14. ஸிக்கா²பத³விப⁴ங்கோ³

1. அபி⁴த⁴ம்மபா⁴ஜனீயவண்ணனா

703. ஸிக்கா²ஸங்கா²தானம் குஸலத⁴ம்மானம் பஞ்ச ஸீலங்கா³னி நிஸ்ஸயபா⁴வேன வா பதிட்டா² ஸியும், உபனிஸ்ஸயபா⁴வேன வாதி தது³ப⁴யம் த³ஸ்ஸேந்தோ ஆஹ ‘‘ஸம்பயோக³வஸேன, உபனிஸ்ஸயவஸேன ச ஓகாஸபா⁴வேனா’’தி.

704. ‘‘கம்மபதா² ஏவா’’தி நியமஸ்ஸ கதத்தா வுத்தம் ‘‘அஸப்³ப³ஸாதா⁴ரணேஸூ’’தி. ந ஹி ஸக்கா இந்த்³ரியாதி³ஸாதா⁴ரணகோட்டா²ஸவஸேன நியமம் காதும். கம்மபத²கோட்டா²ஸிகா ஏவ, ந ஜா²னாதி³கோட்டா²ஸிகா. கம்மபத²பா⁴வேன ஆக³தந்தி வத³ந்தி, து³க்³க³தியா, தத்த² உப்பஜ்ஜனது³க்க²ஸ்ஸ ச பவத்திஉபாயபா⁴வதோதி அதி⁴ப்பாயோ. அஸ்ஸ ஸுராபானஸ்ஸ. உபகாரகத்தம் ஸப்³பே³ஸம். ஸபா⁴க³த்தம் மிச்சா²சாரஸ்ஸ.

ததா²க³ஹிதஸங்கா²ராரம்மணதாயாதி ‘‘ஸத்தம் அவஹராமி, ஸத்தே விப்படிபஜ்ஜாமீ’’திஆதி³னா ஸத்தாகாரேன க³ஹிதஸங்கா²ராரம்மணதாய, ந பன ஸத்தபஞ்ஞத்திஆரம்மணதாயாதி அதி⁴ப்பாயோ. ‘‘பஞ்ச ஸிக்கா²பதா³’’திஆதி³னா தமேவத்த²ம் விவரதி.

தஸ்ஸ தஸ்ஸாதி யஸ்ஸ யஸ்ஸ ப்³யஸனத்தா²ய. ஸயம் வா உஸுஆதி³ம் கி²பதி, ஓபாதக²ணனாதி³ம் கரோதி, தாதி³ஸம் மந்தம் பரிஜப்பதி, கம்மஜஇத்³தி⁴ம் வளஞ்ஜேதி, அஞ்ஞேன வா தம் ஸப்³ப³ம் காரேதீதி ஆஹ ‘‘நிஸ்ஸக்³கி³ய…பே… த்³வே ஏவ க³ஹிதா’’தி.

யதி³பி கோட்டா²ஸவாரே விரதி ஸரூபேன நாக³தா ‘‘யேவாபனா’’த்வேவ வுத்தா, ப⁴ஜாபியமானா பன மக்³க³பா⁴வம்யேவ ப⁴ஜதீதி ஆஹ ‘‘விரதிஸீலம் பன மக்³க³கோட்டா²ஸிக’’ந்தி. ஸேஸஸீலானந்தி ஸேஸஅவீதிக்கந்தஸீலானம்.

712. அப⁴ப்³ப³ட்டா²னாதி பாணாதிபாதாத³யோ. யதா² பாணாதிபாதாத³யோ வேரஹேதுதாய வேரம், ஏவம் தத³ஞ்ஞேபி அகுஸலாதி வுத்தம் ‘‘தம்ஸபா⁴க³தாய வேரபூ⁴தான’’ந்தி. விரதீனம் உப்பத்தி ந ந ப⁴விஸ்ஸதி ஸேக்கா²னந்தி யோஜனா. ‘‘அகுஸலஸமுட்டி²தானி சா’’திஆதி³னாபி ஸேக்கா²னம் உப⁴யேன விரதிஸப்³பா⁴வம்யேவ விபா⁴வேதி. தஸ்ஸத்தோ² – யானி அகுஸலஸமுட்டி²தானி காயகம்மாதீ³னி, தானி தேஸம் ஸேக்கா²னம் காயது³ச்சரிதாதீ³னீதி வேரானியேவ, தேஹி வேரேஹி தேஸம் ஸேக்கா²னம் விரதியோ ஸம்ப⁴வந்தியேவ. யதோதி யஸ்மா பாணாதிபாதாதி³விரமிதப்³ப³னிப்பரியாயவேராபா⁴வேபி காயது³ச்சரிதாதி³வேரமத்ததோ ஸேக்கா²னம் விரதிஸம்ப⁴வதோ. நப²லபூ⁴தஸ்ஸாபீதி யதா² ப²லஸ்ஸ மக்³க³படிபி³ம்ப³பூ⁴தத்தா மக்³க³ஸதி³ஸம் ஸத்தஅட்ட²ங்கி³கதா ஸியா, ஏவம் அப²லபூ⁴தஸ்ஸாபி ஸகதா³கா³மிமக்³கா³தி³கஸ்ஸ யதோ விரதிஸம்ப⁴வதோ அட்ட²ங்கி³கதா ஹோதி, அஞ்ஞதா² பஞ்சங்கி³கோ ஏவ ஸியாதி அதி⁴ப்பாயோ.

அபி⁴த⁴ம்மபா⁴ஜனீயவண்ணனா நிட்டி²தா.

2. பஞ்ஹபுச்ச²கவண்ணனா

714. யதா²விரமிதப்³ப³தோதி யோ யோ பாணாதிபாதாதி³ விரமிதப்³போ³, ததோ விரதிவஸேன.

பஞ்ஹபுச்ச²கவண்ணனா நிட்டி²தா.

ஸிக்கா²பத³விப⁴ங்க³வண்ணனா நிட்டி²தா.