1. ஸுத்தந்தபா⁴ஜனீயம்

உத்³தே³ஸவாரவண்ணனா

355. ஸமானஸத்³த³வசனீயானம் அத்தா²னம் உத்³த⁴ரணம் அத்து²த்³தா⁴ரோ. ஸோ யஸ்மா ஸத்³த³த்த²விசாரோ ந ஹோதி, தஸ்மா வுத்தம் ‘‘ந இத⁴…பே… அத்த²த³ஸ்ஸன’’ந்தி. ப-ஸத்³தோ³ பதா⁴னத்த²தீ³பகோ ‘‘பணீதா த⁴ம்மா’’திஆதீ³ஸு (த⁴. ஸ. திகமாதிகா 14) விய.

அனவஸ்ஸுததா அனுபகிலிட்ட²தா. தேனாஹ ‘‘தது³ப⁴யவீதிவத்ததா’’தி.

பு⁴ஸத்த²ம் பக்க²ந்த³னந்தி பு⁴ஸத்த²விஸிட்ட²ம் பக்க²ந்த³னம் அனுபவிஸனம்.

அஸ்ஸாத³ஸ்ஸாதி தண்ஹாய. ‘‘நிச்சம் அத்தா’’தி அபி⁴னிவேஸவத்து²தாய தி³ட்டி²யா விஸேஸகாரணானம் சித்தத⁴ம்மானம் தண்ஹாயபி வத்து²பா⁴வதோ விஸேஸக்³க³ஹணம், ததா² காயவேத³னானம் தி³ட்டி²யாபி வத்து²பா⁴வஸம்ப⁴வதோ ‘‘விஸேஸேனா’’தி வுத்தம். ஸராக³வீதராகா³தி³விபா⁴க³த்³வயவஸேனேவ சித்தானுபஸ்ஸனாய வுத்தத்தா தம் ‘‘நாதிபபே⁴த³க³த’’ந்தி வுத்தம். த⁴ம்மாதி இத⁴ ஸஞ்ஞாஸங்கா²ரக்க²ந்தா⁴ அதி⁴ப்பேதா, ஸங்கா²ரக்க²ந்தோ⁴ ச ப²ஸ்ஸாதி³வஸேன அனேகபே⁴தோ³தி த⁴ம்மானுபஸ்ஸனா ‘‘அதிபபே⁴த³க³தா’’தி வுத்தா. ஸராகா³தி³விபா⁴க³வஸேன ஸோளஸபே⁴த³த்தா வா சித்தானுபஸ்ஸனா நாதிபபே⁴த³க³தா வுத்தா, ஸுத்தே ஆக³தனயேன நீவரணாதி³வஸேன அனேகபே⁴த³த்தா த⁴ம்மானுபஸ்ஸனா அதிபபே⁴த³க³தா வுத்தா. ‘‘விஸுத்³தி⁴மக்³கோ³தி வுத்தானீ’’தி ஆனேத்வா யோஜேதப்³ப³ம். தா அனுபஸ்ஸனா ஏதேஸந்தி தத³னுபஸ்ஸனா, சித்தத⁴ம்மானுபஸ்ஸினோ புக்³க³லா, தேஸம்.

தத்த² ‘‘அஸுப⁴பா⁴வத³ஸ்ஸனேனா’’தி யதா²டி²தவஸேனாபி யோஜனா லப்³ப⁴தேவ. ப⁴வோக⁴ஸ்ஸ வேத³னா வத்து² ப⁴வஸ்ஸாத³பா⁴வதோ. நிச்சக்³க³ஹணவஸேனாதி அத்தாபி⁴னிவேஸவிஸிட்ட²ஸ்ஸ நிச்சக்³க³ஹணஸ்ஸ வஸேன. ததா² ஹி வுத்தம் ‘‘ஸஸ்ஸதஸ்ஸ அத்தனோ’’தி. ஓகே⁴ஸு வுத்தனயா ஏவ யோகா³ஸவேஸுபி யோஜனா அத்த²தோ அபி⁴ன்னத்தாதி தே ந க³ஹிதா. நிச்சக்³க³ஹணவஸேனாதி அத்தாபி⁴னிவேஸவிஸிட்ட²ஸ்ஸ நிச்சக்³க³ஹணஸ்ஸ வஸேன. பட²மோக⁴ததியசதுத்த²க³ந்த²யோஜனாயம் வுத்தனயேனேவ காயசித்தத⁴ம்மானம் இதருபாதா³னவத்து²தா க³ஹேதப்³பா³தி வேத³னாய தி³ட்டு²பாதா³னவத்து²தா த³ஸ்ஸிதா. ததா² காயவேத³னானம் ச²ந்த³தோ³ஸாக³திவத்து²தா காமோக⁴ப்³யாபாத³காயக³ந்த²வத்து²தாவசனேன வுத்தாதி. தேனாஹ ‘‘அவுத்தானம் வுத்தனயேன வத்து²பா⁴வோ யோஜேதப்³போ³’’தி.

