1. ஸுத்தந்தபா⁴ஜனீயம்

பட²மனயவண்ணனா

466. பதிட்டா²னாயூஹனா ஓக⁴தரணஸுத்தவண்ணனாயம் (ஸம். நி. அட்ட². 1.1.1) –

‘‘கிலேஸவஸேன பதிட்டா²னம், அபி⁴ஸங்கா²ரவஸேன ஆயூஹனா. ததா² தண்ஹாதி³ட்டீ²ஹி பதிட்டா²னம், அவஸேஸகிலேஸாபி⁴ஸங்கா²ரேஹி ஆயூஹனா. தண்ஹாவஸேன பதிட்டா²னம், தி³ட்டி²வஸேன ஆயூஹனா. ஸஸ்ஸததி³ட்டி²யா பதிட்டா²னம், உச்சே²த³தி³ட்டி²யா ஆயூஹனா. லீனவஸேன பதிட்டா²னம், உத்³த⁴ச்சவஸேன ஆயூஹனா. காமஸுகா²னுயோக³வஸேன பதிட்டா²னம், அத்தகிலமதா²னுயோக³வஸேன ஆயூஹனா. ஸப்³பா³குஸலாபி⁴ஸங்கா²ரவஸேன பதிட்டா²னம், ஸப்³ப³லோகியகுஸலாபி⁴ஸங்கா²ரவஸேன ஆயூஹனா’’தி –

வுத்தேஸு பகாரேஸு இத⁴ அவுத்தானம் வஸேன வேதி³தப்³பா³.

ஸம்மப்பவத்தே த⁴ம்மே படிஸஞ்சிக்க²தி, உபபத்திதோ இக்க²தி, ததா³காரோ ஹுத்வா பவத்ததீதி படிஸங்கா²னலக்க²ணோ உபேக்கா²ஸம்போ³ஜ்ஜ²ங்கோ³. ஏவஞ்ச கத்வா ‘‘படிஸங்கா² ஸந்திட்ட²னா க³ஹணே மஜ்ஜ²த்ததா’’தி உபேக்கா²கிச்சாதி⁴மத்ததாய ஸங்கா²ருபேக்கா² வுத்தா. அனுக்கமனிக்கே²பே பயோஜனம் புரிமஸ்ஸ புரிமஸ்ஸ பச்சி²மபச்சி²மகாரணபா⁴வோ.

467. ப³லவதீ ஏவ ஸதி ஸதிஸம்போ³ஜ்ஜ²ங்கோ³தி கத்வா ப³லவபா⁴வதீ³பனத்த²ம் பஞ்ஞா க³ஹிதா, ந யஸ்ஸ கஸ்ஸசி ஸம்பதா⁴ரணஸதி, குஸலுப்பத்திகாரணஸ்ஸ பன ஸரணம் ஸதீதி த³ஸ்ஸேந்தோ ‘‘வத்தம் வா’’திஆதி³மாஹ. வத்தஸீஸே ட²த்வாதி ‘‘அஹோ வத மே த⁴ம்மம் ஸுணேய்யும், ஸுத்வா ச த⁴ம்மம் பஸீதே³ய்யும், பஸன்னா ச மே பஸன்னாகாரம் கரேய்யு’’ந்தி ஏவம்சித்தோ அஹுத்வா ‘‘ஸ்வாக்கா²தோ ப⁴க³வதா த⁴ம்மோ…பே… விஞ்ஞூஹி, அஹோ வத மே த⁴ம்மம் ஸுணேய்யும், ஸுத்வா ச த⁴ம்மம் ஆஜானேய்யும், ஆஜானித்வா ச பன தத²த்தா²ய படிபஜ்ஜேய்யு’’ந்தி த⁴ம்மஸுத⁴ம்மதம் படிச்ச காருஞ்ஞம் அனுத்³த³யம் அனுகம்பம் உபாதா³ய மஹாகஸ்ஸபத்தே²ரேன விய பா⁴ஸிதந்தி அத்தோ². விமுத்தாயதனஸீஸேதி ‘‘ந ஹேவ கோ² ஸத்தா², அபிச கோ² யதா²ஸுதம் யதா²பரியத்தம் த⁴ம்மம் வித்தா²ரேன பரேஸம் தே³ஸேஸ்ஸாமீ’’தி ஏவம் விமுத்திகாரணபதா⁴னபா⁴வே ட²த்வா. சிரகதவத்தாதி³வஸேன தம்ஸமுட்டா²பகோ அரூபகோட்டா²ஸோ வுத்தோ, பா⁴வத்த²த்தா ஏவ வா கதபா⁴ஸித-ஸத்³தா³ கிரியாபூ⁴தஸ்ஸ அரூபகோட்டா²ஸஸ்ஸ வாசகாதி கத்வா ஆஹ ‘‘காயவிஞ்ஞத்திம்…பே… கோட்டா²ஸ’’ந்தி.

