5. இந்த்³ரியவிப⁴ங்கோ³

1. அபி⁴த⁴ம்மபா⁴ஜனீயவண்ணனா

219. சக்கு²த்³வாரபா⁴வேதி சக்கு²த்³வாரபா⁴வஹேது. தம்த்³வாரிகேஹீதி தஸ்மிம் த்³வாரே பவத்தனகேஹி சித்தசேதஸிகேஹி. தே ஹி ‘‘தம் த்³வாரம் பவத்திஓகாஸபூ⁴தம் ஏதேஸம் அத்தீ²’’தி தம்த்³வாரிகா. நனு ச தப்³ப³த்து²கேஹிபி தம் இந்த³ட்ட²ம் காரேதி. தேனாஹ அட்ட²கதா²யம் ‘‘திக்கே² திக்க²த்தா, மந்தே³ ச மந்த³த்தா’’தி? ஸச்சம் காரேதி, தப்³ப³த்து²காபி பன இத⁴ ‘‘தம்த்³வாரிகா’’இச்சேவ வுத்தா. அபரிச்சத்தத்³வாரபா⁴வம்யேவ ஹி சக்கு² நிஸ்ஸயட்டே²ன ‘‘வத்தூ²’’தி வுச்சதி. அத² வா தம்த்³வாரிகேஸு தஸ்ஸ இந்த³ட்டோ² பாகடோதி ‘‘தம்த்³வாரிகேஹீ’’தி வுத்தம். இந்த³ட்டோ² பரேஹி அனுவத்தனீயதா பரமிஸ்ஸரபா⁴வோதி த³ஸ்ஸேந்தோ ‘‘தஞ்ஹி…பே… அனுவத்தந்தீ’’தி ஆஹ. தத்த² தந்தி சக்கு²ம். தேதி தம்த்³வாரிகே. கிரியானிட்டா²னவாசீ ஆவீ-ஸத்³தோ³ ‘‘விஜிதாவீ’’திஆதீ³ஸு (தீ³. நி. 1.258; 2.33; 3.199) வியாதி ஆஹ ‘‘பரினிட்டி²தகிச்சஜானன’’ந்தி.

‘‘ச² இமானி, பி⁴க்க²வே, இந்த்³ரியானி. கதமானி ச²? சக்கு²ந்த்³ரியம்…பே… மனிந்த்³ரிய’’ந்தி (ஸம். நி. 5.495-499) ஏவம் கத்த²சி ச²பிந்த்³ரியானி ஆக³தானி, கஸ்மா பன ஸுத்தந்தே க²ந்தா⁴த³யோ விய இந்த்³ரியானி ஏகஜ்ஜ²ம் ந வுத்தானி, அபி⁴த⁴ம்மே ச வுத்தானீதி ஆஹ ‘‘தத்த² ஸுத்தந்தே’’திஆதி³. நிஸ்ஸரணூபாயாதி³பா⁴வதோதி ஏத்த² லோகுத்தரேஸு மக்³க³பரியாபன்னானி நிஸ்ஸரணம், இதரானி நிஸ்ஸரணப²லம், விவட்டஸன்னிஸ்ஸிதேன நிப்³ப³த்திதானி ஸத்³தி⁴ந்த்³ரியாதீ³னி நிஸ்ஸரணூபாயோ, இதரேஸு கானிசி பவத்திபூ⁴தானி, கானிசி பவத்திஉபாயோதி வேதி³தப்³பா³னி.

கீ²ணாஸவஸ்ஸ பா⁴வபூ⁴தோதி ச²ளங்கு³பேக்கா² விய கீ²ணாஸவஸ்ஸேவ த⁴ம்மபூ⁴தோ.