தா⁴ரணதா அஸம்முஸ்ஸனதா, அனுஸ்ஸரணமேவ வா. ஏகத்தேதி ஏகஸபா⁴வே நிஸ்ஸரணாதி³வஸேன. ஸமாக³மோ ஸச்சி²கிரியா. ஸதிபட்டா²னஸபா⁴வோ ஸம்மாஸதிதா நிய்யானஸதிதா ஸமானபா⁴க³தா ஏகஜாதிதா ஸபா⁴க³தா. புரிமஸ்மிந்தி ‘‘ஏகத்தே நிப்³பா³னே ஸமாக³மோ ஏகத்தஸமோஸரண’’ந்தி ஏதஸ்மிம் அத்தே². விஸுந்தி நானாஅத்த²த்³வயபா⁴வேன. ததே³வ க³மனம் ஸமோஸரணந்தி ஸதிஸத்³த³த்த²ந்தராபா⁴வா…பே… ஏகபா⁴வஸ்ஸாதி யோஜேதப்³ப³ம். ஸதிஸத்³த³த்த²வஸேன அவுச்சமானேதி ‘‘ஏகோ ஸதிபட்டா²னஸபா⁴வோ ஏகத்த’’ந்திஆதி³னா அவுச்சமானே, ‘‘ஏகத்தே நிப்³பா³னே ஸமாக³மோ ஏகத்தஸமோஸரண’’ந்தி ஏவம் வுச்சமானேதி அத்தோ². தா⁴ரணதாவ ஸதீதி ‘‘ஸரணதா’’தி (த⁴. ஸ. 14) வுத்ததா⁴ரணதா ஏவ ஸதீதி கத்வா. ஸதிஸத்³த³த்த²ந்தராபா⁴வாதி ஸதிஸங்கா²தஸ்ஸ ஸரணேகத்தஸமோஸரணஸத்³த³த்த²தோ அஞ்ஞஸ்ஸ அத்த²ஸ்ஸ அபா⁴வா. புரிமந்தி ஸரணபத³ம். நிப்³பா³னஸமோஸரணேபீதி யதா²வுத்தே து³தியே அத்தே² ஸரணேகத்தஸமோஸரணபதா³னி ஸஹிதானேவ ஸதிபட்டா²னேகபா⁴வஸ்ஸ ஞாபகானி, ஏவம் நிப்³பா³னஸமோஸரணேபி ‘‘ஏகத்தே நிப்³பா³னே ஸமாக³மோ ஏகத்தஸமோஸரண’’ந்தி ஏதஸ்மிம்பி அத்தே² ஸதி…பே… காரணானி.

ஆனாபானபப்³பா³தீ³னந்தி ஆனாபானபப்³ப³இரியாபத²சதுஸம்பஜஞ்ஞ கோட்டா²ஸ தா⁴துமனஸிகாரனவஸிவதி²கபப்³பா³னீதி ஏதேஸம். இமேஸு பன யஸ்மா கேஸுசி தே³வானம் கம்மட்டா²னம் ந இஜ்ஜ²தி, தஸ்மா தானி அனாமஸித்வா யதி³பி கோட்டா²ஸதா⁴துமனஸிகாரவஸேனேவேத்த² தே³ஸனா பவத்தா, தே³ஸனந்தரே பன ஆக³தம் அனவஸேஸம் காயானுபஸ்ஸனாவிபா⁴க³ம் த³ஸ்ஸேதும் ‘‘சுத்³த³ஸவிதே⁴ன காயானுபஸ்ஸனம் பா⁴வேத்வா’’தி (விப⁴. அட்ட². 355) வுத்தம். தேனாஹ ‘‘மஹாஸதிபட்டா²னஸுத்தே வுத்தான’’ந்தி. ‘‘ததா²’’தி இமினா ‘‘மஹாஸதிபட்டா²னஸுத்தே (தீ³. நி. 2.382) வுத்தான’’ந்தி இமமேவ உபஸம்ஹரதி. பஞ்சவிதே⁴னாதி நீவரணஉபாதா³னக்க²ந்தா⁴யதனபோ³ஜ்ஜ²ங்க³அரியஸச்சானம் வஸேன பஞ்சதா⁴. பா⁴வனானுபா⁴வோ அரியமக்³க³க்³க³ஹணஸமத்த²தா.

தம்னியமதோதி தஸ்ஸா காயானுபஸ்ஸனாதி³படிபத்தியா நியமதோ. தஸ்ஸா பி⁴க்கு²பா⁴வே நியதே ஸாபி பி⁴க்கு²பா⁴வே நியதாயேவ நாம ஹோதி.

காயானுபஸ்ஸனாஉத்³தே³ஸவண்ணனா

ஏத்தா²தி காயே. அவயவா அஸ்ஸ அத்தீ²தி அவயவீ, ஸமுதா³யோ, ஸமூஹோதி அத்தோ², ஸோ பன அவயவவினிமுத்தம் த்³ரப்³யந்தரந்தி கா³ஹோ லத்³தி⁴ அவயவீகா³ஹோ. ஹத்த²பாதா³தி³அங்கு³லினகா²தி³அங்க³பச்சங்கே³ ஸன்னிவேஸவிஸிட்டே² உபாதா³ய யாயம் அங்க³பச்சங்க³ஸமஞ்ஞா சேவ காயஸமஞ்ஞா ச, தம் அதிக்கமித்வா இத்தி²புரிஸரத²க⁴டாதி³த்³ரப்³யந்திபரிகப்பனம் ஸமஞ்ஞாதிதா⁴வனம். அத² வா யதா²வுத்தஸமஞ்ஞம் அதிக்கமித்வா பகதிஆதி³த்³ரப்³யாதி³ஜீவாதி³காயாதி³பத³த்த²ந்தரபரிகப்பனம் ஸமஞ்ஞாதிதா⁴வனம். நிச்சஸாராதி³கா³ஹபூ⁴தோ அபி⁴னிவேஸோ ஸாராதா³னாபி⁴னிவேஸோ.

ந தம் தி³ட்ட²ந்தி தம் இத்தி²புரிஸாதி³ தி³ட்ட²ம் ந ஹோதி. தி³ட்ட²ம் வா இத்தி²புரிஸாதி³ ந ஹோதீதி யோஜனா. யதா²வுத்தந்தி கேஸாதி³பூ⁴துபாதா³யஸமூஹஸங்கா²தம்.

கேஸாதி³பத²விந்தி கேஸாதி³ஸஞ்ஞிதம் ஸஸம்பா⁴ரபத²விம். புப்³பா³பரியபா⁴வேனாதி ஸந்தானவஸேன. அஞ்ஞத்தா²தி ‘‘ஆபோகாய’’ந்தி ஏவமாதீ³ஸு.

அஜ்ஜ²த்தப³ஹித்³தா⁴தி ஸபரஸந்தானே காயோ வுத்தோதி. ‘‘காயோ’’தி சேத்த² ஸம்மஸனுபகா³ ரூபத⁴ம்மா அதி⁴ப்பேதாதி ஆஹ ‘‘அஜ்ஜ²த்தப³ஹித்³தா⁴த⁴ம்மான’’ந்தி. க⁴டிதம் ஏகாப³த்³த⁴ம் ஆரம்மணம் க⁴டிதாரம்மணம், ஏகாரம்மணபூ⁴தந்தி அத்தோ². தேனாஹ ‘‘ஏகதோ ஆரம்மணபா⁴வோ நத்தீ²’’தி.

