2. அபி⁴த⁴ம்மபா⁴ஜனீயவண்ணனா

243. தம் படிச்சஸமுப்பாத³ம். ஏகேகசித்தாவருத்³த⁴ந்தி அபி⁴த⁴ம்மபா⁴ஜனீயே விய ஏகேகஸ்மிம் சித்தே அவருத்³த⁴ம் அந்தோக³த⁴ம் அகத்வா. அஸஹஜாதானஞ்ச ‘‘அஸஹஜாதானம், ஸஹஜாதானஞ்சா’’தி ஏவம் பட²மபதே³ ஏகஸேஸனித்³தே³ஸோ த³ட்ட²ப்³போ³. ‘‘ஸங்கா²ரபச்சயா விஞ்ஞாண’’ந்தி அஸஹஜாதாயேவ பச்சயபச்சயுப்பன்னா த³ஸ்ஸிதா விபாகவிஞ்ஞாணஸ்ஸேவ அதி⁴ப்பேதத்தா. ‘‘அவிஜ்ஜாபச்சயா ஸங்கா²ரா, விஞ்ஞாணபச்சயா நாமரூப’’ந்தி (விப⁴. 225) ச ஏவமாதீ³ஸு அஸஹஜாதா, ஸஹஜாதா ச. ‘‘ஏகேகேன நயேனா’’தி புராதனோ பாடோ², ஏதரஹி பன ‘‘ஏகேகேன சதுக்கேன’’ இச்சேவ ப³ஹூஸு போத்த²கேஸு பாடோ². நயசதுக்கவாராதி நயேஸு சதுக்கானம் வாரா, அவிஜ்ஜாமூலகாதீ³ஸு நவஸு நயேஸு பச்சேகம் பச்சயசதுக்காதீ³னம் சதுன்னம் சதுக்கானம் ‘‘நாமபச்சயா ச²ட்டா²யதன’’ந்திஆதி³விஸேஸபி⁴ன்னா சத்தாரோ வாராதி அத்தோ². வவத்தி²தாதி யதா²வுத்தவிஸேஸேன அஸம்கிண்ணா. சதுக்கானந்தி வாரசதுக்கானம் வாரஸோளஸகஸ்ஸ நயபா⁴வதோதி அதி⁴ப்பாயோ.

1. பச்சயசதுக்கவண்ணனா

பச்சயஸஹிதபச்சயுப்பன்னானி அங்க³பா⁴வேன வுத்தானி, ந கேவலம் பச்சயா. தஸ்மா ‘‘ச²ட்டா²யதனபச்சயா ப²ஸ்ஸோ’’தி ஏத்த² ந ச²ட்டா²யதனஸ்ஸ அங்க³தா. தேன வுத்தம் ‘‘ந, தஸ்ஸ அனங்க³த்தா’’தி. ஏவஞ்ச கத்வாதி பச்சயஸஹிதஸ்ஸ பச்சயுப்பன்னஸ்ஸ அங்க³பா⁴வதோ. தீஸு பகாரேஸூதி ‘‘பட²மோ ஸப்³ப³ஸங்கா³ஹிகட்டே²னா’’திஆதி³னா (விப⁴. அட்ட². 243) அட்ட²கதா²யம் வுத்தேஸு தீஸுபி பகாரேஸு. பச்சயவிஸேஸாதீ³தி ஏத்த² நாமம், ச²ட்டா²யதனஞ்ச பச்சயவிஸேஸோ. ஆதி³-ஸத்³தே³ன யோனிவிஸேஸோ, ஆயதனானம் அபாரிபூரிபாரிபூரிப⁴வவிஸேஸோ ச க³ஹிதோ. தே ஹி து³தியவாராதீ³னம் நானத்தகரா. அத்த²விஸேஸேனாதி யதி³பி அஞ்ஞத்த² ‘‘ஸளாயதனபச்சயா ப²ஸ்ஸோ’’தி ஸளாயதனபச்சயோ வுத்தோ, ததா²பி ஸஹஜாதாதி³னாமஸன்னிஸ்ஸயேன பவத்தனதோ நாமமத்தபச்சயாபி ஸோ ஹோதீதி படிச்சஸமுப்பாத³ஸ்ஸ நானானயவிசித்ததானுமிதஸ்ஸ க³ம்பீ⁴ரபா⁴வஸ்ஸ விபா⁴வனஸங்கா²தேன, அனவஸேஸனாமபச்சயத³ஸ்ஸனஸங்கா²தேன ச அத்த²விஸேஸேன. ததா² ஹி ‘‘யேஹி, ஆனந்த³, ஆகாரேஹி யேஹி லிங்கே³ஹி யேஹி நிமித்தேஹி யேஹி உத்³தே³ஸேஹி நாமகாயஸ்ஸ பஞ்ஞத்தி ஹோதி, தேஸு ஆகாரேஸு…பே… உத்³தே³ஸேஸு அஸதி அபி நு கோ² ரூபகாயே அதி⁴வசனஸம்ப²ஸ்ஸோ பஞ்ஞாயேதா²’’தி (தீ³. நி. 2.114) ப²ஸ்ஸஸ்ஸ நாமபச்சயதாவிபா⁴வனவஸேன மஹானிதா³னதே³ஸனா பவத்தா. ததா² ‘‘நாமரூபபச்சயா ப²ஸ்ஸோதி இச்சஸ்ஸ வசனீய’’ந்தி (தீ³. நி. 2.97) ‘‘நாமரூபபச்சயா’’தி வத³ந்தேன ‘‘நாமபச்சயா’’திபி வுத்தமேவ ஹோதீதி.