த்³வே அத்தா²தி இந்த³லிங்க³இந்த³ஸிட்ட²ட்டா². அத்தனோ பச்சயவஸேனாதி யதா²ஸகம் கம்மாதி³பச்சயவஸேன. தம்ஸஹிதஸந்தானேதி இத்தி²ந்த்³ரியஸஹிதே, புரிஸிந்த்³ரியஸஹிதே ச ஸந்தானே. அஞ்ஞாகாரேனாதி இத்தி²ஆதி³தோ அஞ்ஞேன ஆகாரேன. அனுவத்தனீயபா⁴வோ இத்தி²புரிஸிந்த்³ரியானம் ஆதி⁴பச்சந்தி யோஜனா. இமஸ்மிஞ்சத்தே²தி ஆதி⁴பச்சத்தே².

தேஸந்தி அனஞ்ஞாதஞ்ஞஸ்ஸாமீதிந்த்³ரியாதீ³னம் திண்ணம். யா ஸுக²து³க்கி²ந்த்³ரியானம் இட்டா²னிட்டா²காரஸம்போ⁴க³ரஸதா வுத்தா, ஸா ஆரம்மணஸபா⁴வேனேவ வேதி³தப்³பா³, ந ஏகச்சஸோமனஸ்ஸிந்த்³ரியாதீ³னம் விய பரிகப்பவஸேனாதி த³ஸ்ஸேந்தோ ‘‘ஏத்த² சா’’திஆதி³மாஹ.

யதி³பி புரிஸிந்த்³ரியானந்தரம் ஜீவிதிந்த்³ரியம் ரூபகண்டே³பி (த⁴. ஸ. 584) தே³ஸிதம், தம் பன ரூபஜீவிதிந்த்³ரியம், ந ச தத்த² மனிந்த்³ரியம் வத்வா இத்தி²புரிஸிந்த்³ரியானி வுத்தானி. இத⁴ பன அட்ட²கதா²யம் இந்த்³ரியானுக்கமோ வுத்தோ ஸப்³பா³காரேன யமகதே³ஸனாய ஸம்ஸந்த³தீதி த³ஸ்ஸேந்தோ ஆஹ ‘‘ஸோ இந்த்³ரியயமகதே³ஸனாய ஸமேதீ’’தி. புரிமபச்சி²மானம் அஜ்ஜ²த்திகபா³ஹிரானந்தி சக்கா²தீ³னம் புரிமானம் அஜ்ஜ²த்திகானம், இத்தி²ந்த்³ரியாதீ³னம் பச்சி²மானம் பா³ஹிரானம். தேஸம் மஜ்ஜே² வுத்தம் உப⁴யேஸம் உபகாரகதாதீ³பனத்த²ந்தி அதி⁴ப்பாயோ. தேன ஏவம்பி தே³ஸனந்தரானுரோதே⁴ன ஜீவிதிந்த்³ரியஸ்ஸ அனுக்கமம் வத்தும் வட்டதீதி த³ஸ்ஸேதி. காமஞ்சேத்த² ஏவம் வுத்தம், பரதோ பன கிச்சவினிச்ச²யே இத⁴ பாளியம் ஆக³தனியாமேனேவ மனிந்த்³ரியானந்தரம் ஜீவிதிந்த்³ரியஸ்ஸ, தத³னந்தரஞ்ச இத்தி²புரிஸிந்த்³ரியானம் கிச்சவினிச்ச²யம் த³ஸ்ஸேஸ்ஸதி. ஸப்³ப³ம் தம் து³க்க²ம் ஸங்கா²ரது³க்க²பா⁴வேன, யதா²ரஹம் வா து³க்க²து³க்க²தாதி³பா⁴வேன. து³வித⁴த்தபா⁴வானுபாலகஸ்ஸாதி ரூபாரூபவஸேன து³வித⁴ஸ்ஸ அத்தபா⁴வஸ்ஸ அனுபாலகஸ்ஸ. ரூபாரூபவஸேன து³வித⁴ம்பி ஹி ஜீவிதிந்த்³ரியம் இத⁴ க³ஹிதம். ‘‘பவத்தீ’’தி ஏதேன ஸஹஜாதத⁴ம்மானம் பவத்தனரஸேன ஜீவிதிந்த்³ரியேன வேத³யிதானம் பவத்தேதப்³ப³தம் தீ³பேதி. ‘‘பா⁴வனாமக்³க³ஸம்பயுத்த’’ந்தி இமினா ப²லபூ⁴தம் அஞ்ஞிந்த்³ரியம் நிவத்தேதி. பா⁴வனாக³ஹணஞ்சேத்த² ஸக்கா அவத்தும். ‘‘பா⁴வேதப்³ப³த்தா’’தி வுத்தத்தா பா⁴வனாபா⁴வோ பாகடோவ. த³ஸ்ஸனானந்தராதி ஸமானஜாதிபூ⁴மிகேன அப்³யவஹிததம் ஸந்தா⁴யாஹ, ந அனந்தரபச்சயம்.