அந்தோஓலீயனா அந்தோஸங்கோசோ அந்தராவோஸானம்.

த்³வீஹீதி அபி⁴ஜ்ஜா²வினயதோ³மனஸ்ஸவினயேஹி.

ஸதி ச ஸம்பஜஞ்ஞஞ்ச ஸதிஸம்பஜஞ்ஞம், தேன. ஏதேன கரணபூ⁴தேன. விபக்க²த⁴ம்மேஹி அனந்தரிதத்தா அவிச்சி²ன்னஸ்ஸ. தஸ்ஸ ஸப்³ப³த்தி²ககம்மட்டா²னஸ்ஸ.

காயானுபஸ்ஸனாஉத்³தே³ஸவண்ணனா நிட்டி²தா.

வேத³னானுபஸ்ஸனாதி³உத்³தே³ஸவண்ணனா

ஸுகா²தீ³னந்தி ஸுக²து³க்கா²து³க்க²மஸுகா²னம்.

ரூபாதி³ஆரம்மணனானத்தபே⁴தா³னம் வஸேன யோஜேதப்³ப³ந்தி ஸம்ப³ந்தோ⁴. ததா² ச ஸேஸேஸுபி. ஸவத்து²காவத்து²காதீ³தி ஆதி³-ஸத்³தே³ன ஹீனாதி³யோனிஆதி³பே⁴த³ம் ஸங்க³ண்ஹாதி. விஸும் விஸும் ந வத்தப்³ப³ந்தி சோத³னம் த³ஸ்ஸேதீதி யோஜனா. ஏகத்தா²தி காயாதீ³ஸு ஏகஸ்மிம். புரிமசோத³னாயாதி ‘‘புப்³பே³ பஹீனத்தா புன பஹானம் ந வத்தப்³ப³’’ந்தி சோத³னாய. பஹீனந்தி விக்க²ம்பி⁴தம். படிபக்க²பா⁴வனாயாதி மக்³க³பா⁴வனாய. உப⁴யத்தா²தி உப⁴யசோத³னாய. உப⁴யந்தி பரிஹாரத்³வயம். யஸ்மா புரிமசோத³னாய நானாபுக்³க³லபரிஹாரோ, நானாசித்தக்க²ணிகபரிஹாரோ ச ஸம்ப⁴வதி, து³தியசோத³னாய பன நானாசித்தக்க²ணிகபரிஹாரோயேவ, தஸ்மா வுத்தம் ‘‘ஸம்ப⁴வதோ யோஜேதப்³ப³’’ந்தி. மக்³க³ஸதிபட்டா²னபா⁴வனம் ஸந்தா⁴ய வுத்தம். ஸப்³ப³த்தா²தி ஸப்³பே³ஸு காயாதீ³ஸு.

வேத³னானுபஸ்ஸனாதி³உத்³தே³ஸவண்ணனா நிட்டி²தா.

உத்³தே³ஸவாரவண்ணனா நிட்டி²தா.

காயானுபஸ்ஸனானித்³தே³ஸவண்ணனா

356. அஜ்ஜ²த்தாதீ³தி ஆதி³-ஸத்³தே³ன இத⁴ வுத்தா ப³ஹித்³தா⁴அஜ்ஜ²த்தப³ஹித்³தா⁴அனுபஸ்ஸனப்பகாரா விய மஹாஸதிபட்டா²னஸுத்தே வுத்தா ஸமுத³யத⁴ம்மானுபஸ்ஸிஆதி³அனுபஸ்ஸனப்பகாராபி காயானுபஸ்ஸனாபா⁴வதோ க³ஹிதா இச்சேவ வேதி³தப்³ப³ம். தத்தா²தி அஜ்ஜ²த்தாதி³அனுபஸ்ஸனாயம். சுத்³த³ஸ பகாரா மஹாஸதிபட்டா²னஸுத்தே ஆக³தசுத்³த³ஸப்பகாராதி³கே அபேக்கி²த்வா இத⁴ வுத்தா. அஜ்ஜ²த்தாதி³ப்பகாரோ ஏகோ பகாரோதி ஆஹ ‘‘ஏகப்பகாரனித்³தே³ஸேனா’’தி. பா³ஹிரேஸூதி ஏகச்சேஸு அஞ்ஞதித்தி²யேஸு. தேஸம்பி ஹி ஆனாபானாதி³வஸேன ஸமத²பக்கி²கா காயானுபஸ்ஸனா ஸம்ப⁴வதி. தேனாஹ ‘‘ஏகதே³ஸஸம்ப⁴வதோ’’தி.

தசஸ்ஸ ச அதசபரிச்சி²ன்னதா தசேன அபரிச்சி²ன்னதா அத்தீ²தி யோஜனா. ‘‘தீ³க⁴பா³ஹு நச்சதூ’’திஆதீ³ஸு விய அஞ்ஞபத³த்தே²பி ஸமாஸே அவயவபத³த்த²ஸங்க³ஹோ லப்³ப⁴தேவாதி வுத்தம் ‘‘காயேகதே³ஸபூ⁴தோ தசோ க³ஹிதோ ஏவா’’தி. தசபடிப³த்³தா⁴னம் நக²த³ந்தன்ஹாருமம்ஸானம், தசபடிப³த்³தா⁴னம் தத³னுப்பவிட்ட²மூலானம் கேஸலோமானம், தப்படிப³த்³த⁴படிப³த்³தா⁴னம் இதரேஸம் ஸமூஹபூ⁴தோ ஸப்³போ³ காயோ ‘‘தசபரியந்தோ’’த்வேவ வுத்தோதி த³ஸ்ஸேந்தோ ‘‘தப்படிப³த்³தா⁴’’திஆதி³மாஹ. அத்தி² கேஸா, அத்தி² லோமாதி ஸம்ப³ந்தோ⁴. தத்த² அத்தீ²தி புது²த்தவாசீ ஏகம் நிபாதபத³ம், ந கிரியாபத³ம். கிரியாபத³த்தே ஹி ஸந்தீதி வத்தப்³ப³ம் ஸியா, வசனவிபல்லாஸேன வா வுத்தந்தி.