வாரசதுக்கே ‘‘ஸங்கா²ரோ’’தி வுத்தம், ஸோகாத³யோ ந வுத்தா, புரிமஸ்மிம் வாரத்³வயே ரூபம் ந வுத்தம், வாரத்தயே ஸளாயதனம் ந வுத்தந்தி யோஜேதப்³ப³ம்.

ஸப்³ப³…பே… ரணதோதி ஸப்³ப³ஸ்ஸ விஞ்ஞாணஸ்ஸ பவத்திட்டா²னபூ⁴தஸப்³ப³ப⁴வஸாதா⁴ரணதோ, விஞ்ஞாணஸ்ஸ வா பவத்திட்டா²னபூ⁴தஸப்³ப³ப⁴வஸாதா⁴ரணதோ. ஸமானம் ப²லம் ஸமானோ பச்சயோ ஸஹஜாதாதி³பச்சயேஹி உபகத்தப்³ப³தோ, உபகாரகதோ ச. தஸ்ஸ விஞ்ஞாணஸ்ஸ. விஞ்ஞாணாஹரணந்தி விபாகவிஞ்ஞாணனிப்³ப³த்தனம். அஸ்ஸ விஞ்ஞாணஸ்ஸ.

க³திஸூசகோதி ஹி-ஸத்³த³ம் லோகே க³திஅத்த²ம் வத³ந்தீதி கத்வா வுத்தம். ‘‘விக³த’’ந்தி ஏத்த² வி-ஸத்³தோ³ படிஸேத⁴தீ³பகோதி த்³வே படிஸேதா⁴ பகதிம் ஞாபேந்தீதி ஆஹ ‘‘விக³ததானிவாரணவஸேன க³தி ஏவ ஹோதீ’’தி.

திதா⁴ சதுதா⁴ பஞ்சதா⁴ வாதி ஏத்த² ஸஞ்ஞாமனஸிகாராத³யோ ஸஹஜாதனிஸ்ஸயஅத்தி²பச்சயவஸேன திதா⁴, ப²ஸ்ஸசேதனாத³யோ தேஸஞ்சேவ ஆஹாராதீ³னஞ்ச வஸேன சதுதா⁴, வேத³னாவிதக்காத³யோ தேஸஞ்சேவ ஜா²னிந்த்³ரியாதீ³னஞ்ச வஸேன பஞ்சதா⁴. யதா² ஸமாதி⁴, ஏவம் வீரியம்பி த³ட்ட²ப்³ப³ம். தம்பி ஹி அதி⁴பதிந்த்³ரியமக்³க³பச்சயேஹி ச²தா⁴ பச்சயோ ஹோதி.