தஸ்ஸாதி இந்த்³ரியபச்சயபா⁴வஸ்ஸ. அனஞ்ஞஸாதா⁴ரணத்தாதி அஞ்ஞேஹி அனிந்த்³ரியேஹி அஸாதா⁴ரணத்தா. ஏவம் ஸாமத்தி²யதோ கிச்சவிஸேஸம் வவத்த²பேத்வா பகரணதோபி தம் த³ஸ்ஸேதி ‘‘இந்த்³ரியகதா²ய ச பவத்தத்தா’’தி. அஞ்ஞேஸந்தி அஞ்ஞேஸம் இந்த்³ரியஸபா⁴வானம்பி ஸஹஜாதத⁴ம்மானம். யேஹி தே இந்த³ட்ட²ம் காரேந்தி, தேஸம் வஸவத்தாபனம் நத்தி², யதா² மனிந்த்³ரியஸ்ஸ புப்³ப³ங்க³மஸபா⁴வாபா⁴வதோ ஸயஞ்ச தே அஞ்ஞத³த்து² மனிந்த்³ரியஸ்ஸேவ வஸே வத்தந்தி. தேனாஹ ‘‘தம்ஸம்பயுத்தானிபி ஹீ’’திஆதி³. யதி³ ஏவம் கத²ம் தேஸம் இந்த³ட்டோ²தி? ‘‘ஸுக²னாதி³லக்க²ணே ஸம்பயுத்தானம் அத்தாகாரானுவிதா⁴பனமத்த’’ந்தி வுத்தோவாயமத்தோ². ‘‘சேதஸிகத்தா’’தி இமினா ஸம்பயுத்தத⁴ம்மானம் சித்தஸ்ஸ பதா⁴னதம் த³ஸ்ஸேதி. ததோ ஹி ‘‘சேதஸிகா’’தி வுச்சந்தி. ஸப்³ப³த்தா²தி வஸவத்தாபனம் ஸஹஜாதத⁴ம்மானுபாலனந்தி ஏவம் யாவ அமதாபி⁴முக²பா⁴வபச்சயதா ச ஸம்பயுத்தானந்தி தம்கிச்சனித்³தே³ஸே. ‘‘அனுப்பாத³னே, அனுபத்த²ம்பே⁴ ச ஸதீ’’தி பத³ம் ஆஹரித்வா ஸம்ப³ந்தி⁴தப்³ப³ம். ந ஹி பத³த்தோ² ஸப்³பா⁴வம் ப்³யபி⁴சரதீதி ஜனகுபத்த²ம்ப⁴கத்தாபா⁴வேபீதி வுத்தம் ஹோதி. தப்பச்சயானந்தி இத்தி²புரிஸனிமித்தாதி³பச்சயானம் கம்மாதீ³னம். தப்பவத்தனே நிமித்தபா⁴வோதி இத்தி²னிமித்தாதி³ஆகாரரூபனிப்³ப³த்தனே காரணபா⁴வோ. ஸ்வாயம் இத்தி²ந்த்³ரியாதீ³னம் தத்த² அத்தி²பா⁴வோயேவாதி த³ட்ட²ப்³ப³ம். யஸ்மிஞ்ஹி ஸதி யம் ஹோதி, அஸதி ச ந ஹோதி, தம் தஸ்ஸ காரணந்தி. ‘‘நிமித்தபா⁴வோ அனுவிதா⁴ன’’ந்தி இமினா அனுவிதா⁴னஸத்³த³ஸ்ஸ கம்மத்த²தம் த³ஸ்ஸேதி. ஸுக²து³க்க²பா⁴வப்பத்தா வியாதி ஸயம் ஸுக²து³க்க²ஸபா⁴வப்பத்தா விய, ஸுக²ந்தா து³க்க²ந்தா ச வியாதி அத்தோ². அஸந்தஸ்ஸ…பே… மஜ்ஜ²த்தாகாரானுபாபனம் அஞ்ஞாணுபேக்க²னாதி³வஸேன வேதி³தப்³ப³ம். ஸமானஜாதியந்தி அகுஸலேஹி ஸுக²து³க்கே²ஹி அகுஸலூபேக்கா²ய, அப்³யாகதேஹி அப்³யாகதூபேக்கா²ய, குஸலஸுக²தோ குஸலூபேக்கா²ய. தத்தா²பி பூ⁴மிவிபா⁴கே³னாயமத்தோ² பி⁴ந்தி³த்வா யோஜேதப்³போ³. தம் ஸப்³ப³ம் க²ந்த⁴விப⁴ங்கே³ வுத்தஓளாரிகஸுகு²மவிபா⁴கே³ன தீ³பேதப்³ப³ம். ஆதி³ஸத்³தே³னாதி ‘‘காமராக³ப்³யாபாதா³தீ³’’தி ஏத்த² வுத்தஆதி³ஸத்³தே³ன. ஸம்யோஜனஸமுச்சி²ந்த³னதது³பனிஸ்ஸயதா ஏவ ஸந்தா⁴ய அஞ்ஞாதாவிந்த்³ரியஸ்ஸ கிச்சந்தராபஸுததா வுத்தா, தஸ்ஸாபி உத்³த⁴ம்பா⁴கி³யஸம்யோஜனபடிப்பஸ்ஸத்³தி⁴ப்பஹானகிச்சதா லப்³ப⁴தேவ. அப்³யாபீபா⁴வதோ வா அஞ்ஞாதாவிந்த்³ரியஸ்ஸ படிப்பஸ்ஸத்³தி⁴ப்பஹானகிச்சம் ந வத்தப்³ப³ம், ததோ அஞ்ஞிந்த்³ரியஸ்ஸாபி தம் அட்ட²கதா²யம் அனுத்³த⁴டம். மக்³கா³னந்தரஞ்ஹி ப²லம் ‘‘தாய ஸத்³தா⁴ய அவூபஸந்தாயா’’திஆதி³வசனதோ (த⁴. ஸ. அட்ட². 505) கிலேஸானம் படிப்பஸ்ஸம்ப⁴னவஸேன பவத்ததி, ந இதரம். அஞ்ஞதா² அரியா ஸப்³ப³காலம் அப்படிப்பஸ்ஸத்³த⁴கிலேஸத³ரதா² ஸியும். இதரஸ்ஸ பன நிச்ச²ந்த³ராகே³ஸு ஸத்தவோஹாரோ விய ருள்ஹிவஸேன படிப்பஸ்ஸத்³தி⁴கிச்சதா வேதி³தப்³பா³.