கம்மட்டா²னஸ்ஸ வாசுக்³க³தகரணாதி³னா உக்³க³ண்ஹனம் உக்³க³ஹோ. கோட்டா²ஸபாளியா ஹி வாசுக்³க³தகரணம், மனஸிகிரியாய கேஸாதீ³னம் வண்ணாதி³தோ உபதா⁴ரணஸ்ஸ ச பகு³ணபா⁴வாபாத³னம் இத⁴ உக்³க³ஹோ. யேன பன நயேன யோகா³வசரோ தத்த² குஸலோ ஹோதி, ஸோ விதீ⁴தி வுத்தோ.

புரிமேஹீதி புரிமபுரிமேஹி பஞ்சகச²க்கேஹி ஸம்ப³ந்தோ⁴ வுத்தோ. ‘‘மம்ஸம்…பே… வக்க’’ந்தி ஹி அனுலோமதோ வக்கபஞ்சகஸ்ஸ புன ‘‘வக்கம்…பே… கேஸா’’தி வக்கபஞ்சகஸ்ஸ, தசபஞ்சகஸ்ஸ ச படிலோமதோ ஸஜ்ஜா²யக்கமோ ஸம்ப³ந்தோ⁴ த³ஸ்ஸிதோ. ஸ்வாயம் ஸஜ்ஜா²யோதி ஸம்ப³ந்தோ⁴. விஸும் திபஞ்சாஹந்தி அனுலோமதோ பஞ்சாஹம், படிலோமதோ பஞ்சாஹம், அனுலோமபடிலோமதோ பஞ்சாஹந்தி ஏவம் பஞ்சகச²க்கேஸு பச்சேகம் திபஞ்சாஹம். புரிமேஹி ஏகதோ திபஞ்சாஹந்தி தசபஞ்சகாதீ³ஹி ஸத்³தி⁴ம் அனுலோமதோ வக்கபஞ்சகாதீ³னி ஏகஜ்ஜ²ம் கத்வா வுத்தனயேனேவ திபஞ்சாஹம். ஆதி³அந்தத³ஸ்ஸனவஸேனாதிஆதி³பூ⁴தஸ்ஸ அனுலோமதோ ஸஜ்ஜா²யஸ்ஸ, அனுலோமபடிலோமதோ ஸஜ்ஜா²யே அந்தபூ⁴தஸ்ஸ படிலோமதோ ஸஜ்ஜா²யஸ்ஸ த³ஸ்ஸனவஸேன. தேனாஹ ‘‘அனுலோம…பே… அந்திமோ’’தி. ஏதம்பீதி யதி³த³ம் புரிமேஹி ஸத்³தி⁴ம் பச்சி²மஸ்ஸ பஞ்சகாதி³னோ ஏகதோ ஸஜ்ஜா²யகரணம், பஞ்சகாதீ³னம் பச்சேகம் அனுலோமாதி³னா ஸஜ்ஜா²யப்பகாரதோ அஞ்ஞோ ஸஜ்ஜா²யப்பகாரோ ஏஸோதி அத்தோ². த்³வின்னம் ஹத்தா²னம் ஏகமுகா² அஞ்ஞமஞ்ஞஸம்ப³ந்தா⁴ ட²பிதா அங்கு³லியோ இத⁴ ஹத்த²ஸங்க²லிகாதி அதி⁴ப்பேதாதி ஆஹ ‘‘அங்கு³லிபந்தீ’’தி. அஸுப⁴லக்க²ணம் கேஸாதீ³னம் படிக்கூலபா⁴வோ. த²த்³தா⁴தி³பா⁴வோ தா⁴துலக்க²ணம்.

அத்தனோ கோட்டா²ஸோ, ஸமானோ வா கோட்டா²ஸோ ஸகோட்டா²ஸோ, தத்த² ப⁴வோ ஸகோட்டா²ஸிகோ, கம்மட்டா²னம்.

காயானுபஸ்ஸனம் ஹித்வாதி அஸுப⁴தோ வா தா⁴துதோ அனுபஸ்ஸனம் மனஸிகாரம் அகத்வா. புப்³பே³ விய பரியந்ததாலஞ்ச ஆதி³தாலஞ்ச அக³ந்த்வா.

ஸமாதா⁴னாதி³விஸேஸயோகே³ன அதி⁴கம் சித்தந்தி அதி⁴சித்தம். தேன வுத்தம் ‘‘ஸமத²விபஸ்ஸனாசித்த’’ந்தி. மனஸிகரணம் சித்தந்தி ஏகந்தம் ஸமாதி⁴னிமித்தஸ்ஸேவ ஸமன்னாஹாரகம் சித்தம். விக்கே²பவஸேன சித்தஸ்ஸ நானாரம்மணே விஸடப்பவத்தி இத⁴ பப⁴ஞ்ஜனம், ஸமாதா⁴னேன தத³பா⁴வதோ ந ச பப⁴ஞ்ஜனஸபா⁴வம்.

ஸக்கி²ப⁴வனதா பச்சக்க²காரிதா. புப்³ப³ஹேதாதி³கேதி ஆதி³-ஸத்³தே³ன தத³னுரூபமனஸிகாரானுயோகா³தி³ம் ஸங்க³ண்ஹாதி.

