12. ஜா²னவிப⁴ங்கோ³

1. ஸுத்தந்தபா⁴ஜனீயம்

மாதிகாவண்ணனா

508. பாதிமோக்க²ஸம்வராதீ³தி ஆதி³-ஸத்³தே³ன இந்த்³ரியேஸு கு³த்தத்³வாரதா, போ⁴ஜனே மத்தஞ்ஞுதா, ஸதிஸம்பஜஞ்ஞம், ஜாக³ரியானுயோகோ³தி ஏவமாதி³கே ஸங்க³ண்ஹாதி. அஸுபா⁴னுஸ்ஸதியோதி அஸுப⁴ஜா²னானி, அனுஸ்ஸதிஜா²னானி ச. ஸதி ஸமணபா⁴வகரபுப்³ப³பா⁴க³கரணீயஸம்பத்தியம் ஸமணபா⁴வோபி ஸித்³தோ⁴யேவ ஹோதீதி ஆஹ ‘‘ஸுஞ்ஞா…பே… த³ஸ்ஸேதீ’’தி. காரணே ஹி ஸித்³தே⁴ ப²லம்பி ஸித்³த⁴மேவ ஹோதீதி. ஸிக்கா²பதா³னம் ஸரூபம், ஸிக்கி²தப்³பா³காரம், ஸங்கே²பதோ விபா⁴க³ஞ்ச த³ஸ்ஸேதும் ‘‘ஸிக்கா²பதே³ஸூ’’திஆதி³ வுத்தம். தத்த² நாமகாயாதி³வஸேனாதி நாமகாயபத³காயப்³யஞ்ஜனகாயவஸேன வுத்தேஸு. இமினா ஸிக்கா²பதா³னம் ஸிக்கா²ய அதி⁴க³மூபாயபூ⁴தபஞ்ஞத்திஸபா⁴வதம் த³ஸ்ஸேதி. தேஸு ஸிக்கி²தப்³பா³காரோ ஸத்து²ஆணானதிக்கமோயேவாதி ஆஹ ‘‘வச…பே… தப்³பே³ஸூ’’தி. ஸிக்கா²கோட்டா²ஸேஸூதி வுத்தப்பபே⁴தே³ஸு அதி⁴ஸீலஸிக்கா²பா⁴கே³ஸு. தேஸு ஸமாதா³னமேவ ஸிக்கி²தப்³பா³காரோதி வுத்தம் ‘‘பரிபூரணவஸேன ஸிக்கி²தப்³பே³ஸூ’’தி. ஸிக்கா²பதே³கதே³ஸபூ⁴தாதி ஸிக்கா²பத³ஸமுதா³யஸ்ஸ அவயவபூ⁴தா. பி⁴க்கு²ஸிக்கா² ஹி இதா⁴தி⁴ப்பேதா ‘‘இத⁴ பி⁴க்கூ²’’தி வுத்தத்தா. ததா² ஹி வக்க²தி ‘‘ஸேஸஸிக்கா² பன அத்து²த்³தா⁴ரவஸேன ஸிக்கா²ஸத்³த³ஸ்ஸ அத்த²த³ஸ்ஸனத்த²ம் வுத்தா’’தி (விப⁴. அட்ட². 516).

மாதிகாவண்ணனா நிட்டி²தா.

நித்³தே³ஸவண்ணனா

509. தி³ட்ட²த்தாதி ஸயம்பூ⁴ஞாணேன ஸச்சி²கதத்தா. க²ந்திஆதீ³ஸுபி ஏஸேவ நயோ. ஸயம்பூ⁴ஞாணேன ஸச்சி²கரணவஸேனேவ ஹி ப⁴க³வதோ க²மனருச்சனாத³யோ, ந அஞ்ஞேஸம் விய அனுஸ்ஸவாகாரபரிவிதக்காதி³முகே²ன. அவிபரீதட்டோ² ஏகந்தனிய்யானட்டே²ன வேதி³தப்³போ³. ஸிக்கி²யமானோதி ஸிக்கா²ய படிபஜ்ஜியமானோ. ஸிக்கி²தப்³பா³னி ஸிக்கா²பதா³னீதி ஸிக்கா²பத³பாளிம் வத³தி. க²ந்த⁴த்தயந்தி ஸீலாதி³க்க²ந்த⁴த்தயம். ‘‘ஸப்³ப³பாபஸ்ஸ…பே… பு³த்³தா⁴ன ஸாஸன’’ந்தி (த⁴. ப. 183; தீ³. நி. 1.90; நேத்தி. 30) வசனதோ ஆஹ ‘‘அனுஸாஸனதா³னபூ⁴தம் ஸிக்க²த்தய’’ந்தி.

ஸம்மாதி³ட்டி²யா பச்சயத்தாதி மக்³க³ஸம்மாதி³ட்டி²யா ஏகந்தஹேதுபா⁴வதோ. ஏத்த² ச ஸம்மாதி³ட்டீ²தி கம்மஸ்ஸகதாஸம்மாதி³ட்டி², கம்மபத²ஸம்மாதி³ட்டி² ச. ப²லகாரணோபசாரேஹீதி ப²லூபசாரேன ஸம்மாதி³ட்டி²பச்சயத்தா, காரணூபசாரேன ஸம்மாதி³ட்டி²புப்³ப³ங்க³மத்தா. குஸலத⁴ம்மேஹி அத்தனோ ஏகதே³ஸபூ⁴தேஹீதி ஸம்மாதி³ட்டி²த⁴ம்மே ஸந்தா⁴யாஹ. குஸலபஞ்ஞாவிஞ்ஞாணானம் வா பஜானனவிஜானனவஸேன த³ஸ்ஸனம் தி³ட்டீ²தி. தேன அவயவத⁴ம்மேன ஸமுதா³யஸ்ஸ உபசரிததம் த³ஸ்ஸேதி. வினயனகிரியத்தாதி தே³ஸனாபூ⁴தம் ஸிக்க²த்தயமாஹ. த⁴ம்மேனாதி த⁴ம்மதோ அனபேதேன. அவிஸமஸபா⁴வேனாதி அவிஸமேன ஸபா⁴வேன, ஸமேனாதி அத்தோ².

510. அனஞ்ஞத்தே²னாதி க³ரஹாதி³அஞ்ஞத்த²ரஹிதேன ஸகத்தே²ன. பி⁴ன்னபடத⁴ரேதி பி⁴க்கு²ஸாருப்பவஸேன பஞ்சக²ண்டா³தி³னா சே²தே³ன சி²ன்னசீவரத⁴ரே.

பே⁴த³னபரியாயவஸேன வுத்தம், தஸ்மா கிலேஸானம் பஹானா கிலேஸானம் பே⁴தா³ பி⁴க்கூ²தி வுத்தம் ஹோதி.