ஏத்தா²ஹ – கஸ்மா பன ஏத்தகானேவ இந்த்³ரியானி வுத்தானி, ஏதானி ஏவ ச வுத்தானீதி? ஆதி⁴பச்சத்த²ஸம்ப⁴வதோதி சே. ஆதி⁴பச்சம் நாம இஸ்ஸரியந்தி வுத்தமேதம். தயித³ம் ஆதி⁴பச்சம் அத்தனோ கிச்சே ப³லவந்தி அஞ்ஞேஸம்பி ஸபா⁴வத⁴ம்மானம் லப்³ப⁴தேவ. பச்சயாதீ⁴னவுத்திகா ஹி பச்சயுப்பன்னா. தஸ்மா தே தேஹி அனுவத்தீயந்தி, தே ச தே அனுவத்தந்தீதி? ஸச்சமேதம், ததா²பி அத்தி² தேஸம் விஸேஸோ. ஸ்வாயம் விஸேஸோ ‘‘சக்கு²விஞ்ஞாணாதி³ப்பவத்தியஞ்ஹி சக்கா²தீ³னம் ஸித்³த⁴மாதி⁴பச்ச’’ந்திஆதி³னா (விப⁴. அட்ட². 219) அட்ட²கதா²யம் த³ஸ்ஸிதோயேவ.