‘‘வசனவஸேனா’’தி இமினா இமஸ்மிம் சதுக்கே ஸஹஜாதபச்சயம் து⁴ரம் கத்வா தே³ஸனா பவத்தாதி தேஸம் அதி⁴ப்பாயோதி த³ஸ்ஸேதி. அத்தோ²தி பச்சயத⁴ம்மோ. கத்த²சீதி கிஸ்மிஞ்சி வாரே அத்தனோ பச்சயுப்பன்னஸ்ஸ யதா²ஸகேஹி பச்சயோ ந ந ஹோதி. ‘‘அத்த²தோ’’தி ச பாடோ². ‘‘ப⁴வபச்சயா ஜாதீ’’திஆதி³ ந வத்தப்³ப³ம் ஸியா, வுத்தஞ்ச தம். தஸ்மா ஸஹஜாதபச்சயவஸேனேவ பட²மசதுக்கோ வுத்தோதி ந க³ஹேதப்³ப³ந்தி த³ஸ்ஸேதி. தேனாஹ ‘‘ந ச தம் ந வுத்த’’ந்திஆதி³. இமஸ்ஸ ச ‘‘ப⁴வபச்சயா ஜாதீதிஆதி³ ந வத்தப்³ப³ம் ஸியா’’தி இமினா ஸம்ப³ந்தோ⁴ வேதி³தப்³போ³. பச்சயவசனமேவாதி ‘‘அவிஜ்ஜாபச்சயா’’திஆதீ³ஸு வுத்தபச்சயவசனமேவ ச. தேஸந்தி தேஸம் ஆசரியானம். அயோஜேத்வா வுத்தந்தி ஸம்ப³ந்தோ⁴. கத²ம் பன வுத்தந்தி ஆஹ ‘‘ஸாமஞ்ஞேன…பே… ஸந்தா⁴ய வுத்த’’ந்தி. ஏத்த² ச ‘‘ஸஹஜாதஸூசக’’ந்திஆதி³னா யதா²தி⁴ப்பேதஸ்ஸ அத்த²ஸ்ஸ வசனதோ அஸித்³தி⁴மாஹ, ‘‘ஸஹஜாததோ’’திஆதி³னா பன அத்தா²பத்திதோ. அஸம்ப⁴வே ஹி அஞ்ஞஸ்ஸ அத்த²தோ ஸிஜ்ஜே²ய்ய வசனதோ வா அத்த²தோ வா அதி⁴ப்பேதத்த²ஸாத⁴னாதி.

அஞ்ஞத்தா²தி அஞ்ஞஸ்மிம் ஸுத்தே. அதீதத்³த⁴ம் நித்³தா⁴ரேத்வா பச்சுப்பன்னானாக³தேஹி ஸத்³தி⁴ம் அத்³த⁴த்தயத³ஸ்ஸனத்த²ம். தம்தே³ஸனாபரிக்³க³ஹத்த²ந்தி மஹானிதா³னதே³ஸனாபரிக்³க³ஹத்த²ம். ஸோ ச உபி⁴ன்னம் தே³ஸனானம் அஞ்ஞமஞ்ஞம் ஸம்ஸந்த³னபா⁴வத³ஸ்ஸனத்த²ம். ஏவம் ஸப்³ப³ஞ்ஞுபு³த்³த⁴பா⁴ஸிதா தே³ஸனா அஞ்ஞத³த்து² ஸம்ஸந்த³தீதி.

இமஸ்ஸாதி இமஸ்ஸ ததியவாரஸ்ஸ.

அபராபேக்க²தாய, அபரிகிலிட்டு²பபத்திதாய, அஸுசிஅமக்கி²ததாய காமாவசரதே³வானம், ஸப்³பே³ஸஞ்ச ப்³ரஹ்மானம் ததா² உபபஜ்ஜனதோ ச ஓபபாதிகயோனியா பதா⁴னதா வேதி³தப்³பா³. ஸங்க³ஹனித³ஸ்ஸனவஸேனாதி ஓபபாதிகயோனியா ஏவ ஸம்ஸேத³ஜயோனியா ஸங்க³ஹஸ்ஸ நித³ஸ்ஸனவஸேன உதா³ஹரணவஸேன. ஆரம்மணபச்சயஸ்ஸாபி ப²ஸ்ஸஸ்ஸ ஸதிபி பவத்திஹேதுபா⁴வே ஸோ பன ஸஹஜாதாதி³பச்சயபூ⁴தஸ்ஸ அஜ்ஜ²த்திகஸ்ஸ ச²ட்டா²யதனஸ்ஸ விய ந ஸாதிஸயோதி வுத்தம் ‘‘ஆரம்மணபச்சயோ சேத்த² பவத்தகோ ந ஹோதீ’’தி.

கேஸஞ்சீதி பரிபுண்ணாயதனானம் க³ப்³ப⁴ஸேய்யகானம். ‘‘பச்சி²ம…பே… ஸதா³ ஸம்ப⁴வதீ’’தி இத³ம் க³ப்³ப⁴ஸேய்யகானம் விய இதரயோனிகானம் கமேன ஆயதனுப்பத்தி நத்தீ²தி வுத்தம். ததா² சாஹ அட்ட²கதா²யம் ‘‘ஸஹுப்பத்திதீ³பனதோ’’தி.