கு³ணவஸேனாதி ஸேக்க²த⁴ம்மாதி³கு³ணானம் வஸேன. தேன பா⁴வத்த²தோ பி⁴க்கு²ஸத்³தோ³ த³ஸ்ஸிதோ ஹோதி.

இத³ம் த்³வயந்தி ‘‘ஏத்த² சா’’திஆதி³னா பரதோ ஸங்க³ஹத³ஸ்ஸனவஸேன வுத்தம் ‘‘ஸேக்கோ²’’திஆதி³கம் வசனத்³வயம். இமினாதி ‘‘ஸேக்கோ² பி⁴க்கு² பி⁴ன்னத்தா பாபகான’’ந்தி பதா³னம் அத்த²த³ஸ்ஸனேன. ந ஸமேதி ஸேக்க²அஸேக்க²புது²ஜ்ஜனாஸேக்க²தீ³பனதோ. ததி³த³ந்தி பட²மத்³வயம். நிப்பரியாயத³ஸ்ஸனம் அரியானம், அஸேக்கா²னம்யேவ ச ஸேக்க²பி⁴ன்னகிலேஸபா⁴வதீ³பனதோ. வுத்தோதி படிஞ்ஞாவசனம், ஸச்சம் வுத்தோதி அத்தோ². ந பன இதா⁴தி⁴ப்பேதோ அத்து²த்³தா⁴ரவஸேன த³ஸ்ஸிதத்தா.

ப⁴க³வதோ வசனந்தி உபஸம்பதா³கம்மவாசமாஹ. தத³னுரூபந்தி தத³னுச்ச²விகம், யதா²வுத்தந்தி அத்தோ². பரிஸாவத்து²ஸீமாஸம்பத்தியோ ‘‘ஸமக்³கே³ன ஸங்கே⁴ன அகுப்பேனா’’தி (விப⁴. 510) இமினா பகாஸிதாதி ‘‘டா²னாரஹ’’ந்தி பத³ஸ்ஸ ‘‘அனூன…பே… அவுத்த’’ந்தி ஏத்தகமேவ அத்த²மாஹ.

511. அவீதிக்கமனவிரதிபா⁴வதோதி அவீதிக்கமஸமாதா³னபூ⁴தா விரதீதி கத்வா வாரித்தஸீலம் பத்வா விரதி ஏவ பதா⁴னந்தி சேதனாஸீலஸ்ஸபி பரியாயதா வுத்தா. ‘‘நக³ரவட்³ட⁴கீ வத்து²விஜ்ஜாசரியோ’’தி இத³ம் இதா⁴தி⁴ப்பேதனக³ரவட்³ட⁴கீத³ஸ்ஸனம். வத்து²விஜ்ஜா, பாஸாத³விஜ்ஜாதி து³விதா⁴ ஹி வட்³ட⁴கீவிஜ்ஜா. லேஹிதப்³ப³ந்தி ஸாயிதப்³ப³ம். சுபி³தப்³ப³ந்தி பாதப்³ப³ம்.

இந்த்³ரியஸம்வராஹாரத்தாதி இந்த்³ரியஸம்வரஹேதுகத்தா. பாதிமோக்க²ஸீலம் ஸிக்கா²பத³ஸீலம் ந பகதிஸீலாதி³கேன க³ய்ஹதீதி ஆஹ ‘‘பாதிமோக்க²தோ அஞ்ஞம் ஸீலம் காயிகஅவீதிக்கமாதி³க்³க³ஹணேன க³ஹித’’ந்தி. தம் பன பாதிமோக்க²ஸீலேன ந ஸங்க³ய்ஹதீதி ந ஸக்கா வத்தும், காயிகவாசஸிகஸம்வரஸ்ஸ தப்³பி³னிமுத்தஸ்ஸ அபா⁴வதோதி த³ஸ்ஸேந்தோ ‘‘இமினா அதி⁴ப்பாயேன வுத்த’’ந்தி ஆஹ.

தத்த² பாதிமோக்க²ஸத்³த³ஸ்ஸ ஏவம் அத்தோ² வேதி³தப்³போ³ – கிலேஸானம் ப³லவபா⁴வதோ, பாபகிரியாய ஸுகரபா⁴வதோ, புஞ்ஞகிரியாய ச து³க்கரபா⁴வதோ ப³ஹுக்க²த்தும் அபாயேஸு பதனஸீலோதி பாதீ, புது²ஜ்ஜனோ, அனிச்சதாய வா ப⁴வாதீ³ஸு கம்மவேக³க்கி²த்தோ க⁴டியந்தம் விய அனவட்டா²னேன பரிப்³ப⁴மனதோ க³மனஸீலோதி பாதீ, மரணவஸேன வா தம்ஹி தம்ஹி ஸத்தனிகாயே அத்தபா⁴வஸ்ஸ பாதனஸீலோதி பாதீ, ஸத்தஸந்தானோ, சித்தமேவ வா. தம் பாதினம் ஸம்ஸாரது³க்க²தோ மோக்கே²தீதி பாதிமோக்க²ம். சித்தஸ்ஸ ஹி விமோக்கே²ன ஸத்தோபி ‘‘விமுத்தோ’’தி வுச்சதி. வுத்தஞ்ஹி ‘‘சித்தவோதா³னா விஸுஜ்ஜ²ந்தீ’’தி (ஸம். நி. 3.100), ‘‘அனுபாதா³ய ஆஸவேஹி சித்தம் விமுத்த’’ந்தி (மஹாவ. 28) ச. அத² வா அவிஜ்ஜாதி³னா ஹேதுனா ஸம்ஸாரே பததி க³ச்ச²தி பவத்ததீதி பாதீ. ‘‘அவிஜ்ஜானீவரணானம் ஸத்தானம் தண்ஹாஸம்யோஜனானம் ஸந்தா⁴வதம் ஸம்ஸரத’’ந்தி (ஸம். நி. 2.124; 3.99; 5.520; கதா². 75) ஹி வுத்தம். தஸ்ஸ பாதினோ ஸத்தஸ்ஸ தண்ஹாதி³ஸம்கிலேஸத்தயதோ மோக்கோ² ஏதேனாதி பாதிமோக்க²ம். ‘‘கண்டே²காளோ’’திஆதீ³னம் விய தஸ்ஸ ஸமாஸஸித்³தி⁴ வேதி³தப்³பா³.

