3. பஞ்ஹபுச்ச²கவண்ணனா

215. ஏவம் புரிமேஸுபி த்³வீஸூதி கஸ்மா வுத்தம், நனு ஸுத்தந்தபா⁴ஜனீயே து³க்க²னிரோத⁴கா³மினிபடிபதா³னித்³தே³ஸே லோகியலோகுத்தரமிஸ்ஸகோ மக்³கோ³ வுத்தோ. தஸ்ஸ ஹி அட்ட²கதா²யம் (விப⁴. அட்ட². 205) ‘‘சதூஸு ஸச்சேஸு உக்³க³ஹாதி³வஸேன புப்³ப³பா⁴க³ஞாணுப்பத்திம் ஸந்தா⁴ய இத³ம் ‘து³க்கே² ஞாண’ந்திஆதி³ வுத்தம், படிவேத⁴க்க²ணே பன ஏகமேவ ஞாணம் ஹோதீ’’தி ஸம்மாதி³ட்டி²யா, ததா² ஸம்மாஸங்கப்பாதீ³னஞ்ச லோகியலோகுத்தரமிஸ்ஸகதா த³ஸ்ஸிதா ‘‘அபிசேஸா ஸம்மாதி³ட்டி² நாம புப்³ப³பா⁴கே³ நானாக்க²ணா நானாரம்மணா ஹோதி, மக்³க³க்க²ணே ஏகக்க²ணா ஏகாரம்மணா’’திஆதி³னா சாதி? ஸச்சமேதம், ஏவம் பன ஆக³மனவஸேன தத்தா²பி சதுஸச்சகம்மட்டா²னத³ஸ்ஸனாதி³முகே²ன அரியோவ அட்ட²ங்கி³கோ மக்³கோ³ த³ஸ்ஸிதோ. ஏவஞ்ச கத்வா ‘‘படிவேத⁴க்க²ணே பன ஏகமேவ ஞாணம் ஹோதீ’’தி மக்³க³ஞாணஸ்ஸ ஏகஸ்ஸேவ து³க்க²ஞாணாதி³தா, ‘‘மக்³க³க்க²ணே பன…பே… ஏகோவ குஸலஸங்கப்போ உப்பஜ்ஜதி, அயம் ஸம்மாஸங்கப்போ நாமா’’திஆதி³னா மக்³க³ஸங்கப்பாதீ³னம் ஸம்மாஸங்கப்பாதி³தா ச நித்³தா⁴ரிதா, பாளியஞ்ச அட்ட²ங்கி³கம் மக்³க³ம் உத்³தி³ஸித்வா தமேவ நித்³தி³ஸிதும் ‘‘து³க்கே² ஞாண’’ந்திஆதி³ வுத்தம். தேன ஸுத்தந்தபா⁴ஜனீயேபி த்³வின்னம் லோகியதா, த்³வின்னம் லோகுத்தரதா வுத்தா ‘‘ஏவம் புரிமேஸுபி த்³வீஸூதி ஏதேனாதி.

பஞ்ஹபுச்ச²கவண்ணனா நிட்டி²தா.

ஸச்சவிப⁴ங்க³வண்ணனா நிட்டி²தா.