ஸமப்பவத்தந்தி லீனுத்³த⁴ச்சரஹிதம். ததா²பவத்தியாதி மஜ்ஜி²மஸமத²னிமித்தம் படிபத்தியா, தத்த² ச பக்க²ந்த³னேன ஸித்³தா⁴ய யதா²வுத்தஸமப்பவத்தியா. பஞ்ஞாய தோஸேதீதி யாயம் தத்த² ஜாதானம் த⁴ம்மானம் அனதிவத்தனா, இந்த்³ரியானம் ஏகரஸதா, தது³பக³வீரியவாஹனா, ஆஸேவனாதி இமாஸம் ஸாதி⁴கா பா⁴வனாபஞ்ஞா, தாய அதி⁴சித்தம் தோஸேதி பஹட்ட²ம் கரோதி. யதா²வுத்தவிஸேஸஸித்³தி⁴யாவ ஹி தம்ஸாதி⁴காய பஞ்ஞாய தம் சித்தம் ஸம்பஹம்ஸிதம் நாம ஹோதி. ஏவம் ஸம்பஹம்ஸந்தோ ச யஸ்மா ஸப்³ப³ஸோ பரிப³ந்த⁴விஸோத⁴னேன பஞ்ஞாய சித்தம் வோதா³பேதீதி ச வுச்சதி, தஸ்மா ‘‘ஸமுத்தேஜேதி சா’’தி வுத்தம். நிரஸ்ஸாத³ந்தி புப்³பே³னாபரம் விஸேஸாலாபே⁴ன பா⁴வனாரஸவிரஹிதம். ஸம்பஹம்ஸேதீதி பா⁴வனாய சித்தம் ஸம்மா பஹாஸேதி பமோதே³தி. ஸமுத்தேஜேதீதி ஸம்மா தத்த² உத்தேஜேதி.

ஆஸயோ பவத்திட்டா²னம்.

வவத்தி²ததந்தி அஸம்கிண்ணதம்.

அந்தோதி அப்³ப⁴ந்தரே கோட்டா²ஸே. ஸுகு²மந்தி ஸுகு²மன்ஹாருஆதி³ம் ஸந்தா⁴ய வத³தி.

தாலபட்டிகா தாலபத்தவிலிவேஹி கதகடஸாரகோ.

க³ணனாய மத்தா-ஸத்³தோ³ கதிபயேஹி ஊனபா⁴வதீ³பனத்த²ம் வுச்சதி. த³ந்தட்டி²வஜ்ஜிதானி தீஹி ஊனானி தீணி அட்டி²ஸதானி. தஸ்மா ‘‘திமத்தானீ’’தி வுத்தம். யம் பன விஸுத்³தி⁴மக்³கே³ ‘‘அதிரேகதிஸதஅட்டி²கஸமுஸ்ஸய’’ந்தி (விஸுத்³தி⁴. 1.122) வுத்தம், தம் த³ந்தட்டீ²னிபி க³ஹேத்வா ஸப்³ப³ஸங்கா³ஹிகனயேன வுத்தம். ‘‘கோ³ப்ப²கட்டி²காதீ³னி அவுத்தானீ’’தி ந வத்தப்³ப³ம் ‘‘ஏகேகஸ்மிம் பாதே³ த்³வே கோ³ப்ப²கட்டீ²னீ’’தி வுத்தத்தா, ‘‘ஆனிஸத³ட்டி²ஆதீ³னீ’’தி பன வத்தப்³ப³ம்.

தேன அட்டி²னாதி ஊருட்டி²னா.

மரும்பேஹீதி மரும்பசுண்ணேஹி.

ஸுஸமாஹிதசித்தேன ஹேதுபூ⁴தேன. நானாரம்மணவிப்ப²ந்த³னவிரஹேனாதி நானாரம்மணபா⁴வேன விப்ப²ந்த³னம் நானாரம்மணவிப்ப²ந்த³னம், தேன விரஹேன. அனதிக்கந்தபீதிஸுக²ஸ்ஸ ஜா²னசித்தஸ்ஸ. தம்ஸமங்கீ³புக்³க³லஸ்ஸ வா.

படிக்கூலதா⁴துவண்ணவிஸேஸந்தி படிக்கூலவிஸேஸம், தா⁴துவிஸேஸம், வண்ணகஸிணவிஸேஸம். வக்கபஞ்சகாதீ³ஸு பஞ்சஸு விஸும், ஹேட்டி²மேஹி ஏகதோ ச ஸஜ்ஜா²யே ச²ன்னம் ச²ன்னம் பஞ்சாஹானம் வஸேன பஞ்ச மாஸா பரிபுண்ணா லப்³ப⁴ந்தி, தசபஞ்சகே பன விஸும் திபஞ்சாஹமேவாதி ஆஹ ‘‘அத்³த⁴மாஸே ஊனேபீ’’தி. மாஸந்தரக³மனம் ஸஜ்ஜா²யஸ்ஸ ஸத்தமாதி³மாஸக³மனம்.

யமேந்தந்தி ப³ந்தே⁴ந்தம்.

‘‘நீலம் பீத’’ந்திஆதி³னா ஸங்கா⁴டே நீலாதி³வவத்தா²னம் தம்னிஸ்ஸயத்தா மஹாபூ⁴தே உபாதா³யாதி ஆஹ ‘‘மஹாபூ⁴தம்…பே… து³க்³க³ந்த⁴ந்திஆதி³னா’’தி. உபாதா³யரூபம் மஹாபூ⁴தேன பரிச்சி²ன்னந்தி யோஜனா. தஸ்ஸாதி உபாதா³ரூபஸ்ஸ. ததோதி மஹாபூ⁴ததோ. சா²யாய ஆதபபச்சயபா⁴வோ ஆதபோ பச்சயோ ஏதிஸ்ஸாதி, ஆதபஸ்ஸ சா²யாய உப்பாத³கபா⁴வோ சா²யாதபானம் ஆதபபச்சயசா²யுப்பாத³கபா⁴வோ. தேன உப்பாதே³தப்³ப³உப்பாத³கபா⁴வோ அஞ்ஞமஞ்ஞபரிச்சே²த³கதாதி த³ஸ்ஸேதி. ஆயதனானி ச த்³வாரானி சாதி த்³வாத³ஸாயதனானி, ததே³கதே³ஸபூ⁴தானி த்³வாரானி ச.

ஸப்பச்சயபா⁴வாதி ஸப்பச்சயத்தா.