அத² வா பாதேதி வினிபாதேதி து³க்கே²தி பாதி, சித்தம். வுத்தஞ்ஹி ‘‘சித்தேன நீயதி லோகோ, சித்தேன பரிகஸ்ஸதீ’’தி (ஸம். நி. 1.62). தஸ்ஸ பாதினோ மோக்கோ² ஏதேனாதி பாதிமோக்க²ம். பததி வா ஏதேன அபாயது³க்கே² வா ஸம்ஸாரது³க்கே² வாதி பாதீ, தண்ஹாதி³ஸம்கிலேஸோ. வுத்தஞ்ஹி ‘‘தண்ஹா ஜனேதி புரிஸம் (ஸம். நி. 1.55-57), தண்ஹாது³தியோ புரிஸோ’’தி (இதிவு. 15; மஹானி. 191; சூளனி. பாராயனானுகீ³திகா³தா² நித்³தே³ஸ 107) ச ஆதி³. ததோ மோக்கோ²தி பாதிமோக்க²ம்.

அத² வா பததி ஏத்தா²தி பாதீனி, ச² அஜ்ஜ²த்திகபா³ஹிரானி ஆயதனானி. வுத்தஞ்ஹி ‘‘ச²ஸு லோகோ ஸமுப்பன்னோ, ச²ஸு குப்³ப³தி ஸந்த²வ’’ந்தி (ஸம். நி. 1.70; ஸு. நி. 171). ததோ ச²அஜ்ஜ²த்திகபா³ஹிராயதனஸங்கா²ததோ பாதிதோ மோக்கோ²தி பாதிமோக்க²ம்.

அத² வா பாதோ வினிபாதோ அஸ்ஸ அத்தீ²தி பாதீ, ஸம்ஸாரோ, ததோ மோக்கோ²தி பாதிமோக்க²ம்.

அத² வா ஸப்³ப³லோகாதி⁴பதிபா⁴வதோ த⁴ம்மிஸ்ஸரோ ப⁴க³வா ‘‘பதீ’’தி வுச்சதி, முச்சதி ஏதேனாதி மோக்கோ², பதினோ மோக்கோ² தேன பஞ்ஞத்தத்தாதி பதிமோக்கோ², பதிமோக்கோ² ஏவ பாதிமோக்க²ம். ஸப்³ப³கு³ணானம் வா மூலபா⁴வதோ உத்தமட்டே²ன பதி ச ஸோ யதா²வுத்தேனத்தே²ன மோக்கோ² சாதி பதிமோக்கோ², பதிமோக்கோ² ஏவ பாதிமோக்க²ம். ததா² ஹி வுத்தம் ‘‘பாதிமோக்க²ந்தி முக²மேதம் பமுக²மேத’’ந்தி (மஹாவ. 135) வித்தா²ரோ.

அத² வா ப-இதி பகாரே, அதீதி அச்சந்தத்தே² நிபாதோ, தஸ்மா பகாரேஹி அச்சந்தம் மோக்கே²தீதி பாதிமோக்க²ம். இத³ஞ்ஹி ஸீலம் ஸயம் தத³ங்க³வஸேன, ஸமாதி⁴ஸஹிதம் பஞ்ஞாஸஹிதஞ்ச விக்க²ம்ப⁴னவஸேன ஸமுச்சே²த³வஸேன ச அச்சந்தம் மோக்கே²தி மோசேதீதி பாதிமோக்க²ம். பதி பதி மோக்கோ²தி வா பதிமோக்கோ², தம்ஹா தம்ஹா வீதிக்கமதோ³ஸதோ பச்சேகம் மோக்கோ²தி அத்தோ², பதிமோக்கோ²யேவ பாதிமோக்க²ம். மோக்கோ² வா நிப்³பா³னம், தஸ்ஸ மோக்க²ஸ்ஸ படிபி³ம்ப³பூ⁴தோதி பதிமோக்க²ம். ஸீலஸம்வரோ ஹி நிப்³பே³த⁴பா⁴கி³யோ ஸூரியஸ்ஸ அருணுக்³க³மனம் விய நிப்³பா³னஸ்ஸ உத³யபூ⁴தோ தப்படிபா⁴கோ³ விய ஹோதி யதா²ரஹம் கிலேஸனிப்³பா³பனதோதி பதிமோக்க²ம், பதிமோக்க²ம்யேவ பாதிமோக்க²ம்.

அத² வா மோக்க²ம் பதி வத்ததி, மோக்கா²பி⁴முக²ந்தி வா பதிமோக்க²ம், பதிமோக்க²ம்யேவ பாதிமோக்க²ந்தி. இத³ம்பி பாதிமோக்க²ஸத்³த³ஸ்ஸ முக²மத்தத³ஸ்ஸனமேவ. ஸப்³பா³கஆரேன பன ஜினபாதிமோக்கோ² ப⁴க³வாவ அனவஜ்ஜபதிமோக்க²ம் பாதிமோக்க²ம் ஸம்வண்ணேய்ய.

513. க³ருப⁴ண்ட³விஸ்ஸஜ்ஜனகரணபூ⁴தம் ஏதஸ்ஸ அத்தீ²தி க³ருப⁴ண்ட³விஸ்ஸஜ்ஜனம். க³ருப⁴ண்ட³ந்தரபூ⁴தம் தா²வராதி³. ஊனகம் ந வட்டதீதி பா²திகம்மம் வுத்தம். அதிரேகக்³க⁴னகம், தத³க்³க⁴னகமேவ வா வட்டதீதி. யதா²வுத்தந்தி போக்க²ரணிதோ பம்ஸுஉத்³த⁴ரணாதி³தா²வரகம்மம்.

தா⁴ரேதி, போஸேதி வா பரேஸம் தா³ரகே.

கி³ஹீனம் கரியமானம் வுத்தம், ந ஸங்க⁴ஸ்ஸ, க³ணஸ்ஸ வாதி அத்தோ². பிண்ட³படிபிண்ட³ந்தி உத்தரபத³லோபம், புரிமபதே³ உத்தரபத³லோபஞ்ச கத்வா நித்³தே³ஸோதி ஆஹ ‘‘பிண்ட³த்த²’’ந்திஆதி³. அயோனிஸோ விசாரணம் அயாதா²வபடிபத்தி.

514. க³ச்ச²ந்தி யதா²ஸகம் விஸயே பவத்தந்தீதி கா³வோ, சக்கா²தீ³னி இந்த்³ரியானி.

விது⁴னனம் பப்போ²டனம், பவாஹனந்தி அத்தோ².

