2. அபி⁴த⁴ம்மபா⁴ஜனீயவண்ணனா

490. அபி⁴த⁴ம்மே லோகுத்தரசித்தபா⁴ஜனீயேபி ‘‘தஸ்மிம் கோ² பன ஸமயே சத்தாரோ க²ந்தா⁴ ஹோந்தி…பே… அட்ட²ங்கி³கோ மக்³கோ³ ஹோதீ’’தி (த⁴. ஸ. 337) வுத்தத்தா இதா⁴பி அபி⁴த⁴ம்மபா⁴ஜனீயே அபி⁴த⁴ம்மானுரூபம் தே³ஸனம் கரோந்தோ ‘‘அட்ட²ங்கி³கோ மக்³கோ³’’தி அரியோபபத³தம் ந கரோதி.

493. தஸ்மிம் ஸமயேதி லோகியகாலேன ஏதேஸம் அதிரேககிச்சம் த³ஸ்ஸேதி. விரதிஉப்பாத³னேன மிச்சா²வாசாதீ³னி புக்³க³லம் பஜஹாபேந்தீதி ஸம்மாதி³ட்டா²தீ³னி பஞ்ச ‘‘காராபகங்கா³னீ’’தி வுத்தானி. ஸம்மாவாசாதி³கிரியா ஹி விரதி, தஞ்ச ஏதானி காராபேந்தீதி. விரதிவஸேனாதி விரமணகிரியாவஸேன, ந காராபகபா⁴வேன கத்துபா⁴வேன சாதி அத்தோ². இமம்…பே… கிச்சாதிரேகதம் த³ஸ்ஸேதுந்தி லோகுத்தரக்க²ணேபி இமானேவ பஞ்ச ஸம்மாவாசாதி³த்தயஸ்ஸ ஏகக்க²ணே காராபகானீதி த³ஸ்ஸேதுந்தி அத்தோ². மிச்சா²தி³ட்டா²தி³கா த³ஸ, தப்பச்சயா அகுஸலா ச த³ஸாதி வீஸதி அகுஸலபக்கி²யா, ஸம்மாதி³ட்டா²தி³கா த³ஸ, தப்பச்சயா ச குஸலா த³ஸாதி வீஸதி குஸலபக்கி²யா ச மஹாசத்தாரீஸகஸுத்தே (ம. நி. 3.136) வுத்தாதி தஸ்ஸ ஏதம் நாமம்.

புஞ்ஞபா⁴கி³யாதி புஞ்ஞகோட்டா²ஸே ப⁴வா, புஞ்ஞாபி⁴ஸங்கா²ரேகதே³ஸபூ⁴தாதி அத்தோ². க²ந்தோ⁴பதி⁴ம் விபச்சதி, தத்த² வா விபச்சதீதி உபதி⁴வேபக்கா.

பஞ்சங்கி³கமக்³க³ம் உத்³தி³ஸித்வா தத்த² ஏகேகம் புச்சி²த்வா தஸ்ஸ தஸ்ஸேவ ஸமயவவத்தா²னம் கத்வா விஸ்ஸஜ்ஜனம் ‘‘பாடியேக்கம் புச்சி²த்வா பாடியேக்கம் விஸ்ஸஜ்ஜன’’ந்தி வுத்தம். ஸஹ பன புச்சி²த்வா பஞ்சன்னம்பி ஸமயவவத்தா²னம் கத்வா விஸ்ஸஜ்ஜனே ‘‘தத்த² கதமா ஸம்மாதி³ட்டி²யா பஞ்ஞா’’திஆதி³கோ படினித்³தே³ஸோ ஏகதோ விஸ்ஸஜ்ஜனபடினித்³தே³ஸத்தா ந பாடியேக்கம் புச்சா²விஸ்ஸஜ்ஜனம் நாம ஹோதீதி. தத்த² பஞ்சங்கி³கவாரே ஏவ பாடியேக்கம் புச்சா²விஸ்ஸஜ்ஜனம் ஸம்மாதி³ட்டா²தீ³ஸு காராபகங்கே³ஸு ஏகேகமுகா²ய பா⁴வனாய மக்³கு³ப்பத்திம் ஸந்தா⁴ய கதந்தி வேதி³தப்³ப³ம். வாசாதீ³னி ஹி புப்³ப³ஸுத்³தி⁴யா ஸிஜ்ஜ²ந்தி, ந மக்³க³ஸ்ஸ உபசாரேனாதி.

அபி⁴த⁴ம்மபா⁴ஜனீயவண்ணனா நிட்டி²தா.

மக்³க³ங்க³விப⁴ங்க³வண்ணனா நிட்டி²தா.