யதா²வுத்தேன ஆகாரேனாதி ‘‘இதி இத³ம் ஸத்தவித⁴ம் உக்³க³ஹகோஸல்லம் ஸுக்³க³ஹிதம் கத்வா’’திஆதி³னா (விப⁴. அட்ட². 356), ‘‘இமம் பன கம்மட்டா²னம் பா⁴வேத்வா அரஹத்தம் பாபுணிதுகாமேனா’’திஆதி³னா (விப⁴. அட்ட². 356) வா வுத்தப்பகாரேன விதி⁴னா. ‘‘அவிஸேஸதோ பன ஸாதா⁴ரணவஸேன ஏவம் வேதி³தப்³பா³’’தி, ‘‘இதோ பட்டா²யா’’தி ச வத³ந்தி. வண்ணாதி³முகே²னாதி வண்ணபடிக்கூலஸுஞ்ஞதாமுகே²ன. உபட்டா²னந்தி கம்மட்டா²னஸ்ஸ உபட்டா²னம், யோ உக்³க³ஹோதி வுத்தோ. ஏத்தா²தி சதுக்கபஞ்சகஜ்ஜா²னபட²மஜ்ஜா²னவிபஸ்ஸனாஸு ஏகஸ்மிம் ஸந்தீ⁴யதி. கேன? கம்மட்டா²னமனஸிகாரேனேவ, தஸ்மா உக்³க³ஹோவ ஸந்தி⁴ உக்³க³ஹஸந்தீ⁴தி வேதி³தப்³ப³ம்.

உட்டா²னகம் உப்பஜ்ஜனகம். ஸாதிரேகானி ச² அம்ப³ணானி கும்ப⁴ம். ததோதி முக²தோ⁴வனகா²த³னபோ⁴ஜனகிச்சதோ. நிவத்ததீதி அரஹத்தாதி⁴க³மேன அச்சந்தனிவத்திவஸேன நிவத்ததி.

கம்மமேவாதி மனஸிகாரகம்மமேவ. ஆரம்மணந்தி புப்³ப³பா⁴க³பா⁴வனாரம்மணம்.

ததா²தி வனமக்கடோ விய.

ஏகந்தி ஏகம் கோட்டா²ஸம்.

ஸத்தக³ஹணரஹிதேதி ஸத்தபஞ்ஞத்திம்பி அனாமஸித்வா தே³ஸிதத்தா வுத்தம். ஸஸந்தானதாய அஹம்காரவத்து²ம்ஹி அப்பஹீனமானஸ்ஸ பஹீனாகாரம் ஸந்தா⁴யாஹ ‘‘வித்³த⁴ஸ்தாஹம்காரே’’தி. தத்தா²தி பரஸ்ஸ காயே.

357. ஆதி³ம்ஹி ஸேவனா மனஸிகாரஸ்ஸ உப்பாத³னா ஆரம்போ⁴.

362. க³மிதாதி விக³மிதா.

காயானுபஸ்ஸனானித்³தே³ஸவண்ணனா நிட்டி²தா.

வேத³னானுபஸ்ஸனானித்³தே³ஸவண்ணனா

363. ஸம்பஜானஸ்ஸாதி ஸம்மா பகாரேஹி ஜானந்தஸ்ஸ, வத்தா²ரம்மணேஹி ஸத்³தி⁴ம் ஸுக²ஸாமிஸாதி³ப்பகாரேஹி அவிபரீதம் வேத³னம் ஜானந்தஸ்ஸாதி அத்தோ². புப்³ப³பா⁴க³பா⁴வனா வோஹாரானுஸாரேனேவ பவத்ததீதி ஆஹ ‘‘வோஹாரமத்தேனா’’தி. வேத³யாமீதி ‘‘அஹம் வேத³யாமீ’’தி அத்துபனாயிகா வுத்தாதி, பரிஞ்ஞாதவேத³னோபி வா உப்பன்னாய ஸுக²வேத³னாய லோகவோஹாரேன ‘‘ஸுக²ம் வேத³னம் வேத³யாமீ’’தி ஜானாதி, வோஹரதி ச, பகே³வ இதரோ. தேனாஹ ‘‘வோஹாரமத்தேன வுத்த’’ந்தி.

உப⁴யந்தி வீரியஸமாதி⁴ம். ஸஹ யோஜேத்வாதி ஸமது⁴ரகிச்சதோ அனூனாதி⁴கம் கத்வா. அத்த²த⁴ம்மாதீ³ஸு ஸம்மோஹவித்³த⁴ம்ஸனவஸேன பவத்தா மக்³க³பஞ்ஞா ஏவ லோகுத்தரபடிஸம்பி⁴தா³.

வண்ணமுகா²தீ³ஸு தீஸுபி முகே²ஸு. பரிக்³க³ஹஸ்ஸாதி அரூபபரிக்³க³ஹஸ்ஸ. ‘‘வத்து² நாம கரஜகாயோ’’தி வசனேன நிவத்திதம் த³ஸ்ஸேந்தோ ‘‘ந சக்கா²தீ³னி ச² வத்தூ²னீ’’தி ஆஹ. அஞ்ஞமஞ்ஞுபத்த²ம்பே⁴ன டி²தேஸு த்³வீஸு நளகலாபேஸு ஏகஸ்ஸ இதரபடிப³த்³த⁴ட்டி²திதா விய நாமகாயஸ்ஸ ரூபகாயபடிப³த்³த⁴வுத்திதாத³ஸ்ஸனஞ்ஹேதம் நிஸ்ஸயபச்சயவிஸேஸத³ஸ்ஸனந்தி.

தேஸந்தி யேஸம் ப²ஸ்ஸவிஞ்ஞாணானி பாகடானி, தேஸம். அஞ்ஞேஸந்தி ததோ அஞ்ஞேஸம், யேஸம் ப²ஸ்ஸவிஞ்ஞாணானி ந பாகடானி. ஸுக²து³க்க²வேத³னானம் ஸுவிபூ⁴தவுத்திதாய வுத்தம் ‘‘ஸப்³பே³ஸம் வினேய்யானம் வேத³னா பாகடா’’தி. விலாபேத்வா விலாபேத்வாதி ஸுவிஸுத்³த⁴ம் நவனீதம் விலாபேத்வா ஸீதிபூ⁴தம் அதிஸீதலே உத³கே பக்கி²பித்வா பத்தி²ன்னம் டி²தம் மத்தே²த்வா பரிபிண்டே³த்வா புன விலாபேத்வாதி ஸதவாரம் ஏவம் கத்வா.