515. யதா² கரணத்தோ² கரணீயஸத்³தோ³, ஏவம் விகிரணத்தோ²பி ஹோதீதி ஆஹ ‘‘விக்கி²பிதப்³பா³னீ’’தி, வித்³த⁴ம்ஸிதப்³பா³னீதி அத்தோ². ஸம்யமனீயானி வா ஸம்யமகரணீயானி, ‘‘ந புன ஏவம் கரோமீ’’தி அத்தனோ த³ஹனம் மனஸா அதி⁴ட்டா²னம் ஸம்யமனம், ஸம்யமனகரணீயானி ஸம்வரகரணீயானீதி சித்தமத்தாயத்தா ஏவ ஸம்யமஸம்வரா ஆசரியேன அதி⁴ப்பேதாதி ஆஹ ‘‘அனாபத்திக³மனீயானீ’’தி. அந்தேவாஸிகத்தே²ரோ பன தே³ஸனாபி சித்துப்பாத³மனஸிகாரேஹி வினா ந ஹோதீதி தே³ஸனாவிஸுத்³தி⁴ம் நிஸ்ஸரணம் வத³தி.

516. ‘‘அலங்கதோ சேபி…பே… ஸ பி⁴க்கூ²’’திஆதீ³ஸு (த⁴. ப. 142) விய இதா⁴பி கு³ணதோ பி⁴க்கு² அதி⁴ப்பேதோ. ததா² ச வுத்தம் ‘‘இத⁴ பி⁴க்கூ²தி படிபத்தியா பி⁴க்கு²பா⁴வத³ஸ்ஸனதோ ஏவமாஹா’’தி (விப⁴. அட்ட². 355). யத்தகம் ஏகேன புக்³க³லேன அஸேஸேத்வா ஸமாதா³தும் ஸக்கா, தம் ஸந்தா⁴யாஹ ‘‘யேன ஸமாதா³னேன ஸப்³பா³பி ஸிக்கா² ஸமாதி³ன்னா ஹோந்தீ’’தி யதா² உபஸம்பதா³பாரிபூரியா அஸேஸம் உபஸம்பன்னஸிக்கா²ஸமாதா³னம். தந்தி ஸமாதா³னம். அனேகேஸூதி விஸும் விஸும் ஸமாதா³னேஸு. யதா² ஸமாதி³ன்னாய ஸிக்கா²ய ஸப்³பே³ன ஸப்³ப³ம் அவீதிக்கமனம் ஸிக்கி²தப்³பா³காரோ, ஏவம் ஸதி வீதிக்கமே தே³ஸனாகா³மினியா தே³ஸனா, வுட்டா²னகா³மினியா வுட்டா²னம் தது³பாயபூ⁴தம் பாரிவாஸிகவத்தசரணாதீ³தி வுத்தம் ‘‘அவீதி…பே… ஆகாரேனா’’தி. யம் ஸிக்கா²பத³ம் பமாதே³ன வீதிக்கந்தம், தம் ஸிக்கி²யமானம் ந ஹோதீதி ஸேஸிதம் நாம ஹோதீதி ஆஹ ‘‘வீதிக்கமனவஸேன ஸேஸஸ்ஸா’’தி.

519. சித்தபரிஸோத⁴னபா⁴வனாதி சித்தஸ்ஸ பரிஸோத⁴னபூ⁴தா ஆவரணீயத⁴ம்மவிக்க²ம்பி⁴கா ஸமாதி⁴விபஸ்ஸனாபா⁴வனா சித்தபரிஸோத⁴னபா⁴வனா. ஸுப்பபரிக்³கா³ஹகந்தி நித்³தா³பரிக்³கா³ஹகம். இத³ந்தி இத³ம் அப்³போ³கிண்ணப⁴வங்கோ³த்தரணஸங்கா²தம் கிரியமயசித்தானம் அப்பவத்தனம் ஸுப்பம் நாம. இதோ ப⁴வங்கோ³த்தரணதோ. புப்³பே³ இதோ கிரியமயசித்தப்பவத்திதோ பரஞ்ச நத்தி². அயம் காயகிலமதோ², தி²னமித்³த⁴ஞ்ச ஏதஸ்ஸ ஸுத்தஸ்ஸ பச்சயோ.

522. ஸதிபட்டா²னாத³யோதி ஸதிபட்டா²னஸம்மப்பதா⁴னஇத்³தி⁴பாதா³, ஏகச்சே ச மக்³க³த⁴ம்மா ஸஹ ந பவத்தந்தி, தஸ்மா பாளியம் ந வுத்தாதி அதி⁴ப்பாயோ. ஏதே தாவ ஏகஸ்மிம் ஆரம்மணே ஸஹ ந பவத்தந்தீதி ந க³ண்ஹேய்யும், இந்த்³ரியப³லானி கஸ்மா ந க³ஹிதானீதி ஆஹ ‘‘பவத்த…பே… ஹோந்தீ’’தி. ஏவம்பி ஸத்³தி⁴ந்த்³ரியப³லானி போ³ஜ்ஜ²ங்கே³ஹி ந ஸங்க³ய்ஹந்தீதி கத²ம் தேஸம் தத³ந்தோக³த⁴தாதி சோத³னம் ஸந்தா⁴யாஹ ‘‘பீதி…பே… வுத்தத்தா’’தி.

523. ஸமந்ததோதி ஸப்³ப³பா⁴கே³ஸு ஸப்³பே³ஸு அபி⁴க்கமாதீ³ஸு, ஸப்³ப³பா⁴க³தோ வா தேஸு ஏவ அபி⁴க்கமாதீ³ஸு அத்தா²னத்தா²தி³ஸப்³ப³பா⁴க³தோ ஸப்³பா³காரதோ. ஸம்மாதி அவிபரீதம் யோனிஸோ. ஸமந்தி அவிஸமம், இட்டா²தி³ஆரம்மணே ராகா³தி³விஸமரஹிதம் கத்வாதி அத்தோ².

பி⁴க்கா² சரீயதி ஏத்தா²தி பி⁴க்கா²சாரோ, பி⁴க்கா²ய சரணட்டா²னம், ஸோ ஏவ கோ³சரோ, பி⁴க்கா²ய சரணமேவ வா ஸம்பஜஞ்ஞஸ்ஸ விஸயபா⁴வதோ கோ³சரோ, தஸ்மிம் பி⁴க்கா²சாரகோ³சரே. ஸோ பன அபி⁴க்கமாதி³பே⁴த³பி⁴ன்னந்தி விஸேஸனவஸேன வுத்தம் ‘‘அபி⁴க்கமாதீ³ஸு பனா’’தி. கம்மட்டா²னஸங்கா²தேதி யோக³கம்மஸ்ஸ பா⁴வனாய பவத்திட்டா²னஸங்கா²தே ஆரம்மணே, பா⁴வனாகம்மேயேவ வா, யோகி³னோ ஸுக²விஸேஸஹேதுதாய வா கம்மட்டா²னஸங்கா²தே ஸம்பஜஞ்ஞஸ்ஸ விஸயபா⁴வேன கோ³சரே. அபி⁴க்கமாதீ³ஸூதி அபி⁴க்கமபடிக்கமாதீ³ஸு சேவ சீவரபாருபனாதீ³ஸு ச. அஸம்முய்ஹனம் சித்தகிரியாவாயோதா⁴துவிப்பா²ரவஸேனேவ தேஸம் பவத்தி, ந அஞ்ஞதா²தி யாதா²வதோ ஜானனம்.

