1. மாதிகாவண்ணனா

1. த⁴ம்மஸங்க³ஹே திகது³கவஸேன ஸங்க³ஹிதானம் த⁴ம்மானம் விப⁴ங்கே³ க²ந்தா⁴தி³விபா⁴க³ம் த³ஸ்ஸேத்வா ததா²ஸங்க³ஹிதவிப⁴த்தானம் தா⁴துகதா²ய ஸங்க³ஹாஸங்க³ஹாதி³ப்பபே⁴த³ம் வத்வா யாய பஞ்ஞத்தியா தேஸம் ஸபா⁴வதோ உபாதா³ய ச பஞ்ஞாபனம் ஹோதி, தம் பபே⁴த³தோ த³ஸ்ஸேதும் ‘‘ச² பஞ்ஞத்தியோ’’திஆதி³னா புக்³க³லபஞ்ஞத்தி ஆரத்³தா⁴. தத்த² யே த⁴ம்மே புப்³பா³பரியபா⁴வேன பவத்தமானே அஸபா⁴வஸமூஹவஸேன உபாதா³ய ‘‘புக்³க³லோ, இத்தீ², புரிஸோ, தே³வோ, மனுஸ்ஸோ’’திஆதி³கா புக்³க³லபஞ்ஞத்தி ஹோதி, தேஸம் அஞ்ஞேஸஞ்ச பா³ஹிரரூபனிப்³பா³னானம் ஸஸபா⁴வஸமூஹஸஸபா⁴வபே⁴த³வஸேன பஞ்ஞாபனா ஸபா⁴வபஞ்ஞத்தீதி க²ந்த⁴பஞ்ஞத்திஆதி³கா பஞ்சவிதா⁴ வேதி³தப்³பா³. தாய த⁴ம்மஸங்க³ஹாதீ³ஸு விப⁴த்தா ஸபா⁴வபஞ்ஞத்தி ஸப்³பா³பி ஸங்க³ஹிதா ஹோதி. புக்³க³லபஞ்ஞத்தி பன அஸபா⁴வபஞ்ஞத்தி. தாய ச ஸமயவிமுத்தாதி³ப்பபே⁴தா³ய ஸத்தஸந்தானக³தே பரிஞ்ஞேய்யாதி³ஸபா⁴வத⁴ம்மே உபாதா³ய பவத்திதோ பதா⁴னாய ‘‘விஹாரோ மஞ்சோ’’திஆதி³கா ச ஸப்³பா³ அஸபா⁴வபஞ்ஞத்தி ஸங்க³ஹிதா ஹோதி.

ஏத்தாவதா ச பஞ்ஞத்தி நாம விஜ்ஜமானபஞ்ஞத்தி அவிஜ்ஜமானபஞ்ஞத்தி ச. தா ஏவ ஹி வோமிஸ்ஸா இதரா சதஸ்ஸோதி. தஸ்மா தாஸம் த³ஸ்ஸனேன இமஸ்மிம் பகரணே ஸப்³பா³ பஞ்ஞத்தியோ த³ஸ்ஸிதாதி வேதி³தப்³பா³. க²ந்தா⁴தி³பஞ்ஞத்தீஸு பன ச²ஸு அஞ்ஞத்த² அத³ஸ்ஸிதப்பபே⁴த³ம் இதே⁴வ ச த³ஸ்ஸிதப்பபே⁴த³ம் புக்³க³லபஞ்ஞத்திம் உபாதா³ய இமஸ்ஸ பகரணஸ்ஸ புக்³க³லபஞ்ஞத்தீதி நாமம் வுத்தந்தி வேதி³தப்³ப³ம். யே த⁴ம்மே இத⁴ பஞ்ஞபேதுகாமோதி பஞ்ஞத்தியா வத்து²பா⁴வேன த³ஸ்ஸேதுகாமோதி அதி⁴ப்பாயோ. ந ஹி ஏதஸ்மிம் பகரணே பஞ்ஞாபனம் கரோதி, வத்தூ²ஹி பன பஞ்ஞத்தியோ த³ஸ்ஸேதீதி.