அபிச க²ந்த⁴பஞ்சகே யாயம் ஸத்தபஞ்ஞத்தி, தஸ்ஸா விஸேஸனிஸ்ஸயோ ச² அஜ்ஜ²த்திகானி ஆயதனானீதி தானி தாவ ஆதி⁴பச்சத்த²ம் உபாதா³ய ‘‘சக்கு²ந்த்³ரியம்…பே… மனிந்த்³ரிய’’ந்திஆதி³தோ வுத்தானி. தானி பன யேன த⁴ம்மேன பவத்தந்தி, அயம் ஸோ த⁴ம்மோ தேஸம் டி²திஹேதூதி த³ஸ்ஸனத்த²ம் ஜீவிதம். தயிமே இந்த்³ரியபடிப³த்³தா⁴ த⁴ம்மா இமேஸம் வஸேன ‘‘இத்தீ², புரிஸோ’’தி வோஹரீயந்தீதி த³ஸ்ஸனத்த²ம் பா⁴வத்³வயம். ஸ்வாயம் ஸத்தஸஞ்ஞிதோ த⁴ம்மபுஞ்ஜோ பப³ந்த⁴வஸேன பவத்தமானோ இமாஹி வேத³னாஹி ஸம்கிலிஸ்ஸதீதி த³ஸ்ஸனத்த²ம் வேத³னாபஞ்சகம். ததோ விஸுத்³த⁴த்தி²கானம் வோதா³னஸம்பா⁴ரத³ஸ்ஸனத்த²ம் ஸத்³தா⁴தி³பஞ்சகம். ததோ வோதா³னஸம்பா⁴ரா இமேஹி விஸுஜ்ஜ²ந்தி, விஸுத்³தி⁴ப்பத்தா, நிட்டி²தகிச்சா ச ஹோந்தீதி த³ஸ்ஸனத்த²ம் அந்தே அனஞ்ஞாதஞ்ஞஸ்ஸாமீதிந்த்³ரியாதீ³னி தீணி வுத்தானி. ஸப்³ப³த்த² ‘‘ஆதி⁴பச்சத்த²ம் உபாதா³யா’’தி பத³ம் யோஜேதப்³ப³ம். ஏத்தாவதா அதி⁴ப்பேதத்த²ஸித்³தீ⁴தி அஞ்ஞேஸம் அக்³க³ஹணம்.