கம்மட்டா²னம் பதா⁴னம் கத்வாதி சீவரபாருபனாதி³ஸரீரபரிஹரணகிச்சகாலேபி கம்மட்டா²னமனஸிகாரமேவ பதா⁴னம் கத்வா.

தஸ்மாதி யஸ்மா உஸ்ஸுக்கஜாதோ ஹுத்வா அதிவிய மம் யாசஸி, யஸ்மா ச ஜீவிதந்தராயானம் து³ஜ்ஜானதம் வத³ஸி, இந்த்³ரியானி ச தே பரிபாகம் க³தானி, தஸ்மா. திஹாதி நிபாதமத்தம். தே தயா. ஏவந்தி இதா³னி வத்தப்³பா³காரம் வத³தி. ஸிக்கி²தப்³ப³ந்தி அதி⁴ஸீலஸிக்கா²தீ³னம் திஸ்ஸன்னம்பி ஸிக்கா²னம் வஸேன ஸிக்க²னம் காதப்³ப³ம். யதா² பன ஸிக்கி²தப்³ப³ம், தம் த³ஸ்ஸேந்தோ ‘‘தி³ட்டே² தி³ட்ட²மத்தம் ப⁴விஸ்ஸதீ’’திஆதி³மாஹ.

தத்த² தி³ட்டே² தி³ட்ட²மத்தந்தி ரூபாயதனே சக்கு²விஞ்ஞாணேன தி³ட்ட²மத்தம். யதா² ஹி சக்கு²விஞ்ஞாணம் ரூபே ரூபமத்தமேவ பஸ்ஸதி, ந நிச்சாதி³ஸபா⁴வம், ஏவம் ஸேஸதம்த்³வாரிகவிஞ்ஞாணேஹிபி மே ஏத்த² தி³ட்ட²மத்தமேவ ப⁴விஸ்ஸதீதி ஸிக்கி²தப்³ப³ந்தி அத்தோ². அத² வா தி³ட்டே² தி³ட்ட²ம் நாம சக்கு²விஞ்ஞாணம், ரூபே ரூபவிஜானனந்தி அத்தோ². மத்தாதி பமாணம். தி³ட்ட²ம் மத்தா ஏதஸ்ஸாதி தி³ட்ட²மத்தம், சக்கு²விஞ்ஞாணமத்தமேவ மே சித்தம் ப⁴விஸ்ஸதீதி அத்தோ². இத³ம் வுத்தம் ஹோதி – யதா² ஆபாத²க³தே ரூபே சக்கு²விஞ்ஞாணம் ந ரஜ்ஜதி ந து³ஸ்ஸதி ந முய்ஹதி, ஏவம் ராகா³தி³விரஹேன சக்கு²விஞ்ஞாணமத்தமேவ மே ஜவனம் ப⁴விஸ்ஸதி, சக்கு²விஞ்ஞாணப்பமாணேனேவ நம் ட²பேஸ்ஸாமீதி. அத² வா தி³ட்ட²ம் நாம சக்கு²விஞ்ஞாணேன தி³ட்ட²ரூபம். தி³ட்டே² தி³ட்ட²ம் நாம தத்தே²வ உப்பன்னம் ஸம்படிச்ச²னஸந்தீரணவோட்ட²ப்³ப³னஸங்கா²தம் சித்தத்தயம். யதா² தம் ந ரஜ்ஜதி ந து³ஸ்ஸதி ந முய்ஹதி, ஏவம் ஆபாத²க³தே ரூபே தேனேவ ஸம்படிச்ச²னாதி³ப்பமாணேன ஜவனம் உப்பாதே³ஸ்ஸாமி, நாஸ்ஸ தம் பமாணம் அதிக்கமித்வா ரஜ்ஜனாதி³வஸேன உப்பஜ்ஜிதும் த³ஸ்ஸாமீதி ஏவமேத்த² அத்தோ² த³ட்ட²ப்³போ³. ஏஸ நயோ ஸுதமுதேஸு. முதந்தி ச ததா³ரம்மணவிஞ்ஞாணேஹி ஸத்³தி⁴ம் க³ந்த⁴ரஸபோ²ட்ட²ப்³பா³யதனம் வேதி³தப்³ப³ம். விஞ்ஞாதே விஞ்ஞாதமத்தந்தி ஏத்த² பன விஞ்ஞாதம் நாம மனோத்³வாராவஜ்ஜனேன விஞ்ஞாதாரம்மணம், தஸ்மிம் விஞ்ஞாதே. விஞ்ஞாதமத்தந்தி ஆவஜ்ஜனப்பமாணம். யதா² ஆவஜ்ஜனம் ந ரஜ்ஜதி ந து³ஸ்ஸதி ந முய்ஹதி, ஏவம் ரஜ்ஜனாதி³வஸேன உப்பஜ்ஜிதும் அத³த்வா ஆவஜ்ஜனப்பமாணேனேவ சித்தம் ட²பேஸ்ஸாமீதி அயமேத்த² அத்தோ². ஏவஞ்ஹி தே பா³ஹிய ஸிக்கி²தப்³ப³ந்தி ஏவம் இமாய படிபதா³ய தயா பா³ஹிய திஸ்ஸன்னம் ஸிக்கா²னம் அனுபவத்தனவஸேன ஸிக்கி²தப்³ப³ம். இதி ப⁴க³வா பா³ஹியஸ்ஸ ஸம்கி²த்தருசிதாய ச²ஹி விஞ்ஞாணகாயேஹி ஸத்³தி⁴ம் ச²ளாரம்மணபே⁴த³பி⁴ன்னம் விபஸ்ஸனாவிஸயம் தி³ட்டா²தீ³ஹி சதூஹி கோட்டா²ஸேஹி விப⁴ஜித்வா தத்த²ஸ்ஸ ஞாததீரணபரிஞ்ஞம் த³ஸ்ஸேதி.

கத²ம்? ஏத்த² ஹி ரூபாயதனம் பஸ்ஸிதப்³ப³ட்டே²ன தி³ட்ட²ம் நாம, சக்கு²விஞ்ஞாணம் பன ஸத்³தி⁴ம் தம்த்³வாரிகவிஞ்ஞாணேஹி த³ஸ்ஸனட்டே²ன, தது³ப⁴யம்பி யதா²பச்சயம் பவத்தமானம் த⁴ம்மமத்தமேவ, ந ஏத்த² கோசி கத்தா வா காரேதா வா. யதோ தம் ஹுத்வா அபா⁴வட்டே²ன அனிச்சம், உத³யப்³ப³யபடிபீளனட்டே²ன து³க்க²ம், அவஸவத்தனட்டே²ன அனத்தாதி குதோ தத்த² பண்டி³தஸ்ஸ ரஜ்ஜனாதீ³னம் ஓகாஸோதி அயஞ்ஹேத்த² அதி⁴ப்பாயோ. ஏஸ நயோ ஸுதாதீ³ஸுபி.