க²ந்தா⁴தி பஞ்ஞாபனாதி இத³ம் க²ந்தா⁴தி ரூபம் பத²வீதிஆதி³கா ஸப்³பா³பி ஸாமஞ்ஞப்பபே⁴த³பஞ்ஞாபனா நாம ஹோதி, தம் ஸந்தா⁴ய வுத்தந்தி த³ட்ட²ப்³ப³ம். பஞ்ஞாபனாதி ஏதஸ்ஸ பன த³ஸ்ஸனா ட²பனாதி ஏதே த்³வே அத்தா², தேஸம் பகாஸனா நிக்கி²பனாதி. தத்த² ‘‘ரூபக்க²ந்தோ⁴…பே… அஞ்ஞாதாவிந்த்³ரியம் ஸமயவிமுத்தோ’’திஆதி³னா இத³மேவம்னாமகம் இத³மேவம்னாமகந்தி தம்தம்கோட்டா²ஸிககரணம் போ³த⁴னமேவ நிக்கி²பனா, ந பஞ்ஞபேதப்³பா³னம் மஞ்சாதீ³னம் விய டா²னஸம்ப³ந்த⁴கரணம். யோ பனாயம் ‘‘நாமபஞ்ஞத்தி ஹி த³ஸ்ஸேதி ச ட²பேதி சா’’தி கத்துனித்³தே³ஸோ கதோ, ஸோ பா⁴வபூ⁴தாய கரணபூ⁴தாய வா நாமபஞ்ஞத்தியா தேஸம் தேஸம் த⁴ம்மானம் தி³ட்ட²தாய ட²பிததாய ச தம்னிமித்ததம் ஸந்தா⁴ய கதோதி வேதி³தப்³போ³.

விஜ்ஜமானபஞ்ஞத்தீதிஆதி³னா வசனேன பாளியம் அனாக³ததம் ஸந்தா⁴ய ‘‘பாளிமுத்தகேனா’’திஆதி³மாஹ. குஸலாகுஸலஸ்ஸேவாதி குஸலாகுஸலஸ்ஸ விய. விஜ்ஜமானஸ்ஸாதி ஏதஸ்ஸ அத்தோ² ஸதோதி, தஸ்ஸ அத்தோ² ஸம்பூ⁴தஸ்ஸாதி. விஜ்ஜமானஸ்ஸ ஸதோதி வா விஜ்ஜமானபூ⁴தஸ்ஸாதி அத்தோ². தமேவத்த²ம் த³ஸ்ஸேந்தோ ஆஹ ‘‘ஸம்பூ⁴தஸ்ஸா’’தி. தேன அவிஜ்ஜமானபா⁴வம் படிக்கி²பதி. ததா² அவிஜ்ஜமானஸ்ஸாதி யதா² குஸலாதீ³னி அகுஸலாதி³ஸபா⁴வதோ, ப²ஸ்ஸாத³யோ ச வேத³னாதி³ஸபா⁴வதோ வினிவத்தஸபா⁴வானி விஜ்ஜந்தி, ததா² அவிஜ்ஜமானஸ்ஸ யே த⁴ம்மே உபாதா³ய ‘‘இத்தீ², புரிஸோ’’தி உபலத்³தி⁴ ஹோதி, தே அபனேத்வா தேஹி வினிவத்தஸ்ஸ இத்தி²ஆதி³ஸபா⁴வஸ்ஸ அபா⁴வதோ அஸம்பூ⁴தஸ்ஸாதி அத்தோ². யம் பனேதஸ்ஸ ‘‘தேனாகாரேன அவிஜ்ஜமானஸ்ஸ அஞ்ஞேனாகாரேன விஜ்ஜமானஸ்ஸா’’தி அத்த²ம் கேசி வத³ந்தி, தத்த² யம் வத்தப்³ப³ம், தம் பஞ்ஞத்திது³கே வுத்தமேவ. அவிஜ்ஜமானேபி ஸபா⁴வே லோகனிருத்திம் அனுக³ந்த்வா அனபி⁴னிவேஸேன சித்தேன ‘‘இத்தீ², புரிஸோ’’தி க³ஹணஸப்³பா⁴வா ‘‘லோகனிருத்திமத்தஸித்³த⁴ஸ்ஸா’’தி ஆஹ. ஸாபி⁴னிவேஸேன பன சித்தேன க³ய்ஹமானம் பஞ்சமஸச்சாதி³கம் ந ஸபா⁴வதோ, நாபி ஸங்கேதேன ஸித்³த⁴ந்தி ‘‘ஸப்³பா³காரேனபி அனுபலப்³ப⁴னேய்ய’’ந்தி வுத்தம். தாஸு இமஸ்மிம்…பே… லப்³ப⁴ந்தீதி இமஸ்மிம் பகரணே ஸரூபதோ திஸ்ஸன்னம் ஆக³ததம் ஸந்தா⁴ய வுத்தம்.