தத்தா²பீதி யத்த² அரூபகம்மட்டா²னம் ஏவ…பே… த³ஸ்ஸிதம், தத்தா²பி. யேஸு ஸுத்தேஸு தத³ந்தோக³த⁴ம் ரூபகம்மட்டா²னந்தி யோஜனா.

வேத³னானுபஸ்ஸனானித்³தே³ஸவண்ணனா நிட்டி²தா.

சித்தானுபஸ்ஸனானித்³தே³ஸவண்ணனா

365. கிலேஸஸம்பயுத்தானம் ந விஸுத்³த⁴தா ஹோதீதி ஸம்ப³ந்தோ⁴. இதரேஹிபீதி அத்தனா ஸம்பயுத்தகிலேஸதோ இதரேஹிபி அஸம்பயுத்தேஹி. விஸும் வசனந்தி அஞ்ஞாகுஸலதோ விஸும் கத்வா வசனம். விஸிட்ட²க்³க³ஹணந்தி விஸிட்ட²தாக³ஹணம், ஆவேணிகஸமோஹதாத³ஸ்ஸனந்தி அத்தோ², யதோ தது³ப⁴யம் மோமூஹசித்தந்தி வுச்சதி.

சித்தானுபஸ்ஸனானித்³தே³ஸவண்ணனா நிட்டி²தா.

த⁴ம்மானுபஸ்ஸனானித்³தே³ஸோ

க. நீவரணபப்³ப³வண்ணனா

367. ஏகஸ்மிம் யுகே³ ப³த்³த⁴கோ³ணானம் விய ஏகதோ பவத்தி யுக³னத்³த⁴தா.

க³ஹணாகாரேனாதி அஸுபே⁴பி ஆரம்மணே ‘‘ஸுப⁴’’ந்தி க³ஹணாகாரேன. நிமித்தந்தி சாதி ஸுப⁴னிமித்தந்தி ச வுச்சதீதி யோஜனா. ஏகம்ஸேன ஸத்தா அத்தனோ அத்தனோ ஹிதஸுக²மேவ ஆஸீஸந்தீதி கத்வா வுத்தம் ‘‘ஆகங்கி²தஸ்ஸ ஹிதஸுக²ஸ்ஸா’’தி. அனுபாயோ ஏவ ச ஹிதவிஸிட்ட²ஸ்ஸ ஸுக²ஸ்ஸ அயோனிஸோமனஸிகாரோ, ஆகங்கி²தஸ்ஸ வா யதா²தி⁴ப்பேதஸ்ஸ ஹிதஸுக²ஸ்ஸ அனுபாயபூ⁴தோ. அவிஜ்ஜந்தா⁴ ஹி தாதி³ஸேபி பவத்தந்தீதி. நிப்பா²தே³தப்³பே³தி அயோனிஸோமனஸிகாரேன நிப்³ப³த்தேதப்³பே³ காமச்ச²ந்தே³தி அத்தோ².

தத³னுகூலத்தாதி தேஸம் அஸுபே⁴ ‘‘ஸுப⁴’’ந்தி, ‘‘அஸுப⁴’’ந்தி ச பவத்தானம் அயோனிஸோமனஸிகாரயோனிஸோமனஸிகாரானம் அனுகூலத்தா. ரூபாதீ³ஸு அனிச்சாதி³அபி⁴னிவேஸஸ்ஸ, அனிச்சஸஞ்ஞாதீ³னஞ்ச யதா²வுத்தமனஸிகாரூபனிஸ்ஸயதா தத³னுகூலதா.

ஆஹாரே படிக்கூலஸஞ்ஞம் ஸோ உப்பாதே³தீதி ஸம்ப³ந்தோ⁴. தப்³பி³பரிணாமஸ்ஸாதி போ⁴ஜனபரிணாமஸ்ஸ நிஸ்ஸந்தா³தி³கஸ்ஸ. ததா³தா⁴ரஸ்ஸாதி உத³ரஸ்ஸ, காயஸ்ஸேவ வா. ஸோதி போ⁴ஜனேமத்தஞ்ஞூ. ஸுத்தந்தபரியாயேன காமராகோ³ ‘‘காமச்ச²ந்த³னீவரண’’ந்தி வுச்சதீதி ஆஹ ‘‘அபி⁴த⁴ம்மபரியாயேனா’’தி. அபி⁴த⁴ம்மே ஹி ‘‘நீவரணம் த⁴ம்மம் படிச்ச நீவரணோ த⁴ம்மோ உப்பஜ்ஜதி நபுரேஜாதபச்சயா’’தி (பட்டா². 3.8.8) ஏதஸ்ஸ விப⁴ங்கே³ ‘‘அரூபே காமச்ச²ந்த³னீவரணம் படிச்ச தி²னமித்³த⁴னீவரணம் உத்³த⁴ச்சனீவரணம் அவிஜ்ஜானீவரணம் உப்பஜ்ஜதீ’’திஆதி³வசனதோ ப⁴வராகோ³பி காமச்ச²ந்த³னீவரணம் வுத்தந்தி விஞ்ஞாயதி. தேனாஹ ‘‘ஸப்³போ³பி லோபோ⁴ காமச்ச²ந்த³னீவரண’’ந்தி.

ஸீமாபே⁴தே³ கதேதி அத்தாதி³மரியாதா³ய பி⁴ன்னாய, அத்தாதீ³ஸு ஸப்³ப³த்த² ஏகரூபாய மேத்தாபா⁴வனாயாதி அத்தோ². விஹாராதி³உத்³தே³ஸரஹிதந்தி விஹாராதி³பதே³ஸபரிச்சே²த³ரஹிதம். உக்³க³ஹிதாய மேத்தாய. அட்ட²வீஸதிவிதா⁴தி இத்தி²ஆதி³வஸேன ஸத்தவிதா⁴ பச்சேகம் அவேராதீ³ஹி யோஜனாவஸேன அட்ட²வீஸதிவிதா⁴. ஸத்தாதி³இத்தி²ஆதி³அவேராதி³யோகே³னாதி ஏத்த² ஸத்தாதி³அவேராதி³யோகே³ன வீஸதி, இத்தி²ஆதி³அவேராதி³யோகே³ன அட்ட²வீஸதீதி அட்ட²சத்தாரீஸம் ஏகிஸ்ஸா தி³ஸாய. ததா² ஸேஸதி³ஸாஸுபீதி ஸப்³பா³ ஸங்க³ஹேத்வா ஆஹ ‘‘அஸீதாதி⁴கசதுஸதப்பபே⁴தா³’’தி.