இதா³னி ஞாததீரணபரிஞ்ஞாஸு பதிட்டி²தஸ்ஸ உபரி ஸஹ ப²லேன பஹானபரிஞ்ஞம் த³ஸ்ஸேதும் ‘‘யதோ கோ² தே பா³ஹியா’’திஆதி³ ஆரத்³த⁴ம். தத்த² யதோதி யதா³, யஸ்மா வா. தேதி தவ. ததோதி ததா³, தஸ்மா வா. தேனாதி தேன தி³ட்டா²தி³னா, தி³ட்டா²தி³படிப³த்³தே⁴ன வா ராகா³தி³னா. இத³ம் வுத்தம் ஹோதி – பா³ஹிய, தவ யஸ்மிம் காலே, யேன வா காரணேன தி³ட்டா²தீ³ஸு மயா வுத்தவிதி⁴ம் படிபஜ்ஜந்தஸ்ஸ அவிபரீதஸபா⁴வாவபோ³தே⁴ன தி³ட்டா²தி³மத்தம் ப⁴விஸ்ஸதி, தஸ்மிம் காலே, தேன வா காரணேன த்வம் தேன தி³ட்டா²தி³படிப³த்³தே⁴ன ராகா³தி³னா ஸஹ ந ப⁴விஸ்ஸஸி, ரத்தோ வா து³ட்டோ² வா மூள்ஹோ வா ந ப⁴விஸ்ஸஸி பஹீனராகா³தி³கத்தா, தேன வா தி³ட்டா²தி³னா ஸஹ படிப³த்³தோ⁴ ந ப⁴விஸ்ஸஸீதி. ததோ த்வம், பா³ஹிய, ந தத்தா²தி யதா³, யஸ்மா வா த்வம் தேன ராகே³ன வா ரத்தோ, தோ³ஸேன வா து³ட்டோ², மோஹேன வா மூள்ஹோ ந ப⁴விஸ்ஸஸி, ததா³, தஸ்மா வா த்வம் தத்த² தி³ட்டா²தி³கே ந ப⁴விஸ்ஸஸி, தஸ்மிம் தி³ட்டே² வா ஸுதமுதவிஞ்ஞாதே வா ‘‘ஏதம் மம, ஏஸோஹமஸ்மி, ஏஸோ மே அத்தா’’தி (மஹாவ. 21) தண்ஹாமானதி³ட்டீ²ஹி அல்லீனோ பதிட்டி²தோ ந ப⁴விஸ்ஸஸி. ஏத்தாவதா பஹானபரிஞ்ஞம் மத்த²கம் பாபேத்வா கீ²ணாஸவபூ⁴மி த³ஸ்ஸிதா. ததோ த்வம், பா³ஹிய, நேவித⁴, ந ஹுரம், ந உப⁴யமந்தரேனாதி யதா³ த்வம், பா³ஹிய, தேன ராகா³தி³னா தத்த² தி³ட்டா²தீ³ஸு படிப³த்³தோ⁴ ந ப⁴விஸ்ஸஸி, ததா³ த்வம் நேவ இத⁴ லோகே, ந பரலோகே, ந உப⁴யத்த² ஹோஸி. ஏஸேவந்தோ து³க்க²ஸ்ஸாதி கிலேஸது³க்க²ஸ்ஸ, வட்டது³க்க²ஸ்ஸ ச அயமேவ அந்தோ அயம் பரிச்சே²தோ³ பரிவடுமபா⁴வோதி அயமேவ ஹி ஏத்த² அத்தோ². யே பன ‘‘உப⁴யமந்தரேனா’’தி பத³ம் க³ஹேத்வா அந்தராப⁴வம் நாம இச்ச²ந்தி, தேஸம் தம் மிச்சா². தத்த² யம் வத்தப்³ப³ம், தம் பரதோ அந்தராப⁴வகதா²யம் (கதா². 505 ஆத³யோ ) ஆவி ப⁴விஸ்ஸதி.

ஏதேஸந்தி அதிஹரணவீதிஹரணானம்.

‘‘தத்த² ஹீ’’திஆதி³னா பஞ்சவிஞ்ஞாணவீதி²யம் புரேதரம் பவத்தஅயோனிஸோமனஸிகாரவஸேன ஆவஜ்ஜனாதீ³னம் அயோனிஸோ ஆவஜ்ஜனாதி³னா இட்டா²தி³ஆரம்மணே லோபா⁴தி³ப்பவத்திமத்தம் ஹோதி, ந பன இத்தி²புரிஸாதி³விகப்பகா³ஹோ, மனோத்³வாரேயேவ பன ஸோ ஹோதீதி த³ஸ்ஸேதி. தஸ்ஸாதி ‘‘இத்தீ², புரிஸோ’’தி ரஜ்ஜனாதி³கஸ்ஸ. ப⁴வங்கா³தீ³தி ப⁴வங்க³ஆவஜ்ஜனத³ஸ்ஸனானி, ஸம்படிச்ச²னஸந்தீரணவோட்ட²ப்³ப³னபஞ்சத்³வாரிகஜவனஞ்ச. அபுப்³ப³தித்தரதாவஸேனாதி அபுப்³ப³தாஇத்தரபா⁴வானம் வஸேன.

அதிஹரதீதி முக²த்³வாரம் அதிக்கமித்வா ஹரதி. தம்தம்விஜானனனிப்பா²த³கோதி தஸ்ஸ தஸ்ஸ பரியேஸனாதி³விஸயஸ்ஸ, விஜானனஸ்ஸ ச நிப்பா²த³கோ. யேன ஹி பயோகே³ன பரியேஸனாதி³ நிப்ப²ஜ்ஜதி, ஸோ தப்³பி³ஸயம் விஜானனம்பி நிப்பா²தே³தி நாம ஹோதி. ஸம்மாபடிபத்திந்தி த⁴ம்மேஸு அவிபரீதபடிபத்திம் யதா²பூ⁴தாவபோ³த⁴ம்.

