3. நயமுக²மாதிகாவண்ணனா

3. நயானம் பவத்தித்³வாரபூ⁴தா ஸங்க³ஹாஸங்க³ஹவியோகீ³ஸஹயோகீ³த⁴ம்மா நயமுகா²னீதி தேஸம் உத்³தே³ஸோ நயமுக²மாதிகா. சுத்³த³ஸபி ஹி ஸங்க³ஹாஸங்க³ஹஸம்பயோக³விப்பயோகா³னம் வோமிஸ்ஸகதாவஸேன பவத்தாதி யேஹி தே சத்தாரோபி ஹோந்தி, தே த⁴ம்மா சுத்³த³ஸன்னம்பி நயானம் முகா²னி ஹோந்தீதி. தத்த² ஸங்க³ஹிதேனஅஸங்க³ஹிதபதா³தீ³ஸு ஸச்சாதீ³ஹிபி யதா²ஸம்ப⁴வம் ஸங்க³ஹாஸங்க³ஹோ யதி³பி வுத்தோ, ஸோ பன ஸங்கா³ஹகபூ⁴தேஹி தேஹி வுத்தோ, ந ஸங்க³ஹபூ⁴தேஹி, ஸோபி ‘‘சக்கா²யதனேன யே த⁴ம்மா க²ந்த⁴ஸங்க³ஹேன ஸங்க³ஹிதா ஆயதனஸங்க³ஹேன அஸங்க³ஹிதா’’திஆதி³னா புச்சி²தப்³ப³விஸ்ஸஜ்ஜிதப்³ப³த⁴ம்முத்³தா⁴ரே தத்தா²பி க²ந்தா⁴தீ³ஹேவ ஸங்க³ஹேஹி நியமேத்வா வுத்தோ, தஸ்மா ‘‘தீஹி ஸங்க³ஹோ, தீஹி அஸங்க³ஹோ’’தி வுத்தம். புச்சி²தப்³ப³விஸ்ஸஜ்ஜிதப்³ப³த⁴ம்முத்³தா⁴ரேபி பன புச்சா²விஸ்ஸஜ்ஜனேஸு ச ரூபக்க²ந்தா⁴தீ³னம் அரணந்தானம் யதா²ஸம்ப⁴வம் ஸம்பயோக³விப்பயோகா³ சதூஹேவ க²ந்தே⁴ஹி ஹோந்தீதி ‘‘சதூஹி ஸம்பயோகோ³,சதூஹி விப்பயோகோ³’’தி வுத்தம்.

நனு ச விப்பயோகோ³ ரூபனிப்³பா³னேஹிபி ஹோதி, கஸ்மா ‘‘சதூஹி விப்பயோகோ³’’தி வுத்தந்தி? ரூபனிப்³பா³னேஹி ப⁴வந்தஸ்ஸபி சதூஹேவ பா⁴வதோ. ந ஹி ரூபம் ரூபேன நிப்³பா³னேன வா விப்பயுத்தம் ஹோதி, நிப்³பா³னம் வா ரூபேன, சதூஹேவ பன க²ந்தே⁴ஹி ஹோதீதி சதுன்னம் க²ந்தா⁴னம் ரூபனிப்³பா³னேஹி விப்பயோகோ³பி விப்பயுஜ்ஜமானேஹி சதூஹி க²ந்தே⁴ஹி நியமிதோ தேஹி வினா விப்பயோகா³பா⁴வதோ. ஸோ சாயம் விப்பயோகோ³ அனாரம்மணஸ்ஸ, அனாரம்மணஅனாரம்மணமிஸ்ஸகேஹி மிஸ்ஸகஸ்ஸ ச ந ஹோதி, அனாரம்மணஸ்ஸ பன மிஸ்ஸகஸ்ஸ ச ஸாரம்மணேன, ஸாரம்மணஸ்ஸ ஸாரம்மணேன அனாரம்மணேன மிஸ்ஸகேன ச ஹோதீதி வேதி³தப்³போ³.