பச்சயசதுக்கவண்ணனா நிட்டி²தா.

2. ஹேதுசதுக்கவண்ணனா

244. அபா⁴வதோதி பா⁴வாபா⁴வதோ. யஞ்ஹி ஜாதிக்க²ணமத்தேயேவ ப⁴வதி, ந ததோ பரம், தம் ஜாதியா அவிக³தபச்சயோ ஸியா அவிக³தபச்சயனியமஸப்³பா⁴வதோ. ப⁴வோ பன யஸ்மா ஜாதிக்க²ணதோ பரம்பி ப⁴வதி, தஸ்மா ந ஸோ தஸ்ஸா அவிக³தபச்சயோ ஹோதி. தேன வுத்தம் ‘‘ததோ உத்³த⁴ம் பா⁴வதோதி அத்தோ²’’தி. ப⁴வேதி ப⁴வபதே³, ப⁴வே வா நிப்பா²தே³தப்³பே³. ஏஸ நயோ ஜாதிஆதீ³ஸூதி ஏத்தா²பி. ‘‘யதா² பனா’’திஆதி³னா ‘‘அவிக³தபச்சயஸ்ஸ அபா⁴வதோ, நியமாபா⁴வதோ சா’’தி வுத்தானம் ஹேதூனம் வுத்தனயேன அப்³யாபிபா⁴வவிபா⁴வனேன அகாரணதம் த³ஸ்ஸேதி அயாவபா⁴வினோ பச்சயுப்பன்னஸ்ஸ, பச்சயத⁴ம்மஸ்ஸ ச அவிக³தபச்சயபா⁴வத³ஸ்ஸனதோ. ஸங்கா²ரக்க²ந்தே⁴திஆதி³ மக்³க³ஸோத⁴னவஸேன வுத்தம். தஸ்ஸ பரிஹாரம் ஸயமேவ வத³தி. ஸோ க²ணோ ஏதஸ்ஸ அத்தீ²தி தங்க²ணிகோ, ந தங்க²ணிகோ அதங்க²ணிகோ, தஸ்ஸ ஸப்³பா⁴வா, அயாவபா⁴விகஸப்³பா⁴வாதி அத்தோ². யதா² பன ஹேதூ ஹோந்தி, தம் த³ஸ்ஸேதும் ‘‘ஸங்க²தலக்க²ணானம் பனா’’திஆதி³மாஹ.

ஏவந்தி ஏவம் யதா²வுத்தனயே ஸதி, ஏவம் ஸந்தேதி அத்தோ². ‘‘ந ஹி…பே… அத்தீ²’’தி இமினா ஜாதிஆதீ³னம் அவிக³தபச்சயவஸேன பச்சயுப்பன்னபா⁴வோ விய பச்சயபா⁴வோபி நத்தீ²தி த³ஸ்ஸேதி. தத்த² காரணமாஹ ‘‘அஸபா⁴வத⁴ம்மத்தா’’தி.

கத²ம் பன அஸபா⁴வத⁴ம்மானம் ஜாதிஆதீ³னம் பச்சயுப்பன்னதா, பச்சயதா சாதி ஆஹ ‘‘ஜாயமானானம் பனா’’திஆதி³. தஸ்ஸாதி ஜாதிஜராமரணஸ்ஸ. வத்தப்³ப³பதே³ஸோதி ‘‘ட²பேத்வா’’தி வத்தப்³ப³பதே³ஸோ. கோ பன ஸோதி? யதா²வுத்தம் நாமம், நாமரூபஞ்ச ஸங்கா²ரக்க²ந்தே⁴ன ரூபக்க²ந்தே⁴ன ச ஜராமரணானம் ஸங்க³ஹிதத்தா. ‘‘யோ ப⁴வோ ஜாதியா பச்சயோ’’தி ஏதேன ப⁴வஸங்க³ஹிதானிபி ஜாதிஆதீ³னி ஜாதியா அப்பச்சயத்தா ஏவ ‘‘ட²பேத்வா’’தி ந வுத்தானீதி த³ஸ்ஸேதி, பச்சயபா⁴வாஸங்கா ஏவ நேஸம் தஸ்ஸா நத்தீ²தி அதி⁴ப்பாயோ. தேனேவ ட²பேதப்³ப³க³ஹேதப்³ப³விஸேஸே ஸதீதி ஸாஸங்கம் வத³தி.

ஹேதுசதுக்கவண்ணனா நிட்டி²தா.