போ³ஜ்ஜ²ங்க³ஸமுட்டா²பகதா புரிமானம் ச²ன்னம் அத்தனோ அத்தனோ அனந்தரிகஸ்ஸ, பரேஸம் ஸப்³பே³ஸம் வா தம்தம்பரியாயேன ஸமுட்டா²பனவஸேன யோஜேதப்³பா³. காமலோகவட்டாமிஸாதி தண்ஹா ததா³ரம்மணா க²ந்தா⁴தி வத³ந்தி, பஞ்சகாமகு³ணிகோ ச ராகோ³ ததா³ரம்மணஞ்ச காமாமிஸம், ‘‘ஸஸ்ஸதோ அத்தா ச லோகோ சா’’திஆதி³னா லோகக்³க³ஹணவஸேன பவத்தோ ஸஸ்ஸதுச்சே²த³ஸஹக³தோ ராகோ³ ததா³ரம்மணஞ்ச லோகாமிஸம், லோகத⁴ம்மா வா, வட்டஸ்ஸாத³வஸேன உப்பன்னோ ஸம்ஸாரஜனகோ ராகோ³ ததா³ரம்மணஞ்ச வட்டாமிஸம். மக்³க³ஸ்ஸ புப்³ப³பா⁴க³த்தா புப்³ப³பா⁴கா³.

பட²மனயவண்ணனா நிட்டி²தா.

து³தியனயவண்ணனா

468-469. அபி⁴ஞ்ஞேய்யா த⁴ம்மா நாம ‘‘ஸப்³பே³ ஸத்தா ஆஹாரட்டி²திகா, த்³வே தா⁴துயோ, திஸ்ஸோ தா⁴துயோ, சத்தாரி அரியஸச்சானி, பஞ்ச விமுத்தாயதனானி, ச² அனுத்தரியானி, ஸத்த நித்³த³ஸவத்தூ²னி, அட்டா²பி⁴பா⁴யதனானி, நவானுபுப்³ப³விஹாரா, த³ஸ நிஜ்ஜரவத்தூ²னீ’’தி ஏவம்பபே⁴தா³ த⁴ம்மா, ‘‘ஸப்³ப³ம், பி⁴க்க²வே, அபி⁴ஞ்ஞேய்ய’’ந்தி (ஸம். நி. 4.46) த³ஸ்ஸிதா க²ந்தா⁴த³யோ ச. வானந்தி வினந்த⁴னம் ப⁴வாதீ³னம், க³மனம் வா பியரூபஸாதரூபேஸு.