அத² வா பவத்தினிவத்தீனம் நிஸ்ஸயாதி³த³ஸ்ஸனத்த²ம்பி ஏதானி ஏவ வுத்தானி. பவத்தியா ஹி விஸேஸதோ மூலனிஸ்ஸயபூ⁴தானி ச² அஜ்ஜ²த்திகானி ஆயதனானி. யதா²ஹ ‘‘ச²ஸு லோகோ ஸமுப்பன்னோ’’திஆதி³ (ஸு. நி. 171). தஸ்ஸா உப்பத்தி இத்தி²புரிஸிந்த்³ரியேஹி. விஸபா⁴க³வத்து²ஸராக³னிமித்தா ஹி யேபு⁴ய்யேன ஸத்தகாயஸ்ஸ அபி⁴னிப்³ப³த்தி. வுத்தஞ்ஹேதம் ‘‘திண்ணம் கோ² பன, மஹாராஜ, ஸன்னிபாதா க³ப்³ப⁴ஸ்ஸாவக்கந்தி ஹோதி, இத⁴ மாதாபிதரோ ச ஸன்னிபதிதா ஹோந்தி, மாதா ச உதுனீ ஹோதி, க³ப்³போ⁴ ச பச்சுபட்டி²தோ ஹோதீ’’தி (ம. நி. 1.408; 2.411; மி. ப. 4.1.6). அவட்டா²னம் ஜீவிதிந்த்³ரியேன தேன அனுபாலேதப்³ப³தோ. தேனாஹ ‘‘ஆயு டி²தி யபனா யாபனா’’திஆதி³. உபபோ⁴கோ³ வேத³னாஹி. வேத³னாவஸேன ஹி இட்டா²தி³ஸப்³ப³விஸயுபபோ⁴கோ³. யதா²ஹ – ‘‘வேத³யதி வேத³யதீதி கோ², பி⁴க்க²வே, தஸ்மா வேத³னாதி வுச்சதீ’’தி (ஸம். நி. 3.79). ஏவம் பவத்தியா நிஸ்ஸயஸமுப்பாத³ட்டி²திஸம்போ⁴க³த³ஸ்ஸனத்த²ம் சக்கு²ந்த்³ரியம் யாவ உபேக்கி²ந்த்³ரியந்தி சுத்³த³ஸிந்த்³ரியானி தே³ஸிதானி. யதா² சேதானி பவத்தியா, ஏவம் இதரானி நிவத்தியா. விவட்டஸன்னிஸ்ஸிதேன ஹி நிப்³ப³த்திதானி ஸத்³தா⁴தீ³னி பஞ்ச இந்த்³ரியானி நிவத்தியா நிஸ்ஸயோ. உப்பாதோ³ அனஞ்ஞாதஞ்ஞஸ்ஸாமீதிந்த்³ரியேன தஸ்ஸ பட²மம் உப்பஜ்ஜனதோ. அவட்டா²னம் அஞ்ஞிந்த்³ரியேன. உபபோ⁴கோ³ அஞ்ஞாதாவிந்த்³ரியேன அக்³க³ப²லஸமுபபோ⁴க³தோ. ஏவம்பி ஏதானி ஏவ இந்த்³ரியானி தே³ஸிதானி. ஏத்தாவதா யதா²தி⁴ப்பேதத்த²ஸித்³தி⁴தோ அஞ்ஞேஸம் அக்³க³ஹணம். ஏதேனாபி நேஸம் தே³ஸனானுக்கமோபி ஸம்வண்ணிதோ வேதி³தப்³போ³.

220. குஸலாகுஸலவீரியாதீ³னீதி ஏத்த² ஆதி³-ஸத்³தே³ன குஸலஸமாதி⁴ஆதீ³னம், அப்³யாகதவீரியாதீ³னஞ்ச ஸங்க³ஹோ த³ட்ட²ப்³போ³. பச்சயாதீ³தி ஆதி³-ஸத்³தே³ன தே³ஸாரம்மணாத³யோ க³ஹிதா, யதா²வுத்தவீரியாதீ³னி, சக்கா²தீ³னி ச ஸங்க³ண்ஹாதி. இச்சேவம் ஸப்³ப³ஸங்கா³ஹிகானி வீரியிந்த்³ரியாதி³பதா³னி, சக்கு²ந்த்³ரியாதி³பதா³னி ச. தேனாதி ‘‘ஏவம் ஸந்தேபீ’’திஆதி³னா பூ⁴மிவிபா⁴க³கத²னேன. தன்னிவத்தனேனாதி ஸப்³பே³ஸம் ஸப்³ப³பூ⁴மிகத்தனிவத்தனேன. அவிஜ்ஜமானஸங்கா³ஹகத்தந்தி தஸ்ஸம் தஸ்ஸம் பூ⁴மியம் அனுபலப்³ப⁴மானஸ்ஸ இந்த்³ரியஸ்ஸ ஸங்கா³ஹகதா.