4. அஞ்ஞமஞ்ஞசதுக்கவண்ணனா

246. பச்சயுப்பன்னஸ்ஸாதி பச்சயுப்பன்னபா⁴வினோ. விஸும் டி²தஸ்ஸாதி ப⁴வேன அஸங்க³ஹிதஸ்ஸ. ஸப்பதே³ஸமேவ க³ஹிதம் இத⁴ வேத³னாதி³க்க²ந்த⁴த்தயஸ்ஸேவ அதி⁴ப்பேதத்தா நிருள்ஹத்தா ச. பச்சயுப்பன்னம் ட²பேத்வா பச்சயபூ⁴தம்யேவ நாமம் க³ஹிதம், அவிக³தபச்சயனியமாபா⁴வோ விய ப⁴வே உபாதா³னஸ்ஸ அஞ்ஞமஞ்ஞபச்சயனியமாபா⁴வோதி யோஜனா. வுத்தனயேனாதி ‘‘ஸங்க²தலக்க²ணானம் பனா’’திஆதி³னா வுத்தனயேன.

அஞ்ஞமஞ்ஞபச்சயோ விய அஞ்ஞமஞ்ஞபச்சயோதி அயமத்தோ² இதா⁴தி⁴ப்பேதோதி த³ஸ்ஸேந்தோ ‘‘அஞ்ஞமஞ்ஞ…பே… அதி⁴ப்பேதோ ஸியா’’தி ஆஹ. ததா² ச வத³ந்தி ‘‘அஞ்ஞமஞ்ஞஞ்சேத்த² ந பட்டா²னே ஆக³தஅஞ்ஞமஞ்ஞவஸேன க³ஹேதப்³ப³’’ந்தி. சக்கா²யதனுபசயாதீ³னந்தி உபரூபரி சிதானி விய உப்பன்னசக்கா²யதனாதீ³னி, சக்கா²யதனாதீ³னம் வா உபத்த²ம்ப⁴கானி சக்கா²யதனுபசயாதீ³னி.

அஞ்ஞமஞ்ஞசதுக்கவண்ணனா நிட்டி²தா.

ஸங்கா²ராதி³மூலகனயமாதிகாவண்ணனா

247. யதி³பி ஸாமஞ்ஞதோ க³தவிஸேஸோ, ததா²பி ஸாமஞ்ஞக்³க³ஹணேன நயக³தோ விஸேஸோ ஸரூபதோ த³ஸ்ஸிதோ ஹோதீதி ‘‘நாமபச்சயா அவிஜ்ஜா’’தி வத்வாபி நாமவிஸேஸானம் தஸ்ஸா பச்சயபா⁴வோ த³ஸ்ஸேதப்³போ³தி ஆஹ ‘‘நாமவிஸேஸானம்…பே… வுத்தா’’தி. ‘‘யதே³வ பன நாம’’ந்திஆதி³ கஸ்மா வுத்தம், நனு நாமக்³க³ஹணேன அக்³க³ஹிதோபி ஜாதிஆதி³ ப⁴வக்³க³ஹணேன க³ஹிதோதி த³ஸ்ஸிதோவாயமத்தோ²தி சோத³னம் ஸந்தா⁴யாஹ ‘‘ப⁴வக்³க³ஹணேன சா’’திஆதி³. இதா⁴பீதி ‘‘ப⁴வபச்சயா அவிஜ்ஜா’’தி இதா⁴பி. ந ஸியாதி ‘‘அவிஜ்ஜாபச்சயா அவிஜ்ஜா’’தி வுத்தம் ந ஸியா. தஸ்மாதி யஸ்மா ஸாமஞ்ஞசோதி³தம் விஸேஸசோதி³தமேவ ந ஹோதி, தஸ்மா. ஸோதி ப⁴வோ. தேனாதி ஸபா⁴வாஸபா⁴வத⁴ம்மஸங்க³ஹணேன.