க³மனேபீதி க³மனபயோகே³பி. அதிஹரணம் யதா²டி²தஸ்ஸேவ காயஸ்ஸ இச்சி²ததே³ஸாபி⁴முக²கரணம். க³மனம் தே³ஸந்தருப்பத்தி. வக்க²மானோதி ‘‘அபி⁴க்கந்தே படிக்கந்தேதி…பே… அத்³தா⁴க³மனவஸேன கதி²தோ. க³தே டி²தே நிஸின்னேதி ஏத்த² விஹாரே சுண்ணிகபாது³த்³தா⁴ரஇரியாபத²வஸேன கதி²தோ’’தி (விப⁴. அட்ட². 523) வக்க²மானோ விஸேஸோ.

பவத்தேதி சங்கமாதீ³ஸு பவத்தே ரூபாரூபத⁴ம்மே. பரிக்³க³ண்ஹந்தஸ்ஸ அனிச்சாதி³தோ.

காயிககிரியாதி³னிப்³ப³த்தகஜவனம் ப²லூபசாரேன ‘‘காயாதி³கிரியாமய’’ந்தி வுத்தம். கிரியாஸமுட்டி²தத்தாதி பன காரணூபசாரேன.

526. கம்மட்டா²னஉபாஸனஸ்ஸாதி கம்மட்டா²னபா⁴வனாய. யோக³பத²ந்தி பா⁴வனாயோக்³க³கிரியாய பவத்தனமக்³க³ம்.

537. காயாதீ³ஸூதி காயவேத³னாசித்தத⁴ம்மேஸு. ஸுட்டு² பவத்தியாதி அஸுபா⁴னுபஸ்ஸனாதி³வஸேன பவத்தியா. நிய்யானஸபா⁴வோ ஸம்மாஸதிதா ஏவ. உபட்டா²னந்தி ஸதிம் கிச்சதோ த³ஸ்ஸேதி. ஏத்த² ச யதா²வுத்தோ பரிக்³க³ஹோ ஜாதோ ஏதிஸ்ஸாதி பரிக்³க³ஹிதா, தம் பரிக்³க³ஹிதம் நிய்யானபூ⁴தம் ஸதிம் கத்வாதி அத்தோ² வேதி³தப்³போ³.

542-3. பகுப்பனம் இத⁴ விகாராபத்திபா⁴வோ.

550. தப்படிபக்க²ஸஞ்ஞாதி தி²னமித்³த⁴படிபக்க²ஸஞ்ஞா. ஸா அத்த²தோ தத³ங்கா³தி³வஸேன தி²னமித்³த⁴வினோத³னாகாரப்பவத்தா குஸலவிதக்கஸம்பயுத்தஸஞ்ஞா, ததா²பூ⁴தோ வா சித்துப்பாதோ³ ஸஞ்ஞாஸீஸேன வுத்தோதி வேதி³தப்³போ³.

553. ஸாரம்ப⁴ந்தி ஆரம்ப⁴வந்தம், ஸஹாரம்ப⁴ந்தி அத்தோ². நிராவரணாபோ⁴கா³ தி²னமித்³த⁴ந்த⁴காரவிக³மேன நிராவரணஸமன்னாஹாரஸஞ்ஞா. விவடா அப்படிச்சா²த³னா.

564. தத்த² தத்தா²தி ‘‘இமினா பாதிமோக்க²ஸம்வரேன உபேதோ ஹோதீ’’திஆதீ³ஸு (விப⁴. 511).

588. யதா² கேனசி நிக்குஜ்ஜிதம் ‘‘இத³ம் நாமேத’’ந்தி பகதிஞாணேன ந ஞாயதி, ஏவம் ஸப்³ப³ப்பகாரேன அவிதி³தம் நிக்குஜ்ஜிதம் விய ஹோதீதி ஆஹ ‘‘ஸப்³ப³தா² அஞ்ஞாததா நிக்குஜ்ஜிதபா⁴வோ’’தி. நிரவஸேஸபரிச்சி²ந்த³னாபா⁴வோதி து³விஞ்ஞேய்யதாய நிரவஸேஸதோ பரிச்சி²ந்தி³தப்³ப³தாபா⁴வோ, பரிச்சி²ந்தி³காபா⁴வோ வா. ஏகதே³ஸேனேவ ஹி க³ம்பீ⁴ரம் ஞாயதி.

ஆசிக்க²ந்தீதிஆதி³தோ பரிப்³யத்தம் கதே²ந்தி. தே³ஸேந்தீதி உபதி³ஸனவஸேன வத³ந்தி, பபோ³தே⁴ந்தி வா. பஞ்ஞாபேந்தீதி பஜானாபேந்தி, ஸம்பகாஸேந்தீதி அத்தோ². பட்ட²பேந்தீதி பகாரேஹி அஸங்கரதோ ட²பேந்தி. விவரந்தீதி விவடம் கரோந்தி. விப⁴ஜந்தீதி விப⁴த்தம் கரோந்தி. உத்தானீகரோந்தீதி அனுத்தானம் க³ம்பீ⁴ரம் உத்தானம் பாகடம் கரோந்தி. ஏத்த² ச ‘‘பஞ்ஞாபேந்தீ’’திஆதீ³ஹி ச²ஹி பதே³ஹி அத்த²பதா³னி த³ஸ்ஸிதானி. ‘‘ஆசிக்க²ந்தி தே³ஸேந்தீ’’தி பன த்³வீஹி பதே³ஹி ப்³யஞ்ஜனபதா³னீதி ஏவம் அத்த²ப்³யஞ்ஜனபத³ஸம்பன்னாய உளாராய பஸம்ஸாய பஸம்ஸனம் த³ஸ்ஸேதி. யம் பனேதேஸு அத்த²ப்³யஞ்ஜனபதே³ஸு வத்தப்³ப³ம், தம் நேத்திஅட்ட²கதா²யம் (நேத்தி. அட்ட². 23 ஆத³யோ) வித்தா²ரதோ வுத்தமேவ, தஸ்மா தத்த² வுத்தனயேனேவ வேதி³தப்³ப³ம்.

602. ஏத்தே²வ யோஜேதப்³ப³ம் தஸ்ஸ ஹேட்டா²பூ⁴மிஸமதிக்கமனமுகே²ன பூ⁴மிவிஸேஸாதி⁴க³முபாயதீ³பனதோ. ஸப்³ப³த்தா²பீதி ‘‘ரூபஸஞ்ஞானம் ஸமதிக்கமா, ஆகாஸானஞ்சாயதனம் ஸமதிக்கம்மா’’தி ஸப்³பே³ஸுபி ஸமதிக்கமவசனேஸு.

