14. ஸிக்கா²பத³விப⁴ங்கோ³

1. அபி⁴த⁴ம்மபா⁴ஜனீயவண்ணனா

703. பதிட்டா²னட்டே²னாதி ஸம்பயோக³வஸேன உபனிஸ்ஸயவஸேன ச ஓகாஸபா⁴வேன. பிட்ட²பூவஓத³னகிண்ணனானாஸம்பா⁴ரே பக்கி²பித்வா மத்³தி³த்வா கதா ஸுரா நாம. மது⁴காதி³புப்ப²பனஸாதி³ப²லஉச்சு²முத்³தி³காதி³னானாஸம்பா⁴ரானம் ரஸா சிரபரிவாஸிதா மேரயம் நாம, ஆஸவோதி அத்தோ².

704. தம்ஸம்பயுத்தத்தாதி விரதிஸம்பயுத்தத்தா, விரதிசேதனாஸம்பயுத்தத்தா வா.

கம்மபதா² ஏவாதி அஸப்³ப³ஸாதா⁴ரணேஸு ஜா²னாதி³கோட்டா²ஸேஸு கம்மபத²கோட்டா²ஸிகா ஏவாதி அத்தோ². ஸுராபானம்பி ‘‘ஸுராபானம், பி⁴க்க²வே, ஆஸேவிதம்…பே… நிரயஸம்வத்தனிக’’ந்தி (அ. நி. 8.40) விஸும் கம்மபத²பா⁴வேன ஆக³தந்தி வத³ந்தி. ஏவம் ஸதி ஏகாத³ஸ கம்மபதா² ஸியும், தஸ்மாஸ்ஸ யதா²வுத்தேஸ்வேவ கம்மபதே²ஸு உபகாரகத்தஸபா⁴க³த்தவஸேன அனுபவேஸோ த³ட்ட²ப்³போ³.

ஸத்தஇத்தி²புரிஸாரம்மணதா ததா²க³ஹிதஸங்கா²ராரம்மணதாய த³ட்ட²ப்³பா³. ‘‘பஞ்ச ஸிக்கா²பதா³ பரித்தாரம்மணா’’தி ஹி வுத்தம். ‘‘ஸப்³பா³பி ஹி ஏதா வீதிக்கமிதப்³ப³வத்து²ம் ஆரம்மணம் கத்வா வேரசேதனாஹி ஏவ விரமந்தீ’’தி (விப⁴. அட்ட². 704) ச வக்க²தீதி.

கோ³ரூபஸீலகோ பகதிப⁴த்³தோ³. காகணிகமத்தஸ்ஸ அத்தா²யாதிஆதி³ லோப⁴வஸேன முஸாகத²னே வுத்தம். தோ³ஸவஸேன முஸாகத²னே ச நிட்ட²ப்பத்தோ ஸங்க⁴பே⁴தோ³ க³ஹிதோ. தோ³ஸவஸேன பரஸ்ஸ ப்³யஸனத்தா²ய முஸாகத²னே பன தஸ்ஸ தஸ்ஸ கு³ணவஸேன அப்பஸாவஜ்ஜமஹாஸாவஜ்ஜதா யோஜேதப்³பா³, மந்தா³தி⁴மத்தப்³யஸனிச்சா²வஸேன ச. நிஸ்ஸக்³கி³யதா²வரவிஜ்ஜாமயித்³தி⁴மயா ஸாஹத்தி²காணத்திகேஸ்வேவ பவிஸந்தீதி த்³வே ஏவ க³ஹிதா.

பஞ்சபி கம்மபதா² ஏவாதி சேதனாஸங்கா²தம் பரியாயஸீலம் ஸந்தா⁴ய வுத்தம், விரதிஸீலம் பன மக்³க³கோட்டா²ஸிகந்தி. தேஸம் பனாதி ஸேஸஸீலானம்.

712. ‘‘கோட்டா²ஸபா⁴வேனா’’தி வுத்தம், ‘‘பதிட்டா²னபா⁴வேனா’’தி பன வத்தப்³ப³ம். ஏத்த² பன ஸிக்கா²பத³வாரே பஹீனபஞ்சாப⁴ப்³ப³ட்டா²னஸ்ஸ அரஹதோ விரமிதப்³ப³வேரஸ்ஸ ஸப்³ப³தா² அபா⁴வா கிரியேஸு விரதியோ ந ஸந்தீதி ந உத்³த⁴டா, ஸேக்கா²னம் பன பஹீனபஞ்சவேரத்தேபி தம்ஸபா⁴க³தாய வேரபூ⁴தானம் அகுஸலானம் வேரனிதா³னானம் லோபா⁴தீ³னஞ்ச ஸப்³பா⁴வா விரதீனம் உப்பத்தி ந ந ப⁴விஸ்ஸதி. அகுஸலஸமுட்டி²தானி ச காயகம்மாதீ³னி தேஸம் காயது³ச்சரிதாதீ³னி வேரானேவ, தேஹி ச தேஸம் விரதியோ ஹோந்தேவ, யதோ நப²லபூ⁴தஸ்ஸபி உபரிமக்³க³த்தயஸ்ஸ அட்ட²ங்கி³கதா ஹோதி. ஸிக்கா²வாரே ச அபா⁴வேதப்³ப³தாய ப²லத⁴ம்மாபி ந ஸிக்கி²தப்³பா³, நாபி ஸிக்கி²தஸிக்க²ஸ்ஸ உப்பஜ்ஜமானா கிரியத⁴ம்மாதி ந கேசி அப்³யாகதா ஸிக்கா²தி உத்³த⁴டா.

அபி⁴த⁴ம்மபா⁴ஜனீயவண்ணனா நிட்டி²தா.

2. பஞ்ஹபுச்ச²கவண்ணனா

714. ஸம்பத்தவிரதிவஸேனாதி ஸம்பத்தே பச்சுப்பன்னே ஆரம்மணே யதா²விரமிதப்³ப³தோ விரதிவஸேனாதி அத்தோ².

பஞ்ஹபுச்ச²கவண்ணனா நிட்டி²தா.

ஸிக்கா²பத³விப⁴ங்க³வண்ணனா நிட்டி²தா.