அபி⁴த⁴ம்மபா⁴ஜனீயவண்ணனா நிட்டி²தா.

2. பஞ்ஹபுச்ச²கவண்ணனா

இத⁴ இமஸ்மிம் ‘‘ஸத்திந்த்³ரியா அனாரம்மணா’’தி ஏவம் ஏகந்தானாரம்மணத்தே வுச்சமானே ந ஆப⁴ட்ட²ம் ஜீவிதிந்த்³ரியம் ந பா⁴ஸிதம். டீகாயம் பன அனாப⁴ட்ட²ந்தி கதஸமாஸம் கத்வா வுத்தம். ரூபத⁴ம்மேஸு ஸங்க³ஹிததந்தி ‘‘ரூப’’ந்தி க³ணிததம். அரூபகோட்டா²ஸேன அரூபபா⁴வேன ஸியாபக்கே² ஸங்க³ஹிதம். கஸ்மா? தஸ்ஸ பரித்தாரம்மணாதி³தா அத்தீ²தி. யஸ்மா பன ரூபாரூபமிஸ்ஸகஸ்ஸேவ வஸேன ஸியாபக்க²ஸங்க³ஹோ யுத்தோ, ந ஏகதே³ஸஸ்ஸ, தஸ்மா ஏகதே³ஸஸ்ஸ தம் அனிச்ச²ந்தோ ஆஹ ‘‘அதி⁴ப்பாயோ’’தி. இதா³னி தமத்த²ம் பகாஸேதும் ‘‘அரூபகோட்டா²ஸேன பனா’’திஆதி³ வுத்தம். நவத்தப்³ப³தாதி பரித்தாரம்மணாதி³பா⁴வேன நவத்தப்³ப³தா. கத²ம் பன ரூபகோட்டா²ஸேனஸ்ஸானாரம்மணஸ்ஸ நவத்தப்³ப³தாதி சோத³னம் ஸந்தா⁴யாஹ ‘‘ந ஹி அனாரம்மண’’ந்திஆதி³. ‘‘அவிஜ்ஜமானாரம்மணானாரம்மணேஸூ’’தி இமினா ‘‘அனாரம்மணா’’தி பா³ஹிரத்த²ஸமாஸோ அயந்தி த³ஸ்ஸேதி. நவத்தப்³பே³ஸூதி ஸாரம்மணபா⁴வேன நவத்தப்³பே³ஸு. அனாரம்மணத்தாதி ஆரம்மணரஹிதத்தா. ‘‘நவிந்த்³ரியா ஸியா பரித்தாரம்மணா, ஸியா மஹக்³க³தாரம்மணா, ஸியா அப்பமாணாரம்மணா, ஸியா ந வத்தப்³பா³ ‘பரித்தாரம்மணா’திபி ‘மஹக்³க³தாரம்மணா’திபி ‘அப்பமாணாரம்மணா’திபீ’’திஆதீ³ஸு (விப⁴. 223) விய ந ஸாரம்மணஸ்ஸேவ நவத்தப்³ப³தம் த³ஸ்ஸேதி. யதா² ச ந ஸாரம்மணஸ்ஸேவ நவத்தப்³ப³தாபரியாயோ, அத² கோ² அனாரம்மணஸ்ஸாபீதி ஸாரம்மணே நியமாபா⁴வோ. ஏவம் நவத்தப்³ப³ம் ஸாரம்மணமேவாதி அயம்பி நியமோ நத்தீ²தி த³ஸ்ஸேந்தோ ‘‘நவத்தப்³ப³ஸ்ஸ வா ஸாரம்மணத’’ந்தி ஆஹ. தஸ்ஸ ந த³ஸ்ஸேதீதி ஸம்ப³ந்தோ⁴. ‘‘ந ஹீ’’திஆதி³னா தமேவத்த²ம் விவரதி.

