ வஸேன ஏகப்பகாரேனாதி அத்தோ², பட²மசதுக்கஸ்ஸேவ வஸேனாதி வா அதி⁴ப்பாயோ. த⁴ம்மபச்சயபே⁴தே³தி அவிஜ்ஜாதீ³னம் த⁴ம்மானம் பச்சயபா⁴வபே⁴தே³ ஜராமரணாதீ³னம் த⁴ம்மானம் ஜாதிஆதி³பச்சயபே⁴தே³, தம்தம்சித்துப்பாத³ஸமயபரிச்சி²ன்னானம் வா ப²ஸ்ஸாதீ³னம் த⁴ம்மானம் ஏகக்க²ணிகாவிஜ்ஜாதி³பச்சயபே⁴தே³. பரியத்திஆதீ³னம் கமோ பரியத்தி…பே… படிபத்திக்கமோ. பச்சயாகாரே ஹி பாளிபரியாபுணனதத³த்த²ஸவனபாளிஅத்த²சிந்தனானி ‘‘ஜராமரணம் அனிச்சம் ஸங்க²தம்…பே… நிரோத⁴த⁴ம்ம’’ந்திஆதி³னா பா⁴வனாபடிபத்தி ச கமேன காதப்³பா³தி கம-க்³க³ஹணம் கரோதி. ததோதி ஞாணப்பபே⁴த³ஜனகதோ கமதோ. அஞ்ஞம் கரணீயதரம் நத்தி². ததா³யத்தா ஹி து³க்க²ந்தகிரியாதி.

குஸலமூலகவிபாகனித்³தே³ஸவண்ணனா நிட்டி²தா.

அபி⁴த⁴ம்மபா⁴ஜனீயவண்ணனா நிட்டி²தா.

படிச்சஸமுப்பாத³விப⁴ங்க³வண்ணனா நிட்டி²தா.