யதா²வுத்தஸ்ஸ பன அட்ட²கதா²னயஸ்ஸ அவிரோதே⁴ன ஆசரியவாதா³ யோஜேதப்³பா³, தஸ்மா பஞ்ஞபேதப்³ப³ட்டே²ன சேஸா பஞ்ஞத்தீதி ஏதஸ்ஸ ஸபா⁴வதோ அவிஜ்ஜமானத்தா பஞ்ஞபேதப்³ப³மத்தட்டே²ன பஞ்ஞத்தீதி அத்தோ². பஞ்ஞபேதப்³ப³ம்பி ஹி ஸஸபா⁴வம் தஜ்ஜபரமத்த²னாமலாப⁴தோ ந பரதோ லபி⁴தப்³ப³ம் பஞ்ஞத்தினாமம் லப⁴தி, நிஸபா⁴வம் பன ஸபா⁴வாபா⁴வதோ ந அத்தனோ ஸபா⁴வேன நாமம் லப⁴தீதி. ஸத்தோதிஆதி³கேன நாமேன பஞ்ஞபிதப்³ப³மத்தட்டே²ன பஞ்ஞத்தீதி நாமம் லப⁴தி, நிஸபா⁴வா ச ஸத்தாத³யோ. ந ஹி ஸஸபா⁴வஸ்ஸ ரூபாதீ³ஹி ஏகத்தேன அஞ்ஞத்தேன வா அனுபலப்³ப⁴ஸபா⁴வதா அத்தீ²தி.

கிரீடம் மகுடம், தம் அஸ்ஸ அத்தீ²தி கிரீடீ. ஏதஸ்மிஞ்ச ஆசரியவாதே³ அனூனேன லக்க²ணேன ப⁴விதப்³ப³ந்தி ஸப்³ப³ஸமோரோதோ⁴ காதப்³போ³. து³தியம் ததியந்தி ஏவம்பகாரா ஹி உபனிதா⁴பஞ்ஞத்தி உபனிக்கி²த்தகபஞ்ஞத்தி ச ஸங்கா²தப்³ப³ப்பதா⁴னத்தா ச²பி பஞ்ஞத்தியோ ப⁴ஜதீதி யுத்தம் வத்தும், இதரா ச யதா²யோக³ம் தம் தம் பஞ்ஞத்திந்தி. து³தியம் ததியம் த்³வே தீணீதிஆதி³ பன ஸங்கா² நாம காசி நத்தீ²தி தாஸம் உபாதா³ஸந்ததிபஞ்ஞத்தீனம் அவிஜ்ஜமானபஞ்ஞத்திபா⁴வம், இதராஸஞ்ச உபனிதா⁴பஞ்ஞத்தீனம் யதா²னித³ஸ்ஸிதானம் அவிஜ்ஜமானேனஅவிஜ்ஜமானபஞ்ஞத்திபா⁴வம் மஞ்ஞமானோ ஆஹ ‘‘ஸேஸா அவிஜ்ஜமானபக்க²ஞ்சேவ அவிஜ்ஜமானேனஅவிஜ்ஜமானபக்க²ஞ்ச ப⁴ஜந்தீ’’தி. து³தியம் ததியம் த்³வே தீணீதிஆதீ³னம் உபனிதா⁴உபனிக்கி²த்தகபஞ்ஞத்தீனம் அவிஜ்ஜமானேனஅவிஜ்ஜமானபஞ்ஞத்திபா⁴வமேவ மஞ்ஞதி. யஞ்ஹி பட²மாதி³கம் அபேக்கி²த்வா யஸ்ஸ சேகாதி³கஸ்ஸ உபனிக்கி²பித்வா பஞ்ஞாபீயதி, தஞ்ச ஸங்கா²னம் கிஞ்சி நத்தீ²தி. ததா² ஸந்ததிபஞ்ஞத்தியா ச. ந ஹி அஸீதி ஆஸீதிகோ ச விஜ்ஜமானோதி.