தத்த² ரூபனிப்³பா³னானம் ஸுகா²தி³ஸம்பயுத்தபா⁴வேன நவத்தப்³ப³தா, ந பரித்தாரம்மணாதி³பா⁴வேனாதி சோத³னம் மனஸி கத்வா ஆஹ ‘‘அதா²பீ’’திஆதி³. தத்த² அதா²பி வத்ததீதி ஸம்ப³ந்தோ⁴. ஸியா அனாரம்மணந்திபி வத்தப்³ப³ம் ஸியாதி அனாரம்மணம் த⁴ம்மாயதனம் ஸாரம்மணேஹி விஸும் கத்வா ஏவம் வத்தப்³ப³ம் ஸியா. நவத்தப்³ப³-ஸத்³தோ³ யதி³ ஸாரம்மணேஸ்வேவ வத்தேய்ய, ந சேவம் வுத்தம், அவசனே ச அஞ்ஞம் காரணம் நத்தீ²தி த³ஸ்ஸேந்தோ ஆஹ ‘‘ந ஹி பஞ்ஹபுச்ச²கே ஸாவஸேஸா தே³ஸனா அத்தீ²’’தி. தஸ்மா நவத்தப்³ப³-ஸத்³தோ³ அனாரம்மணேஸுபி வத்ததேவாதி அதி⁴ப்பாயோ. யாபி ‘‘அட்டி²ந்த்³ரியா ஸியா அஜ்ஜ²த்தாரம்மணா’’தி அஜ்ஜ²த்தாரம்மணாதி³பா⁴வேன நவத்தப்³ப³தா வுத்தா, ஸா ஜீவிதிந்த்³ரியஸ்ஸ ஆகிஞ்சஞ்ஞாயதனகாலே பட²மாருப்பவிஞ்ஞாணாபா⁴வமத்தாரம்மணதம் ஸந்தா⁴ய வுத்தா, ந ஸாரம்மணஸ்ஸேவ நவத்தப்³ப³தாத³ஸ்ஸனத்த²ம், நாபி அனாரம்மணஸ்ஸ பரித்தாரம்மணாதி³பா⁴வேன நவத்தப்³ப³தாபா⁴வத³ஸ்ஸனத்த²ந்தி த³ஸ்ஸேந்தோ ‘‘அட்டி²ந்த்³ரியா ஸியா அஜ்ஜ²த்தாரம்மணாதி ஏத்த² சா’’திஆதி³மாஹ. தத்த² ஸியா அஜ்ஜ²த்தாரம்மணாதீதி இதி-ஸத்³தோ³ ஆதி³அத்தோ². தேன அவஸிட்ட²பாளிஸங்க³ண்ஹனேன ‘‘ஸியா ந வத்தப்³பா³ ‘அஜ்ஜ²த்தாரம்மணா’திபி ‘ப³ஹித்³தா⁴ரம்மணா’திபி ‘அஜ்ஜ²த்தப³ஹித்³தா⁴ரம்மணா’திபீ’’தி இமாய பாளியா வுத்தமத்த²ம் ஜீவிதிந்த்³ரியஸ்ஸ த³ஸ்ஸேந்தோ ‘‘ஜீவிதிந்த்³ரியஸ்ஸ…பே… நவத்தப்³ப³தா வேதி³தப்³பா³’’தி ஆஹ, தம் வுத்தத்த²மேவ.

பஞ்ஹபுச்ச²கவண்ணனா நிட்டி²தா.

இந்த்³ரியவிப⁴ங்க³வண்ணனா நிட்டி²தா.