சங்கமம் அதி⁴ட்ட²ஹந்தஸ்ஸ உப்பன்னவீரியம் விபஸ்ஸனாஸஹக³தந்தி வேதி³தப்³ப³ம். ஏத்தகேனாதி ‘‘லோகியலோகுத்தரமிஸ்ஸகா கதி²தா’’தி ஏத்தாவதா. லோகியந்தி வத³ந்தோ ந கிலமதீதி காயவிஞ்ஞத்திஸமுட்டா²பகஸ்ஸ லோகியத்தா அசோத³னீயோதி அத்தோ². அலப்³ப⁴…பே… படிக்கி²த்தாதி ரூபாவசரே அலப்³ப⁴மானகம் பீதிஸம்போ³ஜ்ஜ²ங்க³ம் உபாதா³ய லப்³ப⁴மானாபி அவிதக்கஅவிசாரா பீதி படிக்கி²த்தா, ‘‘பீதிஸம்போ³ஜ்ஜ²ங்கோ³’’தி ந வுத்தோதி அத்தோ². காமாவசரே வா அலப்³ப⁴மானகம் அவிதக்கஅவிசாரம் பீதிம் உபாதா³ய லப்³ப⁴மானகாவ பீதிபோ³ஜ்ஜ²ங்க³பூ⁴தா படிக்கி²த்தா, அவிதக்கஅவிசாரோ பீதிஸம்போ³ஜ்ஜ²ங்கோ³ ந வுத்தோதி அத்தோ².

அஜ்ஜ²த்தவிமோக்க²ந்தி அஜ்ஜ²த்தத⁴ம்மே அபி⁴னிவிஸித்வா ததோ வுட்டி²தமக்³கோ³ ‘‘அஜ்ஜ²த்தவிமோக்கோ²’’தி இத⁴ வுத்தோதி அதி⁴ப்பாயோ. ந வாரேதப்³போ³தி விபஸ்ஸனாபாத³கேஸு கஸிணாதி³ஜா²னேஸு ஸதிஆதீ³னம் நிப்³பே³த⁴பா⁴கி³யத்தா ந படிக்கி²பிதப்³போ³தி அத்தோ². அனுத்³த⁴ரந்தா பன விபஸ்ஸனா விய போ³தி⁴யா மக்³க³ஸ்ஸ ஆஸன்னகாரணம் ஜா²னம் ந ஹோதி, ந ச ததா² ஏகந்திகம் காரணம், ந ச விபஸ்ஸனாகிச்சஸ்ஸ விய ஜா²னகிச்சஸ்ஸ நிட்டா²னம் மக்³கோ³தி கத்வா ந உத்³த⁴ரந்தி. தத்த² கஸிணஜ்ஜா²னக்³க³ஹணேன ததா³யத்தானி ஆருப்பானிபி க³ஹிதானீதி த³ட்ட²ப்³பா³னி. அஸுப⁴ஜ்ஜா²னானம் அவசனம் அவிதக்காவிசாரஸ்ஸ அதி⁴ப்பேதத்தா.

து³தியனயவண்ணனா நிட்டி²தா.

ததியனயவண்ணனா

470-471. தத³ங்க³ஸமுச்சே²த³னிஸ்ஸரணவிவேகனிஸ்ஸிததம் வத்வா படிப்பஸ்ஸத்³தி⁴விவேகனிஸ்ஸிதத்தஸ்ஸ அவசனம் ‘‘ஸதிஸம்போ³ஜ்ஜ²ங்க³ம் பா⁴வேதீ’’திஆதி³னா (ஸம். நி. 5.182; விப⁴. 471) இத⁴ பா⁴வேதப்³பா³னம் போ³ஜ்ஜ²ங்கா³னம் வுத்தத்தா. பா⁴விதபோ³ஜ்ஜ²ங்க³ஸ்ஸ ஹி ஸச்சி²காதப்³பா³ ப²லபோ³ஜ்ஜ²ங்கா³ அபி⁴த⁴ம்மபா⁴ஜனீயே வுத்தாதி. வோஸ்ஸக்³க³-ஸத்³தோ³ பரிச்சாக³த்தோ² பக்க²ந்த³னத்தோ² சாதி வோஸ்ஸக்³க³ஸ்ஸ து³வித⁴தா வுத்தா. யதா²வுத்தேனாதி தத³ங்க³ஸமுச்சே²த³ப்பகாரேன தன்னின்னபா⁴வாரம்மணகரணப்பகாரேன ச. பரிணாமேந்தம் விபஸ்ஸனாக்க²ணே, பரிணதம் மக்³க³க்க²ணே.

ததியனயவண்ணனா நிட்டி²தா.

ஸுத்தந்தபா⁴ஜனீயவண்ணனா நிட்டி²தா.