உபாதா³னஸ்ஸபி ப⁴வேகதே³ஸத்தா வுத்தம் ‘‘உபாதா³னபச்சயா…பே… அக்³க³ஹிதே’’தி. ‘‘ப⁴வபச்சயா ஜாதீ’’தி இத³ம் வசனம் ஸந்தா⁴யாஹ ‘‘ப⁴வஸத்³தோ³…பே… வுச்சமானோ’’தி. ‘‘நாமபச்சயா அவிஜ்ஜா’’தி ஏத்த² பச்சயுப்பன்னம் ட²பேத்வா பச்சயஸ்ஸ க³ஹணதோ அவிஜ்ஜாவினிமுத்தா ஏவ சத்தாரோ க²ந்தா⁴ நாமஸத்³தே³ன வுச்சந்தீதி ஆஹ ‘‘ந நாமஸத்³தோ³ நிரவஸேஸபோ³த⁴கோ’’தி. ந சேத்த² ஏகம்ஸதோ காரணம் மக்³கி³தப்³ப³ம். யேன ப⁴வ-ஸத்³தோ³ நிரவஸேஸபோ³த⁴கோ, ந நாம-ஸத்³தோ³தி ஆஹ ‘‘ஏவம்ஸபா⁴வா ஹி ஏதா நிருத்தியோ’’தி. இமினா அதி⁴ப்பாயேனாதி ப⁴வஸத்³தோ³ நிரவஸேஸபோ³த⁴கோ உபாதி³ன்னசதுக்க²ந்த⁴விஸயத்தாதி இமினா அதி⁴ப்பாயேன. ஜாயமானாதி³த⁴ம்மவிகாரபா⁴வதோ ஜாயமானாதி³க்க²ந்த⁴படிப³த்³தா⁴ ஜாதிஆத³யோ வுச்சேய்யும், ந பன ஜாதிஆதி³படிப³த்³தா⁴ ஜாயமானாதி³க்க²ந்தா⁴தி ந ஏகசித்தக்க²ணே ஜாதிஆதீ³னம் அவிஜ்ஜாய பச்சயபா⁴வோ ஸம்ப⁴வதீதி இமமத்த²மாஹ ‘‘ஜாயமானானம் பனா’’திஆதி³னா. நானாசித்தக்க²ணே பன ஜாதிஆத³யோ அவிஜ்ஜாய உபனிஸ்ஸயபச்சயோ ஹோந்தீதி ‘‘ஏகசித்தக்க²ணே’’தி விஸேஸிதம். தேனேவாதி அஸம்ப⁴வேனேவ.

மாதிகாவண்ணனா நிட்டி²தா.

அகுஸலனித்³தே³ஸவண்ணனா

248-9. தந்தி தி³ட்டு²பாதா³னம். இதரஸ்ஸாதி காமுபாதா³னஸ்ஸ. தண்ஹாக³ஹணேனாதி ‘‘தண்ஹாபச்சயா’’தி ஏத்த² தண்ஹாக³ஹணேன க³ஹிதத்தா. யதி³ ஏவம் நாமக்³க³ஹணேன க³ஹிதா தண்ஹா கஸ்மா புன வுத்தாதி ஆஹ ‘‘நாமே விய விஸேஸபச்சயத்தாபா⁴வா’’தி. ‘‘நாமபச்சயா ச²ட்டா²யதன’’ந்தி ஏத்த² ஹி காமதண்ஹாபி நாமே ஸங்க³ஹிதாதி நாமஸ்ஸ யதா²ரஹம் ச²ட்டா²யதனஸ்ஸ பச்சயபா⁴வோ வுத்தோதி அத்தி² தத்த² விஸேஸபச்சயத்தம், உபாதா³னஸ்ஸ பன ப⁴வஸங்க³ஹோபி அத்தீ²தி ‘‘தண்ஹாபச்சயா உபாதா³ன’’ந்தி ஏதேன ‘‘காமுபாதா³னபச்சயா ப⁴வோ’’தி ஏதஸ்ஸ நத்தே²வ விஸேஸோதி வுத்தம் ‘‘நாமே விய விஸேஸபச்சயத்தாபா⁴வா’’தி. தண்ஹா ஏதிஸ்ஸா பச்சயோதி தண்ஹாபச்சயா, தி³ட்டி². ப⁴வஸ்ஸ பச்சயபூ⁴தாதி து³வித⁴ஸ்ஸபி ப⁴வஸ்ஸ காரணபூ⁴தா. உப⁴யேனபி உபாதா³னஸ்ஸ ப⁴வனித்³தே³ஸே ட²பேதப்³ப³தம்யேவ விபா⁴வேதி. பச்சயுப்பன்னம் பச்சயோ ச ஏகமேவாதி ‘‘தண்ஹாபச்சயா உபாதா³ன’’ந்தி ஏத்த² வுத்தபச்சயுப்பன்னம், ‘‘உபாதா³னபச்சயா ப⁴வோ’’தி ஏத்த² வுத்தபச்சயோ ச ஏகோ ஏவத்தோ², தஸ்மா பச்சயோ விஸும் பச்சயுப்பன்னதோ பி⁴ன்னம் கத்வா ந விப⁴த்தோ.