கதாகதானுஸோசனஞ்ச ந ஹோதீதி யோஜனா. ‘‘ப³ஹுகம் ஸுதம் ஹோதி ஸுத்தம் கே³ய்ய’’ந்திஆதி³வசனதோ (அ. நி. 4.6) ப³ஹுஸ்ஸுததா நவங்க³ஸ்ஸ ஸாஸனஸ்ஸ வஸேன வேதி³தப்³பா³, ந வினயமத்தஸ்ஸேவாதி வுட்³ட⁴தம் பன அனபேக்கி²த்வா இச்சேவ வுத்தம், ந ப³ஹுஸ்ஸுததஞ்சாதி.

திட்ட²தி அனுப்பன்னா விசிகிச்சா² ஏத்த² ஏதேஸு ‘‘அஹோஸிம் நு கோ² அஹமதீதமத்³தா⁴ன’’ந்திஆதி³காய (ம. நி. 1.18; ஸ. நி. 2.20) பவத்தியா அனேகபே⁴தே³ஸு புரிமுப்பன்னேஸு விசிகிச்சா²த⁴ம்மேஸூதி தே டா²னீயா வுத்தா.

அட்ட²வத்து²காபீதி ந கேவலம் ஸோளஸவத்து²கா, நாபி ரதனத்தயவத்து²கா ச, அத² கோ² அட்ட²வத்து²காபி. ரதனத்தயே ஸம்ஸயாபன்னஸ்ஸ ஸிக்கா²தீ³ஸு கங்கா²ஸம்ப⁴வதோ, தத்த² நிப்³பே³மதிகஸ்ஸ தத³பா⁴வதோ ச ஸேஸவிசிகிச்சா²னம் ரதனத்தயவிசிகிச்சா²மூலிகதா த³ட்ட²ப்³பா³. அனுபவிஸனம் ‘‘ஏவமேத’’ந்தி ஸத்³த³ஹனவஸேன ஆரம்மணஸ்ஸ பக்க²ந்த³னம்.

நீவரணபப்³ப³வண்ணனா நிட்டி²தா.

க². போ³ஜ்ஜ²ங்க³பப்³ப³வண்ணனா

தேனாதி அத்த²ஸன்னிஸ்ஸிதக்³க³ஹணேன.

பச்சயவஸேன து³ப்³ப³லபா⁴வோ மந்த³தா.

பப்³ப³தபதே³ஸவனக³ஹனந்தரிதோபி கா³மோ ந தூ³ரே, பப்³ப³தம் பரிக்கி²பித்வா க³ந்தப்³ப³தாய ஆவாஸோ அரஞ்ஞலக்க²ணூபேதோ, தஸ்மா மம்ஸஸோதேனேவ அஸ்ஸோஸீதி வத³ந்தி.

ஸம்பத்திஹேதுதாய பஸாதோ³ ஸினேஹபரியாயேன வுத்தோ.

இந்த்³ரியானம் திக்க²பா⁴வாபாத³னம் தேஜனம். தோஸனம் பமோத³னம்.

போ³ஜ்ஜ²ங்க³பப்³ப³வண்ணனா நிட்டி²தா.

ஸமத²விபஸ்ஸனாவஸேன பட²மஸ்ஸ ஸதிபட்டா²னஸ்ஸ, ஸுத்³த⁴விபஸ்ஸனாவஸேன இதரேஸம். ஆக³மனவஸேன வுத்தம் அஞ்ஞதா² மக்³க³ஸம்மாஸதியா கத²ம் காயாரம்மணதா ஸியாதி அதி⁴ப்பாயோ. காயானுபஸ்ஸிஆதீ³னம் சதுப்³பி³தா⁴னம் புக்³க³லானம் வுத்தானம். தேனாஹ ‘‘ந ஹி ஸக்கா ஏகஸ்ஸ…பே… வத்து’’ந்தி. அனேகஸதிஸம்ப⁴வாவபோ³த⁴பஸங்கா³தி ஏகசித்துப்பாதே³ன அனேகிஸ்ஸா ஸதியா ஸம்ப⁴வஸ்ஸ, ஸதி ச தஸ்மிம் அனேகாவபோ³த⁴ஸ்ஸ ச ஆபஜ்ஜனதோ. ஸகிச்சபரிச்சி²ன்னேதி அத்தனோ கிச்சவிஸேஸவிஸிட்டே². த⁴ம்மபே⁴தே³னாதி ஆரம்மணபே⁴த³விஸிட்டே²ன த⁴ம்மவிஸேஸேன. ந த⁴ம்மஸ்ஸ த⁴ம்மோ கிச்சந்தி ஏகஸ்ஸ த⁴ம்மஸ்ஸ அஞ்ஞத⁴ம்மோ கிச்சம் நாம ந ஹோதி தத³பா⁴வதோ. த⁴ம்மபே⁴தே³ன த⁴ம்மஸ்ஸ விபா⁴கே³ன. தஸ்ஸ பே⁴தோ³தி தஸ்ஸ கிச்சஸ்ஸ பே⁴தோ³ நத்தி². தஸ்மாதி யஸ்மா நயித⁴ த⁴ம்மஸ்ஸ விபா⁴கே³ன கிச்சபே⁴தோ³ இச்சி²தோ, கிச்சபே⁴தே³ன பன த⁴ம்மவிபா⁴கோ³ இச்சி²தோ, தஸ்மா. தேன வுத்தம் ‘‘ஏகாவா’’திஆதி³.

ஸுத்தந்தபா⁴ஜனீயவண்ணனா நிட்டி²தா.