4. சதுக்கனித்³தே³ஸவண்ணனா

133. பரேன கதம் து³ஸ்ஸீல்யம் ஆணத்தியா அத்தனா ச பயோகே³ன கதந்தி ஆணத்தியா பாபஸ்ஸ தா³யாதோ³ ‘‘ததோ உபட்³ட⁴ஸ்ஸ தா³யாதோ³’’தி வுத்தோ.

145. அயந்தி ‘‘தேஸு பட²மோ’’திஆதி³கம் நயம் வத³தி.

148. தே³ஸனாய த⁴ம்மானம் ஞாணஸ்ஸ ஆபாத²பா⁴வஸம்பாத³னம் ஞாணுக்³கா⁴டனம். ஸஹ உதா³ஹடவேலாயாதி உதா³ஹடவேலாய ஸத்³தி⁴ம் தஸ்மிம் காலே அனதிக்கந்தே ஏவாதி அத்தோ².

152. தந்தி அனந்தரவசனம் வத³தி. ‘‘கதமோ லோகோ’’தி வுத்தே ‘‘பஞ்சுபாதா³னக்க²ந்தா⁴’’தி மஹந்தம் அத்த²ம் ஸங்க³ஹித்வா டி²தவசனம் அத்த²யுத்தம். லுஜ்ஜதீதி லோகோதி காரணயுத்தம்.

156. ஸஹிதாஸஹிதஸ்ஸாதி ஸஹிதாஸஹிதேதி அத்தோ², ஸஹிதாஸஹிதஸ்ஸ பரிச்சி²ந்த³னேதி வா. த்³வேயேவாதி து³தியசதுத்தா²யேவ. தே³ஸகஸாவகஸம்பத்தியா போ³தே⁴தும் ஸமத்த²தாய ஸபா⁴வத⁴ம்மகதி²கா, ஸச்சத⁴ம்மகதி²காதி அத்தோ².

157. குஸலத⁴ம்மேஹி சித்தஸ்ஸ வாஸனாபா⁴வனா வாஸது⁴ரம். அயம் பாபபுக்³க³லோதி சதுத்தோ² வுத்தோ, ந பட²மோ. பட²மோ ஹி அவிஸம்வாதே³துகாமோ வேரஞ்ஜப்³ராஹ்மணஸதி³ஸோ அதி⁴ப்பேதோதி.

159. புக்³க³லேபி அரியானம் அபி⁴க்கமனாதி³ஸதி³ஸதாதி புக்³க³லே அபி⁴க்கமனாதீ³னம் அரியானம் அபி⁴க்கமனாதி³ஸதி³ஸதாதி அத்தோ², அரியானம் அபி⁴க்கமனாதி³னா புக்³க³லஸ்ஸ ஸதி³ஸதாதி வா ஸதி³ஸாபி⁴க்கமனாதி³தாதி அத்தோ².

166. து³ஸ்ஸீலம் ‘‘து³ஸ்ஸீலோ’’தி வத³ந்தோ பூ⁴தம் பா⁴ஸதி நாம. பாணாதிபாதேன து³ஸ்ஸீலம் அதி³ன்னாதா³னேன து³ஸ்ஸீலோதி அவத்வா பாணாதிபாதேனேவாதி வத³ந்தோ தச்ச²ம் பா⁴ஸதி நாம. யமித³ம் ‘‘காலேனா’’தி வுத்தம், தத்ர தஸ்மிம் வசனே, யோ ‘‘காலேன ப⁴ணதீ’’தி வுத்தோ, ஸோ கீதி³ஸோதி த³ஸ்ஸனத்த²ம் ‘‘காலஞ்ஞூ ஹோதீ’’திஆதி³ வுத்தந்தி த³ஸ்ஸேந்தோ ‘‘யமித³ம் காலேனாதி வுத்தம், தத்ர யோ புக்³க³லோ’’திஆதி³மாஹ.

168. ஆக³மனவிபத்தி நாம கம்மம், புப்³பு³ப்பன்னபச்சயவிபத்தி ஸுக்கஸோணிதம். பவத்தே, பவத்தஸ்ஸ வா பச்சயா பவத்தபச்சயா, ஆஹாராத³யோ. ஜோதேதீதி ஜோதி, ஆலோகோ. குலஸம்பத்தியாதீ³ஹி ஜோதமானோ ச ஜோதி வியாதி ஜோதி.