252. உபத்த²ம்ப⁴கஸமுட்டா²பனபச்சா²ஜாதபச்சயவஸேனாதி உபத்த²ம்ப⁴கஸ்ஸ சித்தஸமுட்டா²னரூபஸ்ஸ ஸமுட்டா²பனவஸேன, பச்சா²ஜாதபச்சயவஸேன ச.

254. பஞ்சன்னந்தி சக்கா²யதனாதீ³னம் பஞ்சன்னம். ஸஹஜாதாதி³பச்சயோதி ஸஹஜாதனிஸ்ஸயஅத்தி²அவிக³தாதி³பச்சயோ. வத்து²ஸங்கா²தம் ரூபம். புரேஜாதாதி³பச்சயோதி புரேஜாதனிஸ்ஸயவிப்பயுத்தஅத்தி²அவிக³தபச்சயோ. பச்சா²ஜாதாதி³பச்சயோதி பச்சா²ஜாதவிப்பயுத்தஅத்தி²அவிக³தபச்சயோ. ச²ட்ட²ஸ்ஸ ஸஹஜாதாதீ³தி ஆதி³-ஸத்³தே³ன அஞ்ஞமஞ்ஞனிஸ்ஸயஸம்பயுத்தஅத்தி²அவிக³தாத³யோ க³ஹிதா.

264. யஸ்ஸாதி ‘‘யஸ்ஸ ச ஹோதீ’’தி ஏத்த² வுத்தம் ‘‘யஸ்ஸா’’தி பத³ம் ஸந்தா⁴ய வுத்தம். தேனாஹ ‘‘ஹோதீதி யோஜேதப்³ப³’’ந்தி.

280. தஸ்ஸாதி ‘‘ப³லவகிலேஸபூ⁴தாய விசிகிச்சா²யா’’தி (விப⁴. அட்ட². 280) பத³ஸ்ஸ. தேனாதி ‘‘தண்ஹாட்டா²னே’’தி பதே³ன. சித்துப்பாத³கண்டா³தீ³ஸூதி ஆதி³-ஸத்³தே³ன இமஸ்மிம் படிச்சஸமுப்பாத³விப⁴ங்கே³ ஸுத்தந்தபா⁴ஜனீயாதி³ம் ஸங்க³ண்ஹாதி.

அகுஸலனித்³தே³ஸவண்ணனா நிட்டி²தா.

குஸலாப்³யாகதனித்³தே³ஸவண்ணனா

306. ஸப்³யாபாரானீதி ஸஉஸ்ஸாஹானி, விபாகத⁴ம்மானீதி அத்தோ². பரிஹீனம் அவிஜ்ஜாட்டா²னம் ஏதேஸந்தி பரிஹீனாவிஜ்ஜாட்டா²னா.

ஸந்தா⁴யாதி அதி⁴ப்பாயம் விபா⁴வேந்தோ விய வத³தி, ஸரூபேனேவ பன ‘‘ந ச சக்கு²விஞ்ஞாணாதீ³னி ரூபம் ஸமுட்டா²பேந்தீ’’தி (விப⁴. அட்ட². 306) அட்ட²கதா²யம் வுத்தம். நாமரூபம் ந ந லப்³ப⁴தீதி யோஜனா.

குஸலாப்³யாகதனித்³தே³ஸவண்ணனா நிட்டி²தா.

அவிஜ்ஜாமூலககுஸலனித்³தே³ஸவண்ணனா

334. குஸலப²லேதி குஸலவிபாகபடிஸந்தி⁴விஞ்ஞாணஸ்ஸ க³ஹிதத்தா தஸ்ஸ ஸாது³ரஸவிஸருக்க²பீ³ஜஸதி³ஸதா வுத்தா.

யதி³பி ‘‘ஸங்கா²ரஹேதுக’’ந்திஆதி³னா யோஜனா லப்³ப⁴தி, அவிக³தசதுக்காதீ³னி பன ந லப்³ப⁴ந்தி யதா²லாப⁴யோஜனாய த³ஸ்ஸிதத்தா.

அவிஜ்ஜாமூலககுஸலனித்³தே³ஸவண்ணனா நிட்டி²தா.