ஏகச்சா பூ⁴மிபஞ்ஞத்தீதி காமாவசராதி³பஞ்ஞத்திம் ஸந்தா⁴யாஹ. காமாவசராதீ³ ஹி ஸபா⁴வத⁴ம்மாதி அதி⁴ப்பாயோ. காமோதி பன ஓகாஸே க³ஹிதே அவிஜ்ஜமானேனவிஜ்ஜமானபஞ்ஞத்தி ஏஸா ப⁴விதும் அரஹதி, கம்மனிப்³ப³த்தக்க²ந்தே⁴ஸு க³ஹிதேஸு விஜ்ஜமானேனவிஜ்ஜமானபஞ்ஞத்தி. யதா² பன வசனஸங்கா²தாய வசனஸமுட்டா²பகசேதனாஸங்கா²தாய வா கிரியாய பா⁴ணகோதி புக்³க³லஸ்ஸ பஞ்ஞத்தி விஜ்ஜமானேனஅவிஜ்ஜமானபஞ்ஞத்திபக்க²ம் ப⁴ஜதி, ஏவம் கிஸோ தூ²லோதி ரூபாயதனஸங்கா²தேன ஸண்டா²னேன புக்³க³லாதீ³னம் பஞ்ஞாபனா விஜ்ஜமானேனஅவிஜ்ஜமானபஞ்ஞத்தி ப⁴விதும் அரஹதி. ஸண்டா²னந்தி வா ரூபாயதனே அக்³க³ஹிதே அவிஜ்ஜமானேனஅவிஜ்ஜமானபஞ்ஞத்தி. ரூபம் ப²ஸ்ஸோதிஆதி³கா பன விஜ்ஜமானபஞ்ஞத்தி ருப்பனாதி³கிச்சவஸேன கிச்சபஞ்ஞத்தியம், பச்சத்தத⁴ம்மனாமவஸேன பச்சத்தபஞ்ஞத்தியம் வா அவரோதே⁴தப்³பா³. விஜ்ஜமானாவிஜ்ஜமானபஞ்ஞத்தீஸு ச வுத்தாஸு தாஸம் வோமிஸ்ஸதாவஸேன பவத்தா இதராபி வுத்தாயேவ ஹோந்தீதி அயம்பி ஆசரியவாதோ³ ஸப்³ப³ஸங்கா³ஹகோதி த³ட்ட²ப்³போ³.

2. ‘‘யாவதா பஞ்சக்க²ந்தா⁴’’திஆதி³கஸ்ஸ அத்த²ம் த³ஸ்ஸேந்தோ ‘‘யத்தகேன பஞ்ஞாபனேனா’’திஆதி³மாஹ. தத்த² யாவதா பஞ்சக்க²ந்தா⁴தி யாவதா ரூபக்க²ந்தோ⁴…பே… விஞ்ஞாணக்க²ந்தோ⁴தி க²ந்தா⁴னம் க²ந்த⁴பஞ்ஞத்தி, ஏத்தாவதா க²ந்தா⁴னம் க²ந்த⁴பஞ்ஞத்தி, ஏவம் பாளியோஜனம் கத்வா ஸங்கே²பப்பபே⁴த³வஸேன அயம் அத்தோ² வுத்தோதி வேதி³தப்³போ³. ‘‘யாவதா பஞ்சக்க²ந்தா⁴’’தி, ‘‘க²ந்தா⁴னம் க²ந்த⁴பஞ்ஞத்தீ’’தி ஹி இமஸ்ஸ அத்தோ² ‘‘யத்தகேன பஞ்ஞாபனேன ஸங்கே²பதோ பஞ்சக்க²ந்தா⁴தி வா’’தி ஏதேன த³ஸ்ஸிதோ, ‘‘யாவதா ரூபக்க²ந்தோ⁴’’திஆதி³கஸ்ஸ பன ‘‘பபே⁴த³தோ ரூபக்க²ந்தோ⁴’’திஆதி³கேனாதி. தத்த² ரூபக்க²ந்தோ⁴…பே… விஞ்ஞாணக்க²ந்தோ⁴தி பபே⁴த³னித³ஸ்ஸனமத்தமேதம். தேன அவுத்தோபி ஸப்³போ³ ஸங்க³ஹிதோ ஹோதீதி ‘‘தத்ராபி ரூபக்க²ந்தோ⁴ காமாவசரோ’’திஆதி³ வுத்தம். அயம் வா ஏத்த² பாளியா அத்த²யோஜனா – ‘‘யாவதா’’தி இத³ம் ஸப்³பே³ஹி பதே³ஹி யோஜேத்வா யத்தகா பஞ்சக்க²ந்தா⁴, தத்தகா க²ந்தா⁴னம் க²ந்த⁴பஞ்ஞத்தி. யத்தகோ பஞ்சன்னம் க²ந்தா⁴னம் தப்பபே⁴தா³னஞ்ச ரூபக்க²ந்தா⁴தீ³னம் பபே⁴தோ³, தத்தகோ க²ந்தா⁴னம் க²ந்த⁴பஞ்ஞத்தியா பபே⁴தோ³தி பகரணந்தரே வுத்தேன வத்து²பே⁴தே³ன க²ந்த⁴பஞ்ஞத்தியா பபே⁴த³ம் த³ஸ்ஸேதி. ஏஸ நயோ ‘‘யாவதா ஆயதனான’’ந்திஆதீ³ஸுபி.

7. ஏகதே³ஸேனேவாதி உத்³தே³ஸமத்தேனேவாதி அத்தோ².

மாதிகாவண்ணனா நிட்டி²தா.