173. பஹீனாவஸிட்ட²கிலேஸபச்சவேக்க²ணாபி யேஹி கிலேஸேஹி விமுத்தோ அவிமுத்தோ ச, தேஸம் த³ஸ்ஸனவஸேன விமுத்தித³ஸ்ஸனமேவ ஹோதீதி ஆஹ ‘‘விமுத்திஞாணத³ஸ்ஸனம் ஏகூனவீஸதிவித⁴ம் பச்சவேக்க²ணஞாண’’ந்தி.

174. யானி கானிசி தந்தாவுதானந்தி தந்தாவுதானம் வத்தா²னம் யானி கானிசி வத்தா²னீதி வுத்தம் ஹோதி. ஸாயம் ததியம் அஸ்ஸாதி ஸாயததியோ. அனுயுஞ்ஜனம் அனுயோகோ³. தம் அனுயுத்தோதி உபயோக³வசனம் த³ட்ட²ப்³ப³ம், பா⁴வனபும்ஸகம் வா.

178. தத்த² ஸிக்க²னபா⁴வேனாதி ஸிக்கா²ய ஸாஜீவே ச ஸிக்க²னபா⁴வேன. ஸிக்க²ம் பரிபூரேந்தோதி ஸீலஸம்வரம் பரிபூரேந்தோ. ஸாஜீவஞ்ச அவீதிக்கமந்தோதி ‘‘நாமகாயோ பத³காயோ நிருத்திகாயோ ப்³யஞ்ஜனகாயோ’’தி வுத்தம் ஸிக்கா²பத³ம் ப⁴க³வதோ வசனம் அவீதிக்கமந்தோ ஹுத்வாதி அத்தோ². இத³மேவ ச த்³வயம் ‘‘ஸிக்க²ன’’ந்தி வுத்தம். தத்த² ஸாஜீவானதிக்கமோ ஸிக்கா²பாரிபூரியா பச்சயோ. ததோ ஹி யாவ மக்³கா³ ஸம்வரபாரிபூரீ ஹோதீதி. வினாஸனபா⁴வதோதி ஹிம்ஸனபா⁴வதோ. ஹலித்³தி³ராகோ³ விய ந தி²ரகதோ² ஹோதீதி ஏத்த² கதா²ய அட்டி²தபா⁴வேன ஹலித்³தி³ராக³ஸதி³ஸதா வேதி³தப்³பா³, ந புக்³க³லஸ்ஸ.

179. தா³ருமாஸகோதி யே வோஹாரம் க³ச்ச²ந்தீதி இதி-ஸத்³தே³ன ஏவம்பகாரே த³ஸ்ஸேதி. அஞ்ஞம் த³ஸ்ஸேத்வா அஞ்ஞஸ்ஸ பரிவத்தனந்தி த³ஸக்³க⁴னகம் வத்த²யுக³ம் த³ஸ்ஸேத்வா தஸ்ஸ அஜானந்தஸ்ஸ பஞ்சக்³க⁴னகஸ்ஸ தா³னம்.

181. அவிகிண்ணஸுக²ந்தி ரூபாதீ³ஸு ஸுபா⁴தி³பரிகப்பனவஸேன அவிஸடஸுக²ம்.

187. க²ந்த⁴த⁴ம்மேஸு அனிச்சாதி³வஸேன பவத்தா விபஸ்ஸனா மக்³க³ப²லலாபே⁴ன படிலத்³தா⁴ நாம ஹோதி தத³லாபே⁴ன அனவட்டா²னதோதி மக்³க³ப²லலாபீ⁴ ஏவ ‘‘அதி⁴பஞ்ஞாத⁴ம்மவிபஸ்ஸனாலாபீ⁴’’தி வுத்தோ, மக்³க³ப²லஞாணமேவ ச அதி⁴கபஞ்ஞாபா⁴வதோ சதுஸச்சத⁴ம்மே ஸப்³ப³த⁴ம்மஸ்ஸ வரே நிப்³பா³னே ஏவ வா விஸிட்ட²த³ஸ்ஸனபா⁴வதோ ச அதி⁴பஞ்ஞாத⁴ம்மவிபஸ்ஸனாதி த³ட்ட²ப்³பா³.

189. ஸுதேன அனுபபன்னோதி யதா²ஸுதேன வா அத்தே²ன வா ந ஸமன்னாக³தோதி அத்தோ².

சதுக்கனித்³தே³ஸவண்ணனா நிட்டி²தா.