குஸலமூலகவிபாகனித்³தே³ஸவண்ணனா

343. கம்மம் விய பச்சயோ ஹோதி விபாகபா⁴வதோதி அதி⁴ப்பாயோ. விபாகஸ்ஸ கம்மம் பச்சயோ ஹோந்தம் ஸாதிஸயம் ஹோதீதி தஸ்ஸ நிப்பரியாயதா, தம்ஸம்பயுத்தானம் பரியாயதா ஸியாதி அதி⁴ப்பாயேன ‘‘பரியாயேன உபனிஸ்ஸயபச்சயோதி வுத்தானீ’’தி ஆஹ. ‘‘குஸலோ த⁴ம்மோ அப்³யாகதஸ்ஸ த⁴ம்மஸ்ஸ உபனிஸ்ஸயபச்சயேன பச்சயோ (பட்டா². 1.1.423), அகுஸலோ த⁴ம்மோ அப்³யாகதஸ்ஸ த⁴ம்மஸ்ஸ (பட்டா². 1.1.423), விபாகத⁴ம்மத⁴ம்மோ நேவவிபாகனவிபாகத⁴ம்மத⁴ம்மஸ்ஸ உபனிஸ்ஸயபச்சயேன பச்சயோ’’தி (பட்டா². 1.3.103) பன வசனதோ நிப்பரியாயேன ஸப்³பே³பி குஸலாகுஸலா த⁴ம்மா விபாகஸ்ஸ உபனிஸ்ஸயபச்சயோ ஹோதீதி அயமத்தோ² தி³ஸ்ஸதி. ‘‘குஸலமூலம் அகுஸலமூல’’ந்தி இமேஸம் அன்வாதே³ஸோபி பச்சயஸத்³தா³பேக்கா²ய ‘‘ஏஸா’’தி புல்லிங்க³வஸேன வுத்தோதி த³ஸ்ஸேந்தோ ஆஹ ‘‘ஏஸாதி…பே… யோஜேதப்³ப³’’ந்தி.

‘‘மனஸிகாரோபீ’’திஆதி³னா அப்பஹீனாவிஜ்ஜானம்பி கிரியாய குஸலாகுஸலமூலானி, அவிஜ்ஜா ச உபனிஸ்ஸயா ந ஹோந்தீதி த³ஸ்ஸேதி. கம்மவட்டவிபாகவட்டபூ⁴தானியேவ ஸங்கா²ரவிஞ்ஞாணானி பச்சி²மனயே அதி⁴ப்பேதானீதி வுத்தம் ‘‘கிரியானி பன…பே… க³ச்ச²ந்தீ’’தி. தேஸம் பச்சயானம் வஸேன அனேகப்பகாரதோதி அதி⁴ப்பாயோதி யோஜனா.

நவாதி³பே⁴தா³னந்தி நவஅட்ட²ஸத்தசா²தி ஏவம்பபே⁴தா³னம். சதுன்னம் சதுக்கானந்தி புரிமனயே பச்சி²மனயே ச ஆக³தானம் யதா²லாப⁴ம் சதுன்னம் சதுன்னம் சதுக்கானம். ‘‘குஸலாகுஸலானம் பன விபாகே சா’’தி ச-ஸத்³தே³ன குஸலாகுஸலே சாதி ஸமுச்சேதப்³போ³தி ஆஹ ‘‘குஸல…பே… வத்தப்³ப³’’ந்தி. மூலபதே³கபச்சயதாவஸேனாதி மூலபத³ஸ்ஸ ஏகபச்சயபா⁴வவஸேன உபனிஸ்ஸயபச்சயதாவஸேன. ஏகஸ்ஸேவ நயஸ்ஸாதி குஸலாகுஸலேஸு அவிஜ்ஜாமூலகஸ்ஸ, விபாகேஸு குஸலாகுஸலமூலகஸ்ஸாதி ஏவம் ஏகஸ்ஸேவ நயஸ்ஸ வஸேன. த⁴ம்மபச்சயபே⁴தே³தி த⁴ம்மஸ்ஸ பச்சயபூ⁴தஸ்ஸ, பச்சயுப்பன்னஸ்ஸ வா பச்சயபா⁴வேன பே⁴தே³தி இமமத்த²ம் த³ஸ்ஸேந்தோ ‘‘அவிஜ்ஜாதீ³ன’’ந்திஆதி³ம் வத்வா புன தமேவ ‘‘தம்தம்சித்துப்பாதா³’’திஆதி³னா பகாரந்தரேன விபா⁴வேதி.

குஸலமூலகவிபாகனித்³தே³ஸவண்ணனா நிட்டி²தா.

அபி⁴த⁴ம்மபா⁴ஜனீயவண்ணனா நிட்டி²தா.

படிச்சஸமுப்பாத³விப⁴ங்க³வண்ணனா நிட்டி²தா.