610. தம்யேவ ஆகாஸம் பு²டம் விஞ்ஞாணந்தி தம்யேவ கஸிணுக்³கா⁴டிமாகாஸம் ‘‘அனந்த’’ந்தி மனஸிகாரேன பு²டம் ப²ரித்வா டி²தம் பட²மாருப்பவிஞ்ஞாணம் ‘‘அனந்தம் விஞ்ஞாண’’ந்தி மனஸி கரோதீதி அத்தோ². து³தியவிகப்பே பன ஸாமஞ்ஞஜோதனா விஸேஸே திட்ட²தீதி ‘‘பு²ட’’ந்தி இமினா விஞ்ஞாணமேவ வுத்தந்தி பு²டம் விஞ்ஞாணந்தி பட²மாருப்பவிஞ்ஞாணமாஹ. தஞ்ஹி ஆகாஸஸ்ஸ ஸப²ரணகவிஞ்ஞாணம். விஞ்ஞாணேனாதி ச கரணத்தே² கரணவசனம், தஞ்ச து³தியாருப்பவிஞ்ஞாணம் வத³தீதி ஆஹ ‘‘விஞ்ஞாணஞ்சாயதனவிஞ்ஞாணேன மனஸி கரோதீ’’தி. தேனாதி பட²மாருப்பவிஞ்ஞாணேன. க³ஹிதாகாரந்தி அனந்தப²ரணவஸேன க³ஹிதாகாரம். மனஸி கரோதீதி து³தியாருப்பபரிகம்மமனஸிகாரேன மனஸி கரோதி. ஏவந்தி யதா²வுத்தாகாரம் கஸிணுக்³கா⁴டிமாகாஸே பட²மாருப்பவிஞ்ஞாணேன அனந்தப²ரணவஸேன யோ க³ஹிதாகாரோ, தம் மனஸி கரோந்தம்யேவ. தம் விஞ்ஞாணந்தி தம் து³தியாருப்பவிஞ்ஞாணம். அனந்தம் ப²ரதீதி ‘‘அனந்த’’ந்தி ப²ரதி, தஸ்மா து³தியோயேவத்தோ² யுத்தோதி. ‘‘யஞ்ஹீ’’திஆதி³னா யதா²வுத்தமத்த²ம் பாகடம் கரோதி. தம்ப²ரணாகாரஸஹிதந்தி தஸ்மிம் ஆகாஸே ப²ரணாகாரஸஹிதம். விஞ்ஞாணந்தி பட²மாருப்பவிஞ்ஞாணம்.

615. புப்³பே³தி து³தியாருப்பபரிகம்மகாலே. யம் ‘‘அனந்தம் விஞ்ஞாண’’ந்தி மனஸி கதம், தம்யேவ பட²மாருப்பவிஞ்ஞாணமேவ. தம்யேவ ஹி அபா⁴வேதி. ஆரம்மணாதிக்கமவஸேன ஹி ஏதா ஸமாபத்தியோ லத்³த⁴ப்³பா³தி.

நித்³தே³ஸவண்ணனா நிட்டி²தா.

ஸுத்தந்தபா⁴ஜனீயவண்ணனா நிட்டி²தா.

2. அபி⁴த⁴ம்மபா⁴ஜனீயவண்ணனா

623. சதுக்கனயே து³தியஜ்ஜா²னமேவ யேஸம் விசாரோ ஓளாரிகதோ ந உபட்டா²தி, யேஸஞ்ச உபட்டா²தி, தேஸம் வஸேன த்³விதா⁴ பி⁴ந்தி³த்வா தே³ஸிதந்தி சதுக்கனயதோ பஞ்சகனயோ நீஹதோதி ஆஹ ‘‘உத்³த⁴டானம்யேவ சதுன்னம்…பே… த³ஸ்ஸனதோ சா’’தி.

அபி⁴த⁴ம்மபா⁴ஜனீயவண்ணனா நிட்டி²தா.

3. பஞ்ஹபுச்ச²கவண்ணனா

640. தீஸூதி பட²மாதீ³ஸு தீஸு. சதுக்கனயேன ஹி தம் வுத்தம். ஏவம்கோட்டா²ஸிகாதி அப்பமாணாதி வுத்தா. தேனாஹ ‘‘லோகுத்தரபூ⁴தா ஏவாதி அதி⁴ப்பாயோ’’தி. பரிச்சி²ன்னாகாஸ…பே… சதுத்தா²னம் வட்டவிபஸ்ஸனாபாத³கத்தா ‘‘ஸப்³ப³த்த²பாத³கசதுத்தே² ஸங்க³ஹிதானீ’’தி வுத்தம்.

அயம் கதா²தி பரித்தாரம்மணாதி³கதா². ஹேட்டி²மோ அரியோ உபரிமஸ்ஸ அரியஸ்ஸ லோகுத்தரசித்தானி படிவிஜ்ஜி²தும் ந ஸக்கோதீதி வுத்தம் ‘‘ந ச…பே… ஸக்கோதீ’’தி.

‘‘கிரியதோ த்³வாத³ஸன்ன’’ந்தி ச பாடோ² அத்தி². ஸஹ வத³தி லோகுத்தரப²லசதுத்த²தாஸாமஞ்ஞேனாதி அதி⁴ப்பாயோ. இத⁴ ஸப்³ப³ஸத்³த³ஸ்ஸ பதே³ஸஸப்³ப³வாசிபா⁴வதோ ஏகதே³ஸஸ்ஸ அஸம்ப⁴வேபி ஸப்³ப³த்த²பாத³கதா ஏவ வேதி³தப்³பா³தி த³ஸ்ஸேதும் ‘‘ஸப்³ப³த்த²…பே… த³ட்ட²ப்³ப³’’ந்தி ஆஹ. பரிச்சி²ன்னாகாஸகஸிணசதுத்தா²தீ³னீதி ஆதி³-ஸத்³தே³ன ஆனாபானசதுத்தா²த³யோ ஸங்க³ஹிதா. நவத்தப்³ப³தாயாதி நவத்தப்³பா³ரம்மணதாய.

நிப்³பா³னஞ்சாதி வத்தப்³ப³ம் ததா³ரம்மணஸ்ஸாபி ப³ஹித்³தா⁴ரம்மணபா⁴வதோ.

‘‘ஸஸந்தானக³தம்பீ’’தி இத³ம் ரூப-ஸத்³தே³ன, கம்ம-ஸத்³தே³ன ச ஸம்ப³ந்தி⁴தப்³ப³ம் ‘‘ஸஸந்தானக³தம்பி அபாகடம் ரூபம் தி³ப்³ப³சக்கு² விய ஸஸந்தானக³தம்பி அபாகடம் கம்மம் விபா⁴வேதீ’’தி. பாகடே பன ஸஸந்தானக³தே ரூபே, கம்மே ச அபி⁴ஞ்ஞாஞாணேன பயோஜனம் நத்தீ²தி ‘‘அபாகட’’ந்தி விஸேஸேத்வா வுத்தம்.

பஞ்ஹபுச்ச²கவண்ணனா நிட்டி²தா.

ஜா²னவிப⁴ங்க³வண்ணனா நிட்டி²தா.